Bhāgavata Purāṇa 10.14

श्री-ब्रह्मोवाच नौमीड्य ते ऽभ्र-वपुषे तडिद्-अम्बराय गुञ्जावतंस-परिपिच्छ-लसन्-मुखाय वन्य-स्रजे कवल-वेत्र-विषाण-वेणु- लक्ष्म-श्रिये मृदु-पदे पशुपाङ्गजाय

śrī-brahmovāca naumīḍya te 'bhra-vapuṣe taḍid-ambarāya guñjāvataṃsa-paripiccha-lasan-mukhāya vanya-sraje kavala-vetra-viṣāṇa-veṇu- lakṣma-śriye mṛdu-pade paśupāṅgajāya

Sanskrit only: no published translation is held for this verse.

अस्यापि देव वपुषो मद्-अनुग्रहस्य स्वेच्छा-मयस्य न तु भूत-मयस्य को ऽपि नेशे महि त्व् अवसितुं मनसान्तरेण साक्षात् तवैव किम् उतात्म-सुखानुभूतेः

asyāpi deva vapuṣo mad-anugrahasya svecchā-mayasya na tu bhūta-mayasya ko 'pi neśe mahi tv avasituṃ manasāntareṇa sākṣāt tavaiva kim utātma-sukhānubhūteḥ

Sanskrit only: no published translation is held for this verse.

ज्ञाने प्रयासम् उदपास्य नमन्त एव जीवन्ति सन्-मुखरितां भवदीय-वार्ताम् स्थाने स्थिताः श्रुति-गतां तनु-वाङ्-मनोभिर् ये प्रायशो ऽजित जितो ऽप्य् असि तैस् त्रि-लोक्याम्

jñāne prayāsam udapāsya namanta eva jīvanti san-mukharitāṃ bhavadīya-vārtām sthāne sthitāḥ śruti-gatāṃ tanu-vāṅ-manobhir ye prāyaśo 'jita jito 'py asi tais tri-lokyām

Sanskrit only: no published translation is held for this verse.

श्रेयः-सृतिं भक्तिम् उदस्य ते विभो क्लिश्यन्ति ये केवल-बोध-लब्धये तेषाम् असौ क्लेशल एव शिष्यते नान्यद् यथा स्थूल-तुषावघातिनाम्

śreyaḥ-sṛtiṃ bhaktim udasya te vibho kliśyanti ye kevala-bodha-labdhaye teṣām asau kleśala eva śiṣyate nānyad yathā sthūla-tuṣāvaghātinām

Sanskrit only: no published translation is held for this verse.

पुरेह भूमन् बहवो ऽपि योगिनस् त्वद्-अर्पितेहा निज-कर्म-लब्धया विबुध्य भक्त्यैव कथोपनीतया प्रपेदिरे ऽञ्जो ऽच्युत ते गतिं पराम्

pureha bhūman bahavo 'pi yoginas tvad-arpitehā nija-karma-labdhayā vibudhya bhaktyaiva kathopanītayā prapedire 'ñjo 'cyuta te gatiṃ parām

Sanskrit only: no published translation is held for this verse.

तथापि भूमन् महिमागुणस्य ते विबोद्धुम् अर्हत्य् अमलान्तर्-आत्मभिः अविक्रियात् स्वानुभवाद् अरूपतो ह्य् अनन्य-बोध्यात्मतया न चान्यथा

tathāpi bhūman mahimāguṇasya te viboddhum arhaty amalāntar-ātmabhiḥ avikriyāt svānubhavād arūpato hy ananya-bodhyātmatayā na cānyathā

Sanskrit only: no published translation is held for this verse.

गुणात्मनस् ते ऽपि गुणान् विमातुं हितावतीऋनस्य क ईशिरे ऽस्य कालेन यैर् वा विमिताः सु-कल्पैर् भू-पांशवः खे मिहिका द्यु-भासः

guṇātmanas te 'pi guṇān vimātuṃ hitāvatīṛnasya ka īśire 'sya kālena yair vā vimitāḥ su-kalpair bhū-pāṃśavaḥ khe mihikā dyu-bhāsaḥ

Sanskrit only: no published translation is held for this verse.

