Bhāgavata Purāṇa 6.11

श्रीशुक उवाच त एवं शंसतो धर्मं वचः पत्युरचेतसः नैवागृह्णन्त सम्भ्रान्ताः पलायनपरा नृप

śrīśuka uvāca ta evaṃ śaṃsato dharmaṃ vacaḥ patyuracetasaḥ naivāgṛhṇanta sambhrāntāḥ palāyanaparā nṛpa

Sanskrit only: no published translation is held for this verse.

विशीर्यमाणां पृतनामासुरीमसुरर्षभः कालानुकूलैस्त्रिदशैः काल्यमानामनाथवत्

viśīryamāṇāṃ pṛtanāmāsurīmasurarṣabhaḥ kālānukūlaistridaśaiḥ kālyamānāmanāthavat

Sanskrit only: no published translation is held for this verse.

दृष्ट्वातप्यत सङ्क्रुद्ध इन्द्रशत्रुरमर्षितः तान् निवार्यौजसा राजन् निर्भर्त्स्येदमुवाच ह

dṛṣṭvātapyata saṅkruddha indraśatruramarṣitaḥ tān nivāryaujasā rājan nirbhartsyedamuvāca ha

Sanskrit only: no published translation is held for this verse.

किं व उच्चरितैर्मातुर्धावद्भिः पृष्ठतो हतैः न हि भीतवधः श्लाघ्यो न स्वर्ग्यः शूरमानिनाम्

kiṃ va uccaritairmāturdhāvadbhiḥ pṛṣṭhato hataiḥ na hi bhītavadhaḥ ślāghyo na svargyaḥ śūramāninām

Sanskrit only: no published translation is held for this verse.

यदि वः प्रधने श्रद्धा सारं वा क्षुल्लका हृदि अग्रे तिष्ठत मात्रं मे न चेद्ग्राम्यसुखे स्पृहा

yadi vaḥ pradhane śraddhā sāraṃ vā kṣullakā hṛdi agre tiṣṭhata mātraṃ me na cedgrāmyasukhe spṛhā

Sanskrit only: no published translation is held for this verse.

एवं सुरगणान् क्रुद्धो भीषयन् वपुषा रिपून् व्यनदत् सुमहाप्राणो येन लोका विचेतसः

evaṃ suragaṇān kruddho bhīṣayan vapuṣā ripūn vyanadat sumahāprāṇo yena lokā vicetasaḥ

Sanskrit only: no published translation is held for this verse.

तेन देवगणाः सर्वे वृत्रविस्फोटनेन वै निपेतुर्मूर्च्छिता भूमौ यथैवाशनिना हताः

tena devagaṇāḥ sarve vṛtravisphoṭanena vai nipeturmūrcchitā bhūmau yathaivāśaninā hatāḥ

Sanskrit only: no published translation is held for this verse.

ममर्द पद्भ्यां सुरसैन्यमातुरं निमीलिताक्षं रणरङ्गदुर्मदः गां कम्पयन्नुद्यतशूल ओजसा नालं वनं यूथपतिर्यथोन्मदः

mamarda padbhyāṃ surasainyamāturaṃ nimīlitākṣaṃ raṇaraṅgadurmadaḥ gāṃ kampayannudyataśūla ojasā nālaṃ vanaṃ yūthapatiryathonmadaḥ

Sanskrit only: no published translation is held for this verse.

विलोक्य तं वज्रधरो ऽत्यमर्षितः स्वशत्रवे ऽभिद्रवते महागदाम् चिक्षेप तामापततीं सुदुःसहां जग्राह वामेन करेण लीलया

vilokya taṃ vajradharo 'tyamarṣitaḥ svaśatrave 'bhidravate mahāgadām cikṣepa tāmāpatatīṃ suduḥsahāṃ jagrāha vāmena kareṇa līlayā

Sanskrit only: no published translation is held for this verse.

स इन्द्रशत्रुः कुपितो भृशं तया महेन्द्रवाहं गदयोरुविक्रमः जघान कुम्भस्थल उन्नदन् मृधे तत् कर्म सर्वे समपूजयन् नृप

sa indraśatruḥ kupito bhṛśaṃ tayā mahendravāhaṃ gadayoruvikramaḥ jaghāna kumbhasthala unnadan mṛdhe tat karma sarve samapūjayan nṛpa

Sanskrit only: no published translation is held for this verse.

