Bhāgavata Purāṇa 8.18

श्रीशुक उवाच इत्थं विरिञ्चस्तुतकर्मवीर्यः प्रादुर्बभूवामृतभूरदित्याम् चतुर्भुजः शङ्खगदाब्जचक्रः पिशङ्गवासा नलिनायतेक्षणः

śrīśuka uvāca itthaṃ viriñcastutakarmavīryaḥ prādurbabhūvāmṛtabhūradityām caturbhujaḥ śaṅkhagadābjacakraḥ piśaṅgavāsā nalināyatekṣaṇaḥ

Sanskrit only: no published translation is held for this verse.

श्यामावदातो झषराजकुण्डल त्विषोल्लसच्छ्रीवदनाम्बुजः पुमान् श्रीवत्सवक्षा बलयाङ्गदोल्लसत् किरीटकाञ्चीगुणचारुनूपुरः

śyāmāvadāto jhaṣarājakuṇḍala tviṣollasacchrīvadanāmbujaḥ pumān śrīvatsavakṣā balayāṅgadollasat kirīṭakāñcīguṇacārunūpuraḥ

Sanskrit only: no published translation is held for this verse.

मधुव्रातव्रतविघुष्टया स्वया विराजितः श्रीवनमालया हरिः प्रजापतेर्वेश्मतमः स्वरोचिषा विनाशयन् कण्ठनिविष्टकौस्तुभः

madhuvrātavratavighuṣṭayā svayā virājitaḥ śrīvanamālayā hariḥ prajāpaterveśmatamaḥ svarociṣā vināśayan kaṇṭhaniviṣṭakaustubhaḥ

Sanskrit only: no published translation is held for this verse.

दिशः प्रसेदुः सलिलाशयास्तदा प्रजाः प्रहृष्टा ऋतवो गुणान्विताः द्यौरन्तरीक्षं क्षितिरग्निजिह्वा गावो द्विजाः सञ्जहृषुर्नगाश्च

diśaḥ praseduḥ salilāśayāstadā prajāḥ prahṛṣṭā ṛtavo guṇānvitāḥ dyaurantarīkṣaṃ kṣitiragnijihvā gāvo dvijāḥ sañjahṛṣurnagāśca

Sanskrit only: no published translation is held for this verse.

श्रोणायां श्रवणद्वादश्यां मुहूर्ते ऽभिजिति प्रभुः सर्वे नक्षत्रताराद्याश् चक्रुस्तज्जन्म दक्षिणम्

śroṇāyāṃ śravaṇadvādaśyāṃ muhūrte 'bhijiti prabhuḥ sarve nakṣatratārādyāś cakrustajjanma dakṣiṇam

Sanskrit only: no published translation is held for this verse.

द्वादश्यां सवितातिष्ठन् मध्यन्दिनगतो नृप विजयानाम सा प्रोक्ता यस्यां जन्म विदुर्हरेः

dvādaśyāṃ savitātiṣṭhan madhyandinagato nṛpa vijayānāma sā proktā yasyāṃ janma vidurhareḥ

Sanskrit only: no published translation is held for this verse.

शङ्खदुन्दुभयो नेदुर्मृदङ्गपणवानकाः चित्रवादित्रतूर्याणां निर्घोषस्तुमुलो ऽभवत्

śaṅkhadundubhayo nedurmṛdaṅgapaṇavānakāḥ citravāditratūryāṇāṃ nirghoṣastumulo 'bhavat

Sanskrit only: no published translation is held for this verse.

प्रीताश्चाप्सरसो ऽनृत्यन् गन्धर्वप्रवरा जगुः तुष्टुवुर्मुनयो देवा मनवः पितरो ऽग्नयः

prītāścāpsaraso 'nṛtyan gandharvapravarā jaguḥ tuṣṭuvurmunayo devā manavaḥ pitaro 'gnayaḥ

Sanskrit only: no published translation is held for this verse.

सिद्धविद्याधरगणाः सकिम्पुरुषकिन्नराः चारणा यक्षरक्षांसि सुपर्णा भुजगोत्तमाः

siddhavidyādharagaṇāḥ sakimpuruṣakinnarāḥ cāraṇā yakṣarakṣāṃsi suparṇā bhujagottamāḥ

Sanskrit only: no published translation is held for this verse.

गायन्तो ऽतिप्रशंसन्तो नृत्यन्तो विबुधानुगाः अदित्या आश्रमपदं कुसुमैः समवाकिरन्

gāyanto 'tipraśaṃsanto nṛtyanto vibudhānugāḥ adityā āśramapadaṃ kusumaiḥ samavākiran

Sanskrit only: no published translation is held for this verse.

