Library·Bhāgavata Purāṇa·10·10.9
श्री-शुक उवाच एकदा गृह-दासीषु यशोदा नन्द-गेहिनी कर्मान्तर-नियुक्तासु निर्ममन्थ स्वयं दधि
śrī-śuka uvāca ekadā gṛha-dāsīṣu yaśodā nanda-gehinī karmāntara-niyuktāsu nirmamantha svayaṃ dadhi
Sanskrit only: no published translation is held for this verse.
यानि यानीह गीतानि तद्-बाल-चरितानि च दधि-निर्मन्थने काले स्मरन्ती तान्य् अगायत
yāni yānīha gītāni tad-bāla-caritāni ca dadhi-nirmanthane kāle smarantī tāny agāyata
Sanskrit only: no published translation is held for this verse.
क्षौमं वासः पृथु-कटि-तटे बिभ्रती सूत्र-नद्धं पुत्र-स्नेह-स्नुत-कुच-युगं जात-कम्पं च सुभ्रूः रज्ज्व्-आकर्ष-श्रम-भुज-चलत्-कङ्कणौ कुण्डले च स्विन्नं वक्त्रं कबर-विगलन्-मालती निर्ममन्थ
kṣaumaṃ vāsaḥ pṛthu-kaṭi-taṭe bibhratī sūtra-naddhaṃ putra-sneha-snuta-kuca-yugaṃ jāta-kampaṃ ca subhrūḥ rajjv-ākarṣa-śrama-bhuja-calat-kaṅkaṇau kuṇḍale ca svinnaṃ vaktraṃ kabara-vigalan-mālatī nirmamantha
Sanskrit only: no published translation is held for this verse.
तां स्तन्य-काम आसाद्य मथ्नन्तीं जननीं हरिः गृहीत्वा दधि-मन्थानं न्यषेधत् प्रीतिम् आवहन्
tāṃ stanya-kāma āsādya mathnantīṃ jananīṃ hariḥ gṛhītvā dadhi-manthānaṃ nyaṣedhat prītim āvahan
Sanskrit only: no published translation is held for this verse.
तम् अङ्कम् आरूढम् अपाययत् स्तनं स्नेह-स्नुतं स-स्मितम् ईक्षती मुखम् अतृप्तम् उत्सृज्य जवेन सा ययाव् उत्सिच्यमाने पयसि त्व् अधिश्रिते
tam aṅkam ārūḍham apāyayat stanaṃ sneha-snutaṃ sa-smitam īkṣatī mukham atṛptam utsṛjya javena sā yayāv utsicyamāne payasi tv adhiśrite
Sanskrit only: no published translation is held for this verse.
सञ्जात-कोपः स्फुरितारुणाधरं सन्दश्य दद्भिर् दधि-मन्थ-भाजनम् भित्त्वा मृषाश्रुर् दृषद्-अश्मना रहो जघास हैयङ्गवम् अन्तरं गतः
sañjāta-kopaḥ sphuritāruṇādharaṃ sandaśya dadbhir dadhi-mantha-bhājanam bhittvā mṛṣāśrur dṛṣad-aśmanā raho jaghāsa haiyaṅgavam antaraṃ gataḥ
Sanskrit only: no published translation is held for this verse.
उत्तार्य गोपी सुशृतं पयः पुनः प्रविश्य संदृश्य च दध्य्-अमत्रकम् भग्नं विलोक्य स्व-सुतस्य कर्म तज् जहास तं चापि न तत्र पश्यती
uttārya gopī suśṛtaṃ payaḥ punaḥ praviśya saṃdṛśya ca dadhy-amatrakam bhagnaṃ vilokya sva-sutasya karma taj jahāsa taṃ cāpi na tatra paśyatī
Sanskrit only: no published translation is held for this verse.
उलूखलाङ्घ्रेर् उपरि व्यवस्थितं मर्काय कामं ददतं शिचि स्थितम् हैयङ्गवं चौर्य-विशङ्कितेक्षणं निरीक्ष्य पश्चात् सुतम् आगमच् छनैः
ulūkhalāṅghrer upari vyavasthitaṃ markāya kāmaṃ dadataṃ śici sthitam haiyaṅgavaṃ caurya-viśaṅkitekṣaṇaṃ nirīkṣya paścāt sutam āgamac chanaiḥ
Sanskrit only: no published translation is held for this verse.
ताम् आत्त-यष्टिं प्रसमीक्ष्य सत्वरस् ततो ऽवरुह्यापससार भीतवत् गोप्य् अन्वधावन् न यम् आप योगिनां क्षमं प्रवेष्टुं तपसेरितं मनः
tām ātta-yaṣṭiṃ prasamīkṣya satvaras tato 'varuhyāpasasāra bhītavat gopy anvadhāvan na yam āpa yogināṃ kṣamaṃ praveṣṭuṃ tapaseritaṃ manaḥ
Sanskrit only: no published translation is held for this verse.
अन्वञ्चमाना जननी बृहच्-चलच्- छ्रोणी-भराक्रान्त-गतिः सुमध्यमा जवेन विस्रंसित-केश-बन्धन- च्युत-प्रसूनानुगतिः परामृशत्
anvañcamānā jananī bṛhac-calac- chroṇī-bharākrānta-gatiḥ sumadhyamā javena visraṃsita-keśa-bandhana- cyuta-prasūnānugatiḥ parāmṛśat
Sanskrit only: no published translation is held for this verse.
