Brahma-Purana 49

वासुदेव नमस् ते ऽस्तु नमस् ते मोक्षकारण । त्राहि मां सर्वलोकेश जन्मसंसारसागरात्

vāsudeva namas te 'stu namas te mokṣakāraṇa / trāhi māṃ sarvalokeśa janmasaṃsārasāgarāt

Sanskrit only: no published translation is held for this verse.

निर्मलाम्बरसंकाश नमस् ते पुरुषोत्तम । संकर्षण नमस् ते ऽस्तु त्राहि मां धरणीधर

nirmalāmbarasaṃkāśa namas te puruṣottama / saṃkarṣaṇa namas te 'stu trāhi māṃ dharaṇīdhara

Sanskrit only: no published translation is held for this verse.

नमस् ते हेमगर्भाभ नमस् ते मकरध्वज । रतिकान्त नमस् ते ऽस्तु त्राहि मां संवरान्तक

namas te hemagarbhābha namas te makaradhvaja / ratikānta namas te 'stu trāhi māṃ saṃvarāntaka

Sanskrit only: no published translation is held for this verse.

नमस् ते ऽञ्जनसंकाश नमस् ते भक्तवत्सल । अनिरुद्ध नमस् ते ऽस्तु त्राहि मां वरदो भव

namas te 'ñjanasaṃkāśa namas te bhaktavatsala / aniruddha namas te 'stu trāhi māṃ varado bhava

Sanskrit only: no published translation is held for this verse.

नमस् ते विबुधावास नमस् ते विबुधप्रिय । नारायण नमस् ते ऽस्तु त्राहि मां शरणागतम्

namas te vibudhāvāsa namas te vibudhapriya / nārāyaṇa namas te 'stu trāhi māṃ śaraṇāgatam

Sanskrit only: no published translation is held for this verse.

नमस् ते बलिनां श्रेष्ठ नमस् ते लाङ्गलायुध । चतुर्मुख जगद्धाम त्राहि मां प्रपितामह

namas te balināṃ śreṣṭha namas te lāṅgalāyudha / caturmukha jagaddhāma trāhi māṃ prapitāmaha

Sanskrit only: no published translation is held for this verse.

नमस् ते नीलमेघाभ नमस् ते त्रिदशार्चित । त्राहि विष्णो जगन्नाथ मग्नं मां भवसागरे

namas te nīlameghābha namas te tridaśārcita / trāhi viṣṇo jagannātha magnaṃ māṃ bhavasāgare

Sanskrit only: no published translation is held for this verse.

प्रलयानलसंकाश नमस् ते दितिजान्तक । नरसिंह महावीर्य त्राहि मां दीप्तलोचन

pralayānalasaṃkāśa namas te ditijāntaka / narasiṃha mahāvīrya trāhi māṃ dīptalocana

Sanskrit only: no published translation is held for this verse.

यथा रसातलाद् उर्वी त्वया दंष्ट्रोद्धृता पुरा । तथा महावराहस् त्वं त्राहि मां दुःखसागरात्

yathā rasātalād urvī tvayā daṃṣṭroddhṛtā purā / tathā mahāvarāhas tvaṃ trāhi māṃ duḥkhasāgarāt

Sanskrit only: no published translation is held for this verse.

तवैता मूर्तयः कृष्ण वरदाः संस्तुता मया । तवेमे बलदेवाद्याः पृथग्रूपेण संस्थिताः

tavaitā mūrtayaḥ kṛṣṇa varadāḥ saṃstutā mayā / taveme baladevādyāḥ pṛthagrūpeṇa saṃsthitāḥ

Sanskrit only: no published translation is held for this verse.

अङ्गानि तव देवेश गरुत्माद्यास् तथा प्रभो । दिक्पालाः सायुधाश् चैव केशवाद्यास् तथाच्युत

aṅgāni tava deveśa garutmādyās tathā prabho / dikpālāḥ sāyudhāś caiva keśavādyās tathācyuta

Sanskrit only: no published translation is held for this verse.

ये चान्ये तव देवेश भेदाः प्रोक्ता मनीषिभिः । ते ऽपि सर्वे जगन्नाथ प्रसन्नायतलोचन

ye cānye tava deveśa bhedāḥ proktā manīṣibhiḥ / te 'pi sarve jagannātha prasannāyatalocana

Sanskrit only: no published translation is held for this verse.

