Bhaviṣya Purāṇa (part) 3.2.24

।। व्यास उवाच एकदा नैमिषारण्ये ऋषयः शौनकादयः ।। पृच्छन्ति विनयेनैव सूतं पौराणिकं खलु

|| vyāsa uvāca ekadā naimiṣāraṇye ṛṣayaḥ śaunakādayaḥ || pṛcchanti vinayenaiva sūtaṃ paurāṇikaṃ khalu

Sanskrit only: no published translation is held for this verse.

भगवन्ब्रूहि लोकानां हितार्थाय चतुर्युगे ।। कः पूज्यः सेवितव्यश्च वांच्छितार्थप्रदायकः

bhagavanbrūhi lokānāṃ hitārthāya caturyuge || kaḥ pūjyaḥ sevitavyaśca vāṃcchitārthapradāyakaḥ

Sanskrit only: no published translation is held for this verse.

विनायासेन वै कामं प्राप्नुयुर्मानवाः शुभम् ।। सत्यं ब्रह्मन्वदोपायं नराणां कीर्तिकारकम्

vināyāsena vai kāmaṃ prāpnuyurmānavāḥ śubham || satyaṃ brahmanvadopāyaṃ narāṇāṃ kīrtikārakam

Sanskrit only: no published translation is held for this verse.

।। सूत उवाच नवांभोजनेत्रं रमाकेलिपात्रं चतु्र्बाहुचामीकराचारुगात्रम् ।। जगत्त्राणहेतुं रिपौ धूम्रकेतुं सदा सत्यनारायणं स्तौमि देवम्

|| sūta uvāca navāṃbhojanetraṃ ramākelipātraṃ caturbāhucāmīkarācārugātram || jagattrāṇahetuṃ ripau dhūmraketuṃ sadā satyanārāyaṇaṃ staumi devam

Sanskrit only: no published translation is held for this verse.

श्रीरामं सहलक्ष्मणं सकरुणं सीतान्वितं सात्त्विकं वैदेहीमुखपद्मलुब्धमधुपं पौलस्त्यसंहारकम् ।। वन्दे वन्द्यपदांबुजं सुरवरं भक्तानुकम्पाकरं शत्रुघ्नेन हनूमता च भरतेनासेवितं राघवम्

śrīrāmaṃ sahalakṣmaṇaṃ sakaruṇaṃ sītānvitaṃ sāttvikaṃ vaidehīmukhapadmalubdhamadhupaṃ paulastyasaṃhārakam || vande vandyapadāṃbujaṃ suravaraṃ bhaktānukampākaraṃ śatrughnena hanūmatā ca bharatenāsevitaṃ rāghavam

Sanskrit only: no published translation is held for this verse.

कलिकलुषविनाशं कामसिद्धिप्रकाशं सुरवरमुखभासं भूसुरेण प्रकाशम् ।। विबुधबुधविलासं साधुचर्याविशेषं नृप तिवरचरित्रं भोः शृणुष्वेतिहासम्

kalikaluṣavināśaṃ kāmasiddhiprakāśaṃ suravaramukhabhāsaṃ bhūsureṇa prakāśam || vibudhabudhavilāsaṃ sādhucaryāviśeṣaṃ nṛpa tivaracaritraṃ bhoḥ śṛṇuṣvetihāsam

Sanskrit only: no published translation is held for this verse.

एकदा नारदो योगी परानुग्रहवांच्छया ।। पर्यटन्विविधाँल्लोकान्मर्त्यलोकमुपागमत्

ekadā nārado yogī parānugrahavāṃcchayā || paryaṭanvividhā~llokānmartyalokamupāgamat

Sanskrit only: no published translation is held for this verse.

तत्र दृष्ट्वा जनान्सर्वान्नानाक्लेशसमन्वितान् ।। आधिव्याधियुतानार्तान्पच्यमानान्स्वकर्मभिः

tatra dṛṣṭvā janānsarvānnānākleśasamanvitān || ādhivyādhiyutānārtānpacyamānānsvakarmabhiḥ

Sanskrit only: no published translation is held for this verse.

