श्रीशुक उवाच तस्यासन् विश्वरूपस्य शिरांसि त्रीणि भारत सोमपीथं सुरापीथमन्नादमिति शुश्रुम
śrīśuka uvāca tasyāsan viśvarūpasya śirāṃsi trīṇi bhārata somapīthaṃ surāpīthamannādamiti śuśruma
Sanskrit only: no published translation is held for this verse.
Library·Bhāgavata Purāṇa·6·6.9
Bhāgavata Purāṇa 6.9
स वै बर्हिषि देवेभ्यो भागं प्रत्यक्षमुच्चकैः अददद्यस्य पितरो देवाः सप्रश्रयं नृप
sa vai barhiṣi devebhyo bhāgaṃ pratyakṣamuccakaiḥ adadadyasya pitaro devāḥ sapraśrayaṃ nṛpa
Sanskrit only: no published translation is held for this verse.
स एव हि ददौ भागं परोक्षमसुरान् प्रति यजमानो ऽवहद्भागं मातृस्नेहवशानुगः
sa eva hi dadau bhāgaṃ parokṣamasurān prati yajamāno 'vahadbhāgaṃ mātṛsnehavaśānugaḥ
Sanskrit only: no published translation is held for this verse.
तद्देवहेलनं तस्य धर्मालीकं सुरेश्वरः आलक्ष्य तरसा भीतस्तच्छीर्षाण्य् अच्छिनद्रुषा
taddevahelanaṃ tasya dharmālīkaṃ sureśvaraḥ ālakṣya tarasā bhītastacchīrṣāṇy acchinadruṣā
Sanskrit only: no published translation is held for this verse.
सोमपीथं तु यत् तस्य शिर आसीत् कपिञ्जलः कलविङ्कः सुरापीथमन्नादं यत् स तित्तिरिः
somapīthaṃ tu yat tasya śira āsīt kapiñjalaḥ kalaviṅkaḥ surāpīthamannādaṃ yat sa tittiriḥ
Sanskrit only: no published translation is held for this verse.
ब्रह्महत्यामञ्जलिना जग्राह यदपीश्वरः संवत्सरान्ते तदघं भूतानां स विशुद्धये भूम्यम्बुद्रुमयोषिद्भ्यश्चतुर्धा व्यभजद्धरिः
brahmahatyāmañjalinā jagrāha yadapīśvaraḥ saṃvatsarānte tadaghaṃ bhūtānāṃ sa viśuddhaye bhūmyambudrumayoṣidbhyaścaturdhā vyabhajaddhariḥ
Sanskrit only: no published translation is held for this verse.
भूमिस्तुरीयं जग्राह खातपूरवरेण वै ईरिणं ब्रह्महत्याया रूपं भूमौ प्रदृश्यते
bhūmisturīyaṃ jagrāha khātapūravareṇa vai īriṇaṃ brahmahatyāyā rūpaṃ bhūmau pradṛśyate
Sanskrit only: no published translation is held for this verse.
तुर्यं छेदविरोहेण वरेण जगृहुर्द्रुमाः तेषां निर्यासरूपेण ब्रह्महत्या प्रदृश्यते
turyaṃ chedaviroheṇa vareṇa jagṛhurdrumāḥ teṣāṃ niryāsarūpeṇa brahmahatyā pradṛśyate
Sanskrit only: no published translation is held for this verse.
शश्वत्कामवरेणांहस्तुरीयं जगृहुः स्त्रियः रजोरूपेण तास्वंहो मासि मासि प्रदृश्यते
śaśvatkāmavareṇāṃhasturīyaṃ jagṛhuḥ striyaḥ rajorūpeṇa tāsvaṃho māsi māsi pradṛśyate
Sanskrit only: no published translation is held for this verse.
द्रव्यभूयोवरेणापस्तुरीयं जगृहुर्मलम् तासु बुद्बुदफेनाभ्यां दृष्टं तद्धरति क्षिपन्
dravyabhūyovareṇāpasturīyaṃ jagṛhurmalam tāsu budbudaphenābhyāṃ dṛṣṭaṃ taddharati kṣipan
Sanskrit only: no published translation is held for this verse.
