Library·Bhāgavata Purāṇa·11·11.15
श्री-भगवान् उवाच जितेन्द्रियस्य युक्तस्य जित-श्वासस्य योगिनः मयि धारयतश् चेत उपतिष्ठन्ति सिद्धयः
śrī-bhagavān uvāca jitendriyasya yuktasya jita-śvāsasya yoginaḥ mayi dhārayataś ceta upatiṣṭhanti siddhayaḥ
Sanskrit only: no published translation is held for this verse.
श्री-उद्धव उवाच कया धारणया का स्वित् कथं वा सिद्धिर् अच्युत कति वा सिद्धयो ब्रूहि योगिनां सिद्धि-दो भवान्
śrī-uddhava uvāca kayā dhāraṇayā kā svit kathaṃ vā siddhir acyuta kati vā siddhayo brūhi yogināṃ siddhi-do bhavān
Sanskrit only: no published translation is held for this verse.
श्री-भगवान् उवाच सिद्धयो ऽष्टादश प्रोक्ता धारणा योग-पार-गैः तासाम् अष्टौ मत्-प्रधाना दशैव गुण-हेतवः
śrī-bhagavān uvāca siddhayo 'ṣṭādaśa proktā dhāraṇā yoga-pāra-gaiḥ tāsām aṣṭau mat-pradhānā daśaiva guṇa-hetavaḥ
Sanskrit only: no published translation is held for this verse.
अणिमा महिमा मूर्तेर् लघिमा प्राप्तिर् इन्द्रियैः प्राकाम्यं श्रुत-दृष्टेषु शक्ति-प्रेरणम् ईशिता
aṇimā mahimā mūrter laghimā prāptir indriyaiḥ prākāmyaṃ śruta-dṛṣṭeṣu śakti-preraṇam īśitā
Sanskrit only: no published translation is held for this verse.
गुणेष्व् असङ्गो वशिता यत्-कामस् तद् अवस्यति एता मे सिद्धयः सौम्य अष्टाव् औत्पत्तिका मताः
guṇeṣv asaṅgo vaśitā yat-kāmas tad avasyati etā me siddhayaḥ saumya aṣṭāv autpattikā matāḥ
Sanskrit only: no published translation is held for this verse.
अनूर्मिमत्त्वं देहे ऽस्मिन् दूर-श्रवण-दर्शनम् मनो-जवः काम-रूपं पर-काय-प्रवेशनम्
anūrmimattvaṃ dehe 'smin dūra-śravaṇa-darśanam mano-javaḥ kāma-rūpaṃ para-kāya-praveśanam
Sanskrit only: no published translation is held for this verse.
स्वच्छन्द-मृत्युर् देवानां सह-क्रीडानुदर्शनम् यथा-सङ्कल्प-संसिद्धिर् आज्ञाप्रतिहता गतिः
svacchanda-mṛtyur devānāṃ saha-krīḍānudarśanam yathā-saṅkalpa-saṃsiddhir ājñāpratihatā gatiḥ
Sanskrit only: no published translation is held for this verse.
त्रि-काल-ज्ञत्वम् अद्वन्द्वं पर-चित्ताद्य्-अभिज्ञता अग्न्य्-अर्काम्बु-विषादीनां प्रतिष्टम्भो ऽपराजयः
tri-kāla-jñatvam advandvaṃ para-cittādy-abhijñatā agny-arkāmbu-viṣādīnāṃ pratiṣṭambho 'parājayaḥ
Sanskrit only: no published translation is held for this verse.
एताश् चोद्देशतः प्रोक्ता योग-धारण-सिद्धयः यया धारणया या स्याद् यथा वा स्यान् निबोध मे
etāś coddeśataḥ proktā yoga-dhāraṇa-siddhayaḥ yayā dhāraṇayā yā syād yathā vā syān nibodha me
Sanskrit only: no published translation is held for this verse.
भूत-सूक्ष्मात्मनि मयि तन्-मात्रं धारयेन् मनः अणिमानम् अवाप्नोति तन्-मात्रोपासको मम
bhūta-sūkṣmātmani mayi tan-mātraṃ dhārayen manaḥ aṇimānam avāpnoti tan-mātropāsako mama
Sanskrit only: no published translation is held for this verse.
महत्-तत्त्वात्मनि मयि यथा-संस्थं मनो दधत् महिमानम् अवाप्नोति भूतानां च पृथक् पृथक्
mahat-tattvātmani mayi yathā-saṃsthaṃ mano dadhat mahimānam avāpnoti bhūtānāṃ ca pṛthak pṛthak
Sanskrit only: no published translation is held for this verse.
परमाणु-मये चित्तं भूतानां मयि रञ्जयन् काल-सूक्ष्मार्थतां योगी लघिमानम् अवाप्नुयात्
paramāṇu-maye cittaṃ bhūtānāṃ mayi rañjayan kāla-sūkṣmārthatāṃ yogī laghimānam avāpnuyāt
Sanskrit only: no published translation is held for this verse.
