Library·Bhāgavata Purāṇa·10·10.23
श्री-गोप ऊचुः राम राम महा-बाहो कृष्ण दुष्ट-निबर्हण एषा वै बाधते क्षुन् नस् तच्-छान्तिं कर्तुम् अर्हथः
śrī-gopa ūcuḥ rāma rāma mahā-bāho kṛṣṇa duṣṭa-nibarhaṇa eṣā vai bādhate kṣun nas tac-chāntiṃ kartum arhathaḥ
Sanskrit only: no published translation is held for this verse.
श्री-शुक उवाच इति विज्ञापितो गोपैर् भगवान् देवकी-सुतः भक्ताया विप्र-भार्यायाः प्रसीदन्न् इदम् अब्रवीत्
śrī-śuka uvāca iti vijñāpito gopair bhagavān devakī-sutaḥ bhaktāyā vipra-bhāryāyāḥ prasīdann idam abravīt
Sanskrit only: no published translation is held for this verse.
प्रयात देव-यजनं ब्राह्मणा ब्रह्म-वादिनः सत्रम् आङ्गिरसं नाम ह्य् आसते स्वर्ग-काम्यया
prayāta deva-yajanaṃ brāhmaṇā brahma-vādinaḥ satram āṅgirasaṃ nāma hy āsate svarga-kāmyayā
Sanskrit only: no published translation is held for this verse.
तत्र गत्वौदनं गोपा याचतास्मद्-विसर्जिताः कीर्तयन्तो भगवत आर्यस्य मम चाभिधाम्
tatra gatvaudanaṃ gopā yācatāsmad-visarjitāḥ kīrtayanto bhagavata āryasya mama cābhidhām
Sanskrit only: no published translation is held for this verse.
इत्य् आदिष्टा भगवता गत्वा याचन्त ते तथा कृताञ्जलि-पुटा विप्रान् दण्ड-वत् पतिता भुवि
ity ādiṣṭā bhagavatā gatvā yācanta te tathā kṛtāñjali-puṭā viprān daṇḍa-vat patitā bhuvi
Sanskrit only: no published translation is held for this verse.
हे भूमि-देवाः शृणुत कृष्णस्यादेश-कारिणः प्राप्ताञ् जानीत भद्रं वो गोपान् नो राम-चोदितान्
he bhūmi-devāḥ śṛṇuta kṛṣṇasyādeśa-kāriṇaḥ prāptāñ jānīta bhadraṃ vo gopān no rāma-coditān
Sanskrit only: no published translation is held for this verse.
गाश् चारयन्ताव् अविदूर ओदनं रामाच्युतौ वो लषतो बुभुक्षितौ तयोर् द्विजा ओदनम् अर्थिनोर् यदि श्रद्धा च वो यच्छत धर्म-वित्तमाः
gāś cārayantāv avidūra odanaṃ rāmācyutau vo laṣato bubhukṣitau tayor dvijā odanam arthinor yadi śraddhā ca vo yacchata dharma-vittamāḥ
Sanskrit only: no published translation is held for this verse.
दीक्षायाः पशु-संस्थायाः सौत्रामण्याश् च सत्तमाः अन्यत्र दीक्षितस्यापि नान्नम् अश्नन् हि दुष्यति
dīkṣāyāḥ paśu-saṃsthāyāḥ sautrāmaṇyāś ca sattamāḥ anyatra dīkṣitasyāpi nānnam aśnan hi duṣyati
Sanskrit only: no published translation is held for this verse.
इति ते भगवद्-याच्ञां शृण्वन्तो ऽपि न शुश्रुवुः क्षुद्राशा भूरि-कर्माणो बालिशा वृद्ध-मानिनः
iti te bhagavad-yācñāṃ śṛṇvanto 'pi na śuśruvuḥ kṣudrāśā bhūri-karmāṇo bāliśā vṛddha-māninaḥ
Sanskrit only: no published translation is held for this verse.
देशः कालः पृथग् द्रव्यं मन्त्र-तन्त्रर्त्विजो ऽग्नयः देवता यजमानश् च क्रतुर् धर्मश् च यन्-मयः
deśaḥ kālaḥ pṛthag dravyaṃ mantra-tantrartvijo 'gnayaḥ devatā yajamānaś ca kratur dharmaś ca yan-mayaḥ
Sanskrit only: no published translation is held for this verse.