ऐरावतो वृत्रगदाभिमृष्टो विघूर्णितो ऽद्रिः कुलिशाहतो यथा अपासरद्भिन्नमुखः सहेन्द्रो मुञ्चन्नसृक् सप्तधनुर्भृशार्तः

airāvato vṛtragadābhimṛṣṭo vighūrṇito 'driḥ kuliśāhato yathā apāsaradbhinnamukhaḥ sahendro muñcannasṛk saptadhanurbhṛśārtaḥ

Sanskrit only: no published translation is held for this verse.

न सन्नवाहाय विषण्णचेतसे प्रायुङ्क्त भूयः स गदां महात्मा इन्द्रो ऽमृतस्यन्दिकराभिमर्श वीतव्यथक्षतवाहो ऽवतस्थे

na sannavāhāya viṣaṇṇacetase prāyuṅkta bhūyaḥ sa gadāṃ mahātmā indro 'mṛtasyandikarābhimarśa vītavyathakṣatavāho 'vatasthe

Sanskrit only: no published translation is held for this verse.

स तं नृपेन्द्राहवकाम्यया रिपुं वज्रायुधं भ्रातृहणं विलोक्य स्मरंश्च तत्कर्म नृशंसमंहः शोकेन मोहेन हसन् जगाद

sa taṃ nṛpendrāhavakāmyayā ripuṃ vajrāyudhaṃ bhrātṛhaṇaṃ vilokya smaraṃśca tatkarma nṛśaṃsamaṃhaḥ śokena mohena hasan jagāda

Sanskrit only: no published translation is held for this verse.

श्रीवृत्र उवाच दिष्ट्या भवान् मे समवस्थितो रिपुर् यो ब्रह्महा गुरुहा भ्रातृहा च दिष्ट्यानृणो ऽद्याहमसत्तम त्वया मच्छूलनिर्भिन्नदृषद्धृदाचिरात्

śrīvṛtra uvāca diṣṭyā bhavān me samavasthito ripur yo brahmahā guruhā bhrātṛhā ca diṣṭyānṛṇo 'dyāhamasattama tvayā macchūlanirbhinnadṛṣaddhṛdācirāt

Sanskrit only: no published translation is held for this verse.

यो नो ऽग्रजस्यात्मविदो द्विजातेर् गुरोरपापस्य च दीक्षितस्य विश्रभ्य खड्गेन शिरांस्य् अवृश्चत् पशोरिवाकरुणः स्वर्गकामः

yo no 'grajasyātmavido dvijāter gurorapāpasya ca dīkṣitasya viśrabhya khaḍgena śirāṃsy avṛścat paśorivākaruṇaḥ svargakāmaḥ

Sanskrit only: no published translation is held for this verse.

श्रीह्रीदयाकीर्तिभिरुज्झितं त्वां स्वकर्मणा पुरुषादैश्च गर्ह्यम् कृच्छ्रेण मच्छूलविभिन्नदेहम् अस्पृष्टवह्निं समदन्ति गृध्राः

śrīhrīdayākīrtibhirujjhitaṃ tvāṃ svakarmaṇā puruṣādaiśca garhyam kṛcchreṇa macchūlavibhinnadeham aspṛṣṭavahniṃ samadanti gṛdhrāḥ

Sanskrit only: no published translation is held for this verse.

अन्ये ऽनु ये त्वेह नृशंसमज्ञा यदुद्यतास्त्राः प्रहरन्ति मह्यम् तैर्भूतनाथान् सगणान् निशात त्रिशूलनिर्भिन्नगलैर्यजामि

anye 'nu ye tveha nṛśaṃsamajñā yadudyatāstrāḥ praharanti mahyam tairbhūtanāthān sagaṇān niśāta triśūlanirbhinnagalairyajāmi

Sanskrit only: no published translation is held for this verse.

अथो हरे मे कुलिशेन वीर हर्ता प्रमथ्यैव शिरो यदीह तत्रानृणो भूतबलिं विधाय मनस्विनां पादरजः प्रपत्स्ये

atho hare me kuliśena vīra hartā pramathyaiva śiro yadīha tatrānṛṇo bhūtabaliṃ vidhāya manasvināṃ pādarajaḥ prapatsye

Sanskrit only: no published translation is held for this verse.

