Bhāgavata Purāṇa 6.15

श्रीशुक उवाच ऊचतुर्मृतकोपान्ते पतितं मृतकोपमम् शोकाभिभूतं राजानं बोधयन्तौ सदुक्तिभिः

śrīśuka uvāca ūcaturmṛtakopānte patitaṃ mṛtakopamam śokābhibhūtaṃ rājānaṃ bodhayantau saduktibhiḥ

Sanskrit only: no published translation is held for this verse.

को ऽयं स्यात् तव राजेन्द्र भवान् यमनुशोचति त्वं चास्य कतमः सृष्टौ पुरेदानीमतः परम्

ko 'yaṃ syāt tava rājendra bhavān yamanuśocati tvaṃ cāsya katamaḥ sṛṣṭau puredānīmataḥ param

Sanskrit only: no published translation is held for this verse.

यथा प्रयान्ति संयान्ति स्रोतोवेगेन बालुकाः संयुज्यन्ते वियुज्यन्ते तथा कालेन देहिनः

yathā prayānti saṃyānti srotovegena bālukāḥ saṃyujyante viyujyante tathā kālena dehinaḥ

Sanskrit only: no published translation is held for this verse.

यथा धानासु वै धाना भवन्ति न भवन्ति च एवं भूतानि भूतेषु चोदितानीशमायया

yathā dhānāsu vai dhānā bhavanti na bhavanti ca evaṃ bhūtāni bhūteṣu coditānīśamāyayā

Sanskrit only: no published translation is held for this verse.

वयं च त्वं च ये चेमे तुल्यकालाश्चराचराः जन्ममृत्योर्यथा पश्चात् प्राङ् नैवमधुनापि भोः

vayaṃ ca tvaṃ ca ye ceme tulyakālāścarācarāḥ janmamṛtyoryathā paścāt prāṅ naivamadhunāpi bhoḥ

Sanskrit only: no published translation is held for this verse.

भूतैर्भूतानि भूतेशः सृजत्य् अवति हन्ति च आत्मसृष्टैरस्वतन्त्रैरनपेक्षो ऽपि बालवत्

bhūtairbhūtāni bhūteśaḥ sṛjaty avati hanti ca ātmasṛṣṭairasvatantrairanapekṣo 'pi bālavat

Sanskrit only: no published translation is held for this verse.

देहेन देहिनो राजन् देहाद्देहो ऽभिजायते बीजादेव यथा बीजं देह्य् अर्थ इव शाश्वतः

dehena dehino rājan dehāddeho 'bhijāyate bījādeva yathā bījaṃ dehy artha iva śāśvataḥ

Sanskrit only: no published translation is held for this verse.

देहदेहिविभागो ऽयमविवेककृतः पुरा जातिव्यक्तिविभागो ऽयं यथा वस्तुनि कल्पितः

dehadehivibhāgo 'yamavivekakṛtaḥ purā jātivyaktivibhāgo 'yaṃ yathā vastuni kalpitaḥ

Sanskrit only: no published translation is held for this verse.

श्रीशुक उवाच एवमाश्वासितो राजा चित्रकेतुर्द्विजोक्तिभिः विमृज्य पाणिना वक्त्रमाधिम्लानमभाषत

śrīśuka uvāca evamāśvāsito rājā citraketurdvijoktibhiḥ vimṛjya pāṇinā vaktramādhimlānamabhāṣata

Sanskrit only: no published translation is held for this verse.

श्रीराजोवाच कौ युवां ज्ञानसम्पन्नौ महिष्ठौ च महीयसाम् अवधूतेन वेषेण गूढाविह समागतौ

śrīrājovāca kau yuvāṃ jñānasampannau mahiṣṭhau ca mahīyasām avadhūtena veṣeṇa gūḍhāviha samāgatau

Sanskrit only: no published translation is held for this verse.

चरन्ति ह्य् अवनौ कामं ब्राह्मणा भगवत्प्रियाः मादृशां ग्राम्यबुद्धीनां बोधायोन्मत्तलिङ्गिनः

caranti hy avanau kāmaṃ brāhmaṇā bhagavatpriyāḥ mādṛśāṃ grāmyabuddhīnāṃ bodhāyonmattaliṅginaḥ

Sanskrit only: no published translation is held for this verse.

कुमारो नारद ऋभुरङ्गिरा देवलो ऽसितः अपान्तरतमा व्यासो मार्कण्डेयो ऽथ गौतमः

kumāro nārada ṛbhuraṅgirā devalo 'sitaḥ apāntaratamā vyāso mārkaṇḍeyo 'tha gautamaḥ

Sanskrit only: no published translation is held for this verse.

वसिष्ठो भगवान् रामः कपिलो बादरायणिः दुर्वासा याज्ञवल्क्यश्च जातुकर्णस्तथारुणिः

vasiṣṭho bhagavān rāmaḥ kapilo bādarāyaṇiḥ durvāsā yājñavalkyaśca jātukarṇastathāruṇiḥ

Sanskrit only: no published translation is held for this verse.

रोमशश्च्यवनो दत्त आसुरिः सपतञ्जलिः ऋषिर्वेदशिरा धौम्यो मुनिः पञ्चशिखस्तथा

romaśaścyavano datta āsuriḥ sapatañjaliḥ ṛṣirvedaśirā dhaumyo muniḥ pañcaśikhastathā

Sanskrit only: no published translation is held for this verse.

