Bhāgavata Purāṇa 9.5

श्रीशुक उवाच एवं भगवतादिष्टो दुर्वासाश्चक्रतापितः अम्बरीषमुपावृत्य तत्पादौ दुःखितो ऽग्रहीत्

śrīśuka uvāca evaṃ bhagavatādiṣṭo durvāsāścakratāpitaḥ ambarīṣamupāvṛtya tatpādau duḥkhito 'grahīt

Sanskrit only: no published translation is held for this verse.

तस्य सोद्यममावीक्ष्य पादस्पर्शविलज्जितः अस्तावीत् तद्धरेरस्त्रं कृपया पीडितो भृशम्

tasya sodyamamāvīkṣya pādasparśavilajjitaḥ astāvīt taddharerastraṃ kṛpayā pīḍito bhṛśam

Sanskrit only: no published translation is held for this verse.

अम्बरीष उवाच त्वमग्निर्भगवान् सूर्यस्त्वं सोमो ज्योतिषां पतिः त्वमापस्त्वं क्षितिर्व्योम वायुर्मात्रेन्द्रियाणि च

ambarīṣa uvāca tvamagnirbhagavān sūryastvaṃ somo jyotiṣāṃ patiḥ tvamāpastvaṃ kṣitirvyoma vāyurmātrendriyāṇi ca

Sanskrit only: no published translation is held for this verse.

सुदर्शन नमस्तुभ्यं सहस्राराच्युतप्रिय सर्वास्त्रघातिन् विप्राय स्वस्ति भूया इडस्पते

sudarśana namastubhyaṃ sahasrārācyutapriya sarvāstraghātin viprāya svasti bhūyā iḍaspate

Sanskrit only: no published translation is held for this verse.

त्वं धर्मस्त्वमृतं सत्यं त्वं यज्ञो ऽखिलयज्ञभुक् त्वं लोकपालः सर्वात्मा त्वं तेजः पौरुषं परम्

tvaṃ dharmastvamṛtaṃ satyaṃ tvaṃ yajño 'khilayajñabhuk tvaṃ lokapālaḥ sarvātmā tvaṃ tejaḥ pauruṣaṃ param

Sanskrit only: no published translation is held for this verse.

नमः सुनाभाखिलधर्मसेतवे ह्यधर्मशीलासुरधूमकेतवे त्रैलोक्यगोपाय विशुद्धवर्चसे मनोजवायाद्भुतकर्मणे गृणे

namaḥ sunābhākhiladharmasetave hyadharmaśīlāsuradhūmaketave trailokyagopāya viśuddhavarcase manojavāyādbhutakarmaṇe gṛṇe

Sanskrit only: no published translation is held for this verse.

त्वत्तेजसा धर्ममयेन संहृतं तमः प्रकाशश्च दृशो महात्मनाम् दुरत्ययस्ते महिमा गिरां पते त्वद्रूपमेतत् सदसत् परावरम्

tvattejasā dharmamayena saṃhṛtaṃ tamaḥ prakāśaśca dṛśo mahātmanām duratyayaste mahimā girāṃ pate tvadrūpametat sadasat parāvaram

Sanskrit only: no published translation is held for this verse.

यदा विसृष्टस्त्वमनञ्जनेन वै बलं प्रविष्टो ऽजित दैत्यदानवम् बाहूदरोर्वङ्घ्रिशिरोधराणि वृश्चन्नजस्रं प्रधने विराजसे

yadā visṛṣṭastvamanañjanena vai balaṃ praviṣṭo 'jita daityadānavam bāhūdarorvaṅghriśirodharāṇi vṛścannajasraṃ pradhane virājase

Sanskrit only: no published translation is held for this verse.

स त्वं जगत्त्राण खलप्रहाणये निरूपितः सर्वसहो गदाभृता विप्रस्य चास्मत्कुलदैवहेतवे विधेहि भद्रं तदनुग्रहो हि नः

sa tvaṃ jagattrāṇa khalaprahāṇaye nirūpitaḥ sarvasaho gadābhṛtā viprasya cāsmatkuladaivahetave vidhehi bhadraṃ tadanugraho hi naḥ

Sanskrit only: no published translation is held for this verse.

