Library·Brahmavaivarta Purāṇa·2·2.23
नारद उवाच ।। तुलस्युपाख्यानमिदं श्रुतमीश सुधोपमम् ।। यत्तु सावित्र्युपाख्यानं तन्मे व्याख्यातुमर्हसि
nārada uvāca || tulasyupākhyānamidaṃ śrutamīśa sudhopamam || yattu sāvitryupākhyānaṃ tanme vyākhyātumarhasi
Sanskrit only: no published translation is held for this verse.
पुरा येन समुद्भूता सा श्रुता च श्रुतिप्रसूः ।। केन वा पूजिता देवी प्रथमे कैश्च वा परे
purā yena samudbhūtā sā śrutā ca śrutiprasūḥ || kena vā pūjitā devī prathame kaiśca vā pare
Sanskrit only: no published translation is held for this verse.
नारायण उवाच ।। ब्रह्मणा वेदजननी पूजिता प्रथमे मुने ।। द्वितीये च देवगणैस्तत्पश्चाद्विदुषां गणैः
nārāyaṇa uvāca || brahmaṇā vedajananī pūjitā prathame mune || dvitīye ca devagaṇaistatpaścādviduṣāṃ gaṇaiḥ
Sanskrit only: no published translation is held for this verse.
तथा चाश्वपतिः पूर्वं पूजयामास भारते ।। तत्पश्चात्पूजयामासुर्वर्णाश्चत्वार एव च
tathā cāśvapatiḥ pūrvaṃ pūjayāmāsa bhārate || tatpaścātpūjayāmāsurvarṇāścatvāra eva ca
Sanskrit only: no published translation is held for this verse.
नारद उवाच ।। को वा सोऽश्वपतिर्ब्रह्मन्केन वा तेन पूजिता ।। सर्वपूज्या च सावित्री तन्मे व्याख्यातुमर्हसि
nārada uvāca || ko vā so'śvapatirbrahmankena vā tena pūjitā || sarvapūjyā ca sāvitrī tanme vyākhyātumarhasi
Sanskrit only: no published translation is held for this verse.
नारायण उवाच ।। मद्रदेशे महाराजो बभूवाश्वपतिर्मुने ।। वैरिणां बलहर्त्ता च मित्राणां दुःखनाशनः
nārāyaṇa uvāca || madradeśe mahārājo babhūvāśvapatirmune || vairiṇāṃ balaharttā ca mitrāṇāṃ duḥkhanāśanaḥ
Sanskrit only: no published translation is held for this verse.
आसीत्तस्य महाराज्ञी महिषी धर्मचारिणी ।। मालतीति च सा ख्याता यथा लक्ष्मीर्गदाभृतः
āsīttasya mahārājñī mahiṣī dharmacāriṇī || mālatīti ca sā khyātā yathā lakṣmīrgadābhṛtaḥ
Sanskrit only: no published translation is held for this verse.
सा च राज्ञी महासाध्वी वसिष्ठस्योपदेशतः ।। चकाराराधनं भक्त्या सावित्र्याश्चैव नारद
sā ca rājñī mahāsādhvī vasiṣṭhasyopadeśataḥ || cakārārādhanaṃ bhaktyā sāvitryāścaiva nārada
Sanskrit only: no published translation is held for this verse.
प्रत्यादेशं न सा प्राप महिषी न ददर्श ताम् ।। गृहं जगाम सा दुःखाद्धृदयेन विदूयता
pratyādeśaṃ na sā prāpa mahiṣī na dadarśa tām || gṛhaṃ jagāma sā duḥkhāddhṛdayena vidūyatā
Sanskrit only: no published translation is held for this verse.
राजा तां दुःखितां दृष्ट्वा बोधयित्वा नयेन वै ।। सावित्र्यास्तपसे भक्त्या जगाम पुष्करं तदा
rājā tāṃ duḥkhitāṃ dṛṣṭvā bodhayitvā nayena vai || sāvitryāstapase bhaktyā jagāma puṣkaraṃ tadā
Sanskrit only: no published translation is held for this verse.
