Library·Bhāgavata Purāṇa·8·8.11
श्रीशुक उवाच अथो सुराः प्रत्युपलब्धचेतसः परस्य पुंसः परयानुकम्पया जघ्नुर्भृशं शक्रसमीरणादयस् तांस्तान् रणे यैरभिसंहताः पुरा
śrīśuka uvāca atho surāḥ pratyupalabdhacetasaḥ parasya puṃsaḥ parayānukampayā jaghnurbhṛśaṃ śakrasamīraṇādayas tāṃstān raṇe yairabhisaṃhatāḥ purā
Sanskrit only: no published translation is held for this verse.
वैरोचनाय संरब्धो भगवान् पाकशासनः उदयच्छद्यदा वज्रं प्रजा हा हेति चुक्रुशुः
vairocanāya saṃrabdho bhagavān pākaśāsanaḥ udayacchadyadā vajraṃ prajā hā heti cukruśuḥ
Sanskrit only: no published translation is held for this verse.
वज्रपाणिस्तमाहेदं तिरस्कृत्य पुरःस्थितम् मनस्विनं सुसम्पन्नं विचरन्तं महामृधे
vajrapāṇistamāhedaṃ tiraskṛtya puraḥsthitam manasvinaṃ susampannaṃ vicarantaṃ mahāmṛdhe
Sanskrit only: no published translation is held for this verse.
नटवन् मूढ मायाभिर्मायेशान् नो जिगीषसि जित्वा बालान् निबद्धाक्षान् नटो हरति तद्धनम्
naṭavan mūḍha māyābhirmāyeśān no jigīṣasi jitvā bālān nibaddhākṣān naṭo harati taddhanam
Sanskrit only: no published translation is held for this verse.
आरुरुक्षन्ति मायाभिरुत्सिसृप्सन्ति ये दिवम् तान् दस्यून् विधुनोम्य् अज्ञान् पूर्वस्माच् च पदादधः
ārurukṣanti māyābhirutsisṛpsanti ye divam tān dasyūn vidhunomy ajñān pūrvasmāc ca padādadhaḥ
Sanskrit only: no published translation is held for this verse.
सो ऽहं दुर्मायिनस्ते ऽद्य वज्रेण शतपर्वणा शिरो हरिष्ये मन्दात्मन्घटस्व ज्ञातिभिः सह
so 'haṃ durmāyinaste 'dya vajreṇa śataparvaṇā śiro hariṣye mandātmanghaṭasva jñātibhiḥ saha
Sanskrit only: no published translation is held for this verse.
श्रीबलिरुवाच सङ्ग्रामे वर्तमानानां कालचोदितकर्मणाम् कीर्तिर्जयो ऽजयो मृत्युः सर्वेषां स्युरनुक्रमात्
śrībaliruvāca saṅgrāme vartamānānāṃ kālacoditakarmaṇām kīrtirjayo 'jayo mṛtyuḥ sarveṣāṃ syuranukramāt
Sanskrit only: no published translation is held for this verse.
तदिदं कालरशनं जगत् पश्यन्ति सूरयः न हृष्यन्ति न शोचन्ति तत्र यूयमपण्डिताः
tadidaṃ kālaraśanaṃ jagat paśyanti sūrayaḥ na hṛṣyanti na śocanti tatra yūyamapaṇḍitāḥ
Sanskrit only: no published translation is held for this verse.
न वयं मन्यमानानामात्मानं तत्र साधनम् गिरो वः साधुशोच्यानां गृह्णीमो मर्मताडनाः
na vayaṃ manyamānānāmātmānaṃ tatra sādhanam giro vaḥ sādhuśocyānāṃ gṛhṇīmo marmatāḍanāḥ
Sanskrit only: no published translation is held for this verse.
