Library·Bhāgavata Purāṇa·10·10.86
श्री-राजोवाच ब्रह्मन् वेदितुम् इच्छामः स्वसारां राम-कृष्णयोः यथोपयेमे विजयो या ममासीत् पितामही
śrī-rājovāca brahman veditum icchāmaḥ svasārāṃ rāma-kṛṣṇayoḥ yathopayeme vijayo yā mamāsīt pitāmahī
Sanskrit only: no published translation is held for this verse.
श्री-शुक उवाच अर्जुनस् तीर्थ-यात्रायां पर्यटन्न् अवनीं प्रभुः गतः प्रभासम् अशृणोन् मातुलेयीं स आत्मनः
śrī-śuka uvāca arjunas tīrtha-yātrāyāṃ paryaṭann avanīṃ prabhuḥ gataḥ prabhāsam aśṛṇon mātuleyīṃ sa ātmanaḥ
Sanskrit only: no published translation is held for this verse.
दुर्योधनाय रामस् तां दास्यतीति न चापरे तल्-लिप्सुः स यतिर् भूत्वा त्रि-दण्डी द्वारकाम् अगात्
duryodhanāya rāmas tāṃ dāsyatīti na cāpare tal-lipsuḥ sa yatir bhūtvā tri-daṇḍī dvārakām agāt
Sanskrit only: no published translation is held for this verse.
तत्र वै वार्षितान् मासान् अवात्सीत् स्वार्थ-साधकः पौरैः सभाजितो ऽभीक्ष्णं रामेणाजानता च सः
tatra vai vārṣitān māsān avātsīt svārtha-sādhakaḥ pauraiḥ sabhājito 'bhīkṣṇaṃ rāmeṇājānatā ca saḥ
Sanskrit only: no published translation is held for this verse.
एकदा गृहम् आनीय आतिथ्येन निमन्त्र्य तम् श्रद्धयोपहृतं भैक्ष्यं बलेन बुभुजे किल
ekadā gṛham ānīya ātithyena nimantrya tam śraddhayopahṛtaṃ bhaikṣyaṃ balena bubhuje kila
Sanskrit only: no published translation is held for this verse.
सो ऽपश्यत् तत्र महतीं कन्यां वीर-मनो-हराम् प्रीत्य्-उत्फुल्लेक्षणस् तस्यां भाव-क्षुब्धं मनो दधे
so 'paśyat tatra mahatīṃ kanyāṃ vīra-mano-harām prīty-utphullekṣaṇas tasyāṃ bhāva-kṣubdhaṃ mano dadhe
Sanskrit only: no published translation is held for this verse.
सापि तं चकमे वीक्ष्य नारीणां हृदयं-गमम् हसन्ती व्रीडितापङ्गी तन्-न्यस्त-हृदयेक्षणा
sāpi taṃ cakame vīkṣya nārīṇāṃ hṛdayaṃ-gamam hasantī vrīḍitāpaṅgī tan-nyasta-hṛdayekṣaṇā
Sanskrit only: no published translation is held for this verse.
तां परं समनुध्यायन्न् अन्तरं प्रेप्सुर् अर्जुनः न लेभे शं भ्रमच्-चित्तः कामेनाति-बलीयसा
tāṃ paraṃ samanudhyāyann antaraṃ prepsur arjunaḥ na lebhe śaṃ bhramac-cittaḥ kāmenāti-balīyasā
Sanskrit only: no published translation is held for this verse.
महत्यां देव-यात्रायां रथ-स्थां दुर्ग-निर्गतां जहारानुमतः पित्रोः कृष्णस्य च महा-रथः
mahatyāṃ deva-yātrāyāṃ ratha-sthāṃ durga-nirgatāṃ jahārānumataḥ pitroḥ kṛṣṇasya ca mahā-rathaḥ
Sanskrit only: no published translation is held for this verse.
रथ-स्थो धनुर् आदाय शूरांश् चारुन्धतो भटान् विद्राव्य क्रोशतां स्वानां स्व-भागं मृग-राड् इव
ratha-stho dhanur ādāya śūrāṃś cārundhato bhaṭān vidrāvya krośatāṃ svānāṃ sva-bhāgaṃ mṛga-rāḍ iva
Sanskrit only: no published translation is held for this verse.