तपश्चचार तत्रैव संयतः शतवत्सरम् ।। न ददर्श च सावित्रीं प्रत्यादेशो बभूव ह
tapaścacāra tatraiva saṃyataḥ śatavatsaram || na dadarśa ca sāvitrīṃ pratyādeśo babhūva ha
Sanskrit only: no published translation is held for this verse.
शुश्रावाकाशवाणीं च नृपेन्द्रश्चाशरीरिणीम् ।। गायत्रीदशलक्षं च जपं कुर्विति नारद
śuśrāvākāśavāṇīṃ ca nṛpendraścāśarīriṇīm || gāyatrīdaśalakṣaṃ ca japaṃ kurviti nārada
Sanskrit only: no published translation is held for this verse.
एतस्मिन्नन्तरे तत्र प्रजगाम पराशरः ।। प्रणनाम नृपस्तं च मुनिर्नृपमुवाच ह
etasminnantare tatra prajagāma parāśaraḥ || praṇanāma nṛpastaṃ ca munirnṛpamuvāca ha
Sanskrit only: no published translation is held for this verse.
पराशर उवाच ।। सकृज्जपश्च गायत्र्याः पापं दिनकृतं हरेत् ।। दशधा प्रजपान्नॄणां दिवारात्र्यघमेव च
parāśara uvāca || sakṛjjapaśca gāyatryāḥ pāpaṃ dinakṛtaṃ haret || daśadhā prajapānnṝṇāṃ divārātryaghameva ca
Sanskrit only: no published translation is held for this verse.
शतधा च जपाच्चैवं पापं मासार्जितं परम् ।। सहस्रधा जपाच्चैव कल्मषं वत्सरार्जितम्
śatadhā ca japāccaivaṃ pāpaṃ māsārjitaṃ param || sahasradhā japāccaiva kalmaṣaṃ vatsarārjitam
Sanskrit only: no published translation is held for this verse.
करोति मुक्तिं विप्राणां जपो दशगुणस्ततः ।। करं सर्पफणाकारं कृत्वा तु ऊर्ध्वमुद्रितम्
karoti muktiṃ viprāṇāṃ japo daśaguṇastataḥ || karaṃ sarpaphaṇākāraṃ kṛtvā tu ūrdhvamudritam
Sanskrit only: no published translation is held for this verse.
आनम्रमूर्द्धमचलं प्रजपेत्प्राङ्मुखो द्विजः ।। अनामिकामध्यदेशादथो वामक्रमेण च
ānamramūrddhamacalaṃ prajapetprāṅmukho dvijaḥ || anāmikāmadhyadeśādatho vāmakrameṇa ca
Sanskrit only: no published translation is held for this verse.
तर्जनीमूलपर्य्यन्तं जपस्यैष क्रमः करे ।। श्वेतपङ्कज बीजानां स्फाटिकानां च संस्कृताम्
tarjanīmūlaparyyantaṃ japasyaiṣa kramaḥ kare || śvetapaṅkaja bījānāṃ sphāṭikānāṃ ca saṃskṛtām
Sanskrit only: no published translation is held for this verse.
कृत्वा वा मालिकां राजञ्जपेत्तीर्थे सुरालये ।। संस्थाप्य मालामश्वत्थपत्रसप्तसु संयतः
kṛtvā vā mālikāṃ rājañjapettīrthe surālaye || saṃsthāpya mālāmaśvatthapatrasaptasu saṃyataḥ
Sanskrit only: no published translation is held for this verse.
कृत्वा गोरोचनाक्तां च गायत्र्या स्नापयेत्सुधीः ।। गायत्रीशतकं तस्यां जपेच्च विधिपूर्वकम्
kṛtvā gorocanāktāṃ ca gāyatryā snāpayetsudhīḥ || gāyatrīśatakaṃ tasyāṃ japecca vidhipūrvakam
Sanskrit only: no published translation is held for this verse.
अथवा पञ्चगव्येन स्नाता माला च संस्कृता ।। अथ गङ्गोदकेनैव स्नाता वाऽतिसुसंस्कृता
athavā pañcagavyena snātā mālā ca saṃskṛtā || atha gaṅgodakenaiva snātā vā'tisusaṃskṛtā
Sanskrit only: no published translation is held for this verse.
