Brahma-Purana 178

ततः स विस्मयाविष्टो रोमाञ्चिततनूरुहः । दण्डवत् प्रणिपत्योर्व्यां प्रणामम् अकरोत् तदा

tataḥ sa vismayāviṣṭo romāñcitatanūruhaḥ / daṇḍavat praṇipatyorvyāṃ praṇāmam akarot tadā

Sanskrit only: no published translation is held for this verse.

अद्य मे सफलं जन्म अद्य मे सफलं तपः । इत्य् उक्त्वा मुनिशार्दूलास् तं स्तोतुम् उपचक्रमे

adya me saphalaṃ janma adya me saphalaṃ tapaḥ / ity uktvā muniśārdūlās taṃ stotum upacakrame

Sanskrit only: no published translation is held for this verse.

कण्डुर् उवाच: नारायण हरे कृष्ण श्रीवत्साङ्क जगत्पते । जगद्बीज जगद्धाम जगत्साक्षिन् नमो ऽस्तु ते

kaṇḍur uvāca: nārāyaṇa hare kṛṣṇa śrīvatsāṅka jagatpate / jagadbīja jagaddhāma jagatsākṣin namo 'stu te

Sanskrit only: no published translation is held for this verse.

अव्यक्त जिष्णो प्रभव प्रधानपुरुषोत्तम । पुण्डरीकाक्ष गोविन्द लोकनाथ नमो ऽस्तु ते

avyakta jiṣṇo prabhava pradhānapuruṣottama / puṇḍarīkākṣa govinda lokanātha namo 'stu te

Sanskrit only: no published translation is held for this verse.

हिरण्यगर्भ श्रीनाथ पद्मनाथ सनातन । भूगर्भ ध्रुव ईशान हृषीकेश नमो ऽस्तु ते

hiraṇyagarbha śrīnātha padmanātha sanātana / bhūgarbha dhruva īśāna hṛṣīkeśa namo 'stu te

Sanskrit only: no published translation is held for this verse.

अनाद्यन्तामृताजेय जय त्वं जयतां वर । अजिताखण्ड श्रीकृष्ण श्रीनिवास नमो ऽस्तु ते

anādyantāmṛtājeya jaya tvaṃ jayatāṃ vara / ajitākhaṇḍa śrīkṛṣṇa śrīnivāsa namo 'stu te

Sanskrit only: no published translation is held for this verse.

पर्जन्यधर्मकर्ता च दुष्पार दुरधिष्ठित । दुःखार्तिनाशन हरे जलशायिन् नमो ऽस्तु ते

parjanyadharmakartā ca duṣpāra duradhiṣṭhita / duḥkhārtināśana hare jalaśāyin namo 'stu te

Sanskrit only: no published translation is held for this verse.

भूतपाव्यक्त भूतेश भूततत्त्वैर् अनाकुल । भूताधिवास भूतात्मन् भूतगर्भ नमो ऽस्तु ते

bhūtapāvyakta bhūteśa bhūtatattvair anākula / bhūtādhivāsa bhūtātman bhūtagarbha namo 'stu te

Sanskrit only: no published translation is held for this verse.

यज्ञयज्वन् यज्ञधर यज्ञधाताभयप्रद । यज्ञगर्भ हिरण्याङ्ग पृश्निगर्भ नमो ऽस्तु ते

yajñayajvan yajñadhara yajñadhātābhayaprada / yajñagarbha hiraṇyāṅga pṛśnigarbha namo 'stu te

Sanskrit only: no published translation is held for this verse.

क्षेत्रज्ञः क्षेत्रभृत् क्षेत्री क्षेत्रहा क्षेत्रकृद् वशी । क्षेत्रात्मन् क्षेत्ररहित क्षेत्रस्रष्ट्रे नमो ऽस्तु ते

kṣetrajñaḥ kṣetrabhṛt kṣetrī kṣetrahā kṣetrakṛd vaśī / kṣetrātman kṣetrarahita kṣetrasraṣṭre namo 'stu te

Sanskrit only: no published translation is held for this verse.

गुणालय गुणावास गुणाश्रय गुणावह । गुणभोक्तृ गुणाराम गुणत्यागिन् नमो ऽस्तु ते

guṇālaya guṇāvāsa guṇāśraya guṇāvaha / guṇabhoktṛ guṇārāma guṇatyāgin namo 'stu te

Sanskrit only: no published translation is held for this verse.

