Library·Bhāgavata Purāṇa·11·11.23
श्री-बादरायणिर् उवाच स एवम् आशंसित उद्धवेन भागवत-मुख्येन दाशार्ह-मुख्यः सभाजयन् भृत्य-वचो मुकुन्दस् तम् आबभाषे श्रवणीय-वीर्यः
śrī-bādarāyaṇir uvāca sa evam āśaṃsita uddhavena bhāgavata-mukhyena dāśārha-mukhyaḥ sabhājayan bhṛtya-vaco mukundas tam ābabhāṣe śravaṇīya-vīryaḥ
Sanskrit only: no published translation is held for this verse.
श्री-भगवान् उवाच बार्हस्पत्य स नास्त्य् अत्र साधुर् वै दुर्जनेरितैः दुरक्तैर् भिन्नम् आत्मानं यः समाधातुम् ईश्वरः
śrī-bhagavān uvāca bārhaspatya sa nāsty atra sādhur vai durjaneritaiḥ duraktair bhinnam ātmānaṃ yaḥ samādhātum īśvaraḥ
Sanskrit only: no published translation is held for this verse.
न तथा तप्यते विद्धः पुमान् बाणैस् तु मर्म-गैः यथा तुदन्ति मर्म-स्था ह्य् असतां परुषेषवः
na tathā tapyate viddhaḥ pumān bāṇais tu marma-gaiḥ yathā tudanti marma-sthā hy asatāṃ paruṣeṣavaḥ
Sanskrit only: no published translation is held for this verse.
कथयन्ति महत् पुण्यम् इतिहासम् इहोद्धव तम् अहं वर्णयिष्यामि निबोध सु-समाहितः
kathayanti mahat puṇyam itihāsam ihoddhava tam ahaṃ varṇayiṣyāmi nibodha su-samāhitaḥ
Sanskrit only: no published translation is held for this verse.
केनचिद् भिक्षुणा गीतं परिभूतेन दुर्जनैः स्मरता धृति-युक्तेन विपाकं निज-कर्मणाम्
kenacid bhikṣuṇā gītaṃ paribhūtena durjanaiḥ smaratā dhṛti-yuktena vipākaṃ nija-karmaṇām
Sanskrit only: no published translation is held for this verse.
अवन्तिषु द्विजः कश्चिद् आसीद् आढ्यतमः श्रिया वार्ता-वृत्तिः कदर्यस् तु कामी लुब्धो ऽति-कोपनः
avantiṣu dvijaḥ kaścid āsīd āḍhyatamaḥ śriyā vārtā-vṛttiḥ kadaryas tu kāmī lubdho 'ti-kopanaḥ
Sanskrit only: no published translation is held for this verse.
ज्ञातयो ऽतिथयस् तस्य वाङ्-मात्रेणापि नार्चिताः शून्यावसथ आत्मापि काले कामैर् अनर्चितः
jñātayo 'tithayas tasya vāṅ-mātreṇāpi nārcitāḥ śūnyāvasatha ātmāpi kāle kāmair anarcitaḥ
Sanskrit only: no published translation is held for this verse.
दुह्शीलस्य कदर्यस्य द्रुह्यन्ते पुत्र-बान्धवाः दारा दुहितरो भृत्या विषण्णा नाचरन् प्रियम्
duhśīlasya kadaryasya druhyante putra-bāndhavāḥ dārā duhitaro bhṛtyā viṣaṇṇā nācaran priyam
Sanskrit only: no published translation is held for this verse.
तस्यैवं यक्ष-वित्तस्य च्युतस्योभय-लोकतः धर्म-काम-विहीनस्य चुक्रुधुः पञ्च-भागिनः
tasyaivaṃ yakṣa-vittasya cyutasyobhaya-lokataḥ dharma-kāma-vihīnasya cukrudhuḥ pañca-bhāginaḥ
Sanskrit only: no published translation is held for this verse.
