Ksemendra: Bharatamanjari 16

॥मौसलं पर्व॥ नारायणं नमस्कृत्य नरं चैव नरोत्तमम् । देवीं सरस्वतीं व्यासं ततो जयमुदीरयेत्

//mausalaṃ parva// nārāyaṇaṃ namaskṛtya naraṃ caiva narottamam / devīṃ sarasvatīṃ vyāsaṃ tato jayamudīrayet

Sanskrit only: no published translation is held for this verse.

महीं महीभृतां धुर्ये धर्मराजे प्रशासति । षड्विंशे ऽब्दे महाभागा द्वारकां मुनयो ययुः

mahīṃ mahībhṛtāṃ dhurye dharmarāje praśāsati / ṣaḍviṃśe 'bde mahābhāgā dvārakāṃ munayo yayuḥ

Sanskrit only: no published translation is held for this verse.

तान्दृष्ट्वा कौशिकमुखान्प्रहर्षन्मदविप्लुताः । साम्बं कृत्वा वधूवेशं पप्रच्छुर्वृष्णिपुंगवाः

tāndṛṣṭvā kauśikamukhānpraharṣanmadaviplutāḥ / sāmbaṃ kṛtvā vadhūveśaṃ papracchurvṛṣṇipuṃgavāḥ

Sanskrit only: no published translation is held for this verse.

अपि पुत्रः सुता वास्या भविष्यति मुनीश्वराः । तच्छ्रुत्वा ते ऽवदन्नस्याः कुलमृत्युर्भविष्यति

api putraḥ sutā vāsyā bhaviṣyati munīśvarāḥ / tacchrutvā te 'vadannasyāḥ kulamṛtyurbhaviṣyati

Sanskrit only: no published translation is held for this verse.

मुसलं ब्रह्मदण्डाख्यमित्युक्त्वादर्शनं ययुः । लौहं साम्बस्ततो ऽसूत मुसलं वज्रसंहतम्

musalaṃ brahmadaṇḍākhyamityuktvādarśanaṃ yayuḥ / lauhaṃ sāmbastato 'sūta musalaṃ vajrasaṃhatam

Sanskrit only: no published translation is held for this verse.

तदाह्वको भयात्पिष्ट्वा तूर्णं तत्याज सागरे । सर्वज्ञो ज्ञातवृत्तान्तो वृष्णिक्षयमुपस्थितम्

tadāhvako bhayātpiṣṭvā tūrṇaṃ tatyāja sāgare / sarvajño jñātavṛttānto vṛṣṇikṣayamupasthitam

Sanskrit only: no published translation is held for this verse.

विज्ञाय कैटभारातिस्तीर्थयात्रारसाद्ययौ । चण्डांशुमण्डलोच्चण्डं ततश्चक्रं सुरद्विषः

vijñāya kaiṭabhārātistīrthayātrārasādyayau / caṇḍāṃśumaṇḍaloccaṇḍaṃ tataścakraṃ suradviṣaḥ

Sanskrit only: no published translation is held for this verse.

रथो ध्वजश्च सौवर्णः सहसान्तरधीयत । अथ मार्जारविच्छाये कबन्धावृतमण्डले

ratho dhvajaśca sauvarṇaḥ sahasāntaradhīyata / atha mārjāravicchāye kabandhāvṛtamaṇḍale

Sanskrit only: no published translation is held for this verse.

सूर्ये विघट्टिताशेषदिक्तटे वाति मारुते । मुण्डो विटङ्कवदनो यादवानां गृहे गृहे

sūrye vighaṭṭitāśeṣadiktaṭe vāti mārute / muṇḍo viṭaṅkavadano yādavānāṃ gṛhe gṛhe

Sanskrit only: no published translation is held for this verse.