तं ब्रह्म परमं साक्षाद् भगवन्तम् अधोक्षजम् मनुष्य-दृष्ट्या दुष्प्रज्ञा मर्त्यात्मानो न मेनिरे
taṃ brahma paramaṃ sākṣād bhagavantam adhokṣajam manuṣya-dṛṣṭyā duṣprajñā martyātmāno na menire
Sanskrit only: no published translation is held for this verse.
न ते यद् ओम् इति प्रोचुर् न नेति च परन्तप गोपा निराशाः प्रत्येत्य तथोचुः कृष्ण-रामयोः
na te yad om iti procur na neti ca parantapa gopā nirāśāḥ pratyetya tathocuḥ kṛṣṇa-rāmayoḥ
Sanskrit only: no published translation is held for this verse.
तद् उपाकर्ण्य भगवान् प्रहस्य जगद्-ईश्वरः व्याजहार पुनर् गोपान् दर्शयन् लौकिकीं गतिम्
tad upākarṇya bhagavān prahasya jagad-īśvaraḥ vyājahāra punar gopān darśayan laukikīṃ gatim
Sanskrit only: no published translation is held for this verse.
मां ज्ञापयत पत्नीभ्यः स-सङ्कर्षणम् आगतम् दास्यन्ति कामम् अन्नं वः स्निग्धा मय्य् उषिता धिया
māṃ jñāpayata patnībhyaḥ sa-saṅkarṣaṇam āgatam dāsyanti kāmam annaṃ vaḥ snigdhā mayy uṣitā dhiyā
Sanskrit only: no published translation is held for this verse.
गत्वाथ पत्नी-शालायां दृष्ट्वासीनाः स्व्-अलङ्कृताः नत्वा द्विज-सतीर् गोपाः प्रश्रिता इदम् अब्रुवन्
gatvātha patnī-śālāyāṃ dṛṣṭvāsīnāḥ sv-alaṅkṛtāḥ natvā dvija-satīr gopāḥ praśritā idam abruvan
Sanskrit only: no published translation is held for this verse.
नमो वो विप्र-पत्नीभ्यो निबोधत वचांसि नः इतो ऽविदूरे चरता कृष्णेनेहेषिता वयम्
namo vo vipra-patnībhyo nibodhata vacāṃsi naḥ ito 'vidūre caratā kṛṣṇeneheṣitā vayam
Sanskrit only: no published translation is held for this verse.
गाश् चारयन् स गोपालैः स-रामो दूरम् आगतः बुभुक्षितस्य तस्यान्नं सानुगस्य प्रदीयताम्
gāś cārayan sa gopālaiḥ sa-rāmo dūram āgataḥ bubhukṣitasya tasyānnaṃ sānugasya pradīyatām
Sanskrit only: no published translation is held for this verse.
श्रुत्वाच्युतम् उपायातं नित्यं तद्-दर्शनोत्सुकाः तत्-कथाक्षिप्त-मनसो बभूवुर् जात-सम्भ्रमाः
śrutvācyutam upāyātaṃ nityaṃ tad-darśanotsukāḥ tat-kathākṣipta-manaso babhūvur jāta-sambhramāḥ
Sanskrit only: no published translation is held for this verse.
चतुर्-विधं बहु-गुणम् अन्नम् आदाय भाजनैः अभिसस्रुः प्रियं सर्वाः समुद्रम् इव निम्नगाः
catur-vidhaṃ bahu-guṇam annam ādāya bhājanaiḥ abhisasruḥ priyaṃ sarvāḥ samudram iva nimnagāḥ
Sanskrit only: no published translation is held for this verse.
निषिध्यमानाः पतिभिर् भ्रातृभिर् बन्धुभिः सुतैः भगवत्य् उत्तम-श्लोके दीर्घ-श्रुत -धृताशयाः
niṣidhyamānāḥ patibhir bhrātṛbhir bandhubhiḥ sutaiḥ bhagavaty uttama-śloke dīrgha-śruta -dhṛtāśayāḥ
Sanskrit only: no published translation is held for this verse.
यमुनोपवने ऽशोक नव-पल्लव-मण्डिते विचरन्तं वृतं गोपैः साग्रजं ददृशुः स्त्रियः
yamunopavane 'śoka nava-pallava-maṇḍite vicarantaṃ vṛtaṃ gopaiḥ sāgrajaṃ dadṛśuḥ striyaḥ
Sanskrit only: no published translation is held for this verse.