मयार्चिताः स्तुताः सर्वे तथा यूयं नमस्कृताः । प्रयच्छत वरं मह्यं धर्मकामार्थमोक्षदम्

mayārcitāḥ stutāḥ sarve tathā yūyaṃ namaskṛtāḥ / prayacchata varaṃ mahyaṃ dharmakāmārthamokṣadam

Sanskrit only: no published translation is held for this verse.

भेदास् ते कीर्तिता ये तु हरे संकर्षणादयः । तव पूजार्थसंभूतास् ततस् त्वयि समाश्रिताः

bhedās te kīrtitā ye tu hare saṃkarṣaṇādayaḥ / tava pūjārthasaṃbhūtās tatas tvayi samāśritāḥ

Sanskrit only: no published translation is held for this verse.

न भेदस् तव देवेश विद्यते परमार्थतः । विविधं तव यद् रूपम् उक्तं तद् उपचारतः

na bhedas tava deveśa vidyate paramārthataḥ / vividhaṃ tava yad rūpam uktaṃ tad upacārataḥ

Sanskrit only: no published translation is held for this verse.

अद्वैतं त्वां कथं द्वैतं वक्तुं शक्नोति मानवः । एकस् त्वं हि हरे व्यापी चित्स्वभावो निरञ्जनः

advaitaṃ tvāṃ kathaṃ dvaitaṃ vaktuṃ śaknoti mānavaḥ / ekas tvaṃ hi hare vyāpī citsvabhāvo nirañjanaḥ

Sanskrit only: no published translation is held for this verse.

परमं तव यद् रूपं भावाभावविवर्जितम् । निर्लेपं निर्गुणं श्रेष्ठं कूटस्थम् अचलं ध्रुवम्

paramaṃ tava yad rūpaṃ bhāvābhāvavivarjitam / nirlepaṃ nirguṇaṃ śreṣṭhaṃ kūṭastham acalaṃ dhruvam

Sanskrit only: no published translation is held for this verse.

सर्वोपाधिविनिर्मुक्तं सत्तामात्रव्यवस्थितम् । तद् देवाश् च न जानन्ति कथं जानाम्य् अहं प्रभो

sarvopādhivinirmuktaṃ sattāmātravyavasthitam / tad devāś ca na jānanti kathaṃ jānāmy ahaṃ prabho

Sanskrit only: no published translation is held for this verse.

अपरं तव यद् रूपं पीतवस्त्रं चतुर्भुजम् । शङ्खचक्रगदापाणि- मुकुटाङ्गदधारिणम्

aparaṃ tava yad rūpaṃ pītavastraṃ caturbhujam / śaṅkhacakragadāpāṇi- mukuṭāṅgadadhāriṇam

Sanskrit only: no published translation is held for this verse.

श्रीवत्सोरस्कसंयुक्तं वनमालाविभूषितम् । तद् अर्चयन्ति विबुधा ये चान्ये तव संश्रयाः

śrīvatsoraskasaṃyuktaṃ vanamālāvibhūṣitam / tad arcayanti vibudhā ye cānye tava saṃśrayāḥ

Sanskrit only: no published translation is held for this verse.

देवदेव सुरश्रेष्ठ भक्तानाम् अभयप्रद । त्राहि मां पद्मपत्त्राक्ष मग्नं विषयसागरे

devadeva suraśreṣṭha bhaktānām abhayaprada / trāhi māṃ padmapattrākṣa magnaṃ viṣayasāgare

Sanskrit only: no published translation is held for this verse.

नान्यं पश्यामि लोकेश यस्याहं शरणं व्रजे । त्वाम् ऋते कमलाकान्त प्रसीद मधुसूदन

nānyaṃ paśyāmi lokeśa yasyāhaṃ śaraṇaṃ vraje / tvām ṛte kamalākānta prasīda madhusūdana

Sanskrit only: no published translation is held for this verse.

जराव्याधिशतैर् युक्तो नानादुःखैर् निपीडितः । हर्षशोकान्वितो मूढः कर्मपाशैः सुयन्त्रितः

jarāvyādhiśatair yukto nānāduḥkhair nipīḍitaḥ / harṣaśokānvito mūḍhaḥ karmapāśaiḥ suyantritaḥ

Sanskrit only: no published translation is held for this verse.

