Library·Bhāgavata Purāṇa·10·10.16
श्री-शुक उवाच विलोक्य दूषितां कृष्णां कृष्णः कृष्णाहिना विभुः तस्या विशुद्धिम् अन्विच्छन् सर्पं तम् उदवासयत्
śrī-śuka uvāca vilokya dūṣitāṃ kṛṣṇāṃ kṛṣṇaḥ kṛṣṇāhinā vibhuḥ tasyā viśuddhim anvicchan sarpaṃ tam udavāsayat
Sanskrit only: no published translation is held for this verse.
श्री-राजोवाच कथम् अन्तर्-जले ऽगाधे न्यगृह्णाद् भगवान् अहिम् स वै बहु-युगावासं यथासीद् विप्र कथ्यताम्
śrī-rājovāca katham antar-jale 'gādhe nyagṛhṇād bhagavān ahim sa vai bahu-yugāvāsaṃ yathāsīd vipra kathyatām
Sanskrit only: no published translation is held for this verse.
ब्रह्मन् भगवतस् तस्य भूम्नः स्वच्छन्द-वर्तिनः गोपालोदार-चरितं कस् तृप्येतामृतं जुषन्
brahman bhagavatas tasya bhūmnaḥ svacchanda-vartinaḥ gopālodāra-caritaṃ kas tṛpyetāmṛtaṃ juṣan
Sanskrit only: no published translation is held for this verse.
श्री-शुक उवाच कालिन्द्यां कालियस्यासीद् ह्रदः कश्चिद् विषाग्निना श्रप्यमाण-पया यस्मिन् पतन्त्य् उपरि-गाः खगाः
śrī-śuka uvāca kālindyāṃ kāliyasyāsīd hradaḥ kaścid viṣāgninā śrapyamāṇa-payā yasmin patanty upari-gāḥ khagāḥ
Sanskrit only: no published translation is held for this verse.
विप्रुष्मता विषदोर्मि- मारुतेनाभिमर्शिताः म्रियन्ते तीर-गा यस्य प्राणिनः स्थिर-जङ्गमाः
vipruṣmatā viṣadormi- mārutenābhimarśitāḥ mriyante tīra-gā yasya prāṇinaḥ sthira-jaṅgamāḥ
Sanskrit only: no published translation is held for this verse.
तं चण्ड-वेग-विष-वीर्यम् अवेक्ष्य तेन दुष्टां नदीं च खल-संयमनावतारः कृष्णः कदम्बम् अधिरुह्य ततो ऽति-तुङ्गम् आस्फोट्य गाढ-रशनो न्यपतद् विषोदे
taṃ caṇḍa-vega-viṣa-vīryam avekṣya tena duṣṭāṃ nadīṃ ca khala-saṃyamanāvatāraḥ kṛṣṇaḥ kadambam adhiruhya tato 'ti-tuṅgam āsphoṭya gāḍha-raśano nyapatad viṣode
Sanskrit only: no published translation is held for this verse.
सर्प-ह्रदः पुरुष-सार-निपात-वेग- सङ्क्षोभितोरग-विषोच्छ्वसिताम्बु-राशिः पर्यक् प्लुतो विष-कषाय-बिभीषणोर्मिर् धावन् धनुः-शतम् अनन्त-बलस्य किं तत्
sarpa-hradaḥ puruṣa-sāra-nipāta-vega- saṅkṣobhitoraga-viṣocchvasitāmbu-rāśiḥ paryak pluto viṣa-kaṣāya-bibhīṣaṇormir dhāvan dhanuḥ-śatam ananta-balasya kiṃ tat
Sanskrit only: no published translation is held for this verse.
तस्य ह्रदे विहरतो भुज-दण्ड-घूर्ण- वार्-घोषम् अङ्ग वर-वारण-विक्रमस्य आश्रुत्य तत् स्व-सदनाभिभवं निरीक्ष्य चक्षुः-श्रवाः समसरत् तद् अमृष्यमाणः
tasya hrade viharato bhuja-daṇḍa-ghūrṇa- vār-ghoṣam aṅga vara-vāraṇa-vikramasya āśrutya tat sva-sadanābhibhavaṃ nirīkṣya cakṣuḥ-śravāḥ samasarat tad amṛṣyamāṇaḥ
Sanskrit only: no published translation is held for this verse.