हतपुत्रस्ततस्त्वष्टा जुहावेन्द्राय शत्रवे इन्द्रशत्रो विवर्धस्व मा चिरं जहि विद्विषम्
hataputrastatastvaṣṭā juhāvendrāya śatrave indraśatro vivardhasva mā ciraṃ jahi vidviṣam
Sanskrit only: no published translation is held for this verse.
अथान्वाहार्यपचनादुत्थितो घोरदर्शनः कृतान्त इव लोकानां युगान्तसमये यथा
athānvāhāryapacanādutthito ghoradarśanaḥ kṛtānta iva lokānāṃ yugāntasamaye yathā
Sanskrit only: no published translation is held for this verse.
विष्वग् विवर्धमानं तमिषुमात्रं दिने दिने दग्धशैलप्रतीकाशं सन्ध्याभ्रानीकवर्चसम्
viṣvag vivardhamānaṃ tamiṣumātraṃ dine dine dagdhaśailapratīkāśaṃ sandhyābhrānīkavarcasam
Sanskrit only: no published translation is held for this verse.
तप्तताम्रशिखाश्मश्रुं मध्याह्नार्कोग्रलोचनम्
taptatāmraśikhāśmaśruṃ madhyāhnārkogralocanam
Sanskrit only: no published translation is held for this verse.
देदीप्यमाने त्रिशिखे शूल आरोप्य रोदसी नृत्यन्तमुन्नदन्तं च चालयन्तं पदा महीम्
dedīpyamāne triśikhe śūla āropya rodasī nṛtyantamunnadantaṃ ca cālayantaṃ padā mahīm
Sanskrit only: no published translation is held for this verse.
दरीगम्भीरवक्त्रेण पिबता च नभस्तलम् लिहता जिह्वयर्क्षाणि ग्रसता भुवनत्रयम्
darīgambhīravaktreṇa pibatā ca nabhastalam lihatā jihvayarkṣāṇi grasatā bhuvanatrayam
Sanskrit only: no published translation is held for this verse.
महता रौद्रदंष्ट्रेण जृम्भमाणं मुहुर्मुहुः वित्रस्ता दुद्रुवुर्लोका वीक्ष्य सर्वे दिशो दश
mahatā raudradaṃṣṭreṇa jṛmbhamāṇaṃ muhurmuhuḥ vitrastā dudruvurlokā vīkṣya sarve diśo daśa
Sanskrit only: no published translation is held for this verse.
येनावृता इमे लोकास्तपसा त्वाष्ट्रमूर्तिना स वै वृत्र इति प्रोक्तः पापः परमदारुणः
yenāvṛtā ime lokāstapasā tvāṣṭramūrtinā sa vai vṛtra iti proktaḥ pāpaḥ paramadāruṇaḥ
Sanskrit only: no published translation is held for this verse.
तं निजघ्नुरभिद्रुत्य सगणा विबुधर्षभाः स्वैः स्वैर्दिव्यास्त्रशस्त्रौघैः सो ऽग्रसत् तानि कृत्स्नशः
taṃ nijaghnurabhidrutya sagaṇā vibudharṣabhāḥ svaiḥ svairdivyāstraśastraughaiḥ so 'grasat tāni kṛtsnaśaḥ
Sanskrit only: no published translation is held for this verse.
ततस्ते विस्मिताः सर्वे विषण्णा ग्रस्ततेजसः प्रत्यञ्चमादिपुरुषमुपतस्थुः समाहिताः
tataste vismitāḥ sarve viṣaṇṇā grastatejasaḥ pratyañcamādipuruṣamupatasthuḥ samāhitāḥ
Sanskrit only: no published translation is held for this verse.
