Library·Bhāgavata Purāṇa·10·10.13
श्री-शुक उवाच साधु पृष्टं महा-भाग त्वया भागवतोत्तम यन् नूतनयसीशस्य शृण्वन्न् अपि कथां मुहुः
śrī-śuka uvāca sādhu pṛṣṭaṃ mahā-bhāga tvayā bhāgavatottama yan nūtanayasīśasya śṛṇvann api kathāṃ muhuḥ
Sanskrit only: no published translation is held for this verse.
सताम् अयं सार-भृतां निसर्गो यद्-अर्थ-वाणी-श्रुति-चेतसाम् अपि प्रति-क्षणं नव्य-वद् अच्युतस्य यत् स्त्रिया विटानाम् इव साधु वार्ता
satām ayaṃ sāra-bhṛtāṃ nisargo yad-artha-vāṇī-śruti-cetasām api prati-kṣaṇaṃ navya-vad acyutasya yat striyā viṭānām iva sādhu vārtā
Sanskrit only: no published translation is held for this verse.
शृणुष्वावहितो राजन्न् अपि गुह्यं वदामि ते ब्रूयुः स्निग्धस्य शिष्यस्य गुरवो गुह्यम् अप्य् उत
śṛṇuṣvāvahito rājann api guhyaṃ vadāmi te brūyuḥ snigdhasya śiṣyasya guravo guhyam apy uta
Sanskrit only: no published translation is held for this verse.
तथाघ-वदनान् मृत्यो रक्षित्वा वत्स-पालकान् सरित्-पुलिनम् आनीय भगवान् इदम् अब्रवीत्
tathāgha-vadanān mṛtyo rakṣitvā vatsa-pālakān sarit-pulinam ānīya bhagavān idam abravīt
Sanskrit only: no published translation is held for this verse.
अहो ऽतिरम्यं पुलिनं वयस्याः स्व-केलि-सम्पन् मृदुलाच्छ-बालुकम् स्फुटत्-सरो-गन्ध-हृतालि-पत्रिक- ध्वनि-प्रतिध्वान-लसद्-द्रुमाकुलम्
aho 'tiramyaṃ pulinaṃ vayasyāḥ sva-keli-sampan mṛdulāccha-bālukam sphuṭat-saro-gandha-hṛtāli-patrika- dhvani-pratidhvāna-lasad-drumākulam
Sanskrit only: no published translation is held for this verse.
अत्र भोक्तव्यम् अस्माभिर् दिवारूढं क्षुधार्दिताः वत्साः समीपे ऽपः पीत्वा चरन्तु शनकैस् तृणम्
atra bhoktavyam asmābhir divārūḍhaṃ kṣudhārditāḥ vatsāḥ samīpe 'paḥ pītvā carantu śanakais tṛṇam
Sanskrit only: no published translation is held for this verse.
तथेति पाययित्वार्भा वत्सान् आरुध्य शाद्वले मुक्त्वा शिक्यानि बुभुजुः समं भगवता मुदा
tatheti pāyayitvārbhā vatsān ārudhya śādvale muktvā śikyāni bubhujuḥ samaṃ bhagavatā mudā
Sanskrit only: no published translation is held for this verse.
कृष्णस्य विष्वक् पुरु-राजि-मण्डलैर् अभ्याननाः फुल्ल-दृशो व्रजार्भकाः सहोपविष्टा विपिने विरेजुश् छदा यथाम्भोरुह-कर्णिकायाः
kṛṣṇasya viṣvak puru-rāji-maṇḍalair abhyānanāḥ phulla-dṛśo vrajārbhakāḥ sahopaviṣṭā vipine virejuś chadā yathāmbhoruha-karṇikāyāḥ
Sanskrit only: no published translation is held for this verse.
केचित् पुष्पैर् दलैः केचित् पल्लवैर् अङ्कुरैः फलैः शिग्भिस् त्वग्भिर् दृषद्भिश् च बुभुजुः कृत-भाजनाः
kecit puṣpair dalaiḥ kecit pallavair aṅkuraiḥ phalaiḥ śigbhis tvagbhir dṛṣadbhiś ca bubhujuḥ kṛta-bhājanāḥ
Sanskrit only: no published translation is held for this verse.
