Library·Bhāgavata Purāṇa·10·10.41
श्री-शुक उवाच स्तुवतस् तस्य भगवान् दर्शयित्वा जले वपुः भूयः समाहरत् कृष्णो नटो नाट्यम् इवात्मनः
śrī-śuka uvāca stuvatas tasya bhagavān darśayitvā jale vapuḥ bhūyaḥ samāharat kṛṣṇo naṭo nāṭyam ivātmanaḥ
Sanskrit only: no published translation is held for this verse.
सो ऽपि चान्तर्हितं वीक्ष्य जलाद् उन्मज्य सत्वरः कृत्वा चावश्यकं सर्वं विस्मितो रथम् आगमत्
so 'pi cāntarhitaṃ vīkṣya jalād unmajya satvaraḥ kṛtvā cāvaśyakaṃ sarvaṃ vismito ratham āgamat
Sanskrit only: no published translation is held for this verse.
तम् अपृच्छद् धृषीकेशः किं ते दृष्टम् इवाद्भुतम् भूमौ वियति तोये वा तथा त्वां लक्षयामहे
tam apṛcchad dhṛṣīkeśaḥ kiṃ te dṛṣṭam ivādbhutam bhūmau viyati toye vā tathā tvāṃ lakṣayāmahe
Sanskrit only: no published translation is held for this verse.
श्री-अक्रूर उवाच अद्भुतानीह यावन्ति भूमौ वियति वा जले त्वयि विश्वात्मके तानि किं मे ऽदृष्टं विपश्यतः
śrī-akrūra uvāca adbhutānīha yāvanti bhūmau viyati vā jale tvayi viśvātmake tāni kiṃ me 'dṛṣṭaṃ vipaśyataḥ
Sanskrit only: no published translation is held for this verse.
यत्राद्भुतानि सर्वाणि भूमौ वियति वा जले तं त्वानुपश्यतो ब्रह्मन् किं मे दृष्टम् इहाद्भुतम्
yatrādbhutāni sarvāṇi bhūmau viyati vā jale taṃ tvānupaśyato brahman kiṃ me dṛṣṭam ihādbhutam
Sanskrit only: no published translation is held for this verse.
इत्य् उक्त्वा चोदयाम् आस स्यन्दनं गान्दिनी-सुतः मथुराम् अनयद् रामं कृष्णं चैव दिनात्यये
ity uktvā codayām āsa syandanaṃ gāndinī-sutaḥ mathurām anayad rāmaṃ kṛṣṇaṃ caiva dinātyaye
Sanskrit only: no published translation is held for this verse.
मार्गे ग्राम-जना राजंस् तत्र तत्रोपसङ्गताः वसुदेव-सुतौ वीक्ष्य प्रीता दृष्टिं न चाददुः
mārge grāma-janā rājaṃs tatra tatropasaṅgatāḥ vasudeva-sutau vīkṣya prītā dṛṣṭiṃ na cādaduḥ
Sanskrit only: no published translation is held for this verse.
तावद् व्रजौकसस् तत्र नन्द-गोपादयो ऽग्रतः पुरोपवनम् आसाद्य प्रतीक्षन्तो ऽवतस्थिरे
tāvad vrajaukasas tatra nanda-gopādayo 'grataḥ puropavanam āsādya pratīkṣanto 'vatasthire
Sanskrit only: no published translation is held for this verse.
तान् समेत्याह भगवान् अक्रूरं जगद्-ईश्वरः गृहीत्वा पाणिना पाणिं प्रश्रितं प्रहसन्न् इव
tān sametyāha bhagavān akrūraṃ jagad-īśvaraḥ gṛhītvā pāṇinā pāṇiṃ praśritaṃ prahasann iva
Sanskrit only: no published translation is held for this verse.
भवान् प्रविशताम् अग्रे सह-यानः पुरीं गृहम् वयं त्व् इहावमुच्याथ ततो द्रक्ष्यामहे पुरीम्
bhavān praviśatām agre saha-yānaḥ purīṃ gṛham vayaṃ tv ihāvamucyātha tato drakṣyāmahe purīm
Sanskrit only: no published translation is held for this verse.
श्री-अक्रूर उवाच नाहं भवद्भ्यां रहितः प्रवेक्ष्ये मथुरां प्रभो त्यक्तुं नार्हसि मां नाथ भक्तं ते भक्त-वत्सल
śrī-akrūra uvāca nāhaṃ bhavadbhyāṃ rahitaḥ pravekṣye mathurāṃ prabho tyaktuṃ nārhasi māṃ nātha bhaktaṃ te bhakta-vatsala
Sanskrit only: no published translation is held for this verse.
