Library·Bhāgavata Purāṇa·10·10.18
श्री-शुक उवाच अथ कृष्णः परिवृतो ज्ञातिभिर् मुदितात्मभिः अनुगीयमानो न्यविशद् व्रजं गोकुल-मण्डितम्
śrī-śuka uvāca atha kṛṣṇaḥ parivṛto jñātibhir muditātmabhiḥ anugīyamāno nyaviśad vrajaṃ gokula-maṇḍitam
Sanskrit only: no published translation is held for this verse.
व्रजे विक्रीडतोर् एवं गोपाल-च्छद्म-मायया ग्रीष्मो नामर्तुर् अभवन् नाति-प्रेयाञ् छरीरिणाम्
vraje vikrīḍator evaṃ gopāla-cchadma-māyayā grīṣmo nāmartur abhavan nāti-preyāñ charīriṇām
Sanskrit only: no published translation is held for this verse.
स च वृन्दावन-गुणैर् वसन्त इव लक्षितः यत्रास्ते भगवान् साक्षाद् रामेण सह केशवः
sa ca vṛndāvana-guṇair vasanta iva lakṣitaḥ yatrāste bhagavān sākṣād rāmeṇa saha keśavaḥ
Sanskrit only: no published translation is held for this verse.
यत्र निर्झर-निर्ह्राद- निवृत्त-स्वन-झिल्लिकम् शश्वत् तच्-छीकरर्जीष- द्रुम-मण्डल-मण्डितम्
yatra nirjhara-nirhrāda- nivṛtta-svana-jhillikam śaśvat tac-chīkararjīṣa- druma-maṇḍala-maṇḍitam
Sanskrit only: no published translation is held for this verse.
सरित्-सरः-प्रस्रवणोर्मि-वायुना कह्लार-कञ्जोत्पल-रेणु-हारिणा न विद्यते यत्र वनौकसां दवो निदाघ-वह्न्य्-अर्क-भवो ऽति-शाद्वले
sarit-saraḥ-prasravaṇormi-vāyunā kahlāra-kañjotpala-reṇu-hāriṇā na vidyate yatra vanaukasāṃ davo nidāgha-vahny-arka-bhavo 'ti-śādvale
Sanskrit only: no published translation is held for this verse.
अगाध-तोय-ह्रदिनी-तटोर्मिभिर् द्रवत्-पुरीष्याः पुलिनैः समन्ततः न यत्र चण्डांशु-करा विषोल्बणा भुवो रसं शाद्वलितं च गृह्णते
agādha-toya-hradinī-taṭormibhir dravat-purīṣyāḥ pulinaiḥ samantataḥ na yatra caṇḍāṃśu-karā viṣolbaṇā bhuvo rasaṃ śādvalitaṃ ca gṛhṇate
Sanskrit only: no published translation is held for this verse.
वनं कुसुमितं श्रीमन् नदच्-चित्र-मृग-द्विजम् गायन् मयूर-भ्रमरं कूजत्-कोकिल-सारसम्
vanaṃ kusumitaṃ śrīman nadac-citra-mṛga-dvijam gāyan mayūra-bhramaraṃ kūjat-kokila-sārasam
Sanskrit only: no published translation is held for this verse.
क्रीडिष्यमाणस् तत् क्र्ष्णो भगवान् बल-संयुतः वेणुं विरणयन् गोपैर् गो-धनैः संवृतो ऽविशत्
krīḍiṣyamāṇas tat krṣṇo bhagavān bala-saṃyutaḥ veṇuṃ viraṇayan gopair go-dhanaiḥ saṃvṛto 'viśat
Sanskrit only: no published translation is held for this verse.
प्रवाल-बर्ह-स्तबक- स्रग्-धातु-कृत-भूषणाः राम-कृष्णादयो गोपा ननृतुर् युयुधुर् जगुः
pravāla-barha-stabaka- srag-dhātu-kṛta-bhūṣaṇāḥ rāma-kṛṣṇādayo gopā nanṛtur yuyudhur jaguḥ
Sanskrit only: no published translation is held for this verse.
कृष्णस्य नृत्यतः केचिज् जगुः केचिद् अवादयन् वेणु-पाणितलैः शृङ्गैः प्रशशंसुर् अथापरे
kṛṣṇasya nṛtyataḥ kecij jaguḥ kecid avādayan veṇu-pāṇitalaiḥ śṛṅgaiḥ praśaśaṃsur athāpare
Sanskrit only: no published translation is held for this verse.
