Library·Bhāgavata Purāṇa·10·10.87
श्री-परीक्षिद् उवाच ब्रह्मन् ब्रह्मण्य् अनिर्देश्ये निर्गुणे गुण-वृत्तयः कथं चरन्ति श्रुतयः साक्षात् सद्-असतः परे
śrī-parīkṣid uvāca brahman brahmaṇy anirdeśye nirguṇe guṇa-vṛttayaḥ kathaṃ caranti śrutayaḥ sākṣāt sad-asataḥ pare
Sanskrit only: no published translation is held for this verse.
श्री-शुक उवाच बुद्धीन्द्रिय-मनः-प्राणान् जनानाम् असृजत् प्रभुः मात्रार्थं च भवार्थं च आत्मने ऽकल्पनाय च
śrī-śuka uvāca buddhīndriya-manaḥ-prāṇān janānām asṛjat prabhuḥ mātrārthaṃ ca bhavārthaṃ ca ātmane 'kalpanāya ca
Sanskrit only: no published translation is held for this verse.
सैषा ह्य् उपनिषद् ब्राह्मी पूर्वेशां पूर्व-जैर् धृता श्र्रद्धया धारयेद् यस् तां क्षेमं गच्छेद् अकिञ्चनः
saiṣā hy upaniṣad brāhmī pūrveśāṃ pūrva-jair dhṛtā śrraddhayā dhārayed yas tāṃ kṣemaṃ gacched akiñcanaḥ
Sanskrit only: no published translation is held for this verse.
अत्र ते वर्णयिष्यामि गाथां नारायणान्विताम् नारदस्य च संवादम् ऋषेर् नारायणस्य च
atra te varṇayiṣyāmi gāthāṃ nārāyaṇānvitām nāradasya ca saṃvādam ṛṣer nārāyaṇasya ca
Sanskrit only: no published translation is held for this verse.
एकदा नारदो लोकान् पर्यटन् भगवत्-प्रियः सनातनम् ऋषिं द्रष्टुं ययौ नारायणाश्रमम्
ekadā nārado lokān paryaṭan bhagavat-priyaḥ sanātanam ṛṣiṃ draṣṭuṃ yayau nārāyaṇāśramam
Sanskrit only: no published translation is held for this verse.
यो वै भारत-वर्षे ऽस्मिन् क्षेमाय स्वस्तये नृणाम् धर्म-ज्ञान-शमोपेतम् आ-कल्पाद् आस्थितस् तपः
yo vai bhārata-varṣe 'smin kṣemāya svastaye nṛṇām dharma-jñāna-śamopetam ā-kalpād āsthitas tapaḥ
Sanskrit only: no published translation is held for this verse.
तत्रोपविष्टम् ऋषिभिः कलाप-ग्राम-वासिभिः परीतं प्रणतो ऽपृच्छद् इदम् एव कुरूद्वह
tatropaviṣṭam ṛṣibhiḥ kalāpa-grāma-vāsibhiḥ parītaṃ praṇato 'pṛcchad idam eva kurūdvaha
Sanskrit only: no published translation is held for this verse.
तस्मै ह्य् अवोचद् भगवान् ऋषीणां शृण्वताम् इदम् यो ब्रह्म-वादः पूर्वेषां जन-लोक-निवासिनाम्
tasmai hy avocad bhagavān ṛṣīṇāṃ śṛṇvatām idam yo brahma-vādaḥ pūrveṣāṃ jana-loka-nivāsinām
Sanskrit only: no published translation is held for this verse.
श्री-भगवान् उवाच स्वायम्भुव ब्रह्म-सत्रं जन-लोके ऽभवत् पुरा तत्र-स्थानां मानसानां मुनीनाम् ऊर्ध्व-रेतसाम्
śrī-bhagavān uvāca svāyambhuva brahma-satraṃ jana-loke 'bhavat purā tatra-sthānāṃ mānasānāṃ munīnām ūrdhva-retasām
Sanskrit only: no published translation is held for this verse.