त्वं विष्णुस् त्वं हरिश् चक्री त्वं जिष्णुस् त्वं जनार्दनः । त्वं भूतस् त्वं वषट्कारस् त्वं भव्यस् त्वं भवत्प्रभुः

tvaṃ viṣṇus tvaṃ hariś cakrī tvaṃ jiṣṇus tvaṃ janārdanaḥ / tvaṃ bhūtas tvaṃ vaṣaṭkāras tvaṃ bhavyas tvaṃ bhavatprabhuḥ

Sanskrit only: no published translation is held for this verse.

त्वं भूतकृत् त्वम् अव्यक्तस् त्वं भवो भूतभृद् भवान् । त्वं भूतभावनो देवस् त्वाम् आहुर् अजम् ईश्वरम्

tvaṃ bhūtakṛt tvam avyaktas tvaṃ bhavo bhūtabhṛd bhavān / tvaṃ bhūtabhāvano devas tvām āhur ajam īśvaram

Sanskrit only: no published translation is held for this verse.

त्वम् अनन्तः कृतज्ञस् त्वं प्रकृतिस् त्वं वृषाकपिः । त्वं रुद्रस् त्वं दुराधर्षस् त्वम् अमोघस् त्वम् ईश्वरः

tvam anantaḥ kṛtajñas tvaṃ prakṛtis tvaṃ vṛṣākapiḥ / tvaṃ rudras tvaṃ durādharṣas tvam amoghas tvam īśvaraḥ

Sanskrit only: no published translation is held for this verse.

त्वं विश्वकर्मा जिष्णुस् त्वं त्वं शंभुस् त्वं वृषाकृतिः । त्वं शंकरस् त्वम् उशना त्वं सत्यं त्वं तपो जनः

tvaṃ viśvakarmā jiṣṇus tvaṃ tvaṃ śaṃbhus tvaṃ vṛṣākṛtiḥ / tvaṃ śaṃkaras tvam uśanā tvaṃ satyaṃ tvaṃ tapo janaḥ

Sanskrit only: no published translation is held for this verse.

त्वं विश्वजेता त्वं शर्म त्वं शरण्यस् त्वम् अक्षरम् । त्वं शंभुस् त्वं स्वयंभूश् च त्वं ज्येष्ठस् त्वं परायणः

tvaṃ viśvajetā tvaṃ śarma tvaṃ śaraṇyas tvam akṣaram / tvaṃ śaṃbhus tvaṃ svayaṃbhūś ca tvaṃ jyeṣṭhas tvaṃ parāyaṇaḥ

Sanskrit only: no published translation is held for this verse.

त्वम् आदित्यस् त्वम् ॐकारस् त्वं प्राणस् त्वं तमिस्रहा । त्वं पर्जन्यस् त्वं प्रथितस् त्वं वेधास् त्वं सुरेश्वरः

tvam ādityas tvam oṃkāras tvaṃ prāṇas tvaṃ tamisrahā / tvaṃ parjanyas tvaṃ prathitas tvaṃ vedhās tvaṃ sureśvaraḥ

Sanskrit only: no published translation is held for this verse.

त्वम् ऋग् यजुः साम चैव त्वम् आत्मा संमतो भवान् । त्वम् अग्निस् त्वं च पवनस् त्वम् आपो वसुधा भवान्

tvam ṛg yajuḥ sāma caiva tvam ātmā saṃmato bhavān / tvam agnis tvaṃ ca pavanas tvam āpo vasudhā bhavān

Sanskrit only: no published translation is held for this verse.

त्वं स्रष्टा त्वं तथा भोक्ता होता त्वं च हविः क्रतुः । त्वं प्रभुस् त्वं विभुः श्रेष्ठस् त्वं लोकपतिर् अच्युतः

tvaṃ sraṣṭā tvaṃ tathā bhoktā hotā tvaṃ ca haviḥ kratuḥ / tvaṃ prabhus tvaṃ vibhuḥ śreṣṭhas tvaṃ lokapatir acyutaḥ

Sanskrit only: no published translation is held for this verse.

