Brahma-Purana 216

मुनय ऊचुः: अहो ऽतिदुःखं घोरं च यममार्गे त्वयोदितम् । नरकाणि च घोराणि द्वारं याम्यं च सत्तम

munaya ūcuḥ: aho 'tiduḥkhaṃ ghoraṃ ca yamamārge tvayoditam / narakāṇi ca ghorāṇi dvāraṃ yāmyaṃ ca sattama

Sanskrit only: no published translation is held for this verse.

अस्त्य् उपायो न वा ब्रह्मन् यममार्गे ऽतिभीषणे । ब्रूहि येन नरा यान्ति सुखेन यमसादनम्

asty upāyo na vā brahman yamamārge 'tibhīṣaṇe / brūhi yena narā yānti sukhena yamasādanam

Sanskrit only: no published translation is held for this verse.

व्यास उवाच: इह ये धर्मसंयुक्तास् त्व् अहिंसानिरता नराः । गुरुशुश्रूषणे युक्ता देवब्राह्मणपूजकाः

vyāsa uvāca: iha ye dharmasaṃyuktās tv ahiṃsāniratā narāḥ / guruśuśrūṣaṇe yuktā devabrāhmaṇapūjakāḥ

Sanskrit only: no published translation is held for this verse.

यस्मिन् मनुष्यलोकास् ते सभार्याः ससुतास् तथा । तम् अध्वानं च गच्छन्ति यथा तत् कथयामि वः

yasmin manuṣyalokās te sabhāryāḥ sasutās tathā / tam adhvānaṃ ca gacchanti yathā tat kathayāmi vaḥ

Sanskrit only: no published translation is held for this verse.

विमानैर् विविधैर् दिव्यैः काञ्चनध्वजशोभितैः । धर्मराजपुरं यान्ति सेवमानाप्सरोगणैः

vimānair vividhair divyaiḥ kāñcanadhvajaśobhitaiḥ / dharmarājapuraṃ yānti sevamānāpsarogaṇaiḥ

Sanskrit only: no published translation is held for this verse.

ब्राह्मणेभ्यस् तु दानानि नानारूपाणि भक्तितः । ये प्रयच्छन्ति ते यान्ति सुखेनैव महापथे

brāhmaṇebhyas tu dānāni nānārūpāṇi bhaktitaḥ / ye prayacchanti te yānti sukhenaiva mahāpathe

Sanskrit only: no published translation is held for this verse.

अन्नं ये तु प्रयच्छन्ति ब्राह्मणेभ्यः सुसंकृतम् । श्रोत्रियेभ्यो विशेषेण भक्त्या परमया युताः

annaṃ ye tu prayacchanti brāhmaṇebhyaḥ susaṃkṛtam / śrotriyebhyo viśeṣeṇa bhaktyā paramayā yutāḥ

Sanskrit only: no published translation is held for this verse.

तरुणीभिर् वरस्त्रीभिः सेव्यमानाः प्रयत्नतः । धर्मराजपुरं यान्ति विमानैर् अभ्यलंकृतैः

taruṇībhir varastrībhiḥ sevyamānāḥ prayatnataḥ / dharmarājapuraṃ yānti vimānair abhyalaṃkṛtaiḥ

Sanskrit only: no published translation is held for this verse.

ये च सत्यं प्रभाषन्ते बहिर् अन्तश् च निर्मलाः । ते ऽपि यान्त्य् अमरप्रख्या विमानैर् यममन्दिरम्

ye ca satyaṃ prabhāṣante bahir antaś ca nirmalāḥ / te 'pi yānty amaraprakhyā vimānair yamamandiram

Sanskrit only: no published translation is held for this verse.

गोदानानि पवित्राणि विष्णुम् उद्दिश्य साधुषु । ये प्रयच्छन्ति धर्मज्ञाः कृशेषु कृशवृत्तिषु

godānāni pavitrāṇi viṣṇum uddiśya sādhuṣu / ye prayacchanti dharmajñāḥ kṛśeṣu kṛśavṛttiṣu

Sanskrit only: no published translation is held for this verse.

ते यान्ति दिव्यवर्णाभैर् विमानैर् मणिचित्रितैः । धर्मराजपुरं श्रीमान् सेव्यमानाप्सरोगणैः

te yānti divyavarṇābhair vimānair maṇicitritaiḥ / dharmarājapuraṃ śrīmān sevyamānāpsarogaṇaiḥ

Sanskrit only: no published translation is held for this verse.