तद्-अवध्यान-विस्रस्त- पुण्य-स्कन्धस्य भूरि-द अर्थो ऽप्य् अगच्छन् निधनं बह्व्-आयास-परिश्रमः
tad-avadhyāna-visrasta- puṇya-skandhasya bhūri-da artho 'py agacchan nidhanaṃ bahv-āyāsa-pariśramaḥ
Sanskrit only: no published translation is held for this verse.
ज्ञात्यो जगृहुः किञ्चित् किञ्चिद् दस्यव उद्धव दैवतः कालतः किञ्चिद् ब्रह्म-बन्धोर् नृ-पार्थिवात्
jñātyo jagṛhuḥ kiñcit kiñcid dasyava uddhava daivataḥ kālataḥ kiñcid brahma-bandhor nṛ-pārthivāt
Sanskrit only: no published translation is held for this verse.
स एवं द्रविणे नष्टे धर्म-काम-विवर्जितः उपेक्षितश् च स्व-जनैश् चिन्ताम् आप दुरत्ययाम्
sa evaṃ draviṇe naṣṭe dharma-kāma-vivarjitaḥ upekṣitaś ca sva-janaiś cintām āpa duratyayām
Sanskrit only: no published translation is held for this verse.
तस्यैवं ध्यायतो दीर्घं नष्ट-रायस् तपस्विनः खिद्यतो बाष्प-कण्ठस्य निर्वेदः सु-महान् अभूत्
tasyaivaṃ dhyāyato dīrghaṃ naṣṭa-rāyas tapasvinaḥ khidyato bāṣpa-kaṇṭhasya nirvedaḥ su-mahān abhūt
Sanskrit only: no published translation is held for this verse.
स चाहेदम् अहो कष्टं वृथात्मा मे ऽनुतापितः न धर्माय न कामाय यस्यार्थायास ईदृशः
sa cāhedam aho kaṣṭaṃ vṛthātmā me 'nutāpitaḥ na dharmāya na kāmāya yasyārthāyāsa īdṛśaḥ
Sanskrit only: no published translation is held for this verse.
प्रायेणाथाः कदर्याणां न सुखाय कदाचन इह चात्मोपतापाय मृतस्य नरकाय च
prāyeṇāthāḥ kadaryāṇāṃ na sukhāya kadācana iha cātmopatāpāya mṛtasya narakāya ca
Sanskrit only: no published translation is held for this verse.
यशो यशस्विनां शुद्धं श्लाघ्या ये गुणिनां गुणाः लोभः स्व्-अल्पो ऽपि तान् हन्ति श्वित्रो रूपम् इवेप्सितम्
yaśo yaśasvināṃ śuddhaṃ ślāghyā ye guṇināṃ guṇāḥ lobhaḥ sv-alpo 'pi tān hanti śvitro rūpam ivepsitam
Sanskrit only: no published translation is held for this verse.
अर्थस्य साधने सिद्धे उत्कर्षे रक्षणे व्यये नाशोपभोग आयासस् त्रासश् चिन्ता भ्रमो नृणाम्
arthasya sādhane siddhe utkarṣe rakṣaṇe vyaye nāśopabhoga āyāsas trāsaś cintā bhramo nṛṇām
Sanskrit only: no published translation is held for this verse.
स्तेयं हिंसानृतं दम्भः कामः क्रोधः स्मयो मदः भेदो वैरम् अविश्वासः संस्पर्धा व्यसनानि च
steyaṃ hiṃsānṛtaṃ dambhaḥ kāmaḥ krodhaḥ smayo madaḥ bhedo vairam aviśvāsaḥ saṃspardhā vyasanāni ca
Sanskrit only: no published translation is held for this verse.
एते पञ्चदशानर्था ह्य् अर्थ-मूला मता नृणाम् तस्माद् अनर्थम् अर्थाख्यं श्रेयो-ऽर्थी दूरतस् त्यजेत्
ete pañcadaśānarthā hy artha-mūlā matā nṛṇām tasmād anartham arthākhyaṃ śreyo-'rthī dūratas tyajet
Sanskrit only: no published translation is held for this verse.
