Library·Bhāgavata Purāṇa·10·10.60
श्री-बादरायणिर् उवाच कर्हिचित् सुखम् आसीनं स्व-तल्प-स्थं जगद्-गुरुम् पतिं पर्यचरद् भैष्मी व्यजनेन सखी-जनैः
śrī-bādarāyaṇir uvāca karhicit sukham āsīnaṃ sva-talpa-sthaṃ jagad-gurum patiṃ paryacarad bhaiṣmī vyajanena sakhī-janaiḥ
Sanskrit only: no published translation is held for this verse.
यस् त्व् एतल् लीलया विश्वं सृजत्य् अत्त्य् अवतीश्वरः स हि जातः स्व-सेतूनां गोपीथाय यदुष्व् अजः
yas tv etal līlayā viśvaṃ sṛjaty atty avatīśvaraḥ sa hi jātaḥ sva-setūnāṃ gopīthāya yaduṣv ajaḥ
Sanskrit only: no published translation is held for this verse.
तस्मिन् अन्तर्-गृहे भ्राजन्- मुक्ता-दाम-विलम्बिना विराजिते वितानेन दीपैर् मणि-मयैर् अपि
tasmin antar-gṛhe bhrājan- muktā-dāma-vilambinā virājite vitānena dīpair maṇi-mayair api
Sanskrit only: no published translation is held for this verse.
मल्लिका-दामभिः पुष्पैर् द्विरेफ-कुल-नादिते जाल-रन्ध्र-प्रविष्टैश् च गोभिश् चन्द्रमसो ऽमलैः
mallikā-dāmabhiḥ puṣpair dvirepha-kula-nādite jāla-randhra-praviṣṭaiś ca gobhiś candramaso 'malaiḥ
Sanskrit only: no published translation is held for this verse.
पारिजात-वनामोद- वायुनोद्यान-शालिना धूपैर् अगुरु-जै राजन् जाल-रन्ध्र-विनिर्गतैः
pārijāta-vanāmoda- vāyunodyāna-śālinā dhūpair aguru-jai rājan jāla-randhra-vinirgataiḥ
Sanskrit only: no published translation is held for this verse.
पयः-फेन-निभे शुभ्रे पर्यङ्के कशिपूत्तमे उपतस्थे सुखासीनं जगताम् ईश्वरं पतिम्
payaḥ-phena-nibhe śubhre paryaṅke kaśipūttame upatasthe sukhāsīnaṃ jagatām īśvaraṃ patim
Sanskrit only: no published translation is held for this verse.
वाल-व्यजनम् आदाय रत्न-दण्डं सखी-करात् तेन वीजयती देवी उपासां चक्र ईश्वरम्
vāla-vyajanam ādāya ratna-daṇḍaṃ sakhī-karāt tena vījayatī devī upāsāṃ cakra īśvaram
Sanskrit only: no published translation is held for this verse.
सोपाच्युतं क्वणयती मणि-नूपुराभ्यां रेजे ऽङ्गुलीय-वलय-व्यजनाग्र-हस्ता वस्त्रान्त-गूढ-कुच-कुङ्कुम-शोण-हार- भासा नितम्ब-धृतया च परार्ध्य-काञ्च्या
sopācyutaṃ kvaṇayatī maṇi-nūpurābhyāṃ reje 'ṅgulīya-valaya-vyajanāgra-hastā vastrānta-gūḍha-kuca-kuṅkuma-śoṇa-hāra- bhāsā nitamba-dhṛtayā ca parārdhya-kāñcyā
Sanskrit only: no published translation is held for this verse.
तां रूपिणीं श्रीयम् अनन्य-गतिं निरीक्ष्य या लीलया धृत-तनोर् अनुरूप-रूपा प्रीतः स्मयन्न् अलक-कुण्डल-निष्क-कण्ठ- वक्त्रोल्लसत्-स्मित-सुधां हरिर् आबभाषे
tāṃ rūpiṇīṃ śrīyam ananya-gatiṃ nirīkṣya yā līlayā dhṛta-tanor anurūpa-rūpā prītaḥ smayann alaka-kuṇḍala-niṣka-kaṇṭha- vaktrollasat-smita-sudhāṃ harir ābabhāṣe
Sanskrit only: no published translation is held for this verse.