तं प्रेक्षणीय-सुकुमार-घनावदातं श्रीवत्स-पीत-वसनं स्मित-सुन्दरास्यम् क्रीडन्तम् अप्रतिभयं कमलोदराङ्घ्रिं सन्दश्य मर्मसु रुषा भुजया चछाद
taṃ prekṣaṇīya-sukumāra-ghanāvadātaṃ śrīvatsa-pīta-vasanaṃ smita-sundarāsyam krīḍantam apratibhayaṃ kamalodarāṅghriṃ sandaśya marmasu ruṣā bhujayā cachāda
Sanskrit only: no published translation is held for this verse.
तं नाग-भोग-परिवीतम् अदृष्ट-चेष्टम् आलोक्य तत्-प्रिय-सखाः पशुपा भृशार्ताः कृष्णे ऽर्पितात्म-सुहृद्-अर्थ-कलत्र-कामा दुःखानुशोक-भय-मूढ-धियो निपेतुः
taṃ nāga-bhoga-parivītam adṛṣṭa-ceṣṭam ālokya tat-priya-sakhāḥ paśupā bhṛśārtāḥ kṛṣṇe 'rpitātma-suhṛd-artha-kalatra-kāmā duḥkhānuśoka-bhaya-mūḍha-dhiyo nipetuḥ
Sanskrit only: no published translation is held for this verse.
गावो वृषा वत्सतर्यः क्रन्दमानाः सु-दुःखिताः कृष्णे न्यस्तेक्षणा भीता रुदन्त्य इव तस्थिरे
gāvo vṛṣā vatsataryaḥ krandamānāḥ su-duḥkhitāḥ kṛṣṇe nyastekṣaṇā bhītā rudantya iva tasthire
Sanskrit only: no published translation is held for this verse.
अथ व्रजे महोत्पातास् त्रि-विधा ह्य् अति-दारुणाः उत्पेतुर् भुवि दिव्य् आत्मन्य् आसन्न-भय-शंसिनः
atha vraje mahotpātās tri-vidhā hy ati-dāruṇāḥ utpetur bhuvi divy ātmany āsanna-bhaya-śaṃsinaḥ
Sanskrit only: no published translation is held for this verse.
तान् आलक्ष्य भयोद्विग्ना गोपा नन्द-पुरोगमाः विना रामेण गाः कृष्णं ज्ञात्वा चारयितुं गतम्
tān ālakṣya bhayodvignā gopā nanda-purogamāḥ vinā rāmeṇa gāḥ kṛṣṇaṃ jñātvā cārayituṃ gatam
Sanskrit only: no published translation is held for this verse.
तैर् दुर्निमित्तैर् निधनं मत्वा प्राप्तम् अतद्-विदः तत्-प्राणास् तन्-मनस्कास् ते दुःख-शोक-भयातुराः
tair durnimittair nidhanaṃ matvā prāptam atad-vidaḥ tat-prāṇās tan-manaskās te duḥkha-śoka-bhayāturāḥ
Sanskrit only: no published translation is held for this verse.
आ-बाल-वृद्ध-वनिताः सर्वे ऽङ्ग पशु-वृत्तयः निर्जग्मुर् गोकुलाद् दीनाः कृष्ण-दर्शन-लालसाः
ā-bāla-vṛddha-vanitāḥ sarve 'ṅga paśu-vṛttayaḥ nirjagmur gokulād dīnāḥ kṛṣṇa-darśana-lālasāḥ
Sanskrit only: no published translation is held for this verse.
तांस् तथा कातरान् वीक्ष्य भगवान् माधवो बलः प्रहस्य किञ्चिन् नोवाच प्रभाव-ज्ञो ऽनुजस्य सः
tāṃs tathā kātarān vīkṣya bhagavān mādhavo balaḥ prahasya kiñcin novāca prabhāva-jño 'nujasya saḥ
Sanskrit only: no published translation is held for this verse.
ते ऽन्वेषमाणा दयितं कृष्णं सूचितया पदैः भगवल्-लक्षणैर् जग्मुः पदव्या यमुना-तटम्
te 'nveṣamāṇā dayitaṃ kṛṣṇaṃ sūcitayā padaiḥ bhagaval-lakṣaṇair jagmuḥ padavyā yamunā-taṭam
Sanskrit only: no published translation is held for this verse.