आगच्छ याम गेहान् नः स-नाथान् कुर्व् अधोक्षज सहाग्रजः स-गोपालैः सुहृद्भिश् च सुहृत्तम
āgaccha yāma gehān naḥ sa-nāthān kurv adhokṣaja sahāgrajaḥ sa-gopālaiḥ suhṛdbhiś ca suhṛttama
Sanskrit only: no published translation is held for this verse.
पुनीहि पाद-रजसा गृहान् नो गृह-मेधिनाम् यच्-छौचेनानुतृप्यन्ति पितरः साग्नयः सुराः
punīhi pāda-rajasā gṛhān no gṛha-medhinām yac-chaucenānutṛpyanti pitaraḥ sāgnayaḥ surāḥ
Sanskrit only: no published translation is held for this verse.
अवनिज्याङ्घ्रि-युगलम् आसीत् श्लोक्यो बलिर् महान् ऐश्वर्यम् अतुलं लेभे गतिं चैकान्तिनां तु या
avanijyāṅghri-yugalam āsīt ślokyo balir mahān aiśvaryam atulaṃ lebhe gatiṃ caikāntināṃ tu yā
Sanskrit only: no published translation is held for this verse.
आपस् ते ऽङ्घ्र्य्-अवनेजन्यस् त्रींल् लोकान् शुचयो ऽपुनन् शिरसाधत्त याः शर्वः स्वर् याताः सगरात्मजाः
āpas te 'ṅghry-avanejanyas trīṃl lokān śucayo 'punan śirasādhatta yāḥ śarvaḥ svar yātāḥ sagarātmajāḥ
Sanskrit only: no published translation is held for this verse.
देव-देव जगन्-नाथ पुण्य-श्रवण-कीर्तन यदूत्तमोत्तमः-श्लोक नारायण नमो ऽस्तु ते
deva-deva jagan-nātha puṇya-śravaṇa-kīrtana yadūttamottamaḥ-śloka nārāyaṇa namo 'stu te
Sanskrit only: no published translation is held for this verse.
श्री-भगवन् उवाच आयास्ये भवतो गेहम् अहम् अर्य-समन्वितः यदु-चक्र-द्रुहं हत्वा वितरिष्ये सुहृत्-प्रियम्
śrī-bhagavan uvāca āyāsye bhavato geham aham arya-samanvitaḥ yadu-cakra-druhaṃ hatvā vitariṣye suhṛt-priyam
Sanskrit only: no published translation is held for this verse.
श्री-शुक उवाच एवम् उक्तो भगवता सो ऽक्रूरो विमना इव पुरीं प्रविष्टः कंसाय कर्मावेद्य गृहं ययौ
śrī-śuka uvāca evam ukto bhagavatā so 'krūro vimanā iva purīṃ praviṣṭaḥ kaṃsāya karmāvedya gṛhaṃ yayau
Sanskrit only: no published translation is held for this verse.
अथापराह्ने भगवान् कृष्णः सङ्कर्षणान्वितः मथुरां प्राविशद् गोपैर् दिदृक्षुः परिवारितः
athāparāhne bhagavān kṛṣṇaḥ saṅkarṣaṇānvitaḥ mathurāṃ prāviśad gopair didṛkṣuḥ parivāritaḥ
Sanskrit only: no published translation is held for this verse.
ददर्श तां स्फाटिक-तुण्ग-गोपुर- द्वारां बृहद्-धेम-कपाट-तोरणाम् ताम्रार-कोष्ठां परिखा-दुरासदाम् उद्यान-रम्योपवनोपशोभिताम्
dadarśa tāṃ sphāṭika-tuṇga-gopura- dvārāṃ bṛhad-dhema-kapāṭa-toraṇām tāmrāra-koṣṭhāṃ parikhā-durāsadām udyāna-ramyopavanopaśobhitām
Sanskrit only: no published translation is held for this verse.
सौवर्ण-शृङ्गाटक-हर्म्य-निष्कुटैः श्रेणी-सभाभिर् भवनैर् उपस्कृताम् वैदूर्य-वज्रामल-नील-विद्रुमैर् मुक्ता-हरिद्भिर् वलभीषु वेदिषु
sauvarṇa-śṛṅgāṭaka-harmya-niṣkuṭaiḥ śreṇī-sabhābhir bhavanair upaskṛtām vaidūrya-vajrāmala-nīla-vidrumair muktā-haridbhir valabhīṣu vediṣu
Sanskrit only: no published translation is held for this verse.
