Brahma-Purana 201

व्यास उवाच: चारुदेष्णं सुदेष्णं च चारुदेहं च शोभनम् । सुषेणं चारुगुप्तं च भद्रचारुं तथापरम्

vyāsa uvāca: cārudeṣṇaṃ sudeṣṇaṃ ca cārudehaṃ ca śobhanam / suṣeṇaṃ cāruguptaṃ ca bhadracāruṃ tathāparam

Sanskrit only: no published translation is held for this verse.

चारुविन्दं सुचारुं च चारुं च बलिनां वरम् । रुक्मिण्य् अजनयत् पुत्रान् कन्यां चारुमतीं तथा

cāruvindaṃ sucāruṃ ca cāruṃ ca balināṃ varam / rukmiṇy ajanayat putrān kanyāṃ cārumatīṃ tathā

Sanskrit only: no published translation is held for this verse.

अन्याश् च भार्याः कृष्णस्य बभूवुः सप्त शोभनाः । कालिन्दी मित्रविन्दा च सत्या नाग्नजिती तथा

anyāś ca bhāryāḥ kṛṣṇasya babhūvuḥ sapta śobhanāḥ / kālindī mitravindā ca satyā nāgnajitī tathā

Sanskrit only: no published translation is held for this verse.

देवी जाम्बवती चापि सदा तुष्टा तु रोहिणी । मद्रराजसुता चान्या सुशीला शीलमण्डला

devī jāmbavatī cāpi sadā tuṣṭā tu rohiṇī / madrarājasutā cānyā suśīlā śīlamaṇḍalā

Sanskrit only: no published translation is held for this verse.

सात्राजिती सत्यभामा लक्ष्मणा चारुहासिनी । षोडशात्र सहस्राणि स्त्रीणाम् अन्यानि चक्रिणः

sātrājitī satyabhāmā lakṣmaṇā cāruhāsinī / ṣoḍaśātra sahasrāṇi strīṇām anyāni cakriṇaḥ

Sanskrit only: no published translation is held for this verse.

प्रद्युम्नो ऽपि महावीर्यो रुक्मिणस् तनयां शुभाम् । स्वयंवरस्थां जग्राह सापि तं तनयं हरेः

pradyumno 'pi mahāvīryo rukmiṇas tanayāṃ śubhām / svayaṃvarasthāṃ jagrāha sāpi taṃ tanayaṃ hareḥ

Sanskrit only: no published translation is held for this verse.

तस्याम् अस्याभवत् पुत्रो महाबलपराक्रमः । अनिरुद्धो रणे रुद्धो वीर्योदधिर् अरिंदमः

tasyām asyābhavat putro mahābalaparākramaḥ / aniruddho raṇe ruddho vīryodadhir ariṃdamaḥ

Sanskrit only: no published translation is held for this verse.

तस्यापि रुक्मिणः पौत्रीं वरयाम् आस केशवः । दौहित्राय ददौ रुक्मी स्पर्धयन्न् अपि शौरिणा

tasyāpi rukmiṇaḥ pautrīṃ varayām āsa keśavaḥ / dauhitrāya dadau rukmī spardhayann api śauriṇā

Sanskrit only: no published translation is held for this verse.

तस्या विवाहे रामाद्या यादवा हरिणा सह । रुक्मिणो नगरं जग्मुर् नाम्ना भोजकटं द्विजाः

tasyā vivāhe rāmādyā yādavā hariṇā saha / rukmiṇo nagaraṃ jagmur nāmnā bhojakaṭaṃ dvijāḥ

Sanskrit only: no published translation is held for this verse.

विवाहे तत्र निर्वृत्ते प्राद्युम्नेः सुमहात्मनः । कलिङ्गराजप्रमुखा रुक्मिणं वाक्यम् अब्रुवन्

vivāhe tatra nirvṛtte prādyumneḥ sumahātmanaḥ / kaliṅgarājapramukhā rukmiṇaṃ vākyam abruvan

Sanskrit only: no published translation is held for this verse.

कलिङ्गादय ऊचुः: अनक्षज्ञो हली द्यूते तथास्य व्यसनं महत् । तन् नयामो बलं तस्माद् द्यूतेनैव महाद्युते

kaliṅgādaya ūcuḥ: anakṣajño halī dyūte tathāsya vyasanaṃ mahat / tan nayāmo balaṃ tasmād dyūtenaiva mahādyute

Sanskrit only: no published translation is held for this verse.

व्यास उवाच: तथेति तान् आह नृपान् रुक्मी बलसमन्वितः । सभायां सह रामेण चक्रे द्यूतं च वै तदा

vyāsa uvāca: tatheti tān āha nṛpān rukmī balasamanvitaḥ / sabhāyāṃ saha rāmeṇa cakre dyūtaṃ ca vai tadā

Sanskrit only: no published translation is held for this verse.

सहस्रम् एकं निष्काणां रुक्मिणा विजितो बलः । द्वितीये दिवसे चान्यत् सहस्रं रुक्मिणा जितः

sahasram ekaṃ niṣkāṇāṃ rukmiṇā vijito balaḥ / dvitīye divase cānyat sahasraṃ rukmiṇā jitaḥ

Sanskrit only: no published translation is held for this verse.

ततो दश सहस्राणि निष्काणां पणम् आददे । बलभद्रप्रपन्नानि रुक्मी द्यूतविदां वरः

tato daśa sahasrāṇi niṣkāṇāṃ paṇam ādade / balabhadraprapannāni rukmī dyūtavidāṃ varaḥ

Sanskrit only: no published translation is held for this verse.

