Brahma-Purana 198

व्यास उवाच: वने विहरतस् तस्य सह गोपैर् महात्मनः । मानुषच्छद्मरूपस्य शेषस्य धरणीभृतः

vyāsa uvāca: vane viharatas tasya saha gopair mahātmanaḥ / mānuṣacchadmarūpasya śeṣasya dharaṇībhṛtaḥ

Sanskrit only: no published translation is held for this verse.

निष्पादितोरुकार्यस्य कार्येणैवावतारिणः । उपभोगार्थम् अत्यर्थं वरुणः प्राह वारुणीम्

niṣpāditorukāryasya kāryeṇaivāvatāriṇaḥ / upabhogārtham atyarthaṃ varuṇaḥ prāha vāruṇīm

Sanskrit only: no published translation is held for this verse.

वरुण उवाच: अभीष्टां सर्वदा ह्य् अस्य मदिरे त्वं महौजसः । अनन्तस्योपभोगाय तस्य गच्छ मुदे शुभे

varuṇa uvāca: abhīṣṭāṃ sarvadā hy asya madire tvaṃ mahaujasaḥ / anantasyopabhogāya tasya gaccha mude śubhe

Sanskrit only: no published translation is held for this verse.

व्यास उवाच: इत्य् उक्ता वारुणी तेन संनिधानम् अथाकरोत् । वृन्दावनतटोत्पन्न- कदम्बतरुकोटरे

vyāsa uvāca: ity uktā vāruṇī tena saṃnidhānam athākarot / vṛndāvanataṭotpanna- kadambatarukoṭare

Sanskrit only: no published translation is held for this verse.

विचरन् बलदेवो ऽपि मदिरागन्धम् उद्धतम् । आघ्राय मदिराहर्षम् अवापाथ पुरातनम्

vicaran baladevo 'pi madirāgandham uddhatam / āghrāya madirāharṣam avāpātha purātanam

Sanskrit only: no published translation is held for this verse.

ततः कदम्बात् सहसा मद्यधारां स लाङ्गली । पतन्तीं वीक्ष्य मुनयः प्रययौ परमां मुदम्

tataḥ kadambāt sahasā madyadhārāṃ sa lāṅgalī / patantīṃ vīkṣya munayaḥ prayayau paramāṃ mudam

Sanskrit only: no published translation is held for this verse.

पपौ च गोपगोपीभिः समवेतो मुदान्वितः । उपगीयमानो ललितं गीतवाद्यविशारदैः

papau ca gopagopībhiḥ samaveto mudānvitaḥ / upagīyamāno lalitaṃ gītavādyaviśāradaiḥ

Sanskrit only: no published translation is held for this verse.

श्रमतो ऽत्यन्तघर्माम्भः- कणिकामौक्तिकोज्ज्वलः । आगच्छ यमुने स्नातुम् इच्छामीत्य् आह विह्वलः

śramato 'tyantagharmāmbhaḥ- kaṇikāmauktikojjvalaḥ / āgaccha yamune snātum icchāmīty āha vihvalaḥ

Sanskrit only: no published translation is held for this verse.

तस्य वाचं नदी सा तु मत्तोक्ताम् अवमन्य वै । नाजगाम ततः क्रुद्धो हलं जग्राह लाङ्गली

tasya vācaṃ nadī sā tu mattoktām avamanya vai / nājagāma tataḥ kruddho halaṃ jagrāha lāṅgalī

Sanskrit only: no published translation is held for this verse.

गृहीत्वा तां तटेनैव चकर्ष मदविह्वलः । पापे नायासि नायासि गम्यताम् इच्छयान्यतः

gṛhītvā tāṃ taṭenaiva cakarṣa madavihvalaḥ / pāpe nāyāsi nāyāsi gamyatām icchayānyataḥ

Sanskrit only: no published translation is held for this verse.

सा कृष्टा तेन सहसा मार्गं संत्यज्य निम्नगा । यत्रास्ते बलदेवो ऽसौ प्लावयाम् आस तद् वनम्

sā kṛṣṭā tena sahasā mārgaṃ saṃtyajya nimnagā / yatrāste baladevo 'sau plāvayām āsa tad vanam

Sanskrit only: no published translation is held for this verse.

शरीरिणी तथोपेत्य त्रासविह्वललोचना । प्रसीदेत्य् अब्रवीद् रामं मुञ्च मां मुशलायुध

śarīriṇī tathopetya trāsavihvalalocanā / prasīdety abravīd rāmaṃ muñca māṃ muśalāyudha

Sanskrit only: no published translation is held for this verse.

सो ऽब्रवीद् अवजानासि मम शौर्यबलं यदि । सो ऽहं त्वां हलपातेन नयिष्यामि सहस्रधा

so 'bravīd avajānāsi mama śauryabalaṃ yadi / so 'haṃ tvāṃ halapātena nayiṣyāmi sahasradhā

Sanskrit only: no published translation is held for this verse.

व्यास उवाच: इत्य् उक्तयातिसंत्रस्तस् तया नद्या प्रसादितः । भूभागे प्लाविते तत्र मुमोच यमुनां बलः

vyāsa uvāca: ity uktayātisaṃtrastas tayā nadyā prasāditaḥ / bhūbhāge plāvite tatra mumoca yamunāṃ balaḥ

Sanskrit only: no published translation is held for this verse.

ततः स्नातस्य वै कान्तिर् आजगाम महावने । अवतंसोत्पलं चारु गृहीत्वैकं च कुण्डलम्

tataḥ snātasya vai kāntir ājagāma mahāvane / avataṃsotpalaṃ cāru gṛhītvaikaṃ ca kuṇḍalam

Sanskrit only: no published translation is held for this verse.

वरुणप्रहितां चास्मै मालाम् अम्लानपङ्कजाम् । समुद्रार्हे तथा वस्त्रे नीले लक्ष्मीर् अयच्छत

varuṇaprahitāṃ cāsmai mālām amlānapaṅkajām / samudrārhe tathā vastre nīle lakṣmīr ayacchata

Sanskrit only: no published translation is held for this verse.

कृतावतंसः स तदा चारुकुण्डलभूषितः । नीलाम्बरधरः स्रग्वी शुशुभे कान्तिसंयुतः

kṛtāvataṃsaḥ sa tadā cārukuṇḍalabhūṣitaḥ / nīlāmbaradharaḥ sragvī śuśubhe kāntisaṃyutaḥ

Sanskrit only: no published translation is held for this verse.

इत्थं विभूषितो रेमे तत्र रामस् तदा व्रजे । मासद्वयेन यातश् च पुनः स मथुरां पुरीम्

itthaṃ vibhūṣito reme tatra rāmas tadā vraje / māsadvayena yātaś ca punaḥ sa mathurāṃ purīm

Sanskrit only: no published translation is held for this verse.

रेवतीं चैव तनयां रैवतस्य महीपतेः । उपयेमे बलस् तस्यां जज्ञाते निशठोल्मुकौ

revatīṃ caiva tanayāṃ raivatasya mahīpateḥ / upayeme balas tasyāṃ jajñāte niśaṭholmukau

Sanskrit only: no published translation is held for this verse.