संदर्श्य वदनं प्रायाद्वाचान्विष्टो ऽप्यदृश्यत । चीत्कारपुरुषः शब्दः शारिकानां गृहेष्वभूत्

saṃdarśya vadanaṃ prāyādvācānviṣṭo 'pyadṛśyata / cītkārapuruṣaḥ śabdaḥ śārikānāṃ gṛheṣvabhūt

Sanskrit only: no published translation is held for this verse.

गृध्रगोमायुनादेन राजमार्गौऽप्यपूर्यत । विपरीता प्रसूतिश्च पशूनामभवत्तदा

gṛdhragomāyunādena rājamārgau'pyapūryata / viparītā prasūtiśca paśūnāmabhavattadā

Sanskrit only: no published translation is held for this verse.

कोशेषु कनकाबन्धे रत्नानि स्वयमस्फुटन् । तेषु घोरनिमित्तेषु जातेष्वप्यविशङ्किताः

kośeṣu kanakābandhe ratnāni svayamasphuṭan / teṣu ghoranimitteṣu jāteṣvapyaviśaṅkitāḥ

Sanskrit only: no published translation is held for this verse.

बभूवुर्वृष्णयो भान्ति न हि नाशेषु बुद्धयः । प्रभासमथ संप्राप्ते कृष्णे यादववृष्णयः

babhūvurvṛṣṇayo bhānti na hi nāśeṣu buddhayaḥ / prabhāsamatha saṃprāpte kṛṣṇe yādavavṛṣṇayaḥ

Sanskrit only: no published translation is held for this verse.

तमेव देशमभ्येत्य चक्रिरे विपुलोत्सवम् । उद्यानेषु विचित्रेषु विजह्नुस्तत्र ते सुखम्

tameva deśamabhyetya cakrire vipulotsavam / udyāneṣu vicitreṣu vijahnustatra te sukham

Sanskrit only: no published translation is held for this verse.

गीतनृत्यरसासक्ताः कलिताः कालचक्षुषा । आपानकेलिसंसक्ते ततो वृष्णिकुले ऽभवत्

gītanṛtyarasāsaktāḥ kalitāḥ kālacakṣuṣā / āpānakelisaṃsakte tato vṛṣṇikule 'bhavat

Sanskrit only: no published translation is held for this verse.

विवादे युद्धसंबद्धः शैनेयकृतवर्मणोः । हार्दिक्यं सात्याकिः प्राह सुप्तहा सौप्तिको भवान्

vivāde yuddhasaṃbaddhaḥ śaineyakṛtavarmaṇoḥ / hārdikyaṃ sātyākiḥ prāha suptahā sauptiko bhavān

Sanskrit only: no published translation is held for this verse.

स तमूचे त्वया प्रायगतो भूरिश्रवा हतः । एवं विवादात्संग्रामस्तेषामासीत्सुदारुणः

sa tamūce tvayā prāyagato bhūriśravā hataḥ / evaṃ vivādātsaṃgrāmasteṣāmāsītsudāruṇaḥ

Sanskrit only: no published translation is held for this verse.

प्राक्तस्माद्वज्रमुसलात्प्रजातैर्वल्लरीचयैः । तृणमप्यभवत्तत्र ब्रह्मदण्डमदोत्कटम्

prāktasmādvajramusalātprajātairvallarīcayaiḥ / tṛṇamapyabhavattatra brahmadaṇḍamadotkaṭam

Sanskrit only: no published translation is held for this verse.

क्षयाय मुसलीभूतं सहसान्धकवृष्णिषु । या भूदापानभूस्तेषां ललनानयनोत्सवः

kṣayāya musalībhūtaṃ sahasāndhakavṛṣṇiṣu / yā bhūdāpānabhūsteṣāṃ lalanānayanotsavaḥ

Sanskrit only: no published translation is held for this verse.

सैव मृत्योरभूद्धोरसंहाराहारमण्डपः । साम्बे गदे चारुदोष्णि प्रद्युम्ने कृतवर्मणि

saiva mṛtyorabhūddhorasaṃhārāhāramaṇḍapaḥ / sāmbe gade cārudoṣṇi pradyumne kṛtavarmaṇi

Sanskrit only: no published translation is held for this verse.

