Bhāgavata Purāṇa 8.13

श्रीशुक उवाच मनुर्विवस्वतः पुत्रः श्राद्धदेव इति श्रुतः सप्तमो वर्तमानो यस्तदपत्यानि मे शृणु

śrīśuka uvāca manurvivasvataḥ putraḥ śrāddhadeva iti śrutaḥ saptamo vartamāno yastadapatyāni me śṛṇu

Sanskrit only: no published translation is held for this verse.

इक्ष्वाकुर्नभगश्चैव धृष्टः शर्यातिरेव च नरिष्यन्तो ऽथ नाभागः सप्तमो दिष्ट उच्यते

ikṣvākurnabhagaścaiva dhṛṣṭaḥ śaryātireva ca nariṣyanto 'tha nābhāgaḥ saptamo diṣṭa ucyate

Sanskrit only: no published translation is held for this verse.

तरूषश्च पृषध्रश्च दशमो वसुमान् स्मृतः मनोर्वैवस्वतस्यैते दशपुत्राः परन्तप

tarūṣaśca pṛṣadhraśca daśamo vasumān smṛtaḥ manorvaivasvatasyaite daśaputrāḥ parantapa

Sanskrit only: no published translation is held for this verse.

आदित्या वसवो रुद्रा विश्वेदेवा मरुद्गणाः अश्विनावृभवो राजन्निन्द्रस्तेषां पुरन्दरः

ādityā vasavo rudrā viśvedevā marudgaṇāḥ aśvināvṛbhavo rājannindrasteṣāṃ purandaraḥ

Sanskrit only: no published translation is held for this verse.

कश्यपो ऽत्रिर्वसिष्ठश्च विश्वामित्रो ऽथ गौतमः जमदग्निर्भरद्वाज इति सप्तर्षयः स्मृताः

kaśyapo 'trirvasiṣṭhaśca viśvāmitro 'tha gautamaḥ jamadagnirbharadvāja iti saptarṣayaḥ smṛtāḥ

Sanskrit only: no published translation is held for this verse.

अत्रापि भगवज्जन्म कश्यपाददितेरभूत् आदित्यानामवरजो विष्णुर्वामनरूपधृक्

atrāpi bhagavajjanma kaśyapādaditerabhūt ādityānāmavarajo viṣṇurvāmanarūpadhṛk

Sanskrit only: no published translation is held for this verse.

सङ्क्षेपतो मयोक्तानि सप्तमन्वन्तराणि ते भविष्याण्य् अथ वक्ष्यामि विष्णोः शक्त्यान्वितानि च

saṅkṣepato mayoktāni saptamanvantarāṇi te bhaviṣyāṇy atha vakṣyāmi viṣṇoḥ śaktyānvitāni ca

Sanskrit only: no published translation is held for this verse.

विवस्वतश्च द्वे जाये विश्वकर्मसुते उभे संज्ञा छाया च राजेन्द्र ये प्राग् अभिहिते तव

vivasvataśca dve jāye viśvakarmasute ubhe saṃjñā chāyā ca rājendra ye prāg abhihite tava

Sanskrit only: no published translation is held for this verse.

तृतीयां वडवामेके तासां संज्ञासुतास्त्रयः यमो यमी श्राद्धदेवश्छायायाश्च सुतान् छृणु

tṛtīyāṃ vaḍavāmeke tāsāṃ saṃjñāsutāstrayaḥ yamo yamī śrāddhadevaśchāyāyāśca sutān chṛṇu

Sanskrit only: no published translation is held for this verse.

सावर्णिस्तपती कन्या भार्या संवरणस्य या शनैश्चरस्तृतीयो ऽभूदश्विनौ वडवात्मजौ

sāvarṇistapatī kanyā bhāryā saṃvaraṇasya yā śanaiścarastṛtīyo 'bhūdaśvinau vaḍavātmajau

Sanskrit only: no published translation is held for this verse.

अष्टमे ऽन्तर आयाते सावर्णिर्भविता मनुः निर्मोकविरजस्काद्याः सावर्णितनया नृप

aṣṭame 'ntara āyāte sāvarṇirbhavitā manuḥ nirmokavirajaskādyāḥ sāvarṇitanayā nṛpa

Sanskrit only: no published translation is held for this verse.

तत्र देवाः सुतपसो विरजा अमृतप्रभाः तेषां विरोचनसुतो बलिरिन्द्रो भविष्यति

tatra devāḥ sutapaso virajā amṛtaprabhāḥ teṣāṃ virocanasuto balirindro bhaviṣyati

Sanskrit only: no published translation is held for this verse.