श्री-भगवान् उवाच राज-पुत्रीप्सिता भूपैर् लोक-पाल-विभूतिभिः महानुभावैः श्रीमद्भी रूपौदार्य-बलोर्जितैः
śrī-bhagavān uvāca rāja-putrīpsitā bhūpair loka-pāla-vibhūtibhiḥ mahānubhāvaiḥ śrīmadbhī rūpaudārya-balorjitaiḥ
Sanskrit only: no published translation is held for this verse.
तान् प्राप्तान् अर्थिनो हित्वा चैद्यादीन् स्मर-दुर्मदान् दत्ता भ्रात्रा स्व-पित्रा च कस्मान् नो ववृषे ऽसमान्
tān prāptān arthino hitvā caidyādīn smara-durmadān dattā bhrātrā sva-pitrā ca kasmān no vavṛṣe 'samān
Sanskrit only: no published translation is held for this verse.
राजभ्यो बिभ्यतः सु-भ्रु समुद्रं शरणं गतान् बलवद्भिः कृत-द्वेषान् प्रायस् त्यक्त-नृपासनान्
rājabhyo bibhyataḥ su-bhru samudraṃ śaraṇaṃ gatān balavadbhiḥ kṛta-dveṣān prāyas tyakta-nṛpāsanān
Sanskrit only: no published translation is held for this verse.
अस्पष्ट-वर्त्मनाम् पुंसाम् अलोक-पथम् ईयुषाम् आस्थिताः पदवीं सु-भ्रु प्रायः सीदन्ति योषितः
aspaṣṭa-vartmanām puṃsām aloka-patham īyuṣām āsthitāḥ padavīṃ su-bhru prāyaḥ sīdanti yoṣitaḥ
Sanskrit only: no published translation is held for this verse.
निष्किञ्चना वयं शश्वन् निष्किञ्चन-जन-प्रियाः तस्मा त्प्रायेण न ह्य् आढ्या मां भजन्ति सु-मध्यमे
niṣkiñcanā vayaṃ śaśvan niṣkiñcana-jana-priyāḥ tasmā tprāyeṇa na hy āḍhyā māṃ bhajanti su-madhyame
Sanskrit only: no published translation is held for this verse.
ययोर् आत्म-समं वित्तं जन्मैश्वर्याकृतिर् भवः तयोर् विवाहो मैत्री च नोत्तमाधमयोः क्वचित्
yayor ātma-samaṃ vittaṃ janmaiśvaryākṛtir bhavaḥ tayor vivāho maitrī ca nottamādhamayoḥ kvacit
Sanskrit only: no published translation is held for this verse.
वैदर्भ्य् एतद् अविज्ञाय त्वयादीर्घ-समीक्षया वृता वयं गुणैर् हीना भिक्षुभिः श्लाघिता मुधा
vaidarbhy etad avijñāya tvayādīrgha-samīkṣayā vṛtā vayaṃ guṇair hīnā bhikṣubhiḥ ślāghitā mudhā
Sanskrit only: no published translation is held for this verse.
अथात्मनो ऽनुरूपं वै भजस्व क्षत्रियर्षभम् येन त्वम् आशिषः सत्या इहामुत्र च लप्स्यसे
athātmano 'nurūpaṃ vai bhajasva kṣatriyarṣabham yena tvam āśiṣaḥ satyā ihāmutra ca lapsyase
Sanskrit only: no published translation is held for this verse.
चैद्य-शाल्व-जरासन्ध दन्तवक्रादयो नृपाः मम द्विषन्ति वामोरु रुक्मी चापि तवाग्रजः
caidya-śālva-jarāsandha dantavakrādayo nṛpāḥ mama dviṣanti vāmoru rukmī cāpi tavāgrajaḥ
Sanskrit only: no published translation is held for this verse.
तेषां वीर्य-मदान्धानां दृप्तानां स्मय-नुत्तये आनितासि मया भद्रे तेजोपहरतासताम्
teṣāṃ vīrya-madāndhānāṃ dṛptānāṃ smaya-nuttaye ānitāsi mayā bhadre tejopaharatāsatām
Sanskrit only: no published translation is held for this verse.
