Library·Bhāgavata Purāṇa·4·4.5
मैत्रेय उवाच भवो भवान्या निधनं प्रजापतेर् असत्-कृताया अवगम्य नारदात् स्व-पार्षद-सैन्यं च तद्-अध्वरर्भुभिर् विद्रावितं क्रोधम् अपारम् आदधे
maitreya uvāca bhavo bhavānyā nidhanaṃ prajāpater asat-kṛtāyā avagamya nāradāt sva-pārṣada-sainyaṃ ca tad-adhvararbhubhir vidrāvitaṃ krodham apāram ādadhe
Sanskrit only: no published translation is held for this verse.
क्रुद्धः सुदष्टौष्ठ-पुटः स धूर्-जटिर् जटां तडिद्-वह्नि-सटोग्र-रोचिषम् उत्कृत्य रुद्रः सहसोत्थितो हसन् गम्भीर-नादो विससर्ज तां भुवि
kruddhaḥ sudaṣṭauṣṭha-puṭaḥ sa dhūr-jaṭir jaṭāṃ taḍid-vahni-saṭogra-rociṣam utkṛtya rudraḥ sahasotthito hasan gambhīra-nādo visasarja tāṃ bhuvi
Sanskrit only: no published translation is held for this verse.
ततो ऽतिकायस् तनुवा स्पृशन् दिवं सहस्र-बाहुर् घन-रुक् त्रि-सूर्य-दृक् कराल-दंष्ट्रो ज्वलद्-अग्नि-मूर्धजः कपाल-माली विविधोद्यतायुधः
tato 'tikāyas tanuvā spṛśan divaṃ sahasra-bāhur ghana-ruk tri-sūrya-dṛk karāla-daṃṣṭro jvalad-agni-mūrdhajaḥ kapāla-mālī vividhodyatāyudhaḥ
Sanskrit only: no published translation is held for this verse.
तं किं करोमीति गृणन्तम् आह बद्धाञ्जलिं भगवान् भूत-नाथः दक्षं स-यज्ञं जहि मद्-भटानां त्वम् अग्रणी रुद्र भटांशको मे
taṃ kiṃ karomīti gṛṇantam āha baddhāñjaliṃ bhagavān bhūta-nāthaḥ dakṣaṃ sa-yajñaṃ jahi mad-bhaṭānāṃ tvam agraṇī rudra bhaṭāṃśako me
Sanskrit only: no published translation is held for this verse.
आज्ञप्त एवं कुपितेन मन्युना स देव-देवं परिचक्रमे विभुम् मेने-तदात्मानम् असङ्ग-रंहसा महीयसां तात सहः सहिष्णुम्
ājñapta evaṃ kupitena manyunā sa deva-devaṃ paricakrame vibhum mene-tadātmānam asaṅga-raṃhasā mahīyasāṃ tāta sahaḥ sahiṣṇum
Sanskrit only: no published translation is held for this verse.
अन्वीयमानः स तु रुद्र-पार्षदैर् भृशं नदद्भिर् व्यनदत् सुभैरवम् उद्यम्य शूलं जगद्-अन्तकान्तकं सम्प्राद्रवद् घोषण-भूषणाङ्घ्रिः
anvīyamānaḥ sa tu rudra-pārṣadair bhṛśaṃ nadadbhir vyanadat subhairavam udyamya śūlaṃ jagad-antakāntakaṃ samprādravad ghoṣaṇa-bhūṣaṇāṅghriḥ
Sanskrit only: no published translation is held for this verse.
अथर्त्विजो यजमानः सदस्याः ककुभ्य् उदीच्यां प्रसमीक्ष्य रेणुम् तमः किम् एतत् कुत एतद् रजो ऽभूद् इति द्विजा द्विज-पत्न्यश् च दध्युः
athartvijo yajamānaḥ sadasyāḥ kakubhy udīcyāṃ prasamīkṣya reṇum tamaḥ kim etat kuta etad rajo 'bhūd iti dvijā dvija-patnyaś ca dadhyuḥ
Sanskrit only: no published translation is held for this verse.
