Library·Bhāgavata Purāṇa·10·10.73
श्री-शुक उवाच अयुते द्वे शतान्य् अष्टौ निरुद्धा युधि निर्जिताः ते निर्गता गिरिद्रोण्यां मलिना मल-वाससः
śrī-śuka uvāca ayute dve śatāny aṣṭau niruddhā yudhi nirjitāḥ te nirgatā giridroṇyāṃ malinā mala-vāsasaḥ
Sanskrit only: no published translation is held for this verse.
क्षुत्-क्षामाः शुष्क-वदनाः संरोध-परिकर्शिताः ददृशुस् ते घन-श्यामं पीत-कौशेय-वाससम्
kṣut-kṣāmāḥ śuṣka-vadanāḥ saṃrodha-parikarśitāḥ dadṛśus te ghana-śyāmaṃ pīta-kauśeya-vāsasam
Sanskrit only: no published translation is held for this verse.
श्रीवत्साङ्कं चतुर्-बाहुं पद्म-गर्भारुणेक्षणम् चारु-प्रसन्न-वदनं स्फुरन्-मकर-कुण्डलम्
śrīvatsāṅkaṃ catur-bāhuṃ padma-garbhāruṇekṣaṇam cāru-prasanna-vadanaṃ sphuran-makara-kuṇḍalam
Sanskrit only: no published translation is held for this verse.
पद्म-हस्तं गदा-शङ्ख रथाङ्गैर् उपलक्षितम् किरीट-हार-कटक- कटि-सूत्राङ्गदाञ्चितम्
padma-hastaṃ gadā-śaṅkha rathāṅgair upalakṣitam kirīṭa-hāra-kaṭaka- kaṭi-sūtrāṅgadāñcitam
Sanskrit only: no published translation is held for this verse.
भ्राजद्-वर-मणि-ग्रीवं निवीतं वन-मालया पिबन्त इव चक्षुर्भ्यां लिहन्त इव जिह्वया
bhrājad-vara-maṇi-grīvaṃ nivītaṃ vana-mālayā pibanta iva cakṣurbhyāṃ lihanta iva jihvayā
Sanskrit only: no published translation is held for this verse.
जिघ्रन्त इव नासाभ्यां रम्भन्त इव बाहुभिः प्रणेमुर् हत-पाप्मानो मूर्धभिः पादयोर् हरेः
jighranta iva nāsābhyāṃ rambhanta iva bāhubhiḥ praṇemur hata-pāpmāno mūrdhabhiḥ pādayor hareḥ
Sanskrit only: no published translation is held for this verse.
कृष्ण-सन्दर्शनाह्लाद ध्वस्त-संरोधन-क्लमाः प्रशशंसुर् हृषीकेशं गीर्भिः प्राञ्जलयो नृपाः
kṛṣṇa-sandarśanāhlāda dhvasta-saṃrodhana-klamāḥ praśaśaṃsur hṛṣīkeśaṃ gīrbhiḥ prāñjalayo nṛpāḥ
Sanskrit only: no published translation is held for this verse.
राजान ऊचुः नमस् ते देव-देवेश प्रपन्नार्ति-हराव्यय प्रपन्नान् पाहि नः कृष्ण निर्विण्णान् घोर-संसृतेः
rājāna ūcuḥ namas te deva-deveśa prapannārti-harāvyaya prapannān pāhi naḥ kṛṣṇa nirviṇṇān ghora-saṃsṛteḥ
Sanskrit only: no published translation is held for this verse.
नैनं नाथानुसूयामो मागधं मधुसूदन अनुग्रहो यद् भवतो राज्ञां राज्य-च्युतिर् विभो
nainaṃ nāthānusūyāmo māgadhaṃ madhusūdana anugraho yad bhavato rājñāṃ rājya-cyutir vibho
Sanskrit only: no published translation is held for this verse.
राज्यैश्वर्य-मदोन्नद्धो न श्रेयो विन्दते नृपः त्वन्-माया-मोहितो ऽनित्या मन्यते सम्पदो ऽचलाः
rājyaiśvarya-madonnaddho na śreyo vindate nṛpaḥ tvan-māyā-mohito 'nityā manyate sampado 'calāḥ
Sanskrit only: no published translation is held for this verse.
मृग-तृष्णां यथा बाला मन्यन्त उदकाशयम् एवं वैकारिकीं मायाम् अयुक्ता वस्तु चक्षते
mṛga-tṛṣṇāṃ yathā bālā manyanta udakāśayam evaṃ vaikārikīṃ māyām ayuktā vastu cakṣate
Sanskrit only: no published translation is held for this verse.
वयं पुरा श्री-मद-नष्ट-दृष्टयो जिगीषयास्या इतरेतर-स्पृधः घ्नन्तः प्रजाः स्वा अति-निर्घृणाः प्रभो मृत्युं पुरस् त्वाविगणय्य दुर्मदाः
vayaṃ purā śrī-mada-naṣṭa-dṛṣṭayo jigīṣayāsyā itaretara-spṛdhaḥ ghnantaḥ prajāḥ svā ati-nirghṛṇāḥ prabho mṛtyuṃ puras tvāvigaṇayya durmadāḥ
Sanskrit only: no published translation is held for this verse.
