Bhāgavata Purāṇa 8.12

श्रीबादरायणिरुवाच वृषध्वजो निशम्येदं योषिद्रूपेण दानवान् मोहयित्वा सुरगणान् हरिः सोममपाययत्

śrībādarāyaṇiruvāca vṛṣadhvajo niśamyedaṃ yoṣidrūpeṇa dānavān mohayitvā suragaṇān hariḥ somamapāyayat

Sanskrit only: no published translation is held for this verse.

वृषमारुह्य गिरिशः सर्वभूतगणैर्वृतः सह देव्या ययौ द्रष्टुं यत्रास्ते मधुसूदनः

vṛṣamāruhya giriśaḥ sarvabhūtagaṇairvṛtaḥ saha devyā yayau draṣṭuṃ yatrāste madhusūdanaḥ

Sanskrit only: no published translation is held for this verse.

सभाजितो भगवता सादरं सोमया भवः सूपविष्ट उवाचेदं प्रतिपूज्य स्मयन् हरिम्

sabhājito bhagavatā sādaraṃ somayā bhavaḥ sūpaviṣṭa uvācedaṃ pratipūjya smayan harim

Sanskrit only: no published translation is held for this verse.

श्रीमहादेव उवाच देवदेव जगद्व्यापिन् जगदीश जगन्मय सर्वेषामपि भावानां त्वमात्मा हेतुरीश्वरः

śrīmahādeva uvāca devadeva jagadvyāpin jagadīśa jaganmaya sarveṣāmapi bhāvānāṃ tvamātmā heturīśvaraḥ

Sanskrit only: no published translation is held for this verse.

आद्यन्तावस्य यन् मध्यमिदमन्यदहं बहिः यतो ऽव्ययस्य नैतानि तत् सत्यं ब्रह्म चिद्भवान्

ādyantāvasya yan madhyamidamanyadahaṃ bahiḥ yato 'vyayasya naitāni tat satyaṃ brahma cidbhavān

Sanskrit only: no published translation is held for this verse.

तवैव चरणाम्भोजं श्रेयस्कामा निराशिषः विसृज्योभयतः सङ्गं मुनयः समुपासते

tavaiva caraṇāmbhojaṃ śreyaskāmā nirāśiṣaḥ visṛjyobhayataḥ saṅgaṃ munayaḥ samupāsate

Sanskrit only: no published translation is held for this verse.

त्वं ब्रह्म पूर्णममृतं विगुणं विशोकम् आनन्दमात्रमविकारमनन्यदन्यत्

tvaṃ brahma pūrṇamamṛtaṃ viguṇaṃ viśokam ānandamātramavikāramananyadanyat

Sanskrit only: no published translation is held for this verse.

विश्वस्य हेतुरुदयस्थितिसंयमानाम् आत्मेश्वरश्च तदपेक्षतयानपेक्षः

viśvasya heturudayasthitisaṃyamānām ātmeśvaraśca tadapekṣatayānapekṣaḥ

Sanskrit only: no published translation is held for this verse.

एकस्त्वमेव सदसद्द्वयमद्वयं च स्वर्णं कृताकृतमिवेह न वस्तुभेदः

ekastvameva sadasaddvayamadvayaṃ ca svarṇaṃ kṛtākṛtamiveha na vastubhedaḥ

Sanskrit only: no published translation is held for this verse.

अज्ञानतस्त्वयि जनैर्विहितो विकल्पो यस्माद्गुणव्यतिकरो निरुपाधिकस्य

ajñānatastvayi janairvihito vikalpo yasmādguṇavyatikaro nirupādhikasya

Sanskrit only: no published translation is held for this verse.

त्वां ब्रह्म केचिदवयन्त्य् उत धर्ममेके एके परं सदसतोः पुरुषं परेशम्

tvāṃ brahma kecidavayanty uta dharmameke eke paraṃ sadasatoḥ puruṣaṃ pareśam

Sanskrit only: no published translation is held for this verse.

अन्ये ऽवयन्ति नवशक्तियुतं परं त्वां केचिन् महापुरुषमव्ययमात्मतन्त्रम्

anye 'vayanti navaśaktiyutaṃ paraṃ tvāṃ kecin mahāpuruṣamavyayamātmatantram

Sanskrit only: no published translation is held for this verse.

नाहं परायुरृषयो न मरीचिमुख्या जानन्ति यद्विरचितं खलु सत्त्वसर्गाः

nāhaṃ parāyurṛṣayo na marīcimukhyā jānanti yadviracitaṃ khalu sattvasargāḥ

Sanskrit only: no published translation is held for this verse.