त्वं सर्वदर्शनः श्रीमांस् त्वं सर्वदमनो ऽरिहा । त्वम् अहस् त्वं तथा रात्रिस् त्वाम् आहुर् वत्सरं बुधाः

tvaṃ sarvadarśanaḥ śrīmāṃs tvaṃ sarvadamano 'rihā / tvam ahas tvaṃ tathā rātris tvām āhur vatsaraṃ budhāḥ

Sanskrit only: no published translation is held for this verse.

त्वं कालस् त्वं कला काष्ठा त्वं मुहूर्तः क्षणा लवाः । त्वं बालस् त्वं तथा वृद्धस् त्वं पुमान् स्त्री नपुंसकः

tvaṃ kālas tvaṃ kalā kāṣṭhā tvaṃ muhūrtaḥ kṣaṇā lavāḥ / tvaṃ bālas tvaṃ tathā vṛddhas tvaṃ pumān strī napuṃsakaḥ

Sanskrit only: no published translation is held for this verse.

त्वं विश्वयोनिस् त्वं चक्षुस् त्वं स्थाणुस् त्वं शुचिश्रवाः । त्वं शाश्वतस् त्वम् अजितस् त्वम् उपेन्द्रस् त्वम् उत्तमः

tvaṃ viśvayonis tvaṃ cakṣus tvaṃ sthāṇus tvaṃ śuciśravāḥ / tvaṃ śāśvatas tvam ajitas tvam upendras tvam uttamaḥ

Sanskrit only: no published translation is held for this verse.

त्वं सर्वविश्वसुखदस् त्वं वेदाङ्गं त्वम् अव्ययः । त्वं वेदवेदस् त्वं धाता विधाता त्वं समाहितः

tvaṃ sarvaviśvasukhadas tvaṃ vedāṅgaṃ tvam avyayaḥ / tvaṃ vedavedas tvaṃ dhātā vidhātā tvaṃ samāhitaḥ

Sanskrit only: no published translation is held for this verse.

त्वं जलनिधिर् आमूलं त्वं धाता त्वं पुनर् वसुः । त्वं वैद्यस् त्वं धृतात्मा च त्वम् अतीन्द्रियगोचरः

tvaṃ jalanidhir āmūlaṃ tvaṃ dhātā tvaṃ punar vasuḥ / tvaṃ vaidyas tvaṃ dhṛtātmā ca tvam atīndriyagocaraḥ

Sanskrit only: no published translation is held for this verse.

त्वम् अग्रणीर् ग्रामणीस् त्वं त्वं सुपर्णस् त्वम् आदिमान् । त्वं संग्रहस् त्वं सुमहत् त्वं धृतात्मा त्वम् अच्युतः

tvam agraṇīr grāmaṇīs tvaṃ tvaṃ suparṇas tvam ādimān / tvaṃ saṃgrahas tvaṃ sumahat tvaṃ dhṛtātmā tvam acyutaḥ

Sanskrit only: no published translation is held for this verse.

त्वं यमस् त्वं च नियमस् त्वं प्रांशुस् त्वं चतुर्भुजः । त्वम् एवान्नान्तरात्मा त्वं परमात्मा त्वम् उच्यते

tvaṃ yamas tvaṃ ca niyamas tvaṃ prāṃśus tvaṃ caturbhujaḥ / tvam evānnāntarātmā tvaṃ paramātmā tvam ucyate

Sanskrit only: no published translation is held for this verse.

त्वं गुरुस् त्वं गुरुतमस् त्वं वामस् त्वं प्रदक्षिणः । त्वं पिप्पलस् त्वम् अगमस् त्वं व्यक्तस् त्वं प्रजापतिः

tvaṃ gurus tvaṃ gurutamas tvaṃ vāmas tvaṃ pradakṣiṇaḥ / tvaṃ pippalas tvam agamas tvaṃ vyaktas tvaṃ prajāpatiḥ

Sanskrit only: no published translation is held for this verse.

हिरण्यनाभस् त्वं देवस् त्वं शशी त्वं प्रजापतिः । अनिर्देश्यवपुस् त्वं वै त्वं यमस् त्वं सुरारिहा

hiraṇyanābhas tvaṃ devas tvaṃ śaśī tvaṃ prajāpatiḥ / anirdeśyavapus tvaṃ vai tvaṃ yamas tvaṃ surārihā

Sanskrit only: no published translation is held for this verse.

