Brahma-Purana 115

ब्रह्मोवाच: शेषतीर्थम् इति ख्यातं सर्वकामप्रदायकम् । तस्य रूपं प्रवक्ष्यामि यन् मया परिभाषितम्

brahmovāca: śeṣatīrtham iti khyātaṃ sarvakāmapradāyakam / tasya rūpaṃ pravakṣyāmi yan mayā paribhāṣitam

Sanskrit only: no published translation is held for this verse.

शेषो नाम महानागो रसातलपतिः प्रभुः । सर्वनागैः परिवृतो रसातलम् अथाभ्यगात्

śeṣo nāma mahānāgo rasātalapatiḥ prabhuḥ / sarvanāgaiḥ parivṛto rasātalam athābhyagāt

Sanskrit only: no published translation is held for this verse.

राक्षसा दैत्यदनुजाः प्रविष्टा ये रसातलम् । तैर् निरस्तो भोगिपतिर् माम् उवाचाथ विह्वलः

rākṣasā daityadanujāḥ praviṣṭā ye rasātalam / tair nirasto bhogipatir mām uvācātha vihvalaḥ

Sanskrit only: no published translation is held for this verse.

शेष उवाच: रसातलं त्वया दत्तं राक्षसानां ममापि च । ते मे स्थानं न दास्यन्ति तस्मात् त्वां शरणं गतः

śeṣa uvāca: rasātalaṃ tvayā dattaṃ rākṣasānāṃ mamāpi ca / te me sthānaṃ na dāsyanti tasmāt tvāṃ śaraṇaṃ gataḥ

Sanskrit only: no published translation is held for this verse.

ततो ऽहम् अब्रवं नागं गौतमीं याहि पन्नग । तत्र स्तुत्वा महादेवं लप्स्यसे त्वं मनोरथम्

tato 'ham abravaṃ nāgaṃ gautamīṃ yāhi pannaga / tatra stutvā mahādevaṃ lapsyase tvaṃ manoratham

Sanskrit only: no published translation is held for this verse.

नान्यो ऽस्ति लोकत्रितये मनोरथसमर्पकः । मद्वाक्यप्रेरितो नागो गङ्गाम् आप्लुत्य यत्नतः । कृताञ्जलिपुटो भूत्वा तुष्टाव त्रिदशेश्वरम्

nānyo 'sti lokatritaye manorathasamarpakaḥ / madvākyaprerito nāgo gaṅgām āplutya yatnataḥ / kṛtāñjalipuṭo bhūtvā tuṣṭāva tridaśeśvaram

Sanskrit only: no published translation is held for this verse.

शेष उवाच: नमस् त्रैलोक्यनाथाय दक्षयज्ञविभेदिने । आदिकर्त्रे नमस् तुभ्यं नमस् त्रैलोक्यरूपिणे

śeṣa uvāca: namas trailokyanāthāya dakṣayajñavibhedine / ādikartre namas tubhyaṃ namas trailokyarūpiṇe

Sanskrit only: no published translation is held for this verse.

नमः सहस्रशिरसे नमः संहारकारिणे । सोमसूर्याग्निरूपाय जलरूपाय ते नमः

namaḥ sahasraśirase namaḥ saṃhārakāriṇe / somasūryāgnirūpāya jalarūpāya te namaḥ

Sanskrit only: no published translation is held for this verse.

सर्वदा सर्वरूपाय कालरूपाय ते नमः । पाहि शंकर सर्वेश पाहि सोमेश सर्वग । जगन्नाथ नमस् तुभ्यं देहि मे मनसेप्सितम्

sarvadā sarvarūpāya kālarūpāya te namaḥ / pāhi śaṃkara sarveśa pāhi someśa sarvaga / jagannātha namas tubhyaṃ dehi me manasepsitam

Sanskrit only: no published translation is held for this verse.

ब्रह्मोवाच: ततो महेश्वरः प्रीतः प्रादान् नागेप्सितान् वरान् । विनाशाय सुरारीणां दैत्यदानवरक्षसाम्

brahmovāca: tato maheśvaraḥ prītaḥ prādān nāgepsitān varān / vināśāya surārīṇāṃ daityadānavarakṣasām

Sanskrit only: no published translation is held for this verse.

