Library·Bhāgavata Purāṇa·10·10.6
श्री-शुक उवाच नन्दः पथि वचः शौरेर् न मृषेति विचिन्तयन् हरिं जगाम शरणम् उत्पातागम-शङ्कितः
śrī-śuka uvāca nandaḥ pathi vacaḥ śaurer na mṛṣeti vicintayan hariṃ jagāma śaraṇam utpātāgama-śaṅkitaḥ
Sanskrit only: no published translation is held for this verse.
कंसेन प्रहिता घोरा पूतना बाल-घातिनी शिशूंश् चचार निघ्नन्ती पुर-ग्राम-व्रजादिषु
kaṃsena prahitā ghorā pūtanā bāla-ghātinī śiśūṃś cacāra nighnantī pura-grāma-vrajādiṣu
Sanskrit only: no published translation is held for this verse.
न यत्र श्रवणादीनि रक्षो-घ्नानि स्व-कर्मसु कुर्वन्ति सात्वतां भर्तुर् यातुधान्यश् च तत्र हि
na yatra śravaṇādīni rakṣo-ghnāni sva-karmasu kurvanti sātvatāṃ bhartur yātudhānyaś ca tatra hi
Sanskrit only: no published translation is held for this verse.
सा खे-चर्य् एकदोत्पत्य पूतना नन्द-गोकुलम् योषित्वा माययात्मानं प्राविशत् काम-चारिणी
sā khe-cary ekadotpatya pūtanā nanda-gokulam yoṣitvā māyayātmānaṃ prāviśat kāma-cāriṇī
Sanskrit only: no published translation is held for this verse.
तां केश-बन्ध-व्यतिषक्त-मल्लिकां बृहन्-नितम्ब-स्तन-कृच्छ्र-मध्यमाम् सुवाससं कल्पित-कर्ण-भूषण- त्विषोल्लसत्-कुन्तल-मण्डिताननाम्
tāṃ keśa-bandha-vyatiṣakta-mallikāṃ bṛhan-nitamba-stana-kṛcchra-madhyamām suvāsasaṃ kalpita-karṇa-bhūṣaṇa- tviṣollasat-kuntala-maṇḍitānanām
Sanskrit only: no published translation is held for this verse.
वल्गु-स्मितापाङ्ग-विसर्ग-वीक्षितैर् मनो हरन्तीं वनितां व्रजौकसाम् अमंसताम्भोज-करेण रूपिणीं गोप्यः श्रियं द्रष्टुम् इवागतां पतिम्
valgu-smitāpāṅga-visarga-vīkṣitair mano harantīṃ vanitāṃ vrajaukasām amaṃsatāmbhoja-kareṇa rūpiṇīṃ gopyaḥ śriyaṃ draṣṭum ivāgatāṃ patim
Sanskrit only: no published translation is held for this verse.
बाल-ग्रहस् तत्र विचिन्वती शिशून् यदृच्छया नन्द-गृहे ऽसद्-अन्तकम् बालं प्रतिच्छन्न-निजोरु-तेजसं ददर्श तल्पे ऽग्निम् इवाहितं भसि
bāla-grahas tatra vicinvatī śiśūn yadṛcchayā nanda-gṛhe 'sad-antakam bālaṃ praticchanna-nijoru-tejasaṃ dadarśa talpe 'gnim ivāhitaṃ bhasi
Sanskrit only: no published translation is held for this verse.
विबुध्य तां बालक-मारिका-ग्रहं चराचरात्मा स निमीलितेक्षणः अनन्तम् आरोपयद् अङ्कम् अन्तकं यथोरगं सुप्तम् अबुद्धि-रज्जु-धीः
vibudhya tāṃ bālaka-mārikā-grahaṃ carācarātmā sa nimīlitekṣaṇaḥ anantam āropayad aṅkam antakaṃ yathoragaṃ suptam abuddhi-rajju-dhīḥ
Sanskrit only: no published translation is held for this verse.
