Brahma-Purana 151

ब्रह्मोवाच: निम्नभेदम् इति ख्यातं सर्वपापप्रणाशनम् । गङ्गाया उत्तरे पारे तीर्थं त्रैलोक्यविश्रुतम्

brahmovāca: nimnabhedam iti khyātaṃ sarvapāpapraṇāśanam / gaṅgāyā uttare pāre tīrthaṃ trailokyaviśrutam

Sanskrit only: no published translation is held for this verse.

यस्य संस्मरणेनापि सर्वपापक्षयो भवेत् । वेदद्वीपश् च तत्रैव दर्शनाद् वेदविद् भवेत्

yasya saṃsmaraṇenāpi sarvapāpakṣayo bhavet / vedadvīpaś ca tatraiva darśanād vedavid bhavet

Sanskrit only: no published translation is held for this verse.

उर्वशीं चकमे राजा ऐलः परमधार्मिकः । को न मोहम् उपायाति विलोक्य मदिरेक्षणाम्

urvaśīṃ cakame rājā ailaḥ paramadhārmikaḥ / ko na moham upāyāti vilokya madirekṣaṇām

Sanskrit only: no published translation is held for this verse.

सा प्रायाद् यत्र राजासौ घृतं स्तोकं समश्नुते । आनग्नदर्शनात् कृत्वा तस्याः कालावधिं नृपः

sā prāyād yatra rājāsau ghṛtaṃ stokaṃ samaśnute / ānagnadarśanāt kṛtvā tasyāḥ kālāvadhiṃ nṛpaḥ

Sanskrit only: no published translation is held for this verse.

तां स्वीचकार ललनां यूनां रम्यां नवां नवाम् । सुप्तायां शयने तस्यां समुत्तस्थौ पुरूरवाः

tāṃ svīcakāra lalanāṃ yūnāṃ ramyāṃ navāṃ navām / suptāyāṃ śayane tasyāṃ samuttasthau purūravāḥ

Sanskrit only: no published translation is held for this verse.

विलोक्य तं विवसनं तदैवासौ विनिर्गता । विद्युच्चञ्चलचित्तानां क्व स्थैर्यं ननु योषिताम्

vilokya taṃ vivasanaṃ tadaivāsau vinirgatā / vidyuccañcalacittānāṃ kva sthairyaṃ nanu yoṣitām

Sanskrit only: no published translation is held for this verse.

ईक्षां चक्रे स शर्वर्यां विवस्त्रो विस्मितो महान् । एतस्मिन्न् अन्तरे राजा युद्धायागाद् रिपून् प्रति

īkṣāṃ cakre sa śarvaryāṃ vivastro vismito mahān / etasminn antare rājā yuddhāyāgād ripūn prati

Sanskrit only: no published translation is held for this verse.

ताञ् जित्वा पुनर् अप्य् आगाद् देवलोकं सुपूजितम् । स चागत्य महाराजो वसिष्ठाच् च पुरोधसः

tāñ jitvā punar apy āgād devalokaṃ supūjitam / sa cāgatya mahārājo vasiṣṭhāc ca purodhasaḥ

Sanskrit only: no published translation is held for this verse.

उर्वश्या गमनं श्रुत्वा ततो दुःखसमन्वितः । न जुहोति न चाश्नाति न शृणोति न पश्यति

urvaśyā gamanaṃ śrutvā tato duḥkhasamanvitaḥ / na juhoti na cāśnāti na śṛṇoti na paśyati

Sanskrit only: no published translation is held for this verse.

एतस्मिन्न् अन्तरे तत्र मृतावस्थं नृपोत्तमम् । बोधयाम् आस वाक्यैश् च हेतुभूतैः पुरोहितः

etasminn antare tatra mṛtāvasthaṃ nṛpottamam / bodhayām āsa vākyaiś ca hetubhūtaiḥ purohitaḥ

Sanskrit only: no published translation is held for this verse.

