Library·Bhāgavata Purāṇa·10·10.34
श्री-शुक उवाच एकदा देव-यात्रायां गोपाला जात-कौतुकाः अनोभिर् अनडुद्-युक्तैः प्रययुस् ते ऽम्बिका-वनम्
śrī-śuka uvāca ekadā deva-yātrāyāṃ gopālā jāta-kautukāḥ anobhir anaḍud-yuktaiḥ prayayus te 'mbikā-vanam
Sanskrit only: no published translation is held for this verse.
तत्र स्नात्वा सरस्वत्यां देवं पशु-पतिं विभुम् आनर्चुर् अर्हणैर् भक्त्या देवीं च णृपते ऽम्बिकाम्
tatra snātvā sarasvatyāṃ devaṃ paśu-patiṃ vibhum ānarcur arhaṇair bhaktyā devīṃ ca ṇṛpate 'mbikām
Sanskrit only: no published translation is held for this verse.
गावो हिरण्यं वासांसि मधु मध्व्-अन्नम् आदृताः ब्राह्मणेभ्यो ददुः सर्वे देवो नः प्रीयताम् इति
gāvo hiraṇyaṃ vāsāṃsi madhu madhv-annam ādṛtāḥ brāhmaṇebhyo daduḥ sarve devo naḥ prīyatām iti
Sanskrit only: no published translation is held for this verse.
ऊषुः सरस्वती-तीरे जलं प्राश्य यत-व्रताः रजनीं तां महा-भागा नन्द-सुनन्दकादयः
ūṣuḥ sarasvatī-tīre jalaṃ prāśya yata-vratāḥ rajanīṃ tāṃ mahā-bhāgā nanda-sunandakādayaḥ
Sanskrit only: no published translation is held for this verse.
कश्चिन् महान् अहिस् तस्मिन् विपिने ऽति-बुभुक्षितः यदृच्छयागतो नन्दं शयानम् उर-गो ऽग्रसीत्
kaścin mahān ahis tasmin vipine 'ti-bubhukṣitaḥ yadṛcchayāgato nandaṃ śayānam ura-go 'grasīt
Sanskrit only: no published translation is held for this verse.
स चुक्रोशाहिना ग्रस्तः कृष्ण कृष्ण महान् अयम् सर्पो मां ग्रसते तात प्रपन्नं परिमोचय
sa cukrośāhinā grastaḥ kṛṣṇa kṛṣṇa mahān ayam sarpo māṃ grasate tāta prapannaṃ parimocaya
Sanskrit only: no published translation is held for this verse.
तस्य चाक्रन्दितं श्रुत्वा गोपालाः सहसोत्थिताः ग्रस्तं च दृष्ट्वा विभ्रान्ताः सर्पं विव्यधुर् उल्मुकैः
tasya cākranditaṃ śrutvā gopālāḥ sahasotthitāḥ grastaṃ ca dṛṣṭvā vibhrāntāḥ sarpaṃ vivyadhur ulmukaiḥ
Sanskrit only: no published translation is held for this verse.
अलातैर् दह्यमानो ऽपि नामुञ्चत् तम् उरङ्गमः तम् अस्पृशत् पदाभ्येत्य भगवान् सात्वतां पतिः
alātair dahyamāno 'pi nāmuñcat tam uraṅgamaḥ tam aspṛśat padābhyetya bhagavān sātvatāṃ patiḥ
Sanskrit only: no published translation is held for this verse.
स वै भगवतः श्रीमत् पाद-स्पर्श-हताशुभः भेजे सर्प-वपुर् हित्वा रूपं विद्याधरार्चितम्
sa vai bhagavataḥ śrīmat pāda-sparśa-hatāśubhaḥ bheje sarpa-vapur hitvā rūpaṃ vidyādharārcitam
Sanskrit only: no published translation is held for this verse.
तम् अपृच्छद् धृषीकेशः प्रणतं समवस्थितम् दीप्यमानेन वपुषा पुरुषं हेम-मालिनम्
tam apṛcchad dhṛṣīkeśaḥ praṇataṃ samavasthitam dīpyamānena vapuṣā puruṣaṃ hema-mālinam
Sanskrit only: no published translation is held for this verse.
को भवान् परया लक्ष्म्या रोचते ऽद्भुत-दर्शनः कथं जुगुप्सिताम् एतां गतिं वा प्रापितो ऽवशः
ko bhavān parayā lakṣmyā rocate 'dbhuta-darśanaḥ kathaṃ jugupsitām etāṃ gatiṃ vā prāpito 'vaśaḥ
Sanskrit only: no published translation is held for this verse.