गोप-जाति-प्रतिच्छन्ना देवा गोपाल-रूपिणौ ईडिरे कृष्ण-रामौ च नटा इव नटं नृप
gopa-jāti-praticchannā devā gopāla-rūpiṇau īḍire kṛṣṇa-rāmau ca naṭā iva naṭaṃ nṛpa
Sanskrit only: no published translation is held for this verse.
भ्रमणैर् लङ्घनैः क्षेपैर् आस्फोटन-विकर्षणैः चिक्रीडतुर् नियुद्धेन काक-पक्ष-धरौ क्वचित्
bhramaṇair laṅghanaiḥ kṣepair āsphoṭana-vikarṣaṇaiḥ cikrīḍatur niyuddhena kāka-pakṣa-dharau kvacit
Sanskrit only: no published translation is held for this verse.
क्वचिन् नृत्यत्सु चान्येषु गायकौ वादकौ स्वयम् शशंसतुर् महा-राज साधु साध्व् इति वादिनौ
kvacin nṛtyatsu cānyeṣu gāyakau vādakau svayam śaśaṃsatur mahā-rāja sādhu sādhv iti vādinau
Sanskrit only: no published translation is held for this verse.
क्वचिद् बिल्वैः क्वचित् कुम्भैः क्वचामलक-मुष्टिभिः अस्पृश्य-नेत्र-बन्धाद्यैः क्वचिन् मृग-खगेहया
kvacid bilvaiḥ kvacit kumbhaiḥ kvacāmalaka-muṣṭibhiḥ aspṛśya-netra-bandhādyaiḥ kvacin mṛga-khagehayā
Sanskrit only: no published translation is held for this verse.
क्वचिच् च दर्दुर-प्लावैर् विविधैर् उपहासकैः कदाचित् स्यन्दोलिकया कर्हिचिन् नृप-चेष्टया
kvacic ca dardura-plāvair vividhair upahāsakaiḥ kadācit syandolikayā karhicin nṛpa-ceṣṭayā
Sanskrit only: no published translation is held for this verse.
एवं तौ लोक-सिद्धाभिः क्रीडाभिश् चेरतुर् वने नद्य्-अद्रि-द्रोणि-कुञ्जेषु काननेषु सरःसु च
evaṃ tau loka-siddhābhiḥ krīḍābhiś ceratur vane nady-adri-droṇi-kuñjeṣu kānaneṣu saraḥsu ca
Sanskrit only: no published translation is held for this verse.
पशूंश् चारयतोर् गोपैस् तद्-वने राम-कृष्णयोः गोप-रूपी प्रलम्बो ऽगाद् असुरस् तज्-जिहीर्षया
paśūṃś cārayator gopais tad-vane rāma-kṛṣṇayoḥ gopa-rūpī pralambo 'gād asuras taj-jihīrṣayā
Sanskrit only: no published translation is held for this verse.
तं विद्वान् अपि दाशार्हो भगवान् सर्व-दर्शनः अन्वमोदत तत्-सख्यं वधं तस्य विचिन्तयन्
taṃ vidvān api dāśārho bhagavān sarva-darśanaḥ anvamodata tat-sakhyaṃ vadhaṃ tasya vicintayan
Sanskrit only: no published translation is held for this verse.
तत्रोपाहूय गोपालान् कृष्णः प्राह विहार-वित् हे गोपा विहरिष्यामो द्वन्द्वी-भूय यथा-यथम्
tatropāhūya gopālān kṛṣṇaḥ prāha vihāra-vit he gopā vihariṣyāmo dvandvī-bhūya yathā-yatham
Sanskrit only: no published translation is held for this verse.
तत्र चक्रुः परिवृढौ गोपा राम-जनार्दनौ कृष्ण-सङ्घट्टिनः केचिद् आसन् रामस्य चापरे
tatra cakruḥ parivṛḍhau gopā rāma-janārdanau kṛṣṇa-saṅghaṭṭinaḥ kecid āsan rāmasya cāpare
Sanskrit only: no published translation is held for this verse.
आचेरुर् विविधाः क्रीडा वाह्य-वाहक-लक्षणाः यत्रारोहन्ति जेतारो वहन्ति च पराजिताः
ācerur vividhāḥ krīḍā vāhya-vāhaka-lakṣaṇāḥ yatrārohanti jetāro vahanti ca parājitāḥ
Sanskrit only: no published translation is held for this verse.
वहन्तो वाह्यमानाश् च चारयन्तश् च गो-धनम् भाण्डीरकं नाम वटं जग्मुः कृष्ण-पुरोगमाः
vahanto vāhyamānāś ca cārayantaś ca go-dhanam bhāṇḍīrakaṃ nāma vaṭaṃ jagmuḥ kṛṣṇa-purogamāḥ
Sanskrit only: no published translation is held for this verse.