ते तत्र तत्राब्ज-यवाङ्कुशाशनि- ध्वजोपपन्नानि पदानि विश्-पतेः मार्गे गवाम् अन्य-पदान्तरान्तरे निरीक्षमाणा ययुर् अङ्ग सत्वराः
te tatra tatrābja-yavāṅkuśāśani- dhvajopapannāni padāni viś-pateḥ mārge gavām anya-padāntarāntare nirīkṣamāṇā yayur aṅga satvarāḥ
Sanskrit only: no published translation is held for this verse.
अन्तर् ह्रदे भुजग-भोग-परीतम् आरात् कृष्णं निरीहम् उपलभ्य जलाशयान्ते गोपांश् च मूढ-धिषणान् परितः पशूंश् च सङ्क्रन्दतः परम-कश्मलम् आपुर् आर्ताः
antar hrade bhujaga-bhoga-parītam ārāt kṛṣṇaṃ nirīham upalabhya jalāśayānte gopāṃś ca mūḍha-dhiṣaṇān paritaḥ paśūṃś ca saṅkrandataḥ parama-kaśmalam āpur ārtāḥ
Sanskrit only: no published translation is held for this verse.
गोप्यो ऽनुरक्त-मनसो भगवत्य् अनन्ते तत्-सौहृद-स्मित-विलोक-गिरः स्मरन्त्यः ग्रस्ते ऽहिना प्रियतमे भृश-दुःख-तप्ताः शून्यं प्रिय-व्यतिहृतं ददृशुस् त्रि-लोकम्
gopyo 'nurakta-manaso bhagavaty anante tat-sauhṛda-smita-viloka-giraḥ smarantyaḥ graste 'hinā priyatame bhṛśa-duḥkha-taptāḥ śūnyaṃ priya-vyatihṛtaṃ dadṛśus tri-lokam
Sanskrit only: no published translation is held for this verse.
ताः कृष्ण-मातरम् अपत्यम् अनुप्रविष्टां तुल्य-व्यथाः समनुगृह्य शुचः स्रवन्त्यः तास् ता व्रज-प्रिय-कथाः कथयन्त्य आसन् कृष्णानने ऽर्पित-दृशो मृतक-प्रतीकाः
tāḥ kṛṣṇa-mātaram apatyam anupraviṣṭāṃ tulya-vyathāḥ samanugṛhya śucaḥ sravantyaḥ tās tā vraja-priya-kathāḥ kathayantya āsan kṛṣṇānane 'rpita-dṛśo mṛtaka-pratīkāḥ
Sanskrit only: no published translation is held for this verse.
कृष्ण-प्राणान् निर्विशतो नन्दादीन् वीक्ष्य तं ह्रदम् प्रत्यषेधत् स भगवान् रामः कृष्णानुभाव-वित्
kṛṣṇa-prāṇān nirviśato nandādīn vīkṣya taṃ hradam pratyaṣedhat sa bhagavān rāmaḥ kṛṣṇānubhāva-vit
Sanskrit only: no published translation is held for this verse.
इत्थम् स्व-गोकुलम् अनन्य-गतिं निरीक्ष्य स-स्त्री-कुमारम् अति-दुःखितम् आत्म-हेतोः आज्ञाय मर्त्य-पदवीम् अनुवर्तमानः स्थित्वा मुहूर्तम् उदतिष्ठद् उरङ्ग-बन्धात्
ittham sva-gokulam ananya-gatiṃ nirīkṣya sa-strī-kumāram ati-duḥkhitam ātma-hetoḥ ājñāya martya-padavīm anuvartamānaḥ sthitvā muhūrtam udatiṣṭhad uraṅga-bandhāt
Sanskrit only: no published translation is held for this verse.
तत्-प्रथ्यमान-वपुषा व्यथितात्म-भोगस् त्यक्त्वोन्नमय्य कुपितः स्व-फणान् भुजङ्गः तस्थौ श्वसञ् छ्वसन-रन्ध्र-विषाम्बरीष- स्तब्धेक्षणोल्मुक-मुखो हरिम् ईक्षमाणः
tat-prathyamāna-vapuṣā vyathitātma-bhogas tyaktvonnamayya kupitaḥ sva-phaṇān bhujaṅgaḥ tasthau śvasañ chvasana-randhra-viṣāmbarīṣa- stabdhekṣaṇolmuka-mukho harim īkṣamāṇaḥ
Sanskrit only: no published translation is held for this verse.
