Bhāgavata Purāṇa 8.15

श्रीराजोवाच बलेः पदत्रयं भूमेः कस्माद्धरिरयाचत भूतेश्वरः कृपणवल् लब्धार्थो ऽपि बबन्ध तम्

śrīrājovāca baleḥ padatrayaṃ bhūmeḥ kasmāddharirayācata bhūteśvaraḥ kṛpaṇaval labdhārtho 'pi babandha tam

Sanskrit only: no published translation is held for this verse.

एतद्वेदितुमिच्छामो महत् कौतूहलं हि नः यज्ञेश्वरस्य पूर्णस्य बन्धनं चाप्य् अनागसः

etadveditumicchāmo mahat kautūhalaṃ hi naḥ yajñeśvarasya pūrṇasya bandhanaṃ cāpy anāgasaḥ

Sanskrit only: no published translation is held for this verse.

श्रीशुक उवाच पराजितश्रीरसुभिश्च हापितो हीन्द्रेण राजन् भृगुभिः स जीवितः सर्वात्मना तान् अभजद्भृगून् बलिः शिष्यो महात्मार्थनिवेदनेन

śrīśuka uvāca parājitaśrīrasubhiśca hāpito hīndreṇa rājan bhṛgubhiḥ sa jīvitaḥ sarvātmanā tān abhajadbhṛgūn baliḥ śiṣyo mahātmārthanivedanena

Sanskrit only: no published translation is held for this verse.

तं ब्राह्मणा भृगवः प्रीयमाणा अयाजयन् विश्वजिता त्रिणाकम् जिगीषमाणं विधिनाभिषिच्य महाभिषेकेण महानुभावाः

taṃ brāhmaṇā bhṛgavaḥ prīyamāṇā ayājayan viśvajitā triṇākam jigīṣamāṇaṃ vidhinābhiṣicya mahābhiṣekeṇa mahānubhāvāḥ

Sanskrit only: no published translation is held for this verse.

ततो रथः काञ्चनपट्टनद्धो हयाश्च हर्यश्वतुरङ्गवर्णाः ध्वजश्च सिंहेन विराजमानो हुताशनादास हविर्भिरिष्टात्

tato rathaḥ kāñcanapaṭṭanaddho hayāśca haryaśvaturaṅgavarṇāḥ dhvajaśca siṃhena virājamāno hutāśanādāsa havirbhiriṣṭāt

Sanskrit only: no published translation is held for this verse.

धनुश्च दिव्यं पुरटोपनद्धं तूणावरिक्तौ कवचं च दिव्यम् पितामहस्तस्य ददौ च मालाम् अम्लानपुष्पां जलजं च शुक्रः

dhanuśca divyaṃ puraṭopanaddhaṃ tūṇāvariktau kavacaṃ ca divyam pitāmahastasya dadau ca mālām amlānapuṣpāṃ jalajaṃ ca śukraḥ

Sanskrit only: no published translation is held for this verse.

एवं स विप्रार्जितयोधनार्थस् तैः कल्पितस्वस्त्ययनो ऽथ विप्रान् प्रदक्षिणीकृत्य कृतप्रणामः प्रह्रादमामन्त्र्य नमश्चकार

evaṃ sa viprārjitayodhanārthas taiḥ kalpitasvastyayano 'tha viprān pradakṣiṇīkṛtya kṛtapraṇāmaḥ prahrādamāmantrya namaścakāra

Sanskrit only: no published translation is held for this verse.

अथारुह्य रथं दिव्यं भृगुदत्तं महारथः सुस्रग्धरो ऽथ सन्नह्य धन्वी खड्गी धृतेषुधिः

athāruhya rathaṃ divyaṃ bhṛgudattaṃ mahārathaḥ susragdharo 'tha sannahya dhanvī khaḍgī dhṛteṣudhiḥ

Sanskrit only: no published translation is held for this verse.