श्रीदेवा ऊचुः वाय्वम्बराग्न्यप्क्षितयस्त्रिलोका ब्रह्मादयो ये वयमुद्विजन्तः हराम यस्मै बलिमन्तको ऽसौ बिभेति यस्मादरणं ततो नः
śrīdevā ūcuḥ vāyvambarāgnyapkṣitayastrilokā brahmādayo ye vayamudvijantaḥ harāma yasmai balimantako 'sau bibheti yasmādaraṇaṃ tato naḥ
Sanskrit only: no published translation is held for this verse.
अविस्मितं तं परिपूर्णकामं स्वेनैव लाभेन समं प्रशान्तम् विनोपसर्पत्य् अपरं हि बालिशः श्वलाङ्गुलेनातितितर्ति सिन्धुम्
avismitaṃ taṃ paripūrṇakāmaṃ svenaiva lābhena samaṃ praśāntam vinopasarpaty aparaṃ hi bāliśaḥ śvalāṅgulenātititarti sindhum
Sanskrit only: no published translation is held for this verse.
यस्योरुशृङ्गे जगतीं स्वनावं मनुर्यथाबध्य ततार दुर्गम् स एव नस्त्वाष्ट्रभयाद्दुरन्तात् त्राताश्रितान् वारिचरो ऽपि नूनम्
yasyoruśṛṅge jagatīṃ svanāvaṃ manuryathābadhya tatāra durgam sa eva nastvāṣṭrabhayāddurantāt trātāśritān vāricaro 'pi nūnam
Sanskrit only: no published translation is held for this verse.
पुरा स्वयम्भूरपि संयमाम्भस्य् उदीर्णवातोर्मिरवैः कराले एको ऽरविन्दात् पतितस्ततार तस्माद्भयाद्येन स नो ऽस्तु पारः
purā svayambhūrapi saṃyamāmbhasy udīrṇavātormiravaiḥ karāle eko 'ravindāt patitastatāra tasmādbhayādyena sa no 'stu pāraḥ
Sanskrit only: no published translation is held for this verse.
य एक ईशो निजमायया नः ससर्ज येनानुसृजाम विश्वम् वयं न यस्यापि पुरः समीहतः पश्याम लिङ्गं पृथग् ईशमानिनः
ya eka īśo nijamāyayā naḥ sasarja yenānusṛjāma viśvam vayaṃ na yasyāpi puraḥ samīhataḥ paśyāma liṅgaṃ pṛthag īśamāninaḥ
Sanskrit only: no published translation is held for this verse.
यो नः सपत्नैर्भृशमर्द्यमानान् देवर्षितिर्यङ्नृषु नित्य एव कृतावतारस्तनुभिः स्वमायया कृत्वात्मसात् पाति युगे युगे च
yo naḥ sapatnairbhṛśamardyamānān devarṣitiryaṅnṛṣu nitya eva kṛtāvatārastanubhiḥ svamāyayā kṛtvātmasāt pāti yuge yuge ca
Sanskrit only: no published translation is held for this verse.
तमेव देवं वयमात्मदैवतं परं प्रधानं पुरुषं विश्वमन्यम् व्रजाम सर्वे शरणं शरण्यं स्वानां स नो धास्यति शं महात्मा
tameva devaṃ vayamātmadaivataṃ paraṃ pradhānaṃ puruṣaṃ viśvamanyam vrajāma sarve śaraṇaṃ śaraṇyaṃ svānāṃ sa no dhāsyati śaṃ mahātmā
Sanskrit only: no published translation is held for this verse.
श्रीशुक उवाच इति तेषां महाराज सुराणामुपतिष्ठताम् प्रतीच्यां दिश्य् अभूदाविः शङ्खचक्रगदाधरः
śrīśuka uvāca iti teṣāṃ mahārāja surāṇāmupatiṣṭhatām pratīcyāṃ diśy abhūdāviḥ śaṅkhacakragadādharaḥ
Sanskrit only: no published translation is held for this verse.
आत्मतुल्यैः षोडशभिर्विना श्रीवत्सकौस्तुभौ पर्युपासितमुन्निद्र शरदम्बुरुहेक्षणम्
ātmatulyaiḥ ṣoḍaśabhirvinā śrīvatsakaustubhau paryupāsitamunnidra śaradamburuhekṣaṇam
Sanskrit only: no published translation is held for this verse.