अनिरुद्धे च शैनेये निहते पश्यतो हरेः । वृत्ते वृष्णिक्षये घोरे स्त्रीशेषा यादवे कुले

aniruddhe ca śaineye nihate paśyato hareḥ / vṛtte vṛṣṇikṣaye ghore strīśeṣā yādave kule

Sanskrit only: no published translation is held for this verse.

द्वारका प्ररुरोदेव च्छिन्नहाराश्रुनिर्झरैः । ततः शौरिर्हलधरं द्रष्टुं दुःखाकुलो व्रजन्

dvārakā prarurodeva cchinnahārāśrunirjharaiḥ / tataḥ śaurirhaladharaṃ draṣṭuṃ duḥkhākulo vrajan

Sanskrit only: no published translation is held for this verse.

दारुकं तत्कथयितुं प्राहिणोत्सव्यसाचिने । योषितां दस्तुरक्षायै बभ्रुमादाय केशवः

dārukaṃ tatkathayituṃ prāhiṇotsavyasācine / yoṣitāṃ dasturakṣāyai babhrumādāya keśavaḥ

Sanskrit only: no published translation is held for this verse.

गत्वा जनकमामन्त्र्य रौहिणेयमुपाययौ । अथापश्यन्मुखात्तस्य निःसृतं मधुसूदनः

gatvā janakamāmantrya rauhiṇeyamupāyayau / athāpaśyanmukhāttasya niḥsṛtaṃ madhusūdanaḥ

Sanskrit only: no published translation is held for this verse.

सहस्रशीर्षं भुजगं श्वेतं श्वेताचलोपमम् । वासुकिप्रमुखैर्नागैरथ प्रत्युद्यतैः सह

sahasraśīrṣaṃ bhujagaṃ śvetaṃ śvetācalopamam / vāsukipramukhairnāgairatha pratyudyataiḥ saha

Sanskrit only: no published translation is held for this verse.

दृष्ट्वार्णवं प्रविष्टं तं वरुणेनार्चितं पुनः । गतिज्ञः सर्वभूतानां न शुशोच जनार्दनः

dṛṣṭvārṇavaṃ praviṣṭaṃ taṃ varuṇenārcitaṃ punaḥ / gatijñaḥ sarvabhūtānāṃ na śuśoca janārdanaḥ

Sanskrit only: no published translation is held for this verse.

भवे ह्यभावसद्भावे भावानां स्थिरता कुतः । अनन्तधाम्नि मिलिते बलभद्रे सकानने

bhave hyabhāvasadbhāve bhāvānāṃ sthiratā kutaḥ / anantadhāmni milite balabhadre sakānane

Sanskrit only: no published translation is held for this verse.

प्रविश्य योगी सुष्वाप निबद्धप्राणधारणः । तं स्वज्योतिषि संसक्तं लुब्धको मृगशङ्कया

praviśya yogī suṣvāpa nibaddhaprāṇadhāraṇaḥ / taṃ svajyotiṣi saṃsaktaṃ lubdhako mṛgaśaṅkayā

Sanskrit only: no published translation is held for this verse.

जघान निशिताग्रेण शरेण चरणोदरे । कृष्णशारधिया कृष्णो लुब्धकेनेषुणा हतः

jaghāna niśitāgreṇa śareṇa caraṇodare / kṛṣṇaśāradhiyā kṛṣṇo lubdhakeneṣuṇā hataḥ

Sanskrit only: no published translation is held for this verse.

नारायणाख्यमविशत्परं धाम सनातनम् । सुरसिद्धर्षिगन्धर्वैः पूज्यमाने सह श्रिया

nārāyaṇākhyamaviśatparaṃ dhāma sanātanam / surasiddharṣigandharvaiḥ pūjyamāne saha śriyā

Sanskrit only: no published translation is held for this verse.