तां तीक्ष्ण-चित्ताम् अतिवाम-चेष्टितां वीक्ष्यान्तरा कोष-परिच्छदासिवत् वर-स्त्रियं तत्-प्रभया च धर्षिते निरीक्ष्यमाणे जननी ह्य् अतिष्ठताम्
tāṃ tīkṣṇa-cittām ativāma-ceṣṭitāṃ vīkṣyāntarā koṣa-paricchadāsivat vara-striyaṃ tat-prabhayā ca dharṣite nirīkṣyamāṇe jananī hy atiṣṭhatām
Sanskrit only: no published translation is held for this verse.
तस्मिन् स्तनं दुर्जर-वीर्यम् उल्बणं घोराङ्कम् आदाय शिशोर् ददाव् अथ गाढं कराभ्यां भगवान् प्रपीड्य तत्- प्राणैः समं रोष-समन्वितो ऽपिबत्
tasmin stanaṃ durjara-vīryam ulbaṇaṃ ghorāṅkam ādāya śiśor dadāv atha gāḍhaṃ karābhyāṃ bhagavān prapīḍya tat- prāṇaiḥ samaṃ roṣa-samanvito 'pibat
Sanskrit only: no published translation is held for this verse.
सा मुञ्च मुञ्चालम् इति प्रभाषिणी निष्पीड्यमानाखिल-जीव-मर्मणि विवृत्य नेत्रे चरणौ भुजौ मुहुः प्रस्विन्न-गात्रा क्षिपती रुरोद ह
sā muñca muñcālam iti prabhāṣiṇī niṣpīḍyamānākhila-jīva-marmaṇi vivṛtya netre caraṇau bhujau muhuḥ prasvinna-gātrā kṣipatī ruroda ha
Sanskrit only: no published translation is held for this verse.
तस्याः स्वनेनातिगभीर-रंहसा साद्रिर् मही द्यौश् च चचाल स-ग्रहा रसा दिशश् च प्रतिनेदिरे जनाः पेतुः क्षितौ वज्र-निपात-शङ्कया
tasyāḥ svanenātigabhīra-raṃhasā sādrir mahī dyauś ca cacāla sa-grahā rasā diśaś ca pratinedire janāḥ petuḥ kṣitau vajra-nipāta-śaṅkayā
Sanskrit only: no published translation is held for this verse.
निशा-चरीत्थं व्यथित-स्तना व्यसुर् व्यादाय केशांश् चरणौ भुजाव् अपि प्रसार्य गोष्ठे निज-रूपम् आस्थिता वज्राहतो वृत्र इवापतन् नृप
niśā-carītthaṃ vyathita-stanā vyasur vyādāya keśāṃś caraṇau bhujāv api prasārya goṣṭhe nija-rūpam āsthitā vajrāhato vṛtra ivāpatan nṛpa
Sanskrit only: no published translation is held for this verse.
पतमानो ऽपि तद्-देहस् त्रि-गव्यूत्य्-अन्तर-द्रुमान् चूर्णयाम् आस राजेन्द्र महद् आसीत् तद् अद्भुतम्
patamāno 'pi tad-dehas tri-gavyūty-antara-drumān cūrṇayām āsa rājendra mahad āsīt tad adbhutam
Sanskrit only: no published translation is held for this verse.
ईषा-मात्रोग्र-दंष्ट्रास्यं गिरि-कन्दर-नासिकम् गण्ड-शैल-स्तनं रौद्रं प्रकीर्णारुण-मूर्धजम्
īṣā-mātrogra-daṃṣṭrāsyaṃ giri-kandara-nāsikam gaṇḍa-śaila-stanaṃ raudraṃ prakīrṇāruṇa-mūrdhajam
Sanskrit only: no published translation is held for this verse.
अन्ध-कूप-गभीराक्षं पुलिनारोह-भीषणम् बद्ध-सेतु-भुजोर्व्-अङ्घ्रि शून्य-तोय-ह्रदोदरम्
andha-kūpa-gabhīrākṣaṃ pulināroha-bhīṣaṇam baddha-setu-bhujorv-aṅghri śūnya-toya-hradodaram
Sanskrit only: no published translation is held for this verse.