दृष्ट्वा तमवनौ सर्व ईक्षणाह्लादविक्लवाः दण्डवत् पतिता राजञ् छनैरुत्थाय तुष्टुवुः
dṛṣṭvā tamavanau sarva īkṣaṇāhlādaviklavāḥ daṇḍavat patitā rājañ chanairutthāya tuṣṭuvuḥ
Sanskrit only: no published translation is held for this verse.
श्रीदेवा ऊचुः नमस्ते यज्ञवीर्याय वयसे उत ते नमः नमस्ते ह्य् अस्तचक्राय नमः सुपुरुहूतये
śrīdevā ūcuḥ namaste yajñavīryāya vayase uta te namaḥ namaste hy astacakrāya namaḥ supuruhūtaye
Sanskrit only: no published translation is held for this verse.
यत् ते गतीनां तिसृणामीशितुः परमं पदम् नार्वाचीनो विसर्गस्य धातर्वेदितुमर्हति
yat te gatīnāṃ tisṛṇāmīśituḥ paramaṃ padam nārvācīno visargasya dhātarveditumarhati
Sanskrit only: no published translation is held for this verse.
ॐ नमस्ते ऽस्तु भगवन् नारायण वासुदेवादिपुरुष महापुरुष महानुभाव परममङ्गल परमकल्याण परमकारुणिक केवल जगदाधार लोकैकनाथ सर्वेश्वर लक्ष्मीनाथ परमहंसपरिव्राजकैः परमेणात्मयोगसमाधिना परिभावितपरिस्फुटपारमहंस्यधर्मेणोद्घाटिततमःकपाटद्वारे चित्ते ऽपावृत आत्मलोके स्वयमुपलब्धनिजसुखानुभवो भवान्
oṃ namaste 'stu bhagavan nārāyaṇa vāsudevādipuruṣa mahāpuruṣa mahānubhāva paramamaṅgala paramakalyāṇa paramakāruṇika kevala jagadādhāra lokaikanātha sarveśvara lakṣmīnātha paramahaṃsaparivrājakaiḥ parameṇātmayogasamādhinā paribhāvitaparisphuṭapāramahaṃsyadharmeṇodghāṭitatamaḥkapāṭadvāre citte 'pāvṛta ātmaloke svayamupalabdhanijasukhānubhavo bhavān
Sanskrit only: no published translation is held for this verse.
दुरवबोध इव तवायं विहारयोगो यदशरणो ऽशरीर इदमनवेक्षितास्मत्समवाय आत्मनैवाविक्रियमाणेन सगुणमगुणः सृजसि पासि हरसि
duravabodha iva tavāyaṃ vihārayogo yadaśaraṇo 'śarīra idamanavekṣitāsmatsamavāya ātmanaivāvikriyamāṇena saguṇamaguṇaḥ sṛjasi pāsi harasi
Sanskrit only: no published translation is held for this verse.
अथ तत्र भवान् किं देवदत्तवदिह गुणविसर्गपतितः पारतन्त्र्येण स्वकृतकुशलाकुशलं फलमुपाददात्य् आहोस्विदात्माराम उपशमशीलः समञ्जसदर्शन उदास्त इति ह वाव न विदामः
atha tatra bhavān kiṃ devadattavadiha guṇavisargapatitaḥ pāratantryeṇa svakṛtakuśalākuśalaṃ phalamupādadāty āhosvidātmārāma upaśamaśīlaḥ samañjasadarśana udāsta iti ha vāva na vidāmaḥ
Sanskrit only: no published translation is held for this verse.