पतितो ऽहं महारौद्रे घोरे संसारसागरे । विषमोदकदुष्पारे रागद्वेषझषाकुले

patito 'haṃ mahāraudre ghore saṃsārasāgare / viṣamodakaduṣpāre rāgadveṣajhaṣākule

Sanskrit only: no published translation is held for this verse.

इन्द्रियावर्तगम्भीरे तृष्णाशोकोर्मिसंकुले । निराश्रये निरालम्बे निःसारे ऽत्यन्तचञ्चले

indriyāvartagambhīre tṛṣṇāśokormisaṃkule / nirāśraye nirālambe niḥsāre 'tyantacañcale

Sanskrit only: no published translation is held for this verse.

मायया मोहितस् तत्र भ्रमामि सुचिरं प्रभो । नानाजातिसहस्रेषु जायमानः पुनः पुनः

māyayā mohitas tatra bhramāmi suciraṃ prabho / nānājātisahasreṣu jāyamānaḥ punaḥ punaḥ

Sanskrit only: no published translation is held for this verse.

मया जन्मान्य् अनेकानि सहस्राण्य् अयुतानि च । विविधान्य् अनुभूतानि संसारे ऽस्मिञ् जनार्दन

mayā janmāny anekāni sahasrāṇy ayutāni ca / vividhāny anubhūtāni saṃsāre 'smiñ janārdana

Sanskrit only: no published translation is held for this verse.

वेदाः साङ्गा मयाधीताः शास्त्राणि विविधानि च । इतिहासपुराणानि तथा शिल्पान्य् अनेकशः

vedāḥ sāṅgā mayādhītāḥ śāstrāṇi vividhāni ca / itihāsapurāṇāni tathā śilpāny anekaśaḥ

Sanskrit only: no published translation is held for this verse.

असंतोषाश् च संतोषाः संचयापचया व्ययाः । मया प्राप्ता जगन्नाथ क्षयवृद्ध्यक्षयेतराः

asaṃtoṣāś ca saṃtoṣāḥ saṃcayāpacayā vyayāḥ / mayā prāptā jagannātha kṣayavṛddhyakṣayetarāḥ

Sanskrit only: no published translation is held for this verse.

भार्यारिमित्रबन्धूनां वियोगाः संगमास् तथा । पितरो विविधा दृष्टा मातरश् च तथा मया

bhāryārimitrabandhūnāṃ viyogāḥ saṃgamās tathā / pitaro vividhā dṛṣṭā mātaraś ca tathā mayā

Sanskrit only: no published translation is held for this verse.

दुःखानि चानुभूतानि यानि सौख्यान्य् अनेकशः । प्राप्ताश् च बान्धवाः पुत्रा भ्रातरो ज्ञातयस् तथा

duḥkhāni cānubhūtāni yāni saukhyāny anekaśaḥ / prāptāś ca bāndhavāḥ putrā bhrātaro jñātayas tathā

Sanskrit only: no published translation is held for this verse.

मयोषितं तथा स्त्रीणां कोष्ठे विण्मूत्रपिच्छले । गर्भवासे महादुःखम् अनुभूतं तथा प्रभो

mayoṣitaṃ tathā strīṇāṃ koṣṭhe viṇmūtrapicchale / garbhavāse mahāduḥkham anubhūtaṃ tathā prabho

Sanskrit only: no published translation is held for this verse.

दुःखानि यान्य् अनेकानि बाल्ययौवनगोचरे । वार्धके च हृषीकेश तानि प्राप्तानि वै मया

duḥkhāni yāny anekāni bālyayauvanagocare / vārdhake ca hṛṣīkeśa tāni prāptāni vai mayā

Sanskrit only: no published translation is held for this verse.

मरणे यानि दुःखानि यममार्गे यमालये । मया तान्य् अनुभूतानि नरके यातनास् तथा

maraṇe yāni duḥkhāni yamamārge yamālaye / mayā tāny anubhūtāni narake yātanās tathā

Sanskrit only: no published translation is held for this verse.

