Library·Bhāgavata Purāṇa·10·10.77
श्री-शुक उवाच स उपस्पृश्य सलिलं दंशितो धृत-कार्मुकः नय मां द्युमतः पार्श्वं वीरस्येत्य् आह सारथिम्
śrī-śuka uvāca sa upaspṛśya salilaṃ daṃśito dhṛta-kārmukaḥ naya māṃ dyumataḥ pārśvaṃ vīrasyety āha sārathim
Sanskrit only: no published translation is held for this verse.
विधमन्तं स्व-सैन्यानि द्युमन्तं रुक्मिणी-सुतः प्रतिहत्य प्रत्यविध्यान् नाराचैर् अष्टभिः स्मयन्
vidhamantaṃ sva-sainyāni dyumantaṃ rukmiṇī-sutaḥ pratihatya pratyavidhyān nārācair aṣṭabhiḥ smayan
Sanskrit only: no published translation is held for this verse.
चतुर्भिश् चतुरो वाहान् सूतम् एकेन चाहनत् द्वाभ्यं धनुश् च केतुं च शरेणान्येन वै शिरः
caturbhiś caturo vāhān sūtam ekena cāhanat dvābhyaṃ dhanuś ca ketuṃ ca śareṇānyena vai śiraḥ
Sanskrit only: no published translation is held for this verse.
गद-सात्यकि-साम्बाद्या जघ्नुः सौभ-पतेर् बलम् पेतुः समुद्रे सौभेयाः सर्वे सञ्छिन्न-कन्धराः
gada-sātyaki-sāmbādyā jaghnuḥ saubha-pater balam petuḥ samudre saubheyāḥ sarve sañchinna-kandharāḥ
Sanskrit only: no published translation is held for this verse.
एवं यदूनां शाल्वानां निघ्नताम् इतरेतरम् युद्धं त्रि-नव-रात्रं तद् अभूत् तुमुलम् उल्बणम्
evaṃ yadūnāṃ śālvānāṃ nighnatām itaretaram yuddhaṃ tri-nava-rātraṃ tad abhūt tumulam ulbaṇam
Sanskrit only: no published translation is held for this verse.
इन्द्रप्रस्थं गतः कृष्ण आहूतो धर्म-सूनुना राजसूये ऽथ निवृत्ते शिशुपाले च संस्थिते
indraprasthaṃ gataḥ kṛṣṇa āhūto dharma-sūnunā rājasūye 'tha nivṛtte śiśupāle ca saṃsthite
Sanskrit only: no published translation is held for this verse.
कुरु-वृद्धान् अनुज्ञाप्य मुनींश् च स-सुतां पृथाम् निमित्तान्य् अति-घोराणि पश्यन् द्वारवतीं ययौ
kuru-vṛddhān anujñāpya munīṃś ca sa-sutāṃ pṛthām nimittāny ati-ghorāṇi paśyan dvāravatīṃ yayau
Sanskrit only: no published translation is held for this verse.
आह चाहम् इहायात आर्य-मिश्राभिसङ्गतः राजन्याश् चैद्य-पक्षीया नूनं हन्युः पुरीं मम
āha cāham ihāyāta ārya-miśrābhisaṅgataḥ rājanyāś caidya-pakṣīyā nūnaṃ hanyuḥ purīṃ mama
Sanskrit only: no published translation is held for this verse.
वीक्ष्य तत् कदनं स्वानां निरूप्य पुर-रक्षणम् सौभं च शाल्व-राजं च दारुकं प्राह केशवः
vīkṣya tat kadanaṃ svānāṃ nirūpya pura-rakṣaṇam saubhaṃ ca śālva-rājaṃ ca dārukaṃ prāha keśavaḥ
Sanskrit only: no published translation is held for this verse.
रथं प्रापय मे सूत शाल्वस्यान्तिकम् आशु वै सम्भ्रमस् ते न कर्तव्यो मायावी सौभ-राड् अयम्
rathaṃ prāpaya me sūta śālvasyāntikam āśu vai sambhramas te na kartavyo māyāvī saubha-rāḍ ayam
Sanskrit only: no published translation is held for this verse.