न हि विरोध उभयं भगवत्य् अपरिमितगुणगण ईश्वरे ऽनवगाह्यमाहात्म्ये ऽर्वाचीनविकल्पवितर्कविचारप्रमाणाभासकुतर्कशास्त्रकलिलान्तःकरणाश्रयदुरवग्रहवादिनां विवादानवसर उपरतसमस्तमायामये केवल एवात्ममायामन्तर्धाय को न्वर्थो दुर्घट इव भवति स्वरूपद्वयाभावात्
na hi virodha ubhayaṃ bhagavaty aparimitaguṇagaṇa īśvare 'navagāhyamāhātmye 'rvācīnavikalpavitarkavicārapramāṇābhāsakutarkaśāstrakalilāntaḥkaraṇāśrayaduravagrahavādināṃ vivādānavasara uparatasamastamāyāmaye kevala evātmamāyāmantardhāya ko nvartho durghaṭa iva bhavati svarūpadvayābhāvāt
Sanskrit only: no published translation is held for this verse.
समविषममतीनां मतमनुसरसि यथा रज्जुखण्डः सर्पादिधियाम्
samaviṣamamatīnāṃ matamanusarasi yathā rajjukhaṇḍaḥ sarpādidhiyām
Sanskrit only: no published translation is held for this verse.
स एव हि पुनः सर्ववस्तुनि वस्तुस्वरूपः सर्वेश्वरः सकलजगत्कारणकारणभूतः सर्वप्रत्यगात्मत्वात् सर्वगुणाभासोपलक्षित एक एव पर्यवशेषितः
sa eva hi punaḥ sarvavastuni vastusvarūpaḥ sarveśvaraḥ sakalajagatkāraṇakāraṇabhūtaḥ sarvapratyagātmatvāt sarvaguṇābhāsopalakṣita eka eva paryavaśeṣitaḥ
Sanskrit only: no published translation is held for this verse.
अथ ह वाव तव महिमामृतरससमुद्रविप्रुषा सकृदवलीढया स्वमनसि निष्यन्दमानानवरतसुखेन विस्मारितदृष्टश्रुतविषयसुखलेशाभासाः परमभागवता एकान्तिनो भगवति सर्वभूतप्रियसुहृदि सर्वात्मनि नितरां निरन्तरं निर्वृतमनसः कथमु ह वा एते मधुमथन पुनः स्वार्थकुशला ह्य् आत्मप्रियसुहृदः साधवस्त्वच्चरणाम्बुजानुसेवां विसृजन्ति न यत्र पुनरयं संसारपर्यावर्तः
atha ha vāva tava mahimāmṛtarasasamudravipruṣā sakṛdavalīḍhayā svamanasi niṣyandamānānavaratasukhena vismāritadṛṣṭaśrutaviṣayasukhaleśābhāsāḥ paramabhāgavatā ekāntino bhagavati sarvabhūtapriyasuhṛdi sarvātmani nitarāṃ nirantaraṃ nirvṛtamanasaḥ kathamu ha vā ete madhumathana punaḥ svārthakuśalā hy ātmapriyasuhṛdaḥ sādhavastvaccaraṇāmbujānusevāṃ visṛjanti na yatra punarayaṃ saṃsāraparyāvartaḥ
Sanskrit only: no published translation is held for this verse.
त्रिभुवनात्मभवन त्रिविक्रम त्रिनयन त्रिलोकमनोहरानुभाव तवैव विभूतयो दितिजदनुजादयश्चापि तेषामुपक्रमसमयो ऽयमिति स्वात्ममायया सुरनरमृगमिश्रितजलचराकृतिभिर्यथापराधं दण्डं दण्डधर दधर्थ एवमेनमपि भगवन् जहि त्वाष्ट्रमुत यदि मन्यसे
tribhuvanātmabhavana trivikrama trinayana trilokamanoharānubhāva tavaiva vibhūtayo ditijadanujādayaścāpi teṣāmupakramasamayo 'yamiti svātmamāyayā suranaramṛgamiśritajalacarākṛtibhiryathāparādhaṃ daṇḍaṃ daṇḍadhara dadhartha evamenamapi bhagavan jahi tvāṣṭramuta yadi manyase
Sanskrit only: no published translation is held for this verse.