श्यामं हिरण्य-परिधिं वनमाल्य-बर्ह- धातु-प्रवाल-नट-वेषम् अनव्रतांसे विन्यस्त-हस्तम् इतरेण धुनानम् अब्जं कर्णोत्पलालक-कपोल-मुखाब्ज-हासम्
śyāmaṃ hiraṇya-paridhiṃ vanamālya-barha- dhātu-pravāla-naṭa-veṣam anavratāṃse vinyasta-hastam itareṇa dhunānam abjaṃ karṇotpalālaka-kapola-mukhābja-hāsam
Sanskrit only: no published translation is held for this verse.
प्रायः-श्रुत-प्रियतमोदय-कर्ण-पूरैर् यस्मिन् निमग्न-मनसस् तम् अथाक्षि-रन्द्रैः अन्तः प्रवेश्य सु-चिरं परिरभ्य तापं प्राज्ञं यथाभिमतयो विजहुर् नरेन्द्र
prāyaḥ-śruta-priyatamodaya-karṇa-pūrair yasmin nimagna-manasas tam athākṣi-randraiḥ antaḥ praveśya su-ciraṃ parirabhya tāpaṃ prājñaṃ yathābhimatayo vijahur narendra
Sanskrit only: no published translation is held for this verse.
तास् तथा त्यक्त-सर्वाशाः प्राप्ता आत्म-दिदृक्षया विज्ञायाखिल-दृग्-द्रष्टा प्राह प्रहसिताननः
tās tathā tyakta-sarvāśāḥ prāptā ātma-didṛkṣayā vijñāyākhila-dṛg-draṣṭā prāha prahasitānanaḥ
Sanskrit only: no published translation is held for this verse.
स्वागतं वो महा-भागा आस्यतां करवाम किम् यन् नो दिदृक्षया प्राप्ता उपपन्नम् इदं हि वः
svāgataṃ vo mahā-bhāgā āsyatāṃ karavāma kim yan no didṛkṣayā prāptā upapannam idaṃ hi vaḥ
Sanskrit only: no published translation is held for this verse.
नन्व् अद्धा मयि कुर्वन्ति कुशलाः स्वार्थ-दर्शिनः अहैतुक्य् अव्यवहितां भक्तिम् आत्म-प्रिये यथा
nanv addhā mayi kurvanti kuśalāḥ svārtha-darśinaḥ ahaituky avyavahitāṃ bhaktim ātma-priye yathā
Sanskrit only: no published translation is held for this verse.
प्राण-बुद्धि-मनः-स्वात्म दारापत्य-धनादयः यत्-सम्पर्कात् प्रिया आसंस् ततः को न्व् अपरः प्रियः
prāṇa-buddhi-manaḥ-svātma dārāpatya-dhanādayaḥ yat-samparkāt priyā āsaṃs tataḥ ko nv aparaḥ priyaḥ
Sanskrit only: no published translation is held for this verse.
तद् यात देव-यजनं पतयो वो द्विजातयः स्व-सत्रं पारयिष्यन्ति युष्माभिर् गृह-मेधिनः
tad yāta deva-yajanaṃ patayo vo dvijātayaḥ sva-satraṃ pārayiṣyanti yuṣmābhir gṛha-medhinaḥ
Sanskrit only: no published translation is held for this verse.
श्री-पत्न्य ऊचुः मैवं विभो ऽर्हति भवान् गदितुं न्र्-शंसं सत्यं कुरुष्व निगमं तव पद-मूलम् प्राप्ता वयं तुलसि-दाम पदावसृष्टं केशैर् निवोढुम् अतिलङ्घ्य समस्त-बन्धून्
śrī-patnya ūcuḥ maivaṃ vibho 'rhati bhavān gadituṃ nr-śaṃsaṃ satyaṃ kuruṣva nigamaṃ tava pada-mūlam prāptā vayaṃ tulasi-dāma padāvasṛṣṭaṃ keśair nivoḍhum atilaṅghya samasta-bandhūn
Sanskrit only: no published translation is held for this verse.
गृह्णन्ति नो न पतयः पितरौ सुता वा न भ्रातृ-बन्धु-सुहृदः कुत एव चान्ये तस्माद् भवत्-प्रपदयोः पतितात्मनां नो नान्या भवेद् गतिर् अरिन्दम तद् विधेहि
gṛhṇanti no na patayaḥ pitarau sutā vā na bhrātṛ-bandhu-suhṛdaḥ kuta eva cānye tasmād bhavat-prapadayoḥ patitātmanāṃ no nānyā bhaved gatir arindama tad vidhehi
Sanskrit only: no published translation is held for this verse.