इत्य् उक्तश् चोदयाम् आस रथम् आस्थाय दारुकः विशन्तं ददृशुः सर्वे स्वे परे चारुणानुजम्
ity uktaś codayām āsa ratham āsthāya dārukaḥ viśantaṃ dadṛśuḥ sarve sve pare cāruṇānujam
Sanskrit only: no published translation is held for this verse.
शाल्वश् च कृष्णम् आलोक्य हत-प्राय-बलेश्वरः प्राहरत् कृष्ण-सूतय शक्तिं भीम-रवां मृधे
śālvaś ca kṛṣṇam ālokya hata-prāya-baleśvaraḥ prāharat kṛṣṇa-sūtaya śaktiṃ bhīma-ravāṃ mṛdhe
Sanskrit only: no published translation is held for this verse.
ताम् आपतन्तीं नभसि महोल्काम् इव रंहसा भासयन्तीं दिशः शौरिः सायकैः शतधाच्छिनत्
tām āpatantīṃ nabhasi maholkām iva raṃhasā bhāsayantīṃ diśaḥ śauriḥ sāyakaiḥ śatadhācchinat
Sanskrit only: no published translation is held for this verse.
तं च षोडशभिर् विद्ध्वा बानैः सौभं च खे भ्रमत् अविध्यच् छर-सन्दोहैः खं सूर्य इव रश्मिभिः
taṃ ca ṣoḍaśabhir viddhvā bānaiḥ saubhaṃ ca khe bhramat avidhyac chara-sandohaiḥ khaṃ sūrya iva raśmibhiḥ
Sanskrit only: no published translation is held for this verse.
शाल्वः शौरेस् तु दोः सव्यं स-शार्ङ्गं शार्ङ्ग-धन्वनः बिभेद न्यपतद् धस्ताच् छार्ङ्गम् आसीत् तद् अद्भुतम्
śālvaḥ śaures tu doḥ savyaṃ sa-śārṅgaṃ śārṅga-dhanvanaḥ bibheda nyapatad dhastāc chārṅgam āsīt tad adbhutam
Sanskrit only: no published translation is held for this verse.
हाहा-कारो महान् आसीद् भूतानां तत्र पश्यताम् निनद्य सौभ-राड् उच्चैर् इदम् आह जनार्दनम्
hāhā-kāro mahān āsīd bhūtānāṃ tatra paśyatām ninadya saubha-rāḍ uccair idam āha janārdanam
Sanskrit only: no published translation is held for this verse.
यत् त्वया मूढ नः सख्युर् भ्रातुर् भार्या हृतेक्षताम् प्रमत्तः स सभा-मध्ये त्वया व्यापादितः सखा
yat tvayā mūḍha naḥ sakhyur bhrātur bhāryā hṛtekṣatām pramattaḥ sa sabhā-madhye tvayā vyāpāditaḥ sakhā
Sanskrit only: no published translation is held for this verse.
तं त्वाद्य निशितैर् बाणैर् अपराजित-मानिनम् नयाम्य् अपुनर्-आवृत्तिं यदि तिष्ठेर् ममाग्रतः
taṃ tvādya niśitair bāṇair aparājita-māninam nayāmy apunar-āvṛttiṃ yadi tiṣṭher mamāgrataḥ
Sanskrit only: no published translation is held for this verse.
श्री-भगवान् उवाच वृथा त्वं कत्थसे मन्द न पश्यस्य् अन्तिके ऽन्तकम् पौरुसं दर्शयन्ति स्म शूरा न बहु-भाषिणः
śrī-bhagavān uvāca vṛthā tvaṃ katthase manda na paśyasy antike 'ntakam paurusaṃ darśayanti sma śūrā na bahu-bhāṣiṇaḥ
Sanskrit only: no published translation is held for this verse.
इत्य् उक्त्वा भगवाञ् छाल्वं गदया भीम-वेगया तताड जत्रौ संरब्धः स चकम्पे वमन्न् असृक्
ity uktvā bhagavāñ chālvaṃ gadayā bhīma-vegayā tatāḍa jatrau saṃrabdhaḥ sa cakampe vamann asṛk
Sanskrit only: no published translation is held for this verse.