धारयन् मय्य् अहं-तत्त्वे मनो वैकारिके ऽखिलम् सर्वेन्द्रियाणाम् आत्मत्वं प्राप्तिं प्राप्नोति मन्-मनाः
dhārayan mayy ahaṃ-tattve mano vaikārike 'khilam sarvendriyāṇām ātmatvaṃ prāptiṃ prāpnoti man-manāḥ
Sanskrit only: no published translation is held for this verse.
महत्य् आत्मनि यः सूत्रे धारयेन् मयि मानसम् प्राकाम्यं पारमेष्ठ्यं मे विन्दते ऽव्यक्त-जन्मनः
mahaty ātmani yaḥ sūtre dhārayen mayi mānasam prākāmyaṃ pārameṣṭhyaṃ me vindate 'vyakta-janmanaḥ
Sanskrit only: no published translation is held for this verse.
विष्णौ त्र्य्-अधीश्वरे चित्तं धारयेत् काल-विग्रहे स ईशित्वम् अवाप्नोति क्षेत्रज्ञ-क्षेत्र-चोदनाम्
viṣṇau try-adhīśvare cittaṃ dhārayet kāla-vigrahe sa īśitvam avāpnoti kṣetrajña-kṣetra-codanām
Sanskrit only: no published translation is held for this verse.
नारायणे तुरीयाख्ये भगवच्-छब्द-शब्दिते मनो मय्य् आदधद् योगी मद्-धर्मा वशिताम् इयात्
nārāyaṇe turīyākhye bhagavac-chabda-śabdite mano mayy ādadhad yogī mad-dharmā vaśitām iyāt
Sanskrit only: no published translation is held for this verse.
निर्गुणे ब्रह्मणि मयि धारयन् विशदं मनः परमानन्दम् आप्नोति यत्र कामो ऽवसीयते
nirguṇe brahmaṇi mayi dhārayan viśadaṃ manaḥ paramānandam āpnoti yatra kāmo 'vasīyate
Sanskrit only: no published translation is held for this verse.
श्वेतद्वीप-पतौ चित्तं शुद्धे धर्म-मये मयि धारयञ् छ्वेततां याति षड्-ऊर्मि-रहितो नरः
śvetadvīpa-patau cittaṃ śuddhe dharma-maye mayi dhārayañ chvetatāṃ yāti ṣaḍ-ūrmi-rahito naraḥ
Sanskrit only: no published translation is held for this verse.
मय्य् आकाशात्मनि प्राणे मनसा घोषम् उद्वहन् तत्रोपलब्धा भूतानां हंसो वाचः शृणोत्य् असौ
mayy ākāśātmani prāṇe manasā ghoṣam udvahan tatropalabdhā bhūtānāṃ haṃso vācaḥ śṛṇoty asau
Sanskrit only: no published translation is held for this verse.
चक्षुस् त्वष्टरि संयोज्य त्वष्टारम् अपि चक्षुषि मां तत्र मनसा ध्यायन् विश्वं पश्यति दूरतः
cakṣus tvaṣṭari saṃyojya tvaṣṭāram api cakṣuṣi māṃ tatra manasā dhyāyan viśvaṃ paśyati dūrataḥ
Sanskrit only: no published translation is held for this verse.
मनो मयि सु-संयोज्य देहं तद्-अनुवायुना मद्-धारणानुभावेन तत्रात्मा यत्र वै मनः
mano mayi su-saṃyojya dehaṃ tad-anuvāyunā mad-dhāraṇānubhāvena tatrātmā yatra vai manaḥ
Sanskrit only: no published translation is held for this verse.
यदा मन उपादाय यद् यद् रूपं बुभूषति तत् तद् भवेन् मनो-रूपं मद्-योग-बलम् आश्रयः
yadā mana upādāya yad yad rūpaṃ bubhūṣati tat tad bhaven mano-rūpaṃ mad-yoga-balam āśrayaḥ
Sanskrit only: no published translation is held for this verse.
पर-कायं विशन् सिद्ध आत्मानं तत्र भावयेत् पिण्डं हित्वा विशेत् प्राणो वायु-भूतः षडङ्घ्रि-वत्
para-kāyaṃ viśan siddha ātmānaṃ tatra bhāvayet piṇḍaṃ hitvā viśet prāṇo vāyu-bhūtaḥ ṣaḍaṅghri-vat
Sanskrit only: no published translation is held for this verse.
पार्ष्ण्यापीड्य गुदं प्राणं हृद्-उरः-कण्ठ-मूर्धसु आरोप्य ब्रह्म-रन्ध्रेण ब्रह्म नीत्वोत्सृजेत् तनुम्
pārṣṇyāpīḍya gudaṃ prāṇaṃ hṛd-uraḥ-kaṇṭha-mūrdhasu āropya brahma-randhreṇa brahma nītvotsṛjet tanum
Sanskrit only: no published translation is held for this verse.