त एव कृष्णाद्य गभीर-रंहसा दुरन्ते-वीर्येण विचालिताः श्रियः कालेन तन्वा भवतो ऽनुकम्पया विनष्ट-दर्पाश् चरणौ स्मराम ते
ta eva kṛṣṇādya gabhīra-raṃhasā durante-vīryeṇa vicālitāḥ śriyaḥ kālena tanvā bhavato 'nukampayā vinaṣṭa-darpāś caraṇau smarāma te
Sanskrit only: no published translation is held for this verse.
अथो न राज्यम् मृग-तृष्णि-रूपितं देहेन शश्वत् पतता रुजां भुवा उपासितव्यं स्पृहयामहे विभो क्रिया-फलं प्रेत्य च कर्ण-रोचनम्
atho na rājyam mṛga-tṛṣṇi-rūpitaṃ dehena śaśvat patatā rujāṃ bhuvā upāsitavyaṃ spṛhayāmahe vibho kriyā-phalaṃ pretya ca karṇa-rocanam
Sanskrit only: no published translation is held for this verse.
तं नः समादिशोपायं येन ते चरणाब्जयोः स्मृतिर् यथा न विरमेद् अपि संसरताम् इह
taṃ naḥ samādiśopāyaṃ yena te caraṇābjayoḥ smṛtir yathā na viramed api saṃsaratām iha
Sanskrit only: no published translation is held for this verse.
कृष्णाय वासुदेवाय हरये परमात्मने प्रणत-क्लेश-नाशाय गोविन्दाय नमो नमः
kṛṣṇāya vāsudevāya haraye paramātmane praṇata-kleśa-nāśāya govindāya namo namaḥ
Sanskrit only: no published translation is held for this verse.
श्री-शुक उवाच संस्तूयमानो भगवान् राजभिर् मुक्त-बन्धनैः तान् आह करुणस् तात शरण्यः श्लक्ष्णया गिरा
śrī-śuka uvāca saṃstūyamāno bhagavān rājabhir mukta-bandhanaiḥ tān āha karuṇas tāta śaraṇyaḥ ślakṣṇayā girā
Sanskrit only: no published translation is held for this verse.
श्री-भगवान् उवाच अद्य प्रभृति वो भूपा मय्य् आत्मन्य् अखिलेश्वरे सु-दृढा जायते भक्तिर् बाढम् आशंसितं तथा
śrī-bhagavān uvāca adya prabhṛti vo bhūpā mayy ātmany akhileśvare su-dṛḍhā jāyate bhaktir bāḍham āśaṃsitaṃ tathā
Sanskrit only: no published translation is held for this verse.
दिष्ट्या व्यवसितं भूपा भवन्त ऋत-भाषिणः श्रीय्-ऐश्वर्य-मदोन्नाहं पश्य उन्मादकं नृणाम्
diṣṭyā vyavasitaṃ bhūpā bhavanta ṛta-bhāṣiṇaḥ śrīy-aiśvarya-madonnāhaṃ paśya unmādakaṃ nṛṇām
Sanskrit only: no published translation is held for this verse.
हैहयो नहुषो वेणो रावणो नरको ऽपरे श्री-मदाद् भ्रंशिताः स्थानाद् देव-दैत्य-नरेश्वराः
haihayo nahuṣo veṇo rāvaṇo narako 'pare śrī-madād bhraṃśitāḥ sthānād deva-daitya-nareśvarāḥ
Sanskrit only: no published translation is held for this verse.
भवन्त एतद् विज्ञाय देहाद्य् उत्पाद्यम् अन्त-वत् मां यजन्तो ऽध्वरैर् युक्ताः प्रजा धर्मेण रक्ष्यथ
bhavanta etad vijñāya dehādy utpādyam anta-vat māṃ yajanto 'dhvarair yuktāḥ prajā dharmeṇa rakṣyatha
Sanskrit only: no published translation is held for this verse.
सन्तन्वन्तः प्रजा-तन्तून् सुखं दुःखं भवाभवौ प्राप्तं प्राप्तं च सेवन्तो मच्-चित्ता विचरिष्यथ
santanvantaḥ prajā-tantūn sukhaṃ duḥkhaṃ bhavābhavau prāptaṃ prāptaṃ ca sevanto mac-cittā vicariṣyatha
Sanskrit only: no published translation is held for this verse.
उदासीनाश् च देहादाव् आत्मारामा धृत-व्रताः मय्य् आवेश्य मनः सम्यङ् माम् अन्ते ब्रह्म यास्यथ
udāsīnāś ca dehādāv ātmārāmā dhṛta-vratāḥ mayy āveśya manaḥ samyaṅ mām ante brahma yāsyatha
Sanskrit only: no published translation is held for this verse.