दृष्ट्वादितिस्तं निजगर्भसम्भवं परं पुमांसं मुदमाप विस्मिता गृहीतदेहं निजयोगमायया प्रजापतिश्चाह जयेति विस्मितः

dṛṣṭvāditistaṃ nijagarbhasambhavaṃ paraṃ pumāṃsaṃ mudamāpa vismitā gṛhītadehaṃ nijayogamāyayā prajāpatiścāha jayeti vismitaḥ

Sanskrit only: no published translation is held for this verse.

यत् तद्वपुर्भाति विभूषणायुधैर् अव्यक्तचिद्व्यक्तमधारयद्धरिः बभूव तेनैव स वामनो वटुः सम्पश्यतोर्दिव्यगतिर्यथा नटः

yat tadvapurbhāti vibhūṣaṇāyudhair avyaktacidvyaktamadhārayaddhariḥ babhūva tenaiva sa vāmano vaṭuḥ sampaśyatordivyagatiryathā naṭaḥ

Sanskrit only: no published translation is held for this verse.

तं वटुं वामनं दृष्ट्वा मोदमाना महर्षयः कर्माणि कारयामासुः पुरस्कृत्य प्रजापतिम्

taṃ vaṭuṃ vāmanaṃ dṛṣṭvā modamānā maharṣayaḥ karmāṇi kārayāmāsuḥ puraskṛtya prajāpatim

Sanskrit only: no published translation is held for this verse.

तस्योपनीयमानस्य सावित्रीं सविताब्रवीत् बृहस्पतिर्ब्रह्मसूत्रं मेखलां कश्यपो ऽददात्

tasyopanīyamānasya sāvitrīṃ savitābravīt bṛhaspatirbrahmasūtraṃ mekhalāṃ kaśyapo 'dadāt

Sanskrit only: no published translation is held for this verse.

ददौ कृष्णाजिनं भूमिर्दण्डं सोमो वनस्पतिः कौपीनाच्छादनं माता द्यौश्छत्रं जगतः पतेः

dadau kṛṣṇājinaṃ bhūmirdaṇḍaṃ somo vanaspatiḥ kaupīnācchādanaṃ mātā dyauśchatraṃ jagataḥ pateḥ

Sanskrit only: no published translation is held for this verse.

कमण्डलुं वेदगर्भः कुशान् सप्तर्षयो ददुः अक्षमालां महाराज सरस्वत्य् अव्ययात्मनः

kamaṇḍaluṃ vedagarbhaḥ kuśān saptarṣayo daduḥ akṣamālāṃ mahārāja sarasvaty avyayātmanaḥ

Sanskrit only: no published translation is held for this verse.

तस्मा इत्य् उपनीताय यक्षराट् पात्रिकामदात् भिक्षां भगवती साक्षादुमादादम्बिका सती

tasmā ity upanītāya yakṣarāṭ pātrikāmadāt bhikṣāṃ bhagavatī sākṣādumādādambikā satī

Sanskrit only: no published translation is held for this verse.

स ब्रह्मवर्चसेनैवं सभां सम्भावितो वटुः ब्रह्मर्षिगणसञ्जुष्टामत्यरोचत मारिषः

sa brahmavarcasenaivaṃ sabhāṃ sambhāvito vaṭuḥ brahmarṣigaṇasañjuṣṭāmatyarocata māriṣaḥ

Sanskrit only: no published translation is held for this verse.

समिद्धमाहितं वह्निं कृत्वा परिसमूहनम् परिस्तीर्य समभ्यर्च्य समिद्भिरजुहोद्द्विजः

samiddhamāhitaṃ vahniṃ kṛtvā parisamūhanam paristīrya samabhyarcya samidbhirajuhoddvijaḥ

Sanskrit only: no published translation is held for this verse.

श्रुत्वाश्वमेधैर्यजमानमूर्जितं बलिं भृगूणामुपकल्पितैस्ततः जगाम तत्राखिलसारसम्भृतो भारेण गां सन्नमयन् पदे पदे

śrutvāśvamedhairyajamānamūrjitaṃ baliṃ bhṛgūṇāmupakalpitaistataḥ jagāma tatrākhilasārasambhṛto bhāreṇa gāṃ sannamayan pade pade

Sanskrit only: no published translation is held for this verse.

तं नर्मदायास्तट उत्तरे बलेर् य ऋत्विजस्ते भृगुकच्छसंज्ञके प्रवर्तयन्तो भृगवः क्रतूत्तमं व्यचक्षतारादुदितं यथा रविम्

taṃ narmadāyāstaṭa uttare baler ya ṛtvijaste bhṛgukacchasaṃjñake pravartayanto bhṛgavaḥ kratūttamaṃ vyacakṣatārāduditaṃ yathā ravim

Sanskrit only: no published translation is held for this verse.

ते ऋत्विजो यजमानः सदस्या हतत्विषो वामनतेजसा नृप सूर्यः किलायात्य् उत वा विभावसुः सनत्कुमारो ऽथ दिदृक्षया क्रतोः

te ṛtvijo yajamānaḥ sadasyā hatatviṣo vāmanatejasā nṛpa sūryaḥ kilāyāty uta vā vibhāvasuḥ sanatkumāro 'tha didṛkṣayā kratoḥ

Sanskrit only: no published translation is held for this verse.