तच् छ्रुत्वा क्षुभितो रामः पर्वणीव महार्णवः गृहीत-पादः कृष्णेन सुहृद्भिश् चानुसान्त्वितः
tac chrutvā kṣubhito rāmaḥ parvaṇīva mahārṇavaḥ gṛhīta-pādaḥ kṛṣṇena suhṛdbhiś cānusāntvitaḥ
Sanskrit only: no published translation is held for this verse.
प्राहिणोत् पारिबर्हाणि वर-वध्वोर् मुदा बलः महा-धनोपस्करेभ- रथाश्व-नर-योषितः
prāhiṇot pāribarhāṇi vara-vadhvor mudā balaḥ mahā-dhanopaskarebha- rathāśva-nara-yoṣitaḥ
Sanskrit only: no published translation is held for this verse.
श्री-शुक उवाच कृष्णस्यासीद् द्विज-श्रेष्ठः श्रुतदेव इति श्रुतः कृष्णैक-भक्त्या पूर्णार्थः शान्तः कविर् अलम्पतः
śrī-śuka uvāca kṛṣṇasyāsīd dvija-śreṣṭhaḥ śrutadeva iti śrutaḥ kṛṣṇaika-bhaktyā pūrṇārthaḥ śāntaḥ kavir alampataḥ
Sanskrit only: no published translation is held for this verse.
स उवास विदेहेषु मिथिलायां गृहाश्रमी अनीहयागताहार्य- निर्वर्तित-निज-क्रियः
sa uvāsa videheṣu mithilāyāṃ gṛhāśramī anīhayāgatāhārya- nirvartita-nija-kriyaḥ
Sanskrit only: no published translation is held for this verse.
यात्रा-मात्रं त्व् अहर् अहर् दैवाद् उपनमत्य् उत नाधिकं तावता तुष्टः क्रिया चक्रे यथोचिताः
yātrā-mātraṃ tv ahar ahar daivād upanamaty uta nādhikaṃ tāvatā tuṣṭaḥ kriyā cakre yathocitāḥ
Sanskrit only: no published translation is held for this verse.
तथा तद्-राष्ट्र-पालो ऽङ्ग बहुलाश्व इति श्रुतः मैथिलो निरहम्-मान उभाव् अप्य् अच्युत-प्रियौ
tathā tad-rāṣṭra-pālo 'ṅga bahulāśva iti śrutaḥ maithilo niraham-māna ubhāv apy acyuta-priyau
Sanskrit only: no published translation is held for this verse.
तयोः प्रसन्नो भगवान् दारुकेणाहृतं रथम् आरुह्य साकं मुनिभिर् विदेहान् प्रययौ प्रभुः
tayoḥ prasanno bhagavān dārukeṇāhṛtaṃ ratham āruhya sākaṃ munibhir videhān prayayau prabhuḥ
Sanskrit only: no published translation is held for this verse.
नारदो वामदेवो ऽत्रिः कृष्णो रामो ऽसितो ऽरुणिः अहं बृहस्पतिः कण्वो मैत्रेयश् च्यवनादयः
nārado vāmadevo 'triḥ kṛṣṇo rāmo 'sito 'ruṇiḥ ahaṃ bṛhaspatiḥ kaṇvo maitreyaś cyavanādayaḥ
Sanskrit only: no published translation is held for this verse.
तत्र तत्र तम् आयान्तं पौरा जानपदा नृप उपतस्थुः सार्घ्य-हस्ता ग्रहैः सूर्यम् इवोदितम्
tatra tatra tam āyāntaṃ paurā jānapadā nṛpa upatasthuḥ sārghya-hastā grahaiḥ sūryam ivoditam
Sanskrit only: no published translation is held for this verse.
आनर्त-धन्व-कुरु-जाङ्गल-कङ्क-मत्स्य- पाञ्चाल-कुन्ति-मधु-केकय-कोशलार्णाः अन्ये च तन्-मुख-सरोजम् उदार-हास- स्निग्धेक्षणं नृप पपुर् दृशिभिर् न्र्-नार्यः
ānarta-dhanva-kuru-jāṅgala-kaṅka-matsya- pāñcāla-kunti-madhu-kekaya-kośalārṇāḥ anye ca tan-mukha-sarojam udāra-hāsa- snigdhekṣaṇaṃ nṛpa papur dṛśibhir nr-nāryaḥ
Sanskrit only: no published translation is held for this verse.