सन्तत्रसुः स्म तद् वीक्ष्य गोपा गोप्यः कलेवरम् पूर्वं तु तन्-निःस्वनित- भिन्न-हृत्-कर्ण-मस्तकाः
santatrasuḥ sma tad vīkṣya gopā gopyaḥ kalevaram pūrvaṃ tu tan-niḥsvanita- bhinna-hṛt-karṇa-mastakāḥ
Sanskrit only: no published translation is held for this verse.
बालं च तस्या उरसि क्रीडन्तम् अकुतोभयम् गोप्यस् तूर्णं समभ्येत्य जगृहुर् जात-सम्भ्रमाः
bālaṃ ca tasyā urasi krīḍantam akutobhayam gopyas tūrṇaṃ samabhyetya jagṛhur jāta-sambhramāḥ
Sanskrit only: no published translation is held for this verse.
यशोदा-रोहिणीभ्यां ताः समं बालस्य सर्वतः रक्षां विदधिरे सम्यग् गो-पुच्छ-भ्रमणादिभिः
yaśodā-rohiṇībhyāṃ tāḥ samaṃ bālasya sarvataḥ rakṣāṃ vidadhire samyag go-puccha-bhramaṇādibhiḥ
Sanskrit only: no published translation is held for this verse.
गो-मूत्रेण स्नापयित्वा पुनर् गो-रजसार्भकम् रक्षां चक्रुश् च शकृता द्वादशाङ्गेषु नामभिः
go-mūtreṇa snāpayitvā punar go-rajasārbhakam rakṣāṃ cakruś ca śakṛtā dvādaśāṅgeṣu nāmabhiḥ
Sanskrit only: no published translation is held for this verse.
गोप्यः संस्पृष्ट-सलिला अङ्गेषु करयोः पृथक् न्यस्यात्मन्य् अथ बालस्य बीज-न्यासम् अकुर्वत
gopyaḥ saṃspṛṣṭa-salilā aṅgeṣu karayoḥ pṛthak nyasyātmany atha bālasya bīja-nyāsam akurvata
Sanskrit only: no published translation is held for this verse.
अव्याद् अजो ऽङ्घ्रि मणिमांस् तव जान्व् अथोरू यज्ञो ऽच्युतः कटि-तटं जठरं हयास्यः हृत् केशवस् त्वद्-उर ईश इनस् तु कण्ठं विष्णुर् भुजं मुखम् उरुक्रम ईश्वरः कम्
avyād ajo 'ṅghri maṇimāṃs tava jānv athorū yajño 'cyutaḥ kaṭi-taṭaṃ jaṭharaṃ hayāsyaḥ hṛt keśavas tvad-ura īśa inas tu kaṇṭhaṃ viṣṇur bhujaṃ mukham urukrama īśvaraḥ kam
Sanskrit only: no published translation is held for this verse.
चक्र्य् अग्रतः सह-गदो हरिर् अस्तु पश्चात् त्वत्-पार्श्वयोर् धनुर्-असी मधु-हाजनश् च कोणेषु शङ्ख उरुगाय उपर्य् उपेन्द्रस् तार्क्ष्यः क्षितौ हलधरः पुरुषः समन्तात्
cakry agrataḥ saha-gado harir astu paścāt tvat-pārśvayor dhanur-asī madhu-hājanaś ca koṇeṣu śaṅkha urugāya upary upendras tārkṣyaḥ kṣitau haladharaḥ puruṣaḥ samantāt
Sanskrit only: no published translation is held for this verse.
इन्द्रियाणि हृषीकेशः प्राणान् नारायणो ऽवतु श्वेतद्वीप-पतिश् चित्तं मनो योगेश्वरो ऽवतु
indriyāṇi hṛṣīkeśaḥ prāṇān nārāyaṇo 'vatu śvetadvīpa-patiś cittaṃ mano yogeśvaro 'vatu
Sanskrit only: no published translation is held for this verse.