हिरण्यनाभः कौशल्यः श्रुतदेव ऋतध्वजः एते परे च सिद्धेशाश्चरन्ति ज्ञानहेतवः

hiraṇyanābhaḥ kauśalyaḥ śrutadeva ṛtadhvajaḥ ete pare ca siddheśāścaranti jñānahetavaḥ

Sanskrit only: no published translation is held for this verse.

तस्माद्युवां ग्राम्यपशोर्मम मूढधियः प्रभू अन्धे तमसि मग्नस्य ज्ञानदीप उदीर्यताम्

tasmādyuvāṃ grāmyapaśormama mūḍhadhiyaḥ prabhū andhe tamasi magnasya jñānadīpa udīryatām

Sanskrit only: no published translation is held for this verse.

श्रीअङ्गिरा उवाच अहं ते पुत्रकामस्य पुत्रदो ऽस्म्य् अङ्गिरा नृप एष ब्रह्मसुतः साक्षान् नारदो भगवान् ऋषिः

śrīaṅgirā uvāca ahaṃ te putrakāmasya putrado 'smy aṅgirā nṛpa eṣa brahmasutaḥ sākṣān nārado bhagavān ṛṣiḥ

Sanskrit only: no published translation is held for this verse.

इत्थं त्वां पुत्रशोकेन मग्नं तमसि दुस्तरे अतदर्हमनुस्मृत्य महापुरुषगोचरम्

itthaṃ tvāṃ putraśokena magnaṃ tamasi dustare atadarhamanusmṛtya mahāpuruṣagocaram

Sanskrit only: no published translation is held for this verse.

अनुग्रहाय भवतः प्राप्तावावामिह प्रभो ब्रह्मण्यो भगवद्भक्तो नावासादितुमर्हसि

anugrahāya bhavataḥ prāptāvāvāmiha prabho brahmaṇyo bhagavadbhakto nāvāsāditumarhasi

Sanskrit only: no published translation is held for this verse.

तदैव ते परं ज्ञानं ददामि गृहमागतः ज्ञात्वान्याभिनिवेशं ते पुत्रमेव ददाम्य् अहम्

tadaiva te paraṃ jñānaṃ dadāmi gṛhamāgataḥ jñātvānyābhiniveśaṃ te putrameva dadāmy aham

Sanskrit only: no published translation is held for this verse.

अधुना पुत्रिणां तापो भवतैवानुभूयते एवं दारा गृहा रायो विविधैश्वर्यसम्पदः

adhunā putriṇāṃ tāpo bhavataivānubhūyate evaṃ dārā gṛhā rāyo vividhaiśvaryasampadaḥ

Sanskrit only: no published translation is held for this verse.

शब्दादयश्च विषयाश्चला राज्यविभूतयः मही राज्यं बलं कोषो भृत्यामात्यसुहृज्जनाः

śabdādayaśca viṣayāścalā rājyavibhūtayaḥ mahī rājyaṃ balaṃ koṣo bhṛtyāmātyasuhṛjjanāḥ

Sanskrit only: no published translation is held for this verse.

सर्वे ऽपि शूरसेनेमे शोकमोहभयार्तिदाः गन्धर्वनगरप्रख्याः स्वप्नमायामनोरथाः

sarve 'pi śūraseneme śokamohabhayārtidāḥ gandharvanagaraprakhyāḥ svapnamāyāmanorathāḥ

Sanskrit only: no published translation is held for this verse.

दृश्यमाना विनार्थेन न दृश्यन्ते मनोभवाः कर्मभिर्ध्यायतो नाना कर्माणि मनसो ऽभवन्

dṛśyamānā vinārthena na dṛśyante manobhavāḥ karmabhirdhyāyato nānā karmāṇi manaso 'bhavan

Sanskrit only: no published translation is held for this verse.

अयं हि देहिनो देहो द्रव्यज्ञानक्रियात्मकः देहिनो विविधक्लेश सन्तापकृदुदाहृतः

ayaṃ hi dehino deho dravyajñānakriyātmakaḥ dehino vividhakleśa santāpakṛdudāhṛtaḥ

Sanskrit only: no published translation is held for this verse.

तस्मात् स्वस्थेन मनसा विमृश्य गतिमात्मनः द्वैते ध्रुवार्थविश्रम्भं त्यजोपशममाविश

tasmāt svasthena manasā vimṛśya gatimātmanaḥ dvaite dhruvārthaviśrambhaṃ tyajopaśamamāviśa

Sanskrit only: no published translation is held for this verse.

श्रीनारद उवाच एतां मन्त्रोपनिषदं प्रतीच्छ प्रयतो मम यां धारयन् सप्तरात्राद्द्रष्टा सङ्कर्षणं विभुम्

śrīnārada uvāca etāṃ mantropaniṣadaṃ pratīccha prayato mama yāṃ dhārayan saptarātrāddraṣṭā saṅkarṣaṇaṃ vibhum

Sanskrit only: no published translation is held for this verse.

यत्पादमूलमुपसृत्य नरेन्द्र पूर्वे शर्वादयो भ्रममिमं द्वितयं विसृज्य सद्यस्तदीयमतुलानधिकं महित्वं प्रापुर्भवान् अपि परं न चिरादुपैति

yatpādamūlamupasṛtya narendra pūrve śarvādayo bhramamimaṃ dvitayaṃ visṛjya sadyastadīyamatulānadhikaṃ mahitvaṃ prāpurbhavān api paraṃ na cirādupaiti

Sanskrit only: no published translation is held for this verse.