भिद्यन्ते भ्रातरो दाराः पितरः सुहृदस् तथा एकास्निग्धाः काकिणिना सद्यः सर्वे ऽरयः कृताः
bhidyante bhrātaro dārāḥ pitaraḥ suhṛdas tathā ekāsnigdhāḥ kākiṇinā sadyaḥ sarve 'rayaḥ kṛtāḥ
Sanskrit only: no published translation is held for this verse.
अर्थेनाल्पीयसा ह्य् एते संरब्धा दीप्त-मन्यवः त्यजन्त्य् आशु स्पृधो घ्नन्ति सहसोत्सृज्य सौहृदम्
arthenālpīyasā hy ete saṃrabdhā dīpta-manyavaḥ tyajanty āśu spṛdho ghnanti sahasotsṛjya sauhṛdam
Sanskrit only: no published translation is held for this verse.
लब्ध्वा जन्मामर-प्रार्थ्यं मानुष्यं तद् द्विजाग्र्यताम् तद् अनादृत्य ये स्वार्थं घ्नन्ति यान्त्य् अशुभां गतिम्
labdhvā janmāmara-prārthyaṃ mānuṣyaṃ tad dvijāgryatām tad anādṛtya ye svārthaṃ ghnanti yānty aśubhāṃ gatim
Sanskrit only: no published translation is held for this verse.
स्वर्गापवर्गयोर् द्वारं प्राप्य लोकम् इमं पुमान् द्रविणे को ऽनुषज्जेत मर्त्यो ऽनर्थस्य धामनि
svargāpavargayor dvāraṃ prāpya lokam imaṃ pumān draviṇe ko 'nuṣajjeta martyo 'narthasya dhāmani
Sanskrit only: no published translation is held for this verse.
देवर्षि-पितृ-भूतानि ज्ञातीन् बन्धूंश् च भागिनः असंविभज्य चात्मानं यक्ष-वित्तः पतत्य् अधः
devarṣi-pitṛ-bhūtāni jñātīn bandhūṃś ca bhāginaḥ asaṃvibhajya cātmānaṃ yakṣa-vittaḥ pataty adhaḥ
Sanskrit only: no published translation is held for this verse.
व्यर्थयार्थेहया वित्तं प्रमत्तस्य वयो बलम् कुशला येन सिध्यन्ति जरठः किं नु साधये
vyarthayārthehayā vittaṃ pramattasya vayo balam kuśalā yena sidhyanti jaraṭhaḥ kiṃ nu sādhaye
Sanskrit only: no published translation is held for this verse.
कस्मात् सङ्क्लिश्यते विद्वान् व्यर्थयार्थेहयासकृत् कस्यचिन् मायया नूनं लोको ऽयं सु-विमोहितः
kasmāt saṅkliśyate vidvān vyarthayārthehayāsakṛt kasyacin māyayā nūnaṃ loko 'yaṃ su-vimohitaḥ
Sanskrit only: no published translation is held for this verse.
किं धनैर् धन-दैर् वा किं कामैर् वा काम-दैर् उत मृत्युना ग्रस्यमानस्य कर्मभिर् वोत जन्म-दैः
kiṃ dhanair dhana-dair vā kiṃ kāmair vā kāma-dair uta mṛtyunā grasyamānasya karmabhir vota janma-daiḥ
Sanskrit only: no published translation is held for this verse.
नूनं मे भगवांस् तुष्टः सर्व-देव-मयो हरिः येन नीतो दशाम् एतां निर्वेदश् चात्मनः प्लवः
nūnaṃ me bhagavāṃs tuṣṭaḥ sarva-deva-mayo hariḥ yena nīto daśām etāṃ nirvedaś cātmanaḥ plavaḥ
Sanskrit only: no published translation is held for this verse.