सर्वे मिथो दर्शयन्तः स्व-स्व-भोज्य-रुचिं पृथक् हसन्तो हासयन्तश् चा- भ्यवजह्रुः सहेश्वराः
sarve mitho darśayantaḥ sva-sva-bhojya-ruciṃ pṛthak hasanto hāsayantaś cā- bhyavajahruḥ saheśvarāḥ
Sanskrit only: no published translation is held for this verse.
बिभ्रद् वेणुं जठर-पटयोः शृङ्ग-वेत्रे च कक्षे वामे पाणौ मसृण-कवलं तत्-फलान्य् अङ्गुलीषु तिष्ठन् मध्ये स्व-परिसुहृदो हासयन् नर्मभिः स्वैः स्वर्गे लोके मिषति बुभुजे यज्ञ-भुग् बाल-केलिः
bibhrad veṇuṃ jaṭhara-paṭayoḥ śṛṅga-vetre ca kakṣe vāme pāṇau masṛṇa-kavalaṃ tat-phalāny aṅgulīṣu tiṣṭhan madhye sva-parisuhṛdo hāsayan narmabhiḥ svaiḥ svarge loke miṣati bubhuje yajña-bhug bāla-keliḥ
Sanskrit only: no published translation is held for this verse.
भारतैवं वत्स-पेषु भुञ्जानेष्व् अच्युतात्मसु वत्सास् त्व् अन्तर्-वने दूरं विविशुस् तृण-लोभिताः
bhārataivaṃ vatsa-peṣu bhuñjāneṣv acyutātmasu vatsās tv antar-vane dūraṃ viviśus tṛṇa-lobhitāḥ
Sanskrit only: no published translation is held for this verse.
तान् दृष्ट्वा भय-सन्त्रस्तान् ऊचे कृष्णो ऽस्य भी-भयम् मित्राण्य् आशान् मा विरमते- हानेष्ये वत्सकान् अहम्
tān dṛṣṭvā bhaya-santrastān ūce kṛṣṇo 'sya bhī-bhayam mitrāṇy āśān mā viramate- hāneṣye vatsakān aham
Sanskrit only: no published translation is held for this verse.
इत्य् उक्त्वाद्रि-दरी-कुञ्ज- गह्वरेष्व् आत्म-वत्सकान् विचिन्वन् भगवान् कृष्णः सपाणि-कवलो ययौ
ity uktvādri-darī-kuñja- gahvareṣv ātma-vatsakān vicinvan bhagavān kṛṣṇaḥ sapāṇi-kavalo yayau
Sanskrit only: no published translation is held for this verse.
अम्भोजन्म-जनिस् तद्-अन्तर-गतो मायार्भकस्येशितुर् द्रष्टुं मञ्जु महित्वम् अन्यद् अपि तद्-वत्सान् इतो वत्सपान् नीत्वान्यत्र कुरूद्वहान्तरदधात् खे ऽवस्थितो यः पुरा दृष्ट्वाघासुर-मोक्षणं प्रभवतः प्राप्तः परं विस्मयम्
ambhojanma-janis tad-antara-gato māyārbhakasyeśitur draṣṭuṃ mañju mahitvam anyad api tad-vatsān ito vatsapān nītvānyatra kurūdvahāntaradadhāt khe 'vasthito yaḥ purā dṛṣṭvāghāsura-mokṣaṇaṃ prabhavataḥ prāptaḥ paraṃ vismayam
Sanskrit only: no published translation is held for this verse.
ततो वत्सान् अदृष्ट्वैत्य पुलिने ऽपि च वत्सपान् उभाव् अपि वने कृष्णो विचिकाय समन्ततः
tato vatsān adṛṣṭvaitya puline 'pi ca vatsapān ubhāv api vane kṛṣṇo vicikāya samantataḥ
Sanskrit only: no published translation is held for this verse.
क्वाप्य् अदृष्ट्वान्तर्-विपिने वत्सान् पालांश् च विश्व-वित् सर्वं विधि-कृतं कृष्णः सहसावजगाम ह
kvāpy adṛṣṭvāntar-vipine vatsān pālāṃś ca viśva-vit sarvaṃ vidhi-kṛtaṃ kṛṣṇaḥ sahasāvajagāma ha
Sanskrit only: no published translation is held for this verse.
