Bhāgavata Purāṇa 10.32

श्री-शुक उवाच इति गोप्यः प्रगायन्त्यः प्रलपन्त्यश् च चित्रधा रुरुदुः सु-स्वरं राजन् कृष्ण-दर्शन-लालसाः

śrī-śuka uvāca iti gopyaḥ pragāyantyaḥ pralapantyaś ca citradhā ruruduḥ su-svaraṃ rājan kṛṣṇa-darśana-lālasāḥ

Sanskrit only: no published translation is held for this verse.

तासाम् आविरभूच् छौरिः स्मयमान-मुखाम्बुजः पीताम्बर-धरः स्रग्वी साक्षान् मन्मथ-मन्मथः

tāsām āvirabhūc chauriḥ smayamāna-mukhāmbujaḥ pītāmbara-dharaḥ sragvī sākṣān manmatha-manmathaḥ

Sanskrit only: no published translation is held for this verse.

तं विलोक्यागतं प्रेष्ठं प्रीत्य्-उत्फुल्ल-दृशो ऽबलाः उत्तस्थुर् युगपत् सर्वास् तन्वः प्राणम् इवागतम्

taṃ vilokyāgataṃ preṣṭhaṃ prīty-utphulla-dṛśo 'balāḥ uttasthur yugapat sarvās tanvaḥ prāṇam ivāgatam

Sanskrit only: no published translation is held for this verse.

काचित् कराम्बुजं शौरेर् जगृहे ऽञ्जलिना मुदा काचिद् दधार तद्-बाहुम् अंसे चन्दन-भूषितम्

kācit karāmbujaṃ śaurer jagṛhe 'ñjalinā mudā kācid dadhāra tad-bāhum aṃse candana-bhūṣitam

Sanskrit only: no published translation is held for this verse.

काचिद् अञ्जलिनागृह्णात् तन्वी ताम्बूल-चर्वितम् एका तद्-अङ्घ्रि-कमलं सन्तप्ता स्तनयोर् अधात्

kācid añjalināgṛhṇāt tanvī tāmbūla-carvitam ekā tad-aṅghri-kamalaṃ santaptā stanayor adhāt

Sanskrit only: no published translation is held for this verse.

एका भ्रु-कुटिम् आबध्य प्रेम-संरम्भ-विह्वला घ्नन्तीवैक्षत् कटाक्षेपैः सन्दष्ट-दशन-च्छदा

ekā bhru-kuṭim ābadhya prema-saṃrambha-vihvalā ghnantīvaikṣat kaṭākṣepaiḥ sandaṣṭa-daśana-cchadā

Sanskrit only: no published translation is held for this verse.

अपरानिमिषद्-दृग्भ्यां जुषाणा तन्-मुखाम्बुजम् आपीतम् अपि नातृप्यत् सन्तस् तच्-चरणं यथा

aparānimiṣad-dṛgbhyāṃ juṣāṇā tan-mukhāmbujam āpītam api nātṛpyat santas tac-caraṇaṃ yathā

Sanskrit only: no published translation is held for this verse.

तं काचिन् नेत्र-रन्ध्रेण हृदि कृत्वा निमील्य च पुलकाङ्ग्य् उपगुह्यास्ते योगीवानन्द-सम्प्लुता

taṃ kācin netra-randhreṇa hṛdi kṛtvā nimīlya ca pulakāṅgy upaguhyāste yogīvānanda-samplutā

Sanskrit only: no published translation is held for this verse.

सर्वास् ताः केशवालोक- परमोत्सव-निर्वृताः जहुर् विरह-जं तापं प्राज्ञं प्राप्य यथा जनाः

sarvās tāḥ keśavāloka- paramotsava-nirvṛtāḥ jahur viraha-jaṃ tāpaṃ prājñaṃ prāpya yathā janāḥ

Sanskrit only: no published translation is held for this verse.

ताभिर् विधूत-शोकाभिर् भगवान् अच्युतो वृतः व्यरोचताधिकं तात पुरुषः शक्तिभिर् यथा

tābhir vidhūta-śokābhir bhagavān acyuto vṛtaḥ vyarocatādhikaṃ tāta puruṣaḥ śaktibhir yathā

Sanskrit only: no published translation is held for this verse.

ताः समादाय कालिन्द्या निर्विश्य पुलिनं विभुः विकसत्-कुन्द-मन्दार सुरभ्य्-अनिल-षट्पदम्

tāḥ samādāya kālindyā nirviśya pulinaṃ vibhuḥ vikasat-kunda-mandāra surabhy-anila-ṣaṭpadam

Sanskrit only: no published translation is held for this verse.

शरच्-चन्द्रांशु-सन्दोह- ध्वस्त-दोषा-तमः शिवम् कृष्णाया हस्त-तरला चित-कोमल-वालुकम्

śarac-candrāṃśu-sandoha- dhvasta-doṣā-tamaḥ śivam kṛṣṇāyā hasta-taralā cita-komala-vālukam

Sanskrit only: no published translation is held for this verse.