श्री-भगवान् उवाच पतयो नाभ्यसूयेरन् पितृ-भ्रातृ-सुतादयः लोकाश् च वो मयोपेता देवा अप्य् अनुमन्वते
śrī-bhagavān uvāca patayo nābhyasūyeran pitṛ-bhrātṛ-sutādayaḥ lokāś ca vo mayopetā devā apy anumanvate
Sanskrit only: no published translation is held for this verse.
न प्रीतये ऽनुरागाय ह्य् अङ्ग-सङ्गो नृणाम् इह तन् मनो मयि युञ्जाना अचिरान् माम् अवाप्स्यथ
na prītaye 'nurāgāya hy aṅga-saṅgo nṛṇām iha tan mano mayi yuñjānā acirān mām avāpsyatha
Sanskrit only: no published translation is held for this verse.
श्रवणाद् दर्शनाद् ध्यानान् मयि भावो ऽनुकीर्तनात् न तथा सन्निकर्षेण प्रतियात ततो गृहान्
śravaṇād darśanād dhyānān mayi bhāvo 'nukīrtanāt na tathā sannikarṣeṇa pratiyāta tato gṛhān
Sanskrit only: no published translation is held for this verse.
श्री-शुक उवाच इत्य् उक्ता द्विज-पत्न्यस् ता यज्ञ-वाटं पुनर् गताः ते चानसूयवस् ताभिः स्त्रीभिः सत्रम् अपारयन्
śrī-śuka uvāca ity uktā dvija-patnyas tā yajña-vāṭaṃ punar gatāḥ te cānasūyavas tābhiḥ strībhiḥ satram apārayan
Sanskrit only: no published translation is held for this verse.
तत्रैका विधृता भर्त्रा भगवन्तं यथा-श्रुतम् हृडोपगुह्य विजहौ देहं कर्मानुबन्धनम्
tatraikā vidhṛtā bhartrā bhagavantaṃ yathā-śrutam hṛḍopaguhya vijahau dehaṃ karmānubandhanam
Sanskrit only: no published translation is held for this verse.
भगवान् अपि गोविन्दस् तेनैवान्नेन गोपकान् चतुर्-विधेनाशयित्वा स्वयं च बुभुजे प्रभुः
bhagavān api govindas tenaivānnena gopakān catur-vidhenāśayitvā svayaṃ ca bubhuje prabhuḥ
Sanskrit only: no published translation is held for this verse.
एवं लीला-नर-वपुर् न्र्-लोकम् अनुशीलयन् रेमे गो-गोप-गोपीनां रमयन् रूप-वाक्-कृतैः
evaṃ līlā-nara-vapur nr-lokam anuśīlayan reme go-gopa-gopīnāṃ ramayan rūpa-vāk-kṛtaiḥ
Sanskrit only: no published translation is held for this verse.
अथानुस्मृत्य विप्रास् ते अन्वतप्यन् कृतागसः यद् विश्वेश्वरयोर् याच्ञाम् अहन्म नृ-विडम्बयोः
athānusmṛtya viprās te anvatapyan kṛtāgasaḥ yad viśveśvarayor yācñām ahanma nṛ-viḍambayoḥ
Sanskrit only: no published translation is held for this verse.
दृष्ट्वा स्त्रीणां भगवति कृष्णे भक्तिम् अलौकिकीम् आत्मानं च तया हीनम् अनुतप्ता व्यगर्हयन्
dṛṣṭvā strīṇāṃ bhagavati kṛṣṇe bhaktim alaukikīm ātmānaṃ ca tayā hīnam anutaptā vyagarhayan
Sanskrit only: no published translation is held for this verse.
धिग् जन्म नस् त्रि-वृद् यत् तद् धिग् व्रतं धिग् बहु-ज्ञताम् धिक् कुलं धिक् क्रिया-दाक्ष्यं विमुखा ये त्व् अधोक्षजे
dhig janma nas tri-vṛd yat tad dhig vrataṃ dhig bahu-jñatām dhik kulaṃ dhik kriyā-dākṣyaṃ vimukhā ye tv adhokṣaje
Sanskrit only: no published translation is held for this verse.
नूनं भगवतो माया योगिनाम् अपि मोहिनी यद् वयं गुरवो नृणां स्वार्थे मुह्यामहे द्विजाः
nūnaṃ bhagavato māyā yoginām api mohinī yad vayaṃ guravo nṛṇāṃ svārthe muhyāmahe dvijāḥ
Sanskrit only: no published translation is held for this verse.