सुरेश कस्मान् न हिनोषि वज्रं पुरः स्थिते वैरिणि मय्य् अमोघम् मा संशयिष्ठा न गदेव वज्रः स्यान् निष्फलः कृपणार्थेव याच्ञा

sureśa kasmān na hinoṣi vajraṃ puraḥ sthite vairiṇi mayy amogham mā saṃśayiṣṭhā na gadeva vajraḥ syān niṣphalaḥ kṛpaṇārtheva yācñā

Sanskrit only: no published translation is held for this verse.

नन्वेष वज्रस्तव शक्र तेजसा हरेर्दधीचेस्तपसा च तेजितः तेनैव शत्रुं जहि विष्णुयन्त्रितो यतो हरिर्विजयः श्रीर्गुणास्ततः

nanveṣa vajrastava śakra tejasā harerdadhīcestapasā ca tejitaḥ tenaiva śatruṃ jahi viṣṇuyantrito yato harirvijayaḥ śrīrguṇāstataḥ

Sanskrit only: no published translation is held for this verse.

अहं समाधाय मनो यथाह नः सङ्कर्षणस्तच्चरणारविन्दे त्वद्वज्ररंहोलुलितग्राम्यपाशो गतिं मुनेर्याम्य् अपविद्धलोकः

ahaṃ samādhāya mano yathāha naḥ saṅkarṣaṇastaccaraṇāravinde tvadvajraraṃholulitagrāmyapāśo gatiṃ muneryāmy apaviddhalokaḥ

Sanskrit only: no published translation is held for this verse.

पुंसां किलैकान्तधियां स्वकानां याः सम्पदो दिवि भूमौ रसायाम् न राति यद्द्वेष उद्वेग आधिर् मदः कलिर्व्यसनं सम्प्रयासः

puṃsāṃ kilaikāntadhiyāṃ svakānāṃ yāḥ sampado divi bhūmau rasāyām na rāti yaddveṣa udvega ādhir madaḥ kalirvyasanaṃ samprayāsaḥ

Sanskrit only: no published translation is held for this verse.

त्रैवर्गिकायासविघातमस्मत् पतिर्विधत्ते पुरुषस्य शक्र ततो ऽनुमेयो भगवत्प्रसादो यो दुर्लभो ऽकिञ्चनगोचरो ऽन्यैः

traivargikāyāsavighātamasmat patirvidhatte puruṣasya śakra tato 'numeyo bhagavatprasādo yo durlabho 'kiñcanagocaro 'nyaiḥ

Sanskrit only: no published translation is held for this verse.

अहं हरे तव पादैकमूल दासानुदासो भवितास्मि भूयः मनः स्मरेतासुपतेर्गुणांस्ते गृणीत वाक् कर्म करोतु कायः

ahaṃ hare tava pādaikamūla dāsānudāso bhavitāsmi bhūyaḥ manaḥ smaretāsupaterguṇāṃste gṛṇīta vāk karma karotu kāyaḥ

Sanskrit only: no published translation is held for this verse.

न नाकपृष्ठं न च पारमेष्ठ्यं न सार्वभौमं न रसाधिपत्यम् न योगसिद्धीरपुनर्भवं वा समञ्जस त्वा विरहय्य काङ्क्षे

na nākapṛṣṭhaṃ na ca pārameṣṭhyaṃ na sārvabhaumaṃ na rasādhipatyam na yogasiddhīrapunarbhavaṃ vā samañjasa tvā virahayya kāṅkṣe

Sanskrit only: no published translation is held for this verse.

अजातपक्षा इव मातरं खगाः स्तन्यं यथा वत्सतराः क्षुधार्ताः प्रियं प्रियेव व्युषितं विषण्णा मनो ऽरविन्दाक्ष दिदृक्षते त्वाम्

ajātapakṣā iva mātaraṃ khagāḥ stanyaṃ yathā vatsatarāḥ kṣudhārtāḥ priyaṃ priyeva vyuṣitaṃ viṣaṇṇā mano 'ravindākṣa didṛkṣate tvām

Sanskrit only: no published translation is held for this verse.

ममोत्तमश्लोकजनेषु सख्यं संसारचक्रे भ्रमतः स्वकर्मभिः त्वन्माययात्मात्मजदारगेहेष्व् आसक्तचित्तस्य न नाथ भूयात्

mamottamaślokajaneṣu sakhyaṃ saṃsāracakre bhramataḥ svakarmabhiḥ tvanmāyayātmātmajadārageheṣv āsaktacittasya na nātha bhūyāt

Sanskrit only: no published translation is held for this verse.