त्वं च संकर्षणो देवस् त्वं कर्ता त्वं सनातनः । त्वं वासुदेवो ऽमेयात्मा त्वम् एव गुणवर्जितः

tvaṃ ca saṃkarṣaṇo devas tvaṃ kartā tvaṃ sanātanaḥ / tvaṃ vāsudevo 'meyātmā tvam eva guṇavarjitaḥ

Sanskrit only: no published translation is held for this verse.

त्वं ज्येष्ठस् त्वं वरिष्ठस् त्वं त्वं सहिष्णुश् च माधवः । सहस्रशीर्षा त्वं देवस् त्वम् अव्यक्तः सहस्रदृक्

tvaṃ jyeṣṭhas tvaṃ variṣṭhas tvaṃ tvaṃ sahiṣṇuś ca mādhavaḥ / sahasraśīrṣā tvaṃ devas tvam avyaktaḥ sahasradṛk

Sanskrit only: no published translation is held for this verse.

सहस्रपादस् त्वं देवस् त्वं विराट् त्वं सुरप्रभुः । त्वम् एव तिष्ठसे भूयो देवदेव दशाङ्गुलः

sahasrapādas tvaṃ devas tvaṃ virāṭ tvaṃ suraprabhuḥ / tvam eva tiṣṭhase bhūyo devadeva daśāṅgulaḥ

Sanskrit only: no published translation is held for this verse.

यद् भूतं तत् त्वम् एवोक्तः पुरुषः शक्र उत्तमः । यद् भाव्यं तत् त्वम् ईशानस् त्वम् ऋतस् त्वं तथामृतः

yad bhūtaṃ tat tvam evoktaḥ puruṣaḥ śakra uttamaḥ / yad bhāvyaṃ tat tvam īśānas tvam ṛtas tvaṃ tathāmṛtaḥ

Sanskrit only: no published translation is held for this verse.

त्वत्तो रोहत्य् अयं लोको महीयांस् त्वम् अनुत्तमः । त्वं ज्यायान् पुरुषस् त्वं च त्वं देव दशधा स्थितः

tvatto rohaty ayaṃ loko mahīyāṃs tvam anuttamaḥ / tvaṃ jyāyān puruṣas tvaṃ ca tvaṃ deva daśadhā sthitaḥ

Sanskrit only: no published translation is held for this verse.

विश्वभूतश् चतुर्भागो नवभागो ऽमृतो दिवि । नवभागो ऽन्तरिक्षस्थः पौरुषेयः सनातनः

viśvabhūtaś caturbhāgo navabhāgo 'mṛto divi / navabhāgo 'ntarikṣasthaḥ pauruṣeyaḥ sanātanaḥ

Sanskrit only: no published translation is held for this verse.

भागद्वयं च भूसंस्थं चतुर्भागो ऽप्य् अभूद् इह । त्वत्तो यज्ञाः संभवन्ति जगतो वृष्टिकारणम्

bhāgadvayaṃ ca bhūsaṃsthaṃ caturbhāgo 'py abhūd iha / tvatto yajñāḥ saṃbhavanti jagato vṛṣṭikāraṇam

Sanskrit only: no published translation is held for this verse.

त्वत्तो विराट् समुत्पन्नो जगतो हृदि यः पुमान् । सो ऽतिरिच्यत भूतेभ्यस् तेजसा यशसा श्रिया

tvatto virāṭ samutpanno jagato hṛdi yaḥ pumān / so 'tiricyata bhūtebhyas tejasā yaśasā śriyā

Sanskrit only: no published translation is held for this verse.

त्वत्तः सुराणाम् आहारः पृषदाज्यम् अजायत । ग्राम्यारण्याश् चौषधयस् त्वत्तः पशुमृगादयः

tvattaḥ surāṇām āhāraḥ pṛṣadājyam ajāyata / grāmyāraṇyāś cauṣadhayas tvattaḥ paśumṛgādayaḥ

Sanskrit only: no published translation is held for this verse.

ध्येयध्यानपरस् त्वं च कृतवान् असि चौषधीः । त्वं देवदेव सप्तास्य कालाख्यो दीप्तविग्रहः

dhyeyadhyānaparas tvaṃ ca kṛtavān asi cauṣadhīḥ / tvaṃ devadeva saptāsya kālākhyo dīptavigrahaḥ

Sanskrit only: no published translation is held for this verse.

