Bhāgavata Purāṇa 9.3

श्रीशुक उवाच शर्यातिर्मानवो राजा ब्रह्मिष्ठः सम्बभूव ह यो वा अङ्गिरसां सत्रे द्वितीयमहरूचिवान्

śrīśuka uvāca śaryātirmānavo rājā brahmiṣṭhaḥ sambabhūva ha yo vā aṅgirasāṃ satre dvitīyamaharūcivān

Sanskrit only: no published translation is held for this verse.

सुकन्या नाम तस्यासीत् कन्या कमललोचना तया सार्धं वनगतो ह्यगमच् च्यवनाश्रमम्

sukanyā nāma tasyāsīt kanyā kamalalocanā tayā sārdhaṃ vanagato hyagamac cyavanāśramam

Sanskrit only: no published translation is held for this verse.

सा सखीभिः परिवृता विचिन्वन्त्यङ्घ्रिपान् वने वल्मीकरन्ध्रे ददृशे खद्योते इव ज्योतिषी

sā sakhībhiḥ parivṛtā vicinvantyaṅghripān vane valmīkarandhre dadṛśe khadyote iva jyotiṣī

Sanskrit only: no published translation is held for this verse.

ते दैवचोदिता बाला ज्योतिषी कण्टकेन वै अविध्यन् मुग्धभावेन सुस्रावासृक् ततो बहिः

te daivacoditā bālā jyotiṣī kaṇṭakena vai avidhyan mugdhabhāvena susrāvāsṛk tato bahiḥ

Sanskrit only: no published translation is held for this verse.

शकृन्मूत्रनिरोधो ऽभूत् सैनिकानां च तत्क्षणात् राजर्षिस्तमुपालक्ष्य पुरुषान् विस्मितो ऽब्रवीत्

śakṛnmūtranirodho 'bhūt sainikānāṃ ca tatkṣaṇāt rājarṣistamupālakṣya puruṣān vismito 'bravīt

Sanskrit only: no published translation is held for this verse.

अप्यभद्रं न युष्माभिर्भार्गवस्य विचेष्टितम् व्यक्तं केनापि नस्तस्य कृतमाश्रमदूषणम्

apyabhadraṃ na yuṣmābhirbhārgavasya viceṣṭitam vyaktaṃ kenāpi nastasya kṛtamāśramadūṣaṇam

Sanskrit only: no published translation is held for this verse.

सुकन्या प्राह पितरं भीता किञ्चित् कृतं मया द्वे ज्योतिषी अजानन्त्या निर्भिन्ने कण्टकेन वै

sukanyā prāha pitaraṃ bhītā kiñcit kṛtaṃ mayā dve jyotiṣī ajānantyā nirbhinne kaṇṭakena vai

Sanskrit only: no published translation is held for this verse.

दुहितुस्तद्वचः श्रुत्वा शर्यातिर्जातसाध्वसः मुनिं प्रसादयामास वल्मीकान्तर्हितं शनैः

duhitustadvacaḥ śrutvā śaryātirjātasādhvasaḥ muniṃ prasādayāmāsa valmīkāntarhitaṃ śanaiḥ

Sanskrit only: no published translation is held for this verse.

तदभिप्रायमाज्ञाय प्रादाद्दुहितरं मुनेः कृच्छ्रान् मुक्तस्तमामन्त्र्य पुरं प्रायात् समाहितः

tadabhiprāyamājñāya prādādduhitaraṃ muneḥ kṛcchrān muktastamāmantrya puraṃ prāyāt samāhitaḥ

Sanskrit only: no published translation is held for this verse.

सुकन्या च्यवनं प्राप्य पतिं परमकोपनम् प्रीणयामास चित्तज्ञा अप्रमत्तानुवृत्तिभिः

sukanyā cyavanaṃ prāpya patiṃ paramakopanam prīṇayāmāsa cittajñā apramattānuvṛttibhiḥ

Sanskrit only: no published translation is held for this verse.

कस्यचित् त्व् अथ कालस्य नासत्याव् आश्रमागतौ तौ पूजयित्वा प्रोवाच वयो मे दत्तमीश्वरौ

kasyacit tv atha kālasya nāsatyāv āśramāgatau tau pūjayitvā provāca vayo me dattamīśvarau

Sanskrit only: no published translation is held for this verse.

ग्रहं ग्रहीष्ये सोमस्य यज्ञे वामप्यसोमपोः क्रियतां मे वयोरूपं प्रमदानां यदीप्सितम्

grahaṃ grahīṣye somasya yajñe vāmapyasomapoḥ kriyatāṃ me vayorūpaṃ pramadānāṃ yadīpsitam

Sanskrit only: no published translation is held for this verse.