शेषाय प्रददौ शूलं जह्य् अनेनारिपुंगवान् । ततः प्रोक्तः शिवेनासौ शेषः शूलेन भोगिभिः

śeṣāya pradadau śūlaṃ jahy anenāripuṃgavān / tataḥ proktaḥ śivenāsau śeṣaḥ śūlena bhogibhiḥ

Sanskrit only: no published translation is held for this verse.

रसातलम् अथो गत्वा निजघान रिपून् रणे । निहत्य नागः शूलेन दैत्यदानवराक्षसान्

rasātalam atho gatvā nijaghāna ripūn raṇe / nihatya nāgaḥ śūlena daityadānavarākṣasān

Sanskrit only: no published translation is held for this verse.

न्यवर्तत पुनर् देवो यत्र शेषेश्वरो हरः । पथा येन समायातो देवं द्रष्टुं स नागराट्

nyavartata punar devo yatra śeṣeśvaro haraḥ / pathā yena samāyāto devaṃ draṣṭuṃ sa nāgarāṭ

Sanskrit only: no published translation is held for this verse.

रसातलाद् यत्र देवो बिलं तत्र व्यजायत । तस्माद् बिलतलाद् यातं गाङ्गं वार्य् अतिपुण्यदम्

rasātalād yatra devo bilaṃ tatra vyajāyata / tasmād bilatalād yātaṃ gāṅgaṃ vāry atipuṇyadam

Sanskrit only: no published translation is held for this verse.

तद् वारि गङ्गाम् अगमद् गङ्गायाः संगमस् ततः । देवस्य पुरतश् चापि कुण्डं तत्र सुविस्तरम्

tad vāri gaṅgām agamad gaṅgāyāḥ saṃgamas tataḥ / devasya purataś cāpi kuṇḍaṃ tatra suvistaram

Sanskrit only: no published translation is held for this verse.

नागस् तत्राकरोद् धोमं यत्र चाग्निः सदा स्थितः । सोष्णं तद् अभवद् वारि गङ्गायास् तत्र संगमः

nāgas tatrākarod dhomaṃ yatra cāgniḥ sadā sthitaḥ / soṣṇaṃ tad abhavad vāri gaṅgāyās tatra saṃgamaḥ

Sanskrit only: no published translation is held for this verse.

देवदेवं समाराध्य नागः प्रीतो महायशाः । रसातलं ततो ऽभीष्टं शिवात् प्राप्य तलं ययौ

devadevaṃ samārādhya nāgaḥ prīto mahāyaśāḥ / rasātalaṃ tato 'bhīṣṭaṃ śivāt prāpya talaṃ yayau

Sanskrit only: no published translation is held for this verse.

ततः प्रभृति तत् तीर्थं नागतीर्थम् उदाहृतम् । सर्वकामप्रदं पुण्यं रोगदारिद्र्यनाशनम्

tataḥ prabhṛti tat tīrthaṃ nāgatīrtham udāhṛtam / sarvakāmapradaṃ puṇyaṃ rogadāridryanāśanam

Sanskrit only: no published translation is held for this verse.

आयुर्लक्ष्मीकरं पुण्यं स्नानदानाच् च मुक्तिदम् । शृणुयाद् वा पठेद् भक्त्या यो वापि स्मरते तु तत्

āyurlakṣmīkaraṃ puṇyaṃ snānadānāc ca muktidam / śṛṇuyād vā paṭhed bhaktyā yo vāpi smarate tu tat

Sanskrit only: no published translation is held for this verse.

तीर्थं शेषेश्वरो यत्र यत्र शक्तिप्रदः शिवः । एकविंशतितीर्थानाम् उभयोस् तत्र तीरयोः । शतानि मुनिशार्दूल सर्वसंपत्प्रदायिनाम्

tīrthaṃ śeṣeśvaro yatra yatra śaktipradaḥ śivaḥ / ekaviṃśatitīrthānām ubhayos tatra tīrayoḥ / śatāni muniśārdūla sarvasaṃpatpradāyinām

Sanskrit only: no published translation is held for this verse.