तं जिह्वया द्वि-शिखया परिलेलिहानं द्वे सृक्वणी ह्य् अति-कराल-विषाग्नि-दृष्टिम् क्रीडन्न् अमुं परिससार यथा खगेन्द्रो बभ्राम सो ऽप्य् अवसरं प्रसमीक्षमाणः
taṃ jihvayā dvi-śikhayā parilelihānaṃ dve sṛkvaṇī hy ati-karāla-viṣāgni-dṛṣṭim krīḍann amuṃ parisasāra yathā khagendro babhrāma so 'py avasaraṃ prasamīkṣamāṇaḥ
Sanskrit only: no published translation is held for this verse.
एवं परिभ्रम-हतौजसम् उन्नतांसम् आनम्य तत्-पृथु-शिरःस्व् अधिरूढ आद्यः तन्-मूर्ध-रत्न-निकर-स्पर्शाति-ताम्र- पादाम्बुजो ऽखिल-कलादि-गुरुर् ननर्त
evaṃ paribhrama-hataujasam unnatāṃsam ānamya tat-pṛthu-śiraḥsv adhirūḍha ādyaḥ tan-mūrdha-ratna-nikara-sparśāti-tāmra- pādāmbujo 'khila-kalādi-gurur nanarta
Sanskrit only: no published translation is held for this verse.
तं नर्तुम् उद्यतम् अवेक्ष्य तदा तदीय- गन्धर्व-सिद्ध-मुनि-चारण-देव-वध्वः प्रीत्या मृदङ्ग-पणवानक-वाद्य-गीत- पुष्पोपहार-नुतिभिः सहसोपसेदुः
taṃ nartum udyatam avekṣya tadā tadīya- gandharva-siddha-muni-cāraṇa-deva-vadhvaḥ prītyā mṛdaṅga-paṇavānaka-vādya-gīta- puṣpopahāra-nutibhiḥ sahasopaseduḥ
Sanskrit only: no published translation is held for this verse.
यद् यच् छिरो न नमते ऽङ्ग शतैक-शीर्ष्णस् तत् तन् ममर्द खर-दण्ड-धरो ऽङ्घ्रि-पातैः क्षीणायुषो भ्रमत उल्बणम् आस्यतो ऽसृङ् नस्तो वमन् परम-कश्मलम् आप नागः
yad yac chiro na namate 'ṅga śataika-śīrṣṇas tat tan mamarda khara-daṇḍa-dharo 'ṅghri-pātaiḥ kṣīṇāyuṣo bhramata ulbaṇam āsyato 'sṛṅ nasto vaman parama-kaśmalam āpa nāgaḥ
Sanskrit only: no published translation is held for this verse.
तस्याक्षिभिर् गरलम् उद्वमतः शिरःसु यद् यत् समुन्नमति निःश्वसतो रुषोच्चैः नृत्यन् पदानुनमयन् दमयां बभूव पुष्पैः प्रपूजित इवेह पुमान् पुराणः
tasyākṣibhir garalam udvamataḥ śiraḥsu yad yat samunnamati niḥśvasato ruṣoccaiḥ nṛtyan padānunamayan damayāṃ babhūva puṣpaiḥ prapūjita iveha pumān purāṇaḥ
Sanskrit only: no published translation is held for this verse.
तच्-चित्र-ताण्डव-विरुग्न-फणा-सहस्रो रक्तं मुखैर् उरु वमन् नृप भग्न-गात्रः स्मृत्वा चराचर-गुरुं पुरुषं पुराणं नारायणं तम् अरणं मनसा जगाम
tac-citra-tāṇḍava-virugna-phaṇā-sahasro raktaṃ mukhair uru vaman nṛpa bhagna-gātraḥ smṛtvā carācara-guruṃ puruṣaṃ purāṇaṃ nārāyaṇaṃ tam araṇaṃ manasā jagāma
Sanskrit only: no published translation is held for this verse.