हेमाङ्गदलसद्बाहुः स्फुरन्मकरकुण्डलः रराज रथमारूढो धिष्ण्यस्थ इव हव्यवाट्

hemāṅgadalasadbāhuḥ sphuranmakarakuṇḍalaḥ rarāja rathamārūḍho dhiṣṇyastha iva havyavāṭ

Sanskrit only: no published translation is held for this verse.

तुल्यैश्वर्यबलश्रीभिः स्वयूथैर्दैत्ययूथपैः पिबद्भिरिव खं दृग्भिर्दहद्भिः परिधीन् इव

tulyaiśvaryabalaśrībhiḥ svayūthairdaityayūthapaiḥ pibadbhiriva khaṃ dṛgbhirdahadbhiḥ paridhīn iva

Sanskrit only: no published translation is held for this verse.

वृतो विकर्षन् महतीमासुरीं ध्वजिनीं विभुः ययाविन्द्रपुरीं स्वृद्धां कम्पयन्निव रोदसी

vṛto vikarṣan mahatīmāsurīṃ dhvajinīṃ vibhuḥ yayāvindrapurīṃ svṛddhāṃ kampayanniva rodasī

Sanskrit only: no published translation is held for this verse.

रम्यामुपवनोद्यानैः श्रीमद्भिर्नन्दनादिभिः कूजद्विहङ्गमिथुनैर्गायन्मत्तमधुव्रतैः

ramyāmupavanodyānaiḥ śrīmadbhirnandanādibhiḥ kūjadvihaṅgamithunairgāyanmattamadhuvrataiḥ

Sanskrit only: no published translation is held for this verse.

प्रवालफलपुष्पोरु भारशाखामरद्रुमैः हंससारसचक्राह्व कारण्डवकुलाकुलाः नलिन्यो यत्र क्रीडन्ति प्रमदाः सुरसेविताः

pravālaphalapuṣporu bhāraśākhāmaradrumaiḥ haṃsasārasacakrāhva kāraṇḍavakulākulāḥ nalinyo yatra krīḍanti pramadāḥ surasevitāḥ

Sanskrit only: no published translation is held for this verse.

आकाशगङ्गया देव्या वृतां परिखभूतया प्राकारेणाग्निवर्णेन साट्टालेनोन्नतेन च

ākāśagaṅgayā devyā vṛtāṃ parikhabhūtayā prākāreṇāgnivarṇena sāṭṭālenonnatena ca

Sanskrit only: no published translation is held for this verse.

रुक्मपट्टकपाटैश्च द्वारैः स्फटिकगोपुरैः जुष्टां विभक्तप्रपथां विश्वकर्मविनिर्मिताम्

rukmapaṭṭakapāṭaiśca dvāraiḥ sphaṭikagopuraiḥ juṣṭāṃ vibhaktaprapathāṃ viśvakarmavinirmitām

Sanskrit only: no published translation is held for this verse.

सभाचत्वररथ्याढ्यां विमानैर्न्यर्बुदैर्युताम् शृङ्गाटकैर्मणिमयैर्वज्रविद्रुमवेदिभिः

sabhācatvararathyāḍhyāṃ vimānairnyarbudairyutām śṛṅgāṭakairmaṇimayairvajravidrumavedibhiḥ

Sanskrit only: no published translation is held for this verse.

यत्र नित्यवयोरूपाः श्यामा विरजवाससः भ्राजन्ते रूपवन्नार्यो ह्य् अर्चिर्भिरिव वह्नयः

yatra nityavayorūpāḥ śyāmā virajavāsasaḥ bhrājante rūpavannāryo hy arcirbhiriva vahnayaḥ

Sanskrit only: no published translation is held for this verse.

सुरस्त्रीकेशविभ्रष्ट नवसौगन्धिकस्रजाम् यत्रामोदमुपादाय मार्ग आवाति मारुतः

surastrīkeśavibhraṣṭa navasaugandhikasrajām yatrāmodamupādāya mārga āvāti mārutaḥ

Sanskrit only: no published translation is held for this verse.