उपानद्युगलं छत्त्रं शय्यासनम् अथापि वा । ये प्रयच्छन्ति वस्त्राणि तथैवाभरणानि च

upānadyugalaṃ chattraṃ śayyāsanam athāpi vā / ye prayacchanti vastrāṇi tathaivābharaṇāni ca

Sanskrit only: no published translation is held for this verse.

ते यान्त्य् अश्वै रथैश् चैव कुञ्जरैश् चाप्य् अलंकृताः । धर्मराजपुरं दिव्यं छत्त्रैः सौवर्णराजतैः

te yānty aśvai rathaiś caiva kuñjaraiś cāpy alaṃkṛtāḥ / dharmarājapuraṃ divyaṃ chattraiḥ sauvarṇarājataiḥ

Sanskrit only: no published translation is held for this verse.

ये च भक्त्या प्रयच्छन्ति गुडपानकम् अर्चितम् । ओदनं च द्विजाग्र्येभ्यो विशुद्धेनान्तरात्मना

ye ca bhaktyā prayacchanti guḍapānakam arcitam / odanaṃ ca dvijāgryebhyo viśuddhenāntarātmanā

Sanskrit only: no published translation is held for this verse.

ते यान्ति काञ्चनैर् यानैर् विविधैस् तु यमालयम् । वरस्त्रीभिर् यथाकामं सेव्यमानाः पुनः पुनः

te yānti kāñcanair yānair vividhais tu yamālayam / varastrībhir yathākāmaṃ sevyamānāḥ punaḥ punaḥ

Sanskrit only: no published translation is held for this verse.

ये च क्षीरं प्रयच्छन्ति घृतं दधि गुडं मधु । ब्राह्मणेभ्यः प्रयत्नेन शुद्ध्योपेतं सुसंस्कृतम्

ye ca kṣīraṃ prayacchanti ghṛtaṃ dadhi guḍaṃ madhu / brāhmaṇebhyaḥ prayatnena śuddhyopetaṃ susaṃskṛtam

Sanskrit only: no published translation is held for this verse.

चक्रवाकप्रयुक्तैश् च विमानैस् तु हिरण्मयैः । यान्ति गन्धर्ववादित्रैः सेव्यमाना यमालयम्

cakravākaprayuktaiś ca vimānais tu hiraṇmayaiḥ / yānti gandharvavāditraiḥ sevyamānā yamālayam

Sanskrit only: no published translation is held for this verse.

ये फलानि प्रयच्छन्ति पुष्पाणि सुरभीणि च । हंसयुक्तैर् विमानैस् तु यान्ति धर्मपुरं नराः

ye phalāni prayacchanti puṣpāṇi surabhīṇi ca / haṃsayuktair vimānais tu yānti dharmapuraṃ narāḥ

Sanskrit only: no published translation is held for this verse.

ये तिलांस् तिलधेनुं च घृतधेनुम् अथापि वा । श्रोत्रियेभ्यः प्रयच्छन्ति विप्रेभ्यः श्रद्धयान्विताः

ye tilāṃs tiladhenuṃ ca ghṛtadhenum athāpi vā / śrotriyebhyaḥ prayacchanti viprebhyaḥ śraddhayānvitāḥ

Sanskrit only: no published translation is held for this verse.

सोममण्डलसंकाशैर् यानैस् ते यान्ति निर्मलैः । गन्धर्वैर् उपगीयन्ते पुरे वैवस्वतस्य ते

somamaṇḍalasaṃkāśair yānais te yānti nirmalaiḥ / gandharvair upagīyante pure vaivasvatasya te

Sanskrit only: no published translation is held for this verse.

येषां वाप्यश् च कूपाश् च तडागानि सरांसि च । दीर्घिकाः पुष्करिण्यश् च शीतलाश् च जलाशयाः

yeṣāṃ vāpyaś ca kūpāś ca taḍāgāni sarāṃsi ca / dīrghikāḥ puṣkariṇyaś ca śītalāś ca jalāśayāḥ

Sanskrit only: no published translation is held for this verse.

यानैस् ते हेमचन्द्राभैर् दिव्यघण्टानिनादितैः । व्यजनैस् तालवृन्तैश् च वीज्यमाना महाप्रभाः

yānais te hemacandrābhair divyaghaṇṭānināditaiḥ / vyajanais tālavṛntaiś ca vījyamānā mahāprabhāḥ

Sanskrit only: no published translation is held for this verse.