ततः कृष्णो मुदं कर्तुं तन्-मातॄणां च कस्य च उभयायितम् आत्मानं चक्रे विश्व-कृद् ईश्वरः
tataḥ kṛṣṇo mudaṃ kartuṃ tan-mātṝṇāṃ ca kasya ca ubhayāyitam ātmānaṃ cakre viśva-kṛd īśvaraḥ
Sanskrit only: no published translation is held for this verse.
यावद् वत्सप-वत्सकाल्पक-वपुर् यावत् कराङ्घ्र्य्-आदिकं यावद् यष्टि-विषाण-वेणु-दल-शिग् यावद् विभूषाम्बरम् यावच् छील-गुणाभिधाकृति-वयो यावद् विहारादिकं सर्वं विष्णुमयं गिरो ऽङ्ग-वद् अजः सर्व-स्वरूपो बभौ
yāvad vatsapa-vatsakālpaka-vapur yāvat karāṅghry-ādikaṃ yāvad yaṣṭi-viṣāṇa-veṇu-dala-śig yāvad vibhūṣāmbaram yāvac chīla-guṇābhidhākṛti-vayo yāvad vihārādikaṃ sarvaṃ viṣṇumayaṃ giro 'ṅga-vad ajaḥ sarva-svarūpo babhau
Sanskrit only: no published translation is held for this verse.
स्वयम् आत्मात्म-गोवत्सान् प्रतिवार्यात्म-वत्सपैः क्रीडन्न् आत्म-विहारैश् च सर्वात्मा प्राविशद् व्रजम्
svayam ātmātma-govatsān prativāryātma-vatsapaiḥ krīḍann ātma-vihāraiś ca sarvātmā prāviśad vrajam
Sanskrit only: no published translation is held for this verse.
तत्-तद्-वत्सान् पृथङ् नीत्वा तत्-तद्-गोष्ठे निवेश्य सः तत्-तद्-आत्माभवद् राजंस् तत्-तत्-सद्म प्रविष्टवान्
tat-tad-vatsān pṛthaṅ nītvā tat-tad-goṣṭhe niveśya saḥ tat-tad-ātmābhavad rājaṃs tat-tat-sadma praviṣṭavān
Sanskrit only: no published translation is held for this verse.
तन्-मातरो वेणु-रव-त्वरोत्थिता उत्थाप्य दोर्भिः परिरभ्य निर्भरम् स्नेह-स्नुत-स्तन्य-पयः-सुधासवं मत्वा परं ब्रह्म सुतान् अपाययन्
tan-mātaro veṇu-rava-tvarotthitā utthāpya dorbhiḥ parirabhya nirbharam sneha-snuta-stanya-payaḥ-sudhāsavaṃ matvā paraṃ brahma sutān apāyayan
Sanskrit only: no published translation is held for this verse.
ततो नृपोन्मर्दन-मज्ज-लेपना- लङ्कार-रक्षा-तिलकाशनादिभिः संलालितः स्वाचरितैः प्रहर्षयन् सायं गतो याम-यमेन माधवः
tato nṛponmardana-majja-lepanā- laṅkāra-rakṣā-tilakāśanādibhiḥ saṃlālitaḥ svācaritaiḥ praharṣayan sāyaṃ gato yāma-yamena mādhavaḥ
Sanskrit only: no published translation is held for this verse.
गावस् ततो गोष्ठम् उपेत्य सत्वरं हुङ्कार-घोषैः परिहूत-सङ्गतान् स्वकान् स्वकान् वत्सतरान् अपाययन् मुहुर् लिहन्त्यः स्रवद् औधसं पयः
gāvas tato goṣṭham upetya satvaraṃ huṅkāra-ghoṣaiḥ parihūta-saṅgatān svakān svakān vatsatarān apāyayan muhur lihantyaḥ sravad audhasaṃ payaḥ
Sanskrit only: no published translation is held for this verse.
गो-गोपीनां मातृतास्मिन्न् आसीत् स्नेहर्धिकां विना पुरोवद् आस्व् अपि हरेस् तोकता मायया विना
go-gopīnāṃ mātṛtāsminn āsīt snehardhikāṃ vinā purovad āsv api hares tokatā māyayā vinā
Sanskrit only: no published translation is held for this verse.
व्रजौकसां स्व-तोकेषु स्नेह-वल्ल्य् आब्दम् अन्वहम् शनैर् निःसीम ववृधे यथा कृष्णे त्व् अपूर्ववत्
vrajaukasāṃ sva-tokeṣu sneha-vally ābdam anvaham śanair niḥsīma vavṛdhe yathā kṛṣṇe tv apūrvavat
Sanskrit only: no published translation is held for this verse.