तत् ते ऽनुकम्पां सु-समीक्षमाणो भुञ्जान एवात्म-कृतं विपाकम् हृद्-वाग्-वपुर्भिर् विदधन् नमस् ते जीवेत यो मुक्ति-पदे स दाय-भाक्

tat te 'nukampāṃ su-samīkṣamāṇo bhuñjāna evātma-kṛtaṃ vipākam hṛd-vāg-vapurbhir vidadhan namas te jīveta yo mukti-pade sa dāya-bhāk

Sanskrit only: no published translation is held for this verse.

पश्येश मे ऽनार्यम् अनन्त आद्ये परात्मनि त्वय्य् अपि मायि-मायिनि मायां वितत्येक्षितुम् आत्म-वैभवं ह्य् अहं कियान् ऐच्छम् इवार्चिर् अग्नौ

paśyeśa me 'nāryam ananta ādye parātmani tvayy api māyi-māyini māyāṃ vitatyekṣitum ātma-vaibhavaṃ hy ahaṃ kiyān aiccham ivārcir agnau

Sanskrit only: no published translation is held for this verse.

अतः क्षमस्वाच्युत मे रजो-भुवो ह्य् अजानतस् त्वत्-पृथग्-ईश-मानिनः अजावलेपान्ध-तमो-ऽन्ध-चक्षुष एषो ऽनुकम्प्यो मयि नाथवान् इति

ataḥ kṣamasvācyuta me rajo-bhuvo hy ajānatas tvat-pṛthag-īśa-māninaḥ ajāvalepāndha-tamo-'ndha-cakṣuṣa eṣo 'nukampyo mayi nāthavān iti

Sanskrit only: no published translation is held for this verse.

क्वाहं तमो-महद्-अहं-ख-चराग्नि-वार्-भू- संवेष्टिताण्ड-घट-सप्त-वितस्ति-कायः क्वेदृग्-विधाविगणिताण्ड-पराणु-चर्या- वाताध्व-रोम-विवरस्य च ते महित्वम्

kvāhaṃ tamo-mahad-ahaṃ-kha-carāgni-vār-bhū- saṃveṣṭitāṇḍa-ghaṭa-sapta-vitasti-kāyaḥ kvedṛg-vidhāvigaṇitāṇḍa-parāṇu-caryā- vātādhva-roma-vivarasya ca te mahitvam

Sanskrit only: no published translation is held for this verse.

उत्क्षेपणं गर्भ-गतस्य पादयोः किं कल्पते मातुर् अधोक्षजागसे किम् अस्ति-नास्ति-व्यपदेश-भूषितं तवास्ति कुक्षेः कियद् अप्य् अनन्तः

utkṣepaṇaṃ garbha-gatasya pādayoḥ kiṃ kalpate mātur adhokṣajāgase kim asti-nāsti-vyapadeśa-bhūṣitaṃ tavāsti kukṣeḥ kiyad apy anantaḥ

Sanskrit only: no published translation is held for this verse.

जगत्-त्रयान्तोदधि-सम्प्लवोदे नारायणस्योदर-नाभि-नालात् विनिर्गतो ऽजस् त्व् इति वाङ् न वै मृषा किन्त्व् ईश्वर त्वन् न विनिर्गतो ऽस्मि

jagat-trayāntodadhi-samplavode nārāyaṇasyodara-nābhi-nālāt vinirgato 'jas tv iti vāṅ na vai mṛṣā kintv īśvara tvan na vinirgato 'smi

Sanskrit only: no published translation is held for this verse.