यद्यस्ति दत्तमिष्टं वा स्वधर्मो वा स्वनुष्ठितः कुलं नो विप्रदैवं चेद्द्विजो भवतु विज्वरः

yadyasti dattamiṣṭaṃ vā svadharmo vā svanuṣṭhitaḥ kulaṃ no vipradaivaṃ ceddvijo bhavatu vijvaraḥ

Sanskrit only: no published translation is held for this verse.

यदि नो भगवान् प्रीत एकः सर्वगुणाश्रयः सर्वभूतात्मभावेन द्विजो भवतु विज्वरः

yadi no bhagavān prīta ekaḥ sarvaguṇāśrayaḥ sarvabhūtātmabhāvena dvijo bhavatu vijvaraḥ

Sanskrit only: no published translation is held for this verse.

श्रीशुक उवाच इति संस्तुवतो राज्ञो विष्णुचक्रं सुदर्शनम् अशाम्यत् सर्वतो विप्रं प्रदहद्राजयाच्ञया

śrīśuka uvāca iti saṃstuvato rājño viṣṇucakraṃ sudarśanam aśāmyat sarvato vipraṃ pradahadrājayācñayā

Sanskrit only: no published translation is held for this verse.

स मुक्तो ऽस्त्राग्नितापेन दुर्वासाः स्वस्तिमांस्ततः प्रशशंस तमुर्वीशं युञ्जानः परमाशिषः

sa mukto 'strāgnitāpena durvāsāḥ svastimāṃstataḥ praśaśaṃsa tamurvīśaṃ yuñjānaḥ paramāśiṣaḥ

Sanskrit only: no published translation is held for this verse.

दुर्वासा उवाच अहो अनन्तदासानां महत्त्वं दृष्टमद्य मे कृतागसो ऽपि यद्राजन् मङ्गलानि समीहसे

durvāsā uvāca aho anantadāsānāṃ mahattvaṃ dṛṣṭamadya me kṛtāgaso 'pi yadrājan maṅgalāni samīhase

Sanskrit only: no published translation is held for this verse.

दुष्करः को नु साधूनां दुस्त्यजो वा महात्मनाम् यैः सङ्गृहीतो भगवान् सात्वतामृषभो हरिः

duṣkaraḥ ko nu sādhūnāṃ dustyajo vā mahātmanām yaiḥ saṅgṛhīto bhagavān sātvatāmṛṣabho hariḥ

Sanskrit only: no published translation is held for this verse.

यन्नामश्रुतिमात्रेण पुमान् भवति निर्मलः तस्य तीर्थपदः किं वा दासानामवशिष्यते

yannāmaśrutimātreṇa pumān bhavati nirmalaḥ tasya tīrthapadaḥ kiṃ vā dāsānāmavaśiṣyate

Sanskrit only: no published translation is held for this verse.

राजन्ननुगृहीतो ऽहं त्वयातिकरुणात्मना मदघं पृष्ठतः कृत्वा प्राणा यन् मे ऽभिरक्षिताः

rājannanugṛhīto 'haṃ tvayātikaruṇātmanā madaghaṃ pṛṣṭhataḥ kṛtvā prāṇā yan me 'bhirakṣitāḥ

Sanskrit only: no published translation is held for this verse.

राजा तमकृताहारः प्रत्यागमनकाङ्क्षया चरणाव् उपसङ्गृह्य प्रसाद्य समभोजयत्

rājā tamakṛtāhāraḥ pratyāgamanakāṅkṣayā caraṇāv upasaṅgṛhya prasādya samabhojayat

Sanskrit only: no published translation is held for this verse.

सो ऽशित्वादृतमानीतमातिथ्यं सार्वकामिकम् तृप्तात्मा नृपतिं प्राह भुज्यतामिति सादरम्

so 'śitvādṛtamānītamātithyaṃ sārvakāmikam tṛptātmā nṛpatiṃ prāha bhujyatāmiti sādaram

Sanskrit only: no published translation is held for this verse.