जुष्टेषु जालामुख-रन्ध्र-कुट्टिमेष्व् आविष्ट-पारावत-बर्हि-नादिताम् संसिक्त-रथ्यापण-मार्ग-चत्वरां प्रकीर्ण-माल्याङ्कुर-लाज-तण्डुलाम्
juṣṭeṣu jālāmukha-randhra-kuṭṭimeṣv āviṣṭa-pārāvata-barhi-nāditām saṃsikta-rathyāpaṇa-mārga-catvarāṃ prakīrṇa-mālyāṅkura-lāja-taṇḍulām
Sanskrit only: no published translation is held for this verse.
आपूर्ण-कुम्भैर् दधि-चन्दनोक्षितैः प्रसून-दीपावलिभिः स-पल्लवैः स-वृन्द-रम्भा-क्रमुकैः स-केतुभिः स्व्-अलङ्कृत-द्वार-गृहां स-पट्टिकैः
āpūrṇa-kumbhair dadhi-candanokṣitaiḥ prasūna-dīpāvalibhiḥ sa-pallavaiḥ sa-vṛnda-rambhā-kramukaiḥ sa-ketubhiḥ sv-alaṅkṛta-dvāra-gṛhāṃ sa-paṭṭikaiḥ
Sanskrit only: no published translation is held for this verse.
तां सम्प्रविष्टौ वसुदेव-नन्दनौ वृतौ वयस्यैर् नरदेव-वर्त्मना द्रष्टुं समीयुस् त्वरिताः पुर-स्त्रियो हर्म्याणि चैवारुरुहुर् नृपोत्सुकाः
tāṃ sampraviṣṭau vasudeva-nandanau vṛtau vayasyair naradeva-vartmanā draṣṭuṃ samīyus tvaritāḥ pura-striyo harmyāṇi caivāruruhur nṛpotsukāḥ
Sanskrit only: no published translation is held for this verse.
काश्चिद् विपर्यग्-धृत-वस्त्र-भूषणा विस्मृत्य चैकं युगलेष्व् अथापराः कृतैक-पत्र-श्रवनैक-नूपुरा नाङ्क्त्वा द्वितीयं त्व् अपराश् च लोचनम्
kāścid viparyag-dhṛta-vastra-bhūṣaṇā vismṛtya caikaṃ yugaleṣv athāparāḥ kṛtaika-patra-śravanaika-nūpurā nāṅktvā dvitīyaṃ tv aparāś ca locanam
Sanskrit only: no published translation is held for this verse.
अश्नन्त्य एकास् तद् अपास्य सोत्सवा अभ्यज्यमाना अकृतोपमज्जनाः स्वपन्त्य उत्थाय निशम्य निःस्वनं प्रपाययन्त्यो ऽर्भम् अपोह्य मातरः
aśnantya ekās tad apāsya sotsavā abhyajyamānā akṛtopamajjanāḥ svapantya utthāya niśamya niḥsvanaṃ prapāyayantyo 'rbham apohya mātaraḥ
Sanskrit only: no published translation is held for this verse.
मनांसि तासाम् अरविन्द-लोचनः प्रगल्भ-लीला-हसितावलोकैः जहार मत्त-द्विरदेन्द्र-विक्रमो दृशां ददच् छ्री-रमणात्मनोत्सवम्
manāṃsi tāsām aravinda-locanaḥ pragalbha-līlā-hasitāvalokaiḥ jahāra matta-dviradendra-vikramo dṛśāṃ dadac chrī-ramaṇātmanotsavam
Sanskrit only: no published translation is held for this verse.
दृष्ट्वा मुहुः श्रुतम् अनुद्रुत-चेतसस् तं तत्-प्रेक्षणोत्स्मित-सुधोक्षण-लब्ध-मानाः आनन्द-मूर्तिम् उपगुह्य दृशात्म-लब्धं हृष्यत्-त्वचो जहुर् अनन्तम् अरिन्दमाधिम्
dṛṣṭvā muhuḥ śrutam anudruta-cetasas taṃ tat-prekṣaṇotsmita-sudhokṣaṇa-labdha-mānāḥ ānanda-mūrtim upaguhya dṛśātma-labdhaṃ hṛṣyat-tvaco jahur anantam arindamādhim
Sanskrit only: no published translation is held for this verse.
प्रासाद-शिखरारूढाः प्रीत्य्-उत्फुल्ल-मुखाम्बुजाः अभ्यवर्षन् सौमनस्यैः प्रमदा बल-केशवौ
prāsāda-śikharārūḍhāḥ prīty-utphulla-mukhāmbujāḥ abhyavarṣan saumanasyaiḥ pramadā bala-keśavau
Sanskrit only: no published translation is held for this verse.
