Library·Bhāgavata Purāṇa·10·10.27
श्री-शुक उवाच गोवर्धने धृते शैले आसाराद् रक्षिते व्रजे गो-लोकाद् आव्रजत् कृष्णं सुरभिः शक्र एव च
śrī-śuka uvāca govardhane dhṛte śaile āsārād rakṣite vraje go-lokād āvrajat kṛṣṇaṃ surabhiḥ śakra eva ca
Sanskrit only: no published translation is held for this verse.
विविक्त उपसङ्गम्य व्रीडीतः कृत-हेलनः पस्पर्श पादयोर् एनं किरीटेनार्क-वर्चसा
vivikta upasaṅgamya vrīḍītaḥ kṛta-helanaḥ pasparśa pādayor enaṃ kirīṭenārka-varcasā
Sanskrit only: no published translation is held for this verse.
दृष्ट-श्रुतानुभावो ऽस्य कृष्णस्यामित-तेजसः नष्ट-त्रि-लोकेश-मद इदम् आह कृताञ्जलिः
dṛṣṭa-śrutānubhāvo 'sya kṛṣṇasyāmita-tejasaḥ naṣṭa-tri-lokeśa-mada idam āha kṛtāñjaliḥ
Sanskrit only: no published translation is held for this verse.
इन्द्र उवाच विशुद्ध-सत्त्वं तव धाम शान्तं तपो-मयं ध्वस्त-रजस्-तमस्कम् माया-मयो ऽयं गुण-सम्प्रवाहो न विद्यते ते ग्रहणानुबन्धः
indra uvāca viśuddha-sattvaṃ tava dhāma śāntaṃ tapo-mayaṃ dhvasta-rajas-tamaskam māyā-mayo 'yaṃ guṇa-sampravāho na vidyate te grahaṇānubandhaḥ
Sanskrit only: no published translation is held for this verse.
कुतो नु तद्-धेतव ईश तत्-कृता लोभादयो ये ऽबुध-लिन्ग-भावाः तथापि दण्डं भगवान् बिभर्ति धर्मस्य गुप्त्यै खल-निग्रहाय
kuto nu tad-dhetava īśa tat-kṛtā lobhādayo ye 'budha-linga-bhāvāḥ tathāpi daṇḍaṃ bhagavān bibharti dharmasya guptyai khala-nigrahāya
Sanskrit only: no published translation is held for this verse.
पिता गुरुस् त्वं जगताम् अधीशो दुरत्ययः काल उपात्त-दण्डः हिताय चेच्छा-तनुभिः समीहसे मानं विधुन्वन् जगद्-ईश-मानिनाम्
pitā gurus tvaṃ jagatām adhīśo duratyayaḥ kāla upātta-daṇḍaḥ hitāya cecchā-tanubhiḥ samīhase mānaṃ vidhunvan jagad-īśa-māninām
Sanskrit only: no published translation is held for this verse.
ये मद्-विधाज्ञा जगद्-ईश-मानिनस् त्वां वीक्ष्य काले ऽभयम् आशु तन्-मदम् हित्वार्य-मार्गं प्रभजन्त्य् अपस्मया ईहा खलानाम् अपि ते ऽनुशासनम्
ye mad-vidhājñā jagad-īśa-māninas tvāṃ vīkṣya kāle 'bhayam āśu tan-madam hitvārya-mārgaṃ prabhajanty apasmayā īhā khalānām api te 'nuśāsanam
Sanskrit only: no published translation is held for this verse.
स त्वं ममैश्वर्य-मद-प्लुतस्य कृतागसस् ते ऽविदुषः प्रभावम् क्षन्तुं प्रभो ऽथार्हसि मूढ-चेतसो मैवं पुनर् भून् मतिर् ईश मे ऽसती
sa tvaṃ mamaiśvarya-mada-plutasya kṛtāgasas te 'viduṣaḥ prabhāvam kṣantuṃ prabho 'thārhasi mūḍha-cetaso maivaṃ punar bhūn matir īśa me 'satī
Sanskrit only: no published translation is held for this verse.