सो ऽहं कालावशेषेण शोषयिष्ये ऽङ्गम् आत्मनः अप्रमत्तो ऽखिल-स्वार्थे यदि स्यात् सिद्ध आत्मनि
so 'haṃ kālāvaśeṣeṇa śoṣayiṣye 'ṅgam ātmanaḥ apramatto 'khila-svārthe yadi syāt siddha ātmani
Sanskrit only: no published translation is held for this verse.
तत्र माम् अनुमोदेरन् देवास् त्रि-भुवनेश्वराः मुहूर्तेन ब्रह्म-लोकं खट्वाङ्गः समसाधयत्
tatra mām anumoderan devās tri-bhuvaneśvarāḥ muhūrtena brahma-lokaṃ khaṭvāṅgaḥ samasādhayat
Sanskrit only: no published translation is held for this verse.
श्री-भगवान् उवाच इत्य् अभिप्रेत्य मनसा ह्य् आवन्त्यो द्विज-सत्तमः उन्मुच्य हृदय-ग्रन्थीन् शान्तो भिक्षुर् अभून् मुनिः
śrī-bhagavān uvāca ity abhipretya manasā hy āvantyo dvija-sattamaḥ unmucya hṛdaya-granthīn śānto bhikṣur abhūn muniḥ
Sanskrit only: no published translation is held for this verse.
स चचार महीम् एतां संयतात्मेन्द्रियानिलः भिक्षार्थं नगर-ग्रामान् असङ्गो ऽलक्षितो ऽविशत्
sa cacāra mahīm etāṃ saṃyatātmendriyānilaḥ bhikṣārthaṃ nagara-grāmān asaṅgo 'lakṣito 'viśat
Sanskrit only: no published translation is held for this verse.
तं वै प्रवयसं भिक्षुम् अवधूतम् असज्-जनाः दृष्ट्वा पर्यभवन् भद्र बह्वीभिः परिभूतिभिः
taṃ vai pravayasaṃ bhikṣum avadhūtam asaj-janāḥ dṛṣṭvā paryabhavan bhadra bahvībhiḥ paribhūtibhiḥ
Sanskrit only: no published translation is held for this verse.
केचित् त्रि-वेणुं जगृहुर् एके पात्रं कमण्डलुम् पीठं चैके ऽक्ष-सूत्रं च कन्थां चीराणि केचन प्रदाय च पुनस् तानि दर्शितान्य् आददुर् मुनेः
kecit tri-veṇuṃ jagṛhur eke pātraṃ kamaṇḍalum pīṭhaṃ caike 'kṣa-sūtraṃ ca kanthāṃ cīrāṇi kecana pradāya ca punas tāni darśitāny ādadur muneḥ
Sanskrit only: no published translation is held for this verse.
अन्नं च भैक्ष्य-सम्पन्नं भुञ्जानस्य सरित्-तटे मूत्रयन्ति च पापिष्ठाः ष्ठीवन्त्य् अस्य च मूर्धनि
annaṃ ca bhaikṣya-sampannaṃ bhuñjānasya sarit-taṭe mūtrayanti ca pāpiṣṭhāḥ ṣṭhīvanty asya ca mūrdhani
Sanskrit only: no published translation is held for this verse.
यत-वाचं वाचयन्ति ताडयन्ति न वक्ति चेत् तर्जयन्त्य् अपरे वाग्भिः स्तेनो ऽयम् इति वादिनः बध्नन्ति रज्ज्वा तं केचिद् बध्यतां बध्यताम् इति
yata-vācaṃ vācayanti tāḍayanti na vakti cet tarjayanty apare vāgbhiḥ steno 'yam iti vādinaḥ badhnanti rajjvā taṃ kecid badhyatāṃ badhyatām iti
Sanskrit only: no published translation is held for this verse.
क्षिपन्त्य् एके ऽवजानन्त एष धर्म-ध्वजः शठः क्षीण-वित्त इमां वृत्तिम् अग्रहीत् स्व-जनोज्झितः
kṣipanty eke 'vajānanta eṣa dharma-dhvajaḥ śaṭhaḥ kṣīṇa-vitta imāṃ vṛttim agrahīt sva-janojjhitaḥ
Sanskrit only: no published translation is held for this verse.