तेभ्यः स्व-वीक्षण-विनष्ट-तमिस्र-दृग्भ्यः क्षेमं त्रि-लोक-गुरुर् अर्थ-दृशं च यच्छन् शृण्वन् दिग्-अन्त-धवलं स्व-यशो ऽशुभ-घ्नं गीतं सुरैर् नृभिर् अगाच् छनकैर् विदेहान्
tebhyaḥ sva-vīkṣaṇa-vinaṣṭa-tamisra-dṛgbhyaḥ kṣemaṃ tri-loka-gurur artha-dṛśaṃ ca yacchan śṛṇvan dig-anta-dhavalaṃ sva-yaśo 'śubha-ghnaṃ gītaṃ surair nṛbhir agāc chanakair videhān
Sanskrit only: no published translation is held for this verse.
ते ऽच्युतं प्राप्तम् आकर्ण्य पौरा जानपदा नृप अभीयुर् मुदितास् तस्मै गृहीतार्हण-पाणयः
te 'cyutaṃ prāptam ākarṇya paurā jānapadā nṛpa abhīyur muditās tasmai gṛhītārhaṇa-pāṇayaḥ
Sanskrit only: no published translation is held for this verse.
दृष्ट्वा त उत्तमः-श्लोकं प्रीत्य्-उत्फुलाननाशयाः कैर् धृताञ्जलिभिर् नेमुः श्रुत-पूर्वांस् तथा मुनीन्
dṛṣṭvā ta uttamaḥ-ślokaṃ prīty-utphulānanāśayāḥ kair dhṛtāñjalibhir nemuḥ śruta-pūrvāṃs tathā munīn
Sanskrit only: no published translation is held for this verse.
स्वानुग्रहाय सम्प्राप्तं मन्वानौ तं जगद्-गुरुम् मैथिलः श्रुतदेवश् च पादयोः पेततुः प्रभोः
svānugrahāya samprāptaṃ manvānau taṃ jagad-gurum maithilaḥ śrutadevaś ca pādayoḥ petatuḥ prabhoḥ
Sanskrit only: no published translation is held for this verse.
न्यमन्त्रयेतां दाशार्हम् आतिथ्येन सह द्विजैः मैथिलः श्रुतदेवश् च युगपत् संहताञ्जली
nyamantrayetāṃ dāśārham ātithyena saha dvijaiḥ maithilaḥ śrutadevaś ca yugapat saṃhatāñjalī
Sanskrit only: no published translation is held for this verse.
भगवांस् तद् अभिप्रेत्य द्वयोः प्रिय-चिकीर्षया उभयोर् आविशद् गेहम् उभाभ्यां तद्-अलक्षितः
bhagavāṃs tad abhipretya dvayoḥ priya-cikīrṣayā ubhayor āviśad geham ubhābhyāṃ tad-alakṣitaḥ
Sanskrit only: no published translation is held for this verse.
श्रान्तान् अप्य् अथ तान् दूराज् जनकः स्व-गृहागतान् आनीतेष्व् आसनाग्र्येषु सुखासीनान् महा-मनाः
śrāntān apy atha tān dūrāj janakaḥ sva-gṛhāgatān ānīteṣv āsanāgryeṣu sukhāsīnān mahā-manāḥ
Sanskrit only: no published translation is held for this verse.
प्रवृद्ध-भक्त्या उद्धर्ष- हृदयास्राविलेक्षणः नत्वा तद्-अङ्घ्रीन् प्रक्षाल्य तद्-अपो लोक-पावनीः
pravṛddha-bhaktyā uddharṣa- hṛdayāsrāvilekṣaṇaḥ natvā tad-aṅghrīn prakṣālya tad-apo loka-pāvanīḥ
Sanskrit only: no published translation is held for this verse.
स-कुटुम्बो वहन् मूर्ध्ना पूजयां चक्र ईश्वरान् गन्ध-माल्याम्बराकल्प- धूप-दीपार्घ्य-गो-वृषैः
sa-kuṭumbo vahan mūrdhnā pūjayāṃ cakra īśvarān gandha-mālyāmbarākalpa- dhūpa-dīpārghya-go-vṛṣaiḥ
Sanskrit only: no published translation is held for this verse.