उदासीना वयं नूनं न स्त्र्य्-अपत्यार्थ-कामुकाः आत्म-लब्ध्यास्महे पूर्णा गेहयोर् ज्योतिर्-अक्रियाः
udāsīnā vayaṃ nūnaṃ na stry-apatyārtha-kāmukāḥ ātma-labdhyāsmahe pūrṇā gehayor jyotir-akriyāḥ
Sanskrit only: no published translation is held for this verse.
श्री-शुक उवाच एतावद् उक्त्वा भगवान् आत्मानं वल्लभाम् इव मन्यमानाम् अविश्लेषात् तद्-दर्प-घ्न उपारमत्
śrī-śuka uvāca etāvad uktvā bhagavān ātmānaṃ vallabhām iva manyamānām aviśleṣāt tad-darpa-ghna upāramat
Sanskrit only: no published translation is held for this verse.
इति त्रिलोकेश-पतेस् तदात्मनः प्रियस्य देव्य् अश्रुत-पूर्वम् अप्रियम् आश्रुत्य भीता हृदि जात-वेपथुश् चिन्तां दुरन्तां रुदती जगाम ह
iti trilokeśa-pates tadātmanaḥ priyasya devy aśruta-pūrvam apriyam āśrutya bhītā hṛdi jāta-vepathuś cintāṃ durantāṃ rudatī jagāma ha
Sanskrit only: no published translation is held for this verse.
पदा सु-जातेन नखारुण-श्रीया भुवं लिखन्त्य् अश्रुभिर् अञ्जनासितैः आसिञ्चती कुङ्कुम-रूषितौ स्तनौ तस्थाव् अधो-मुख्य् अति-दुःख-रुद्ध-वाक्
padā su-jātena nakhāruṇa-śrīyā bhuvaṃ likhanty aśrubhir añjanāsitaiḥ āsiñcatī kuṅkuma-rūṣitau stanau tasthāv adho-mukhy ati-duḥkha-ruddha-vāk
Sanskrit only: no published translation is held for this verse.
तस्याः सु-दुःख-भय-शोक-विनष्ट-बुद्धेर् हस्ताच् छ्लथद्-वलयतो व्यजनं पपात देहश् च विक्लव-धियः सहसैव मुह्यन् रम्भेव वायु-विहतो प्रविकीर्य केशान्
tasyāḥ su-duḥkha-bhaya-śoka-vinaṣṭa-buddher hastāc chlathad-valayato vyajanaṃ papāta dehaś ca viklava-dhiyaḥ sahasaiva muhyan rambheva vāyu-vihato pravikīrya keśān
Sanskrit only: no published translation is held for this verse.
तद् दृष्ट्वा भगवान् कृष्णः प्रियायाः प्रेम-बन्धनम् हास्य-प्रौढिम् अजानन्त्याः करुणः सो ऽन्वकम्पत
tad dṛṣṭvā bhagavān kṛṣṇaḥ priyāyāḥ prema-bandhanam hāsya-prauḍhim ajānantyāḥ karuṇaḥ so 'nvakampata
Sanskrit only: no published translation is held for this verse.
पर्यङ्काद् अवरुह्याशु ताम् उत्थाप्य चतुर्-भुजः केशान् समुह्य तद्-वक्त्रं प्रामृजत् पद्म-पाणिना
paryaṅkād avaruhyāśu tām utthāpya catur-bhujaḥ keśān samuhya tad-vaktraṃ prāmṛjat padma-pāṇinā
Sanskrit only: no published translation is held for this verse.
प्रमृज्याश्रु-कले नेत्रे स्तनौ चोपहतौ शुचा आश्लिष्य बाहुना राजन् अनन्य-विषयां सतीम्
pramṛjyāśru-kale netre stanau copahatau śucā āśliṣya bāhunā rājan ananya-viṣayāṃ satīm
Sanskrit only: no published translation is held for this verse.
सान्त्वयाम् आस सान्त्व-ज्ञः कृपया कृपणां प्रभुः हास्य-प्रौढि-भ्रमच्-चित्ताम् अतद्-अर्हां सतां गतिः
sāntvayām āsa sāntva-jñaḥ kṛpayā kṛpaṇāṃ prabhuḥ hāsya-prauḍhi-bhramac-cittām atad-arhāṃ satāṃ gatiḥ
Sanskrit only: no published translation is held for this verse.