बाढमित्यूचतुर्विप्रमभिनन्द्य भिषक्तमौ निमज्जतां भवान् अस्मिन् ह्रदे सिद्धविनिर्मिते

bāḍhamityūcaturvipramabhinandya bhiṣaktamau nimajjatāṃ bhavān asmin hrade siddhavinirmite

Sanskrit only: no published translation is held for this verse.

इत्युक्तो जरया ग्रस्त देहो धमनिसन्ततः ह्रदं प्रवेशितो ऽश्विभ्यां वलीपलितविग्रहः

ityukto jarayā grasta deho dhamanisantataḥ hradaṃ praveśito 'śvibhyāṃ valīpalitavigrahaḥ

Sanskrit only: no published translation is held for this verse.

पुरुषास्त्रय उत्तस्थुरपीव्या वनिताप्रियाः पद्मस्रजः कुण्डलिनस्तुल्यरूपाः सुवाससः

puruṣāstraya uttasthurapīvyā vanitāpriyāḥ padmasrajaḥ kuṇḍalinastulyarūpāḥ suvāsasaḥ

Sanskrit only: no published translation is held for this verse.

तान् निरीक्ष्य वरारोहा सरूपान् सूर्यवर्चसः अजानती पतिं साध्वी अश्विनौ शरणं ययौ

tān nirīkṣya varārohā sarūpān sūryavarcasaḥ ajānatī patiṃ sādhvī aśvinau śaraṇaṃ yayau

Sanskrit only: no published translation is held for this verse.

दर्शयित्वा पतिं तस्यै पातिव्रत्येन तोषितौ ऋषिमामन्त्र्य ययतुर्विमानेन त्रिविष्टपम्

darśayitvā patiṃ tasyai pātivratyena toṣitau ṛṣimāmantrya yayaturvimānena triviṣṭapam

Sanskrit only: no published translation is held for this verse.

यक्ष्यमाणो ऽथ शर्यातिश्च्यवनस्याश्रमं गतः ददर्श दुहितुः पार्श्वे पुरुषं सूर्यवर्चसम्

yakṣyamāṇo 'tha śaryātiścyavanasyāśramaṃ gataḥ dadarśa duhituḥ pārśve puruṣaṃ sūryavarcasam

Sanskrit only: no published translation is held for this verse.

राजा दुहितरं प्राह कृतपादाभिवन्दनाम् आशिषश्चाप्रयुञ्जानो नातिप्रीतिमना इव

rājā duhitaraṃ prāha kṛtapādābhivandanām āśiṣaścāprayuñjāno nātiprītimanā iva

Sanskrit only: no published translation is held for this verse.

चिकीर्षितं ते किमिदं पतिस्त्वया प्रलम्भितो लोकनमस्कृतो मुनिः यत् त्वं जराग्रस्तमसत्यसम्मतं विहाय जारं भजसे ऽमुमध्वगम्

cikīrṣitaṃ te kimidaṃ patistvayā pralambhito lokanamaskṛto muniḥ yat tvaṃ jarāgrastamasatyasammataṃ vihāya jāraṃ bhajase 'mumadhvagam

Sanskrit only: no published translation is held for this verse.

कथं मतिस्ते ऽवगतान्यथा सतां कुलप्रसूते कुलदूषणं त्व् इदम् बिभर्षि जारं यदपत्रपा कुलं पितुश्च भर्तुश्च नयस्यधस्तमः

kathaṃ matiste 'vagatānyathā satāṃ kulaprasūte kuladūṣaṇaṃ tv idam bibharṣi jāraṃ yadapatrapā kulaṃ pituśca bhartuśca nayasyadhastamaḥ

Sanskrit only: no published translation is held for this verse.

एवं ब्रुवाणं पितरं स्मयमाना शुचिस्मिता उवाच तात जामाता तवैष भृगुनन्दनः

evaṃ bruvāṇaṃ pitaraṃ smayamānā śucismitā uvāca tāta jāmātā tavaiṣa bhṛgunandanaḥ

Sanskrit only: no published translation is held for this verse.

शशंस पित्रे तत् सर्वं वयोरूपाभिलम्भनम् विस्मितः परमप्रीतस्तनयां परिषस्वजे

śaśaṃsa pitre tat sarvaṃ vayorūpābhilambhanam vismitaḥ paramaprītastanayāṃ pariṣasvaje

Sanskrit only: no published translation is held for this verse.

सोमेन याजयन् वीरं ग्रहं सोमस्य चाग्रहीत् असोमपोरप्यश्विनोश्च्यवनः स्वेन तेजसा

somena yājayan vīraṃ grahaṃ somasya cāgrahīt asomaporapyaśvinoścyavanaḥ svena tejasā

Sanskrit only: no published translation is held for this verse.