नारायणस् त्वं न हि सर्व-देहिनाम् आत्मास्य् अधीशाखिल-लोक-साक्षी नारायणो ऽङ्गं नर-भू-जलायनात् तच् चापि सत्यं न तवैव माया

nārāyaṇas tvaṃ na hi sarva-dehinām ātmāsy adhīśākhila-loka-sākṣī nārāyaṇo 'ṅgaṃ nara-bhū-jalāyanāt tac cāpi satyaṃ na tavaiva māyā

Sanskrit only: no published translation is held for this verse.

तच् चेज् जल-स्थं तव सज् जगद्-वपुः किं मे न दृष्टं भगवंस् तदैव किं वा सु-दृष्टं हृदि मे तदैव किं नो सपद्य् एव पुनर् व्यदर्शि

tac cej jala-sthaṃ tava saj jagad-vapuḥ kiṃ me na dṛṣṭaṃ bhagavaṃs tadaiva kiṃ vā su-dṛṣṭaṃ hṛdi me tadaiva kiṃ no sapady eva punar vyadarśi

Sanskrit only: no published translation is held for this verse.

अत्रैव माया-धमनावतारे ह्य् अस्य प्रपञ्चस्य बहिः स्फुटस्य कृत्स्नस्य चान्तर् जठरे जनन्या मायात्वम् एव प्रकटी-कृतं ते

atraiva māyā-dhamanāvatāre hy asya prapañcasya bahiḥ sphuṭasya kṛtsnasya cāntar jaṭhare jananyā māyātvam eva prakaṭī-kṛtaṃ te

Sanskrit only: no published translation is held for this verse.

यस्य कुक्षाव् इदं सर्वं सात्मं भाति यथा तथा तत् त्वय्य् अपीह तत् सर्वं किम् इदं मायया विना

yasya kukṣāv idaṃ sarvaṃ sātmaṃ bhāti yathā tathā tat tvayy apīha tat sarvaṃ kim idaṃ māyayā vinā

Sanskrit only: no published translation is held for this verse.

अद्यैव त्वद् ऋते ऽस्य किं मम न ते मायात्वम् आदर्शितम् एको ऽसि प्रथमं ततो व्रज-सुहृद्-वत्साः समस्ता अपि तावन्तो ऽसि चतुर्-भुजास् तद् अखिलैः साकं मयोपासितास् तावन्त्य् एव जगन्त्य् अभूस् तद् अमितं ब्रह्माद्वयं शिष्यते

adyaiva tvad ṛte 'sya kiṃ mama na te māyātvam ādarśitam eko 'si prathamaṃ tato vraja-suhṛd-vatsāḥ samastā api tāvanto 'si catur-bhujās tad akhilaiḥ sākaṃ mayopāsitās tāvanty eva jaganty abhūs tad amitaṃ brahmādvayaṃ śiṣyate

Sanskrit only: no published translation is held for this verse.

अजानतां त्वत्-पदवीम् अनात्मन्य् आत्मात्मना भासि वितत्य मायाम् सृष्टाव् इवाहं जगतो विधान इव त्वम् एषो ऽन्त इव त्रिनेत्रः

ajānatāṃ tvat-padavīm anātmany ātmātmanā bhāsi vitatya māyām sṛṣṭāv ivāhaṃ jagato vidhāna iva tvam eṣo 'nta iva trinetraḥ

Sanskrit only: no published translation is held for this verse.

सुरेष्व् ऋषिष्व् ईश तथैव नृष्व् अपि तिर्यक्षु यादःस्व् अपि ते ऽजनस्य जन्मासतां दुर्मद-निग्रहाय प्रभो विधातः सद्-अनुग्रहाय च

sureṣv ṛṣiṣv īśa tathaiva nṛṣv api tiryakṣu yādaḥsv api te 'janasya janmāsatāṃ durmada-nigrahāya prabho vidhātaḥ sad-anugrahāya ca

Sanskrit only: no published translation is held for this verse.