श्रीशुक उवाच एवमभ्यर्थितो विष्णुर्भगवान् शूलपाणिना प्रहस्य भावगम्भीरं गिरिशं प्रत्यभाषत

śrīśuka uvāca evamabhyarthito viṣṇurbhagavān śūlapāṇinā prahasya bhāvagambhīraṃ giriśaṃ pratyabhāṣata

Sanskrit only: no published translation is held for this verse.

श्रीभगवान् उवाच कौतूहलाय दैत्यानां योषिद्वेषो मया धृतः पश्यता सुरकार्याणि गते पीयूषभाजने

śrībhagavān uvāca kautūhalāya daityānāṃ yoṣidveṣo mayā dhṛtaḥ paśyatā surakāryāṇi gate pīyūṣabhājane

Sanskrit only: no published translation is held for this verse.

तत् ते ऽहं दर्शयिष्यामि दिदृक्षोः सुरसत्तम कामिनां बहु मन्तव्यं सङ्कल्पप्रभवोदयम्

tat te 'haṃ darśayiṣyāmi didṛkṣoḥ surasattama kāmināṃ bahu mantavyaṃ saṅkalpaprabhavodayam

Sanskrit only: no published translation is held for this verse.

श्रीशुक उवाच इति ब्रुवाणो भगवांस्तत्रैवान्तरधीयत सर्वतश्चारयंश्चक्षुर्भव आस्ते सहोमया

śrīśuka uvāca iti bruvāṇo bhagavāṃstatraivāntaradhīyata sarvataścārayaṃścakṣurbhava āste sahomayā

Sanskrit only: no published translation is held for this verse.

ततो ददर्शोपवने वरस्त्रियं विचित्रपुष्पारुणपल्लवद्रुमे विक्रीडतीं कन्दुकलीलया लसद् दुकूलपर्यस्तनितम्बमेखलाम्

tato dadarśopavane varastriyaṃ vicitrapuṣpāruṇapallavadrume vikrīḍatīṃ kandukalīlayā lasad dukūlaparyastanitambamekhalām

Sanskrit only: no published translation is held for this verse.

आवर्तनोद्वर्तनकम्पितस्तन प्रकृष्टहारोरुभरैः पदे पदे प्रभज्यमानामिव मध्यतश्चलत् पदप्रवालं नयतीं ततस्ततः

āvartanodvartanakampitastana prakṛṣṭahārorubharaiḥ pade pade prabhajyamānāmiva madhyataścalat padapravālaṃ nayatīṃ tatastataḥ

Sanskrit only: no published translation is held for this verse.

दिक्षु भ्रमत्कन्दुकचापलैर्भृशं प्रोद्विग्नतारायतलोललोचनाम् स्वकर्णविभ्राजितकुण्डलोल्लसत् कपोलनीलालकमण्डिताननाम्

dikṣu bhramatkandukacāpalairbhṛśaṃ prodvignatārāyatalolalocanām svakarṇavibhrājitakuṇḍalollasat kapolanīlālakamaṇḍitānanām

Sanskrit only: no published translation is held for this verse.

श्लथद्दुकूलं कबरीं च विच्युतां सन्नह्यतीं वामकरेण वल्गुना विनिघ्नतीमन्यकरेण कन्दुकं विमोहयन्तीं जगदात्ममायया

ślathaddukūlaṃ kabarīṃ ca vicyutāṃ sannahyatīṃ vāmakareṇa valgunā vinighnatīmanyakareṇa kandukaṃ vimohayantīṃ jagadātmamāyayā

Sanskrit only: no published translation is held for this verse.

तां वीक्ष्य देव इति कन्दुकलीलयेषद् व्रीडास्फुटस्मितविसृष्टकटाक्षमुष्टः स्त्रीप्रेक्षणप्रतिसमीक्षणविह्वलात्मा नात्मानमन्तिक उमां स्वगणांश्च वेद

tāṃ vīkṣya deva iti kandukalīlayeṣad vrīḍāsphuṭasmitavisṛṣṭakaṭākṣamuṣṭaḥ strīprekṣaṇapratisamīkṣaṇavihvalātmā nātmānamantika umāṃ svagaṇāṃśca veda

Sanskrit only: no published translation is held for this verse.

तस्याः कराग्रात् स तु कन्दुको यदा गतो विदूरं तमनुव्रजत्स्त्रियाः वासः ससूत्रं लघु मारुतो ऽहरद् भवस्य देवस्य किलानुपश्यतः

tasyāḥ karāgrāt sa tu kanduko yadā gato vidūraṃ tamanuvrajatstriyāḥ vāsaḥ sasūtraṃ laghu māruto 'harad bhavasya devasya kilānupaśyataḥ

Sanskrit only: no published translation is held for this verse.

एवं तां रुचिरापाङ्गीं दर्शनीयां मनोरमाम् दृष्ट्वा तस्यां मनश्चक्रे विषज्जन्त्यां भवः किल

evaṃ tāṃ rucirāpāṅgīṃ darśanīyāṃ manoramām dṛṣṭvā tasyāṃ manaścakre viṣajjantyāṃ bhavaḥ kila

Sanskrit only: no published translation is held for this verse.