कृष्णस्य गर्भ-जगतो ऽति-भरावसन्नं पार्ष्णि-प्रहार-परिरुग्न-फणातपत्रम् दृष्ट्वाहिम् आद्यम् उपसेदुर् अमुष्य पत्न्य आर्ताः श्लथद्-वसन-भूषण-केश-बन्धाः
kṛṣṇasya garbha-jagato 'ti-bharāvasannaṃ pārṣṇi-prahāra-parirugna-phaṇātapatram dṛṣṭvāhim ādyam upasedur amuṣya patnya ārtāḥ ślathad-vasana-bhūṣaṇa-keśa-bandhāḥ
Sanskrit only: no published translation is held for this verse.
तास् तं सु-विग्न-मनसो ऽथ पुरस्कृतार्भाः कायं निधाय भुवि भूत-पतिं प्रणेमुः साध्व्यः कृताञ्जलि-पुटाः शमलस्य भर्तुर् मोक्षेप्सवः शरण-दं शरणं प्रपन्नाः
tās taṃ su-vigna-manaso 'tha puraskṛtārbhāḥ kāyaṃ nidhāya bhuvi bhūta-patiṃ praṇemuḥ sādhvyaḥ kṛtāñjali-puṭāḥ śamalasya bhartur mokṣepsavaḥ śaraṇa-daṃ śaraṇaṃ prapannāḥ
Sanskrit only: no published translation is held for this verse.
नाग-पत्न्य ऊचुः न्याय्यो हि दण्डः कृत-किल्बिषे ऽस्मिंस् तवावतारः खल-निग्रहाय रिपोः सुतानाम् अपि तुल्य-दृष्टिर् धत्से दमं फलम् एवानुशंसन्
nāga-patnya ūcuḥ nyāyyo hi daṇḍaḥ kṛta-kilbiṣe 'smiṃs tavāvatāraḥ khala-nigrahāya ripoḥ sutānām api tulya-dṛṣṭir dhatse damaṃ phalam evānuśaṃsan
Sanskrit only: no published translation is held for this verse.
अनुग्रहो ऽयं भवतः कृतो हि नो दण्डो ऽसतां ते खलु कल्मषापहः यद् दन्दशूकत्वम् अमुष्य देहिनः क्रोधो ऽपि ते ऽनुग्रह एव सम्मतः
anugraho 'yaṃ bhavataḥ kṛto hi no daṇḍo 'satāṃ te khalu kalmaṣāpahaḥ yad dandaśūkatvam amuṣya dehinaḥ krodho 'pi te 'nugraha eva sammataḥ
Sanskrit only: no published translation is held for this verse.
तपः सुतप्तं किम् अनेन पूर्वं निरस्त-मानेन च मान-देन धर्मो ऽथ वा सर्व-जनानुकम्पया यतो भवांस् तुष्यति सर्व-जीवः
tapaḥ sutaptaṃ kim anena pūrvaṃ nirasta-mānena ca māna-dena dharmo 'tha vā sarva-janānukampayā yato bhavāṃs tuṣyati sarva-jīvaḥ
Sanskrit only: no published translation is held for this verse.
कस्यानुभावो ऽस्य न देव विद्महे तवाङ्घ्रि-रेणु-स्परशाधिकारः यद्-वाञ्छया श्रीर् ललनाचरत् तपो विहाय कामान् सु-चिरं धृत-व्रता
kasyānubhāvo 'sya na deva vidmahe tavāṅghri-reṇu-sparaśādhikāraḥ yad-vāñchayā śrīr lalanācarat tapo vihāya kāmān su-ciraṃ dhṛta-vratā
Sanskrit only: no published translation is held for this verse.
न नाक-पृष्ठं न च सार्व-भौमं न पारमेष्ठ्यं न रसाधिपत्यम् न योग-सिद्धीर् अपुनर्-भवं वा वाञ्छन्ति यत्-पाद-रजः-प्रपन्नाः
na nāka-pṛṣṭhaṃ na ca sārva-bhaumaṃ na pārameṣṭhyaṃ na rasādhipatyam na yoga-siddhīr apunar-bhavaṃ vā vāñchanti yat-pāda-rajaḥ-prapannāḥ
Sanskrit only: no published translation is held for this verse.