राम-सङ्घट्टिनो यर्हि श्रीदाम-वृषभादयः क्रीडायां जयिनस् तांस् तान् ऊहुः कृष्णादयो नृप
rāma-saṅghaṭṭino yarhi śrīdāma-vṛṣabhādayaḥ krīḍāyāṃ jayinas tāṃs tān ūhuḥ kṛṣṇādayo nṛpa
Sanskrit only: no published translation is held for this verse.
उवाह कृष्णो भगवान् श्रीदामानं पराजितः वृषभं भद्रसेनस् तु प्रलम्बो रोहिणी-सुतम्
uvāha kṛṣṇo bhagavān śrīdāmānaṃ parājitaḥ vṛṣabhaṃ bhadrasenas tu pralambo rohiṇī-sutam
Sanskrit only: no published translation is held for this verse.
अविषह्यं मन्यमानः कृष्णं दानव-पुङ्गवः वहन् द्रुततरं प्रागाद् अवरोहणतः परम्
aviṣahyaṃ manyamānaḥ kṛṣṇaṃ dānava-puṅgavaḥ vahan drutataraṃ prāgād avarohaṇataḥ param
Sanskrit only: no published translation is held for this verse.
तम् उद्वहन् धरणि-धरेन्द्र-गौरवं महासुरो विगत-रयो निजं वपुः स आस्थितः पुरट-परिच्छदो बभौ तडिद्-द्युमान् उडुपति-वाड् इवाम्बुदः
tam udvahan dharaṇi-dharendra-gauravaṃ mahāsuro vigata-rayo nijaṃ vapuḥ sa āsthitaḥ puraṭa-paricchado babhau taḍid-dyumān uḍupati-vāḍ ivāmbudaḥ
Sanskrit only: no published translation is held for this verse.
निरीक्ष्य तद्-वपुर् अलम् अम्बरे चरत् प्रदीप्त-दृग् भ्रु-कुटि-तटोग्र-दंष्ट्रकम् ज्वलच्-छिखं कटक-किरीट-कुण्डल- त्विषाद्भुतं हलधर ईषद् अत्रसत्
nirīkṣya tad-vapur alam ambare carat pradīpta-dṛg bhru-kuṭi-taṭogra-daṃṣṭrakam jvalac-chikhaṃ kaṭaka-kirīṭa-kuṇḍala- tviṣādbhutaṃ haladhara īṣad atrasat
Sanskrit only: no published translation is held for this verse.
अथागत-स्मृतिर् अभयो रिपुं बलो विहाय सार्थम् इव हरन्तम् आत्मनः रुषाहनच् छिरसि दृढेन मुष्टिना सुराधिपो गिरिम् इव वज्र-रंहसा
athāgata-smṛtir abhayo ripuṃ balo vihāya sārtham iva harantam ātmanaḥ ruṣāhanac chirasi dṛḍhena muṣṭinā surādhipo girim iva vajra-raṃhasā
Sanskrit only: no published translation is held for this verse.
स आहतः सपदि विशीर्ण-मस्तको मुखाद् वमन् रुधिरम् अपस्मृतो ऽसुरः महा-रवं व्यसुर् अपतत् समीरयन् गिरिर् यथा मघवत आयुधाहतः
sa āhataḥ sapadi viśīrṇa-mastako mukhād vaman rudhiram apasmṛto 'suraḥ mahā-ravaṃ vyasur apatat samīrayan girir yathā maghavata āyudhāhataḥ
Sanskrit only: no published translation is held for this verse.
दृष्ट्वा प्रलम्बं निहतं बलेन बल-शालिना गोपाः सु-विस्मिता आसन् साधु साध्व् इति वादिनः
dṛṣṭvā pralambaṃ nihataṃ balena bala-śālinā gopāḥ su-vismitā āsan sādhu sādhv iti vādinaḥ
Sanskrit only: no published translation is held for this verse.
आशिषो ऽभिगृणन्तस् तं प्रशशंसुस् तद्-अर्हणम् प्रेत्यागतम् इवालिङ्ग्य प्रेम-विह्वल-चेतसः
āśiṣo 'bhigṛṇantas taṃ praśaśaṃsus tad-arhaṇam pretyāgatam ivāliṅgya prema-vihvala-cetasaḥ
Sanskrit only: no published translation is held for this verse.
पापे प्रलम्बे निहते देवाः परम-निर्वृताः अभ्यवर्षन् बलं माल्यैः शशंसुः साधु साध्व् इति
pāpe pralambe nihate devāḥ parama-nirvṛtāḥ abhyavarṣan balaṃ mālyaiḥ śaśaṃsuḥ sādhu sādhv iti
Sanskrit only: no published translation is held for this verse.