श्री-भगवान् उवाच मा मा वैदर्भ्य् असूयेथा जाने त्वां मत्-परायणाम् त्वद्-वचः श्रोतु-कामेन क्ष्वेल्याचरितम् अङ्गने
śrī-bhagavān uvāca mā mā vaidarbhy asūyethā jāne tvāṃ mat-parāyaṇām tvad-vacaḥ śrotu-kāmena kṣvelyācaritam aṅgane
Sanskrit only: no published translation is held for this verse.
मुखं च प्रेम-संरम्भ- स्फुरिताधरम् ईक्षितुम् कटा-क्षेपारुणापाङ्गं सुन्दर-भ्रु-कुटी-तटम्
mukhaṃ ca prema-saṃrambha- sphuritādharam īkṣitum kaṭā-kṣepāruṇāpāṅgaṃ sundara-bhru-kuṭī-taṭam
Sanskrit only: no published translation is held for this verse.
अयं हि परमो लाभो गृहेषु गृह-मेधिनाम् यन् नर्मैर् ईयते यामः प्रियया भीरु भामिनि
ayaṃ hi paramo lābho gṛheṣu gṛha-medhinām yan narmair īyate yāmaḥ priyayā bhīru bhāmini
Sanskrit only: no published translation is held for this verse.
श्री-शुक उवाच सैवं भगवता राजन् वैदर्भी परिसान्त्विता ज्ञात्वा तत्-परिहासोक्तिं प्रिय-त्याग-भयं जहौ
śrī-śuka uvāca saivaṃ bhagavatā rājan vaidarbhī parisāntvitā jñātvā tat-parihāsoktiṃ priya-tyāga-bhayaṃ jahau
Sanskrit only: no published translation is held for this verse.
बभाष ऋषभं पुंसां वीक्षन्ती भगवन्-मुखम् स-व्रीड-हास-रुचिर- स्निग्धापाङ्गेन भारत
babhāṣa ṛṣabhaṃ puṃsāṃ vīkṣantī bhagavan-mukham sa-vrīḍa-hāsa-rucira- snigdhāpāṅgena bhārata
Sanskrit only: no published translation is held for this verse.
श्री-रुक्मिण्य् उवाच नन्व् एवम् एतद् अरविन्द-विलोचनाह यद् वै भवान् भगवतो ऽसदृशी विभूम्नः क्व स्वे महिम्न्य् अभिरतो भगवांस् त्र्य्-अधीशः क्वाहं गुण-प्रकृतिर् अज्ञ-गृहीत-पादा
śrī-rukmiṇy uvāca nanv evam etad aravinda-vilocanāha yad vai bhavān bhagavato 'sadṛśī vibhūmnaḥ kva sve mahimny abhirato bhagavāṃs try-adhīśaḥ kvāhaṃ guṇa-prakṛtir ajña-gṛhīta-pādā
Sanskrit only: no published translation is held for this verse.
सत्यं भयाद् इव गुणेभ्य उरुक्रमान्तः शेते समुद्र उपलम्भन-मात्र आत्मा नित्यं कद्-इन्द्रिय-गणैः कृत-विग्रहस् त्वं त्वत्-सेवकैर् नृप-पदं विधुतं तमो ऽन्धम्
satyaṃ bhayād iva guṇebhya urukramāntaḥ śete samudra upalambhana-mātra ātmā nityaṃ kad-indriya-gaṇaiḥ kṛta-vigrahas tvaṃ tvat-sevakair nṛpa-padaṃ vidhutaṃ tamo 'ndham
Sanskrit only: no published translation is held for this verse.
त्वत्-पाद-पद्म-मकरन्द-जुषां मुनीनां वर्त्मास्फुटं न्र्-पशुभिर् ननु दुर्विभाव्यम् यस्माद् अलौकिकम् इवेहितम् ईश्वरस्य भूमंस् तवेहितम् अथो अनु ये भवन्तम्
tvat-pāda-padma-makaranda-juṣāṃ munīnāṃ vartmāsphuṭaṃ nr-paśubhir nanu durvibhāvyam yasmād alaukikam ivehitam īśvarasya bhūmaṃs tavehitam atho anu ye bhavantam
Sanskrit only: no published translation is held for this verse.