तद् एष नाथाप दुरापम् अन्यैस् तमो-जनिः क्रोध-वशो ऽप्य् अहीशः संसार-चक्रे भ्रमतः शरीरिणो यद्-इच्छतः स्याद् विभवः समक्षः
tad eṣa nāthāpa durāpam anyais tamo-janiḥ krodha-vaśo 'py ahīśaḥ saṃsāra-cakre bhramataḥ śarīriṇo yad-icchataḥ syād vibhavaḥ samakṣaḥ
Sanskrit only: no published translation is held for this verse.
नमस् तुभ्यं भगवते पुरुषाय महात्मने भूतावासाय भूताय पराय परमात्मने
namas tubhyaṃ bhagavate puruṣāya mahātmane bhūtāvāsāya bhūtāya parāya paramātmane
Sanskrit only: no published translation is held for this verse.
ज्ञान-विज्ञान-नीधये ब्रह्मणे ऽनन्त-शक्तये अगुणायाविकाराय नमस् ते प्राकृताय च
jñāna-vijñāna-nīdhaye brahmaṇe 'nanta-śaktaye aguṇāyāvikārāya namas te prākṛtāya ca
Sanskrit only: no published translation is held for this verse.
कालाय काल-नाभाय कालावयव-साक्षिणे विश्वाय तद्-उपद्रष्ट्रे तत्-कर्त्रे विश्व-हेतवे
kālāya kāla-nābhāya kālāvayava-sākṣiṇe viśvāya tad-upadraṣṭre tat-kartre viśva-hetave
Sanskrit only: no published translation is held for this verse.
भूत-मात्रेन्द्रिय-प्राण- मनो-बुद्ध्य्-आशयात्मने त्रि-गुणेनाभिमानेन गूढ-स्वात्मानुभूतये
bhūta-mātrendriya-prāṇa- mano-buddhy-āśayātmane tri-guṇenābhimānena gūḍha-svātmānubhūtaye
Sanskrit only: no published translation is held for this verse.
नमो ऽनन्ताय सूक्ष्माय कूट-स्थाय विपश्चिते नाना-वादानुरोधाय वाच्य-वाचक-शक्तये
namo 'nantāya sūkṣmāya kūṭa-sthāya vipaścite nānā-vādānurodhāya vācya-vācaka-śaktaye
Sanskrit only: no published translation is held for this verse.
नमः प्रमाण-मूलाय कवये शास्त्र-योनये प्रवृत्ताय निवृत्ताय निगमाय नमो नमः
namaḥ pramāṇa-mūlāya kavaye śāstra-yonaye pravṛttāya nivṛttāya nigamāya namo namaḥ
Sanskrit only: no published translation is held for this verse.
नमः कृष्णाय रामाय वसुदेव-सुताय च प्रद्युम्नायानिरुद्धाय सात्वतां पतये नमः
namaḥ kṛṣṇāya rāmāya vasudeva-sutāya ca pradyumnāyāniruddhāya sātvatāṃ pataye namaḥ
Sanskrit only: no published translation is held for this verse.
नमो गुण-प्रदीपाय गुणात्म-च्छादनाय च गुण-वृत्त्य्-उपलक्ष्याय गुण-द्रष्ट्रे स्व-संविदे
namo guṇa-pradīpāya guṇātma-cchādanāya ca guṇa-vṛtty-upalakṣyāya guṇa-draṣṭre sva-saṃvide
Sanskrit only: no published translation is held for this verse.
अव्याकृत-विहाराय सर्व-व्याकृत-सिद्धये हृषीकेश नमस् ते ऽस्तु मुनये मौन-शीलिने
avyākṛta-vihārāya sarva-vyākṛta-siddhaye hṛṣīkeśa namas te 'stu munaye mauna-śīline
Sanskrit only: no published translation is held for this verse.
परावर-गति-ज्ञाय सर्वाध्यक्षाय ते नमः अविश्वाय च विश्वाय तद्-द्रष्ट्रे ऽस्य च हेतवे
parāvara-gati-jñāya sarvādhyakṣāya te namaḥ aviśvāya ca viśvāya tad-draṣṭre 'sya ca hetave
Sanskrit only: no published translation is held for this verse.
त्वं ह्य् अस्य जन्म-स्थिति-संयमान् विभो गुणैर् अनीहो ऽकृत-काल-शक्ति-धृक् तत्-तत्-स्वभावान् प्रतिबोधयन् सतः समीक्षयामोघ-विहार ईहसे
tvaṃ hy asya janma-sthiti-saṃyamān vibho guṇair anīho 'kṛta-kāla-śakti-dhṛk tat-tat-svabhāvān pratibodhayan sataḥ samīkṣayāmogha-vihāra īhase
Sanskrit only: no published translation is held for this verse.