विष्णुं प्रविष्टे गोविन्दे बभूव क्षुभितं जगत् । अत्रान्तरे दारुकेन कथिते यादवक्षये

viṣṇuṃ praviṣṭe govinde babhūva kṣubhitaṃ jagat / atrāntare dārukena kathite yādavakṣaye

Sanskrit only: no published translation is held for this verse.

शोकं त्रासं च दैन्यं च भेजिरे पाण्डवाः परम् । ततो युधिष्ठिरगिरा द्वारकां श्वेतवाहनः

śokaṃ trāsaṃ ca dainyaṃ ca bhejire pāṇḍavāḥ param / tato yudhiṣṭhiragirā dvārakāṃ śvetavāhanaḥ

Sanskrit only: no published translation is held for this verse.

दारुकेनैव सहितः प्रययौ शोकमूर्च्छितः । स प्राप यादवपुरीमपद्मामिव पद्मिनीम्

dārukenaiva sahitaḥ prayayau śokamūrcchitaḥ / sa prāpa yādavapurīmapadmāmiva padminīm

Sanskrit only: no published translation is held for this verse.

वृष्णिसिंहैर्विरहिता गुहां हैमवतीमिव । कष्टैररिष्टनिचयैः स्पृष्टां दुःखाद्विलोक्य ताम्

vṛṣṇisiṃhairvirahitā guhāṃ haimavatīmiva / kaṣṭairariṣṭanicayaiḥ spṛṣṭāṃ duḥkhādvilokya tām

Sanskrit only: no published translation is held for this verse.

द्रष्टुं विवेश शोकार्तं जनकं कंसविद्विषः । तारप्रलापमुखरैर्वृतं वृष्णिवधूजनैः

draṣṭuṃ viveśa śokārtaṃ janakaṃ kaṃsavidviṣaḥ / tārapralāpamukharairvṛtaṃ vṛṣṇivadhūjanaiḥ

Sanskrit only: no published translation is held for this verse.

षोडशस्त्रीसहस्राणि कलत्रं कमलापतेः । सौभद्रजनको दृष्ट्वा मुमोह भयविह्वलम्

ṣoḍaśastrīsahasrāṇi kalatraṃ kamalāpateḥ / saubhadrajanako dṛṣṭvā mumoha bhayavihvalam

Sanskrit only: no published translation is held for this verse.

शयानं भुवि पार्थो ऽपि वसुदेवं प्रलापिनम् । विलोक्य शोकविवशो वज्रभिन्न इवापतत्

śayānaṃ bhuvi pārtho 'pi vasudevaṃ pralāpinam / vilokya śokavivaśo vajrabhinna ivāpatat

Sanskrit only: no published translation is held for this verse.

क्व रामः क्व च गोविन्दः क्व प्रद्युम्नः क्व सात्यकिः । अहो विधेर्दुरन्तेयं शक्तिरित्यर्जुनो ऽवदत्

kva rāmaḥ kva ca govindaḥ kva pradyumnaḥ kva sātyakiḥ / aho vidherduranteyaṃ śaktirityarjuno 'vadat

Sanskrit only: no published translation is held for this verse.

मणिकङ्कणझाङ्कारिनृत्तगीतघनध्वनिः । अविश्रान्तमभूद्यत्र श्रवणानन्दनिर्झरैः

maṇikaṅkaṇajhāṅkārinṛttagītaghanadhvaniḥ / aviśrāntamabhūdyatra śravaṇānandanirjharaiḥ

Sanskrit only: no published translation is held for this verse.

तत्रैव वृष्णिनारीणां शृण्वन्नारोदनध्वनिम् । निशां निनाय बीभत्सुर्निरपायमयीं श्रियम्

tatraiva vṛṣṇinārīṇāṃ śṛṇvannārodanadhvanim / niśāṃ nināya bībhatsurnirapāyamayīṃ śriyam

Sanskrit only: no published translation is held for this verse.