जङ्गमाजङ्गमं सर्वं जगद् एतच् चराचरम् । त्वत्तः सर्वम् इदं जातं त्वयि सर्वं प्रतिष्ठितम्

jaṅgamājaṅgamaṃ sarvaṃ jagad etac carācaram / tvattaḥ sarvam idaṃ jātaṃ tvayi sarvaṃ pratiṣṭhitam

Sanskrit only: no published translation is held for this verse.

अनिरुद्धस् त्वं माधवस् त्वं प्रद्युम्नः सुरारिहा । देव सर्वसुरश्रेष्ठ सर्वलोकपरायण

aniruddhas tvaṃ mādhavas tvaṃ pradyumnaḥ surārihā / deva sarvasuraśreṣṭha sarvalokaparāyaṇa

Sanskrit only: no published translation is held for this verse.

त्राहि माम् अरविन्दाक्ष नारायण नमो ऽस्तु ते । नमस् ते भगवन् विष्णो नमस् ते पुरुषोत्तम

trāhi mām aravindākṣa nārāyaṇa namo 'stu te / namas te bhagavan viṣṇo namas te puruṣottama

Sanskrit only: no published translation is held for this verse.

नमस् ते सर्वलोकेश नमस् ते कमलालय । गुणालय नमस् ते ऽस्तु नमस् ते ऽस्तु गुणाकर

namas te sarvalokeśa namas te kamalālaya / guṇālaya namas te 'stu namas te 'stu guṇākara

Sanskrit only: no published translation is held for this verse.

वासुदेव नमस् ते ऽस्तु नमस् ते ऽस्तु सुरोत्तम । जनार्दन नमस् ते ऽस्तु नमस् ते ऽस्तु सनातन

vāsudeva namas te 'stu namas te 'stu surottama / janārdana namas te 'stu namas te 'stu sanātana

Sanskrit only: no published translation is held for this verse.

नमस् ते योगिनां गम्य योगावास नमो ऽस्तु ते । गोपते श्रीपते विष्णो नमस् ते ऽस्तु मरुत्पते

namas te yogināṃ gamya yogāvāsa namo 'stu te / gopate śrīpate viṣṇo namas te 'stu marutpate

Sanskrit only: no published translation is held for this verse.

जगत्पते जगत्सूते नमस् ते ज्ञानिनां पते । दिवस्पते नमस् ते ऽस्तु नमस् ते ऽस्तु महीपते

jagatpate jagatsūte namas te jñānināṃ pate / divaspate namas te 'stu namas te 'stu mahīpate

Sanskrit only: no published translation is held for this verse.

नमस् ते मधुहन्त्रे च नमस् ते पुष्करेक्षण । कैटभघ्न नमस् ते ऽस्तु सुब्रह्मण्य नमो ऽस्तु ते

namas te madhuhantre ca namas te puṣkarekṣaṇa / kaiṭabhaghna namas te 'stu subrahmaṇya namo 'stu te

Sanskrit only: no published translation is held for this verse.

नमो ऽस्तु ते महामीन श्रुतिपृष्ठधराच्युत । समुद्रसलिलक्षोभ पद्मजाह्लादकारिणे

namo 'stu te mahāmīna śrutipṛṣṭhadharācyuta / samudrasalilakṣobha padmajāhlādakāriṇe

Sanskrit only: no published translation is held for this verse.

अश्वशीर्ष महाघोण महापुरुषविग्रह । मधुकैटभहन्त्रे च नमस् ते तुरगानन

aśvaśīrṣa mahāghoṇa mahāpuruṣavigraha / madhukaiṭabhahantre ca namas te turagānana

Sanskrit only: no published translation is held for this verse.

महाकमठभोगाय पृथिव्युद्धरणाय च । विधृताद्रिस्वरूपाय महाकूर्माय ते नमः

mahākamaṭhabhogāya pṛthivyuddharaṇāya ca / vidhṛtādrisvarūpāya mahākūrmāya te namaḥ

Sanskrit only: no published translation is held for this verse.