विहरिष्यन् सुराक्रीडे मत्-स्थं सत्त्वं विभावयेत् विमानेनोपतिष्ठन्ति सत्त्व-वृत्तीः सुर-स्त्रियः
vihariṣyan surākrīḍe mat-sthaṃ sattvaṃ vibhāvayet vimānenopatiṣṭhanti sattva-vṛttīḥ sura-striyaḥ
Sanskrit only: no published translation is held for this verse.
यथा सङ्कल्पयेद् बुद्ध्या यदा वा मत्-परः पुमान् मयि सत्ये मनो युञ्जंस् तथा तत् समुपाश्नुते
yathā saṅkalpayed buddhyā yadā vā mat-paraḥ pumān mayi satye mano yuñjaṃs tathā tat samupāśnute
Sanskrit only: no published translation is held for this verse.
यो वै मद्-भावम् आपन्न ईशितुर् वशितुः पुमान् कुतश्चिन् न विहन्येत तस्य चाज्ञा यथा मम
yo vai mad-bhāvam āpanna īśitur vaśituḥ pumān kutaścin na vihanyeta tasya cājñā yathā mama
Sanskrit only: no published translation is held for this verse.
मद्-भक्त्या शुद्ध-सत्त्वस्य योगिनो धारणा-विदः तस्य त्रै-कालिकी बुद्धिर् जन्म-मृत्यूपबृंहिता
mad-bhaktyā śuddha-sattvasya yogino dhāraṇā-vidaḥ tasya trai-kālikī buddhir janma-mṛtyūpabṛṃhitā
Sanskrit only: no published translation is held for this verse.
अग्न्य्-आदिभिर् न हन्येत मुनेर् योग-मयं वपुः मद्-योग-शान्त-चित्तस्य यादसाम् उदकं यथा
agny-ādibhir na hanyeta muner yoga-mayaṃ vapuḥ mad-yoga-śānta-cittasya yādasām udakaṃ yathā
Sanskrit only: no published translation is held for this verse.
मद्-विभूतीर् अभिध्यायन् श्रीवत्सास्त्र-विभूषिताः ध्वजातपत्र-व्यजनैः स भवेद् अपराजितः
mad-vibhūtīr abhidhyāyan śrīvatsāstra-vibhūṣitāḥ dhvajātapatra-vyajanaiḥ sa bhaved aparājitaḥ
Sanskrit only: no published translation is held for this verse.
उपासकस्य माम् एवं योग-धारणया मुनेः सिद्धयः पूर्व-कथिता उपतिष्ठन्त्य् अशेषतः
upāsakasya mām evaṃ yoga-dhāraṇayā muneḥ siddhayaḥ pūrva-kathitā upatiṣṭhanty aśeṣataḥ
Sanskrit only: no published translation is held for this verse.
जितेन्द्रियस्य दान्तस्य जित-श्वासात्मनो मुनेः मद्-धारणां धारयतः का सा सिद्धिः सु-दुर्लभा
jitendriyasya dāntasya jita-śvāsātmano muneḥ mad-dhāraṇāṃ dhārayataḥ kā sā siddhiḥ su-durlabhā
Sanskrit only: no published translation is held for this verse.
अन्तरायान् वदन्त्य् एता युञ्जतो योगम् उत्तमम् मया सम्पद्यमानस्य काल-क्षपण-हेतवः
antarāyān vadanty etā yuñjato yogam uttamam mayā sampadyamānasya kāla-kṣapaṇa-hetavaḥ
Sanskrit only: no published translation is held for this verse.
जन्मौषधि-तपो-मन्त्रैर् यावतीर् इह सिद्धयः योगेनाप्नोति ताः सर्वा नान्यैर् योग-गतिं व्रजेत्
janmauṣadhi-tapo-mantrair yāvatīr iha siddhayaḥ yogenāpnoti tāḥ sarvā nānyair yoga-gatiṃ vrajet
Sanskrit only: no published translation is held for this verse.
सर्वासाम् अपि सिद्धीनां हेतुः पतिर् अहं प्रभुः अहं योगस्य साङ्ख्यस्य धर्मस्य ब्रह्म-वादिनाम्
sarvāsām api siddhīnāṃ hetuḥ patir ahaṃ prabhuḥ ahaṃ yogasya sāṅkhyasya dharmasya brahma-vādinām
Sanskrit only: no published translation is held for this verse.
अहम् आत्मान्तरो बाह्यो ऽनावृतः सर्व-देहिनाम् यथा भूतानि भूतेषु बहिर् अन्तः स्वयं तथा
aham ātmāntaro bāhyo 'nāvṛtaḥ sarva-dehinām yathā bhūtāni bhūteṣu bahir antaḥ svayaṃ tathā
Sanskrit only: no published translation is held for this verse.