Library·Bhāgavata Purāṇa·4·4.15
मैत्रेय उवाच अथ तस्य पुनर् विप्रैर् अपुत्रस्य महीपतेः बाहुभ्यां मथ्यमानाभ्यां मिथुनं समपद्यत
maitreya uvāca atha tasya punar viprair aputrasya mahīpateḥ bāhubhyāṃ mathyamānābhyāṃ mithunaṃ samapadyata
Sanskrit only: no published translation is held for this verse.
तद् दृष्ट्वा मिथुनं जातम् ऋषयो ब्रह्म-वादिनः ऊचुः परम-सन्तुष्टा विदित्वा भगवत्-कलाम्
tad dṛṣṭvā mithunaṃ jātam ṛṣayo brahma-vādinaḥ ūcuḥ parama-santuṣṭā viditvā bhagavat-kalām
Sanskrit only: no published translation is held for this verse.
ऋषय ऊचुः एष विष्णोर् भगवतः कला भुवन-पालिनी इयं च लक्ष्म्याः सम्भूतिः पुरुषस्यानपायिनी
ṛṣaya ūcuḥ eṣa viṣṇor bhagavataḥ kalā bhuvana-pālinī iyaṃ ca lakṣmyāḥ sambhūtiḥ puruṣasyānapāyinī
Sanskrit only: no published translation is held for this verse.
अयं तु प्रथमो राज्ञां पुमान् प्रथयिता यशः पृथुर् नाम महाराजो भविष्यति पृथु-श्रवाः
ayaṃ tu prathamo rājñāṃ pumān prathayitā yaśaḥ pṛthur nāma mahārājo bhaviṣyati pṛthu-śravāḥ
Sanskrit only: no published translation is held for this verse.
इयं च सुदती देवी गुण-भूषण-भूषणा अर्चिर् नाम वरारोहा पृथुम् एवावरुन्धती
iyaṃ ca sudatī devī guṇa-bhūṣaṇa-bhūṣaṇā arcir nāma varārohā pṛthum evāvarundhatī
Sanskrit only: no published translation is held for this verse.
एष साक्षाद् धरेर् अंशोजातो लोक-रिरक्षया इयं च तत्-परा हि श्रीर् अनुजज्ञे ऽनपायिनी
eṣa sākṣād dharer aṃśojāto loka-rirakṣayā iyaṃ ca tat-parā hi śrīr anujajñe 'napāyinī
Sanskrit only: no published translation is held for this verse.
मैत्रेय उवाच प्रशंसन्ति स्म तं विप्रा गन्धर्व-प्रवरा जगुः मुमुचुः सुमनो-धाराः सिद्धा नृत्यन्ति स्वः-स्त्रियः
maitreya uvāca praśaṃsanti sma taṃ viprā gandharva-pravarā jaguḥ mumucuḥ sumano-dhārāḥ siddhā nṛtyanti svaḥ-striyaḥ
Sanskrit only: no published translation is held for this verse.
शङ्ख-तूर्य-मृदङ्गाद्या नेदुर् दुन्दुभयो दिवि तत्र सर्व उपाजग्मुर् देवर्षि-पितॄणां गणाः
śaṅkha-tūrya-mṛdaṅgādyā nedur dundubhayo divi tatra sarva upājagmur devarṣi-pitṝṇāṃ gaṇāḥ
Sanskrit only: no published translation is held for this verse.
ब्रह्मा जगद्-गुरुर् देवैः सहासृत्य सुरेश्वरैः वैन्यस्य दक्षिणे हस्ते दृष्ट्वा चिह्नं गदाभृतः
brahmā jagad-gurur devaiḥ sahāsṛtya sureśvaraiḥ vainyasya dakṣiṇe haste dṛṣṭvā cihnaṃ gadābhṛtaḥ
Sanskrit only: no published translation is held for this verse.
पादयोर् अरविन्दं च तं वै मेने हरेः कलाम् यस्याप्रतिहतं चक्रम् अंशः स परमेष्ठिनः
pādayor aravindaṃ ca taṃ vai mene hareḥ kalām yasyāpratihataṃ cakram aṃśaḥ sa parameṣṭhinaḥ
Sanskrit only: no published translation is held for this verse.
तस्याभिषेक आरब्धो ब्राह्मणैर् ब्रह्म-वादिभिः आभिषेचनिकान्य् अस्मै आजह्रुः सर्वतो जनाः
tasyābhiṣeka ārabdho brāhmaṇair brahma-vādibhiḥ ābhiṣecanikāny asmai ājahruḥ sarvato janāḥ
Sanskrit only: no published translation is held for this verse.
सरित्-समुद्रा गिरयो नागा गावः खगा मृगाः द्यौः क्षितिः सर्व-भूतानि समाजह्रुर् उपायनम्
sarit-samudrā girayo nāgā gāvaḥ khagā mṛgāḥ dyauḥ kṣitiḥ sarva-bhūtāni samājahrur upāyanam
Sanskrit only: no published translation is held for this verse.
सो ऽभिषिक्तो महाराजः सुवासाः साध्व्-अलङ्कृतः पत्न्यार्चिषालङ्कृतया विरेजे ऽग्निर् इवापरः
so 'bhiṣikto mahārājaḥ suvāsāḥ sādhv-alaṅkṛtaḥ patnyārciṣālaṅkṛtayā vireje 'gnir ivāparaḥ
Sanskrit only: no published translation is held for this verse.