श्वेतद्वीपं गतवति त्वयि द्रष्टुं तद्-ईश्वरम् ब्रह्म-वादः सु-संवृत्तः श्रुतयो यत्र शेरते तत्र हायम् अभूत् प्रश्नस् त्वं मां यम् अनुपृच्छसि
śvetadvīpaṃ gatavati tvayi draṣṭuṃ tad-īśvaram brahma-vādaḥ su-saṃvṛttaḥ śrutayo yatra śerate tatra hāyam abhūt praśnas tvaṃ māṃ yam anupṛcchasi
Sanskrit only: no published translation is held for this verse.
तुल्य-श्रुत-तपः-शीलास् तुल्य-स्वीयारि-मध्यमाः अपि चक्रुः प्रवचनम् एकं शुश्रूषवो ऽपरे
tulya-śruta-tapaḥ-śīlās tulya-svīyāri-madhyamāḥ api cakruḥ pravacanam ekaṃ śuśrūṣavo 'pare
Sanskrit only: no published translation is held for this verse.
श्री-सनन्दन उवाच स्व-सृष्टम् इदम् आपीय शयानं सह शक्तिभिः तद्-अन्ते बोधयां चक्रुस् तल्-लिङ्गैः श्रुतयः परम्
śrī-sanandana uvāca sva-sṛṣṭam idam āpīya śayānaṃ saha śaktibhiḥ tad-ante bodhayāṃ cakrus tal-liṅgaiḥ śrutayaḥ param
Sanskrit only: no published translation is held for this verse.
यथा शयानं संराजं वन्दिनस् तत्-पराक्रमैः प्रत्यूषे ऽभेत्य सु-श्लोकैर् बोधयन्त्य् अनुजीविनः
yathā śayānaṃ saṃrājaṃ vandinas tat-parākramaiḥ pratyūṣe 'bhetya su-ślokair bodhayanty anujīvinaḥ
Sanskrit only: no published translation is held for this verse.
श्री-श्रुतय ऊचुः जय जय जह्य् अजाम् अजित दोष-गृभीत-गुणां त्वम् असि यद् आत्मना समवरुद्ध-समस्त-भगः अग-जगद्-ओकसाम् अखिल-शक्त्य्-अवबोधक ते क्वचिद् अजयात्मना च चरतो ऽनुचरेन् निगमः
śrī-śrutaya ūcuḥ jaya jaya jahy ajām ajita doṣa-gṛbhīta-guṇāṃ tvam asi yad ātmanā samavaruddha-samasta-bhagaḥ aga-jagad-okasām akhila-śakty-avabodhaka te kvacid ajayātmanā ca carato 'nucaren nigamaḥ
Sanskrit only: no published translation is held for this verse.
बृहद् उपलब्धम् एतद् अवयन्त्य् अवशेषतया यत उदयास्तम्-अयौ विकृतेर् मृदि वाविकृतात् अत ऋषयो दधुस् त्वयि मनो-वचनाचरितं कथम् अयथा भवन्ति भुवि दत्त-पदानि नृणाम्
bṛhad upalabdham etad avayanty avaśeṣatayā yata udayāstam-ayau vikṛter mṛdi vāvikṛtāt ata ṛṣayo dadhus tvayi mano-vacanācaritaṃ katham ayathā bhavanti bhuvi datta-padāni nṛṇām
Sanskrit only: no published translation is held for this verse.
इति तव सूरयस् त्र्य्-अधिपते ऽखिल-लोक-मल- क्षपण-कथामृताब्धिम् अवगाह्य तपांसि जहुः किम् उत पुनः स्व-धाम-विधुताशय-काल-गुणाः परम भजन्ति ये पदम् अजस्र-सुखानुभवम्
iti tava sūrayas try-adhipate 'khila-loka-mala- kṣapaṇa-kathāmṛtābdhim avagāhya tapāṃsi jahuḥ kim uta punaḥ sva-dhāma-vidhutāśaya-kāla-guṇāḥ parama bhajanti ye padam ajasra-sukhānubhavam
Sanskrit only: no published translation is held for this verse.
दृतय इव श्वसन्त्य् असु-भृतो यदि ते ऽनुविधा महद्-अहम्-आदयो ऽण्डम् असृजन् यद्-अनुग्रहतः पुरुष-विधो ऽन्वयो ऽत्र चरमो ऽन्न-मयादिषु यः सद्-असतः परं त्वम् अथ यद् एष्व् अवशेषम् ऋतम्
dṛtaya iva śvasanty asu-bhṛto yadi te 'nuvidhā mahad-aham-ādayo 'ṇḍam asṛjan yad-anugrahataḥ puruṣa-vidho 'nvayo 'tra caramo 'nna-mayādiṣu yaḥ sad-asataḥ paraṃ tvam atha yad eṣv avaśeṣam ṛtam
Sanskrit only: no published translation is held for this verse.