अस्माकं तावकानां तततत नतानां हरे तव चरणनलिनयुगलध्यानानुबद्धहृदयनिगडानां स्वलिङ्गविवरणेनात्मसात्कृतानामनुकम्पानुरञ्जितविशदरुचिरशिशिरस्मितावलोकेन विगलितमधुरमुखरसामृतकलया चान्तस्तापमनघार्हसि शमयितुम्
asmākaṃ tāvakānāṃ tatatata natānāṃ hare tava caraṇanalinayugaladhyānānubaddhahṛdayanigaḍānāṃ svaliṅgavivaraṇenātmasātkṛtānāmanukampānurañjitaviśadaruciraśiśirasmitāvalokena vigalitamadhuramukharasāmṛtakalayā cāntastāpamanaghārhasi śamayitum
Sanskrit only: no published translation is held for this verse.
अथ भगवंस्तवास्माभिरखिलजगदुत्पत्तिस्थितिलयनिमित्तायमानदिव्यमायाविनोदस्य सकलजीवनिकायानामन्तर्हृदयेषु बहिरपि च ब्रह्मप्रत्यगात्मस्वरूपेण प्रधानरूपेण च यथादेशकालदेहावस्थानविशेषं तदुपादानोपलम्भकतयानुभवतः सर्वप्रत्ययसाक्षिण आकाशशरीरस्य साक्षात् परब्रह्मणः परमात्मनः कियान् इह वार्थविशेषो विज्ञापनीयः स्याद्विस्फुलिङ्गादिभिरिव हिरण्यरेतसः
atha bhagavaṃstavāsmābhirakhilajagadutpattisthitilayanimittāyamānadivyamāyāvinodasya sakalajīvanikāyānāmantarhṛdayeṣu bahirapi ca brahmapratyagātmasvarūpeṇa pradhānarūpeṇa ca yathādeśakāladehāvasthānaviśeṣaṃ tadupādānopalambhakatayānubhavataḥ sarvapratyayasākṣiṇa ākāśaśarīrasya sākṣāt parabrahmaṇaḥ paramātmanaḥ kiyān iha vārthaviśeṣo vijñāpanīyaḥ syādvisphuliṅgādibhiriva hiraṇyaretasaḥ
Sanskrit only: no published translation is held for this verse.
अत एव स्वयं तदुपकल्पयास्माकं भगवतः परमगुरोस्तव चरणशतपलाशच्छायां विविधवृजिनसंसारपरिश्रमोपशमनीमुपसृतानां वयं यत्कामेनोपसादिताः
ata eva svayaṃ tadupakalpayāsmākaṃ bhagavataḥ paramagurostava caraṇaśatapalāśacchāyāṃ vividhavṛjinasaṃsārapariśramopaśamanīmupasṛtānāṃ vayaṃ yatkāmenopasāditāḥ
Sanskrit only: no published translation is held for this verse.
अथो ईश जहि त्वाष्ट्रं ग्रसन्तं भुवनत्रयम् ग्रस्तानि येन नः कृष्ण तेजांस्य् अस्त्रायुधानि च
atho īśa jahi tvāṣṭraṃ grasantaṃ bhuvanatrayam grastāni yena naḥ kṛṣṇa tejāṃsy astrāyudhāni ca
Sanskrit only: no published translation is held for this verse.
हंसाय दह्रनिलयाय निरीक्षकाय कृष्णाय मृष्टयशसे निरुपक्रमाय सत्सङ्ग्रहाय भवपान्थनिजाश्रमाप्ताव् अन्ते परीष्टगतये हरये नमस्ते
haṃsāya dahranilayāya nirīkṣakāya kṛṣṇāya mṛṣṭayaśase nirupakramāya satsaṅgrahāya bhavapānthanijāśramāptāv ante parīṣṭagataye haraye namaste
Sanskrit only: no published translation is held for this verse.
श्रीशुक उवाच अथैवमीडितो राजन् सादरं त्रिदशैर्हरिः स्वमुपस्थानमाकर्ण्य प्राह तान् अभिनन्दितः
śrīśuka uvāca athaivamīḍito rājan sādaraṃ tridaśairhariḥ svamupasthānamākarṇya prāha tān abhinanditaḥ
Sanskrit only: no published translation is held for this verse.