येषां देवकुलान्य् अत्र चित्राण्य् आयतनानि च । रत्नैः प्रस्फुरमाणानि मनोज्ञानि शुभानि च

yeṣāṃ devakulāny atra citrāṇy āyatanāni ca / ratnaiḥ prasphuramāṇāni manojñāni śubhāni ca

Sanskrit only: no published translation is held for this verse.

ते यान्ति लोकपालैस् तु विमानैर् वातरंहसैः । धर्मराजपुरं दिव्यं नानाजनसमाकुलम्

te yānti lokapālais tu vimānair vātaraṃhasaiḥ / dharmarājapuraṃ divyaṃ nānājanasamākulam

Sanskrit only: no published translation is held for this verse.

पानीयं ये प्रयच्छन्ति सर्वप्राण्युपजीवितम् । ते वितृष्णाः सुखं यान्ति विमानैस् तं महापथम्

pānīyaṃ ye prayacchanti sarvaprāṇyupajīvitam / te vitṛṣṇāḥ sukhaṃ yānti vimānais taṃ mahāpatham

Sanskrit only: no published translation is held for this verse.

काष्ठपादुकयानानि पीठकान्य् आसनानि च । यैर् दत्तानि द्विजातिभ्यस् ते ऽध्वानं यान्ति वै सुखम्

kāṣṭhapādukayānāni pīṭhakāny āsanāni ca / yair dattāni dvijātibhyas te 'dhvānaṃ yānti vai sukham

Sanskrit only: no published translation is held for this verse.

सौवर्णमणिपीठेषु पादौ कृत्वोत्तमेषु च । ते प्रयान्ति विमानैस् तु अप्सरोगणमण्डितैः

sauvarṇamaṇipīṭheṣu pādau kṛtvottameṣu ca / te prayānti vimānais tu apsarogaṇamaṇḍitaiḥ

Sanskrit only: no published translation is held for this verse.

आरामाणि विचित्राणि पुष्पाढ्यानीह मानवाः । रोपयन्ति फलाढ्यानि नराणाम् उपकारिणः

ārāmāṇi vicitrāṇi puṣpāḍhyānīha mānavāḥ / ropayanti phalāḍhyāni narāṇām upakāriṇaḥ

Sanskrit only: no published translation is held for this verse.

वृक्षच्छायासु रम्यासु शीतलासु स्वलंकृताः । वरस्त्रीगीतवाद्यैश् च सेव्यमाना व्रजन्ति ते

vṛkṣacchāyāsu ramyāsu śītalāsu svalaṃkṛtāḥ / varastrīgītavādyaiś ca sevyamānā vrajanti te

Sanskrit only: no published translation is held for this verse.

सुवर्णं रजतं वापि विद्रुमं मौक्तिकं तथा । ये प्रयच्छन्ति ते यान्ति विमानैः कनकोज्ज्वलैः

suvarṇaṃ rajataṃ vāpi vidrumaṃ mauktikaṃ tathā / ye prayacchanti te yānti vimānaiḥ kanakojjvalaiḥ

Sanskrit only: no published translation is held for this verse.

भूमिदा दीप्यमानाश् च सर्वकामैस् तु तर्पिताः । उदितादित्यसंकाशैर् विमानैर् भृशनादितैः

bhūmidā dīpyamānāś ca sarvakāmais tu tarpitāḥ / uditādityasaṃkāśair vimānair bhṛśanāditaiḥ

Sanskrit only: no published translation is held for this verse.

कन्यां तु ये प्रयच्छन्ति ब्रह्मदेयाम् अलंकृताम् । दिव्यकन्यावृता यान्ति विमानैस् ते यमालयम्

kanyāṃ tu ye prayacchanti brahmadeyām alaṃkṛtām / divyakanyāvṛtā yānti vimānais te yamālayam

Sanskrit only: no published translation is held for this verse.

सुगन्धागुरुकर्पूरान् पुष्पधूपान् द्विजोत्तमाः । प्रयच्छन्ति द्विजातिभ्यो भक्त्या परमयान्विताः

sugandhāgurukarpūrān puṣpadhūpān dvijottamāḥ / prayacchanti dvijātibhyo bhaktyā paramayānvitāḥ

Sanskrit only: no published translation is held for this verse.