गदायां सन्निवृत्तायां शाल्वस् त्व् अन्तरधीयत ततो मुहूर्त आगत्य पुरुषः शिरसाच्युतम् देवक्या प्रहितो ऽस्मीति नत्वा प्राह वचो रुदन्
gadāyāṃ sannivṛttāyāṃ śālvas tv antaradhīyata tato muhūrta āgatya puruṣaḥ śirasācyutam devakyā prahito 'smīti natvā prāha vaco rudan
Sanskrit only: no published translation is held for this verse.
कृष्ण कृष्ण महा-बाहो पिता ते पितृ-वत्सल बद्ध्वापनीतः शाल्वेन सौनिकेन यथा पशुः
kṛṣṇa kṛṣṇa mahā-bāho pitā te pitṛ-vatsala baddhvāpanītaḥ śālvena saunikena yathā paśuḥ
Sanskrit only: no published translation is held for this verse.
निशम्य विप्रियं कृष्णो मानुसीं प्रकृतिं गतः विमनस्को घृणी स्नेहाद् बभाषे प्राकृतो यथा
niśamya vipriyaṃ kṛṣṇo mānusīṃ prakṛtiṃ gataḥ vimanasko ghṛṇī snehād babhāṣe prākṛto yathā
Sanskrit only: no published translation is held for this verse.
कथं रामम् असम्भ्रान्तं जित्वाजेयं सुरासुरैः शाल्वेनाल्पीयसा नीतः पिता मे बलवान् विधिः
kathaṃ rāmam asambhrāntaṃ jitvājeyaṃ surāsuraiḥ śālvenālpīyasā nītaḥ pitā me balavān vidhiḥ
Sanskrit only: no published translation is held for this verse.
इति ब्रुवाणे गोविन्दे सौभ-राट् प्रत्युपस्थितः वसुदेवम् इवानीय कृष्णं चेदम् उवाच सः
iti bruvāṇe govinde saubha-rāṭ pratyupasthitaḥ vasudevam ivānīya kṛṣṇaṃ cedam uvāca saḥ
Sanskrit only: no published translation is held for this verse.
एष ते जनिता तातो यद्-अर्थम् इह जीवसि वधिष्ये वीक्षतस् ते ऽमुम् ईशश् चेत् पाहि बालिश
eṣa te janitā tāto yad-artham iha jīvasi vadhiṣye vīkṣatas te 'mum īśaś cet pāhi bāliśa
Sanskrit only: no published translation is held for this verse.
एवं निर्भर्त्स्य मायावी खड्गेनानकदुन्दुभेः उत्कृत्य शिर आदाय ख-स्थं सौभं समाविशत्
evaṃ nirbhartsya māyāvī khaḍgenānakadundubheḥ utkṛtya śira ādāya kha-sthaṃ saubhaṃ samāviśat
Sanskrit only: no published translation is held for this verse.
ततो मुहूर्तं प्रकृताव् उपप्लुतः स्व-बोध आस्ते स्व-जनानुषङ्गतः महानुभावस् तद् अबुध्यद् आसुरीं मायां स शाल्व-प्रसृतां मयोदिताम्
tato muhūrtaṃ prakṛtāv upaplutaḥ sva-bodha āste sva-janānuṣaṅgataḥ mahānubhāvas tad abudhyad āsurīṃ māyāṃ sa śālva-prasṛtāṃ mayoditām
Sanskrit only: no published translation is held for this verse.
न तत्र दूतं न पितुः कलेवरं प्रबुद्ध आजौ समपश्यद् अच्युतः स्वाप्नं यथा चाम्बर-चारिणं रिपुं सौभ-स्थम् आलोक्य निहन्तुम् उद्यतः
na tatra dūtaṃ na pituḥ kalevaraṃ prabuddha ājau samapaśyad acyutaḥ svāpnaṃ yathā cāmbara-cāriṇaṃ ripuṃ saubha-stham ālokya nihantum udyataḥ
Sanskrit only: no published translation is held for this verse.