हन्तुं तमाददे वज्रं सद्यो मन्युरमर्षितः सवज्रं स्तम्भयामास भुजमिन्द्रस्य भार्गवः

hantuṃ tamādade vajraṃ sadyo manyuramarṣitaḥ savajraṃ stambhayāmāsa bhujamindrasya bhārgavaḥ

Sanskrit only: no published translation is held for this verse.

अन्वजानंस्ततः सर्वे ग्रहं सोमस्य चाश्विनोः भिषजाव् इति यत् पूर्वं सोमाहुत्या बहिष्कृतौ

anvajānaṃstataḥ sarve grahaṃ somasya cāśvinoḥ bhiṣajāv iti yat pūrvaṃ somāhutyā bahiṣkṛtau

Sanskrit only: no published translation is held for this verse.

उत्तानबर्हिरानर्तो भूरिषेण इति त्रयः शर्यातेरभवन् पुत्रा आनर्ताद्रेवतो ऽभवत्

uttānabarhirānarto bhūriṣeṇa iti trayaḥ śaryāterabhavan putrā ānartādrevato 'bhavat

Sanskrit only: no published translation is held for this verse.

सो ऽन्तःसमुद्रे नगरीं विनिर्माय कुशस्थलीम् आस्थितो ऽभुङ्क्त विषयान् आनर्तादीन् अरिन्दम

so 'ntaḥsamudre nagarīṃ vinirmāya kuśasthalīm āsthito 'bhuṅkta viṣayān ānartādīn arindama

Sanskrit only: no published translation is held for this verse.

तस्य पुत्रशतं जज्ञे ककुद्मिज्येष्ठमुत्तमम् ककुद्मी रेवतीं कन्यां स्वामादाय विभुं गतः

tasya putraśataṃ jajñe kakudmijyeṣṭhamuttamam kakudmī revatīṃ kanyāṃ svāmādāya vibhuṃ gataḥ

Sanskrit only: no published translation is held for this verse.

पुत्र्या वरं परिप्रष्टुं ब्रह्मलोकमपावृतम् आवर्तमाने गान्धर्वे स्थितो ऽलब्धक्षणः क्षणम्

putryā varaṃ paripraṣṭuṃ brahmalokamapāvṛtam āvartamāne gāndharve sthito 'labdhakṣaṇaḥ kṣaṇam

Sanskrit only: no published translation is held for this verse.

तदन्त आद्यमानम्य स्वाभिप्रायं न्यवेदयत् तच् छ्रुत्वा भगवान् ब्रह्मा प्रहस्य तमुवाच ह

tadanta ādyamānamya svābhiprāyaṃ nyavedayat tac chrutvā bhagavān brahmā prahasya tamuvāca ha

Sanskrit only: no published translation is held for this verse.

अहो राजन् निरुद्धास्ते कालेन हृदि ये कृताः तत् पुत्रपौत्रनप्त्-णां गोत्राणि च न शृण्महे

aho rājan niruddhāste kālena hṛdi ye kṛtāḥ tat putrapautranapt-ṇāṃ gotrāṇi ca na śṛṇmahe

Sanskrit only: no published translation is held for this verse.

कालो ऽभियातस्त्रिणव चतुर्युगविकल्पितः तद्गच्छ देवदेवांशो बलदेवो महाबलः

kālo 'bhiyātastriṇava caturyugavikalpitaḥ tadgaccha devadevāṃśo baladevo mahābalaḥ

Sanskrit only: no published translation is held for this verse.

कन्यारत्नमिदं राजन् नररत्नाय देहि भोः भुवो भारावताराय भगवान् भूतभावनः

kanyāratnamidaṃ rājan nararatnāya dehi bhoḥ bhuvo bhārāvatārāya bhagavān bhūtabhāvanaḥ

Sanskrit only: no published translation is held for this verse.

अवतीर्णो निजांशेन पुण्यश्रवणकीर्तनः इत्यादिष्टो ऽभिवन्द्याजं नृपः स्वपुरमागतः त्यक्तं पुण्यजनत्रासाद्भ्रातृभिर्दिक्ष्व् अवस्थितैः

avatīrṇo nijāṃśena puṇyaśravaṇakīrtanaḥ ityādiṣṭo 'bhivandyājaṃ nṛpaḥ svapuramāgataḥ tyaktaṃ puṇyajanatrāsādbhrātṛbhirdikṣv avasthitaiḥ

Sanskrit only: no published translation is held for this verse.

सुतां दत्त्वानवद्याङ्गीं बलाय बलशालिने बदर्याख्यं गतो राजा तप्तुं नारायणाश्रमम्

sutāṃ dattvānavadyāṅgīṃ balāya balaśāline badaryākhyaṃ gato rājā taptuṃ nārāyaṇāśramam

Sanskrit only: no published translation is held for this verse.