अहो एष महा-सारो धृतिमान् गिरि-राड् इव मौनेन साधयत्य् अर्थं बक-वद् दृढ-निश्चयः
aho eṣa mahā-sāro dhṛtimān giri-rāḍ iva maunena sādhayaty arthaṃ baka-vad dṛḍha-niścayaḥ
Sanskrit only: no published translation is held for this verse.
इत्य् एके विहसन्त्य् एनम् एके दुर्वातयन्ति च तं बबन्धुर् निरुरुधुर् यथा क्रीडनकं द्विजम्
ity eke vihasanty enam eke durvātayanti ca taṃ babandhur nirurudhur yathā krīḍanakaṃ dvijam
Sanskrit only: no published translation is held for this verse.
एवं स भौतिकं दुःखं दैविकं दैहिकं च यत् भोक्तव्यम् आत्मनो दिष्टं प्राप्तं प्राप्तम् अबुध्यत
evaṃ sa bhautikaṃ duḥkhaṃ daivikaṃ daihikaṃ ca yat bhoktavyam ātmano diṣṭaṃ prāptaṃ prāptam abudhyata
Sanskrit only: no published translation is held for this verse.
परिभूत इमां गाथाम् अगायत नराधमैः पातयद्भिः स्व धर्म-स्थो धृतिम् आस्थाय सात्त्विकीम्
paribhūta imāṃ gāthām agāyata narādhamaiḥ pātayadbhiḥ sva dharma-stho dhṛtim āsthāya sāttvikīm
Sanskrit only: no published translation is held for this verse.
द्विज उवाच नायं जनो मे सुख-दुःख-हेतुर् न देवतात्मा ग्रह-कर्म-कालाः मनः परं कारणम् आमनन्ति संसार-चक्रं परिवर्तयेद् यत्
dvija uvāca nāyaṃ jano me sukha-duḥkha-hetur na devatātmā graha-karma-kālāḥ manaḥ paraṃ kāraṇam āmananti saṃsāra-cakraṃ parivartayed yat
Sanskrit only: no published translation is held for this verse.
मनो गुणान् वै सृजते बलीयस् ततश् च कर्माणि विलक्षणानि शुक्लानि कृष्णान्य् अथ लोहितानि तेभ्यः स-वर्णाः सृतयो भवन्ति
mano guṇān vai sṛjate balīyas tataś ca karmāṇi vilakṣaṇāni śuklāni kṛṣṇāny atha lohitāni tebhyaḥ sa-varṇāḥ sṛtayo bhavanti
Sanskrit only: no published translation is held for this verse.
अनीह आत्मा मनसा समीहता हिरण्-मयो मत्-सख उद्विचष्टे मनः स्व-लिङ्गं परिगृह्य कामान् जुषन् निबद्धो गुण-सङ्गतो ऽसौ
anīha ātmā manasā samīhatā hiraṇ-mayo mat-sakha udvicaṣṭe manaḥ sva-liṅgaṃ parigṛhya kāmān juṣan nibaddho guṇa-saṅgato 'sau
Sanskrit only: no published translation is held for this verse.
दानं स्व-धर्मो नियमो यमश् च श्रुतं च कर्माणि च सद्-व्रतानि सर्वे मनो-निग्रह-लक्षणान्ताः परो हि योगो मनसः समाधिः
dānaṃ sva-dharmo niyamo yamaś ca śrutaṃ ca karmāṇi ca sad-vratāni sarve mano-nigraha-lakṣaṇāntāḥ paro hi yogo manasaḥ samādhiḥ
Sanskrit only: no published translation is held for this verse.
समाहितं यस्य मनः प्रशान्तं दानादिभिः किं वद तस्य कृत्यम् असंयतं यस्य मनो विनश्यद् दानादिभिश् चेद् अपरं किम् एभिः
samāhitaṃ yasya manaḥ praśāntaṃ dānādibhiḥ kiṃ vada tasya kṛtyam asaṃyataṃ yasya mano vinaśyad dānādibhiś ced aparaṃ kim ebhiḥ
Sanskrit only: no published translation is held for this verse.