एवं वदन्ति राजर्षे ऋषयः के च नान्विताः यत् स्व-वाचो विरुध्येत नूनं ते न स्मरन्त्य् उत
evaṃ vadanti rājarṣe ṛṣayaḥ ke ca nānvitāḥ yat sva-vāco virudhyeta nūnaṃ te na smaranty uta
Sanskrit only: no published translation is held for this verse.
क्व शोक-मोहौ स्नेहो वा भयं वा ये ऽज्ञ-सम्भवाः क्व चाखण्डित-विज्ञान- ज्ञानैश्वर्यस् त्व् अखण्डितः
kva śoka-mohau sneho vā bhayaṃ vā ye 'jña-sambhavāḥ kva cākhaṇḍita-vijñāna- jñānaiśvaryas tv akhaṇḍitaḥ
Sanskrit only: no published translation is held for this verse.
यत्-पाद-सेवोर्जितयात्म-विद्यया हिन्वन्त्य् अनाद्यात्म-विपर्यय-ग्रहम् लभन्त आत्मीयम् अनन्तम् ऐश्वरं कुतो नु मोहः परमस्य सद्-गतेः
yat-pāda-sevorjitayātma-vidyayā hinvanty anādyātma-viparyaya-graham labhanta ātmīyam anantam aiśvaraṃ kuto nu mohaḥ paramasya sad-gateḥ
Sanskrit only: no published translation is held for this verse.
तं शस्त्र-पूगैः प्रहरन्तम् ओजसा शाल्वं शरैः शौरिर् अमोघ-विक्रमः विद्ध्वाच्छिनद् वर्म धनुः शिरो-मणिं सौभं च शत्रोर् गदया रुरोज ह
taṃ śastra-pūgaiḥ praharantam ojasā śālvaṃ śaraiḥ śaurir amogha-vikramaḥ viddhvācchinad varma dhanuḥ śiro-maṇiṃ saubhaṃ ca śatror gadayā ruroja ha
Sanskrit only: no published translation is held for this verse.
तत् कृष्ण-हस्तेरितया विचूर्णितं पपात तोये गदया सहस्रधा विसृज्य तद् भू-तलम् आस्थितो गदाम् उद्यम्य शाल्वो ऽच्युतम् अभ्यगाद् द्रुतम्
tat kṛṣṇa-hasteritayā vicūrṇitaṃ papāta toye gadayā sahasradhā visṛjya tad bhū-talam āsthito gadām udyamya śālvo 'cyutam abhyagād drutam
Sanskrit only: no published translation is held for this verse.
आधावतः स-गदं तस्य बाहुं भल्लेन छित्त्वाथ रथाङ्गम् अद्भुतम् वधाय शाल्वस्य लयार्क-सन्निभं बिभ्रद् बभौ सार्क इवोदयाचलः
ādhāvataḥ sa-gadaṃ tasya bāhuṃ bhallena chittvātha rathāṅgam adbhutam vadhāya śālvasya layārka-sannibhaṃ bibhrad babhau sārka ivodayācalaḥ
Sanskrit only: no published translation is held for this verse.
जहार तेनैव शिरः स-कुण्डलं किरीट-युक्तं पुरु-मायिनो हरिः वज्रेण वृत्रस्य यथा पुरन्दरो बभूव हाहेति वचस् तदा नृणाम्
jahāra tenaiva śiraḥ sa-kuṇḍalaṃ kirīṭa-yuktaṃ puru-māyino hariḥ vajreṇa vṛtrasya yathā purandaro babhūva hāheti vacas tadā nṛṇām
Sanskrit only: no published translation is held for this verse.
तस्मिन् निपतिते पापे सौभे च गदया हते नेदुर् दुन्दुभयो राजन् दिवि देव-गणेरिताः सखीनाम् अपचितिं कुर्वन् दन्तवक्रो रुषाभ्यगात्
tasmin nipatite pāpe saubhe ca gadayā hate nedur dundubhayo rājan divi deva-gaṇeritāḥ sakhīnām apacitiṃ kurvan dantavakro ruṣābhyagāt
Sanskrit only: no published translation is held for this verse.