उदरम् उपासते य ऋषि-वर्त्मसु कूर्प-दृशः परिसर-पद्धतिं हृदयम् आरुणयो दहरम् तत उदगाद् अनन्त तव धाम शिरः परमं पुनर् इह यत् समेत्य न पतन्ति कृतान्त-मुखे
udaram upāsate ya ṛṣi-vartmasu kūrpa-dṛśaḥ parisara-paddhatiṃ hṛdayam āruṇayo daharam tata udagād ananta tava dhāma śiraḥ paramaṃ punar iha yat sametya na patanti kṛtānta-mukhe
Sanskrit only: no published translation is held for this verse.
स्व-कृत-विचित्र-योनिषु विशन्न् इव हेतुतया तरतमतश् चकास्स्य् अनल-वत् स्व-कृतानुकृतिः अथ वितथास्व् अमूष्व् अवितथां तव धाम समं विरज-धियो ऽनुयन्त्य् अभिविपण्यव एक-रसम्
sva-kṛta-vicitra-yoniṣu viśann iva hetutayā taratamataś cakāssy anala-vat sva-kṛtānukṛtiḥ atha vitathāsv amūṣv avitathāṃ tava dhāma samaṃ viraja-dhiyo 'nuyanty abhivipaṇyava eka-rasam
Sanskrit only: no published translation is held for this verse.
स्व-कृत-पुरेष्व् अमीष्व् अबहिर्-अन्तर-संवरणं तव पुरुषं वदन्त्य् अखिल-शक्ति-धृतो ऽंश-कृतम् इति नृ-गतिं विविच्य कवयो निगमावपनं भवत उपासते ऽङ्घ्रिम् अभवम् भुवि विश्वसिताः
sva-kṛta-pureṣv amīṣv abahir-antara-saṃvaraṇaṃ tava puruṣaṃ vadanty akhila-śakti-dhṛto 'ṃśa-kṛtam iti nṛ-gatiṃ vivicya kavayo nigamāvapanaṃ bhavata upāsate 'ṅghrim abhavam bhuvi viśvasitāḥ
Sanskrit only: no published translation is held for this verse.
दुरवगमात्म-तत्त्व-निगमाय तवात्त-तनोश् चरित-महामृताब्धि-परिवर्त-परिश्रमणाः न परिलषन्ति केचिद् अपवर्गम् अपीश्वर ते चरण-सरोज-हंस-कुल-सङ्ग-विसृष्ट-गृहाः
duravagamātma-tattva-nigamāya tavātta-tanoś carita-mahāmṛtābdhi-parivarta-pariśramaṇāḥ na parilaṣanti kecid apavargam apīśvara te caraṇa-saroja-haṃsa-kula-saṅga-visṛṣṭa-gṛhāḥ
Sanskrit only: no published translation is held for this verse.
त्वद्-अनुपथं कुलायम् इदम् आत्म-सुहृत्-प्रिय-वच् चरति तथोन्मुखे त्वयि हिते प्रिय आत्मनि च न बत रमन्त्य् अहो असद्-उपासनयात्म-हनो यद्-अनुशया भ्रमन्त्य् उरु-भये कु-शरीर-भृतः
tvad-anupathaṃ kulāyam idam ātma-suhṛt-priya-vac carati tathonmukhe tvayi hite priya ātmani ca na bata ramanty aho asad-upāsanayātma-hano yad-anuśayā bhramanty uru-bhaye ku-śarīra-bhṛtaḥ
Sanskrit only: no published translation is held for this verse.
निभृत-मरुन्-मनो-ऽक्ष-दृढ-योग-युजो हृदि यन् मुनय उपासते तद् अरयो ऽपि ययुः स्मरणात् स्त्रिय उरगेन्द्र-भोग-भुज-दण्ड-विषक्त-धियो वयम् अपि ते समाः सम-दृशो ऽङ्घ्रि-सरोज-सुधाः
nibhṛta-marun-mano-'kṣa-dṛḍha-yoga-yujo hṛdi yan munaya upāsate tad arayo 'pi yayuḥ smaraṇāt striya uragendra-bhoga-bhuja-daṇḍa-viṣakta-dhiyo vayam api te samāḥ sama-dṛśo 'ṅghri-saroja-sudhāḥ
Sanskrit only: no published translation is held for this verse.