मनो-वशे ऽन्ये ह्य् अभवन् स्म देवा मनश् च नान्यस्य वशं समेति भीष्मो हि देवः सहसः सहीयान् युञ्ज्याद् वशे तं स हि देव-देवः
mano-vaśe 'nye hy abhavan sma devā manaś ca nānyasya vaśaṃ sameti bhīṣmo hi devaḥ sahasaḥ sahīyān yuñjyād vaśe taṃ sa hi deva-devaḥ
Sanskrit only: no published translation is held for this verse.
तम् दुर्जयं शत्रुम् असह्य-वेगम् अरुन्-तुदं तन् न विजित्य केचित् कुर्वन्त्य् असद्-विग्रहम् अत्र मर्त्यैर् मित्राण्य् उदासीन-रिपून् विमूढाः
tam durjayaṃ śatrum asahya-vegam arun-tudaṃ tan na vijitya kecit kurvanty asad-vigraham atra martyair mitrāṇy udāsīna-ripūn vimūḍhāḥ
Sanskrit only: no published translation is held for this verse.
देहं मनो-मात्रम् इमं गृहीत्वा ममाहम् इत्य् अन्ध-धियो मनुष्याः एषो ऽहम् अन्यो ऽयम् इति भ्रमेण दुरन्त-पारे तमसि भ्रमन्ति
dehaṃ mano-mātram imaṃ gṛhītvā mamāham ity andha-dhiyo manuṣyāḥ eṣo 'ham anyo 'yam iti bhrameṇa duranta-pāre tamasi bhramanti
Sanskrit only: no published translation is held for this verse.
जनस् तु हेतुः सुख-दुःखयोश् चेत् किम् आत्मनश् चात्र हि भौमयोस् तत् जिह्वां क्वचित् सन्दशति स्व-दद्भिस् तद्-वेदनायां कतमाय कुप्येत्
janas tu hetuḥ sukha-duḥkhayoś cet kim ātmanaś cātra hi bhaumayos tat jihvāṃ kvacit sandaśati sva-dadbhis tad-vedanāyāṃ katamāya kupyet
Sanskrit only: no published translation is held for this verse.
दुःखस्य हेतुर् यदि देवतास् तु किम् आत्मनस् तत्र विकारयोस् तत् यद् अङ्गम् अङ्गेन निहन्यते क्वचित् क्रुध्येत कस्मै पुरुषः स्व-देहे
duḥkhasya hetur yadi devatās tu kim ātmanas tatra vikārayos tat yad aṅgam aṅgena nihanyate kvacit krudhyeta kasmai puruṣaḥ sva-dehe
Sanskrit only: no published translation is held for this verse.
आत्मा यदि स्यात् सुख-दुःख-हेतुः किम् अन्यतस् तत्र निज-स्वभावः न ह्य् आत्मनो ऽन्यद् यदि तन् मृषा स्यात् क्रुध्येत कस्मान् न सुखं न दुःखम्
ātmā yadi syāt sukha-duḥkha-hetuḥ kim anyatas tatra nija-svabhāvaḥ na hy ātmano 'nyad yadi tan mṛṣā syāt krudhyeta kasmān na sukhaṃ na duḥkham
Sanskrit only: no published translation is held for this verse.
ग्रहा निमित्तं सुख-दुःखयोश् चेत् किम् आत्मनो ऽजस्य जनस्य ते वै ग्रहैर् ग्रहस्यैव वदन्ति पीडां क्रुध्येत कस्मै पुरुषस् ततो ऽन्यः
grahā nimittaṃ sukha-duḥkhayoś cet kim ātmano 'jasya janasya te vai grahair grahasyaiva vadanti pīḍāṃ krudhyeta kasmai puruṣas tato 'nyaḥ
Sanskrit only: no published translation is held for this verse.