नमो महावराहाय पृथिव्युद्धारकारिणे । नमश् चादिवराहाय विश्वरूपाय वेधसे

namo mahāvarāhāya pṛthivyuddhārakāriṇe / namaś cādivarāhāya viśvarūpāya vedhase

Sanskrit only: no published translation is held for this verse.

नमो ऽनन्ताय सूक्ष्माय मुख्याय च वराय च । परमाणुस्वरूपाय योगिगम्याय ते नमः

namo 'nantāya sūkṣmāya mukhyāya ca varāya ca / paramāṇusvarūpāya yogigamyāya te namaḥ

Sanskrit only: no published translation is held for this verse.

तस्मै नमः कारणकारणाय ब्र्प् १७८।१७७अ योगीन्द्रवृत्तनिलयाय सुदुर्विदाय ब्र्प् १७८।१७७ब् क्षीरार्णवाश्रितमहाहिसुतल्पगाय ब्र्प् १७८।१७७च् तुभ्यं नमः कनकरत्नसुकुण्डलाय ब्र्प् १७८।१७७द् व्यास उवाच: इत्थं स्तुतस् तदा तेन प्रीतः प्रोवाच माधवः । क्षिप्रं ब्रूहि मुनिश्रेष्ठ मत्तो यद् अभिवाञ्छसि

tasmai namaḥ kāraṇakāraṇāya BrP 178.177a yogīndravṛttanilayāya sudurvidāya BrP 178.177b kṣīrārṇavāśritamahāhisutalpagāya BrP 178.177c tubhyaṃ namaḥ kanakaratnasukuṇḍalāya BrP 178.177d vyāsa uvāca: itthaṃ stutas tadā tena prītaḥ provāca mādhavaḥ / kṣipraṃ brūhi muniśreṣṭha matto yad abhivāñchasi

Sanskrit only: no published translation is held for this verse.

कण्डुर् उवाच: संसारे ऽस्मिञ् जगन्नाथ दुस्तरे लोमहर्षणे । अनित्ये दुःखबहुले कदलीदलसंनिभे

kaṇḍur uvāca: saṃsāre 'smiñ jagannātha dustare lomaharṣaṇe / anitye duḥkhabahule kadalīdalasaṃnibhe

Sanskrit only: no published translation is held for this verse.

निराश्रये निरालम्बे जलबुद्बुदचञ्चले । सर्वोपद्रवसंयुक्ते दुस्तरे चातिभैरवे

nirāśraye nirālambe jalabudbudacañcale / sarvopadravasaṃyukte dustare cātibhairave

Sanskrit only: no published translation is held for this verse.

भ्रमामि सुचिरं कालं मायया मोहितस् तव । न चान्तम् अभिगच्छामि विषयासक्तमानसः

bhramāmi suciraṃ kālaṃ māyayā mohitas tava / na cāntam abhigacchāmi viṣayāsaktamānasaḥ

Sanskrit only: no published translation is held for this verse.

त्वाम् अहं चाद्य देवेश संसारभयपीडितः । गतो ऽस्मि शरणं कृष्ण माम् उद्धर भवार्णवात्

tvām ahaṃ cādya deveśa saṃsārabhayapīḍitaḥ / gato 'smi śaraṇaṃ kṛṣṇa mām uddhara bhavārṇavāt

Sanskrit only: no published translation is held for this verse.

गन्तुम् इच्छामि परमं पदं यत् ते सनातनम् । प्रसादात् तव देवेश पुनरावृत्तिदुर्लभम्

gantum icchāmi paramaṃ padaṃ yat te sanātanam / prasādāt tava deveśa punarāvṛttidurlabham

Sanskrit only: no published translation is held for this verse.

श्रीभगवान् उवाच: भक्तो ऽसि मे मुनिश्रेष्ठ माम् आराधय नित्यशः । मत्प्रसादाद् ध्रुवं मोक्षं प्राप्यसि त्वं समीहितम्

śrībhagavān uvāca: bhakto 'si me muniśreṣṭha mām ārādhaya nityaśaḥ / matprasādād dhruvaṃ mokṣaṃ prāpyasi tvaṃ samīhitam

Sanskrit only: no published translation is held for this verse.

मद्भक्ताः क्षत्रिया वैश्याः स्त्रियः शूद्रान्त्यजातिजाः । प्राप्नुवन्ति परां सिद्धिं किं पुनस् त्वं द्विजोत्तम

madbhaktāḥ kṣatriyā vaiśyāḥ striyaḥ śūdrāntyajātijāḥ / prāpnuvanti parāṃ siddhiṃ kiṃ punas tvaṃ dvijottama

Sanskrit only: no published translation is held for this verse.

श्वपाको ऽपि च मद्भक्तः सम्यक् श्रद्धासमन्वितः । प्राप्नोत्य् अभिमतां सिद्धिम् अन्येषां तत्र का कथा

śvapāko 'pi ca madbhaktaḥ samyak śraddhāsamanvitaḥ / prāpnoty abhimatāṃ siddhim anyeṣāṃ tatra kā kathā

Sanskrit only: no published translation is held for this verse.

व्यास उवाच: एवम् उक्त्वा तु तं विप्राः स देवो भक्तवत्सलः । दुर्विज्ञेयगतिर् विष्णुस् तत्रैवान्तरधीयत

vyāsa uvāca: evam uktvā tu taṃ viprāḥ sa devo bhaktavatsalaḥ / durvijñeyagatir viṣṇus tatraivāntaradhīyata

Sanskrit only: no published translation is held for this verse.

गते तस्मिन् मुनिश्रेष्ठाः कण्डुः संहृष्टमानसः । सर्वान् कामान् परित्यज्य स्वस्थचित्तो भवत् पुनः

gate tasmin muniśreṣṭhāḥ kaṇḍuḥ saṃhṛṣṭamānasaḥ / sarvān kāmān parityajya svasthacitto bhavat punaḥ

Sanskrit only: no published translation is held for this verse.

सर्वेन्द्रियाणि संयम्य निर्ममो निरहंकृतिः । एकाग्रमानसः सम्यग् ध्यात्वा तं पुरुषोत्तमम्

sarvendriyāṇi saṃyamya nirmamo nirahaṃkṛtiḥ / ekāgramānasaḥ samyag dhyātvā taṃ puruṣottamam

Sanskrit only: no published translation is held for this verse.

निर्लेपं निर्गुणं शान्तं सत्तामात्रव्यवस्थितम् । अवाप परमं मोक्षं सुराणाम् अपि दुर्लभम्

nirlepaṃ nirguṇaṃ śāntaṃ sattāmātravyavasthitam / avāpa paramaṃ mokṣaṃ surāṇām api durlabham

Sanskrit only: no published translation is held for this verse.

यः पठेच् छृणुयाद् वापि कथां कण्डोर् महात्मनः । विमुक्तः सर्वपापेभ्यः स्वर्गलोकं स गच्छति

yaḥ paṭhec chṛṇuyād vāpi kathāṃ kaṇḍor mahātmanaḥ / vimuktaḥ sarvapāpebhyaḥ svargalokaṃ sa gacchati

Sanskrit only: no published translation is held for this verse.

एवं मया मुनिश्रेष्ठाः कर्मभूमिर् उदाहृता । मोक्षक्षेत्रं च परमं देवं च पुरुषोत्तमम्

evaṃ mayā muniśreṣṭhāḥ karmabhūmir udāhṛtā / mokṣakṣetraṃ ca paramaṃ devaṃ ca puruṣottamam

Sanskrit only: no published translation is held for this verse.

ये पश्यन्ति विभुं स्तुवन्ति वरदं ध्यायन्ति मुक्तिप्रदं । भक्त्या श्रीपुरुषोत्तमाख्यम् अजरं संसारदुःखापहम्

ye paśyanti vibhuṃ stuvanti varadaṃ dhyāyanti muktipradaṃ / bhaktyā śrīpuruṣottamākhyam ajaraṃ saṃsāraduḥkhāpaham

Sanskrit only: no published translation is held for this verse.

ते भुक्त्वा मनुजेन्द्रभोगम् अमलाः स्वर्गे च दिव्यं सुखं । पश्चाद् यान्ति समस्तदोषरहिताः स्थानं हरेर् अव्ययम्

te bhuktvā manujendrabhogam amalāḥ svarge ca divyaṃ sukhaṃ / paścād yānti samastadoṣarahitāḥ sthānaṃ harer avyayam

Sanskrit only: no published translation is held for this verse.