केनोपायेन चैतेषां दुःखनाशो भवेद्ध्रुवम्।। इति सञ्चिंत्य मनसा विष्णुलोकं गतस्तदा

kenopāyena caiteṣāṃ duḥkhanāśo bhaveddhruvam|| iti sañciṃtya manasā viṣṇulokaṃ gatastadā

Sanskrit only: no published translation is held for this verse.

तत्र नारायणं देवं शुक्लवर्णं चतुर्भुजम् ।। शंखचक्रगदापद्मवनमालाविभूषितम्

tatra nārāyaṇaṃ devaṃ śuklavarṇaṃ caturbhujam || śaṃkhacakragadāpadmavanamālāvibhūṣitam

Sanskrit only: no published translation is held for this verse.

प्रसन्नवदनं शांतं सनकाद्यैरभिष्टुतम् ।। दृष्ट्वा तं देवदेवेशं स्तोतुं समुपचक्रमे

prasannavadanaṃ śāṃtaṃ sanakādyairabhiṣṭutam || dṛṣṭvā taṃ devadeveśaṃ stotuṃ samupacakrame

Sanskrit only: no published translation is held for this verse.

।। नारद उवाच नमो वाङ्मनसातीतरूपायानंतशक्तये ।। नादि मध्यान्तदेवाय निर्गुणाय महात्मने

|| nārada uvāca namo vāṅmanasātītarūpāyānaṃtaśaktaye || nādi madhyāntadevāya nirguṇāya mahātmane

Sanskrit only: no published translation is held for this verse.

सर्वेषामादिभूताय लोकानामुपकारिणे ।। अपारपरिमाणाय तपोधाम्ने नमोनमः

sarveṣāmādibhūtāya lokānāmupakāriṇe || apāraparimāṇāya tapodhāmne namonamaḥ

Sanskrit only: no published translation is held for this verse.

।। सूत उवाच इति श्रुत्वा स्तुतिं विष्णुर्नारदं प्रत्यभाषत ।। किमर्थमागतोऽसि त्वं कि ते मनसि वर्तते

|| sūta uvāca iti śrutvā stutiṃ viṣṇurnāradaṃ pratyabhāṣata || kimarthamāgato'si tvaṃ ki te manasi vartate

Sanskrit only: no published translation is held for this verse.

कथयस्व महाभाग तत्सर्वं कथयामि ते ।। श्रुत्वा तु नारदो विष्णुमुक्तवान्सर्वकारणम्

kathayasva mahābhāga tatsarvaṃ kathayāmi te || śrutvā tu nārado viṣṇumuktavānsarvakāraṇam

Sanskrit only: no published translation is held for this verse.

नारदस्य वचः श्रुत्वा साधुसाध्वित्यपूजयत् ।। शृणु नारद वक्ष्यामि व्रतमेकं सनातनम्

nāradasya vacaḥ śrutvā sādhusādhvityapūjayat || śṛṇu nārada vakṣyāmi vratamekaṃ sanātanam

Sanskrit only: no published translation is held for this verse.

कृते त्रेतायुगे विष्णुर्द्वापरेऽनेकरूपधृक् ।। कलौ प्रत्यक्षफलदः सत्यनारायणो विभुः

kṛte tretāyuge viṣṇurdvāpare'nekarūpadhṛk || kalau pratyakṣaphaladaḥ satyanārāyaṇo vibhuḥ

Sanskrit only: no published translation is held for this verse.

चतुष्पादो हि धर्मश्च तस्य सत्यं प्रसाधनम् ।। सत्येन धार्यते लोकः सत्ये ब्रह्म प्रतिष्ठितम्

catuṣpādo hi dharmaśca tasya satyaṃ prasādhanam || satyena dhāryate lokaḥ satye brahma pratiṣṭhitam

Sanskrit only: no published translation is held for this verse.