वाता न वान्ति न हि सन्ति दस्यवः प्राचीन-बर्हिर् जीवति होग्र-दण्डः गावो न काल्यन्त इदं कुतो रजो लोको ऽधुना किं प्रलयाय कल्पते
vātā na vānti na hi santi dasyavaḥ prācīna-barhir jīvati hogra-daṇḍaḥ gāvo na kālyanta idaṃ kuto rajo loko 'dhunā kiṃ pralayāya kalpate
Sanskrit only: no published translation is held for this verse.
प्रसूति-मिश्राः स्त्रिय उद्विग्न-चित्ता ऊचुर् विपाको वृजिनस्यैव तस्य यत् पश्यन्तीनां दुहितॄणां प्रजेशः सुतां सतीम् अवदध्याव् अनागाम्
prasūti-miśrāḥ striya udvigna-cittā ūcur vipāko vṛjinasyaiva tasya yat paśyantīnāṃ duhitṝṇāṃ prajeśaḥ sutāṃ satīm avadadhyāv anāgām
Sanskrit only: no published translation is held for this verse.
यस् त्व् अन्त-काले व्युप्त-जटा-कलापः स्व-शूल-सूच्य्-अर्पित-दिग्-गजेन्द्रः वितत्य नृत्यत्य् उदितास्त्र-दोर्-ध्वजान् उच्चाट्ट-हास-स्तनयित्नु-भिन्न-दिक्
yas tv anta-kāle vyupta-jaṭā-kalāpaḥ sva-śūla-sūcy-arpita-dig-gajendraḥ vitatya nṛtyaty uditāstra-dor-dhvajān uccāṭṭa-hāsa-stanayitnu-bhinna-dik
Sanskrit only: no published translation is held for this verse.
अमर्षयित्वा तम् असह्य-तेजसं मन्यु-प्लुतं दुर्निरीक्ष्यं भ्रु-कुट्या कराल-दंष्ट्राभिर् उदस्त-भागणं स्यात् स्वस्ति किं कोपयतो विधातुः
amarṣayitvā tam asahya-tejasaṃ manyu-plutaṃ durnirīkṣyaṃ bhru-kuṭyā karāla-daṃṣṭrābhir udasta-bhāgaṇaṃ syāt svasti kiṃ kopayato vidhātuḥ
Sanskrit only: no published translation is held for this verse.
बह्व् एवम् उद्विग्न-दृशोच्यमाने जनेन दक्षस्य मुहुर् महात्मनः उत्पेतुर् उत्पाततमाः सहस्रशो भयावहा दिवि भूमौ च पर्यक्
bahv evam udvigna-dṛśocyamāne janena dakṣasya muhur mahātmanaḥ utpetur utpātatamāḥ sahasraśo bhayāvahā divi bhūmau ca paryak
Sanskrit only: no published translation is held for this verse.
तावत् स रुद्रानुचरैर् महा-मखो नानायुधैर् वामनकैर् उदायुधैः पिङ्गैः पिशङ्गैर् मकरोदराननैः पर्याद्रवद्भिर् विदुरान्वरुध्यत
tāvat sa rudrānucarair mahā-makho nānāyudhair vāmanakair udāyudhaiḥ piṅgaiḥ piśaṅgair makarodarānanaiḥ paryādravadbhir vidurānvarudhyata
Sanskrit only: no published translation is held for this verse.
केचिद् बभञ्जुः प्राग्-वंशं पत्नी-शालां तथापरे सद आग्नीध्र-शालां च तद्-विहारं महानसम्
kecid babhañjuḥ prāg-vaṃśaṃ patnī-śālāṃ tathāpare sada āgnīdhra-śālāṃ ca tad-vihāraṃ mahānasam
Sanskrit only: no published translation is held for this verse.
रुरुजुर् यज्ञ-पात्राणि तथैके ऽग्नीन् अनाशयन् कुण्डेष्व् अमूत्रयन् केचिद् बिभिदुर् वेदि-मेखलाः
rurujur yajña-pātrāṇi tathaike 'gnīn anāśayan kuṇḍeṣv amūtrayan kecid bibhidur vedi-mekhalāḥ
Sanskrit only: no published translation is held for this verse.
अबाधन्त मुनीन् अन्ये एके पत्नीर् अतर्जयन् अपरे जगृहुर् देवान् प्रत्यासन्नान् पलायितान्
abādhanta munīn anye eke patnīr atarjayan apare jagṛhur devān pratyāsannān palāyitān
Sanskrit only: no published translation is held for this verse.