वाचा मधुरया प्रीणन्न् इदम् आहान्न-तर्पितान् पादाव् अङ्क-गतौ विष्णोः संस्पृशञ् छनकैर् मुदा
vācā madhurayā prīṇann idam āhānna-tarpitān pādāv aṅka-gatau viṣṇoḥ saṃspṛśañ chanakair mudā
Sanskrit only: no published translation is held for this verse.
श्री-बहुलाश्व उवाच भवान् हि सर्व-भूतानाम् आत्मा साक्षी स्व-दृग् विभो अथ नस् त्वत्-पदाम्भोजं स्मरतां दर्शनं गतः
śrī-bahulāśva uvāca bhavān hi sarva-bhūtānām ātmā sākṣī sva-dṛg vibho atha nas tvat-padāmbhojaṃ smaratāṃ darśanaṃ gataḥ
Sanskrit only: no published translation is held for this verse.
स्व-वचस् तद् ऋतं कर्तुम् अस्मद्-दृग्-गोचरो भवान् यद् आत्थैकान्त-भक्तान् मे नानन्तः श्रीर् अजः प्रियः
sva-vacas tad ṛtaṃ kartum asmad-dṛg-gocaro bhavān yad ātthaikānta-bhaktān me nānantaḥ śrīr ajaḥ priyaḥ
Sanskrit only: no published translation is held for this verse.
को नु त्वच्-चरणाम्भोजम् एवं-विद् विसृजेत् पुमान् निष्किञ्चनानां शान्तानां मुनीनां यस् त्वम् आत्म-दः
ko nu tvac-caraṇāmbhojam evaṃ-vid visṛjet pumān niṣkiñcanānāṃ śāntānāṃ munīnāṃ yas tvam ātma-daḥ
Sanskrit only: no published translation is held for this verse.
यो ऽवतीर्य यदोर् वंशे नृणां संसरताम् इह यशो वितेने तच्-छान्त्यै त्रै-लोक्य-वृजिनापहम्
yo 'vatīrya yador vaṃśe nṛṇāṃ saṃsaratām iha yaśo vitene tac-chāntyai trai-lokya-vṛjināpaham
Sanskrit only: no published translation is held for this verse.
नमस् तुभ्यं भगवते कृष्णायाकुण्ठ-मेधसे नारायणाय ऋषये सु-शान्तं तप ईयुषे
namas tubhyaṃ bhagavate kṛṣṇāyākuṇṭha-medhase nārāyaṇāya ṛṣaye su-śāntaṃ tapa īyuṣe
Sanskrit only: no published translation is held for this verse.
दिनानि कतिचिद् भूमन् गृहान् नो निवस द्विजैः समेतः पाद-रजसा पुनीहीदं निमेः कुलम्
dināni katicid bhūman gṛhān no nivasa dvijaiḥ sametaḥ pāda-rajasā punīhīdaṃ nimeḥ kulam
Sanskrit only: no published translation is held for this verse.
इत्य् उपामन्त्रितो राज्ञा भगवांल् लोक-भावनः उवास कुर्वन् कल्याणं मिथिला-नर-योषिताम्
ity upāmantrito rājñā bhagavāṃl loka-bhāvanaḥ uvāsa kurvan kalyāṇaṃ mithilā-nara-yoṣitām
Sanskrit only: no published translation is held for this verse.
श्रुतदेवो ऽच्युतं प्राप्तं स्व-गृहाञ् जनको यथा नत्वा मुनीन् सु-संहृष्टो धुन्वन् वासो ननर्त ह
śrutadevo 'cyutaṃ prāptaṃ sva-gṛhāñ janako yathā natvā munīn su-saṃhṛṣṭo dhunvan vāso nanarta ha
Sanskrit only: no published translation is held for this verse.
तृण-पीठ-बृषीष्व् एतान् आनीतेषूपवेश्य सः स्वागतेनाभिनन्द्याङ्घ्रीन् स-भार्यो ऽवनिजे मुदा
tṛṇa-pīṭha-bṛṣīṣv etān ānīteṣūpaveśya saḥ svāgatenābhinandyāṅghrīn sa-bhāryo 'vanije mudā
Sanskrit only: no published translation is held for this verse.
तद्-अम्भसा महा-भाग आत्मानं स-गृहान्वयम् स्नापयां चक्र उद्धर्षो लब्ध-सर्व-मनोरथः
tad-ambhasā mahā-bhāga ātmānaṃ sa-gṛhānvayam snāpayāṃ cakra uddharṣo labdha-sarva-manorathaḥ
Sanskrit only: no published translation is held for this verse.