ततः प्रातः प्रियसुतो वसुदेवः प्रियां तनुम् । तत्याज देवकीमुख्यैरनुयातो वधूजनैः

tataḥ prātaḥ priyasuto vasudevaḥ priyāṃ tanum / tatyāja devakīmukhyairanuyāto vadhūjanaiḥ

Sanskrit only: no published translation is held for this verse.

ततः सात्त्वतमुख्यानां सर्वेषां शोकविह्वलः । पार्थः शरीरं संस्कृत्य चकार सलिलक्रियाम्

tataḥ sāttvatamukhyānāṃ sarveṣāṃ śokavihvalaḥ / pārthaḥ śarīraṃ saṃskṛtya cakāra salilakriyām

Sanskrit only: no published translation is held for this verse.

वज्राभिधानं कृष्णस्य पौत्रं कुन्तीसुतस्ततः । आदाय वृष्णिकान्ताश्च प्रतस्थे दारुकानुगः

vajrābhidhānaṃ kṛṣṇasya pautraṃ kuntīsutastataḥ / ādāya vṛṣṇikāntāśca pratasthe dārukānugaḥ

Sanskrit only: no published translation is held for this verse.

अथ द्वारवतीं स्फारतरङ्गभुजमण्डलैः । शङ्खाट्टहासविकटो जहार मकराकरः

atha dvāravatīṃ sphārataraṅgabhujamaṇḍalaiḥ / śaṅkhāṭṭahāsavikaṭo jahāra makarākaraḥ

Sanskrit only: no published translation is held for this verse.

हते वृष्णिपुरे क्षिप्रं रत्नलोभादिवाब्धिना । पुरुषानुगतं सर्वमित्यूचे दुःखितो जनः

hate vṛṣṇipure kṣipraṃ ratnalobhādivābdhinā / puruṣānugataṃ sarvamityūce duḥkhito janaḥ

Sanskrit only: no published translation is held for this verse.

कलत्रं वृष्णिसिंहानामादाय श्वेतवाहनः । इन्द्रप्रस्थं व्रजन्प्राप दुर्गमां विकटाटवीम्

kalatraṃ vṛṣṇisiṃhānāmādāya śvetavāhanaḥ / indraprasthaṃ vrajanprāpa durgamāṃ vikaṭāṭavīm

Sanskrit only: no published translation is held for this verse.

दस्यवस्तत्र गोपाला बलिनः पशुजीविनः । अदृष्टपूर्वाः स्वर्योषित्सुभगाः सात्त्वताङ्गनाः

dasyavastatra gopālā balinaḥ paśujīvinaḥ / adṛṣṭapūrvāḥ svaryoṣitsubhagāḥ sāttvatāṅganāḥ

Sanskrit only: no published translation is held for this verse.

तडित्तरलरत्नांशुपुञ्जरिताम्बराः । विलोक्य लोभवशगा हर्तुमभ्युद्ययुर्बलात्

taḍittaralaratnāṃśupuñjaritāmbarāḥ / vilokya lobhavaśagā hartumabhyudyayurbalāt

Sanskrit only: no published translation is held for this verse.

गोपानापतितान्दृष्टा तानुग्रलगुडायुधान् । गाण्डीवधन्वा गाण्डीपमधिज्यमकरोत्क्रुधा

gopānāpatitāndṛṣṭā tānugralaguḍāyudhān / gāṇḍīvadhanvā gāṇḍīpamadhijyamakarotkrudhā

Sanskrit only: no published translation is held for this verse.

कालशक्तिहतस्यापि तस्यापि क्षपितद्विषः । न शक्तिरभवत्काचित्क्षीणेषोर्ज्याविकर्षणे

kālaśaktihatasyāpi tasyāpi kṣapitadviṣaḥ / na śaktirabhavatkācitkṣīṇeṣorjyāvikarṣaṇe

Sanskrit only: no published translation is held for this verse.