प्रीतो ऽस्म्यनुगृहीतो ऽस्मि तव भागवतस्य वै दर्शनस्पर्शनालापैरातिथ्येनात्ममेधसा

prīto 'smyanugṛhīto 'smi tava bhāgavatasya vai darśanasparśanālāpairātithyenātmamedhasā

Sanskrit only: no published translation is held for this verse.

कर्मावदातमेतत् ते गायन्ति स्वःस्त्रियो मुहुः कीर्तिं परमपुण्यां च कीर्तयिष्यति भूरियम्

karmāvadātametat te gāyanti svaḥstriyo muhuḥ kīrtiṃ paramapuṇyāṃ ca kīrtayiṣyati bhūriyam

Sanskrit only: no published translation is held for this verse.

श्रीशुक उवाच एवं सङ्कीर्त्य राजानं दुर्वासाः परितोषितः ययौ विहायसामन्त्र्य ब्रह्मलोकमहैतुकम्

śrīśuka uvāca evaṃ saṅkīrtya rājānaṃ durvāsāḥ paritoṣitaḥ yayau vihāyasāmantrya brahmalokamahaitukam

Sanskrit only: no published translation is held for this verse.

संवत्सरो ऽत्यगात् तावद्यावता नागतो गतः मुनिस्तद्दर्शनाकाङ्क्षो राजाब्भक्षो बभूव ह

saṃvatsaro 'tyagāt tāvadyāvatā nāgato gataḥ munistaddarśanākāṅkṣo rājābbhakṣo babhūva ha

Sanskrit only: no published translation is held for this verse.

गते ऽथ दुर्वाससि सो ऽम्बरीषो द्विजोपयोगातिपवित्रमाहरत् ऋषेर्विमोक्षं व्यसनं च वीक्ष्य मेने स्ववीर्यं च परानुभावम्

gate 'tha durvāsasi so 'mbarīṣo dvijopayogātipavitramāharat ṛṣervimokṣaṃ vyasanaṃ ca vīkṣya mene svavīryaṃ ca parānubhāvam

Sanskrit only: no published translation is held for this verse.

एवं विधानेकगुणः स राजा परात्मनि ब्रह्मणि वासुदेवे क्रियाकलापैः समुवाह भक्तिं ययाविरिञ्च्यान् निरयांश्चकार

evaṃ vidhānekaguṇaḥ sa rājā parātmani brahmaṇi vāsudeve kriyākalāpaiḥ samuvāha bhaktiṃ yayāviriñcyān nirayāṃścakāra

Sanskrit only: no published translation is held for this verse.

श्रीशुक उवाच अथाम्बरीषस्तनयेषु राज्यं समानशीलेषु विसृज्य धीरः वनं विवेशात्मनि वासुदेवे मनो दधद्ध्वस्तगुणप्रवाहः

śrīśuka uvāca athāmbarīṣastanayeṣu rājyaṃ samānaśīleṣu visṛjya dhīraḥ vanaṃ viveśātmani vāsudeve mano dadhaddhvastaguṇapravāhaḥ

Sanskrit only: no published translation is held for this verse.

इत्येतत् पुण्यमाख्यानमम्बरीषस्य भूपते सङ्कीर्तयन्ननुध्यायन् भक्तो भगवतो भवेत्

ityetat puṇyamākhyānamambarīṣasya bhūpate saṅkīrtayannanudhyāyan bhakto bhagavato bhavet

Sanskrit only: no published translation is held for this verse.

अम्बरीषस्य चरितं ये शृण्वन्ति महात्मनः मुक्तिं प्रयान्ति ते सर्वे भक्त्या विष्णोः प्रसादतः

ambarīṣasya caritaṃ ye śṛṇvanti mahātmanaḥ muktiṃ prayānti te sarve bhaktyā viṣṇoḥ prasādataḥ

Sanskrit only: no published translation is held for this verse.