को वेत्ति भूमन् भगवन् परात्मन् योगेश्वरोतीर् भवतस् त्रि-लोक्याम् क्व वा कथं वा कति वा कदेति विस्तारयन् क्रीडसि योग-मायाम्

ko vetti bhūman bhagavan parātman yogeśvarotīr bhavatas tri-lokyām kva vā kathaṃ vā kati vā kadeti vistārayan krīḍasi yoga-māyām

Sanskrit only: no published translation is held for this verse.

तस्माद् इदं जगद् अशेषम् असत्-स्वरूपं स्वप्नाभम् अस्त-धिषणं पुरु-दुःख-दुःखम् त्वय्य् एव नित्य-सुख-बोध-तनाव् अनन्ते मायात उद्यद् अपि यत् सद् इवावभाति

tasmād idaṃ jagad aśeṣam asat-svarūpaṃ svapnābham asta-dhiṣaṇaṃ puru-duḥkha-duḥkham tvayy eva nitya-sukha-bodha-tanāv anante māyāta udyad api yat sad ivāvabhāti

Sanskrit only: no published translation is held for this verse.

एकस् त्वम् आत्मा पुरुषः पुराणः सत्यः स्वयं-ज्योतिर् अनन्त आद्यः नित्यो ऽक्षरो ऽजस्र-सुखो निरञ्जनः पूर्णाद्वयो मुक्त उपाधितो ऽमृतः

ekas tvam ātmā puruṣaḥ purāṇaḥ satyaḥ svayaṃ-jyotir ananta ādyaḥ nityo 'kṣaro 'jasra-sukho nirañjanaḥ pūrṇādvayo mukta upādhito 'mṛtaḥ

Sanskrit only: no published translation is held for this verse.

एवं-विधं त्वां सकलात्मनाम् अपि स्वात्मानम् आत्मात्मतया विचक्षते गुर्व्-अर्क-लब्धोपनिषत्-सुचक्षुषा ये ते तरन्तीव भवानृताम्बुधिम्

evaṃ-vidhaṃ tvāṃ sakalātmanām api svātmānam ātmātmatayā vicakṣate gurv-arka-labdhopaniṣat-sucakṣuṣā ye te tarantīva bhavānṛtāmbudhim

Sanskrit only: no published translation is held for this verse.

आत्मानम् एवात्मतयाविजानतां तेनैव जातं निखिलं प्रपञ्चितम् ज्ञानेन भूयो ऽपि च तत् प्रलीयते रज्ज्वाम् अहेर् भोग-भवाभवौ यथा

ātmānam evātmatayāvijānatāṃ tenaiva jātaṃ nikhilaṃ prapañcitam jñānena bhūyo 'pi ca tat pralīyate rajjvām aher bhoga-bhavābhavau yathā

Sanskrit only: no published translation is held for this verse.

अज्ञान-संज्ञौ भव-बन्ध-मोक्षौ द्वौ नाम नान्यौ स्त ऋत-ज्ञ-भावात् अजस्र-चित्य् आत्मनि केवले परे विचार्यमाणे तरणाव् इवाहनी

ajñāna-saṃjñau bhava-bandha-mokṣau dvau nāma nānyau sta ṛta-jña-bhāvāt ajasra-city ātmani kevale pare vicāryamāṇe taraṇāv ivāhanī

Sanskrit only: no published translation is held for this verse.

त्वाम् आत्मानं परं मत्वा परम् आत्मानम् एव च आत्मा पुनर् बहिर् मृग्य अहो ऽज्ञ-जनताज्ञता

tvām ātmānaṃ paraṃ matvā param ātmānam eva ca ātmā punar bahir mṛgya aho 'jña-janatājñatā

Sanskrit only: no published translation is held for this verse.

अन्तर्-भवे ऽनन्त भवन्तम् एव ह्य् अतत् त्यजन्तो मृगयन्ति सन्तः असन्तम् अप्य् अन्त्य् अहिम् अन्तरेण सन्तं गुणं तं किम् उ यन्ति सन्तः

antar-bhave 'nanta bhavantam eva hy atat tyajanto mṛgayanti santaḥ asantam apy anty ahim antareṇa santaṃ guṇaṃ taṃ kim u yanti santaḥ

Sanskrit only: no published translation is held for this verse.