श्रीशुक उवाच इत्य् आक्षिप्य विभुं वीरो नाराचैर्वीरमर्दनः आकर्णपूर्णैरहनदाक्षेपैराह तं पुनः
śrīśuka uvāca ity ākṣipya vibhuṃ vīro nārācairvīramardanaḥ ākarṇapūrṇairahanadākṣepairāha taṃ punaḥ
Sanskrit only: no published translation is held for this verse.
एवं निराकृतो देवो वैरिणा तथ्यवादिना नामृष्यत् तदधिक्षेपं तोत्राहत इव द्विपः
evaṃ nirākṛto devo vairiṇā tathyavādinā nāmṛṣyat tadadhikṣepaṃ totrāhata iva dvipaḥ
Sanskrit only: no published translation is held for this verse.
प्राहरत् कुलिशं तस्मा अमोघं परमर्दनः सयानो न्यपतद्भूमौ छिन्नपक्ष इवाचलः
prāharat kuliśaṃ tasmā amoghaṃ paramardanaḥ sayāno nyapatadbhūmau chinnapakṣa ivācalaḥ
Sanskrit only: no published translation is held for this verse.
सखायं पतितं दृष्ट्वा जम्भो बलिसखः सुहृत् अभ्ययात् सौहृदं सख्युर्हतस्यापि समाचरन्
sakhāyaṃ patitaṃ dṛṣṭvā jambho balisakhaḥ suhṛt abhyayāt sauhṛdaṃ sakhyurhatasyāpi samācaran
Sanskrit only: no published translation is held for this verse.
स सिंहवाह आसाद्य गदामुद्यम्य रंहसा जत्रावताडयच् छक्रं गजं च सुमहाबलः
sa siṃhavāha āsādya gadāmudyamya raṃhasā jatrāvatāḍayac chakraṃ gajaṃ ca sumahābalaḥ
Sanskrit only: no published translation is held for this verse.
गदाप्रहारव्यथितो भृशं विह्वलितो गजः जानुभ्यां धरणीं स्पृष्ट्वा कश्मलं परमं ययौ
gadāprahāravyathito bhṛśaṃ vihvalito gajaḥ jānubhyāṃ dharaṇīṃ spṛṣṭvā kaśmalaṃ paramaṃ yayau
Sanskrit only: no published translation is held for this verse.
ततो रथो मातलिना हरिभिर्दशशतैर्वृतः आनीतो द्विपमुत्सृज्य रथमारुरुहे विभुः
tato ratho mātalinā haribhirdaśaśatairvṛtaḥ ānīto dvipamutsṛjya rathamāruruhe vibhuḥ
Sanskrit only: no published translation is held for this verse.
तस्य तत् पूजयन् कर्म यन्तुर्दानवसत्तमः शूलेन ज्वलता तं तु स्मयमानो ऽहनन् मृधे
tasya tat pūjayan karma yanturdānavasattamaḥ śūlena jvalatā taṃ tu smayamāno 'hanan mṛdhe
Sanskrit only: no published translation is held for this verse.
सेहे रुजं सुदुर्मर्षां सत्त्वमालम्ब्य मातलिः इन्द्रो जम्भस्य सङ्क्रुद्धो वज्रेणापाहरच् छिरः
sehe rujaṃ sudurmarṣāṃ sattvamālambya mātaliḥ indro jambhasya saṅkruddho vajreṇāpāharac chiraḥ
Sanskrit only: no published translation is held for this verse.
जम्भं श्रुत्वा हतं तस्य ज्ञातयो नारदादृषेः नमुचिश्च बलः पाकस्तत्रापेतुस्त्वरान्विताः
jambhaṃ śrutvā hataṃ tasya jñātayo nāradādṛṣeḥ namuciśca balaḥ pākastatrāpetustvarānvitāḥ
Sanskrit only: no published translation is held for this verse.