तस्मै जहार धनदो हैमं वीर वरासनम् वरुणः सलिल-स्रावम् आतपत्रं शशि-प्रभम्
tasmai jahāra dhanado haimaṃ vīra varāsanam varuṇaḥ salila-srāvam ātapatraṃ śaśi-prabham
Sanskrit only: no published translation is held for this verse.
वायुश् च वाल-व्यजने धर्मः कीर्तिमयीं स्रजम् इन्द्रः किरीटम् उत्कृष्टं दण्डं संयमनं यमः
vāyuś ca vāla-vyajane dharmaḥ kīrtimayīṃ srajam indraḥ kirīṭam utkṛṣṭaṃ daṇḍaṃ saṃyamanaṃ yamaḥ
Sanskrit only: no published translation is held for this verse.
ब्रह्मा ब्रह्ममयं वर्म भारती हारम् उत्तमम् हरिः सुदर्शनं चक्रं तत्-पत्न्य् अव्याहतां श्रियम्
brahmā brahmamayaṃ varma bhāratī hāram uttamam hariḥ sudarśanaṃ cakraṃ tat-patny avyāhatāṃ śriyam
Sanskrit only: no published translation is held for this verse.
दश-चन्द्रम् असिं रुद्रः शत-चन्द्रं तथाम्बिका सोमो ऽमृतमयान् अश्वांस् त्वष्टा रूपाश्रयं रथम्
daśa-candram asiṃ rudraḥ śata-candraṃ tathāmbikā somo 'mṛtamayān aśvāṃs tvaṣṭā rūpāśrayaṃ ratham
Sanskrit only: no published translation is held for this verse.
अग्निर् आज-गवं चापं सूर्यो रश्मिमयान् इषून् भूः पादुके योगमय्यौ द्यौः पुष्पावलिम् अन्वहम्
agnir āja-gavaṃ cāpaṃ sūryo raśmimayān iṣūn bhūḥ pāduke yogamayyau dyauḥ puṣpāvalim anvaham
Sanskrit only: no published translation is held for this verse.
नाट्यं सुगीतं वादित्रम् अन्तर्धानं च खेचराः ऋषयश् चाशिषः सत्याः समुद्रः शङ्खम् आत्मजम्
nāṭyaṃ sugītaṃ vāditram antardhānaṃ ca khecarāḥ ṛṣayaś cāśiṣaḥ satyāḥ samudraḥ śaṅkham ātmajam
Sanskrit only: no published translation is held for this verse.
सिन्धवः पर्वता नद्यो रथ-वीथीर् महात्मनः सूतो ऽथ मागधो वन्दी तं स्तोतुम् उपतस्थिरे
sindhavaḥ parvatā nadyo ratha-vīthīr mahātmanaḥ sūto 'tha māgadho vandī taṃ stotum upatasthire
Sanskrit only: no published translation is held for this verse.
स्तावकांस् तान् अभिप्रेत्य पृथुर् वैन्यः प्रतापवान् मेघ-निर्ह्रादया वाचा प्रहसन्न् इदम् अब्रवीत्
stāvakāṃs tān abhipretya pṛthur vainyaḥ pratāpavān megha-nirhrādayā vācā prahasann idam abravīt
Sanskrit only: no published translation is held for this verse.
पृथुर् उवाच भोः सूत हे मागध सौम्य वन्दिन् लोके ऽधुनास्पष्ट-गुणस्य मे स्यात् किम् आश्रयो मे स्तव एष योज्यतां मा मय्य् अभूवन् वितथा गिरो वः
pṛthur uvāca bhoḥ sūta he māgadha saumya vandin loke 'dhunāspaṣṭa-guṇasya me syāt kim āśrayo me stava eṣa yojyatāṃ mā mayy abhūvan vitathā giro vaḥ
Sanskrit only: no published translation is held for this verse.
तस्मात् परोक्षे ऽस्मद्-उपश्रुतान्य् अलं करिष्यथ स्तोत्रम् अपीच्य-वाचः सत्य् उत्तमश्लोक-गुणानुवादे जुगुप्सितं न स्तवयन्ति सभ्याः
tasmāt parokṣe 'smad-upaśrutāny alaṃ kariṣyatha stotram apīcya-vācaḥ saty uttamaśloka-guṇānuvāde jugupsitaṃ na stavayanti sabhyāḥ
Sanskrit only: no published translation is held for this verse.
महद्-गुणान् आत्मनि कर्तुम् ईशः कः स्तावकैः स्तावयते ऽसतो ऽपि ते ऽस्याभविष्यन्न् इति विप्रलब्धो जनावहासं कुमतिर् न वेद
mahad-guṇān ātmani kartum īśaḥ kaḥ stāvakaiḥ stāvayate 'sato 'pi te 'syābhaviṣyann iti vipralabdho janāvahāsaṃ kumatir na veda
Sanskrit only: no published translation is held for this verse.
प्रभवो ह्य् आत्मनः स्तोत्रंजुगुप्सन्त्य् अपि विश्रुताः ह्रीमन्तः परमोदाराः पौरुषं वा विगर्हितम्
prabhavo hy ātmanaḥ stotraṃjugupsanty api viśrutāḥ hrīmantaḥ paramodārāḥ pauruṣaṃ vā vigarhitam
Sanskrit only: no published translation is held for this verse.
वयं त्व् अविदिता लोके सूताद्यापि वरीमभिः कर्मभिः कथम् आत्मानं गापयिष्याम बालवत्
vayaṃ tv aviditā loke sūtādyāpi varīmabhiḥ karmabhiḥ katham ātmānaṃ gāpayiṣyāma bālavat
Sanskrit only: no published translation is held for this verse.