तद्-दर्शनाह्लाद-विधूत-हृद्-रुजो मनोरथान्तं श्रुतयो यथा ययुः स्वैर् उत्तरीयैः कुच-कुङ्कुमाङ्कितैर् अचीकॢपन्न् आसनम् आत्म-बन्धवे

tad-darśanāhlāda-vidhūta-hṛd-rujo manorathāntaṃ śrutayo yathā yayuḥ svair uttarīyaiḥ kuca-kuṅkumāṅkitair acīkḷpann āsanam ātma-bandhave

Sanskrit only: no published translation is held for this verse.

तत्रोपविष्टो भगवान् स ईश्वरो योगेश्वरान्तर्-हृदि कल्पितासनः चकास गोपी-परिषद्-गतो ऽर्चितस् त्रैलोक्य-लक्ष्म्य्-एक-पदं वपुर् दधत्

tatropaviṣṭo bhagavān sa īśvaro yogeśvarāntar-hṛdi kalpitāsanaḥ cakāsa gopī-pariṣad-gato 'rcitas trailokya-lakṣmy-eka-padaṃ vapur dadhat

Sanskrit only: no published translation is held for this verse.

सभाजयित्वा तम् अनङ्ग-दीपनं सहास-लीलेक्षण-विभ्रम-भ्रुवा संस्पर्शनेनाङ्क-कृताङ्घ्रि-हस्तयोः संस्तुत्य ईषत् कुपिता बभाषिरे

sabhājayitvā tam anaṅga-dīpanaṃ sahāsa-līlekṣaṇa-vibhrama-bhruvā saṃsparśanenāṅka-kṛtāṅghri-hastayoḥ saṃstutya īṣat kupitā babhāṣire

Sanskrit only: no published translation is held for this verse.

श्री-गोप्य ऊचुः भजतो ऽनुभजन्त्य् एक एक एतद्-विपर्ययम् नोभयांश् च भजन्त्य् एक एतन् नो ब्रूहि साधु भोः

śrī-gopya ūcuḥ bhajato 'nubhajanty eka eka etad-viparyayam nobhayāṃś ca bhajanty eka etan no brūhi sādhu bhoḥ

Sanskrit only: no published translation is held for this verse.

श्री-भगवान् उवाच मिथो भजन्ति ये सख्यः स्वार्थैकान्तोद्यमा हि ते न तत्र सौहृदं धर्मः स्वार्थार्थं तद् धि नान्यथा

śrī-bhagavān uvāca mitho bhajanti ye sakhyaḥ svārthaikāntodyamā hi te na tatra sauhṛdaṃ dharmaḥ svārthārthaṃ tad dhi nānyathā

Sanskrit only: no published translation is held for this verse.

भजन्त्य् अभजतो ये वै करुणाः पितरौ यथा धर्मो निरपवादो ऽत्र सौहृदं च सु-मध्यमाः

bhajanty abhajato ye vai karuṇāḥ pitarau yathā dharmo nirapavādo 'tra sauhṛdaṃ ca su-madhyamāḥ

Sanskrit only: no published translation is held for this verse.

भजतो ऽपि न वै केचिद् भजन्त्य् अभजतः कुतः आत्मारामा ह्य् आप्त-कामा अकृत-ज्ञा गुरु-द्रुहः

bhajato 'pi na vai kecid bhajanty abhajataḥ kutaḥ ātmārāmā hy āpta-kāmā akṛta-jñā guru-druhaḥ

Sanskrit only: no published translation is held for this verse.

नाहं तु सख्यो भजतो ऽपि जन्तून् भजाम्य् अमीषाम् अनुवृत्ति-वृत्तये यथाधनो लब्ध-धने विनष्टे तच्-चिन्तयान्यन् निभृतो न वेद

nāhaṃ tu sakhyo bhajato 'pi jantūn bhajāmy amīṣām anuvṛtti-vṛttaye yathādhano labdha-dhane vinaṣṭe tac-cintayānyan nibhṛto na veda

Sanskrit only: no published translation is held for this verse.

एवं मद्-अर्थोज्झित-लोक-वेद स्वानाम् हि वो मय्य् अनुवृत्तये ऽबलाः मयापरोक्षं भजता तिरोहितं मासूयितुं मार्हथ तत् प्रियं प्रियाः

evaṃ mad-arthojjhita-loka-veda svānām hi vo mayy anuvṛttaye 'balāḥ mayāparokṣaṃ bhajatā tirohitaṃ māsūyituṃ mārhatha tat priyaṃ priyāḥ

Sanskrit only: no published translation is held for this verse.

न पारये ऽहं निरवद्य-संयुजां स्व-साधु-कृत्यं विबुधायुषापि वः या माभजन् दुर्जर-गेह-शृङ्खलाः संवृश्च्य तद् वः प्रतियातु साधुना

na pāraye 'haṃ niravadya-saṃyujāṃ sva-sādhu-kṛtyaṃ vibudhāyuṣāpi vaḥ yā mābhajan durjara-geha-śṛṅkhalāḥ saṃvṛścya tad vaḥ pratiyātu sādhunā

Sanskrit only: no published translation is held for this verse.