क इह नु वेद बतावर-जन्म-लयो ऽग्र-सरं यत उदगाद् ऋषिर् यम् अनु देव-गणा उभये तर्हि न सन् न चासद् उभयं न च काल-जवः किम् अपि न तत्र शास्त्रम् अवकृष्य शयीत यदा
ka iha nu veda batāvara-janma-layo 'gra-saraṃ yata udagād ṛṣir yam anu deva-gaṇā ubhaye tarhi na san na cāsad ubhayaṃ na ca kāla-javaḥ kim api na tatra śāstram avakṛṣya śayīta yadā
Sanskrit only: no published translation is held for this verse.
जनिम् असतः सतो मृतिम् उतात्मनि ये च भिदां विपणम् ऋतं स्मरन्त्य् उपदिशन्ति त आरुपितैः त्रि-गुण-मयः पुमान् इति भिदा यद् अबोध-कृता त्वयि न ततः परत्र स भवेद् अवबोध-रसे
janim asataḥ sato mṛtim utātmani ye ca bhidāṃ vipaṇam ṛtaṃ smaranty upadiśanti ta ārupitaiḥ tri-guṇa-mayaḥ pumān iti bhidā yad abodha-kṛtā tvayi na tataḥ paratra sa bhaved avabodha-rase
Sanskrit only: no published translation is held for this verse.
सद् इव मनस् त्रि-वृत् त्वयि विभात्य् असद् आ-मनुजात् सद् अभिमृशन्त्य् अशेषम् इदम् आत्मतयात्म-विदः न हि विकृतिं त्यजन्ति कनकस्य तद्-आत्मतया स्व-कृतम् अनुप्रविष्टम् इदम् आत्मतयावसितम्
sad iva manas tri-vṛt tvayi vibhāty asad ā-manujāt sad abhimṛśanty aśeṣam idam ātmatayātma-vidaḥ na hi vikṛtiṃ tyajanti kanakasya tad-ātmatayā sva-kṛtam anupraviṣṭam idam ātmatayāvasitam
Sanskrit only: no published translation is held for this verse.
तव परि ये चरन्त्य् अखिल-सत्त्व-निकेततया त उत पदाक्रमन्त्य् अविगणय्य शिरो निरृतेः परिवयसे पशून् इव गिरा विबुधान् अपि तांस् त्वयि कृत-सौहृदाः खलु पुनन्ति न ये विमुखाः
tava pari ye caranty akhila-sattva-niketatayā ta uta padākramanty avigaṇayya śiro nirṛteḥ parivayase paśūn iva girā vibudhān api tāṃs tvayi kṛta-sauhṛdāḥ khalu punanti na ye vimukhāḥ
Sanskrit only: no published translation is held for this verse.
त्वम् अकरणः स्व-राड् अखिल-कारक-शक्ति-धरस् तव बलिम् उद्वहन्ति समदन्त्य् अजयानिमिषाः वर्ष-भुजो ऽखिल-क्षिति-पतेर् इव विश्व-सृजो विदधति यत्र ये त्व् अधिकृता भवतश् चकिताः
tvam akaraṇaḥ sva-rāḍ akhila-kāraka-śakti-dharas tava balim udvahanti samadanty ajayānimiṣāḥ varṣa-bhujo 'khila-kṣiti-pater iva viśva-sṛjo vidadhati yatra ye tv adhikṛtā bhavataś cakitāḥ
Sanskrit only: no published translation is held for this verse.
स्थिर-चर-जातयः स्युर् अजयोत्थ-निमित्त-युजो विहर उदीक्षया यदि परस्य विमुक्त ततः न हि परमस्य कश्चिद् अपरो न परश् च भवेद् वियत इवापदस्य तव शून्य-तुलां दधतः
sthira-cara-jātayaḥ syur ajayottha-nimitta-yujo vihara udīkṣayā yadi parasya vimukta tataḥ na hi paramasya kaścid aparo na paraś ca bhaved viyata ivāpadasya tava śūnya-tulāṃ dadhataḥ
Sanskrit only: no published translation is held for this verse.