तयापहृतविज्ञानस्तत्कृतस्मरविह्वलः भवान्या अपि पश्यन्त्या गतह्रीस्तत्पदं ययौ

tayāpahṛtavijñānastatkṛtasmaravihvalaḥ bhavānyā api paśyantyā gatahrīstatpadaṃ yayau

Sanskrit only: no published translation is held for this verse.

सा तमायान्तमालोक्य विवस्त्रा व्रीडिता भृशम् निलीयमाना वृक्षेषु हसन्ती नान्वतिष्ठत

sā tamāyāntamālokya vivastrā vrīḍitā bhṛśam nilīyamānā vṛkṣeṣu hasantī nānvatiṣṭhata

Sanskrit only: no published translation is held for this verse.

तामन्वगच्छद्भगवान् भवः प्रमुषितेन्द्रियः कामस्य च वशं नीतः करेणुमिव यूथपः

tāmanvagacchadbhagavān bhavaḥ pramuṣitendriyaḥ kāmasya ca vaśaṃ nītaḥ kareṇumiva yūthapaḥ

Sanskrit only: no published translation is held for this verse.

सो ऽनुव्रज्यातिवेगेन गृहीत्वानिच्छतीं स्त्रियम् केशबन्ध उपानीय बाहुभ्यां परिषस्वजे

so 'nuvrajyātivegena gṛhītvānicchatīṃ striyam keśabandha upānīya bāhubhyāṃ pariṣasvaje

Sanskrit only: no published translation is held for this verse.

सोपगूढा भगवता करिणा करिणी यथा इतस्ततः प्रसर्पन्ती विप्रकीर्णशिरोरुहा

sopagūḍhā bhagavatā kariṇā kariṇī yathā itastataḥ prasarpantī viprakīrṇaśiroruhā

Sanskrit only: no published translation is held for this verse.

आत्मानं मोचयित्वाङ्ग सुरर्षभभुजान्तरात् प्राद्रवत् सा पृथुश्रोणी माया देवविनिर्मिता

ātmānaṃ mocayitvāṅga surarṣabhabhujāntarāt prādravat sā pṛthuśroṇī māyā devavinirmitā

Sanskrit only: no published translation is held for this verse.

तस्यासौ पदवीं रुद्रो विष्णोरद्भुतकर्मणः प्रत्यपद्यत कामेन वैरिणेव विनिर्जितः

tasyāsau padavīṃ rudro viṣṇoradbhutakarmaṇaḥ pratyapadyata kāmena vairiṇeva vinirjitaḥ

Sanskrit only: no published translation is held for this verse.

तस्यानुधावतो रेतश्चस्कन्दामोघरेतसः शुष्मिणो यूथपस्येव वासितामनुधावतः

tasyānudhāvato retaścaskandāmogharetasaḥ śuṣmiṇo yūthapasyeva vāsitāmanudhāvataḥ

Sanskrit only: no published translation is held for this verse.

यत्र यत्रापतन् मह्यां रेतस्तस्य महात्मनः तानि रूप्यस्य हेम्नश्च क्षेत्राण्य् आसन् महीपते

yatra yatrāpatan mahyāṃ retastasya mahātmanaḥ tāni rūpyasya hemnaśca kṣetrāṇy āsan mahīpate

Sanskrit only: no published translation is held for this verse.

सरित्सरःसु शैलेषु वनेषूपवनेषु च यत्र क्व चासन्नृषयस्तत्र सन्निहितो हरः

saritsaraḥsu śaileṣu vaneṣūpavaneṣu ca yatra kva cāsannṛṣayastatra sannihito haraḥ

Sanskrit only: no published translation is held for this verse.

स्कन्ने रेतसि सो ऽपश्यदात्मानं देवमायया जडीकृतं नृपश्रेष्ठ सन्न्यवर्तत कश्मलात्

skanne retasi so 'paśyadātmānaṃ devamāyayā jaḍīkṛtaṃ nṛpaśreṣṭha sannyavartata kaśmalāt

Sanskrit only: no published translation is held for this verse.

अथावगतमाहात्म्य आत्मनो जगदात्मनः अपरिज्ञेयवीर्यस्य न मेने तदु हाद्भुतम्

athāvagatamāhātmya ātmano jagadātmanaḥ aparijñeyavīryasya na mene tadu hādbhutam

Sanskrit only: no published translation is held for this verse.

तमविक्लवमव्रीडमालक्ष्य मधुसूदनः उवाच परमप्रीतो बिभ्रत् स्वां पौरुषीं तनुम्

tamaviklavamavrīḍamālakṣya madhusūdanaḥ uvāca paramaprīto bibhrat svāṃ pauruṣīṃ tanum

Sanskrit only: no published translation is held for this verse.