निष्किञ्चनो ननु भवान् न यतो ऽस्ति किञ्चिद् यस्मै बलिं बलि-भुजो ऽपि हरन्त्य् अजाद्याः न त्वा विदन्त्य् असु-तृपो ऽन्तकम् आढ्यतान्धाः प्रेष्ठो भवान् बलि-भुजाम् अपि ते ऽपि तुभ्यम्
niṣkiñcano nanu bhavān na yato 'sti kiñcid yasmai baliṃ bali-bhujo 'pi haranty ajādyāḥ na tvā vidanty asu-tṛpo 'ntakam āḍhyatāndhāḥ preṣṭho bhavān bali-bhujām api te 'pi tubhyam
Sanskrit only: no published translation is held for this verse.
त्वं वै समस्त-पुरुषार्थ-मयः फलात्मा यद्-वाञ्छया सु-मतयो विसृजन्ति कृत्स्नम् तेषां विभो समुचितो भवतः समाजः पुंसः स्त्रियाश् च रतयोः सुख-दुःखिनोर् न
tvaṃ vai samasta-puruṣārtha-mayaḥ phalātmā yad-vāñchayā su-matayo visṛjanti kṛtsnam teṣāṃ vibho samucito bhavataḥ samājaḥ puṃsaḥ striyāś ca ratayoḥ sukha-duḥkhinor na
Sanskrit only: no published translation is held for this verse.
त्वं न्यस्त-दण्ड-मुनिभिर् गदितानुभाव आत्मात्म-दश् च जगताम् इति मे वृतो ऽसि हित्वा भवद्-भ्रुव उदीरित-काल-वेग- ध्वस्ताशिषो ऽब्ज-भव-नाक-पतीन् कुतो ऽन्ये
tvaṃ nyasta-daṇḍa-munibhir gaditānubhāva ātmātma-daś ca jagatām iti me vṛto 'si hitvā bhavad-bhruva udīrita-kāla-vega- dhvastāśiṣo 'bja-bhava-nāka-patīn kuto 'nye
Sanskrit only: no published translation is held for this verse.
जाड्यं वचस् तव गदाग्रज यस् तु भूपान् विद्राव्य शार्ङ्ग-निनदेन जहर्थ मां त्वम् सिंहो यथा स्व-बलिम् ईश पशून् स्व-भागं तेभ्यो भयाद् यद् उदधिं शरणं प्रपन्नः
jāḍyaṃ vacas tava gadāgraja yas tu bhūpān vidrāvya śārṅga-ninadena jahartha māṃ tvam siṃho yathā sva-balim īśa paśūn sva-bhāgaṃ tebhyo bhayād yad udadhiṃ śaraṇaṃ prapannaḥ
Sanskrit only: no published translation is held for this verse.
यद्-वाञ्छया नृप-शिखामणयो ऽन्ग-वैन्य- जायन्त-नाहुष-गयादय ऐक्य-पत्यम् राज्यं विसृज्य विविशुर् वनम् अम्बुजाक्ष सीदन्ति ते ऽनुपदवीं त इहास्थिताः किम्
yad-vāñchayā nṛpa-śikhāmaṇayo 'nga-vainya- jāyanta-nāhuṣa-gayādaya aikya-patyam rājyaṃ visṛjya viviśur vanam ambujākṣa sīdanti te 'nupadavīṃ ta ihāsthitāḥ kim
Sanskrit only: no published translation is held for this verse.
कान्यं श्रयेत तव पाद-सरोज-गन्धम् आघ्राय सन्-मुखरितं जनतापवर्गम् लक्ष्म्य्-आलयं त्व् अविगणय्य गुणालयस्य मर्त्या सदोरु-भयम् अर्थ-विविइत-दृष्टिः
kānyaṃ śrayeta tava pāda-saroja-gandham āghrāya san-mukharitaṃ janatāpavargam lakṣmy-ālayaṃ tv avigaṇayya guṇālayasya martyā sadoru-bhayam artha-viviita-dṛṣṭiḥ
Sanskrit only: no published translation is held for this verse.
तं त्वानुरूपम् अभजं जगताम् अधीशम् आत्मानम् अत्र च परत्र च काम-पूरम् स्यान् मे तवाङ्घ्रिर् अरणं सृतिभिर् भ्रमन्त्या यो वै भजन्तम् उपयात्य् अनृतापवर्गः
taṃ tvānurūpam abhajaṃ jagatām adhīśam ātmānam atra ca paratra ca kāma-pūram syān me tavāṅghrir araṇaṃ sṛtibhir bhramantyā yo vai bhajantam upayāty anṛtāpavargaḥ
Sanskrit only: no published translation is held for this verse.