इत्थम् आत्मात्मनात्मानं वत्स-पाल-मिषेण सः पालयन् वत्सपो वर्षं चिक्रीडे वन-गोष्ठयोः
ittham ātmātmanātmānaṃ vatsa-pāla-miṣeṇa saḥ pālayan vatsapo varṣaṃ cikrīḍe vana-goṣṭhayoḥ
Sanskrit only: no published translation is held for this verse.
एकदा चारयन् वत्सान् स-रामो वनम् आविशत् पञ्च-षासु त्रि-यामासु हायनापूरणीष्व् अजः
ekadā cārayan vatsān sa-rāmo vanam āviśat pañca-ṣāsu tri-yāmāsu hāyanāpūraṇīṣv ajaḥ
Sanskrit only: no published translation is held for this verse.
ततो विदूराच् चरतो गावो वत्सान् उपव्रजम् गोवर्धनाद्रि-शिरसि चरन्त्यो ददृशुस् तृणम्
tato vidūrāc carato gāvo vatsān upavrajam govardhanādri-śirasi carantyo dadṛśus tṛṇam
Sanskrit only: no published translation is held for this verse.
दृष्ट्वाथ तत्-स्नेह-वशो ऽस्मृतात्मा स गो-व्रजो ऽत्यात्मप-दुर्ग-मार्गः द्वि-पात् ककुद्-ग्रीव उदास्य-पुच्छो ऽगाद् धुङ्कृतैर् आस्रु-पया जवेन
dṛṣṭvātha tat-sneha-vaśo 'smṛtātmā sa go-vrajo 'tyātmapa-durga-mārgaḥ dvi-pāt kakud-grīva udāsya-puccho 'gād dhuṅkṛtair āsru-payā javena
Sanskrit only: no published translation is held for this verse.
समेत्य गावो ऽधो वत्सान् वत्सवत्यो ऽप्य् अपाययन् गिलन्त्य इव चाङ्गानि लिहन्त्यः स्वौधसं पयः
sametya gāvo 'dho vatsān vatsavatyo 'py apāyayan gilantya iva cāṅgāni lihantyaḥ svaudhasaṃ payaḥ
Sanskrit only: no published translation is held for this verse.
गोपास् तद्-रोधनायास- मौघ्य-लज्जोरु-मन्युना दुर्गाध्व-कृच्छ्रतो ऽभ्येत्य गो-वत्सैर् ददृशुः सुतान्
gopās tad-rodhanāyāsa- maughya-lajjoru-manyunā durgādhva-kṛcchrato 'bhyetya go-vatsair dadṛśuḥ sutān
Sanskrit only: no published translation is held for this verse.
तद्-ईक्षणोत्प्रेम-रसाप्लुताशया जातानुरागा गत-मन्यवो ऽर्भकान् उदुह्य दोर्भिः परिरभ्य मूर्धनि घ्राणैर् अवापुः परमां मुदं ते
tad-īkṣaṇotprema-rasāplutāśayā jātānurāgā gata-manyavo 'rbhakān uduhya dorbhiḥ parirabhya mūrdhani ghrāṇair avāpuḥ paramāṃ mudaṃ te
Sanskrit only: no published translation is held for this verse.
ततः प्रवयसो गोपास् तोकाश्लेष-सुनिर्वृताः कृच्छ्राच् छनैर् अपगतास् तद्-अनुस्मृत्य्-उदश्रवः
tataḥ pravayaso gopās tokāśleṣa-sunirvṛtāḥ kṛcchrāc chanair apagatās tad-anusmṛty-udaśravaḥ
Sanskrit only: no published translation is held for this verse.
व्रजस्य रामः प्रेमर्धेर् वीक्ष्यौत्कण्ठ्यम् अनुक्षणम् मुक्त-स्तनेष्व् अपत्येष्व् अप्य् अहेतु-विद् अचिन्तयत्
vrajasya rāmaḥ premardher vīkṣyautkaṇṭhyam anukṣaṇam mukta-staneṣv apatyeṣv apy ahetu-vid acintayat
Sanskrit only: no published translation is held for this verse.