ते सुगन्धाः सुवेशाश् च सुप्रभाः सुविभूषिताः । यान्ति धर्मपुरं यानैर् विचित्रैर् अभ्यलंकृताः

te sugandhāḥ suveśāś ca suprabhāḥ suvibhūṣitāḥ / yānti dharmapuraṃ yānair vicitrair abhyalaṃkṛtāḥ

Sanskrit only: no published translation is held for this verse.

दीपदा यान्ति यानैश् च दीपयन्तो दिशो दश । आदित्यसदृशैर् यानैर् दीप्यमाना यथाग्नयः

dīpadā yānti yānaiś ca dīpayanto diśo daśa / ādityasadṛśair yānair dīpyamānā yathāgnayaḥ

Sanskrit only: no published translation is held for this verse.

गृहावसथदातारो गृहैः काञ्चनमण्डितैः । व्रजन्ति बालार्कनिभैर् धर्मराजगृहं नराः

gṛhāvasathadātāro gṛhaiḥ kāñcanamaṇḍitaiḥ / vrajanti bālārkanibhair dharmarājagṛhaṃ narāḥ

Sanskrit only: no published translation is held for this verse.

जलभाजनदातारः कुण्डिकाकरकप्रदाः । पूजमानाप्सरोभिश् च यान्ति दृप्ता महागजैः

jalabhājanadātāraḥ kuṇḍikākarakapradāḥ / pūjamānāpsarobhiś ca yānti dṛptā mahāgajaiḥ

Sanskrit only: no published translation is held for this verse.

पादाभ्यङ्गं शिरोभ्यङ्गं स्नानपानोदकं तथा । ये प्रयच्छन्ति विप्रेभ्यस् ते यान्त्य् अश्वैर् यमालयम्

pādābhyaṅgaṃ śirobhyaṅgaṃ snānapānodakaṃ tathā / ye prayacchanti viprebhyas te yānty aśvair yamālayam

Sanskrit only: no published translation is held for this verse.

विश्रामयन्ति ये विप्राञ् श्रान्तान् अध्वनि कर्शितान् । चक्रवाकप्रयुक्तेन यान्ति यानेन ते सुखम्

viśrāmayanti ye viprāñ śrāntān adhvani karśitān / cakravākaprayuktena yānti yānena te sukham

Sanskrit only: no published translation is held for this verse.

स्वागतेन च यो विप्रं पूजयेद् आसनेन च । स गच्छति तम् अध्वानं सुखं परमनिर्वृतः

svāgatena ca yo vipraṃ pūjayed āsanena ca / sa gacchati tam adhvānaṃ sukhaṃ paramanirvṛtaḥ

Sanskrit only: no published translation is held for this verse.

नमो ब्रह्मण्यदेवेति यो हरिं चाभिवादयेत् । गां च पापहरेत्य् उक्त्वा सुखं यान्ति च तत् पथम्

namo brahmaṇyadeveti yo hariṃ cābhivādayet / gāṃ ca pāpaharety uktvā sukhaṃ yānti ca tat patham

Sanskrit only: no published translation is held for this verse.

अनन्तराशिनो ये च दम्भानृतविवर्जिताः । ते ऽपि सारसयुक्तैस् तु यान्ति यानैश् च तत् पथम्

anantarāśino ye ca dambhānṛtavivarjitāḥ / te 'pi sārasayuktais tu yānti yānaiś ca tat patham

Sanskrit only: no published translation is held for this verse.

वर्तन्ते ह्य् एकभक्तेन शाठ्यदम्भविवर्जिताः । हंसयुक्तैर् विमानैस् तु सुखं यान्ति यमालयम्

vartante hy ekabhaktena śāṭhyadambhavivarjitāḥ / haṃsayuktair vimānais tu sukhaṃ yānti yamālayam

Sanskrit only: no published translation is held for this verse.

चतुर्थेनैकभक्तेन वर्तन्ते ये जितेन्द्रियाः । ते यान्ति धर्मनगरं यानैर् बर्हिणयोजितैः

caturthenaikabhaktena vartante ye jitendriyāḥ / te yānti dharmanagaraṃ yānair barhiṇayojitaiḥ

Sanskrit only: no published translation is held for this verse.