दध्य्-अक्षतैः सोद-पात्रैः स्रग्-गन्धैर् अभ्युपायनैः ताव् आनर्चुः प्रमुदितास् तत्र तत्र द्विजातयः
dadhy-akṣataiḥ soda-pātraiḥ srag-gandhair abhyupāyanaiḥ tāv ānarcuḥ pramuditās tatra tatra dvijātayaḥ
Sanskrit only: no published translation is held for this verse.
ऊचुः पौरा अहो गोप्यस् तपः किम् अचरन् महत् या ह्य् एताव् अनुपश्यन्ति नर-लोक-महोत्सवौ
ūcuḥ paurā aho gopyas tapaḥ kim acaran mahat yā hy etāv anupaśyanti nara-loka-mahotsavau
Sanskrit only: no published translation is held for this verse.
रजकं कञ्चिद् आयान्तं रङ्ग-कारं गदाग्रजः दृष्ट्वायाचत वासांसि धौतान्य् अत्य्-उत्तमानि च
rajakaṃ kañcid āyāntaṃ raṅga-kāraṃ gadāgrajaḥ dṛṣṭvāyācata vāsāṃsi dhautāny aty-uttamāni ca
Sanskrit only: no published translation is held for this verse.
देह्य् आवयोः समुचितान्य् अङ्ग वासांसि चार्हतोः भविष्यति परं श्रेयो दातुस् ते नात्र संशयः
dehy āvayoḥ samucitāny aṅga vāsāṃsi cārhatoḥ bhaviṣyati paraṃ śreyo dātus te nātra saṃśayaḥ
Sanskrit only: no published translation is held for this verse.
स याचितो भगवता परिपूर्णेन सर्वतः साक्षेपं रुषितः प्राह भृत्यो राज्ञः सु-दुर्मदः
sa yācito bhagavatā paripūrṇena sarvataḥ sākṣepaṃ ruṣitaḥ prāha bhṛtyo rājñaḥ su-durmadaḥ
Sanskrit only: no published translation is held for this verse.
ईदृशान्य् एव वासांसी नित्यं गिरि-वने-चरः परिधत्त किम् उद्वृत्ता राज-द्रव्याण्य् अभीप्सथ
īdṛśāny eva vāsāṃsī nityaṃ giri-vane-caraḥ paridhatta kim udvṛttā rāja-dravyāṇy abhīpsatha
Sanskrit only: no published translation is held for this verse.
याताशु बालिशा मैवं प्रार्थ्यं यदि जिजीवीषा बध्नन्ति घ्नन्ति लुम्पन्ति दृप्तं राज-कुलानि वै
yātāśu bāliśā maivaṃ prārthyaṃ yadi jijīvīṣā badhnanti ghnanti lumpanti dṛptaṃ rāja-kulāni vai
Sanskrit only: no published translation is held for this verse.
एवं विकत्थमानस्य कुपितो देवकी-सुतः रजकस्य कराग्रेण शिरः कायाद् अपातयत्
evaṃ vikatthamānasya kupito devakī-sutaḥ rajakasya karāgreṇa śiraḥ kāyād apātayat
Sanskrit only: no published translation is held for this verse.
तस्यानुजीविनः सर्वे वासः-कोशान् विसृज्य वै दुद्रुवुः सर्वतो मार्गं वासांसि जगृहे ऽच्युतः
tasyānujīvinaḥ sarve vāsaḥ-kośān visṛjya vai dudruvuḥ sarvato mārgaṃ vāsāṃsi jagṛhe 'cyutaḥ
Sanskrit only: no published translation is held for this verse.
वसित्वात्म-प्रिये वस्त्रे कृष्णः सङ्कर्षणस् तथा शेषाण्य् आदत्त गोपेभ्यो विसृज्य भुवि कानिचित्
vasitvātma-priye vastre kṛṣṇaḥ saṅkarṣaṇas tathā śeṣāṇy ādatta gopebhyo visṛjya bhuvi kānicit
Sanskrit only: no published translation is held for this verse.
ततस् तु वायकः प्रीतस् तयोर् वेषम् अकल्पयत् विचित्र-वर्णैश् चैलेयैर् आकल्पैर् अनुरूपतः
tatas tu vāyakaḥ prītas tayor veṣam akalpayat vicitra-varṇaiś caileyair ākalpair anurūpataḥ
Sanskrit only: no published translation is held for this verse.