किम् एतद् अद्भुतम् इव वासुदेवे ऽखिलात्मनि व्रजस्य सात्मनस् तोकेष्व् अपूर्वं प्रेम वर्धते
kim etad adbhutam iva vāsudeve 'khilātmani vrajasya sātmanas tokeṣv apūrvaṃ prema vardhate
Sanskrit only: no published translation is held for this verse.
केयं वा कुत आयाता दैवी वा नार्य् उतासुरी प्रायो मायास्तु मे भर्तुर् नान्या मे ऽपि विमोहिनी
keyaṃ vā kuta āyātā daivī vā nāry utāsurī prāyo māyāstu me bhartur nānyā me 'pi vimohinī
Sanskrit only: no published translation is held for this verse.
इति सञ्चिन्त्य दाशार्हो वत्सान् स-वयसान् अपि सर्वान् आचष्ट वैकुण्ठं चक्षुषा वयुनेन सः
iti sañcintya dāśārho vatsān sa-vayasān api sarvān ācaṣṭa vaikuṇṭhaṃ cakṣuṣā vayunena saḥ
Sanskrit only: no published translation is held for this verse.
नैते सुरेशा ऋषयो न चैते त्वम् एव भासीश भिद्-आश्रये ऽपि सर्वं पृथक् त्वं निगमात् कथं वदेत्य् उक्तेन वृत्तं प्रभुणा बलो ऽवैत्
naite sureśā ṛṣayo na caite tvam eva bhāsīśa bhid-āśraye 'pi sarvaṃ pṛthak tvaṃ nigamāt kathaṃ vadety uktena vṛttaṃ prabhuṇā balo 'vait
Sanskrit only: no published translation is held for this verse.
तावद् एत्यात्मभूर् आत्म- मानेन त्रुट्य्-अनेहसा पुरोवद् आब्दं क्रीडन्तं ददृशे स-कलं हरिम्
tāvad etyātmabhūr ātma- mānena truṭy-anehasā purovad ābdaṃ krīḍantaṃ dadṛśe sa-kalaṃ harim
Sanskrit only: no published translation is held for this verse.
यावन्तो गोकुले बालाः स-वत्साः सर्व एव हि मायाशये शयाना मे नाद्यापि पुनर् उत्थिताः
yāvanto gokule bālāḥ sa-vatsāḥ sarva eva hi māyāśaye śayānā me nādyāpi punar utthitāḥ
Sanskrit only: no published translation is held for this verse.
इत एते ऽत्र कुत्रत्या मन्-माया-मोहितेतरे तावन्त एव तत्राब्दं क्रीडन्तो विष्णुना समम्
ita ete 'tra kutratyā man-māyā-mohitetare tāvanta eva tatrābdaṃ krīḍanto viṣṇunā samam
Sanskrit only: no published translation is held for this verse.
एवम् एतेषु भेदेषु चिरं ध्यात्वा स आत्म-भूः सत्याः के कतरे नेति ज्ञातुं नेष्टे कथञ्चन
evam eteṣu bhedeṣu ciraṃ dhyātvā sa ātma-bhūḥ satyāḥ ke katare neti jñātuṃ neṣṭe kathañcana
Sanskrit only: no published translation is held for this verse.
एवं सम्मोहयन् विष्णुं विमोहं विश्व-मोहनम् स्वयैव माययाजो ऽपि स्वयम् एव विमोहितः
evaṃ sammohayan viṣṇuṃ vimohaṃ viśva-mohanam svayaiva māyayājo 'pi svayam eva vimohitaḥ
Sanskrit only: no published translation is held for this verse.
तम्यां तमोवन् नैहारं खद्योतार्चिर् इवाहनि महतीतर-मायैश्यं निहन्त्य् आत्मनि युञ्जतः
tamyāṃ tamovan naihāraṃ khadyotārcir ivāhani mahatītara-māyaiśyaṃ nihanty ātmani yuñjataḥ
Sanskrit only: no published translation is held for this verse.
तावत् सर्वे वत्स-पालाः पश्यतो ऽजस्य तत्-क्षणात् व्यदृश्यन्त घन-श्यामाः पीत-कौशेय-वाससः
tāvat sarve vatsa-pālāḥ paśyato 'jasya tat-kṣaṇāt vyadṛśyanta ghana-śyāmāḥ pīta-kauśeya-vāsasaḥ
Sanskrit only: no published translation is held for this verse.