सत्यनारायणव्रतमतः श्रेष्ठतमं स्मृतम् ।। इति श्रुत्वा हरेर्वाक्यं नारदः पुनरब्रवीत्

satyanārāyaṇavratamataḥ śreṣṭhatamaṃ smṛtam || iti śrutvā harervākyaṃ nāradaḥ punarabravīt

Sanskrit only: no published translation is held for this verse.

किं फलं किं विधानं च सत्यनारायणार्चने ।। तत्सर्वं कृपया देव कथयस्व कृपानिधे

kiṃ phalaṃ kiṃ vidhānaṃ ca satyanārāyaṇārcane || tatsarvaṃ kṛpayā deva kathayasva kṛpānidhe

Sanskrit only: no published translation is held for this verse.

।। भगवानुवाच नारायणार्चने वक्तुं फलं नालं चतुर्मुखः ।। शृणु संक्षेपतो ह्येतत्कथयामि तवाग्रतः

|| bhagavānuvāca nārāyaṇārcane vaktuṃ phalaṃ nālaṃ caturmukhaḥ || śṛṇu saṃkṣepato hyetatkathayāmi tavāgrataḥ

Sanskrit only: no published translation is held for this verse.

निर्धनोपि धनाढ्यः स्यादपुत्रः पुत्रवान्भवेत् ।। भ्रष्टराज्यो लभेद्राज्यमन्धोऽपि स्यात्सुलोचनः

nirdhanopi dhanāḍhyaḥ syādaputraḥ putravānbhavet || bhraṣṭarājyo labhedrājyamandho'pi syātsulocanaḥ

Sanskrit only: no published translation is held for this verse.

मुच्यते बंधनाद्बद्धो निर्भयः स्याद्भयातुरः ।। मनसा कामयेद्यंयं लभते तं विधानतः

mucyate baṃdhanādbaddho nirbhayaḥ syādbhayāturaḥ || manasā kāmayedyaṃyaṃ labhate taṃ vidhānataḥ

Sanskrit only: no published translation is held for this verse.

इह जन्मनि भो विप्र भक्त्या च विधिनार्चयेत् ।। लभेत्कामं हि तच्छीघ्रं नात्र कार्या विचारणा

iha janmani bho vipra bhaktyā ca vidhinārcayet || labhetkāmaṃ hi tacchīghraṃ nātra kāryā vicāraṇā

Sanskrit only: no published translation is held for this verse.

प्रातःस्नायी शुचिर्भूत्वा दंतधावनपूर्व कम् ।। तुलसीमञ्जरीं धृत्वा ध्यायेत्सत्यस्थितं हरिम्

prātaḥsnāyī śucirbhūtvā daṃtadhāvanapūrva kam || tulasīmañjarīṃ dhṛtvā dhyāyetsatyasthitaṃ harim

Sanskrit only: no published translation is held for this verse.

नारायणं सांद्रघनावदातं चतुर्भुजं पीतमहार्हवाससम् ।। प्रसन्नवक्त्रं नवकंजलोचनं सनन्दनाद्यैरुपसेवितं भजे

nārāyaṇaṃ sāṃdraghanāvadātaṃ caturbhujaṃ pītamahārhavāsasam || prasannavaktraṃ navakaṃjalocanaṃ sanandanādyairupasevitaṃ bhaje

Sanskrit only: no published translation is held for this verse.

करोमि ते व्रतं देव सायंकाले त्वदर्चनम् ।। श्रुत्वा गाथां त्वदीयां हि प्रसादं ते भजाम्यहम्

karomi te vrataṃ deva sāyaṃkāle tvadarcanam || śrutvā gāthāṃ tvadīyāṃ hi prasādaṃ te bhajāmyaham

Sanskrit only: no published translation is held for this verse.

इति संकल्प्य मनसा सायंकाले प्रपूजयेत् ।। पञ्चभिः कलशैर्जुष्टं कदलीतोरणान्वितम्

iti saṃkalpya manasā sāyaṃkāle prapūjayet || pañcabhiḥ kalaśairjuṣṭaṃ kadalītoraṇānvitam

Sanskrit only: no published translation is held for this verse.