नाना-लक्षण-वेषाभ्यां कृष्ण-रामौ विरेजतुः स्व्-अलङ्कृतौ बाल-गजौ पर्वणीव सितेतरौ
nānā-lakṣaṇa-veṣābhyāṃ kṛṣṇa-rāmau virejatuḥ sv-alaṅkṛtau bāla-gajau parvaṇīva sitetarau
Sanskrit only: no published translation is held for this verse.
तस्य प्रसन्नो भगवान् प्रादात् सारूप्यम् आत्मनः श्रियं च परमां लोके बलैश्वर्य-स्मृतीन्द्रियम्
tasya prasanno bhagavān prādāt sārūpyam ātmanaḥ śriyaṃ ca paramāṃ loke balaiśvarya-smṛtīndriyam
Sanskrit only: no published translation is held for this verse.
ततः सुदाम्नो भवनं माला-कारस्य जग्मतुः तौ दृष्ट्वा स समुत्थाय ननाम शिरसा भुवि
tataḥ sudāmno bhavanaṃ mālā-kārasya jagmatuḥ tau dṛṣṭvā sa samutthāya nanāma śirasā bhuvi
Sanskrit only: no published translation is held for this verse.
तयोर् आसनम् आनीय पाद्यं चार्घ्यार्हणादिभिः पूजां सानुगयोश् चक्रे स्रक्-ताम्बूलानुलेपनैः
tayor āsanam ānīya pādyaṃ cārghyārhaṇādibhiḥ pūjāṃ sānugayoś cakre srak-tāmbūlānulepanaiḥ
Sanskrit only: no published translation is held for this verse.
प्राह नः सार्थकं जन्म पावितं च कुलं प्रभो पितृ-देवर्षयो मह्यं तुष्टा ह्य् आगमनेन वाम्
prāha naḥ sārthakaṃ janma pāvitaṃ ca kulaṃ prabho pitṛ-devarṣayo mahyaṃ tuṣṭā hy āgamanena vām
Sanskrit only: no published translation is held for this verse.
भवन्तौ किल विश्वस्य जगतः कारणं परम् अवतीर्णाव् इहांशेन क्षेमाय च भवाय च
bhavantau kila viśvasya jagataḥ kāraṇaṃ param avatīrṇāv ihāṃśena kṣemāya ca bhavāya ca
Sanskrit only: no published translation is held for this verse.
न हि वां विषमा दृष्टिः सुहृदोर् जगद्-आत्मनोः समयोः सर्व-भूतेषु भजन्तं भजतोर् अपि
na hi vāṃ viṣamā dṛṣṭiḥ suhṛdor jagad-ātmanoḥ samayoḥ sarva-bhūteṣu bhajantaṃ bhajator api
Sanskrit only: no published translation is held for this verse.
ताव् अज्ञापयतं भृत्यं किम् अहं करवाणि वाम् पुंसो ऽत्य्-अनुग्रहो ह्य् एष भवद्भिर् यन् नियुज्यते
tāv ajñāpayataṃ bhṛtyaṃ kim ahaṃ karavāṇi vām puṃso 'ty-anugraho hy eṣa bhavadbhir yan niyujyate
Sanskrit only: no published translation is held for this verse.
इत्य् अभिप्रेत्य राजेन्द्र सुदामा प्रीत-मानसः शस्तैः सु-गन्धैः कुसुमैर् माला विरचिता ददौ
ity abhipretya rājendra sudāmā prīta-mānasaḥ śastaiḥ su-gandhaiḥ kusumair mālā viracitā dadau
Sanskrit only: no published translation is held for this verse.
ताभिः स्व्-अलङ्कृतौ प्रीतौ कृष्ण-रामौ सहानुगौ प्रणताय प्रपन्नाय ददतुर् वर-दौ वरान्
tābhiḥ sv-alaṅkṛtau prītau kṛṣṇa-rāmau sahānugau praṇatāya prapannāya dadatur vara-dau varān
Sanskrit only: no published translation is held for this verse.
सो ऽपि वव्रे ऽचलां भक्तिं तस्मिन्न् एवाखिलात्मनि तद्-भक्तेषु च सौहार्दं भूतेषु च दयां पराम्
so 'pi vavre 'calāṃ bhaktiṃ tasminn evākhilātmani tad-bhakteṣu ca sauhārdaṃ bhūteṣu ca dayāṃ parām
Sanskrit only: no published translation is held for this verse.
इति तस्मै वरं दत्त्वा श्रियं चान्वय-वर्धिनीम् बलम् आयुर् यशः कान्तिं निर्जगाम सहाग्रजः
iti tasmai varaṃ dattvā śriyaṃ cānvaya-vardhinīm balam āyur yaśaḥ kāntiṃ nirjagāma sahāgrajaḥ
Sanskrit only: no published translation is held for this verse.