चतुर्-भुजाः शङ्ख-चक्र- गदा-राजीव-पाणयः किरीटिनः कुण्डलिनो हारिणो वन-मालिनः
catur-bhujāḥ śaṅkha-cakra- gadā-rājīva-pāṇayaḥ kirīṭinaḥ kuṇḍalino hāriṇo vana-mālinaḥ
Sanskrit only: no published translation is held for this verse.
श्रीवत्साङ्गद-दो-रत्न- कम्बु-कङ्कण-पाणयः नूपुरैः कटकैर् भाताः कटि-सूत्राङ्गुलीयकैः
śrīvatsāṅgada-do-ratna- kambu-kaṅkaṇa-pāṇayaḥ nūpuraiḥ kaṭakair bhātāḥ kaṭi-sūtrāṅgulīyakaiḥ
Sanskrit only: no published translation is held for this verse.
आङ्घ्रि-मस्तकम् आपूर्णास् तुलसी-नव-दामभिः कोमलैः सर्व-गात्रेषु भूरि-पुण्यवद्-अर्पितैः
āṅghri-mastakam āpūrṇās tulasī-nava-dāmabhiḥ komalaiḥ sarva-gātreṣu bhūri-puṇyavad-arpitaiḥ
Sanskrit only: no published translation is held for this verse.
चन्द्रिका-विशद-स्मेरैः सारुणापाङ्ग-वीक्षितैः स्वकार्थानाम् इव रजः- सत्त्वाभ्यां स्रष्टृ-पालकाः
candrikā-viśada-smeraiḥ sāruṇāpāṅga-vīkṣitaiḥ svakārthānām iva rajaḥ- sattvābhyāṃ sraṣṭṛ-pālakāḥ
Sanskrit only: no published translation is held for this verse.
आत्मादि-स्तम्ब-पर्यन्तैर् मूर्तिमद्भिश् चराचरैः नृत्य-गीताद्य्-अनेकार्हैः पृथक् पृथग् उपासिताः
ātmādi-stamba-paryantair mūrtimadbhiś carācaraiḥ nṛtya-gītādy-anekārhaiḥ pṛthak pṛthag upāsitāḥ
Sanskrit only: no published translation is held for this verse.
अणिमाद्यैर् महिमभिर् अजाद्याभिर् विभूतिभिः चतुर्-विंशतिभिस् तत्त्वैः परीता महद्-आदिभिः
aṇimādyair mahimabhir ajādyābhir vibhūtibhiḥ catur-viṃśatibhis tattvaiḥ parītā mahad-ādibhiḥ
Sanskrit only: no published translation is held for this verse.
काल-स्वभाव-संस्कार- काम-कर्म-गुणादिभिः स्व-महि-ध्वस्त-महिभिर् मूर्तिमद्भिर् उपासिताः
kāla-svabhāva-saṃskāra- kāma-karma-guṇādibhiḥ sva-mahi-dhvasta-mahibhir mūrtimadbhir upāsitāḥ
Sanskrit only: no published translation is held for this verse.
सत्य-ज्ञानानन्तानन्द- मात्रैक-रस-मूर्तयः अस्पृष्ट-भूरि-माहात्म्या अपि ह्य् उपनिषद्-दृशाम्
satya-jñānānantānanda- mātraika-rasa-mūrtayaḥ aspṛṣṭa-bhūri-māhātmyā api hy upaniṣad-dṛśām
Sanskrit only: no published translation is held for this verse.
एवं सकृद् ददर्शाजः पर-ब्रह्मात्मनो ऽखिलान् यस्य भासा सर्वम् इदं विभाति स-चराचरम्
evaṃ sakṛd dadarśājaḥ para-brahmātmano 'khilān yasya bhāsā sarvam idaṃ vibhāti sa-carācaram
Sanskrit only: no published translation is held for this verse.
ततो ऽतिकुतुकोद्वृत्य- स्तिमितैकादशेन्द्रियः तद्-धाम्नाभूद् अजस् तूष्णीं पूर्-देव्य्-अन्तीव पुत्रिका
tato 'tikutukodvṛtya- stimitaikādaśendriyaḥ tad-dhāmnābhūd ajas tūṣṇīṃ pūr-devy-antīva putrikā
Sanskrit only: no published translation is held for this verse.