तृतीये दिवसे ये तु भुञ्जते नियतव्रताः । ते ऽपि हस्तिरथैर् दिव्यैर् यान्ति यानैश् च तत् पदम्

tṛtīye divase ye tu bhuñjate niyatavratāḥ / te 'pi hastirathair divyair yānti yānaiś ca tat padam

Sanskrit only: no published translation is held for this verse.

षष्ठे ऽन्नभक्षको यस् तु शौचनित्यो जितेन्द्रियः । स याति कुञ्जरस्थस् तु शचीपतिर् इव स्वयम्

ṣaṣṭhe 'nnabhakṣako yas tu śaucanityo jitendriyaḥ / sa yāti kuñjarasthas tu śacīpatir iva svayam

Sanskrit only: no published translation is held for this verse.

धर्मराजपुरं दिव्यं नानामणिविभूषितम् । नानास्वरसमायुक्तं जयशब्दरवैर् युतम्

dharmarājapuraṃ divyaṃ nānāmaṇivibhūṣitam / nānāsvarasamāyuktaṃ jayaśabdaravair yutam

Sanskrit only: no published translation is held for this verse.

पक्षोपवासिनो यान्ति यानैः शार्दूलयोजितैः । पुरं तद् धर्मराजस्य सेव्यमानाः सुरासुरैः

pakṣopavāsino yānti yānaiḥ śārdūlayojitaiḥ / puraṃ tad dharmarājasya sevyamānāḥ surāsuraiḥ

Sanskrit only: no published translation is held for this verse.

ये च मासोपवासं तु कुर्वते संयतेन्द्रियाः । ते ऽपि सूर्यप्रदीप्तैस् तु यान्ति यानैर् यमालयम्

ye ca māsopavāsaṃ tu kurvate saṃyatendriyāḥ / te 'pi sūryapradīptais tu yānti yānair yamālayam

Sanskrit only: no published translation is held for this verse.

महाप्रस्थानम् एकाग्रो यः प्रयाति दृढव्रतः । सेव्यमानस् तु गन्धर्वैर् याति यानैर् यमालयम्

mahāprasthānam ekāgro yaḥ prayāti dṛḍhavrataḥ / sevyamānas tu gandharvair yāti yānair yamālayam

Sanskrit only: no published translation is held for this verse.

शरीरं साधयेद् यस् तु वैष्णवेनान्तरात्मना । स रथेनाग्निवर्णेन यातीह त्रिदशालयम्

śarīraṃ sādhayed yas tu vaiṣṇavenāntarātmanā / sa rathenāgnivarṇena yātīha tridaśālayam

Sanskrit only: no published translation is held for this verse.

अग्निप्रवेशं यः कुर्यान् नारायणपरायणः । स यात्य् अग्निप्रकाशेन विमानेन यमालयम्

agnipraveśaṃ yaḥ kuryān nārāyaṇaparāyaṇaḥ / sa yāty agniprakāśena vimānena yamālayam

Sanskrit only: no published translation is held for this verse.

प्राणांस् त्यजति यो मर्त्यः स्मरन् विष्णुं सनातनम् । यानेनार्कप्रकाशेन याति धर्मपुरं नरः

prāṇāṃs tyajati yo martyaḥ smaran viṣṇuṃ sanātanam / yānenārkaprakāśena yāti dharmapuraṃ naraḥ

Sanskrit only: no published translation is held for this verse.

प्रविष्टो ऽन्तर् जलं यस् तु प्राणांस् त्यजति मानवः । सोममण्डलकल्पेन याति यानेन वै सुखम्

praviṣṭo 'ntar jalaṃ yas tu prāṇāṃs tyajati mānavaḥ / somamaṇḍalakalpena yāti yānena vai sukham

Sanskrit only: no published translation is held for this verse.

स्वशरीरं हि गृध्रेभ्यो वैष्णवो यः प्रयच्छति । स याति रथमुख्येन काञ्चनेन यमालयम्

svaśarīraṃ hi gṛdhrebhyo vaiṣṇavo yaḥ prayacchati / sa yāti rathamukhyena kāñcanena yamālayam

Sanskrit only: no published translation is held for this verse.

स्त्रीग्रहे गोग्रहे वापि युद्धे मृत्युम् उपैति यः । स यात्य् अमरकन्याभिः सेव्यमानो रविप्रभः

strīgrahe gograhe vāpi yuddhe mṛtyum upaiti yaḥ / sa yāty amarakanyābhiḥ sevyamāno raviprabhaḥ

Sanskrit only: no published translation is held for this verse.