शालग्रामं स्वर्णयुक्तं पूजयेदात्मसूक्तकैः ।। पञ्चामृतेन संस्नाप्य चन्दनादिभिरर्चयेत्

śālagrāmaṃ svarṇayuktaṃ pūjayedātmasūktakaiḥ || pañcāmṛtena saṃsnāpya candanādibhirarcayet

Sanskrit only: no published translation is held for this verse.

ॐनमो भगवते नित्यं सत्यदेवाय धीमहि ।। चतुःपदार्थदात्रे च नमस्तुभ्यं नमोनमः

oṃnamo bhagavate nityaṃ satyadevāya dhīmahi || catuḥpadārthadātre ca namastubhyaṃ namonamaḥ

Sanskrit only: no published translation is held for this verse.

जप्तव्यष्टोत्तरशतं जुहुयात्तद्दशांशकम् ।। तर्पणं मार्जनं कृत्वा कथां श्रुत्वा हरेरिमाम्

japtavyaṣṭottaraśataṃ juhuyāttaddaśāṃśakam || tarpaṇaṃ mārjanaṃ kṛtvā kathāṃ śrutvā harerimām

Sanskrit only: no published translation is held for this verse.

षडध्यायीं सत्यमुख्यां तत्पश्चात्तत्प्रसादकम् ।। सम्यग्विभज्य तत्सर्वं दापयेच्छ्रोतृकाय च

ṣaḍadhyāyīṃ satyamukhyāṃ tatpaścāttatprasādakam || samyagvibhajya tatsarvaṃ dāpayecchrotṛkāya ca

Sanskrit only: no published translation is held for this verse.

आचार्यायादिभागं च द्वितीयं स्वकुलाय सः ।। श्रोतृभ्यश्च तृतीयं च चतुर्थं चात्महेतवे

ācāryāyādibhāgaṃ ca dvitīyaṃ svakulāya saḥ || śrotṛbhyaśca tṛtīyaṃ ca caturthaṃ cātmahetave

Sanskrit only: no published translation is held for this verse.

विप्रेभ्यो भोजनं दद्यात्स्वयं भुञ्जीत वाग्यतः ।। देवर्षेऽनेन विधिना सत्यनारायणार्चनम्

viprebhyo bhojanaṃ dadyātsvayaṃ bhuñjīta vāgyataḥ || devarṣe'nena vidhinā satyanārāyaṇārcanam

Sanskrit only: no published translation is held for this verse.

कारयेद्यदि भक्त्या च श्रद्धया च समन्वितः ।। व्रती कामानवाप्नोति वांछितानिह जन्मनि

kārayedyadi bhaktyā ca śraddhayā ca samanvitaḥ || vratī kāmānavāpnoti vāṃchitāniha janmani

Sanskrit only: no published translation is held for this verse.

इह जन्मकृतं कर्म परजन्मनि पद्यते ।। परजन्मकृतं कर्म भोक्तव्यं सर्वदा नरैः

iha janmakṛtaṃ karma parajanmani padyate || parajanmakṛtaṃ karma bhoktavyaṃ sarvadā naraiḥ

Sanskrit only: no published translation is held for this verse.

सत्यनारायण व्रतमिह सर्वान्कामान्ददाति हि ।। अद्यैव जगतीमध्ये स्थापयामि त्वदाज्ञया

satyanārāyaṇa vratamiha sarvānkāmāndadāti hi || adyaiva jagatīmadhye sthāpayāmi tvadājñayā

Sanskrit only: no published translation is held for this verse.

इत्युक्त्ंवाऽतर्दधे देवो नारदः स्वर्गतिं ययौ ।। स्वयं नारायणो देवः काश्यां पुर्यां समागतः

ityuktṃvā'tardadhe devo nāradaḥ svargatiṃ yayau || svayaṃ nārāyaṇo devaḥ kāśyāṃ puryāṃ samāgataḥ

Sanskrit only: no published translation is held for this verse.