इतीरेशे ऽतर्क्ये निज-महिमनि स्व-प्रमितिके परत्राजातो ऽतन्-निरसन-मुख-ब्रह्मक-मितौ अनीशे ऽपि द्रष्टुं किम् इदम् इति वा मुह्यति सति चच्छादाजो ज्ञात्वा सपदि परमो ऽजा-जवनिकाम्
itīreśe 'tarkye nija-mahimani sva-pramitike paratrājāto 'tan-nirasana-mukha-brahmaka-mitau anīśe 'pi draṣṭuṃ kim idam iti vā muhyati sati cacchādājo jñātvā sapadi paramo 'jā-javanikām
Sanskrit only: no published translation is held for this verse.
ततो ऽर्वाक् प्रतिलब्धाक्षः कः परेतवद् उत्थितः कृच्छ्राद् उन्मील्य वै दृष्टीर् आचष्टेदं सहात्मना
tato 'rvāk pratilabdhākṣaḥ kaḥ paretavad utthitaḥ kṛcchrād unmīlya vai dṛṣṭīr ācaṣṭedaṃ sahātmanā
Sanskrit only: no published translation is held for this verse.
सपद्य् एवाभितः पश्यन् दिशो ऽपश्यत् पुरः-स्थितम् वृन्दावनं जनाजीव्य- द्रुमाकीर्णं समा-प्रियम्
sapady evābhitaḥ paśyan diśo 'paśyat puraḥ-sthitam vṛndāvanaṃ janājīvya- drumākīrṇaṃ samā-priyam
Sanskrit only: no published translation is held for this verse.
यत्र नैसर्ग-दुर्वैराः सहासन् नृ-मृगादयः मित्राणीवाजितावास- द्रुत-रुट्-तर्षकादिकम्
yatra naisarga-durvairāḥ sahāsan nṛ-mṛgādayaḥ mitrāṇīvājitāvāsa- druta-ruṭ-tarṣakādikam
Sanskrit only: no published translation is held for this verse.
तत्रोद्वहत् पशुप-वंश-शिशुत्व-नाट्यं ब्रह्माद्वयं परम् अनन्तम् अगाध-बोधम् वत्सान् सखीन् इव पुरा परितो विचिन्वद् एकं स-पाणि-कवलं परमेष्ठ्य् अचष्ट
tatrodvahat paśupa-vaṃśa-śiśutva-nāṭyaṃ brahmādvayaṃ param anantam agādha-bodham vatsān sakhīn iva purā parito vicinvad ekaṃ sa-pāṇi-kavalaṃ parameṣṭhy acaṣṭa
Sanskrit only: no published translation is held for this verse.
दृष्ट्वा त्वरेण निज-धोरणतो ऽवतीर्य पृथ्व्यां वपुः कनक-दण्डम् इवाभिपात्य स्पृष्ट्वा चतुर्-मुकुट-कोटिभिर् अङ्घ्रि-युग्मं नत्वा मुद्-अश्रु-सुजलैर् अकृताभिषेकम्
dṛṣṭvā tvareṇa nija-dhoraṇato 'vatīrya pṛthvyāṃ vapuḥ kanaka-daṇḍam ivābhipātya spṛṣṭvā catur-mukuṭa-koṭibhir aṅghri-yugmaṃ natvā mud-aśru-sujalair akṛtābhiṣekam
Sanskrit only: no published translation is held for this verse.
उत्थायोत्थाय कृष्णस्य चिरस्य पादयोः पतन् आस्ते महित्वं प्राग्-दृष्टं स्मृत्वा स्मृत्वा पुनः पुनः
utthāyotthāya kṛṣṇasya cirasya pādayoḥ patan āste mahitvaṃ prāg-dṛṣṭaṃ smṛtvā smṛtvā punaḥ punaḥ
Sanskrit only: no published translation is held for this verse.
शनैर् अथोत्थाय विमृज्य लोचने मुकुन्दम् उद्वीक्ष्य विनम्र-कन्धरः कृताञ्जलिः प्रश्रयवान् समाहितः स-वेपथुर् गद्गदयैलतेलया
śanair athotthāya vimṛjya locane mukundam udvīkṣya vinamra-kandharaḥ kṛtāñjaliḥ praśrayavān samāhitaḥ sa-vepathur gadgadayailatelayā
Sanskrit only: no published translation is held for this verse.