दत्त्वेमां याचमानाय विष्णवे यः पदत्रयम् राद्धमिन्द्रपदं हित्वा ततः सिद्धिमवाप्स्यति

dattvemāṃ yācamānāya viṣṇave yaḥ padatrayam rāddhamindrapadaṃ hitvā tataḥ siddhimavāpsyati

Sanskrit only: no published translation is held for this verse.

यो ऽसौ भगवता बद्धः प्रीतेन सुतले पुनः निवेशितो ऽधिके स्वर्गादधुनास्ते स्वराड् इव

yo 'sau bhagavatā baddhaḥ prītena sutale punaḥ niveśito 'dhike svargādadhunāste svarāḍ iva

Sanskrit only: no published translation is held for this verse.

गालवो दीप्तिमान् रामो द्रोणपुत्रः कृपस्तथा ऋष्यशृङ्गः पितास्माकं भगवान् बादरायणः

gālavo dīptimān rāmo droṇaputraḥ kṛpastathā ṛṣyaśṛṅgaḥ pitāsmākaṃ bhagavān bādarāyaṇaḥ

Sanskrit only: no published translation is held for this verse.

इमे सप्तर्षयस्तत्र भविष्यन्ति स्वयोगतः इदानीमासते राजन् स्वे स्व आश्रममण्डले

ime saptarṣayastatra bhaviṣyanti svayogataḥ idānīmāsate rājan sve sva āśramamaṇḍale

Sanskrit only: no published translation is held for this verse.

देवगुह्यात् सरस्वत्यां सार्वभौम इति प्रभुः स्थानं पुरन्दराद्धृत्वा बलये दास्यतीश्वरः

devaguhyāt sarasvatyāṃ sārvabhauma iti prabhuḥ sthānaṃ purandarāddhṛtvā balaye dāsyatīśvaraḥ

Sanskrit only: no published translation is held for this verse.

नवमो दक्षसावर्णिर्मनुर्वरुणसम्भवः भूतकेतुर्दीप्तकेतुरित्य् आद्यास्तत्सुता नृप

navamo dakṣasāvarṇirmanurvaruṇasambhavaḥ bhūtaketurdīptaketurity ādyāstatsutā nṛpa

Sanskrit only: no published translation is held for this verse.

पारामरीचिगर्भाद्या देवा इन्द्रो ऽद्भुतः स्मृतः द्युतिमत्प्रमुखास्तत्र भविष्यन्त्य् ऋषयस्ततः

pārāmarīcigarbhādyā devā indro 'dbhutaḥ smṛtaḥ dyutimatpramukhāstatra bhaviṣyanty ṛṣayastataḥ

Sanskrit only: no published translation is held for this verse.

आयुष्मतो ऽम्बुधारायामृषभो भगवत्कला भविता येन संराद्धां त्रिलोकीं भोक्ष्यते ऽद्भुतः

āyuṣmato 'mbudhārāyāmṛṣabho bhagavatkalā bhavitā yena saṃrāddhāṃ trilokīṃ bhokṣyate 'dbhutaḥ

Sanskrit only: no published translation is held for this verse.

दशमो ब्रह्मसावर्णिरुपश्लोकसुतो मनुः तत्सुता भूरिषेणाद्या हविष्मत् प्रमुखा द्विजाः

daśamo brahmasāvarṇirupaślokasuto manuḥ tatsutā bhūriṣeṇādyā haviṣmat pramukhā dvijāḥ

Sanskrit only: no published translation is held for this verse.

हविष्मान् सुकृतः सत्यो जयो मूर्तिस्तदा द्विजाः सुवासनविरुद्धाद्या देवाः शम्भुः सुरेश्वरः

haviṣmān sukṛtaḥ satyo jayo mūrtistadā dvijāḥ suvāsanaviruddhādyā devāḥ śambhuḥ sureśvaraḥ

Sanskrit only: no published translation is held for this verse.

विष्वक्सेनो विषूच्यां तु शम्भोः सख्यं करिष्यति जातः स्वांशेन भगवान् गृहे विश्वसृजो विभुः

viṣvakseno viṣūcyāṃ tu śambhoḥ sakhyaṃ kariṣyati jātaḥ svāṃśena bhagavān gṛhe viśvasṛjo vibhuḥ

Sanskrit only: no published translation is held for this verse.

मनुर्वै धर्मसावर्णिरेकादशम आत्मवान् अनागतास्तत्सुताश्च सत्यधर्मादयो दश

manurvai dharmasāvarṇirekādaśama ātmavān anāgatāstatsutāśca satyadharmādayo daśa

Sanskrit only: no published translation is held for this verse.