कृमिकीटद्रुमाणां च हस्त्यश्वमृगपक्षिणाम् । महिषोष्ट्रगवां चैव तथान्येषां वनौकसाम्

kṛmikīṭadrumāṇāṃ ca hastyaśvamṛgapakṣiṇām / mahiṣoṣṭragavāṃ caiva tathānyeṣāṃ vanaukasām

Sanskrit only: no published translation is held for this verse.

द्विजातीनां च सर्वेषां शूद्राणां चैव योनिषु । धनिनां क्षत्रियाणां च दरिद्राणां तपस्विनाम्

dvijātīnāṃ ca sarveṣāṃ śūdrāṇāṃ caiva yoniṣu / dhanināṃ kṣatriyāṇāṃ ca daridrāṇāṃ tapasvinām

Sanskrit only: no published translation is held for this verse.

नृपाणां नृपभृत्यानां तथान्येषां च देहिनाम् । गृहेषु तेषाम् उत्पन्नो देव चाहं पुनः पुनः

nṛpāṇāṃ nṛpabhṛtyānāṃ tathānyeṣāṃ ca dehinām / gṛheṣu teṣām utpanno deva cāhaṃ punaḥ punaḥ

Sanskrit only: no published translation is held for this verse.

गतो ऽस्मि दासतां नाथ भृत्यानां बहुशो नृणाम् । दरिद्रत्वं चेश्वरत्वं स्वामित्वं च तथा गतः

gato 'smi dāsatāṃ nātha bhṛtyānāṃ bahuśo nṛṇām / daridratvaṃ ceśvaratvaṃ svāmitvaṃ ca tathā gataḥ

Sanskrit only: no published translation is held for this verse.

हतो मया हताश् चान्ये घातितो घातितास् तथा । दत्तं ममान्यैर् अन्येभ्यो मया दत्तम् अनेकशः

hato mayā hatāś cānye ghātito ghātitās tathā / dattaṃ mamānyair anyebhyo mayā dattam anekaśaḥ

Sanskrit only: no published translation is held for this verse.

पितृमातृसुहृद्भ्रातृ- कलत्राणां कृतेन च । धनिनां श्रोत्रियाणां च दरिद्राणां तपस्विनाम्

pitṛmātṛsuhṛdbhrātṛ- kalatrāṇāṃ kṛtena ca / dhanināṃ śrotriyāṇāṃ ca daridrāṇāṃ tapasvinām

Sanskrit only: no published translation is held for this verse.

उक्तं दैन्यं च विविधं त्यक्त्वा लज्जां जनार्दन । देवतिर्यङ्मनुष्येषु स्थावरेषु चरेषु च

uktaṃ dainyaṃ ca vividhaṃ tyaktvā lajjāṃ janārdana / devatiryaṅmanuṣyeṣu sthāvareṣu careṣu ca

Sanskrit only: no published translation is held for this verse.

न विद्यते तथा स्थानं यत्राहं न गतः प्रभो । कदा मे नरके वासः कदा स्वर्गे जगत्पते

na vidyate tathā sthānaṃ yatrāhaṃ na gataḥ prabho / kadā me narake vāsaḥ kadā svarge jagatpate

Sanskrit only: no published translation is held for this verse.

कदा मनुष्यलोकेषु कदा तिर्यग्गतेषु च । जलयन्त्रे यथा चक्रे घटी रज्जुनिबन्धना

kadā manuṣyalokeṣu kadā tiryaggateṣu ca / jalayantre yathā cakre ghaṭī rajjunibandhanā

Sanskrit only: no published translation is held for this verse.

याति चोर्ध्वम् अधश् चैव कदा मध्ये च तिष्ठति । तथा चाहं सुरश्रेष्ठ कर्मरज्जुसमावृतः

yāti cordhvam adhaś caiva kadā madhye ca tiṣṭhati / tathā cāhaṃ suraśreṣṭha karmarajjusamāvṛtaḥ

Sanskrit only: no published translation is held for this verse.

अधश् चोर्ध्वं तथा मध्ये भ्रमन् गच्छामि योगतः । एवं संसारचक्रे ऽस्मिन् भैरवे रोमहर्षणे

adhaś cordhvaṃ tathā madhye bhraman gacchāmi yogataḥ / evaṃ saṃsāracakre 'smin bhairave romaharṣaṇe

Sanskrit only: no published translation is held for this verse.