हेमजालाक्षनिर्गच्छद् धूमेनागुरुगन्धिना पाण्डुरेण प्रतिच्छन्न मार्गे यान्ति सुरप्रियाः

hemajālākṣanirgacchad dhūmenāgurugandhinā pāṇḍureṇa praticchanna mārge yānti surapriyāḥ

Sanskrit only: no published translation is held for this verse.

मुक्तावितानैर्मणिहेमकेतुभिर् नानापताकावलभीभिरावृताम् शिखण्डिपारावतभृङ्गनादितां वैमानिकस्त्रीकलगीतमङ्गलाम्

muktāvitānairmaṇihemaketubhir nānāpatākāvalabhībhirāvṛtām śikhaṇḍipārāvatabhṛṅganāditāṃ vaimānikastrīkalagītamaṅgalām

Sanskrit only: no published translation is held for this verse.

मृदङ्गशङ्खानकदुन्दुभिस्वनैः सतालवीणामुरजेष्टवेणुभिः नृत्यैः सवाद्यैरुपदेवगीतकैर् मनोरमां स्वप्रभया जितप्रभाम्

mṛdaṅgaśaṅkhānakadundubhisvanaiḥ satālavīṇāmurajeṣṭaveṇubhiḥ nṛtyaiḥ savādyairupadevagītakair manoramāṃ svaprabhayā jitaprabhām

Sanskrit only: no published translation is held for this verse.

यां न व्रजन्त्य् अधर्मिष्ठाः खला भूतद्रुहः शठाः मानिनः कामिनो लुब्धा एभिर्हीना व्रजन्ति यत्

yāṃ na vrajanty adharmiṣṭhāḥ khalā bhūtadruhaḥ śaṭhāḥ māninaḥ kāmino lubdhā ebhirhīnā vrajanti yat

Sanskrit only: no published translation is held for this verse.

तां देवधानीं स वरूथिनीपतिर् बहिः समन्ताद्रुरुधे पृतन्यया आचार्यदत्तं जलजं महास्वनं दध्मौ प्रयुञ्जन् भयमिन्द्रयोषिताम्

tāṃ devadhānīṃ sa varūthinīpatir bahiḥ samantādrurudhe pṛtanyayā ācāryadattaṃ jalajaṃ mahāsvanaṃ dadhmau prayuñjan bhayamindrayoṣitām

Sanskrit only: no published translation is held for this verse.

मघवांस्तमभिप्रेत्य बलेः परममुद्यमम् सर्वदेवगणोपेतो गुरुमेतदुवाच ह

maghavāṃstamabhipretya baleḥ paramamudyamam sarvadevagaṇopeto gurumetaduvāca ha

Sanskrit only: no published translation is held for this verse.

भगवन्नुद्यमो भूयान् बलेर्नः पूर्ववैरिणः अविषह्यमिमं मन्ये केनासीत् तेजसोर्जितः

bhagavannudyamo bhūyān balernaḥ pūrvavairiṇaḥ aviṣahyamimaṃ manye kenāsīt tejasorjitaḥ

Sanskrit only: no published translation is held for this verse.

नैनं कश्चित् कुतो वापि प्रतिव्योढुमधीश्वरः पिबन्निव मुखेनेदं लिहन्निव दिशो दश दहन्निव दिशो दृग्भिः संवर्ताग्निरिवोत्थितः

nainaṃ kaścit kuto vāpi prativyoḍhumadhīśvaraḥ pibanniva mukhenedaṃ lihanniva diśo daśa dahanniva diśo dṛgbhiḥ saṃvartāgnirivotthitaḥ

Sanskrit only: no published translation is held for this verse.

ब्रूहि कारणमेतस्य दुर्धर्षत्वस्य मद्रिपोः ओजः सहो बलं तेजो यत एतत् समुद्यमः

brūhi kāraṇametasya durdharṣatvasya madripoḥ ojaḥ saho balaṃ tejo yata etat samudyamaḥ

Sanskrit only: no published translation is held for this verse.