पृश्निगर्भस् तु ते बुद्धिम् आत्मानं भगवान् परः क्रीडन्तं पातु गोविन्दः शयानं पातु माधवः
pṛśnigarbhas tu te buddhim ātmānaṃ bhagavān paraḥ krīḍantaṃ pātu govindaḥ śayānaṃ pātu mādhavaḥ
Sanskrit only: no published translation is held for this verse.
व्रजन्तम् अव्याद् वैकुण्ठ आसीनं त्वां श्रियः पतिः भुञ्जानं यज्ञभुक् पातु सर्व-ग्रह-भयङ्करः
vrajantam avyād vaikuṇṭha āsīnaṃ tvāṃ śriyaḥ patiḥ bhuñjānaṃ yajñabhuk pātu sarva-graha-bhayaṅkaraḥ
Sanskrit only: no published translation is held for this verse.
डाकिन्यो यातुधान्यश् च कुष्माण्डा ये ऽर्भक-ग्रहाः भूत-प्रेत-पिशाचाश् च यक्ष-रक्षो-विनायकाः
ḍākinyo yātudhānyaś ca kuṣmāṇḍā ye 'rbhaka-grahāḥ bhūta-preta-piśācāś ca yakṣa-rakṣo-vināyakāḥ
Sanskrit only: no published translation is held for this verse.
कोटरा रेवती ज्येष्ठा पूतना मातृकादयः उन्मादा ये ह्य् अपस्मारा देह-प्राणेन्द्रिय-द्रुहः
koṭarā revatī jyeṣṭhā pūtanā mātṛkādayaḥ unmādā ye hy apasmārā deha-prāṇendriya-druhaḥ
Sanskrit only: no published translation is held for this verse.
स्वप्न-दृष्टा महोत्पाता वृद्धा बाल-ग्रहाश् च ये सर्वे नश्यन्तु ते विष्णोर् नाम-ग्रहण-भीरवः
svapna-dṛṣṭā mahotpātā vṛddhā bāla-grahāś ca ye sarve naśyantu te viṣṇor nāma-grahaṇa-bhīravaḥ
Sanskrit only: no published translation is held for this verse.
श्री-शुक उवाच इति प्रणय-बद्धाभिर् गोपीभिः कृत-रक्षणम् पाययित्वा स्तनं माता सन्न्यवेशयद् आत्मजम्
śrī-śuka uvāca iti praṇaya-baddhābhir gopībhiḥ kṛta-rakṣaṇam pāyayitvā stanaṃ mātā sannyaveśayad ātmajam
Sanskrit only: no published translation is held for this verse.
तावन् नन्दादयो गोपा मथुराया व्रजं गताः विलोक्य पूतना-देहं बभूवुर् अतिविस्मिताः
tāvan nandādayo gopā mathurāyā vrajaṃ gatāḥ vilokya pūtanā-dehaṃ babhūvur ativismitāḥ
Sanskrit only: no published translation is held for this verse.
नूनं बतर्षिः सञ्जातो योगेशो वा समास सः स एव दृष्टो ह्य् उत्पातो यद् आहानकदुन्दुभिः
nūnaṃ batarṣiḥ sañjāto yogeśo vā samāsa saḥ sa eva dṛṣṭo hy utpāto yad āhānakadundubhiḥ
Sanskrit only: no published translation is held for this verse.
कलेवरं परशुभिश् छित्त्वा तत् ते व्रजौकसः दूरे क्षिप्त्वावयवशो न्यदहन् काष्ठ-वेष्टितम्
kalevaraṃ paraśubhiś chittvā tat te vrajaukasaḥ dūre kṣiptvāvayavaśo nyadahan kāṣṭha-veṣṭitam
Sanskrit only: no published translation is held for this verse.
दह्यमानस्य देहस्य धूमश् चागुरु-सौरभः उत्थितः कृष्ण-निर्भुक्त- सपद्य् आहत-पाप्मनः
dahyamānasya dehasya dhūmaś cāguru-saurabhaḥ utthitaḥ kṛṣṇa-nirbhukta- sapady āhata-pāpmanaḥ
Sanskrit only: no published translation is held for this verse.