फलार्हणोशीर-शिवामृताम्बुभिर् मृदा सुरभ्या तुलसी-कुशाम्बुयैः आराधयाम् आस यथोपपन्नया सपर्यया सत्त्व-विवर्धनान्धसा
phalārhaṇośīra-śivāmṛtāmbubhir mṛdā surabhyā tulasī-kuśāmbuyaiḥ ārādhayām āsa yathopapannayā saparyayā sattva-vivardhanāndhasā
Sanskrit only: no published translation is held for this verse.
स तर्कयाम् आस कुतो ममान्व् अभूत् गृहान्ध-कुपे पतितस्य सङ्गमः यः सर्व-तीर्थास्पद-पाद-रेणुभिः कृष्णेन चास्यात्म-निकेत-भूसुरैः
sa tarkayām āsa kuto mamānv abhūt gṛhāndha-kupe patitasya saṅgamaḥ yaḥ sarva-tīrthāspada-pāda-reṇubhiḥ kṛṣṇena cāsyātma-niketa-bhūsuraiḥ
Sanskrit only: no published translation is held for this verse.
सूपविष्टान् कृतातिथ्यान् श्रुतदेव उपस्थितः स-भार्य-स्वजनापत्य उवाचाङ्घ्र्य्-अभिमर्शनः
sūpaviṣṭān kṛtātithyān śrutadeva upasthitaḥ sa-bhārya-svajanāpatya uvācāṅghry-abhimarśanaḥ
Sanskrit only: no published translation is held for this verse.
श्रुतदेव उवाच नाद्य नो दर्शनं प्राप्तः परं परम-पूरुषः यर्हीदं शक्तिभिः सृष्ट्वा प्रविष्टो ह्य् आत्म-सत्तया
śrutadeva uvāca nādya no darśanaṃ prāptaḥ paraṃ parama-pūruṣaḥ yarhīdaṃ śaktibhiḥ sṛṣṭvā praviṣṭo hy ātma-sattayā
Sanskrit only: no published translation is held for this verse.
यथा शयानः पुरुषो मनसैवात्म-मायया सृष्ट्वा लोकं परं स्वाप्नम् अनुविश्यावभासते
yathā śayānaḥ puruṣo manasaivātma-māyayā sṛṣṭvā lokaṃ paraṃ svāpnam anuviśyāvabhāsate
Sanskrit only: no published translation is held for this verse.
शृण्वतां गदतां शश्वद् अर्चतां त्वाभिवन्दताम् णृणां संवदताम् अन्तर् हृदि भास्य् अमलात्मनाम्
śṛṇvatāṃ gadatāṃ śaśvad arcatāṃ tvābhivandatām ṇṛṇāṃ saṃvadatām antar hṛdi bhāsy amalātmanām
Sanskrit only: no published translation is held for this verse.
हृदि-स्थो ऽप्य् अति-दूर-स्थः कर्म-विक्षिप्त-चेतसाम् आत्म-शक्तिभिर् अग्राह्यो ऽप्य् अन्त्य् उपेत-गुणात्मनाम्
hṛdi-stho 'py ati-dūra-sthaḥ karma-vikṣipta-cetasām ātma-śaktibhir agrāhyo 'py anty upeta-guṇātmanām
Sanskrit only: no published translation is held for this verse.
नमो ऽस्तु ते ऽध्यात्म-विदां परात्मने अनात्मने स्वात्म-विभक्त-मृत्यवे स-कारणाकारण-लिङ्गम् ईयुषे स्व-माययासंवृत-रुद्ध-दृष्टये
namo 'stu te 'dhyātma-vidāṃ parātmane anātmane svātma-vibhakta-mṛtyave sa-kāraṇākāraṇa-liṅgam īyuṣe sva-māyayāsaṃvṛta-ruddha-dṛṣṭaye
Sanskrit only: no published translation is held for this verse.
स त्वं शाधि स्व-भृत्यान् नः किं देव करवाम हे एतद्-अन्तो नृणां क्लेशो यद् भवान् अक्षि-गोचरः
sa tvaṃ śādhi sva-bhṛtyān naḥ kiṃ deva karavāma he etad-anto nṛṇāṃ kleśo yad bhavān akṣi-gocaraḥ
Sanskrit only: no published translation is held for this verse.