वचोभिः परुषैरिन्द्रमर्दयन्तो ऽस्य मर्मसु शरैरवाकिरन् मेघा धाराभिरिव पर्वतम्
vacobhiḥ paruṣairindramardayanto 'sya marmasu śarairavākiran meghā dhārābhiriva parvatam
Sanskrit only: no published translation is held for this verse.
हरीन् दशशतान्य् आजौ हर्यश्वस्य बलः शरैः तावद्भिरर्दयामास युगपल् लघुहस्तवान्
harīn daśaśatāny ājau haryaśvasya balaḥ śaraiḥ tāvadbhirardayāmāsa yugapal laghuhastavān
Sanskrit only: no published translation is held for this verse.
शताभ्यां मातलिं पाको रथं सावयवं पृथक् सकृत् सन्धानमोक्षेण तदद्भुतमभूद्रणे
śatābhyāṃ mātaliṃ pāko rathaṃ sāvayavaṃ pṛthak sakṛt sandhānamokṣeṇa tadadbhutamabhūdraṇe
Sanskrit only: no published translation is held for this verse.
नमुचिः पञ्चदशभिः स्वर्णपुङ्खैर्महेषुभिः आहत्य व्यनदत् सङ्ख्ये सतोय इव तोयदः
namuciḥ pañcadaśabhiḥ svarṇapuṅkhairmaheṣubhiḥ āhatya vyanadat saṅkhye satoya iva toyadaḥ
Sanskrit only: no published translation is held for this verse.
सर्वतः शरकूटेन शक्रं सरथसारथिम् छादयामासुरसुराः प्रावृट्सूर्यमिवाम्बुदाः
sarvataḥ śarakūṭena śakraṃ sarathasārathim chādayāmāsurasurāḥ prāvṛṭsūryamivāmbudāḥ
Sanskrit only: no published translation is held for this verse.
अलक्षयन्तस्तमतीव विह्वला विचुक्रुशुर्देवगणाः सहानुगाः अनायकाः शत्रुबलेन निर्जिता वणिक्पथा भिन्ननवो यथार्णवे
alakṣayantastamatīva vihvalā vicukruśurdevagaṇāḥ sahānugāḥ anāyakāḥ śatrubalena nirjitā vaṇikpathā bhinnanavo yathārṇave
Sanskrit only: no published translation is held for this verse.
ततस्तुराषाड् इषुबद्धपञ्जराद् विनिर्गतः साश्वरथध्वजाग्रणीः बभौ दिशः खं पृथिवीं च रोचयन् स्वतेजसा सूर्य इव क्षपात्यये
tatasturāṣāḍ iṣubaddhapañjarād vinirgataḥ sāśvarathadhvajāgraṇīḥ babhau diśaḥ khaṃ pṛthivīṃ ca rocayan svatejasā sūrya iva kṣapātyaye
Sanskrit only: no published translation is held for this verse.
निरीक्ष्य पृतनां देवः परैरभ्यर्दितां रणे उदयच्छद्रिपुं हन्तुं वज्रं वज्रधरो रुषा
nirīkṣya pṛtanāṃ devaḥ parairabhyarditāṃ raṇe udayacchadripuṃ hantuṃ vajraṃ vajradharo ruṣā
Sanskrit only: no published translation is held for this verse.
स तेनैवाष्टधारेण शिरसी बलपाकयोः ज्ञातीनां पश्यतां राजन् जहार जनयन् भयम्
sa tenaivāṣṭadhāreṇa śirasī balapākayoḥ jñātīnāṃ paśyatāṃ rājan jahāra janayan bhayam
Sanskrit only: no published translation is held for this verse.
नमुचिस्तद्वधं दृष्ट्वा शोकामर्षरुषान्वितः जिघांसुरिन्द्रं नृपते चकार परमोद्यमम्
namucistadvadhaṃ dṛṣṭvā śokāmarṣaruṣānvitaḥ jighāṃsurindraṃ nṛpate cakāra paramodyamam
Sanskrit only: no published translation is held for this verse.