तस्यैव ते ऽमूस् तनवस् त्रि-लोक्यां शान्ता अशान्ता उत मूढ-योनयः शान्ताः प्रियास् ते ह्य् अधुनावितुं सतां स्थातुश् च ते धर्म-परीप्सयेहतः
tasyaiva te 'mūs tanavas tri-lokyāṃ śāntā aśāntā uta mūḍha-yonayaḥ śāntāḥ priyās te hy adhunāvituṃ satāṃ sthātuś ca te dharma-parīpsayehataḥ
Sanskrit only: no published translation is held for this verse.
अपराधः सकृद् भर्त्रा सोढव्यः स्व-प्रजा-कृतः क्षन्तुम् अर्हसि शान्तात्मन् मूढस्य त्वाम् अजानतः
aparādhaḥ sakṛd bhartrā soḍhavyaḥ sva-prajā-kṛtaḥ kṣantum arhasi śāntātman mūḍhasya tvām ajānataḥ
Sanskrit only: no published translation is held for this verse.
अनुगृह्णीष्व भगवन् प्राणांस् त्यजति पन्नगः स्त्रीणां नः साधु-शोच्यानां पतिः प्राणः प्रदीयताम्
anugṛhṇīṣva bhagavan prāṇāṃs tyajati pannagaḥ strīṇāṃ naḥ sādhu-śocyānāṃ patiḥ prāṇaḥ pradīyatām
Sanskrit only: no published translation is held for this verse.
विधेहि ते किङ्करीणाम् अनुष्ठेयं तवाज्ञया यच्-छ्रद्धयानुतिष्ठन् वै मुच्यते सर्वतो भयात्
vidhehi te kiṅkarīṇām anuṣṭheyaṃ tavājñayā yac-chraddhayānutiṣṭhan vai mucyate sarvato bhayāt
Sanskrit only: no published translation is held for this verse.
श्री-शुक उवाच इत्थं स नाग-पत्नीभिर् भगवान् समभिष्टुतः मूर्च्छितं भग्न-शिरसं विससर्जाङ्घ्रि-कुट्टनैः
śrī-śuka uvāca itthaṃ sa nāga-patnībhir bhagavān samabhiṣṭutaḥ mūrcchitaṃ bhagna-śirasaṃ visasarjāṅghri-kuṭṭanaiḥ
Sanskrit only: no published translation is held for this verse.
प्रतिलब्धेन्द्रिय-प्राणः कालियः शनकैर् हरिम् कृच्छ्रात् समुच्छ्वसन् दीनः कृष्णं प्राह कृताञ्जलिः
pratilabdhendriya-prāṇaḥ kāliyaḥ śanakair harim kṛcchrāt samucchvasan dīnaḥ kṛṣṇaṃ prāha kṛtāñjaliḥ
Sanskrit only: no published translation is held for this verse.
कालिय उवाच वयं खलाः सहोत्पत्त्या तमसा दीर्घ-मन्यवः स्वभावो दुस्त्यजो नाथ लोकानां यद् असद्-ग्रहः
kāliya uvāca vayaṃ khalāḥ sahotpattyā tamasā dīrgha-manyavaḥ svabhāvo dustyajo nātha lokānāṃ yad asad-grahaḥ
Sanskrit only: no published translation is held for this verse.
त्वया सृष्टम् इदं विश्वं धातर् गुण-विसर्जनम् नाना-स्वभाव-वीर्यौजो- योनि-बीजाशयाकृति
tvayā sṛṣṭam idaṃ viśvaṃ dhātar guṇa-visarjanam nānā-svabhāva-vīryaujo- yoni-bījāśayākṛti
Sanskrit only: no published translation is held for this verse.
वयं च तत्र भगवन् सर्पा जात्य्-उरु-मन्यवः कथं त्यजामस् त्वन्-मायां दुस्त्यजां मोहिताः स्वयम्
vayaṃ ca tatra bhagavan sarpā jāty-uru-manyavaḥ kathaṃ tyajāmas tvan-māyāṃ dustyajāṃ mohitāḥ svayam
Sanskrit only: no published translation is held for this verse.