ततो जहासाथ बलं कलिङ्गाधिपतिर् द्विजाः । दन्तान् विदर्शयन् मूढो रुक्मी चाह मदोद्धतः

tato jahāsātha balaṃ kaliṅgādhipatir dvijāḥ / dantān vidarśayan mūḍho rukmī cāha madoddhataḥ

Sanskrit only: no published translation is held for this verse.

रुक्म्य् उवाच: अविद्यो ऽयं महाद्यूते बलभद्रः पराजितः । मृषैवाक्षावलेपत्वाद् यो ऽयं मेने ऽक्षकोविदम्

rukmy uvāca: avidyo 'yaṃ mahādyūte balabhadraḥ parājitaḥ / mṛṣaivākṣāvalepatvād yo 'yaṃ mene 'kṣakovidam

Sanskrit only: no published translation is held for this verse.

दृष्ट्वा कलिङ्गराजं तु प्रकाशदशनाननम् । रुक्मिणं चापि दुर्वाक्यं कोपं चक्रे हलायुधः

dṛṣṭvā kaliṅgarājaṃ tu prakāśadaśanānanam / rukmiṇaṃ cāpi durvākyaṃ kopaṃ cakre halāyudhaḥ

Sanskrit only: no published translation is held for this verse.

व्यास उवाच: ततः कोपपरीतात्मा निष्ककोटिं हलायुधः । ग्लहं जग्राह रुक्मी च ततस् त्व् अक्षान् अपातयत्

vyāsa uvāca: tataḥ kopaparītātmā niṣkakoṭiṃ halāyudhaḥ / glahaṃ jagrāha rukmī ca tatas tv akṣān apātayat

Sanskrit only: no published translation is held for this verse.

अजयद् बलदेवो ऽथ प्राहोच्चैस् तं जितं मया । ममेति रुक्मी प्राहोच्चैर् अलीकोक्तैर् अलं बलम्

ajayad baladevo 'tha prāhoccais taṃ jitaṃ mayā / mameti rukmī prāhoccair alīkoktair alaṃ balam

Sanskrit only: no published translation is held for this verse.

त्वयोक्तो ऽयं ग्लहः सत्यं न ममैषो ऽनुमोदितः । एवं त्वया चेद् विजितं न मया विजितं कथम्

tvayokto 'yaṃ glahaḥ satyaṃ na mamaiṣo 'numoditaḥ / evaṃ tvayā ced vijitaṃ na mayā vijitaṃ katham

Sanskrit only: no published translation is held for this verse.

ततो ऽन्तरिक्षे वाग् उच्चैः प्राह गम्भीरनादिनी । बलदेवस्य तं कोपं वर्धयन्ती महात्मनः

tato 'ntarikṣe vāg uccaiḥ prāha gambhīranādinī / baladevasya taṃ kopaṃ vardhayantī mahātmanaḥ

Sanskrit only: no published translation is held for this verse.

आकाशवाग् उवाच: जितं तु बलदेवेन रुक्मिणा भाषितं मृषा । अनुक्त्वा वचनं किंचित् कृतं भवति कर्मणा

ākāśavāg uvāca: jitaṃ tu baladevena rukmiṇā bhāṣitaṃ mṛṣā / anuktvā vacanaṃ kiṃcit kṛtaṃ bhavati karmaṇā

Sanskrit only: no published translation is held for this verse.

व्यास उवाच: ततो बलः समुत्थाय क्रोधसंरक्तलोचनः । जघानाष्टापदेनैव रुक्मिणं स महाबलः

vyāsa uvāca: tato balaḥ samutthāya krodhasaṃraktalocanaḥ / jaghānāṣṭāpadenaiva rukmiṇaṃ sa mahābalaḥ

Sanskrit only: no published translation is held for this verse.

कलिङ्गराजं चादाय विस्फुरन्तं बलाद् बलः । बभञ्ज दन्तान् कुपितो यैः प्रकाशं जहास सः

kaliṅgarājaṃ cādāya visphurantaṃ balād balaḥ / babhañja dantān kupito yaiḥ prakāśaṃ jahāsa saḥ

Sanskrit only: no published translation is held for this verse.

आकृष्य च महास्तम्भं जातरूपमयं बलः । जघान ये तत्पक्षास् तान् भूभृतः कुपितो बलः

ākṛṣya ca mahāstambhaṃ jātarūpamayaṃ balaḥ / jaghāna ye tatpakṣās tān bhūbhṛtaḥ kupito balaḥ

Sanskrit only: no published translation is held for this verse.

ततो हाहाकृतं सर्वं पलायनपरं द्विजाः । तद् राजमण्डलं सर्वं बभूव कुपिते बले

tato hāhākṛtaṃ sarvaṃ palāyanaparaṃ dvijāḥ / tad rājamaṇḍalaṃ sarvaṃ babhūva kupite bale

Sanskrit only: no published translation is held for this verse.

बलेन निहतं श्रुत्वा रुक्मिणं मधुसूदनः । नोवाच वचनं किंचिद् रुक्मिणीबलयोर् भयात्

balena nihataṃ śrutvā rukmiṇaṃ madhusūdanaḥ / novāca vacanaṃ kiṃcid rukmiṇībalayor bhayāt

Sanskrit only: no published translation is held for this verse.

ततो ऽनिरुद्धम् आदाय कृतोद्वाहं द्विजोत्तमाः । द्वारकाम् आजगामाथ यदुचक्रं सकेशवम्

tato 'niruddham ādāya kṛtodvāhaṃ dvijottamāḥ / dvārakām ājagāmātha yaducakraṃ sakeśavam

Sanskrit only: no published translation is held for this verse.