श्रीभगवान् उवाच प्रीतो ऽहं वः सुरश्रेष्ठा मदुपस्थानविद्यया आत्मैश्वर्यस्मृतिः पुंसां भक्तिश्चैव यया मयि
śrībhagavān uvāca prīto 'haṃ vaḥ suraśreṣṭhā madupasthānavidyayā ātmaiśvaryasmṛtiḥ puṃsāṃ bhaktiścaiva yayā mayi
Sanskrit only: no published translation is held for this verse.
किं दुरापं मयि प्रीते तथापि विबुधर्षभाः मय्य् एकान्तमतिर्नान्यन् मत्तो वाञ्छति तत्त्ववित्
kiṃ durāpaṃ mayi prīte tathāpi vibudharṣabhāḥ mayy ekāntamatirnānyan matto vāñchati tattvavit
Sanskrit only: no published translation is held for this verse.
न वेद कृपणः श्रेय आत्मनो गुणवस्तुदृक् तस्य तान् इच्छतो यच्छेद्यदि सो ऽपि तथाविधः
na veda kṛpaṇaḥ śreya ātmano guṇavastudṛk tasya tān icchato yacchedyadi so 'pi tathāvidhaḥ
Sanskrit only: no published translation is held for this verse.
स्वयं निःश्रेयसं विद्वान् न वक्त्य् अज्ञाय कर्म हि न राति रोगिणो ऽपथ्यं वाञ्छतो ऽपि भिषक्तमः
svayaṃ niḥśreyasaṃ vidvān na vakty ajñāya karma hi na rāti rogiṇo 'pathyaṃ vāñchato 'pi bhiṣaktamaḥ
Sanskrit only: no published translation is held for this verse.
मघवन् यात भद्रं वो दध्यञ्चमृषिसत्तमम् विद्याव्रततपःसारं गात्रं याचत मा चिरम्
maghavan yāta bhadraṃ vo dadhyañcamṛṣisattamam vidyāvratatapaḥsāraṃ gātraṃ yācata mā ciram
Sanskrit only: no published translation is held for this verse.
स वा अधिगतो दध्यङ्ङ् अश्विभ्यां ब्रह्म निष्कलम् यद्वा अश्वशिरो नाम तयोरमरतां व्यधात्
sa vā adhigato dadhyaṅṅ aśvibhyāṃ brahma niṣkalam yadvā aśvaśiro nāma tayoramaratāṃ vyadhāt
Sanskrit only: no published translation is held for this verse.
दध्यङ्ङ् आथर्वणस्त्वष्ट्रे वर्माभेद्यं मदात्मकम् विश्वरूपाय यत् प्रादात् त्वष्टा यत् त्वमधास्ततः
dadhyaṅṅ ātharvaṇastvaṣṭre varmābhedyaṃ madātmakam viśvarūpāya yat prādāt tvaṣṭā yat tvamadhāstataḥ
Sanskrit only: no published translation is held for this verse.
युष्मभ्यं याचितो ऽश्विभ्यां धर्मज्ञो ऽङ्गानि दास्यति ततस्तैरायुधश्रेष्ठो विश्वकर्मविनिर्मितः येन वृत्रशिरो हर्ता मत्तेजौपबृंहितः
yuṣmabhyaṃ yācito 'śvibhyāṃ dharmajño 'ṅgāni dāsyati tatastairāyudhaśreṣṭho viśvakarmavinirmitaḥ yena vṛtraśiro hartā mattejaupabṛṃhitaḥ
Sanskrit only: no published translation is held for this verse.
तस्मिन् विनिहते यूयं तेजो ऽस्त्रायुधसम्पदः भूयः प्राप्स्यथ भद्रं वो न हिंसन्ति च मत्परान्
tasmin vinihate yūyaṃ tejo 'strāyudhasampadaḥ bhūyaḥ prāpsyatha bhadraṃ vo na hiṃsanti ca matparān
Sanskrit only: no published translation is held for this verse.