भृगुं बबन्ध मणिमान् वीरभद्रः प्रजापतिम् चण्डेशः पूषणं देवं भगं नन्दीश्वरो ऽग्रहीत्
bhṛguṃ babandha maṇimān vīrabhadraḥ prajāpatim caṇḍeśaḥ pūṣaṇaṃ devaṃ bhagaṃ nandīśvaro 'grahīt
Sanskrit only: no published translation is held for this verse.
सर्व एवर्त्विजो दृष्ट्वा सदस्याः स-दिवौकसः तैर् अर्द्यमानाः सुभृशं ग्रावभिर् नैकधाद्रवन्
sarva evartvijo dṛṣṭvā sadasyāḥ sa-divaukasaḥ tair ardyamānāḥ subhṛśaṃ grāvabhir naikadhādravan
Sanskrit only: no published translation is held for this verse.
जुह्वतः स्रुव-हस्तस्य श्मश्रूणि भगवान् भवः भृगोर् लुलुञ्चे सदसि यो ऽहसच् छ्मश्रु दर्शयन्
juhvataḥ sruva-hastasya śmaśrūṇi bhagavān bhavaḥ bhṛgor luluñce sadasi yo 'hasac chmaśru darśayan
Sanskrit only: no published translation is held for this verse.
भगस्य नेत्रे भगवान् पातितस्य रुषा भुवि उज्जहार सद-स्थो ऽक्ष्णा यः शपन्तम् असूसुचत्
bhagasya netre bhagavān pātitasya ruṣā bhuvi ujjahāra sada-stho 'kṣṇā yaḥ śapantam asūsucat
Sanskrit only: no published translation is held for this verse.
पूष्णो ह्य् अपातयद् दन्तान् कालिङ्गस्य यथा बलः शप्यमाने गरिमणि यो ऽहसद् दर्शयन् दतः
pūṣṇo hy apātayad dantān kāliṅgasya yathā balaḥ śapyamāne garimaṇi yo 'hasad darśayan dataḥ
Sanskrit only: no published translation is held for this verse.
आक्रम्योरसि दक्षस्य शित-धारेण हेतिना छिन्दन्न् अपि तद् उद्धर्तुं नाशक्नोत् त्र्यम्बकस् तदा
ākramyorasi dakṣasya śita-dhāreṇa hetinā chindann api tad uddhartuṃ nāśaknot tryambakas tadā
Sanskrit only: no published translation is held for this verse.
शस्त्रैर् अस्त्रान्वितैर् एवम् अनिर्भिन्न-त्वचं हरः विस्मयं परम् आपन्नो दध्यौ पशुपतिश् चिरम्
śastrair astrānvitair evam anirbhinna-tvacaṃ haraḥ vismayaṃ param āpanno dadhyau paśupatiś ciram
Sanskrit only: no published translation is held for this verse.
दृष्ट्वा संज्ञपनं योगं पशूनां स पतिर् मखे यजमान-पशोः कस्य कायात् तेनाहरच् छिरः
dṛṣṭvā saṃjñapanaṃ yogaṃ paśūnāṃ sa patir makhe yajamāna-paśoḥ kasya kāyāt tenāharac chiraḥ
Sanskrit only: no published translation is held for this verse.
साधु-वादस् तदा तेषां कर्म तत् तस्य पश्यताम् भूत-प्रेत-पिशाचानां अन्येषां तद्-विपर्ययः
sādhu-vādas tadā teṣāṃ karma tat tasya paśyatām bhūta-preta-piśācānāṃ anyeṣāṃ tad-viparyayaḥ
Sanskrit only: no published translation is held for this verse.
जुहावैतच् छिरस् तस्मिन् दक्षिणाग्नाव् अमर्षितः तद्-देव-यजनं दग्ध्वा प्रातिष्ठद् गुह्यकालयम्
juhāvaitac chiras tasmin dakṣiṇāgnāv amarṣitaḥ tad-deva-yajanaṃ dagdhvā prātiṣṭhad guhyakālayam
Sanskrit only: no published translation is held for this verse.