अथापि ते देव पदाम्बुज-द्वय- प्रसाद-लेशानुगृहीत एव हि जानाति तत्त्वं भगवन्-महिम्नो न चान्य एको ऽपि चिरं विचिन्वन्

athāpi te deva padāmbuja-dvaya- prasāda-leśānugṛhīta eva hi jānāti tattvaṃ bhagavan-mahimno na cānya eko 'pi ciraṃ vicinvan

Sanskrit only: no published translation is held for this verse.

तद् अस्तु मे नाथ स भूरि-भागो भवे ऽत्र वान्यत्र तु वा तिरश्चाम् येनाहम् एको ऽपि भवज्-जनानां भूत्वा निषेवे तव पाद-पल्लवम्

tad astu me nātha sa bhūri-bhāgo bhave 'tra vānyatra tu vā tiraścām yenāham eko 'pi bhavaj-janānāṃ bhūtvā niṣeve tava pāda-pallavam

Sanskrit only: no published translation is held for this verse.

अहो ऽति-धन्या व्रज-गो-रमण्यः स्तन्यामृतं पीतम् अतीव ते मुदा यासां विभो वत्सतरात्मजात्मना यत्-तृप्तये ऽद्यापि न चालम् अध्वराः

aho 'ti-dhanyā vraja-go-ramaṇyaḥ stanyāmṛtaṃ pītam atīva te mudā yāsāṃ vibho vatsatarātmajātmanā yat-tṛptaye 'dyāpi na cālam adhvarāḥ

Sanskrit only: no published translation is held for this verse.

अहो भाग्यम् अहो भाग्यं नन्द-गोप-व्रजौकसाम् यन्-मित्रं परमानन्दं पूर्णं ब्रह्म सनातनम्

aho bhāgyam aho bhāgyaṃ nanda-gopa-vrajaukasām yan-mitraṃ paramānandaṃ pūrṇaṃ brahma sanātanam

Sanskrit only: no published translation is held for this verse.

एषां तु भाग्य-महिमाच्युत तावद् आस्ताम् एकादशैव हि वयं बत भूरि-भागाः एतद्-धृषीक-चषकैर् असकृत् पिबामः शर्वादयो ऽङ्घ्र्य्-उदज-मध्व्-अमृतासवं ते

eṣāṃ tu bhāgya-mahimācyuta tāvad āstām ekādaśaiva hi vayaṃ bata bhūri-bhāgāḥ etad-dhṛṣīka-caṣakair asakṛt pibāmaḥ śarvādayo 'ṅghry-udaja-madhv-amṛtāsavaṃ te

Sanskrit only: no published translation is held for this verse.

तद् भूरि-भाग्यम् इह जन्म किम् अप्य् अटव्यां यद् गोकुले ऽपि कतमाङ्घ्रि-रजो-ऽभिषेकम् यज्-जीवितं तु निखिलं भगवान् मुकुन्दस् त्व् अद्यापि यत्-पद-रजः श्रुति-मृग्यम् एव

tad bhūri-bhāgyam iha janma kim apy aṭavyāṃ yad gokule 'pi katamāṅghri-rajo-'bhiṣekam yaj-jīvitaṃ tu nikhilaṃ bhagavān mukundas tv adyāpi yat-pada-rajaḥ śruti-mṛgyam eva

Sanskrit only: no published translation is held for this verse.

एषां घोष-निवासिनाम् उत भवान् किं देव रातेति नश् चेतो विश्व-फलात् फलं त्वद्-अपरं कुत्राप्य् अयन् मुह्यति सद्-वेषाद् इव पूतनापि स-कुला त्वाम् एव देवापिता यद्-धामार्थ-सुहृत्-प्रियात्म-तनय-प्राणाशयास् त्वत्-कृते

eṣāṃ ghoṣa-nivāsinām uta bhavān kiṃ deva rāteti naś ceto viśva-phalāt phalaṃ tvad-aparaṃ kutrāpy ayan muhyati sad-veṣād iva pūtanāpi sa-kulā tvām eva devāpitā yad-dhāmārtha-suhṛt-priyātma-tanaya-prāṇāśayās tvat-kṛte

Sanskrit only: no published translation is held for this verse.