तस्याः स्युर् अच्युत नृपा भवतोपदिष्टाः स्त्रीणां गृहेषु खर-गो-श्व-विडाल-भृत्याः यत्-कर्ण-मूलम् अन्-कर्षण नोपयायाद् युष्मत्-कथा मृड-विरिञ्च-सभासु गीता
tasyāḥ syur acyuta nṛpā bhavatopadiṣṭāḥ strīṇāṃ gṛheṣu khara-go-śva-viḍāla-bhṛtyāḥ yat-karṇa-mūlam an-karṣaṇa nopayāyād yuṣmat-kathā mṛḍa-viriñca-sabhāsu gītā
Sanskrit only: no published translation is held for this verse.
त्वक्-श्मश्रु-रोम-नख-केश-पिनद्धम् अन्तर् मांसास्थि-रक्त-कृमि-विट्-कफ-पित्त-वातम् जीवच्-छवं भजति कान्त-मतिर् विमूढा या ते पदाब्ज-मकरन्दम् अजिघ्रती स्त्री
tvak-śmaśru-roma-nakha-keśa-pinaddham antar māṃsāsthi-rakta-kṛmi-viṭ-kapha-pitta-vātam jīvac-chavaṃ bhajati kānta-matir vimūḍhā yā te padābja-makarandam ajighratī strī
Sanskrit only: no published translation is held for this verse.
अस्त्व् अम्बुजाक्ष मम ते चरणानुराग आत्मन् रतस्य मयि चानतिरिक्त-दृष्टेः यर्ह्य् अस्य वृद्धय उपात्त-रजो-ऽति-मात्रो माम् ईक्षसे तद् उ ह नः परमानुकम्पा
astv ambujākṣa mama te caraṇānurāga ātman ratasya mayi cānatirikta-dṛṣṭeḥ yarhy asya vṛddhaya upātta-rajo-'ti-mātro mām īkṣase tad u ha naḥ paramānukampā
Sanskrit only: no published translation is held for this verse.
नैवालीकम् अहं मन्ये वचस् ते मधुसूदन अम्बाया एव हि प्रायः कन्यायाः स्याद् रतिः क्वचित्
naivālīkam ahaṃ manye vacas te madhusūdana ambāyā eva hi prāyaḥ kanyāyāḥ syād ratiḥ kvacit
Sanskrit only: no published translation is held for this verse.
व्यूढायाश् चापि पुंश्चल्या मनो ऽभ्येति नवं नवम् बुधो ऽसतीं न बिभृयात् तां बिभ्रद् उभय-च्युतः
vyūḍhāyāś cāpi puṃścalyā mano 'bhyeti navaṃ navam budho 'satīṃ na bibhṛyāt tāṃ bibhrad ubhaya-cyutaḥ
Sanskrit only: no published translation is held for this verse.
श्री-भगवान् उवाच साध्व्य् एतच्-छ्रोतु-कामैस् त्वं राज-पुत्री प्रलम्भिता मयोदितं यद् अन्वात्थ सर्वं तत् सत्यम् एव हि
śrī-bhagavān uvāca sādhvy etac-chrotu-kāmais tvaṃ rāja-putrī pralambhitā mayoditaṃ yad anvāttha sarvaṃ tat satyam eva hi
Sanskrit only: no published translation is held for this verse.
यान् यान् कामयसे कामान् मय्य् अकामाय भामिनि सन्ति ह्य् एकान्त-भक्तायास् तव कल्याणि नित्यद
yān yān kāmayase kāmān mayy akāmāya bhāmini santi hy ekānta-bhaktāyās tava kalyāṇi nityada
Sanskrit only: no published translation is held for this verse.
उपलब्धं पति-प्रेम पाति-व्रत्यं च ते ऽनघे यद् वाक्यैश् चाल्यमानाया न धीर् मय्य् अपकर्षिता
upalabdhaṃ pati-prema pāti-vratyaṃ ca te 'naghe yad vākyaiś cālyamānāyā na dhīr mayy apakarṣitā
Sanskrit only: no published translation is held for this verse.