चापयष्टिरनायत्ता तस्याभूदतिदुःखगा । वृद्धस्येव दरिद्रस्य तरुणी रूपिणी वधूः

cāpayaṣṭiranāyattā tasyābhūdatiduḥkhagā / vṛddhasyeva daridrasya taruṇī rūpiṇī vadhūḥ

Sanskrit only: no published translation is held for this verse.

तस्य कोपाग्नितप्तस्य वृथा भ्रूभङ्गकारिणः । भृत्या इवाविनीतस्य बभूवुरवशाः शराः

tasya kopāgnitaptasya vṛthā bhrūbhaṅgakāriṇaḥ / bhṛtyā ivāvinītasya babhūvuravaśāḥ śarāḥ

Sanskrit only: no published translation is held for this verse.

ते दिव्यास्त्रगणाः क्वापि जग्मुरुत्सृज्य तं मृधे । गुणसङ्गामनादृत्य धूर्ता मित्रमिवाधनम्

te divyāstragaṇāḥ kvāpi jagmurutsṛjya taṃ mṛdhe / guṇasaṅgāmanādṛtya dhūrtā mitramivādhanam

Sanskrit only: no published translation is held for this verse.

स निःशश्वास विपुलैर्मार्गणैः परिवर्जितः । क्षीणकोश इव त्यागी वैलक्ष्यविनताननः

sa niḥśaśvāsa vipulairmārgaṇaiḥ parivarjitaḥ / kṣīṇakośa iva tyāgī vailakṣyavinatānanaḥ

Sanskrit only: no published translation is held for this verse.

ततो निष्प्रतिभे तत्र पार्थे सर्वायुधक्षयात् । वृष्णिपौराङ्गना जह्रुर्निर्विवेका वनेचराः

tato niṣpratibhe tatra pārthe sarvāyudhakṣayāt / vṛṣṇipaurāṅganā jahrurnirvivekā vanecarāḥ

Sanskrit only: no published translation is held for this verse.

न तु प्रधाननारीषु तेषामासीत्प्रगल्भता । अनर्हस्य महार्हेषु नीचस्योजस्विता कथम्

na tu pradhānanārīṣu teṣāmāsītpragalbhatā / anarhasya mahārheṣu nīcasyojasvitā katham

Sanskrit only: no published translation is held for this verse.

तैः प्रसह्य हृते स्त्रैणे भग्नमानो धनंजयः । प्रतस्थे निजदोर्दण्डे सासूयाः पातयन्दृशः

taiḥ prasahya hṛte straiṇe bhagnamāno dhanaṃjayaḥ / pratasthe nijadordaṇḍe sāsūyāḥ pātayandṛśaḥ

Sanskrit only: no published translation is held for this verse.

अहो बलवती देवी संसारे ऽस्मिन्ननित्यता । अहो निःसारपर्यन्ता भावानां प्रभविष्णुता

aho balavatī devī saṃsāre 'sminnanityatā / aho niḥsāraparyantā bhāvānāṃ prabhaviṣṇutā

Sanskrit only: no published translation is held for this verse.

अहो सर्वकषः कालश्चित्रपाकमहो जगत् । विजिते विजयो गोपैर्दुःखादित्यवदज्जनः

aho sarvakaṣaḥ kālaścitrapākamaho jagat / vijite vijayo gopairduḥkhādityavadajjanaḥ

Sanskrit only: no published translation is held for this verse.

धिगनित्यविलासस्य विभ्रमभ्रान्तिकारिणः । धातुरद्भुतनिर्माणविनोदविशरारुताम्

dhiganityavilāsasya vibhramabhrāntikāriṇaḥ / dhāturadbhutanirmāṇavinodaviśarārutām

Sanskrit only: no published translation is held for this verse.

आखण्डलप्रभृतयः खाण्डवे येन खण्डिताः । कैराते त्रिपुरारातिः समरे येन तोषितः

ākhaṇḍalaprabhṛtayaḥ khāṇḍave yena khaṇḍitāḥ / kairāte tripurārātiḥ samare yena toṣitaḥ

Sanskrit only: no published translation is held for this verse.