तावद् रागादयः स्तेनास् तावत् कारा-गृहं गृहम् तावन् मोहो ऽङ्घ्रि-निगडो यावत् कृष्ण न ते जनाः

tāvad rāgādayaḥ stenās tāvat kārā-gṛhaṃ gṛham tāvan moho 'ṅghri-nigaḍo yāvat kṛṣṇa na te janāḥ

Sanskrit only: no published translation is held for this verse.

प्रपञ्चं निष्प्रपञ्चो ऽपि विडम्बयसि भू-तले प्रपन्न-जनतानन्द- सन्दोहं प्रथितुं प्रभो

prapañcaṃ niṣprapañco 'pi viḍambayasi bhū-tale prapanna-janatānanda- sandohaṃ prathituṃ prabho

Sanskrit only: no published translation is held for this verse.

जानन्त एव जानन्तु किं बहूक्त्या न मे प्रभो मनसो वपुषो वाचो वैभवं तव गो-चरः

jānanta eva jānantu kiṃ bahūktyā na me prabho manaso vapuṣo vāco vaibhavaṃ tava go-caraḥ

Sanskrit only: no published translation is held for this verse.

अनुजानीहि मां कृष्ण सर्वं त्वं वेत्सि सर्व-दृक् त्वम् एव जगतां नाथो जगद् एतत् तवार्पितम्

anujānīhi māṃ kṛṣṇa sarvaṃ tvaṃ vetsi sarva-dṛk tvam eva jagatāṃ nātho jagad etat tavārpitam

Sanskrit only: no published translation is held for this verse.

श्री-कृष्ण वृष्णि-कुल-पुष्कर-जोष-दायिन् क्ष्मा-निर्जर-द्विज-पशूदधि-वृद्धि-कारिन् उद्धर्म-शार्वर-हर क्षिति-राक्षस-ध्रुग् आ-कल्पम् आर्कम् अर्हन् भगवन् नमस् ते

śrī-kṛṣṇa vṛṣṇi-kula-puṣkara-joṣa-dāyin kṣmā-nirjara-dvija-paśūdadhi-vṛddhi-kārin uddharma-śārvara-hara kṣiti-rākṣasa-dhrug ā-kalpam ārkam arhan bhagavan namas te

Sanskrit only: no published translation is held for this verse.

श्री-शुक उवाच इत्य् अभिष्टूय भूमानं त्रिः परिक्रम्य पादयोः नत्वाभीष्टं जगद्-धाता स्व-धाम प्रत्यपद्यत

śrī-śuka uvāca ity abhiṣṭūya bhūmānaṃ triḥ parikramya pādayoḥ natvābhīṣṭaṃ jagad-dhātā sva-dhāma pratyapadyata

Sanskrit only: no published translation is held for this verse.

ततो ऽनुज्ञाप्य भगवान् स्व-भुवं प्राग् अवस्थितान् वत्सान् पुलिनम् आनिन्ये यथा-पूर्व-सखं स्वकम्

tato 'nujñāpya bhagavān sva-bhuvaṃ prāg avasthitān vatsān pulinam āninye yathā-pūrva-sakhaṃ svakam

Sanskrit only: no published translation is held for this verse.

एकस्मिन्न् अपि याते ऽब्दे प्राणेशं चान्तरात्मनः कृष्ण-मायाहता राजन् क्षणार्धं मेनिरे ऽर्भकाः

ekasminn api yāte 'bde prāṇeśaṃ cāntarātmanaḥ kṛṣṇa-māyāhatā rājan kṣaṇārdhaṃ menire 'rbhakāḥ

Sanskrit only: no published translation is held for this verse.