अहो पश्यत नारीणाम् अपि कृष्णे जगद्-गुरौ दुरन्त-भावं यो ऽविध्यन् मृत्यु-पाशान् गृहाभिधान्
aho paśyata nārīṇām api kṛṣṇe jagad-gurau duranta-bhāvaṃ yo 'vidhyan mṛtyu-pāśān gṛhābhidhān
Sanskrit only: no published translation is held for this verse.
नासां द्विजाति-संस्कारो न निवासो गुराव् अपि न तपो नात्म-मीमांसा न शौचं न क्रियाः शुभाः
nāsāṃ dvijāti-saṃskāro na nivāso gurāv api na tapo nātma-mīmāṃsā na śaucaṃ na kriyāḥ śubhāḥ
Sanskrit only: no published translation is held for this verse.
तथापि ह्य् उत्तमः-श्लोके कृष्णे योगेश्वरेश्वरे भक्तिर् दृढा न चास्माकं संस्कारादिमताम् अपि
tathāpi hy uttamaḥ-śloke kṛṣṇe yogeśvareśvare bhaktir dṛḍhā na cāsmākaṃ saṃskārādimatām api
Sanskrit only: no published translation is held for this verse.
ननु स्वार्थ-विमूढानां प्रमत्तानां गृहेहया अहो नः स्मारयाम् आस गोप-वाक्यैः सतां गतिः
nanu svārtha-vimūḍhānāṃ pramattānāṃ gṛhehayā aho naḥ smārayām āsa gopa-vākyaiḥ satāṃ gatiḥ
Sanskrit only: no published translation is held for this verse.
अन्यथा पूर्ण-कामस्य कैवल्याद्य्-अशिषां पतेः ईशितव्यैः किम् अस्माभिर् ईशस्यैतद् विडम्बनम्
anyathā pūrṇa-kāmasya kaivalyādy-aśiṣāṃ pateḥ īśitavyaiḥ kim asmābhir īśasyaitad viḍambanam
Sanskrit only: no published translation is held for this verse.
हित्वान्यान् भजते यं श्रीः पाद-स्पर्शाशयासकृत् स्वात्म-दोषापवर्गेण तद्-याच्ञा जन-मोहिनी
hitvānyān bhajate yaṃ śrīḥ pāda-sparśāśayāsakṛt svātma-doṣāpavargeṇa tad-yācñā jana-mohinī
Sanskrit only: no published translation is held for this verse.
देशः कालः पृथग् द्रव्यं मन्त्र-तन्त्रर्त्विजो ऽग्नयः देवता यजमानश् च क्रतुर् धर्मश् च यन्-मयः
deśaḥ kālaḥ pṛthag dravyaṃ mantra-tantrartvijo 'gnayaḥ devatā yajamānaś ca kratur dharmaś ca yan-mayaḥ
Sanskrit only: no published translation is held for this verse.
स एव भगवान् साक्षाद् विष्णुर् योगेश्वरेश्वरः जातो यदुष्व् इत्य् आशृण्म ह्य् अपि मूढा न विद्महे
sa eva bhagavān sākṣād viṣṇur yogeśvareśvaraḥ jāto yaduṣv ity āśṛṇma hy api mūḍhā na vidmahe
Sanskrit only: no published translation is held for this verse.
तस्मै नमो भगवते कृष्णायाकुण्ठ-मेधसे यन्-माया-मोहित-धियो भ्रमामः कर्म-वर्त्मसु
tasmai namo bhagavate kṛṣṇāyākuṇṭha-medhase yan-māyā-mohita-dhiyo bhramāmaḥ karma-vartmasu
Sanskrit only: no published translation is held for this verse.
स वै न आद्यः पुरुषः स्व-माया-मोहितात्मनाम् अविज्ञतानुभावानां क्षन्तुम् अर्हत्य् अतिक्रमम्
sa vai na ādyaḥ puruṣaḥ sva-māyā-mohitātmanām avijñatānubhāvānāṃ kṣantum arhaty atikramam
Sanskrit only: no published translation is held for this verse.
इति स्वाघम् अनुस्मृत्य कृष्णे ते कृत-हेलनाः दिदृक्षवो व्रजम् अथ कंसाद् भीता न चाचलन्
iti svāgham anusmṛtya kṛṣṇe te kṛta-helanāḥ didṛkṣavo vrajam atha kaṃsād bhītā na cācalan
Sanskrit only: no published translation is held for this verse.