तवावतारो ऽयम् अधोक्षजेह भुवो भराणाम् उरु-भार-जन्मनाम् चमू-पतीनाम् अभवाय देव भवाय युष्मच्-चरणानुवर्तिनाम्
tavāvatāro 'yam adhokṣajeha bhuvo bharāṇām uru-bhāra-janmanām camū-patīnām abhavāya deva bhavāya yuṣmac-caraṇānuvartinām
Sanskrit only: no published translation is held for this verse.
नमस् तुभ्यं भगवते पुरुषाय महात्मने वासुदेवाय कृष्णाय सात्वतां पतये नमः
namas tubhyaṃ bhagavate puruṣāya mahātmane vāsudevāya kṛṣṇāya sātvatāṃ pataye namaḥ
Sanskrit only: no published translation is held for this verse.
स्वच्छन्दोपात्त-देहाय विशुद्ध-ज्ञान-मूर्तये सर्वस्मै सर्व-बीजाय सर्व-भूतात्मने नमः
svacchandopātta-dehāya viśuddha-jñāna-mūrtaye sarvasmai sarva-bījāya sarva-bhūtātmane namaḥ
Sanskrit only: no published translation is held for this verse.
मयेदं भगवन् गोष्ठ- नाशायासार-वायुभिः चेष्टितं विहते यज्ञे मानिना तीव्र-मन्युना
mayedaṃ bhagavan goṣṭha- nāśāyāsāra-vāyubhiḥ ceṣṭitaṃ vihate yajñe māninā tīvra-manyunā
Sanskrit only: no published translation is held for this verse.
त्वयेशानुगृहीतो ऽस्मि ध्वस्त-स्तम्भो वृथोद्यमः ईश्वरं गुरुम् आत्मानं त्वाम् अहं शरणं गतः
tvayeśānugṛhīto 'smi dhvasta-stambho vṛthodyamaḥ īśvaraṃ gurum ātmānaṃ tvām ahaṃ śaraṇaṃ gataḥ
Sanskrit only: no published translation is held for this verse.
श्री-शुक उवाच एवं सङ्कीर्तितः कृष्णो मघोना भगवान् अमुम् मेघ-गम्भीरया वाचा प्रहसन्न् इदम् अब्रवीत्
śrī-śuka uvāca evaṃ saṅkīrtitaḥ kṛṣṇo maghonā bhagavān amum megha-gambhīrayā vācā prahasann idam abravīt
Sanskrit only: no published translation is held for this verse.
श्री-भगवान् उवाच मया ते ऽकारि मघवन् मख-भङ्गो ऽनुगृह्णता मद्-अनुस्मृतये नित्यं मत्तस्येन्द्र-श्रिया भृशम्
śrī-bhagavān uvāca mayā te 'kāri maghavan makha-bhaṅgo 'nugṛhṇatā mad-anusmṛtaye nityaṃ mattasyendra-śriyā bhṛśam
Sanskrit only: no published translation is held for this verse.
माम् ऐश्वर्य-श्री-मदान्धो दण्ड पाणिं न पश्यति तं भ्रंशयामि सम्पद्भ्यो यस्य चेच्छाम्य् अनुग्रहम्
mām aiśvarya-śrī-madāndho daṇḍa pāṇiṃ na paśyati taṃ bhraṃśayāmi sampadbhyo yasya cecchāmy anugraham
Sanskrit only: no published translation is held for this verse.
गम्यतां शक्र भद्रं वः क्रियतां मे ऽनुशासनम् स्थीयतां स्वाधिकारेषु युक्तैर् वः स्तम्भ-वर्जितैः
gamyatāṃ śakra bhadraṃ vaḥ kriyatāṃ me 'nuśāsanam sthīyatāṃ svādhikāreṣu yuktair vaḥ stambha-varjitaiḥ
Sanskrit only: no published translation is held for this verse.
अथाह सुरभिः कृष्णम् अभिवन्द्य मनस्विनी स्व-सन्तानैर् उपामन्त्र्य गोप-रूपिणम् ईश्वरम्
athāha surabhiḥ kṛṣṇam abhivandya manasvinī sva-santānair upāmantrya gopa-rūpiṇam īśvaram
Sanskrit only: no published translation is held for this verse.