वैष्णवा ये च कुर्वन्ति तीर्थयात्रां जितेन्द्रियाः । तत् पथं यान्ति ते घोरं सुखयानैर् अलंकृताः

vaiṣṇavā ye ca kurvanti tīrthayātrāṃ jitendriyāḥ / tat pathaṃ yānti te ghoraṃ sukhayānair alaṃkṛtāḥ

Sanskrit only: no published translation is held for this verse.

ये यजन्ति द्विजश्रेष्ठाः क्रतुभिर् भूरिदक्षिणैः । तप्तहाटकसंकाशैर् विमानैर् यान्ति ते सुखम्

ye yajanti dvijaśreṣṭhāḥ kratubhir bhūridakṣiṇaiḥ / taptahāṭakasaṃkāśair vimānair yānti te sukham

Sanskrit only: no published translation is held for this verse.

परपीडाम् अकुर्वन्तो भृत्यानां भरणादिकम् । कुर्वन्ति ते सुखं यान्ति विमानैः कनकोज्ज्वलैः

parapīḍām akurvanto bhṛtyānāṃ bharaṇādikam / kurvanti te sukhaṃ yānti vimānaiḥ kanakojjvalaiḥ

Sanskrit only: no published translation is held for this verse.

ये क्षान्ताः सर्वभूतेषु प्राणिनाम् अभयप्रदाः । क्रोधमोहविनिर्मुक्ता निर्मदाः संयतेन्द्रियाः

ye kṣāntāḥ sarvabhūteṣu prāṇinām abhayapradāḥ / krodhamohavinirmuktā nirmadāḥ saṃyatendriyāḥ

Sanskrit only: no published translation is held for this verse.

पूर्णचन्द्रप्रकाशेन विमानेन महाप्रभाः । यान्ति वैवस्वतपुरं देवगन्धर्वसेविताः

pūrṇacandraprakāśena vimānena mahāprabhāḥ / yānti vaivasvatapuraṃ devagandharvasevitāḥ

Sanskrit only: no published translation is held for this verse.

एकभावेन ये विष्णुं ब्रह्माणं त्र्यम्बकं रविम् । पूजयन्ति हि ते यान्ति विमानैर् भास्करप्रभैः

ekabhāvena ye viṣṇuṃ brahmāṇaṃ tryambakaṃ ravim / pūjayanti hi te yānti vimānair bhāskaraprabhaiḥ

Sanskrit only: no published translation is held for this verse.

ये च मांसं न खादन्ति सत्यशौचसमन्विताः । ते ऽपि यान्ति सुखेनैव धर्मराजपुरं नराः

ye ca māṃsaṃ na khādanti satyaśaucasamanvitāḥ / te 'pi yānti sukhenaiva dharmarājapuraṃ narāḥ

Sanskrit only: no published translation is held for this verse.

मांसान् मिष्टतरं नास्ति भक्ष्यभोज्यादिकेषु च । तस्मान् मांसं न भुञ्जीत नास्ति मिष्टैः सुखोदयः

māṃsān miṣṭataraṃ nāsti bhakṣyabhojyādikeṣu ca / tasmān māṃsaṃ na bhuñjīta nāsti miṣṭaiḥ sukhodayaḥ

Sanskrit only: no published translation is held for this verse.

गोसहस्रं तु यो दद्याद् यस् तु मांसं न भक्षयेत् । समाव् एतौ पुरा प्राह ब्रह्मा वेदविदां वरः

gosahasraṃ tu yo dadyād yas tu māṃsaṃ na bhakṣayet / samāv etau purā prāha brahmā vedavidāṃ varaḥ

Sanskrit only: no published translation is held for this verse.

सर्वतीर्थेषु यत् पुण्यं सर्वयज्ञेषु यत् फलम् । अमांसभक्षणे विप्रास् तच् च तच् च च तत्समम्

sarvatīrtheṣu yat puṇyaṃ sarvayajñeṣu yat phalam / amāṃsabhakṣaṇe viprās tac ca tac ca ca tatsamam

Sanskrit only: no published translation is held for this verse.

एवं सुखेन ते यान्ति यमलोकं च धार्मिकाः । दानव्रतपरा यानैर् यत्र देवो रवेः सुतः

evaṃ sukhena te yānti yamalokaṃ ca dhārmikāḥ / dānavrataparā yānair yatra devo raveḥ sutaḥ

Sanskrit only: no published translation is held for this verse.