कृतागसं तं प्ररुदन्तम् अक्षिणी कषन्तम् अञ्जन्-मषिणी स्व-पाणिना उद्वीक्षमाणं भय-विह्वलेक्षणं हस्ते गृहीत्वा भिषयन्त्य् अवागुरत्
kṛtāgasaṃ taṃ prarudantam akṣiṇī kaṣantam añjan-maṣiṇī sva-pāṇinā udvīkṣamāṇaṃ bhaya-vihvalekṣaṇaṃ haste gṛhītvā bhiṣayanty avāgurat
Sanskrit only: no published translation is held for this verse.
त्यक्त्वा यष्टिं सुतं भीतं विज्ञायार्भक-वत्सला इयेष किल तं बद्धुं दाम्नातद्-वीर्य-कोविदा
tyaktvā yaṣṭiṃ sutaṃ bhītaṃ vijñāyārbhaka-vatsalā iyeṣa kila taṃ baddhuṃ dāmnātad-vīrya-kovidā
Sanskrit only: no published translation is held for this verse.
न चान्तर् न बहिर् यस्य न पूर्वं नापि चापरम् पूर्वापरं बहिश् चान्तर् जगतो यो जगच् च यः
na cāntar na bahir yasya na pūrvaṃ nāpi cāparam pūrvāparaṃ bahiś cāntar jagato yo jagac ca yaḥ
Sanskrit only: no published translation is held for this verse.
तं मत्वात्मजम् अव्यक्तं मर्त्य-लिङ्गम् अधोक्षजम् गोपिकोलूखले दाम्ना बबन्ध प्राकृतं यथा
taṃ matvātmajam avyaktaṃ martya-liṅgam adhokṣajam gopikolūkhale dāmnā babandha prākṛtaṃ yathā
Sanskrit only: no published translation is held for this verse.
तद् दाम बध्यमानस्य स्वार्भकस्य कृतागसः द्व्य्-अङ्गुलोनम् अभूत् तेन सन्दधे ऽन्यच् च गोपिका
tad dāma badhyamānasya svārbhakasya kṛtāgasaḥ dvy-aṅgulonam abhūt tena sandadhe 'nyac ca gopikā
Sanskrit only: no published translation is held for this verse.
यदासीत् तद् अपि न्यूनं तेनान्यद् अपि सन्दधे तद् अपि द्व्य्-अङ्गुलं न्यूनं यद् यद् आदत्त बन्धनम्
yadāsīt tad api nyūnaṃ tenānyad api sandadhe tad api dvy-aṅgulaṃ nyūnaṃ yad yad ādatta bandhanam
Sanskrit only: no published translation is held for this verse.
एवं स्व-गेह-दामानि यशोदा सन्दधत्य् अपि गोपीनां सुस्मयन्तीनां स्मयन्ती विस्मिताभवत्
evaṃ sva-geha-dāmāni yaśodā sandadhaty api gopīnāṃ susmayantīnāṃ smayantī vismitābhavat
Sanskrit only: no published translation is held for this verse.
स्व-मातुः स्विन्न-गात्राया विस्रस्त-कबर-स्रजः दृष्ट्वा परिश्रमं कृष्णः कृपयासीत् स्व-बन्धने
sva-mātuḥ svinna-gātrāyā visrasta-kabara-srajaḥ dṛṣṭvā pariśramaṃ kṛṣṇaḥ kṛpayāsīt sva-bandhane
Sanskrit only: no published translation is held for this verse.
एवं सन्दर्शिता ह्य् अङ्ग हरिणा भृत्य-वश्यता स्व-वशेनापि कृष्णेन यस्येदं सेश्वरं वशे
evaṃ sandarśitā hy aṅga hariṇā bhṛtya-vaśyatā sva-vaśenāpi kṛṣṇena yasyedaṃ seśvaraṃ vaśe
Sanskrit only: no published translation is held for this verse.
नेमं विरिञ्चो न भवो न श्रीर् अप्य् अङ्ग-संश्रया प्रसादं लेभिरे गोपी यत् तत् प्राप विमुक्तिदात्
nemaṃ viriñco na bhavo na śrīr apy aṅga-saṃśrayā prasādaṃ lebhire gopī yat tat prāpa vimuktidāt
Sanskrit only: no published translation is held for this verse.
नायं सुखापो भगवान् देहिनां गोपिका-सुतः ज्ञानिनां चात्म-भूतानां यथा भक्तिमताम् इह
nāyaṃ sukhāpo bhagavān dehināṃ gopikā-sutaḥ jñānināṃ cātma-bhūtānāṃ yathā bhaktimatām iha
Sanskrit only: no published translation is held for this verse.
कृष्णस् तु गृह-कृत्येषु व्यग्रायां मातरि प्रभुः अद्राक्षीद् अर्जुनौ पूर्वं गुह्यकौ धनदात्मजौ
kṛṣṇas tu gṛha-kṛtyeṣu vyagrāyāṃ mātari prabhuḥ adrākṣīd arjunau pūrvaṃ guhyakau dhanadātmajau
Sanskrit only: no published translation is held for this verse.
पुरा नारद-शापेन वृक्षतां प्रापितौ मदात् नलकूवर-मणिग्रीवाव् इति ख्यातौ श्रियान्वितौ
purā nārada-śāpena vṛkṣatāṃ prāpitau madāt nalakūvara-maṇigrīvāv iti khyātau śriyānvitau
Sanskrit only: no published translation is held for this verse.