वसिष्ठ उवाच: सा मृताद्य महाराज मा व्यथस्व महामते । एवं स्थितं तु मा त्वां वै अशिवाः स्पृश्युर् आशुगाः

vasiṣṭha uvāca: sā mṛtādya mahārāja mā vyathasva mahāmate / evaṃ sthitaṃ tu mā tvāṃ vai aśivāḥ spṛśyur āśugāḥ

Sanskrit only: no published translation is held for this verse.

न वै स्त्रैणानि जानीषे हृदयानि महामते । शालावृकाणां यादॄंशि तस्मात् त्वं भूप मा शुचः

na vai straiṇāni jānīṣe hṛdayāni mahāmate / śālāvṛkāṇāṃ yādṝṃśi tasmāt tvaṃ bhūpa mā śucaḥ

Sanskrit only: no published translation is held for this verse.

को नाम लोके राजेन्द्र कामिनीभिर् न वञ्चितः । वञ्चकत्वं नृशंसत्वं चञ्चलत्वं कुशीलता

ko nāma loke rājendra kāminībhir na vañcitaḥ / vañcakatvaṃ nṛśaṃsatvaṃ cañcalatvaṃ kuśīlatā

Sanskrit only: no published translation is held for this verse.

इति स्वाभाविकं यासां ताः कथं सुखहेतवः । कालेन को न निहतः को ऽर्थी गौरवम् आगतः

iti svābhāvikaṃ yāsāṃ tāḥ kathaṃ sukhahetavaḥ / kālena ko na nihataḥ ko 'rthī gauravam āgataḥ

Sanskrit only: no published translation is held for this verse.

श्रिया न भ्रामितः को वा योषिद्भिः को न खण्डितः । स्वप्नमायोपमा राजन् मदविप्लुतचेतसः

śriyā na bhrāmitaḥ ko vā yoṣidbhiḥ ko na khaṇḍitaḥ / svapnamāyopamā rājan madaviplutacetasaḥ

Sanskrit only: no published translation is held for this verse.

सुखाय योषितः कस्य ज्ञात्वैतद् विज्वरो भव । विहाय शंकरं विष्णुं गौतमीं वा महामते । दुःखिनां शरणं नान्यद् विद्यते भुवनत्रये

sukhāya yoṣitaḥ kasya jñātvaitad vijvaro bhava / vihāya śaṃkaraṃ viṣṇuṃ gautamīṃ vā mahāmate / duḥkhināṃ śaraṇaṃ nānyad vidyate bhuvanatraye

Sanskrit only: no published translation is held for this verse.

ब्रह्मोवाच: एतच् छ्रुत्वा ततो राजा दुःखं संहृत्य यत्नतः । गौतम्या मध्यसंस्थो ऽसाव् ऐलः परमधार्मिकः

brahmovāca: etac chrutvā tato rājā duḥkhaṃ saṃhṛtya yatnataḥ / gautamyā madhyasaṃstho 'sāv ailaḥ paramadhārmikaḥ

Sanskrit only: no published translation is held for this verse.

तत्र चाराधयाम् आस शिवं देवं जनार्दनम् । ब्रह्माणं भास्करं गङ्गां देवान् अन्यांश् च यत्नतः

tatra cārādhayām āsa śivaṃ devaṃ janārdanam / brahmāṇaṃ bhāskaraṃ gaṅgāṃ devān anyāṃś ca yatnataḥ

Sanskrit only: no published translation is held for this verse.

यो विपन्नो न तीर्थानि देवताश् च न सेवते । स कालवशगो जन्तुः कां दशाम् अनुयास्यति

yo vipanno na tīrthāni devatāś ca na sevate / sa kālavaśago jantuḥ kāṃ daśām anuyāsyati

Sanskrit only: no published translation is held for this verse.