भवान् हि कारणं तत्र सर्व-ज्ञो जगद्-ईश्वरः अनुग्रहं निग्रहं वा मन्यसे तद् विधेहि नः
bhavān hi kāraṇaṃ tatra sarva-jño jagad-īśvaraḥ anugrahaṃ nigrahaṃ vā manyase tad vidhehi naḥ
Sanskrit only: no published translation is held for this verse.
श्री-शुक उवाच इत्य् आकर्ण्य वचः प्राह भगवान् कार्य-मानुषः नात्र स्थेयं त्वया सर्प समुद्रं याहि मा चिरम् स्व-ज्ञात्य्-अपत्य-दाराढ्यो गो-नृभिर् भुज्यते नदी
śrī-śuka uvāca ity ākarṇya vacaḥ prāha bhagavān kārya-mānuṣaḥ nātra stheyaṃ tvayā sarpa samudraṃ yāhi mā ciram sva-jñāty-apatya-dārāḍhyo go-nṛbhir bhujyate nadī
Sanskrit only: no published translation is held for this verse.
य एतत् संस्मरेन् मर्त्यस् तुभ्यं मद्-अनुशासनम् कीर्तयन्न् उभयोः सन्ध्योर् न युष्मद् भयम् आप्नुयात्
ya etat saṃsmaren martyas tubhyaṃ mad-anuśāsanam kīrtayann ubhayoḥ sandhyor na yuṣmad bhayam āpnuyāt
Sanskrit only: no published translation is held for this verse.
यो ऽस्मिन् स्नात्वा मद्-आक्रीडे देवादींस् तर्पयेज् जलैः उपोष्य मां स्मरन्न् अर्चेत् सर्व-पापैः प्रमुच्यते
yo 'smin snātvā mad-ākrīḍe devādīṃs tarpayej jalaiḥ upoṣya māṃ smarann arcet sarva-pāpaiḥ pramucyate
Sanskrit only: no published translation is held for this verse.
द्वीपं रमणकं हित्वा ह्रदम् एतम् उपाश्रितः यद्-भयात् स सुपर्णस् त्वां नाद्यान् मत्-पाद-लाञ्छितम्
dvīpaṃ ramaṇakaṃ hitvā hradam etam upāśritaḥ yad-bhayāt sa suparṇas tvāṃ nādyān mat-pāda-lāñchitam
Sanskrit only: no published translation is held for this verse.
श्री-ऋषिर् उवाच मुक्तो भगवता राजन् कृष्णेनाद्भुत-कर्मणा तं पूजयाम् आस मुदा नाग-पत्न्यश् च सादरम्
śrī-ṛṣir uvāca mukto bhagavatā rājan kṛṣṇenādbhuta-karmaṇā taṃ pūjayām āsa mudā nāga-patnyaś ca sādaram
Sanskrit only: no published translation is held for this verse.
दिव्याम्बर-स्रङ्-मणिभिः परार्ध्यैर् अपि भूषणैः दिव्य-गन्धानुलेपैश् च महत्योत्पल-मालया
divyāmbara-sraṅ-maṇibhiḥ parārdhyair api bhūṣaṇaiḥ divya-gandhānulepaiś ca mahatyotpala-mālayā
Sanskrit only: no published translation is held for this verse.
पूजयित्वा जगन्-नाथं प्रसाद्य गरुड-ध्वजम् ततः प्रीतो ऽभ्यनुज्ञातः परिक्रम्याभिवन्द्य तम्
pūjayitvā jagan-nāthaṃ prasādya garuḍa-dhvajam tataḥ prīto 'bhyanujñātaḥ parikramyābhivandya tam
Sanskrit only: no published translation is held for this verse.
स-कलत्र-सुहृत्-पुत्रो द्वीपम् अब्धेर् जगाम ह तदैव सामृत-जला यमुना निर्विषाभवत् अनुग्रहाद् भगवतः क्रीडा-मानुष-रूपिणः
sa-kalatra-suhṛt-putro dvīpam abdher jagāma ha tadaiva sāmṛta-jalā yamunā nirviṣābhavat anugrahād bhagavataḥ krīḍā-mānuṣa-rūpiṇaḥ
Sanskrit only: no published translation is held for this verse.