इत्थं सशिष्येषु भृगुष्वनेकधा वितर्क्यमाणो भगवान् स वामनः छत्रं सदण्डं सजलं कमण्डलुं विवेश बिभ्रद्धयमेधवाटम्

itthaṃ saśiṣyeṣu bhṛguṣvanekadhā vitarkyamāṇo bhagavān sa vāmanaḥ chatraṃ sadaṇḍaṃ sajalaṃ kamaṇḍaluṃ viveśa bibhraddhayamedhavāṭam

Sanskrit only: no published translation is held for this verse.

मौञ्ज्या मेखलया वीतमुपवीताजिनोत्तरम् जटिलं वामनं विप्रं मायामाणवकं हरिम्

mauñjyā mekhalayā vītamupavītājinottaram jaṭilaṃ vāmanaṃ vipraṃ māyāmāṇavakaṃ harim

Sanskrit only: no published translation is held for this verse.

प्रविष्टं वीक्ष्य भृगवः सशिष्यास्ते सहाग्निभिः प्रत्यगृह्णन् समुत्थाय सङ्क्षिप्तास्तस्य तेजसा

praviṣṭaṃ vīkṣya bhṛgavaḥ saśiṣyāste sahāgnibhiḥ pratyagṛhṇan samutthāya saṅkṣiptāstasya tejasā

Sanskrit only: no published translation is held for this verse.

यजमानः प्रमुदितो दर्शनीयं मनोरमम् रूपानुरूपावयवं तस्मा आसनमाहरत्

yajamānaḥ pramudito darśanīyaṃ manoramam rūpānurūpāvayavaṃ tasmā āsanamāharat

Sanskrit only: no published translation is held for this verse.

स्वागतेनाभिनन्द्याथ पादौ भगवतो बलिः अवनिज्यार्चयामास मुक्तसङ्गमनोरमम्

svāgatenābhinandyātha pādau bhagavato baliḥ avanijyārcayāmāsa muktasaṅgamanoramam

Sanskrit only: no published translation is held for this verse.

तत्पादशौचं जनकल्मषापहं स धर्मविन् मूर्ध्न्य् अदधात् सुमङ्गलम् यद्देवदेवो गिरिशश्चन्द्रमौलिर् दधार मूर्ध्ना परया च भक्त्या

tatpādaśaucaṃ janakalmaṣāpahaṃ sa dharmavin mūrdhny adadhāt sumaṅgalam yaddevadevo giriśaścandramaulir dadhāra mūrdhnā parayā ca bhaktyā

Sanskrit only: no published translation is held for this verse.

श्रीबलिरुवाच स्वागतं ते नमस्तुभ्यं ब्रह्मन् किं करवाम ते ब्रह्मर्षीणां तपः साक्षान् मन्ये त्वार्य वपुर्धरम्

śrībaliruvāca svāgataṃ te namastubhyaṃ brahman kiṃ karavāma te brahmarṣīṇāṃ tapaḥ sākṣān manye tvārya vapurdharam

Sanskrit only: no published translation is held for this verse.

अद्य नः पितरस्तृप्ता अद्य नः पावितं कुलम् अद्य स्विष्टः क्रतुरयं यद्भवान् आगतो गृहान्

adya naḥ pitarastṛptā adya naḥ pāvitaṃ kulam adya sviṣṭaḥ kraturayaṃ yadbhavān āgato gṛhān

Sanskrit only: no published translation is held for this verse.

अद्याग्नयो मे सुहुता यथाविधि द्विजात्मज त्वच्चरणावनेजनैः हतांहसो वार्भिरियं च भूरहो तथा पुनीता तनुभिः पदैस्तव

adyāgnayo me suhutā yathāvidhi dvijātmaja tvaccaraṇāvanejanaiḥ hatāṃhaso vārbhiriyaṃ ca bhūraho tathā punītā tanubhiḥ padaistava

Sanskrit only: no published translation is held for this verse.

यद्यद्वटो वाञ्छसि तत् प्रतीच्छ मे त्वामर्थिनं विप्रसुतानुतर्कये गां काञ्चनं गुणवद्धाम मृष्टं तथान्नपेयमुत वा विप्रकन्याम् ग्रामान् समृद्धांस्तुरगान् गजान् वा रथांस्तथार्हत्तम सम्प्रतीच्छ

yadyadvaṭo vāñchasi tat pratīccha me tvāmarthinaṃ viprasutānutarkaye gāṃ kāñcanaṃ guṇavaddhāma mṛṣṭaṃ tathānnapeyamuta vā viprakanyām grāmān samṛddhāṃsturagān gajān vā rathāṃstathārhattama sampratīccha

Sanskrit only: no published translation is held for this verse.