कर्मास्तु हेतुः सुख-दुःखयोश् चेत् किम् आत्मनस् तद् धि जडाजडत्वे देहस् त्व् अचित् पुरुषो ऽयं सुपर्णः क्रुध्येत कस्मै न हि कर्म मूलम्
karmāstu hetuḥ sukha-duḥkhayoś cet kim ātmanas tad dhi jaḍājaḍatve dehas tv acit puruṣo 'yaṃ suparṇaḥ krudhyeta kasmai na hi karma mūlam
Sanskrit only: no published translation is held for this verse.
कालस् तु हेतुः सुख-दुःखयोश् चेत् किम् आत्मनस् तत्र तद्-आत्मको ऽसौ नाग्नेर् हि तापो न हिमस्य तत् स्यात् क्रुध्येत कस्मै न परस्य द्वन्द्वम्
kālas tu hetuḥ sukha-duḥkhayoś cet kim ātmanas tatra tad-ātmako 'sau nāgner hi tāpo na himasya tat syāt krudhyeta kasmai na parasya dvandvam
Sanskrit only: no published translation is held for this verse.
न केनचित् क्वापि कथञ्चनास्य द्वन्द्वोपरागः परतः परस्य यथाहमः संसृति-रूपिणः स्याद् एवं प्रबुद्धो न बिभेति भूतैः
na kenacit kvāpi kathañcanāsya dvandvoparāgaḥ parataḥ parasya yathāhamaḥ saṃsṛti-rūpiṇaḥ syād evaṃ prabuddho na bibheti bhūtaiḥ
Sanskrit only: no published translation is held for this verse.
एतां स आस्थाय परात्म-निष्ठाम् अध्यासितां पूर्वतमैर् महर्षिभिः अहं तरिष्यामि दुरन्त-पारं तमो मुकुन्दाङ्घ्रि-निषेवयैव
etāṃ sa āsthāya parātma-niṣṭhām adhyāsitāṃ pūrvatamair maharṣibhiḥ ahaṃ tariṣyāmi duranta-pāraṃ tamo mukundāṅghri-niṣevayaiva
Sanskrit only: no published translation is held for this verse.
श्री-भगवान् उवाच निर्विद्य नष्ट-द्रविणे गत-क्लमः प्रव्रज्य गां पर्यटमान इत्थम् निराकृतो ऽसद्भिर् अपि स्व-धर्माद् अकम्पितो ऽमूं मुनिर् आह गाथाम्
śrī-bhagavān uvāca nirvidya naṣṭa-draviṇe gata-klamaḥ pravrajya gāṃ paryaṭamāna ittham nirākṛto 'sadbhir api sva-dharmād akampito 'mūṃ munir āha gāthām
Sanskrit only: no published translation is held for this verse.
सुख-दुःख-प्रदो नान्यः पुरुषस्यात्म-विभ्रमः मित्रोदासीन-रिपवः संसारस् तमसः कृतः
sukha-duḥkha-prado nānyaḥ puruṣasyātma-vibhramaḥ mitrodāsīna-ripavaḥ saṃsāras tamasaḥ kṛtaḥ
Sanskrit only: no published translation is held for this verse.
तस्मात् सर्वात्मना तात निगृहाण मनो धिया मय्य् आवेशितया युक्त एतावान् योग-सङ्ग्रहः
tasmāt sarvātmanā tāta nigṛhāṇa mano dhiyā mayy āveśitayā yukta etāvān yoga-saṅgrahaḥ
Sanskrit only: no published translation is held for this verse.
य एतां भिक्षुणा गीतां ब्रह्म-निष्ठां समाहितः धारयञ् छ्रावयञ् छृण्वन् द्वन्द्वैर् नैवाभिभूयते
ya etāṃ bhikṣuṇā gītāṃ brahma-niṣṭhāṃ samāhitaḥ dhārayañ chrāvayañ chṛṇvan dvandvair naivābhibhūyate
Sanskrit only: no published translation is held for this verse.