अपरिमिता ध्रुवास् तनु-भृतो यदि सर्व-गतास् तर्हि न शास्यतेति नियमो ध्रव नेतरथा अजनि च यन्-मयं तद् अविमुच्य नियन्तृ भवेत् समम् अनुजानतां यद् अमतं मत-दुष्टतया
aparimitā dhruvās tanu-bhṛto yadi sarva-gatās tarhi na śāsyateti niyamo dhrava netarathā ajani ca yan-mayaṃ tad avimucya niyantṛ bhavet samam anujānatāṃ yad amataṃ mata-duṣṭatayā
Sanskrit only: no published translation is held for this verse.
न घटत उद्भवः प्रकृति-पूरुषयोर् अजयोर् उभय-युजा भवन्त्य् असु-भृतो जल-बुद्बुद-वत् त्वयि त इमे ततो विविध-नाम-गुणैः परमे सरित इवार्णवे मधुनि लिल्युर् अशेष-रसाः
na ghaṭata udbhavaḥ prakṛti-pūruṣayor ajayor ubhaya-yujā bhavanty asu-bhṛto jala-budbuda-vat tvayi ta ime tato vividha-nāma-guṇaiḥ parame sarita ivārṇave madhuni lilyur aśeṣa-rasāḥ
Sanskrit only: no published translation is held for this verse.
नृषु तव मयया भ्रमम् अमीष्व् अवगत्य भृशं त्वयि सु-धियो ऽभवे दधति भावम् अनुप्रभवम् कथम् अनुवर्ततां भव-भयं तव यद् भ्रु-कुटिः सृजति मुहुस् त्रि-नेमिर् अभवच्-छरणेषु भयम्
nṛṣu tava mayayā bhramam amīṣv avagatya bhṛśaṃ tvayi su-dhiyo 'bhave dadhati bhāvam anuprabhavam katham anuvartatāṃ bhava-bhayaṃ tava yad bhru-kuṭiḥ sṛjati muhus tri-nemir abhavac-charaṇeṣu bhayam
Sanskrit only: no published translation is held for this verse.
विजित-हृषीक-वायुभिर् अदान्त-मनस् तुर-गं य इह यतन्ति यन्तुम् अति-लोलम् उपाय-खिदः व्यसन-शतान्विताः समवहाय गुरोश् चरणं वणिज इवाज सन्त्य् अकृत-कर्ण-धरा जलधौ
vijita-hṛṣīka-vāyubhir adānta-manas tura-gaṃ ya iha yatanti yantum ati-lolam upāya-khidaḥ vyasana-śatānvitāḥ samavahāya guroś caraṇaṃ vaṇija ivāja santy akṛta-karṇa-dharā jaladhau
Sanskrit only: no published translation is held for this verse.
स्वजन-सुतात्म-दार-धन-धाम-धरासु-रथैस् त्वयि सति किं नृणाम् श्रयत आत्मनि सर्व-रसे इति सद् अजानतां मिथुनतो रतये चरतां सुखयति को न्व् इह स्व-विहते स्व-निरस्त-भगे
svajana-sutātma-dāra-dhana-dhāma-dharāsu-rathais tvayi sati kiṃ nṛṇām śrayata ātmani sarva-rase iti sad ajānatāṃ mithunato rataye caratāṃ sukhayati ko nv iha sva-vihate sva-nirasta-bhage
Sanskrit only: no published translation is held for this verse.
भुवि पुरु-पुण्य-तीर्थ-सदनान्य् ऋषयो विमदास् त उत भवत्-पदाम्बुज-हृदो ऽघ-भिद्-अङ्घ्रि-जलाः दधति सकृन् मनस् त्वयि य आत्मनि नित्य-सुखे न पुनर् उपासते पुरुष-सार-हरावसथान्
bhuvi puru-puṇya-tīrtha-sadanāny ṛṣayo vimadās ta uta bhavat-padāmbuja-hṛdo 'gha-bhid-aṅghri-jalāḥ dadhati sakṛn manas tvayi ya ātmani nitya-sukhe na punar upāsate puruṣa-sāra-harāvasathān
Sanskrit only: no published translation is held for this verse.