भ्रमामि सुचिरं कालं नान्तं पश्यामि कर्हिचित् । न जाने किं करोम्य् अद्य हरे व्याकुलितेन्द्रियः

bhramāmi suciraṃ kālaṃ nāntaṃ paśyāmi karhicit / na jāne kiṃ karomy adya hare vyākulitendriyaḥ

Sanskrit only: no published translation is held for this verse.

शोकतृष्णाभिभूतो ऽहं कांदिशीको विचेतनः । इदानीं त्वाम् अहं देव विह्वलः शरणं गतः

śokatṛṣṇābhibhūto 'haṃ kāṃdiśīko vicetanaḥ / idānīṃ tvām ahaṃ deva vihvalaḥ śaraṇaṃ gataḥ

Sanskrit only: no published translation is held for this verse.

त्राहि मां दुःखितं कृष्ण मग्नं संसारसागरे । कृपां कुरु जगन्नाथ भक्तं मां यदि मन्यसे

trāhi māṃ duḥkhitaṃ kṛṣṇa magnaṃ saṃsārasāgare / kṛpāṃ kuru jagannātha bhaktaṃ māṃ yadi manyase

Sanskrit only: no published translation is held for this verse.

त्वदृते नास्ति मे बन्धुर् यो ऽसौ चिन्तां करिष्यति । देव त्वां नाथम् आसाद्य न भयं मे ऽस्ति कुत्रचित्

tvadṛte nāsti me bandhur yo 'sau cintāṃ kariṣyati / deva tvāṃ nātham āsādya na bhayaṃ me 'sti kutracit

Sanskrit only: no published translation is held for this verse.

जीविते मरणे चैव योगक्षेमे ऽथवा प्रभो । ये तु त्वां विधिवद् देव नार्चयन्ति नराधमाः

jīvite maraṇe caiva yogakṣeme 'thavā prabho / ye tu tvāṃ vidhivad deva nārcayanti narādhamāḥ

Sanskrit only: no published translation is held for this verse.

सुगतिस् तु कथं तेषां भवेत् संसारबन्धनात् । किं तेषां कुलशीलेन विद्यया जीवितेन च

sugatis tu kathaṃ teṣāṃ bhavet saṃsārabandhanāt / kiṃ teṣāṃ kulaśīlena vidyayā jīvitena ca

Sanskrit only: no published translation is held for this verse.

येषां न जायते भक्तिर् जगद्धातरि केशवे । प्रकृतिं त्व् आसुरीं प्राप्य ये त्वां निन्दन्ति मोहिताः

yeṣāṃ na jāyate bhaktir jagaddhātari keśave / prakṛtiṃ tv āsurīṃ prāpya ye tvāṃ nindanti mohitāḥ

Sanskrit only: no published translation is held for this verse.

पतन्ति नरके घोरे जायमानाः पुनः पुनः । न तेषां निष्कृतिस् तस्माद् विद्यते नरकार्णवात्

patanti narake ghore jāyamānāḥ punaḥ punaḥ / na teṣāṃ niṣkṛtis tasmād vidyate narakārṇavāt

Sanskrit only: no published translation is held for this verse.

ये दूषयन्ति दुर्वृत्तास् त्वां देव पुरुषाधमाः । यत्र यत्र भवेज् जन्म मम कर्मनिबन्धनात्

ye dūṣayanti durvṛttās tvāṃ deva puruṣādhamāḥ / yatra yatra bhavej janma mama karmanibandhanāt

Sanskrit only: no published translation is held for this verse.

तत्र तत्र हरे भक्तिस् त्वयि चास्तु दृढा सदा । आराध्य त्वां सुरा दैत्या नराश् चान्ये ऽपि संयताः

tatra tatra hare bhaktis tvayi cāstu dṛḍhā sadā / ārādhya tvāṃ surā daityā narāś cānye 'pi saṃyatāḥ

Sanskrit only: no published translation is held for this verse.

अवापुः परमां सिद्धिं कस् त्वां देव न पूजयेत् । न शक्नुवन्ति ब्रह्माद्याः स्तोतुं त्वां त्रिदशा हरे

avāpuḥ paramāṃ siddhiṃ kas tvāṃ deva na pūjayet / na śaknuvanti brahmādyāḥ stotuṃ tvāṃ tridaśā hare

Sanskrit only: no published translation is held for this verse.