दृष्ट्वा तान् धार्मिकान् देवः स्वयं संमानयेद् यमः । स्वागतासनदानेन पाद्यार्घ्येण प्रियेण तु

dṛṣṭvā tān dhārmikān devaḥ svayaṃ saṃmānayed yamaḥ / svāgatāsanadānena pādyārghyeṇa priyeṇa tu

Sanskrit only: no published translation is held for this verse.

धन्या यूयं महात्मान आत्मनो हितकारिणः । येन दिव्यसुखार्थाय भवद्भिः सुकृतं कृतम्

dhanyā yūyaṃ mahātmāna ātmano hitakāriṇaḥ / yena divyasukhārthāya bhavadbhiḥ sukṛtaṃ kṛtam

Sanskrit only: no published translation is held for this verse.

इदं विमानम् आरुह्य दिव्यस्त्रीभोगभूषिताः । स्वर्गं गच्छध्वम् अतुलं सर्वकामसमन्वितम्

idaṃ vimānam āruhya divyastrībhogabhūṣitāḥ / svargaṃ gacchadhvam atulaṃ sarvakāmasamanvitam

Sanskrit only: no published translation is held for this verse.

तत्र भुक्त्वा महाभोगान् अन्ते पुण्यपरिक्षयात् । यत् किंचिद् अल्पम् अशुभं फलं तद् इह भोक्ष्यथ

tatra bhuktvā mahābhogān ante puṇyaparikṣayāt / yat kiṃcid alpam aśubhaṃ phalaṃ tad iha bhokṣyatha

Sanskrit only: no published translation is held for this verse.

ये तु तं धर्मराजानं नराः पुण्यानुभावतः । पश्यन्ति सौम्यमनसं पितृभूतम् इवात्मनः

ye tu taṃ dharmarājānaṃ narāḥ puṇyānubhāvataḥ / paśyanti saumyamanasaṃ pitṛbhūtam ivātmanaḥ

Sanskrit only: no published translation is held for this verse.

तस्माद् धर्मः सेवितव्यः सदा मुक्तिफलप्रदः । धर्माद् अर्थस् तथा कामो मोक्षश् च परिकीर्त्यते

tasmād dharmaḥ sevitavyaḥ sadā muktiphalapradaḥ / dharmād arthas tathā kāmo mokṣaś ca parikīrtyate

Sanskrit only: no published translation is held for this verse.

धर्मो माता पिता भ्राता धर्मो नाथः सुहृत् तथा । धर्मः स्वामी सखा गोप्ता तथा धाता च पोषकः

dharmo mātā pitā bhrātā dharmo nāthaḥ suhṛt tathā / dharmaḥ svāmī sakhā goptā tathā dhātā ca poṣakaḥ

Sanskrit only: no published translation is held for this verse.

धर्माद् अर्थो ऽर्थतः कामः कामाद् भोगः सुखानि च । धर्माद् ऐश्वर्यम् एकाग्र्यं धर्मात् स्वर्गगतिः परा

dharmād artho 'rthataḥ kāmaḥ kāmād bhogaḥ sukhāni ca / dharmād aiśvaryam ekāgryaṃ dharmāt svargagatiḥ parā

Sanskrit only: no published translation is held for this verse.

धर्मस् तु सेवितो विप्रास् त्रायते महतो भयात् । देवत्वं च द्विजत्वं च धर्मात् प्राप्नोत्य् असंशयम्

dharmas tu sevito viprās trāyate mahato bhayāt / devatvaṃ ca dvijatvaṃ ca dharmāt prāpnoty asaṃśayam

Sanskrit only: no published translation is held for this verse.

यदा च क्षीयते पापं नराणां पूर्वसंचितम् । तदैषां भजते बुद्धिर् धर्मं चात्र द्विजोत्तमाः

yadā ca kṣīyate pāpaṃ narāṇāṃ pūrvasaṃcitam / tadaiṣāṃ bhajate buddhir dharmaṃ cātra dvijottamāḥ

Sanskrit only: no published translation is held for this verse.

जन्मान्तरसहस्रेषु मानुष्यं प्राप्य दुर्लभम् । यो हि नाचरते धर्मं भवेत् स खलु वञ्चितः

janmāntarasahasreṣu mānuṣyaṃ prāpya durlabham / yo hi nācarate dharmaṃ bhavet sa khalu vañcitaḥ

Sanskrit only: no published translation is held for this verse.