सुरभिर् उवाच कृष्ण कृष्ण महा-योगिन् विश्वात्मन् विश्व-सम्भव भवता लोक-नाथेन स-नाथा वयम् अच्युत
surabhir uvāca kṛṣṇa kṛṣṇa mahā-yogin viśvātman viśva-sambhava bhavatā loka-nāthena sa-nāthā vayam acyuta
Sanskrit only: no published translation is held for this verse.
त्वं नः परमकं दैवं त्वं न इन्द्रो जगत्-पते भवाय भव गो-विप्र देवानां ये च साधवः
tvaṃ naḥ paramakaṃ daivaṃ tvaṃ na indro jagat-pate bhavāya bhava go-vipra devānāṃ ye ca sādhavaḥ
Sanskrit only: no published translation is held for this verse.
इन्द्रं नस् त्वाभिषेक्ष्यामो ब्रह्मणा चोदिता वयम् अवतीर्णो ऽसि विश्वात्मन् भूमेर् भारापनुत्तये
indraṃ nas tvābhiṣekṣyāmo brahmaṇā coditā vayam avatīrṇo 'si viśvātman bhūmer bhārāpanuttaye
Sanskrit only: no published translation is held for this verse.
शृई-शुक उवाच एवं कृष्णम् उपामन्त्र्य सुरभिः पयसात्मनः जलैर् आकाश-गङ्गाया ऐरावत-करोद्धृतैः
śṛī-śuka uvāca evaṃ kṛṣṇam upāmantrya surabhiḥ payasātmanaḥ jalair ākāśa-gaṅgāyā airāvata-karoddhṛtaiḥ
Sanskrit only: no published translation is held for this verse.
इन्द्रः सुरर्षिभिः साकं चोदितो देव-मातृभिः अभ्यसिञ्चत दाशार्हं गोविन्द इति चाभ्यधात्
indraḥ surarṣibhiḥ sākaṃ codito deva-mātṛbhiḥ abhyasiñcata dāśārhaṃ govinda iti cābhyadhāt
Sanskrit only: no published translation is held for this verse.
तत्रागतास् तुम्बुरु-नारदादयो गन्धर्व-विद्याधर-सिद्ध-चारणाः जगुर् यशो लोक-मलापहं हरेः सुराङ्गनाः सन्ननृतुर् मुदान्विताः
tatrāgatās tumburu-nāradādayo gandharva-vidyādhara-siddha-cāraṇāḥ jagur yaśo loka-malāpahaṃ hareḥ surāṅganāḥ sannanṛtur mudānvitāḥ
Sanskrit only: no published translation is held for this verse.
तं तुष्टुवुर् देव-निकाय-केतवो ह्य् अवाकिरंश् चाद्भुत-पुष्प-वृष्टिभिः लोकाः परां निर्वृतिम् आप्नुवंस् त्रयो गावस् तदा गाम् अनयन् पयो-द्रुताम्
taṃ tuṣṭuvur deva-nikāya-ketavo hy avākiraṃś cādbhuta-puṣpa-vṛṣṭibhiḥ lokāḥ parāṃ nirvṛtim āpnuvaṃs trayo gāvas tadā gām anayan payo-drutām
Sanskrit only: no published translation is held for this verse.
नाना-रसौघाः सरितो वृक्षा आसन् मधु-स्रवाः अकृष्ट-पच्यौषधयो गिरयो ऽबिभ्रन् उन् मणीन्
nānā-rasaughāḥ sarito vṛkṣā āsan madhu-sravāḥ akṛṣṭa-pacyauṣadhayo girayo 'bibhran un maṇīn
Sanskrit only: no published translation is held for this verse.
कृष्णे ऽभिषिक्त एतानि सर्वाणि कुरु-नन्दन निर्वैराण्य् अभवंस् तात क्रूराण्य् अपि निसर्गतः
kṛṣṇe 'bhiṣikta etāni sarvāṇi kuru-nandana nirvairāṇy abhavaṃs tāta krūrāṇy api nisargataḥ
Sanskrit only: no published translation is held for this verse.
इति गो-गोकुल-पतिं गोविन्दम् अभिषिच्य सः अनुज्ञातो ययौ शक्रो वृतो देवादिभिर् दिवम्
iti go-gokula-patiṃ govindam abhiṣicya saḥ anujñāto yayau śakro vṛto devādibhir divam
Sanskrit only: no published translation is held for this verse.