एवं क्रमेण राजर्षे दशलक्षं जपं कुरु ।। साक्षाद् द्रक्ष्यसि सावित्रीं त्रिजन्ममपातकक्षयात्
evaṃ krameṇa rājarṣe daśalakṣaṃ japaṃ kuru || sākṣād drakṣyasi sāvitrīṃ trijanmamapātakakṣayāt
Sanskrit only: no published translation is held for this verse.
नित्यं नित्यं त्रिसन्ध्यं च करिष्यसि दिने दिने ।। मध्याह्ने चापि सायाह्ने प्रातरेव शुचिः सदा
nityaṃ nityaṃ trisandhyaṃ ca kariṣyasi dine dine || madhyāhne cāpi sāyāhne prātareva śuciḥ sadā
Sanskrit only: no published translation is held for this verse.
सन्ध्याहीनोऽशुचिर्नित्यमनर्हः सर्वकर्मसु ।। यदह्ना कुरुते कर्म न तस्य फलभाग्भवेत्
sandhyāhīno'śucirnityamanarhaḥ sarvakarmasu || yadahnā kurute karma na tasya phalabhāgbhavet
Sanskrit only: no published translation is held for this verse.
नोपतिष्ठति यः पूर्वां नोपास्ते यश्च पश्चिमाम् ।। स शूद्रवद्बहिष्कार्य्यः सर्वस्माद् द्विजकर्मणः
nopatiṣṭhati yaḥ pūrvāṃ nopāste yaśca paścimām || sa śūdravadbahiṣkāryyaḥ sarvasmād dvijakarmaṇaḥ
Sanskrit only: no published translation is held for this verse.
यावज्जीवनपर्य्यन्तं यस्त्रिसन्ध्यां करोति च ।। स च सूर्य्यसमो विप्रस्तेजसा तपसा सदा
yāvajjīvanaparyyantaṃ yastrisandhyāṃ karoti ca || sa ca sūryyasamo viprastejasā tapasā sadā
Sanskrit only: no published translation is held for this verse.
तत्पादपद्मरजसा सद्यः पूता वसुन्धरा ।। जीवन्मुक्तः स तेजस्वी सन्ध्या पूतो हि यो द्विजः
tatpādapadmarajasā sadyaḥ pūtā vasundharā || jīvanmuktaḥ sa tejasvī sandhyā pūto hi yo dvijaḥ
Sanskrit only: no published translation is held for this verse.
तीर्थानि च पवित्राणि तस्य स्पर्शनमात्रतः ।। ततः पापानि यान्त्येव वैनतेयादिवोरगाः
tīrthāni ca pavitrāṇi tasya sparśanamātrataḥ || tataḥ pāpāni yāntyeva vainateyādivoragāḥ
Sanskrit only: no published translation is held for this verse.
न गृह्णन्ति सुराः पूजां पितरः पिण्डतर्पणम् ।। स्वेच्छया च द्विजातेश्च त्रिसन्ध्यरहितस्य च
na gṛhṇanti surāḥ pūjāṃ pitaraḥ piṇḍatarpaṇam || svecchayā ca dvijāteśca trisandhyarahitasya ca
Sanskrit only: no published translation is held for this verse.
विष्णुमन्त्रविहीनश्च त्रिसन्ध्यरहितो द्विजः ।। एकादशीविहीनश्च विषहीनो यथोरगः
viṣṇumantravihīnaśca trisandhyarahito dvijaḥ || ekādaśīvihīnaśca viṣahīno yathoragaḥ
Sanskrit only: no published translation is held for this verse.
हरेरनैवेद्यभोजी धावको वृषवाहकः ।। शूद्रान्नभोजी विप्रश्च विषहीनो यथोरगः
hareranaivedyabhojī dhāvako vṛṣavāhakaḥ || śūdrānnabhojī vipraśca viṣahīno yathoragaḥ
Sanskrit only: no published translation is held for this verse.