सर्प उवाच अहं विद्याधरः कश्चित् सुदर्शन इति श्रुतः श्रिया स्वरूप-सम्पत्त्या विमानेनाचरन् दिशः
sarpa uvāca ahaṃ vidyādharaḥ kaścit sudarśana iti śrutaḥ śriyā svarūpa-sampattyā vimānenācaran diśaḥ
Sanskrit only: no published translation is held for this verse.
ऋषीन् विरूपाङ्गिरसः प्राहसं रूप-दर्पितः तैर् इमां प्रापितो योनिं प्रलब्धैः स्वेन पाप्मना
ṛṣīn virūpāṅgirasaḥ prāhasaṃ rūpa-darpitaḥ tair imāṃ prāpito yoniṃ pralabdhaiḥ svena pāpmanā
Sanskrit only: no published translation is held for this verse.
शापो मे ऽनुग्रहायैव कृतस् तैः करुणात्मभिः यद् अहं लोक-गुरुणा पदा स्पृष्टो हताशुभः
śāpo me 'nugrahāyaiva kṛtas taiḥ karuṇātmabhiḥ yad ahaṃ loka-guruṇā padā spṛṣṭo hatāśubhaḥ
Sanskrit only: no published translation is held for this verse.
तं त्वाहं भव-भीतानां प्रपन्नानां भयापहम् आपृच्छे शाप-निर्मुक्तः पाद-स्पर्शाद् अमीव-हन्
taṃ tvāhaṃ bhava-bhītānāṃ prapannānāṃ bhayāpaham āpṛcche śāpa-nirmuktaḥ pāda-sparśād amīva-han
Sanskrit only: no published translation is held for this verse.
प्रपन्नो ऽस्मि महा-योगिन् महा-पुरुष सत्-पते अनुजानीहि मां देव सर्व-लोकेश्वरेश्वर
prapanno 'smi mahā-yogin mahā-puruṣa sat-pate anujānīhi māṃ deva sarva-lokeśvareśvara
Sanskrit only: no published translation is held for this verse.
ब्रह्म-दण्डाद् विमुक्तो ऽहं सद्यस् ते ऽच्युत दर्शनात् यन्-नाम गृह्णन्न् अखिलान् श्रोतॄन् आत्मानम् एव च सद्यः पुनाति किं भूयस् तस्य स्पृष्टः पदा हि ते
brahma-daṇḍād vimukto 'haṃ sadyas te 'cyuta darśanāt yan-nāma gṛhṇann akhilān śrotṝn ātmānam eva ca sadyaḥ punāti kiṃ bhūyas tasya spṛṣṭaḥ padā hi te
Sanskrit only: no published translation is held for this verse.
इत्य् अनुज्ञाप्य दाशार्हं परिक्रम्याभिवन्द्य च सुदर्शनो दिवं यातः कृच्छ्रान् नन्दश् च मोचितः
ity anujñāpya dāśārhaṃ parikramyābhivandya ca sudarśano divaṃ yātaḥ kṛcchrān nandaś ca mocitaḥ
Sanskrit only: no published translation is held for this verse.
निशाम्य कृष्णस्य तद् आत्म-वैभवं व्रजौकसो विस्मित-चेतसस् ततः समाप्य तस्मिन् नियमं पुनर् व्रजं णृपाययुस् तत् कथयन्त आदृताः
niśāmya kṛṣṇasya tad ātma-vaibhavaṃ vrajaukaso vismita-cetasas tataḥ samāpya tasmin niyamaṃ punar vrajaṃ ṇṛpāyayus tat kathayanta ādṛtāḥ
Sanskrit only: no published translation is held for this verse.
कदाचिद् अथ गोविन्दो रामश् चाद्भुत-विक्रमः विजह्रतुर् वने रात्र्यां मध्य-गौ व्रज-योषिताम्
kadācid atha govindo rāmaś cādbhuta-vikramaḥ vijahratur vane rātryāṃ madhya-gau vraja-yoṣitām
Sanskrit only: no published translation is held for this verse.
उपगीयमानौ ललितं स्त्री-जनैर् बद्ध-सौहृदैः स्व्-अलङ्कृतानुलिप्ताङ्गौ स्रग्विनौ विरजो-ऽम्बरौ
upagīyamānau lalitaṃ strī-janair baddha-sauhṛdaiḥ sv-alaṅkṛtānuliptāṅgau sragvinau virajo-'mbarau
Sanskrit only: no published translation is held for this verse.