कथं मानुषबुद्ध्याहं स्तौमि त्वां प्रकृतेः परम् । तथा चाज्ञानभावेन संस्तुतो ऽसि मया प्रभो

kathaṃ mānuṣabuddhyāhaṃ staumi tvāṃ prakṛteḥ param / tathā cājñānabhāvena saṃstuto 'si mayā prabho

Sanskrit only: no published translation is held for this verse.

तत् क्षमस्वापराधं मे यदि ते ऽस्ति दया मयि । कृतापराधे ऽपि हरे क्षमां कुर्वन्ति साधवः

tat kṣamasvāparādhaṃ me yadi te 'sti dayā mayi / kṛtāparādhe 'pi hare kṣamāṃ kurvanti sādhavaḥ

Sanskrit only: no published translation is held for this verse.

तस्मात् प्रसीद देवेश भक्तस्नेहं समाश्रितः । स्तुतो ऽसि यन् मया देव भक्तिभावेन चेतसा । साङ्गं भवतु तत् सर्वं वासुदेव नमो ऽस्तु ते

tasmāt prasīda deveśa bhaktasnehaṃ samāśritaḥ / stuto 'si yan mayā deva bhaktibhāvena cetasā / sāṅgaṃ bhavatu tat sarvaṃ vāsudeva namo 'stu te

Sanskrit only: no published translation is held for this verse.

ब्रह्मोवाच: इत्थं स्तुतस् तदा तेन प्रसन्नो गरुडध्वजः । ददौ तस्मै मुनिश्रेष्ठाः सकलं मनसेप्सितम्

brahmovāca: itthaṃ stutas tadā tena prasanno garuḍadhvajaḥ / dadau tasmai muniśreṣṭhāḥ sakalaṃ manasepsitam

Sanskrit only: no published translation is held for this verse.

यः संपूज्य जगन्नाथं प्रत्यहं स्तौति मानवः । स्तोत्रेणानेन मतिमान् स मोक्षं लभते ध्रुवम्

yaḥ saṃpūjya jagannāthaṃ pratyahaṃ stauti mānavaḥ / stotreṇānena matimān sa mokṣaṃ labhate dhruvam

Sanskrit only: no published translation is held for this verse.

त्रिसंध्यं यो जपेद् विद्वान् इदं स्तोत्रवरं शुचिः । धर्मं चार्थं च कामं च मोक्षं च लभते नरः

trisaṃdhyaṃ yo japed vidvān idaṃ stotravaraṃ śuciḥ / dharmaṃ cārthaṃ ca kāmaṃ ca mokṣaṃ ca labhate naraḥ

Sanskrit only: no published translation is held for this verse.

यः पठेच् छृणुयाद् वापि श्रावयेद् वा समाहितः । स लोकं शाश्वतं विष्णोर् याति निर्धूतकल्मषः

yaḥ paṭhec chṛṇuyād vāpi śrāvayed vā samāhitaḥ / sa lokaṃ śāśvataṃ viṣṇor yāti nirdhūtakalmaṣaḥ

Sanskrit only: no published translation is held for this verse.

धन्यं पापहरं चेदं भुक्तिमुक्तिप्रदं शिवम् । गुह्यं सुदुर्लभं पुण्यं न देयं यस्य कस्यचित्

dhanyaṃ pāpaharaṃ cedaṃ bhuktimuktipradaṃ śivam / guhyaṃ sudurlabhaṃ puṇyaṃ na deyaṃ yasya kasyacit

Sanskrit only: no published translation is held for this verse.

न नास्तिकाय मूर्खाय न कृतघ्नाय मानिने । न दुष्टमतये दद्यान् नाभक्ताय कदाचन

na nāstikāya mūrkhāya na kṛtaghnāya mānine / na duṣṭamataye dadyān nābhaktāya kadācana

Sanskrit only: no published translation is held for this verse.

दातव्यं भक्तियुक्ताय गुणशीलान्विताय च । विष्णुभक्ताय शान्ताय श्रद्धानुष्ठानशालिने

dātavyaṃ bhaktiyuktāya guṇaśīlānvitāya ca / viṣṇubhaktāya śāntāya śraddhānuṣṭhānaśāline

Sanskrit only: no published translation is held for this verse.