विहङ्गमाः कामगमा निर्वाणरुचयः सुराः इन्द्रश्च वैधृतस्तेषामृषयश्चारुणादयः

vihaṅgamāḥ kāmagamā nirvāṇarucayaḥ surāḥ indraśca vaidhṛtasteṣāmṛṣayaścāruṇādayaḥ

Sanskrit only: no published translation is held for this verse.

आर्यकस्य सुतस्तत्र धर्मसेतुरिति स्मृतः वैधृतायां हरेरंशस्त्रिलोकीं धारयिष्यति

āryakasya sutastatra dharmaseturiti smṛtaḥ vaidhṛtāyāṃ hareraṃśastrilokīṃ dhārayiṣyati

Sanskrit only: no published translation is held for this verse.

भविता रुद्रसावर्णी राजन् द्वादशमो मनुः देववान् उपदेवश्च देवश्रेष्ठादयः सुताः

bhavitā rudrasāvarṇī rājan dvādaśamo manuḥ devavān upadevaśca devaśreṣṭhādayaḥ sutāḥ

Sanskrit only: no published translation is held for this verse.

ऋतधामा च तत्रेन्द्रो देवाश्च हरितादयः ऋषयश्च तपोमूर्तिस्तपस्व्य् आग्नीध्रकादयः

ṛtadhāmā ca tatrendro devāśca haritādayaḥ ṛṣayaśca tapomūrtistapasvy āgnīdhrakādayaḥ

Sanskrit only: no published translation is held for this verse.

स्वधामाख्यो हरेरंशः साधयिष्यति तन्मनोः अन्तरं सत्यसहसः सुनृतायाः सुतो विभुः

svadhāmākhyo hareraṃśaḥ sādhayiṣyati tanmanoḥ antaraṃ satyasahasaḥ sunṛtāyāḥ suto vibhuḥ

Sanskrit only: no published translation is held for this verse.

मनुस्त्रयोदशो भाव्यो देवसावर्णिरात्मवान् चित्रसेनविचित्राद्या देवसावर्णिदेहजाः

manustrayodaśo bhāvyo devasāvarṇirātmavān citrasenavicitrādyā devasāvarṇidehajāḥ

Sanskrit only: no published translation is held for this verse.

देवाः सुकर्मसुत्राम संज्ञा इन्द्रो दिवस्पतिः निर्मोकतत्त्वदर्शाद्या भविष्यन्त्य् ऋषयस्तदा

devāḥ sukarmasutrāma saṃjñā indro divaspatiḥ nirmokatattvadarśādyā bhaviṣyanty ṛṣayastadā

Sanskrit only: no published translation is held for this verse.

देवहोत्रस्य तनय उपहर्ता दिवस्पतेः योगेश्वरो हरेरंशो बृहत्यां सम्भविष्यति

devahotrasya tanaya upahartā divaspateḥ yogeśvaro hareraṃśo bṛhatyāṃ sambhaviṣyati

Sanskrit only: no published translation is held for this verse.

मनुर्वा इन्द्रसावर्णिश्चतुर्दशम एष्यति उरुगम्भीरबुधाद्या इन्द्रसावर्णिवीर्यजाः

manurvā indrasāvarṇiścaturdaśama eṣyati urugambhīrabudhādyā indrasāvarṇivīryajāḥ

Sanskrit only: no published translation is held for this verse.

पवित्राश्चाक्षुषा देवाः शुचिरिन्द्रो भविष्यति अग्निर्बाहुः शुचिः शुद्धो मागधाद्यास्तपस्विनः

pavitrāścākṣuṣā devāḥ śucirindro bhaviṣyati agnirbāhuḥ śuciḥ śuddho māgadhādyāstapasvinaḥ

Sanskrit only: no published translation is held for this verse.

सत्रायणस्य तनयो बृहद्भानुस्तदा हरिः वितानायां महाराज क्रियातन्तून् वितायिता

satrāyaṇasya tanayo bṛhadbhānustadā hariḥ vitānāyāṃ mahārāja kriyātantūn vitāyitā

Sanskrit only: no published translation is held for this verse.

राजंश्चतुर्दशैतानि त्रिकालानुगतानि ते प्रोक्तान्य् एभिर्मितः कल्पो युगसाहस्रपर्ययः

rājaṃścaturdaśaitāni trikālānugatāni te proktāny ebhirmitaḥ kalpo yugasāhasraparyayaḥ

Sanskrit only: no published translation is held for this verse.