तदीश्वरैकशरणो गौतमीसेवनोत्सुकः । परां श्रद्धाम् उपगतः संसारास्थापराङ्मुखः

tadīśvaraikaśaraṇo gautamīsevanotsukaḥ / parāṃ śraddhām upagataḥ saṃsārāsthāparāṅmukhaḥ

Sanskrit only: no published translation is held for this verse.

ईजे यज्ञांश् च बहुलान् ऋत्विग्भिर् बहुदक्षिणान् । वेदद्वीपो ऽभवत् तेन यज्ञद्वीपः स उच्यते

īje yajñāṃś ca bahulān ṛtvigbhir bahudakṣiṇān / vedadvīpo 'bhavat tena yajñadvīpaḥ sa ucyate

Sanskrit only: no published translation is held for this verse.

पौर्णमास्यां तु शर्वर्यां तत्रायाति सदोर्वशी । तस्य दीपस्य यः कुर्यात् प्रदक्षिणम् अथो नरः

paurṇamāsyāṃ tu śarvaryāṃ tatrāyāti sadorvaśī / tasya dīpasya yaḥ kuryāt pradakṣiṇam atho naraḥ

Sanskrit only: no published translation is held for this verse.

प्रदक्षिणीकृता तेन पृथिवी सागराम्बरा । वेदानां स्मरणं तत्र यज्ञानां स्मरणं तथा

pradakṣiṇīkṛtā tena pṛthivī sāgarāmbarā / vedānāṃ smaraṇaṃ tatra yajñānāṃ smaraṇaṃ tathā

Sanskrit only: no published translation is held for this verse.

सुकृती तत्र यः कुर्याद् वेदयज्ञफलं लभेत् । ऐलतीर्थं तु तज् ज्ञेयं तद् एव च पुरूरवम्

sukṛtī tatra yaḥ kuryād vedayajñaphalaṃ labhet / ailatīrthaṃ tu taj jñeyaṃ tad eva ca purūravam

Sanskrit only: no published translation is held for this verse.

वासिष्ठं चापि तत् तु स्यान् निम्नभेदं तद् उच्यते । ऐले राज्ञि न किंचित् स्यान् निम्नं सर्वेषु कर्मसु

vāsiṣṭhaṃ cāpi tat tu syān nimnabhedaṃ tad ucyate / aile rājñi na kiṃcit syān nimnaṃ sarveṣu karmasu

Sanskrit only: no published translation is held for this verse.

यद् एतन् निम्नम् उर्वश्यां सर्वभावेन वर्तनम् । तच् चापि भेदितं निम्नं वसिष्ठेन च गङ्गया

yad etan nimnam urvaśyāṃ sarvabhāvena vartanam / tac cāpi bheditaṃ nimnaṃ vasiṣṭhena ca gaṅgayā

Sanskrit only: no published translation is held for this verse.

निम्नभेदम् अभूत् तेन दृष्टादृष्टेष्टसिद्धिदम् । तत्र सप्त शतान्य् आहुस् तीर्थानि गुणवन्ति च

nimnabhedam abhūt tena dṛṣṭādṛṣṭeṣṭasiddhidam / tatra sapta śatāny āhus tīrthāni guṇavanti ca

Sanskrit only: no published translation is held for this verse.

तेषु स्नानं च दानं च सर्वक्रतुफलप्रदम् । स्नानं कृत्वा निम्नभेदे यः पश्यति सुरान् इमान्

teṣu snānaṃ ca dānaṃ ca sarvakratuphalapradam / snānaṃ kṛtvā nimnabhede yaḥ paśyati surān imān

Sanskrit only: no published translation is held for this verse.

इह चामुत्र वा निम्नं न किंचित् तस्य विद्यते । सर्वोन्नतिम् अवाप्यासौ मोदते दिवि शक्रवत्

iha cāmutra vā nimnaṃ na kiṃcit tasya vidyate / sarvonnatim avāpyāsau modate divi śakravat

Sanskrit only: no published translation is held for this verse.