श्रीगुरुरुवाच जानामि मघवन् छत्रोरुन्नतेरस्य कारणम् शिष्यायोपभृतं तेजो भृगुभिर्ब्रह्मवादिभिः

śrīgururuvāca jānāmi maghavan chatrorunnaterasya kāraṇam śiṣyāyopabhṛtaṃ tejo bhṛgubhirbrahmavādibhiḥ

Sanskrit only: no published translation is held for this verse.

ओजस्विनं बलिं जेतुं न समर्थो ऽस्ति कश्चन भवद्विधो भवान् वापि वर्जयित्वेश्वरं हरिम्

ojasvinaṃ baliṃ jetuṃ na samartho 'sti kaścana bhavadvidho bhavān vāpi varjayitveśvaraṃ harim

Sanskrit only: no published translation is held for this verse.

विजेष्यति न को ऽप्य् एनं ब्रह्मतेजःसमेधितम् नास्य शक्तः पुरः स्थातुं कृतान्तस्य यथा जनाः

vijeṣyati na ko 'py enaṃ brahmatejaḥsamedhitam nāsya śaktaḥ puraḥ sthātuṃ kṛtāntasya yathā janāḥ

Sanskrit only: no published translation is held for this verse.

तस्मान् निलयमुत्सृज्य यूयं सर्वे त्रिविष्टपम् यात कालं प्रतीक्षन्तो यतः शत्रोर्विपर्ययः

tasmān nilayamutsṛjya yūyaṃ sarve triviṣṭapam yāta kālaṃ pratīkṣanto yataḥ śatrorviparyayaḥ

Sanskrit only: no published translation is held for this verse.

एष विप्रबलोदर्कः सम्प्रत्य् ऊर्जितविक्रमः तेषामेवापमानेन सानुबन्धो विनङ्क्ष्यति

eṣa viprabalodarkaḥ sampraty ūrjitavikramaḥ teṣāmevāpamānena sānubandho vinaṅkṣyati

Sanskrit only: no published translation is held for this verse.

एवं सुमन्त्रितार्थास्ते गुरुणार्थानुदर्शिना हित्वा त्रिविष्टपं जग्मुर्गीर्वाणाः कामरूपिणः

evaṃ sumantritārthāste guruṇārthānudarśinā hitvā triviṣṭapaṃ jagmurgīrvāṇāḥ kāmarūpiṇaḥ

Sanskrit only: no published translation is held for this verse.

देवेष्वथ निलीनेषु बलिर्वैरोचनः पुरीम् देवधानीमधिष्ठाय वशं निन्ये जगत्त्रयम्

deveṣvatha nilīneṣu balirvairocanaḥ purīm devadhānīmadhiṣṭhāya vaśaṃ ninye jagattrayam

Sanskrit only: no published translation is held for this verse.

तं विश्वजयिनं शिष्यं भृगवः शिष्यवत्सलाः शतेन हयमेधानामनुव्रतमयाजयन्

taṃ viśvajayinaṃ śiṣyaṃ bhṛgavaḥ śiṣyavatsalāḥ śatena hayamedhānāmanuvratamayājayan

Sanskrit only: no published translation is held for this verse.

ततस्तदनुभावेन भुवनत्रयविश्रुताम् कीर्तिं दिक्षुवितन्वानः स रेज उडुराड् इव

tatastadanubhāvena bhuvanatrayaviśrutām kīrtiṃ dikṣuvitanvānaḥ sa reja uḍurāḍ iva

Sanskrit only: no published translation is held for this verse.

बुभुजे च श्रियं स्वृद्धां द्विजदेवोपलम्भिताम् कृतकृत्यमिवात्मानं मन्यमानो महामनाः

bubhuje ca śriyaṃ svṛddhāṃ dvijadevopalambhitām kṛtakṛtyamivātmānaṃ manyamāno mahāmanāḥ

Sanskrit only: no published translation is held for this verse.