श्री-शुक उवाच इत्य् आदिश्य नृपान् कृष्णो भगवान् भुवनेश्वरः तेषां न्ययुङ्क्त पुरुषान् स्त्रियो मज्जन-कर्मणि
śrī-śuka uvāca ity ādiśya nṛpān kṛṣṇo bhagavān bhuvaneśvaraḥ teṣāṃ nyayuṅkta puruṣān striyo majjana-karmaṇi
Sanskrit only: no published translation is held for this verse.
सपर्यां कारयाम् आस सहदेवेन भारत नरदेवोचितैर् वस्त्रैर् भूषणैः स्रग्-विलेपनैः
saparyāṃ kārayām āsa sahadevena bhārata naradevocitair vastrair bhūṣaṇaiḥ srag-vilepanaiḥ
Sanskrit only: no published translation is held for this verse.
भोजयित्वा वरान्नेन सु-स्नातान् समलङ्कृतान् भोगैश् च विविधैर् युक्तांस् ताम्बूलाद्यैर् नृपोचितैः
bhojayitvā varānnena su-snātān samalaṅkṛtān bhogaiś ca vividhair yuktāṃs tāmbūlādyair nṛpocitaiḥ
Sanskrit only: no published translation is held for this verse.
ते पूजिता मुकुन्देन राजानो मृष्ट-कुण्डलाः विरेजुर् मोचिताः क्लेशात् प्रावृड्-अन्ते यथा ग्रहाः
te pūjitā mukundena rājāno mṛṣṭa-kuṇḍalāḥ virejur mocitāḥ kleśāt prāvṛḍ-ante yathā grahāḥ
Sanskrit only: no published translation is held for this verse.
रथान् सद्-अश्वान् आरोप्य मणि-काञ्चन-भूषितान् प्रीणय्य सुनृतैर् वाक्यैः स्व-देशान् प्रत्ययापयत्
rathān sad-aśvān āropya maṇi-kāñcana-bhūṣitān prīṇayya sunṛtair vākyaiḥ sva-deśān pratyayāpayat
Sanskrit only: no published translation is held for this verse.
त एवं मोचिताः कृच्छ्रात् कृष्णेन सु-महात्मना ययुस् तम् एव ध्यायन्तः कृतानि च जगत्-पतेः
ta evaṃ mocitāḥ kṛcchrāt kṛṣṇena su-mahātmanā yayus tam eva dhyāyantaḥ kṛtāni ca jagat-pateḥ
Sanskrit only: no published translation is held for this verse.
जगदुः प्रकृतिभ्यस् ते महा-पुरुष-चेष्टितम् यथान्वशासद् भगवांस् तथा चक्रुर् अतन्द्रिताः
jagaduḥ prakṛtibhyas te mahā-puruṣa-ceṣṭitam yathānvaśāsad bhagavāṃs tathā cakrur atandritāḥ
Sanskrit only: no published translation is held for this verse.
जरासन्धं घातयित्वा भीमसेनेन केशवः पार्थाभ्यां संयुतः प्रायात् सहदेवेन पूजितः
jarāsandhaṃ ghātayitvā bhīmasenena keśavaḥ pārthābhyāṃ saṃyutaḥ prāyāt sahadevena pūjitaḥ
Sanskrit only: no published translation is held for this verse.
गत्वा ते खाण्डव-प्रस्थं शङ्खान् दध्मुर् जितारयः हर्षयन्तः स्व-सुहृदो दुर्हृदां चासुखावहाः
gatvā te khāṇḍava-prasthaṃ śaṅkhān dadhmur jitārayaḥ harṣayantaḥ sva-suhṛdo durhṛdāṃ cāsukhāvahāḥ
Sanskrit only: no published translation is held for this verse.
तच् छ्रुत्वा प्रीत-मनस इन्द्रप्रस्थ-निवासिनः मेनिरे मागधं शान्तं राजा चाप्त-मनोरथः
tac chrutvā prīta-manasa indraprastha-nivāsinaḥ menire māgadhaṃ śāntaṃ rājā cāpta-manorathaḥ
Sanskrit only: no published translation is held for this verse.
अभिवन्द्याथ राजानं भीमार्जुन-जनार्दनाः सर्वम् आश्रावयां चक्रुर् आत्मना यद् अनुष्ठितम्
abhivandyātha rājānaṃ bhīmārjuna-janārdanāḥ sarvam āśrāvayāṃ cakrur ātmanā yad anuṣṭhitam
Sanskrit only: no published translation is held for this verse.
निशम्य धर्म-राजस् तत् केशवेनानुकम्पितम् आनन्दाश्रु-कलां मुञ्चन् प्रेम्णा नोवाच किञ्चन
niśamya dharma-rājas tat keśavenānukampitam ānandāśru-kalāṃ muñcan premṇā novāca kiñcana
Sanskrit only: no published translation is held for this verse.