श्री-शुक उवाच तद्-उक्तम् इत्य् उपाकर्ण्य भगवान् प्रणतार्ति-हा गृहीत्वा पाणिना पाणिं प्रहसंस् तम् उवाच ह
śrī-śuka uvāca tad-uktam ity upākarṇya bhagavān praṇatārti-hā gṛhītvā pāṇinā pāṇiṃ prahasaṃs tam uvāca ha
Sanskrit only: no published translation is held for this verse.
श्री-भगवान् उवाच ब्रह्मंस् ते ऽनुग्रहार्थाय सम्प्राप्तान् विद्ध्य् अमून् मुनीन् सञ्चरन्ति मया लोकान् पुनन्तः पाद-रेणुभिः
śrī-bhagavān uvāca brahmaṃs te 'nugrahārthāya samprāptān viddhy amūn munīn sañcaranti mayā lokān punantaḥ pāda-reṇubhiḥ
Sanskrit only: no published translation is held for this verse.
देवाः क्षेत्राणि तीर्थानि दर्शन-स्पर्शनार्चनैः शनैः पुनन्ति कालेन तद् अप्य् अर्हत्तमेक्षया
devāḥ kṣetrāṇi tīrthāni darśana-sparśanārcanaiḥ śanaiḥ punanti kālena tad apy arhattamekṣayā
Sanskrit only: no published translation is held for this verse.
ब्राह्मणो जन्मना श्रेयान् सर्वेषाम् प्राणिनाम् इह तपसा विद्यया तुष्ट्या किम् उ मत्-कलया युतः
brāhmaṇo janmanā śreyān sarveṣām prāṇinām iha tapasā vidyayā tuṣṭyā kim u mat-kalayā yutaḥ
Sanskrit only: no published translation is held for this verse.
न ब्राह्मणान् मे दयितं रूपम् एतच् चतुर्-भुजम् सर्व-वेद-मयो विप्रः सर्व-देव-मयो ह्य् अहम्
na brāhmaṇān me dayitaṃ rūpam etac catur-bhujam sarva-veda-mayo vipraḥ sarva-deva-mayo hy aham
Sanskrit only: no published translation is held for this verse.
दुष्प्रज्ञा अविदित्वैवम् अवजानन्त्य् असूयवः गुरुं मां विप्रम् आत्मानम् अर्चादाव् इज्य-दृष्टयः
duṣprajñā aviditvaivam avajānanty asūyavaḥ guruṃ māṃ vipram ātmānam arcādāv ijya-dṛṣṭayaḥ
Sanskrit only: no published translation is held for this verse.
चराचरम् इदं विश्वं भावा ये चास्य हेतवः मद्-रूपाणीति चेतस्य् आधत्ते विप्रो मद्-ईक्षया
carācaram idaṃ viśvaṃ bhāvā ye cāsya hetavaḥ mad-rūpāṇīti cetasy ādhatte vipro mad-īkṣayā
Sanskrit only: no published translation is held for this verse.
तस्माद् ब्रह्म-ऋषीन् एतान् ब्रह्मन् मच्-छ्रद्धयार्चय एवं चेद् अर्चितो ऽस्म्य् अद्धा नान्यथा भूरि-भूतिभिः
tasmād brahma-ṛṣīn etān brahman mac-chraddhayārcaya evaṃ ced arcito 'smy addhā nānyathā bhūri-bhūtibhiḥ
Sanskrit only: no published translation is held for this verse.
श्री-शुक उवाच स इत्थं प्रभुनादिष्टः सह-कृष्णान् द्विजोत्तमान् आराध्यैकात्म-भावेन मैथिलश् चाप सद्-गतिम्
śrī-śuka uvāca sa itthaṃ prabhunādiṣṭaḥ saha-kṛṣṇān dvijottamān ārādhyaikātma-bhāvena maithilaś cāpa sad-gatim
Sanskrit only: no published translation is held for this verse.
एवं स्व-भक्तयो राजन् भगवान् भक्त-भक्तिमान् उषित्वादिश्य सन्-मार्गं पुनर् द्वारवतीम् अगात्
evaṃ sva-bhaktayo rājan bhagavān bhakta-bhaktimān uṣitvādiśya san-mārgaṃ punar dvāravatīm agāt
Sanskrit only: no published translation is held for this verse.