किं किं न विस्मरन्तीह माया-मोहित-चेतसः यन्-मोहितं जगत् सर्वम् अभीक्ष्णं विस्मृतात्मकम्

kiṃ kiṃ na vismarantīha māyā-mohita-cetasaḥ yan-mohitaṃ jagat sarvam abhīkṣṇaṃ vismṛtātmakam

Sanskrit only: no published translation is held for this verse.

ऊचुश् च सुहृदः कृष्णं स्व्-आगतं ते ऽति-रंहसा नैको ऽप्य् अभोजि कवल एहीतः साधु भुज्यताम्

ūcuś ca suhṛdaḥ kṛṣṇaṃ sv-āgataṃ te 'ti-raṃhasā naiko 'py abhoji kavala ehītaḥ sādhu bhujyatām

Sanskrit only: no published translation is held for this verse.

ततो हसन् हृषीकेशो ऽभ्यवहृत्य सहार्भकैः दर्शयंश् चर्माजगरं न्यवर्तत वनाद् व्रजम्

tato hasan hṛṣīkeśo 'bhyavahṛtya sahārbhakaiḥ darśayaṃś carmājagaraṃ nyavartata vanād vrajam

Sanskrit only: no published translation is held for this verse.

बर्ह-प्रसून-वन-धातु-विचित्रिताङ्गः प्रोद्दाम-वेणु-दल-शृङ्ग-रवोत्सवाढ्यः वत्सान् गृणन्न् अनुग-गीत-पवित्र-कीर्तिर् गोपी-दृग्-उत्सव-दृशिः प्रविवेश गोष्ठम्

barha-prasūna-vana-dhātu-vicitritāṅgaḥ proddāma-veṇu-dala-śṛṅga-ravotsavāḍhyaḥ vatsān gṛṇann anuga-gīta-pavitra-kīrtir gopī-dṛg-utsava-dṛśiḥ praviveśa goṣṭham

Sanskrit only: no published translation is held for this verse.

अद्यानेन महा-व्यालो यशोदा-नन्द-सूनुना हतो ऽविता वयं चास्माद् इति बाला व्रजे जगुः

adyānena mahā-vyālo yaśodā-nanda-sūnunā hato 'vitā vayaṃ cāsmād iti bālā vraje jaguḥ

Sanskrit only: no published translation is held for this verse.

श्री-राजोवाच ब्रह्मन् परोद्भवे कृष्णे इयान् प्रेमा कथं भवेत् यो ऽभूत-पूर्वस् तोकेषु स्वोद्भवेष्व् अपि कथ्यताम्

śrī-rājovāca brahman parodbhave kṛṣṇe iyān premā kathaṃ bhavet yo 'bhūta-pūrvas tokeṣu svodbhaveṣv api kathyatām

Sanskrit only: no published translation is held for this verse.

श्री-शुक उवाच सर्वेषाम् अपि भूतानां नृप स्वात्मैव वल्लभः इतरे ऽपत्य-वित्ताद्यास् तद्-वल्लभतयैव हि

śrī-śuka uvāca sarveṣām api bhūtānāṃ nṛpa svātmaiva vallabhaḥ itare 'patya-vittādyās tad-vallabhatayaiva hi

Sanskrit only: no published translation is held for this verse.

तद् राजेन्द्र यथा स्नेहः स्व-स्वकात्मनि देहिनाम् न तथा ममतालम्बि- पुत्र-वित्त-गृहादिषु

tad rājendra yathā snehaḥ sva-svakātmani dehinām na tathā mamatālambi- putra-vitta-gṛhādiṣu

Sanskrit only: no published translation is held for this verse.

देहात्म-वादिनां पुंसाम् अपि राजन्य-सत्तम यथा देहः प्रियतमस् तथा न ह्य् अनु ये च तम्

dehātma-vādināṃ puṃsām api rājanya-sattama yathā dehaḥ priyatamas tathā na hy anu ye ca tam

Sanskrit only: no published translation is held for this verse.