अश्मसारमयं शूलं घण्टावद्धेमभूषणम् प्रगृह्याभ्यद्रवत् क्रुद्धो हतो ऽसीति वितर्जयन् प्राहिणोद्देवराजाय निनदन् मृगराड् इव
aśmasāramayaṃ śūlaṃ ghaṇṭāvaddhemabhūṣaṇam pragṛhyābhyadravat kruddho hato 'sīti vitarjayan prāhiṇoddevarājāya ninadan mṛgarāḍ iva
Sanskrit only: no published translation is held for this verse.
तदापतद्गगनतले महाजवं विचिच्छिदे हरिरिषुभिः सहस्रधा तमाहनन् नृप कुलिशेन कन्धरे रुषान्वितस्त्रिदशपतिः शिरो हरन्
tadāpatadgaganatale mahājavaṃ vicicchide haririṣubhiḥ sahasradhā tamāhanan nṛpa kuliśena kandhare ruṣānvitastridaśapatiḥ śiro haran
Sanskrit only: no published translation is held for this verse.
न तस्य हि त्वचमपि वज्र ऊर्जितो बिभेद यः सुरपतिनौजसेरितः तदद्भुतं परमतिवीर्यवृत्रभित् तिरस्कृतो नमुचिशिरोधरत्वचा
na tasya hi tvacamapi vajra ūrjito bibheda yaḥ surapatinaujaseritaḥ tadadbhutaṃ paramativīryavṛtrabhit tiraskṛto namuciśirodharatvacā
Sanskrit only: no published translation is held for this verse.
तस्मादिन्द्रो ऽबिभेच् छत्रोर्वज्रः प्रतिहतो यतः किमिदं दैवयोगेन भूतं लोकविमोहनम्
tasmādindro 'bibhec chatrorvajraḥ pratihato yataḥ kimidaṃ daivayogena bhūtaṃ lokavimohanam
Sanskrit only: no published translation is held for this verse.
येन मे पूर्वमद्रीणां पक्षच्छेदः प्रजात्यये कृतो निविशतां भारैः पतत्त्रैः पततां भुवि
yena me pūrvamadrīṇāṃ pakṣacchedaḥ prajātyaye kṛto niviśatāṃ bhāraiḥ patattraiḥ patatāṃ bhuvi
Sanskrit only: no published translation is held for this verse.
तपःसारमयं त्वाष्ट्रं वृत्रो येन विपाटितः अन्ये चापि बलोपेताः सर्वास्त्रैरक्षतत्वचः
tapaḥsāramayaṃ tvāṣṭraṃ vṛtro yena vipāṭitaḥ anye cāpi balopetāḥ sarvāstrairakṣatatvacaḥ
Sanskrit only: no published translation is held for this verse.
सो ऽयं प्रतिहतो वज्रो मया मुक्तो ऽसुरे ऽल्पके नाहं तदाददे दण्डं ब्रह्मतेजो ऽप्य् अकारणम्
so 'yaṃ pratihato vajro mayā mukto 'sure 'lpake nāhaṃ tadādade daṇḍaṃ brahmatejo 'py akāraṇam
Sanskrit only: no published translation is held for this verse.
इति शक्रं विषीदन्तमाह वाग् अशरीरिणी नायं शुष्कैरथो नार्द्रैर्वधमर्हति दानवः
iti śakraṃ viṣīdantamāha vāg aśarīriṇī nāyaṃ śuṣkairatho nārdrairvadhamarhati dānavaḥ
Sanskrit only: no published translation is held for this verse.
मयास्मै यद्वरो दत्तो मृत्युर्नैवार्द्रशुष्कयोः अतो ऽन्यश्चिन्तनीयस्ते उपायो मघवन् रिपोः
mayāsmai yadvaro datto mṛtyurnaivārdraśuṣkayoḥ ato 'nyaścintanīyaste upāyo maghavan ripoḥ
Sanskrit only: no published translation is held for this verse.