सत इदं उत्थितं सद् इति चेन् ननु तर्क-हतं व्यभिचरति क्व च क्व च मृषा न तथोभय-युक् व्यवहृतये विकल्प इषितो ऽन्ध-परम्परया भ्रमयति भारती त उरु-वृत्तिभिर् उक्थ-जडान्
sata idaṃ utthitaṃ sad iti cen nanu tarka-hataṃ vyabhicarati kva ca kva ca mṛṣā na tathobhaya-yuk vyavahṛtaye vikalpa iṣito 'ndha-paramparayā bhramayati bhāratī ta uru-vṛttibhir uktha-jaḍān
Sanskrit only: no published translation is held for this verse.
न यद् इदम् अग्र आस न भविष्यद् अतो निधनाद् अनु मितम् अन्तरा त्वयि विभाति मृषैक-रसे अत उपमीयते द्रविण-जाति-विकल्प-पथैर् वितथ-मनो-विलासम् ऋतम् इत्य् अवयन्त्य् अबुधाः
na yad idam agra āsa na bhaviṣyad ato nidhanād anu mitam antarā tvayi vibhāti mṛṣaika-rase ata upamīyate draviṇa-jāti-vikalpa-pathair vitatha-mano-vilāsam ṛtam ity avayanty abudhāḥ
Sanskrit only: no published translation is held for this verse.
स यद् अजया त्व् अजाम् अनुशयीत गुणांश् च जुषन् भजति सरूपतां तद् अनु मृत्युम् अपेत-भगः त्वम् उत जहासि ताम् अहिर् इव त्वचम् आत्त-भगो महसि महीयसे ऽष्ट-गुणिते ऽपरिमेय-भगः
sa yad ajayā tv ajām anuśayīta guṇāṃś ca juṣan bhajati sarūpatāṃ tad anu mṛtyum apeta-bhagaḥ tvam uta jahāsi tām ahir iva tvacam ātta-bhago mahasi mahīyase 'ṣṭa-guṇite 'parimeya-bhagaḥ
Sanskrit only: no published translation is held for this verse.
यदि न समुद्धरन्ति यतयो हृदि काम-जटा दुरधिगमो ऽसतां हृदि गतो ऽस्मृत-कण्ठ-मणिः असु-तृप-योगिनाम् उभयतो ऽप्य् असुखं भगवन्न् अनपगतान्तकाद् अनधिरूढ-पदाद् भवतः
yadi na samuddharanti yatayo hṛdi kāma-jaṭā duradhigamo 'satāṃ hṛdi gato 'smṛta-kaṇṭha-maṇiḥ asu-tṛpa-yoginām ubhayato 'py asukhaṃ bhagavann anapagatāntakād anadhirūḍha-padād bhavataḥ
Sanskrit only: no published translation is held for this verse.
त्वद् अवगमी न वेत्ति भवद्-उत्थ-शुभाशुभयोर् गुण-विगुणान्वयांस् तर्हि देह-भृतां च गिरः अनु-युगम् अन्व्-अहं स-गुण गीत-परम्परया श्रवण-भृतो यतस् त्वम् अपवर्ग-गतिर् मनु-जैः
tvad avagamī na vetti bhavad-uttha-śubhāśubhayor guṇa-viguṇānvayāṃs tarhi deha-bhṛtāṃ ca giraḥ anu-yugam anv-ahaṃ sa-guṇa gīta-paramparayā śravaṇa-bhṛto yatas tvam apavarga-gatir manu-jaiḥ
Sanskrit only: no published translation is held for this verse.
द्यु-पतय एव ते न ययुर् अन्तम् अनन्ततया त्वम् अपि यद्-अन्तराण्ड-निचया ननु सावरणाः ख इव रजांसि वान्ति वयसा सह यच् छ्रुतयस् त्वयि हि फलन्त्य् अतन्-निरसनेन भवन्-निधनाः
dyu-pataya eva te na yayur antam anantatayā tvam api yad-antarāṇḍa-nicayā nanu sāvaraṇāḥ kha iva rajāṃsi vānti vayasā saha yac chrutayas tvayi hi phalanty atan-nirasanena bhavan-nidhanāḥ
Sanskrit only: no published translation is held for this verse.