देहो ऽपि ममता-भाक् चेत् तर्ह्य् असौ नात्म-वत् प्रियः यज् जीर्यत्य् अपि देहे ऽस्मिन् जीविताशा बलीयसी

deho 'pi mamatā-bhāk cet tarhy asau nātma-vat priyaḥ yaj jīryaty api dehe 'smin jīvitāśā balīyasī

Sanskrit only: no published translation is held for this verse.

तस्मात् प्रियतमः स्वात्मा सर्वेषाम् अपि देहिनाम् तद्-अर्थम् एव सकलं जगद् एतच् चराचरम्

tasmāt priyatamaḥ svātmā sarveṣām api dehinām tad-artham eva sakalaṃ jagad etac carācaram

Sanskrit only: no published translation is held for this verse.

कृष्णम् एनम् अवेहि त्वम् आत्मानम् अखिलात्मनाम् जगद्-धिताय सो ऽप्य् अत्र देहीवाभाति मायया

kṛṣṇam enam avehi tvam ātmānam akhilātmanām jagad-dhitāya so 'py atra dehīvābhāti māyayā

Sanskrit only: no published translation is held for this verse.

वस्तुतो जानताम् अत्र कृष्णं स्थास्नु चरिष्णु च भगवद्-रूपम् अखिलं नान्यद् वस्त्व् इह किञ्चन

vastuto jānatām atra kṛṣṇaṃ sthāsnu cariṣṇu ca bhagavad-rūpam akhilaṃ nānyad vastv iha kiñcana

Sanskrit only: no published translation is held for this verse.

सर्वेषाम् अपि वस्तूनां भावार्थो भवति स्थितः तस्यापि भगवान् कृष्णः किम् अतद् वस्तु रूप्यताम्

sarveṣām api vastūnāṃ bhāvārtho bhavati sthitaḥ tasyāpi bhagavān kṛṣṇaḥ kim atad vastu rūpyatām

Sanskrit only: no published translation is held for this verse.

समाश्रिता ये पद-पल्लव-प्लवं महत्-पदं पुण्य-यशो मुरारेः भवाम्बुधिर् वत्स-पदं परं पदं पदं पदं यद् विपदां न तेषाम्

samāśritā ye pada-pallava-plavaṃ mahat-padaṃ puṇya-yaśo murāreḥ bhavāmbudhir vatsa-padaṃ paraṃ padaṃ padaṃ padaṃ yad vipadāṃ na teṣām

Sanskrit only: no published translation is held for this verse.

एतत् ते सर्वम् आख्यातं यत् पृष्टो ऽहम् इह त्वया तत् कौमारे हरि-कृतं पौगण्डे परिकीर्तितम्

etat te sarvam ākhyātaṃ yat pṛṣṭo 'ham iha tvayā tat kaumāre hari-kṛtaṃ paugaṇḍe parikīrtitam

Sanskrit only: no published translation is held for this verse.

एतत् सुहृद्भिश् चरितं मुरारेर् अघार्दनं शाद्वल-जेमनं च व्यक्तेतरद् रूपम् अजोर्व्-अभिष्टवं शृण्वन् गृणन्न् एति नरो ऽखिलार्थान्

etat suhṛdbhiś caritaṃ murārer aghārdanaṃ śādvala-jemanaṃ ca vyaktetarad rūpam ajorv-abhiṣṭavaṃ śṛṇvan gṛṇann eti naro 'khilārthān

Sanskrit only: no published translation is held for this verse.

एवं विहारैः कौमारैः कौमारं जहतुर् व्रजे निलायनैः सेतु-बन्धैर् मर्कटोत्प्लवनादिभिः

evaṃ vihāraiḥ kaumāraiḥ kaumāraṃ jahatur vraje nilāyanaiḥ setu-bandhair markaṭotplavanādibhiḥ

Sanskrit only: no published translation is held for this verse.