पूतना लोक-बाल-घ्नी राक्षसी रुधिराशना जिघांसयापि हरये स्तनं दत्त्वाप सद्-गतिम्
pūtanā loka-bāla-ghnī rākṣasī rudhirāśanā jighāṃsayāpi haraye stanaṃ dattvāpa sad-gatim
Sanskrit only: no published translation is held for this verse.
किं पुनः श्रद्धया भक्त्या कृष्णाय परमात्मने यच्छन् प्रियतमं किं नु रक्तास् तन्-मातरो यथा
kiṃ punaḥ śraddhayā bhaktyā kṛṣṇāya paramātmane yacchan priyatamaṃ kiṃ nu raktās tan-mātaro yathā
Sanskrit only: no published translation is held for this verse.
पद्भ्यां भक्त-हृदि-स्थाभ्यां वन्द्याभ्यां लोक-वन्दितैः अङ्गं यस्याः समाक्रम्य भगवान् अपि तत्-स्तनम्
padbhyāṃ bhakta-hṛdi-sthābhyāṃ vandyābhyāṃ loka-vanditaiḥ aṅgaṃ yasyāḥ samākramya bhagavān api tat-stanam
Sanskrit only: no published translation is held for this verse.
यातुधान्य् अपि सा स्वर्गम् अवाप जननी-गतिम् कृष्ण-भुक्त-स्तन-क्षीराः किम् उ गावो ऽनुमातरः
yātudhāny api sā svargam avāpa jananī-gatim kṛṣṇa-bhukta-stana-kṣīrāḥ kim u gāvo 'numātaraḥ
Sanskrit only: no published translation is held for this verse.
पयांसि यासाम् अपिबत् पुत्र-स्नेह-स्नुतान्य् अलम् भगवान् देवकी-पुत्रः कैवल्याद्य्-अखिल-प्रदः
payāṃsi yāsām apibat putra-sneha-snutāny alam bhagavān devakī-putraḥ kaivalyādy-akhila-pradaḥ
Sanskrit only: no published translation is held for this verse.
तासाम् अविरतं कृष्णे कुर्वतीनां सुतेक्षणम् न पुनः कल्पते राजन् संसारो ऽज्ञान-सम्भवः
tāsām avirataṃ kṛṣṇe kurvatīnāṃ sutekṣaṇam na punaḥ kalpate rājan saṃsāro 'jñāna-sambhavaḥ
Sanskrit only: no published translation is held for this verse.
कट-धूमस्य सौरभ्यम् अवघ्राय व्रजौकसः किम् इदं कुत एवेति वदन्तो व्रजम् आययुः
kaṭa-dhūmasya saurabhyam avaghrāya vrajaukasaḥ kim idaṃ kuta eveti vadanto vrajam āyayuḥ
Sanskrit only: no published translation is held for this verse.
ते तत्र वर्णितं गोपैः पूतनागमनादिकम् श्रुत्वा तन्-निधनं स्वस्ति शिशोश् चासन् सुविस्मिताः
te tatra varṇitaṃ gopaiḥ pūtanāgamanādikam śrutvā tan-nidhanaṃ svasti śiśoś cāsan suvismitāḥ
Sanskrit only: no published translation is held for this verse.
नन्दः स्व-पुत्रम् आदाय प्रेत्यागतम् उदार-धीः मूर्ध्न्य् उपाघ्राय परमां मुदं लेभे कुरूद्वह
nandaḥ sva-putram ādāya pretyāgatam udāra-dhīḥ mūrdhny upāghrāya paramāṃ mudaṃ lebhe kurūdvaha
Sanskrit only: no published translation is held for this verse.
य एतत् पूतना-मोक्षं कृष्णस्यार्भकम् अद्भुतम् शृणुयाच् छ्रद्धया मर्त्यो गोविन्दे लभते रतिम्
ya etat pūtanā-mokṣaṃ kṛṣṇasyārbhakam adbhutam śṛṇuyāc chraddhayā martyo govinde labhate ratim
Sanskrit only: no published translation is held for this verse.