निशा-मुखं मानयन्ताव् उदितोडुप-तारकम् मल्लिका-गन्ध-मत्तालि- जुष्टं कुमुद-वायुना
niśā-mukhaṃ mānayantāv uditoḍupa-tārakam mallikā-gandha-mattāli- juṣṭaṃ kumuda-vāyunā
Sanskrit only: no published translation is held for this verse.
जगतुः सर्व-भूतानां मनः-श्रवण-मङ्गलम् तौ कल्पयन्तौ युगपत् स्वर-मण्डल-मूर्च्छितम्
jagatuḥ sarva-bhūtānāṃ manaḥ-śravaṇa-maṅgalam tau kalpayantau yugapat svara-maṇḍala-mūrcchitam
Sanskrit only: no published translation is held for this verse.
गोप्यस् तद्-गीतम् आकर्ण्य मूर्च्छिता नाविदन् नृप स्रंसद्-दुकूलम् आत्मानं स्रस्त-केश-स्रजं ततः
gopyas tad-gītam ākarṇya mūrcchitā nāvidan nṛpa sraṃsad-dukūlam ātmānaṃ srasta-keśa-srajaṃ tataḥ
Sanskrit only: no published translation is held for this verse.
एवं विक्रीडतोः स्वैरं गायतोः सम्प्रमत्त-वत् शङ्खचूड इति ख्यातो धनदानुचरो ऽभ्यगात्
evaṃ vikrīḍatoḥ svairaṃ gāyatoḥ sampramatta-vat śaṅkhacūḍa iti khyāto dhanadānucaro 'bhyagāt
Sanskrit only: no published translation is held for this verse.
तयोर् निरीक्षतो राजंस् तन्-नाथं प्रमदा-जनम् क्रोशन्तं कालयाम् आस दिश्य् उदीच्याम् अशङ्कितः
tayor nirīkṣato rājaṃs tan-nāthaṃ pramadā-janam krośantaṃ kālayām āsa diśy udīcyām aśaṅkitaḥ
Sanskrit only: no published translation is held for this verse.
क्रोशन्तं कृष्ण रामेति विलोक्य स्व-परिग्रहम् यथा गा दस्युना ग्रस्ता भ्रातराव् अन्वधावताम्
krośantaṃ kṛṣṇa rāmeti vilokya sva-parigraham yathā gā dasyunā grastā bhrātarāv anvadhāvatām
Sanskrit only: no published translation is held for this verse.
मा भैष्टेत्य् अभयारावौ शाल-हस्तौ तरस्विनौ आसेदतुस् तं तरसा त्वरितं गुह्यकाधमम्
mā bhaiṣṭety abhayārāvau śāla-hastau tarasvinau āsedatus taṃ tarasā tvaritaṃ guhyakādhamam
Sanskrit only: no published translation is held for this verse.
स वीक्ष्य ताव् अनुप्राप्तौ काल-मृत्यू इवोद्विजन् विषृज्य स्त्री-जनं मूढः प्राद्रवज् जीवितेच्छया
sa vīkṣya tāv anuprāptau kāla-mṛtyū ivodvijan viṣṛjya strī-janaṃ mūḍhaḥ prādravaj jīvitecchayā
Sanskrit only: no published translation is held for this verse.
तम् अन्वधावद् गोविन्दो यत्र यत्र स धावति जिहीर्षुस् तच्-छिरो-रत्नं तस्थौ रक्षन् स्त्रियो बलः
tam anvadhāvad govindo yatra yatra sa dhāvati jihīrṣus tac-chiro-ratnaṃ tasthau rakṣan striyo balaḥ
Sanskrit only: no published translation is held for this verse.
अविदूर इवाभ्येत्य शिरस् तस्य दुरात्मनः जहार मुष्टिनैवाङ्ग सह-चूड-मणिं विभुः
avidūra ivābhyetya śiras tasya durātmanaḥ jahāra muṣṭinaivāṅga saha-cūḍa-maṇiṃ vibhuḥ
Sanskrit only: no published translation is held for this verse.
शङ्खचूडं निहत्यैवं मणिम् आदाय भास्वरम् अग्रजायाददात् प्रीत्या पश्यन्तीनां च योषिताम्
śaṅkhacūḍaṃ nihatyaivaṃ maṇim ādāya bhāsvaram agrajāyādadāt prītyā paśyantīnāṃ ca yoṣitām
Sanskrit only: no published translation is held for this verse.