श्रीभगवान् उवाच दिष्ट्या त्वं विबुधश्रेष्ठ स्वां निष्ठामात्मना स्थितः यन् मे स्त्रीरूपया स्वैरं मोहितो ऽप्य् अङ्ग मायया

śrībhagavān uvāca diṣṭyā tvaṃ vibudhaśreṣṭha svāṃ niṣṭhāmātmanā sthitaḥ yan me strīrūpayā svairaṃ mohito 'py aṅga māyayā

Sanskrit only: no published translation is held for this verse.

को नु मे ऽतितरेन् मायां विषक्तस्त्वदृते पुमान् तांस्तान् विसृजतीं भावान् दुस्तरामकृतात्मभिः

ko nu me 'titaren māyāṃ viṣaktastvadṛte pumān tāṃstān visṛjatīṃ bhāvān dustarāmakṛtātmabhiḥ

Sanskrit only: no published translation is held for this verse.

सेयं गुणमयी माया न त्वामभिभविष्यति मया समेता कालेन कालरूपेण भागशः

seyaṃ guṇamayī māyā na tvāmabhibhaviṣyati mayā sametā kālena kālarūpeṇa bhāgaśaḥ

Sanskrit only: no published translation is held for this verse.

श्रीशुक उवाच एवं भगवता राजन् श्रीवत्साङ्केन सत्कृतः आमन्त्र्य तं परिक्रम्य सगणः स्वालयं ययौ

śrīśuka uvāca evaṃ bhagavatā rājan śrīvatsāṅkena satkṛtaḥ āmantrya taṃ parikramya sagaṇaḥ svālayaṃ yayau

Sanskrit only: no published translation is held for this verse.

आत्मांशभूतां तां मायां भवानीं भगवान् भवः सम्मतामृषिमुख्यानां प्रीत्याचष्टाथ भारत

ātmāṃśabhūtāṃ tāṃ māyāṃ bhavānīṃ bhagavān bhavaḥ sammatāmṛṣimukhyānāṃ prītyācaṣṭātha bhārata

Sanskrit only: no published translation is held for this verse.

अयि व्यपश्यस्त्वमजस्य मायां परस्य पुंसः परदेवतायाः अहं कलानामृषभो ऽपि मुह्ये ययावशो ऽन्ये किमुतास्वतन्त्राः

ayi vyapaśyastvamajasya māyāṃ parasya puṃsaḥ paradevatāyāḥ ahaṃ kalānāmṛṣabho 'pi muhye yayāvaśo 'nye kimutāsvatantrāḥ

Sanskrit only: no published translation is held for this verse.

यं मामपृच्छस्त्वमुपेत्य योगात् समासहस्रान्त उपारतं वै स एष साक्षात् पुरुषः पुराणो न यत्र कालो विशते न वेदः

yaṃ māmapṛcchastvamupetya yogāt samāsahasrānta upārataṃ vai sa eṣa sākṣāt puruṣaḥ purāṇo na yatra kālo viśate na vedaḥ

Sanskrit only: no published translation is held for this verse.

श्रीशुक उवाच इति ते ऽभिहितस्तात विक्रमः शार्ङ्गधन्वनः सिन्धोर्निर्मथने येन धृतः पृष्ठे महाचलः

śrīśuka uvāca iti te 'bhihitastāta vikramaḥ śārṅgadhanvanaḥ sindhornirmathane yena dhṛtaḥ pṛṣṭhe mahācalaḥ

Sanskrit only: no published translation is held for this verse.

एतन् मुहुः कीर्तयतो ऽनुशृण्वतो न रिष्यते जातु समुद्यमः क्वचित् यदुत्तमश्लोकगुणानुवर्णनं समस्तसंसारपरिश्रमापहम्

etan muhuḥ kīrtayato 'nuśṛṇvato na riṣyate jātu samudyamaḥ kvacit yaduttamaślokaguṇānuvarṇanaṃ samastasaṃsārapariśramāpaham

Sanskrit only: no published translation is held for this verse.

असदविषयमङ्घ्रिं भावगम्यं प्रपन्नान् अमृतममरवर्यान् आशयत् सिन्धुमथ्यम् कपटयुवतिवेषो मोहयन् यः सुरारींस् तमहमुपसृतानां कामपूरं नतो ऽस्मि

asadaviṣayamaṅghriṃ bhāvagamyaṃ prapannān amṛtamamaravaryān āśayat sindhumathyam kapaṭayuvativeṣo mohayan yaḥ surārīṃs tamahamupasṛtānāṃ kāmapūraṃ nato 'smi

Sanskrit only: no published translation is held for this verse.