Library·Bhāgavata Purāṇa·10·10.28
श्री-बादरायणिर् उवाच एकादश्यां निराहारः समभ्यर्च्य जनार्दनम् स्नातुं नन्दस् तु कालिन्द्यां द्वादश्यां जलम् आविशत्
śrī-bādarāyaṇir uvāca ekādaśyāṃ nirāhāraḥ samabhyarcya janārdanam snātuṃ nandas tu kālindyāṃ dvādaśyāṃ jalam āviśat
Sanskrit only: no published translation is held for this verse.
तं गृहीत्वानयद् भृत्यो वरुणस्यासुरो ऽन्तिकम् अवज्ञायासुरीं वेलां प्रविष्टम् उदकं निशि
taṃ gṛhītvānayad bhṛtyo varuṇasyāsuro 'ntikam avajñāyāsurīṃ velāṃ praviṣṭam udakaṃ niśi
Sanskrit only: no published translation is held for this verse.
चुक्रुशुस् तम् अपश्यन्तः कृष्ण रामेति गोपकाः भगवांस् तद् उपश्रुत्य पितरं वरुणाहृतम् तद्-अन्तिकं गतो राजन् स्वानाम् अभय-दो विभुः
cukruśus tam apaśyantaḥ kṛṣṇa rāmeti gopakāḥ bhagavāṃs tad upaśrutya pitaraṃ varuṇāhṛtam tad-antikaṃ gato rājan svānām abhaya-do vibhuḥ
Sanskrit only: no published translation is held for this verse.
प्राप्तं वीक्ष्य हृषीकेशं लोक-पालः सपर्यया महत्या पूजयित्वाह तद्-दर्शन-महोत्सवः
prāptaṃ vīkṣya hṛṣīkeśaṃ loka-pālaḥ saparyayā mahatyā pūjayitvāha tad-darśana-mahotsavaḥ
Sanskrit only: no published translation is held for this verse.
श्री-वरुण उवाच अद्य मे निभृतो देहो ऽद्यैवार्थो ऽधिगतः प्रभो त्वत्-पाद-भाजो भगवन्न् अवापुः पारम् अध्वनः
śrī-varuṇa uvāca adya me nibhṛto deho 'dyaivārtho 'dhigataḥ prabho tvat-pāda-bhājo bhagavann avāpuḥ pāram adhvanaḥ
Sanskrit only: no published translation is held for this verse.
नमस् तुभ्यं भगवते ब्रह्मणे परमात्मने न यत्र श्रूयते माया लोक-सृष्टि-विकल्पना
namas tubhyaṃ bhagavate brahmaṇe paramātmane na yatra śrūyate māyā loka-sṛṣṭi-vikalpanā
Sanskrit only: no published translation is held for this verse.
अजानता मामकेन मूढेनाकार्य-वेदिना आनीतो ऽयं तव पिता तद् भवान् क्षन्तुम् अर्हति
ajānatā māmakena mūḍhenākārya-vedinā ānīto 'yaṃ tava pitā tad bhavān kṣantum arhati
Sanskrit only: no published translation is held for this verse.
ममाप्य् अनुग्रहं कृष्ण कर्तुम् अर्हस्य् अशेष-दृक् गोविन्द नीयताम् एष पिता ते पितृ-वत्सल
mamāpy anugrahaṃ kṛṣṇa kartum arhasy aśeṣa-dṛk govinda nīyatām eṣa pitā te pitṛ-vatsala
Sanskrit only: no published translation is held for this verse.
श्री-शुक उवाच एवं प्रसादितः कृष्णो भगवान् ईश्वरेश्वरः आदायागात् स्व-पितरं बन्धूनां चावहन् मुदम्
śrī-śuka uvāca evaṃ prasāditaḥ kṛṣṇo bhagavān īśvareśvaraḥ ādāyāgāt sva-pitaraṃ bandhūnāṃ cāvahan mudam
Sanskrit only: no published translation is held for this verse.
नन्दस् त्व् अतीन्द्रियं दृष्ट्वा लोक-पाल-महोदयम् कृष्णे च सन्नतिं तेषां ज्ञातिभ्यो विस्मितो ऽब्रवीत्
nandas tv atīndriyaṃ dṛṣṭvā loka-pāla-mahodayam kṛṣṇe ca sannatiṃ teṣāṃ jñātibhyo vismito 'bravīt
Sanskrit only: no published translation is held for this verse.
ते चौत्सुक्य-धियो राजन् मत्वा गोपास् तम् ईश्वरम् अपि नः स्व-गतिं सूक्ष्माम् उपाधास्यद् अधीश्वरः
te cautsukya-dhiyo rājan matvā gopās tam īśvaram api naḥ sva-gatiṃ sūkṣmām upādhāsyad adhīśvaraḥ
Sanskrit only: no published translation is held for this verse.
इति स्वानां स भगवान् विज्ञायाखिल-दृक् स्वयम् सङ्कल्प-सिद्धये तेषां कृपयैतद् अचिन्तयत्
iti svānāṃ sa bhagavān vijñāyākhila-dṛk svayam saṅkalpa-siddhaye teṣāṃ kṛpayaitad acintayat
Sanskrit only: no published translation is held for this verse.
जनो वै लोक एतस्मिन्न् अविद्या-काम-कर्मभिः उच्चावचासु गतिषु न वेद स्वां गतिं भ्रमन्
jano vai loka etasminn avidyā-kāma-karmabhiḥ uccāvacāsu gatiṣu na veda svāṃ gatiṃ bhraman
Sanskrit only: no published translation is held for this verse.
इति सञ्चिन्त्य भगवान् महा-कारुणिको हरिः दर्शयाम् आस लोकं स्वं गोपानां तमसः परम्
iti sañcintya bhagavān mahā-kāruṇiko hariḥ darśayām āsa lokaṃ svaṃ gopānāṃ tamasaḥ param
Sanskrit only: no published translation is held for this verse.
सत्यं ज्ञानम् अनन्तं यद् ब्रह्म-ज्योतिः सनातनम् यद् धि पश्यन्ति मुनयो गुणापाये समाहिताः
satyaṃ jñānam anantaṃ yad brahma-jyotiḥ sanātanam yad dhi paśyanti munayo guṇāpāye samāhitāḥ
Sanskrit only: no published translation is held for this verse.
ते तु ब्रह्म-ह्रदम् नीता मग्नाः कृष्णेन चोद्धृताः ददृशुर् ब्रह्मणो लोकं यत्राक्रूरो ऽध्यगात् पुरा
te tu brahma-hradam nītā magnāḥ kṛṣṇena coddhṛtāḥ dadṛśur brahmaṇo lokaṃ yatrākrūro 'dhyagāt purā
Sanskrit only: no published translation is held for this verse.
नन्दादयस् तु तं दृष्ट्वा परमानन्द-निवृताः कृष्णं च तत्र च्छन्दोभिः स्तूयमानं सु-विस्मिताः
nandādayas tu taṃ dṛṣṭvā paramānanda-nivṛtāḥ kṛṣṇaṃ ca tatra cchandobhiḥ stūyamānaṃ su-vismitāḥ
Sanskrit only: no published translation is held for this verse.