Brahma-Purana 199

व्यास उवाच: भीष्मकः कुण्डिने राजा विदर्भविषये ऽभवत् । रुक्मिणी तस्य दुहिता रुक्मी चैव सुतो द्विजाः

vyāsa uvāca: bhīṣmakaḥ kuṇḍine rājā vidarbhaviṣaye 'bhavat / rukmiṇī tasya duhitā rukmī caiva suto dvijāḥ

Sanskrit only: no published translation is held for this verse.

रुक्मिणीं चकमे कृष्णः सा च तं चारुहासिनी । न ददौ याचते चैनां रुक्मी द्वेषेण चक्रिणे

rukmiṇīṃ cakame kṛṣṇaḥ sā ca taṃ cāruhāsinī / na dadau yācate caināṃ rukmī dveṣeṇa cakriṇe

Sanskrit only: no published translation is held for this verse.

ददौ स शिशुपालाय जरासंधप्रचोदितः । भीष्मको रुक्मिणा सार्धं रुक्मिणीम् उरुविक्रमः

dadau sa śiśupālāya jarāsaṃdhapracoditaḥ / bhīṣmako rukmiṇā sārdhaṃ rukmiṇīm uruvikramaḥ

Sanskrit only: no published translation is held for this verse.

विवाहार्थं ततः सर्वे जरासंधमुखा नृपाः । भीष्मकस्य पुरं जग्मुः शिशुपालश् च कुण्डिनम्

vivāhārthaṃ tataḥ sarve jarāsaṃdhamukhā nṛpāḥ / bhīṣmakasya puraṃ jagmuḥ śiśupālaś ca kuṇḍinam

Sanskrit only: no published translation is held for this verse.

कृष्णो ऽपि बलभद्राद्यैर् यदुभिः परिवारितः । प्रययौ कुण्डिनं द्रष्टुं विवाहं चैद्यभूपतेः

kṛṣṇo 'pi balabhadrādyair yadubhiḥ parivāritaḥ / prayayau kuṇḍinaṃ draṣṭuṃ vivāhaṃ caidyabhūpateḥ

Sanskrit only: no published translation is held for this verse.

श्वोभाविनि विवाहे तु तां कन्यां हृतवान् हरिः । विपक्षभावम् आसाद्य रामाद्येष्व् एव बन्धुषु

śvobhāvini vivāhe tu tāṃ kanyāṃ hṛtavān hariḥ / vipakṣabhāvam āsādya rāmādyeṣv eva bandhuṣu

Sanskrit only: no published translation is held for this verse.

ततश् च पौण्ड्रकः श्रीमान् दन्तवक्त्रो विदूरथः । शिशुपालो जरासंधः शाल्वाद्याश् च महीभृतः

tataś ca pauṇḍrakaḥ śrīmān dantavaktro vidūrathaḥ / śiśupālo jarāsaṃdhaḥ śālvādyāś ca mahībhṛtaḥ

Sanskrit only: no published translation is held for this verse.

कुपितास् ते हरिं हन्तुं चक्रुर् उद्योगम् उत्तमम् । निर्जिताश् च समागम्य रामाद्यैर् यदुपुंगवैः

kupitās te hariṃ hantuṃ cakrur udyogam uttamam / nirjitāś ca samāgamya rāmādyair yadupuṃgavaiḥ

Sanskrit only: no published translation is held for this verse.

कुण्डिनं न प्रवेक्ष्यामि अहत्वा युधि केशवम् । कृत्वा प्रतिज्ञां रुक्मी च हन्तुं कृष्णम् अभिद्रुतः

kuṇḍinaṃ na pravekṣyāmi ahatvā yudhi keśavam / kṛtvā pratijñāṃ rukmī ca hantuṃ kṛṣṇam abhidrutaḥ

Sanskrit only: no published translation is held for this verse.

हत्वा बलं स नागाश्व- पत्तिस्यन्दनसंकुलम् । निर्जितः पातितश् चोर्व्यां लीलयैव स चक्रिणा

hatvā balaṃ sa nāgāśva- pattisyandanasaṃkulam / nirjitaḥ pātitaś corvyāṃ līlayaiva sa cakriṇā

Sanskrit only: no published translation is held for this verse.

निर्जित्य रुक्मिणं सम्यग् उपयेमे स रुक्मिणीम् । राक्षसेन विधानेन संप्राप्तो मधुसूदनः

nirjitya rukmiṇaṃ samyag upayeme sa rukmiṇīm / rākṣasena vidhānena saṃprāpto madhusūdanaḥ

Sanskrit only: no published translation is held for this verse.

तस्यां जज्ञे च प्रद्युम्नो मदनांशः स वीर्यवान् । जहार शम्बरो यं वै यो जघान च शम्बरम्

tasyāṃ jajñe ca pradyumno madanāṃśaḥ sa vīryavān / jahāra śambaro yaṃ vai yo jaghāna ca śambaram

Sanskrit only: no published translation is held for this verse.