श्री-भगवान् उवाच इत्य् एतद् ब्रह्मणः पुत्रा आश्रुत्यात्मानुशासनम् सनन्दनम् अथानर्चुः सिद्धा ज्ञात्वात्मनो गतिम्
śrī-bhagavān uvāca ity etad brahmaṇaḥ putrā āśrutyātmānuśāsanam sanandanam athānarcuḥ siddhā jñātvātmano gatim
Sanskrit only: no published translation is held for this verse.
इत्य् अशेष-समाम्नाय- पुराणोपनिषद्-रसः समुद्धृतः पूर्व-जातैर् व्योम-यानैर् महात्मभिः
ity aśeṣa-samāmnāya- purāṇopaniṣad-rasaḥ samuddhṛtaḥ pūrva-jātair vyoma-yānair mahātmabhiḥ
Sanskrit only: no published translation is held for this verse.
त्वं चैतद् ब्रह्म-दायाद श्रद्धयात्मानुशासनम् धारयंश् चर गां कामं कामानां भर्जनं नृणाम्
tvaṃ caitad brahma-dāyāda śraddhayātmānuśāsanam dhārayaṃś cara gāṃ kāmaṃ kāmānāṃ bharjanaṃ nṛṇām
Sanskrit only: no published translation is held for this verse.
श्री-शुक उवाच एवं स ऋषिणादिष्टं गृहीत्वा श्रद्धयात्मवान् पूर्णः श्रुत-धरो राजन्न् आह वीर-व्रतो मुनिः
śrī-śuka uvāca evaṃ sa ṛṣiṇādiṣṭaṃ gṛhītvā śraddhayātmavān pūrṇaḥ śruta-dharo rājann āha vīra-vrato muniḥ
Sanskrit only: no published translation is held for this verse.
श्री-नारद उवाच नमस् तस्मै भगवते कृष्णायामल-कीर्तये यो धत्ते सर्व-भूतानाम् अभवायोशतीः कलाः
śrī-nārada uvāca namas tasmai bhagavate kṛṣṇāyāmala-kīrtaye yo dhatte sarva-bhūtānām abhavāyośatīḥ kalāḥ
Sanskrit only: no published translation is held for this verse.
इत्य् आद्यम् ऋषिम् आनम्य तच्-छिष्यांश् च महात्मनः ततो ऽगाद् आश्रमं साक्षात् पितुर् द्वैपायनस्य मे
ity ādyam ṛṣim ānamya tac-chiṣyāṃś ca mahātmanaḥ tato 'gād āśramaṃ sākṣāt pitur dvaipāyanasya me
Sanskrit only: no published translation is held for this verse.
सभाजितो भगवता कृतासन-परिग्रहः तस्मै तद् वर्णयाम् आस नारायण-मुखाच् छ्रुतम्
sabhājito bhagavatā kṛtāsana-parigrahaḥ tasmai tad varṇayām āsa nārāyaṇa-mukhāc chrutam
Sanskrit only: no published translation is held for this verse.
इत्य् एतद् वर्णितं राजन् यन् नः प्रश्नः कृतस् त्वया यथा ब्रह्मण्य् अनिर्देश्ये नीऋगुणे ऽपि मनश् चरेत्
ity etad varṇitaṃ rājan yan naḥ praśnaḥ kṛtas tvayā yathā brahmaṇy anirdeśye nīṛguṇe 'pi manaś caret
Sanskrit only: no published translation is held for this verse.
यो ऽस्योत्प्रेक्षक आदि-मध्य-निधने यो ऽव्यक्त-जीवेश्वरो यः सृष्ट्वेदम् अनुप्रविश्य ऋषिणा चक्रे पुरः शास्ति ताः यं सम्पद्य जहात्य् अजाम् अनुशयी सुप्तः कुलायं यथा तं कैवल्य-निरस्त-योनिम् अभयं ध्यायेद् अजस्रं हरिम्
yo 'syotprekṣaka ādi-madhya-nidhane yo 'vyakta-jīveśvaro yaḥ sṛṣṭvedam anupraviśya ṛṣiṇā cakre puraḥ śāsti tāḥ yaṃ sampadya jahāty ajām anuśayī suptaḥ kulāyaṃ yathā taṃ kaivalya-nirasta-yonim abhayaṃ dhyāyed ajasraṃ harim
Sanskrit only: no published translation is held for this verse.