कुत्सिता ये दरिद्राश् च विरूपा व्याधितास् तथा । परप्रेष्याश् च मूर्खाश् च ज्ञेया धर्मविवर्जिताः

kutsitā ye daridrāś ca virūpā vyādhitās tathā / parapreṣyāś ca mūrkhāś ca jñeyā dharmavivarjitāḥ

Sanskrit only: no published translation is held for this verse.

ये हि दीर्घायुषः शूराः पण्डिता भोगिनो ऽर्थिनः । अरोगा रूपवन्तश् च तैस् तु धर्मः पुरा कृतः

ye hi dīrghāyuṣaḥ śūrāḥ paṇḍitā bhogino 'rthinaḥ / arogā rūpavantaś ca tais tu dharmaḥ purā kṛtaḥ

Sanskrit only: no published translation is held for this verse.

एवं धर्मरता विप्रा गच्छन्ति गतिम् उत्तमाम् । अधर्मं सेवमानास् तु तिर्यग्योनिं व्रजन्ति ते

evaṃ dharmaratā viprā gacchanti gatim uttamām / adharmaṃ sevamānās tu tiryagyoniṃ vrajanti te

Sanskrit only: no published translation is held for this verse.

ये नरा नरकध्वंसि- वासुदेवम् अनुव्रताः । ते स्वप्ने ऽपि न पश्यन्ति यमं वा नरकाणि वा

ye narā narakadhvaṃsi- vāsudevam anuvratāḥ / te svapne 'pi na paśyanti yamaṃ vā narakāṇi vā

Sanskrit only: no published translation is held for this verse.

अनादिनिधनं देवं दैत्यदानवदारणम् । ये नमन्ति नरा नित्यं नहि पश्यन्ति ते यमम्

anādinidhanaṃ devaṃ daityadānavadāraṇam / ye namanti narā nityaṃ nahi paśyanti te yamam

Sanskrit only: no published translation is held for this verse.

कर्मणा मनसा वाचा ये ऽच्युतं शरणं गताः । न समर्थो यमस् तेषां ते मुक्तिफलभागिनः

karmaṇā manasā vācā ye 'cyutaṃ śaraṇaṃ gatāḥ / na samartho yamas teṣāṃ te muktiphalabhāginaḥ

Sanskrit only: no published translation is held for this verse.

ये जना जगतां नाथं नित्यं नारायणं द्विजाः । नमन्ति नहि ते विष्णोः स्थानाद् अन्यत्र गामिनः

ye janā jagatāṃ nāthaṃ nityaṃ nārāyaṇaṃ dvijāḥ / namanti nahi te viṣṇoḥ sthānād anyatra gāminaḥ

Sanskrit only: no published translation is held for this verse.

न ते दूतान् न तन् मार्गं न यमं न च तां पुरीम् । प्रणम्य विष्णुं पश्यन्ति नरकाणि कथंचन

na te dūtān na tan mārgaṃ na yamaṃ na ca tāṃ purīm / praṇamya viṣṇuṃ paśyanti narakāṇi kathaṃcana

Sanskrit only: no published translation is held for this verse.

कृत्वापि बहुशः पापं नरा मोहसमन्विताः । न यान्ति नरकं नत्वा सर्वपापहरं हरिम्

kṛtvāpi bahuśaḥ pāpaṃ narā mohasamanvitāḥ / na yānti narakaṃ natvā sarvapāpaharaṃ harim

Sanskrit only: no published translation is held for this verse.

शाठ्येनापि नरा नित्यं ये स्मरन्ति जनार्दनम् । ते ऽपि यान्ति तनुं त्यक्त्वा विष्णुलोकम् अनामयम्

śāṭhyenāpi narā nityaṃ ye smaranti janārdanam / te 'pi yānti tanuṃ tyaktvā viṣṇulokam anāmayam

Sanskrit only: no published translation is held for this verse.

अत्यन्तक्रोधसक्तो ऽपि कदाचित् कीर्तयेद् धरिम् । सो ऽपि दोषक्षयान् मुक्तिं लभेच् चेदिपतिर् यथा

atyantakrodhasakto 'pi kadācit kīrtayed dharim / so 'pi doṣakṣayān muktiṃ labhec cedipatir yathā

Sanskrit only: no published translation is held for this verse.