जित्वा तमपि गोपाला वराकाः सुहृदं हरेः । जह्रुर्विष्णुकलत्राणि धिक्कालस्य दुरन्तताम्

jitvā tamapi gopālā varākāḥ suhṛdaṃ hareḥ / jahrurviṣṇukalatrāṇi dhikkālasya durantatām

Sanskrit only: no published translation is held for this verse.

रेवतीं रुक्मिणीं सत्यभामां जाम्बवतीं तथा । वज्रं पौत्रं च कंसारेरन्याश्च यदुयोषितः

revatīṃ rukmiṇīṃ satyabhāmāṃ jāmbavatīṃ tathā / vajraṃ pautraṃ ca kaṃsāreranyāśca yaduyoṣitaḥ

Sanskrit only: no published translation is held for this verse.

आदाय फल्गुणः शोचन्निन्द्रप्रस्थं समाविशत् । सबाष्पं पौरसंघातैरभितः परिवारितः

ādāya phalguṇaḥ śocannindraprasthaṃ samāviśat / sabāṣpaṃ paurasaṃghātairabhitaḥ parivāritaḥ

Sanskrit only: no published translation is held for this verse.

राज्ये निधाय तत्रैव वज्रं याते धनंजये । सत्यभामानुगा देव्यः पावकं विविशुः शुचा

rājye nidhāya tatraiva vajraṃ yāte dhanaṃjaye / satyabhāmānugā devyaḥ pāvakaṃ viviśuḥ śucā

Sanskrit only: no published translation is held for this verse.

व्रजन्वृष्णिवियोगार्तः किरीटि हस्तिनापुरम् । परावरज्ञं भावानां वने व्यासं व्यलोकयत्

vrajanvṛṣṇiviyogārtaḥ kirīṭi hastināpuram / parāvarajñaṃ bhāvānāṃ vane vyāsaṃ vyalokayat

Sanskrit only: no published translation is held for this verse.

दुःखान्न्यवेदयत्तस्मै घोरं वृष्णिकुलक्षयम् । आत्मनश्चात्तचापस्य गोपैः पथि पराभवम्

duḥkhānnyavedayattasmai ghoraṃ vṛṣṇikulakṣayam / ātmanaścāttacāpasya gopaiḥ pathi parābhavam

Sanskrit only: no published translation is held for this verse.

तमब्रवीज्ज्ञाननिधिर्मुनिराश्वास्य मूर्च्छितम् । पुत्र कालविलासानां सर्वमेतद्विजृम्भितम्

tamabravījjñānanidhirmunirāśvāsya mūrcchitam / putra kālavilāsānāṃ sarvametadvijṛmbhitam

Sanskrit only: no published translation is held for this verse.

मतिर्विभूतयो भोगाः प्रभावाः शक्तयो गुणाः । सर्वथा कालकलया नीयते स्मृतिशेषताम्

matirvibhūtayo bhogāḥ prabhāvāḥ śaktayo guṇāḥ / sarvathā kālakalayā nīyate smṛtiśeṣatām

Sanskrit only: no published translation is held for this verse.

ध्रुवं सर्वपरित्यागे न कुर्युर्मुनयो मतिम् । अवसानैकविरसा यदि न स्याद्भवस्थितिः

dhruvaṃ sarvaparityāge na kuryurmunayo matim / avasānaikavirasā yadi na syādbhavasthitiḥ

Sanskrit only: no published translation is held for this verse.

इत्युक्तो मुनिना पार्थः प्रययौ हस्तिनापुरम् । प्रभावं वृष्णिसिंहस्य कलयन्भृशविह्वलः

ityukto muninā pārthaḥ prayayau hastināpuram / prabhāvaṃ vṛṣṇisiṃhasya kalayanbhṛśavihvalaḥ

Sanskrit only: no published translation is held for this verse.