ये मां भजन्ति दाम्पत्ये तपसा व्रत-चर्यया कामात्मानो ऽपवर्गेशं मोहिता मम मायया
ye māṃ bhajanti dāmpatye tapasā vrata-caryayā kāmātmāno 'pavargeśaṃ mohitā mama māyayā
Sanskrit only: no published translation is held for this verse.
मां प्राप्य मानिन्य् अपवर्ग-सम्पदं वाञ्छन्ति ये सम्पद एव तत्-पतिम् ते मन्द-भागा निरये ऽपि ये नृणां मात्रात्मकत्वात् निरयः सु-सङ्गमः
māṃ prāpya māniny apavarga-sampadaṃ vāñchanti ye sampada eva tat-patim te manda-bhāgā niraye 'pi ye nṛṇāṃ mātrātmakatvāt nirayaḥ su-saṅgamaḥ
Sanskrit only: no published translation is held for this verse.
दिष्ट्या गृहेश्वर्य् असकृन् मयि त्वया कृतानुवृत्तिर् भव-मोचनी खलैः सु-दुष्करासौ सुतरां दुराशिषो ह्य् असुं-भराया निकृतिं जुषः स्त्रियाः
diṣṭyā gṛheśvary asakṛn mayi tvayā kṛtānuvṛttir bhava-mocanī khalaiḥ su-duṣkarāsau sutarāṃ durāśiṣo hy asuṃ-bharāyā nikṛtiṃ juṣaḥ striyāḥ
Sanskrit only: no published translation is held for this verse.
न त्वादृशीम् प्रणयिनीं गृहिणीं गृहेषु पश्यामि मानिनि यया स्व-विवाह-काले प्राप्तान् नृपान् न विगणय्य रहो-हरो मे प्रस्थापितो द्विज उपश्रुत-सत्-कथस्य
na tvādṛśīm praṇayinīṃ gṛhiṇīṃ gṛheṣu paśyāmi mānini yayā sva-vivāha-kāle prāptān nṛpān na vigaṇayya raho-haro me prasthāpito dvija upaśruta-sat-kathasya
Sanskrit only: no published translation is held for this verse.
भ्रातुर् विरूप-करणं युधि निर्जितस्य प्रोद्वाह-पर्वणि च तद्-वधम् अक्ष-गोष्ठ्याम् दुःखं समुत्थम् असहो ऽस्मद्-अयोग-भीत्या नैवाब्रवीः किम् अपि तेन वयं जितास् ते
bhrātur virūpa-karaṇaṃ yudhi nirjitasya prodvāha-parvaṇi ca tad-vadham akṣa-goṣṭhyām duḥkhaṃ samuttham asaho 'smad-ayoga-bhītyā naivābravīḥ kim api tena vayaṃ jitās te
Sanskrit only: no published translation is held for this verse.
दूतस् त्वयात्म-लभने सु-विविक्त-मन्त्रः प्रस्थापितो मयि चिरायति शून्यम् एतत् मत्वा जिहास इदं अङ्गम् अनन्य-योग्यं तिष्ठेत तत् त्वयि वयं प्रतिनन्दयामः
dūtas tvayātma-labhane su-vivikta-mantraḥ prasthāpito mayi cirāyati śūnyam etat matvā jihāsa idaṃ aṅgam ananya-yogyaṃ tiṣṭheta tat tvayi vayaṃ pratinandayāmaḥ
Sanskrit only: no published translation is held for this verse.
श्री-शुक उवाच एवं सौरत-संलापैर् भगवान् जगद्-ईश्वरः स्व-रतो रमया रेमे नर-लोकं विडम्बयन्
śrī-śuka uvāca evaṃ saurata-saṃlāpair bhagavān jagad-īśvaraḥ sva-rato ramayā reme nara-lokaṃ viḍambayan
Sanskrit only: no published translation is held for this verse.
तथान्यासाम् अपि विभुर् गृहेसु गृहवान् इव आस्थितो गृह-मेधीयान् धर्मान् लोक-गुरुर् हरिः
tathānyāsām api vibhur gṛhesu gṛhavān iva āsthito gṛha-medhīyān dharmān loka-gurur hariḥ
Sanskrit only: no published translation is held for this verse.