शवदाही च शूद्राणां यो विप्रो वृषलीपतिः ।। शूद्राणां सूपकारश्च विषहीनो यथोरगः
śavadāhī ca śūdrāṇāṃ yo vipro vṛṣalīpatiḥ || śūdrāṇāṃ sūpakāraśca viṣahīno yathoragaḥ
Sanskrit only: no published translation is held for this verse.
शूद्राणां च प्रतिग्राही शूद्रयाजी च यो द्विजः ।। असिजीवी मषीजीवी विषहीनो यथोरगः
śūdrāṇāṃ ca pratigrāhī śūdrayājī ca yo dvijaḥ || asijīvī maṣījīvī viṣahīno yathoragaḥ
Sanskrit only: no published translation is held for this verse.
यो विप्रोऽवीरान्नभोजी ऋतुस्नातान्नभोजकः ।। भगजीवी वार्धुषिको विषहीनो यथोरगः
yo vipro'vīrānnabhojī ṛtusnātānnabhojakaḥ || bhagajīvī vārdhuṣiko viṣahīno yathoragaḥ
Sanskrit only: no published translation is held for this verse.
यः कन्याविक्रयी विप्रो यो हरेर्नामविक्रयी ।। यो विद्याविक्रयी भूप विषहीनो यथोरगः
yaḥ kanyāvikrayī vipro yo harernāmavikrayī || yo vidyāvikrayī bhūpa viṣahīno yathoragaḥ
Sanskrit only: no published translation is held for this verse.
सूर्य्योदये च द्विर्भोजी मत्स्यभोजी च यो द्विजः ।। शिलापूजादिरहितो विषहीनो यथोरगः
sūryyodaye ca dvirbhojī matsyabhojī ca yo dvijaḥ || śilāpūjādirahito viṣahīno yathoragaḥ
Sanskrit only: no published translation is held for this verse.
इत्युक्त्वा च मुनिश्रेष्ठः सर्व पूजाविधिक्रमम् ।। तमुवाच च सावित्र्या ध्यानादिकमभीप्सितम्
ityuktvā ca muniśreṣṭhaḥ sarva pūjāvidhikramam || tamuvāca ca sāvitryā dhyānādikamabhīpsitam
Sanskrit only: no published translation is held for this verse.
दत्त्वा सर्वं नृपेन्द्राय प्रययौ स्वालयं मुनिः ।। राजा संपूज्य सावित्रीं ददर्श वरमाप च
dattvā sarvaṃ nṛpendrāya prayayau svālayaṃ muniḥ || rājā saṃpūjya sāvitrīṃ dadarśa varamāpa ca
Sanskrit only: no published translation is held for this verse.
नारद उवाच।। किं वा ध्यानं च सावित्र्याः किं वा पूजाविधानकम्।। स्तोत्रं मन्त्रं च किं दत्त्वा प्रययौ स पराशरः
nārada uvāca|| kiṃ vā dhyānaṃ ca sāvitryāḥ kiṃ vā pūjāvidhānakam|| stotraṃ mantraṃ ca kiṃ dattvā prayayau sa parāśaraḥ
Sanskrit only: no published translation is held for this verse.
नृपः केन विधानेन संपूज्य श्रुतिमातरम्।। वरं च किं वा संप्राप वद सोऽश्वपतिर्नृपः
nṛpaḥ kena vidhānena saṃpūjya śrutimātaram|| varaṃ ca kiṃ vā saṃprāpa vada so'śvapatirnṛpaḥ
Sanskrit only: no published translation is held for this verse.
नारायण उवाच।। ज्येष्ठे कृष्णत्रयोदश्यां शुद्धे काले च संयतः।। व्रतमेव चतुर्दश्यां व्रती भक्त्या समाचरेत्
nārāyaṇa uvāca|| jyeṣṭhe kṛṣṇatrayodaśyāṃ śuddhe kāle ca saṃyataḥ|| vratameva caturdaśyāṃ vratī bhaktyā samācaret
Sanskrit only: no published translation is held for this verse.
व्रतं चतुर्दशाब्दं च द्विसप्तफलसंयुतम्।। दत्त्वा द्विसप्तनैवेद्यं पुष्पधूपादिकं तथा
vrataṃ caturdaśābdaṃ ca dvisaptaphalasaṃyutam|| dattvā dvisaptanaivedyaṃ puṣpadhūpādikaṃ tathā
Sanskrit only: no published translation is held for this verse.
वस्त्रं यज्ञोपवीतं च भोज्यं च विधिपूर्वकम्।। संस्थाप्य मङ्गलघटं फलशाखासमन्वितम
vastraṃ yajñopavītaṃ ca bhojyaṃ ca vidhipūrvakam|| saṃsthāpya maṅgalaghaṭaṃ phalaśākhāsamanvitama
Sanskrit only: no published translation is held for this verse.
गणेशं च दिनेशं च वह्निं विष्णुं शिवं शिवाम्।। संपूज्य पूजयेदिष्टं घटे आवाहिते मुने
gaṇeśaṃ ca dineśaṃ ca vahniṃ viṣṇuṃ śivaṃ śivām|| saṃpūjya pūjayediṣṭaṃ ghaṭe āvāhite mune
Sanskrit only: no published translation is held for this verse.
शृणु ध्यानं च सावित्र्याश्चोक्तं माध्यन्दिने च यत्।। स्तोत्रं पूजाविधानं च मन्त्रं च सर्वकामदम्
śṛṇu dhyānaṃ ca sāvitryāścoktaṃ mādhyandine ca yat|| stotraṃ pūjāvidhānaṃ ca mantraṃ ca sarvakāmadam
Sanskrit only: no published translation is held for this verse.
तप्तकाञ्चनवर्णाभां ज्वलन्तीं ब्रह्मतेजसा ।। ग्रीष्ममध्याह्नमार्त्तण्डसहस्रसमसुप्रभाम्
taptakāñcanavarṇābhāṃ jvalantīṃ brahmatejasā || grīṣmamadhyāhnamārttaṇḍasahasrasamasuprabhām
Sanskrit only: no published translation is held for this verse.
ईषद्धास्यप्रसन्नास्यां रत्नभूषणभूषिताम्।। वह्निशुद्धांशुकाधानां भक्तानुग्रहकातराम्
īṣaddhāsyaprasannāsyāṃ ratnabhūṣaṇabhūṣitām|| vahniśuddhāṃśukādhānāṃ bhaktānugrahakātarām
Sanskrit only: no published translation is held for this verse.
सुखदां मुक्तिदां शान्तां कान्तां च जगतां विधेः।। सर्वसम्पत्स्वरूपां च प्रदात्रीं सर्वसम्पदाम्
sukhadāṃ muktidāṃ śāntāṃ kāntāṃ ca jagatāṃ vidheḥ|| sarvasampatsvarūpāṃ ca pradātrīṃ sarvasampadām
Sanskrit only: no published translation is held for this verse.
वेदाधिष्ठातृदेवीं च वेदशास्त्रस्वरूपिणीम् ।। वेदे बीजस्वरूपां च भजे त्वां वेदमातरम्
vedādhiṣṭhātṛdevīṃ ca vedaśāstrasvarūpiṇīm || vede bījasvarūpāṃ ca bhaje tvāṃ vedamātaram
Sanskrit only: no published translation is held for this verse.
ध्यात्वा ध्यानेन चानेन दत्त्वा पुष्पं स्वमूर्द्धनि ।। पुनर्ध्यात्वा घटे भक्त्या देवीमावाहयेद्व्रती
dhyātvā dhyānena cānena dattvā puṣpaṃ svamūrddhani || punardhyātvā ghaṭe bhaktyā devīmāvāhayedvratī
Sanskrit only: no published translation is held for this verse.
दत्त्वा षोडशोपचारं वेदोक्तमन्त्रपूर्वकम् ।। सम्पूज्य स्तुत्वा प्रणमेदेवं देवीं विधानतः
dattvā ṣoḍaśopacāraṃ vedoktamantrapūrvakam || sampūjya stutvā praṇamedevaṃ devīṃ vidhānataḥ
Sanskrit only: no published translation is held for this verse.
वसनं भूषणं माल्यं गन्धमाचमनीयकम्।। मनोहरं सुतल्पं च देयान्येतानि षोडश
vasanaṃ bhūṣaṇaṃ mālyaṃ gandhamācamanīyakam|| manoharaṃ sutalpaṃ ca deyānyetāni ṣoḍaśa
Sanskrit only: no published translation is held for this verse.
दारुसारविकारं च हेमादिनिर्मितं च वा ।। देवाधारं पुण्यदं च मया नित्यं निवेदितम्
dārusāravikāraṃ ca hemādinirmitaṃ ca vā || devādhāraṃ puṇyadaṃ ca mayā nityaṃ niveditam
Sanskrit only: no published translation is held for this verse.
तीर्थोदकं च पाद्यं च पुण्यदं प्रीतिदं महत् ।। पूजाङ्गभूतं शुद्धं च मया भक्त्या निवेदितम्
tīrthodakaṃ ca pādyaṃ ca puṇyadaṃ prītidaṃ mahat || pūjāṅgabhūtaṃ śuddhaṃ ca mayā bhaktyā niveditam
Sanskrit only: no published translation is held for this verse.
पवित्ररूपमर्घ्यं च दूर्वापुष्पाक्षतान्वितम् ।। पुण्यदं शंखतोयाक्तं मया तुभ्यं निवेदितम्
pavitrarūpamarghyaṃ ca dūrvāpuṣpākṣatānvitam || puṇyadaṃ śaṃkhatoyāktaṃ mayā tubhyaṃ niveditam
Sanskrit only: no published translation is held for this verse.
सुगन्धि धात्रीतैलं च देहसौन्दर्य्यकारणम् ।। मया निवेदितं भक्त्या स्नानीयं प्रतिगृह्यताम्
sugandhi dhātrītailaṃ ca dehasaundaryyakāraṇam || mayā niveditaṃ bhaktyā snānīyaṃ pratigṛhyatām
Sanskrit only: no published translation is held for this verse.
मलयाचलसम्भूतं देहशोभाविवर्द्धनम् ।। सुगन्धियुक्तं सुखदं मया तुभ्यं निवेदितम्
malayācalasambhūtaṃ dehaśobhāvivarddhanam || sugandhiyuktaṃ sukhadaṃ mayā tubhyaṃ niveditam
Sanskrit only: no published translation is held for this verse.
गन्धद्रव्योद्भवः पुण्यः प्रीतिदो दिव्यगन्धदः ।। मया निवेदितो भक्त्या धूपोऽयं प्रतिगृह्यताम्
gandhadravyodbhavaḥ puṇyaḥ prītido divyagandhadaḥ || mayā nivedito bhaktyā dhūpo'yaṃ pratigṛhyatām
Sanskrit only: no published translation is held for this verse.
जगतां दर्शनीयं च दर्शनं दीप्तिकारणम् ।। अन्धकारध्वंसबीजं मया तुभ्यं निवेदितम्
jagatāṃ darśanīyaṃ ca darśanaṃ dīptikāraṇam || andhakāradhvaṃsabījaṃ mayā tubhyaṃ niveditam
Sanskrit only: no published translation is held for this verse.
तुष्टिदं पुष्टिदं चैव प्रीतिदं क्षुद्विनाशनम् ।। पुण्यदं स्वादुरूपं च नैवेद्यं प्रतिगृह्यताम्
tuṣṭidaṃ puṣṭidaṃ caiva prītidaṃ kṣudvināśanam || puṇyadaṃ svādurūpaṃ ca naivedyaṃ pratigṛhyatām
Sanskrit only: no published translation is held for this verse.
ताम्बूलं च वरं रम्यं कर्पूरादिसुवासितम् ।। तुष्टिदं पुष्टिदं चैव मया भक्त्या निवेदितम्
tāmbūlaṃ ca varaṃ ramyaṃ karpūrādisuvāsitam || tuṣṭidaṃ puṣṭidaṃ caiva mayā bhaktyā niveditam
Sanskrit only: no published translation is held for this verse.
सुशीतलं वासितं च पिपासानाशकारणम् ।। जगतां जीवरूपं च जीवनं प्रतिगृह्यताम्
suśītalaṃ vāsitaṃ ca pipāsānāśakāraṇam || jagatāṃ jīvarūpaṃ ca jīvanaṃ pratigṛhyatām
Sanskrit only: no published translation is held for this verse.
देहशोभास्वरूपं च सभाशोभाविवर्द्धनम् ।। कार्पासजं च कृमिजं वसनं प्रतिगृह्यताम्
dehaśobhāsvarūpaṃ ca sabhāśobhāvivarddhanam || kārpāsajaṃ ca kṛmijaṃ vasanaṃ pratigṛhyatām
Sanskrit only: no published translation is held for this verse.
काञ्चनादिभिराबद्धं श्रीयुक्तं श्रीकरं सदा।। सुखदं पुण्यदं चैव भूषणं प्रतिगृह्यताम्
kāñcanādibhirābaddhaṃ śrīyuktaṃ śrīkaraṃ sadā|| sukhadaṃ puṇyadaṃ caiva bhūṣaṇaṃ pratigṛhyatām
Sanskrit only: no published translation is held for this verse.
नानापुष्पलताकीर्णं बहुभासा समन्वितम् ।। प्रीतिदं पुण्यदं चैव माल्यं वै प्रतिगृह्यताम्
nānāpuṣpalatākīrṇaṃ bahubhāsā samanvitam || prītidaṃ puṇyadaṃ caiva mālyaṃ vai pratigṛhyatām
Sanskrit only: no published translation is held for this verse.
सर्वमङ्गलरूपश्च सर्व मङ्गलदो वरः ।। पुण्यप्रदश्च गन्धाढ्यो गन्धश्च प्रतिगृह्यताम्
sarvamaṅgalarūpaśca sarva maṅgalado varaḥ || puṇyapradaśca gandhāḍhyo gandhaśca pratigṛhyatām
Sanskrit only: no published translation is held for this verse.
शुद्धं शुद्धिप्रदं चैव शुद्धानां प्रीतिदं महत् ।। रम्यमाचमनीयं च मया दत्तं प्रगृह्यताम्
śuddhaṃ śuddhipradaṃ caiva śuddhānāṃ prītidaṃ mahat || ramyamācamanīyaṃ ca mayā dattaṃ pragṛhyatām
Sanskrit only: no published translation is held for this verse.
रत्नसारादिनिर्माणं पुष्पचन्दनसंयुतम् ।। सुखदं पुण्यदं चैव सुतल्पं प्रतिगृह्यताम
ratnasārādinirmāṇaṃ puṣpacandanasaṃyutam || sukhadaṃ puṇyadaṃ caiva sutalpaṃ pratigṛhyatāma
Sanskrit only: no published translation is held for this verse.
नानावृक्षसमुद्भूतं नानारूपसमन्वितम् ।। फलस्वरूपं फलदं फलं च प्रतिगृह्यताम्
nānāvṛkṣasamudbhūtaṃ nānārūpasamanvitam || phalasvarūpaṃ phaladaṃ phalaṃ ca pratigṛhyatām
Sanskrit only: no published translation is held for this verse.
सिन्दूरं च वरं रम्यं भालशोभाविवर्द्धनम् ।। भूषणं भूषणानां च सिन्दूरं प्रतिगृह्यताम्
sindūraṃ ca varaṃ ramyaṃ bhālaśobhāvivarddhanam || bhūṣaṇaṃ bhūṣaṇānāṃ ca sindūraṃ pratigṛhyatām
Sanskrit only: no published translation is held for this verse.
विशुद्धग्रंथिसंयुक्तं पुण्यसूत्रविनिर्मितम् ।। पवित्रं वेदमन्त्रेण यज्ञसूत्रं च गृह्यताम्
viśuddhagraṃthisaṃyuktaṃ puṇyasūtravinirmitam || pavitraṃ vedamantreