Brahma-Purana 183

व्यास उवाच: कंसस् त्व् अथोद्विग्नमनाः प्राह सर्वान् महासुरान् । प्रलम्बकेशिप्रमुखान् आहूयासुरपुंगवान्

vyāsa uvāca: kaṃsas tv athodvignamanāḥ prāha sarvān mahāsurān / pralambakeśipramukhān āhūyāsurapuṃgavān

Sanskrit only: no published translation is held for this verse.

कंस उवाच: हे प्रलम्ब महाबाहो केशिन् धेनुक पूतने । अरिष्टाद्यैस् तथा चान्यैः श्रूयतां वचनं मम

kaṃsa uvāca: he pralamba mahābāho keśin dhenuka pūtane / ariṣṭādyais tathā cānyaiḥ śrūyatāṃ vacanaṃ mama

Sanskrit only: no published translation is held for this verse.

मां हन्तुम् अमरैर् यत्नः कृतः किल दुरात्मभिः । मद्वीर्यतापितान् वीरान् न त्व् एतान् गणयाम्य् अहम्

māṃ hantum amarair yatnaḥ kṛtaḥ kila durātmabhiḥ / madvīryatāpitān vīrān na tv etān gaṇayāmy aham

Sanskrit only: no published translation is held for this verse.

आश्चर्यं कन्यया चोक्तं जायते दैत्यपुंगवाः । हास्यं मे जायते वीरास् तेषु यत्नपरेष्व् अपि

āścaryaṃ kanyayā coktaṃ jāyate daityapuṃgavāḥ / hāsyaṃ me jāyate vīrās teṣu yatnapareṣv api

Sanskrit only: no published translation is held for this verse.

तथापि खलु दुष्टानां तेषाम् अप्य् अधिकं मया । अपकाराय दैत्येन्द्रा यतनीयं दुरात्मनाम्

tathāpi khalu duṣṭānāṃ teṣām apy adhikaṃ mayā / apakārāya daityendrā yatanīyaṃ durātmanām

Sanskrit only: no published translation is held for this verse.

उत्पन्नश् चापि मृत्युर् मे भूतभव्यभवत्प्रभुः । इत्य् एतद् बालिका प्राह देवकीगर्भसंभवा

utpannaś cāpi mṛtyur me bhūtabhavyabhavatprabhuḥ / ity etad bālikā prāha devakīgarbhasaṃbhavā

Sanskrit only: no published translation is held for this verse.

तस्माद् बालेषु परमो यत्नः कार्यो महीतले । यत्रोद्रिक्तं बलं बाले स हन्तव्यः प्रयत्नतः

tasmād bāleṣu paramo yatnaḥ kāryo mahītale / yatrodriktaṃ balaṃ bāle sa hantavyaḥ prayatnataḥ

Sanskrit only: no published translation is held for this verse.

व्यास उवाच: इत्य् आज्ञाप्यासुरान् कंसः प्रविश्यात्मगृहं ततः । उवाच वसुदेवं च देवकीम् अविरोधतः

vyāsa uvāca: ity ājñāpyāsurān kaṃsaḥ praviśyātmagṛhaṃ tataḥ / uvāca vasudevaṃ ca devakīm avirodhataḥ

Sanskrit only: no published translation is held for this verse.

कंस उवाच: युवयोर् घातिता गर्भा वृथैवैते मयाधुना । को ऽप्य् अन्य एव नाशाय बालो मम समुद्गतः

kaṃsa uvāca: yuvayor ghātitā garbhā vṛthaivaite mayādhunā / ko 'py anya eva nāśāya bālo mama samudgataḥ

Sanskrit only: no published translation is held for this verse.

तद् अलं परितापेन नूनं यद् भाविनो हि ते । अर्भका युवयोः को वा आयुषो ऽन्ते न हन्यते

tad alaṃ paritāpena nūnaṃ yad bhāvino hi te / arbhakā yuvayoḥ ko vā āyuṣo 'nte na hanyate

Sanskrit only: no published translation is held for this verse.

व्यास उवाच: इत्य् आश्वास्य विमुच्यैव कंसस् तौ परितोष्य च । अन्तर्गृहं द्विजश्रेष्ठाः प्रविवेश पुनः स्वकम्

vyāsa uvāca: ity āśvāsya vimucyaiva kaṃsas tau paritoṣya ca / antargṛhaṃ dvijaśreṣṭhāḥ praviveśa punaḥ svakam

Sanskrit only: no published translation is held for this verse.