तां दैवीं गिरमाकर्ण्य मघवान् सुसमाहितः ध्यायन् फेनमथापश्यदुपायमुभयात्मकम्
tāṃ daivīṃ giramākarṇya maghavān susamāhitaḥ dhyāyan phenamathāpaśyadupāyamubhayātmakam
Sanskrit only: no published translation is held for this verse.
न शुष्केण न चार्द्रेण जहार नमुचेः शिरः तं तुष्टुवुर्मुनिगणा माल्यैश्चावाकिरन् विभुम्
na śuṣkeṇa na cārdreṇa jahāra namuceḥ śiraḥ taṃ tuṣṭuvurmunigaṇā mālyaiścāvākiran vibhum
Sanskrit only: no published translation is held for this verse.
गन्धर्वमुख्यौ जगतुर्विश्वावसुपरावसू देवदुन्दुभयो नेदुर्नर्तक्यो ननृतुर्मुदा
gandharvamukhyau jagaturviśvāvasuparāvasū devadundubhayo nedurnartakyo nanṛturmudā
Sanskrit only: no published translation is held for this verse.
अन्ये ऽप्य् एवं प्रतिद्वन्द्वान् वाय्वग्निवरुणादयः सूदयामासुरसुरान् मृगान् केसरिणो यथा
anye 'py evaṃ pratidvandvān vāyvagnivaruṇādayaḥ sūdayāmāsurasurān mṛgān kesariṇo yathā
Sanskrit only: no published translation is held for this verse.
ब्रह्मणा प्रेषितो देवान् देवर्षिर्नारदो नृप वारयामास विबुधान् दृष्ट्वा दानवसङ्क्षयम्
brahmaṇā preṣito devān devarṣirnārado nṛpa vārayāmāsa vibudhān dṛṣṭvā dānavasaṅkṣayam
Sanskrit only: no published translation is held for this verse.
श्रीनारद उवाच भवद्भिरमृतं प्राप्तं नारायणभुजाश्रयैः श्रिया समेधिताः सर्व उपारमत विग्रहात्
śrīnārada uvāca bhavadbhiramṛtaṃ prāptaṃ nārāyaṇabhujāśrayaiḥ śriyā samedhitāḥ sarva upāramata vigrahāt
Sanskrit only: no published translation is held for this verse.
श्रीशुक उवाच संयम्य मन्युसंरम्भं मानयन्तो मुनेर्वचः उपगीयमानानुचरैर्ययुः सर्वे त्रिविष्टपम्
śrīśuka uvāca saṃyamya manyusaṃrambhaṃ mānayanto munervacaḥ upagīyamānānucarairyayuḥ sarve triviṣṭapam
Sanskrit only: no published translation is held for this verse.
ये ऽवशिष्टा रणे तस्मिन् नारदानुमतेन ते बलिं विपन्नमादाय अस्तं गिरिमुपागमन्
ye 'vaśiṣṭā raṇe tasmin nāradānumatena te baliṃ vipannamādāya astaṃ girimupāgaman
Sanskrit only: no published translation is held for this verse.
तत्राविनष्टावयवान् विद्यमानशिरोधरान् उशना जीवयामास संजीवन्या स्वविद्यया
tatrāvinaṣṭāvayavān vidyamānaśirodharān uśanā jīvayāmāsa saṃjīvanyā svavidyayā
Sanskrit only: no published translation is held for this verse.
बलिश्चोशनसा स्पृष्टः प्रत्यापन्नेन्द्रियस्मृतिः पराजितो ऽपि नाखिद्यल् लोकतत्त्वविचक्षणः
baliścośanasā spṛṣṭaḥ pratyāpannendriyasmṛtiḥ parājito 'pi nākhidyal lokatattvavicakṣaṇaḥ
Sanskrit only: no published translation is held for this verse.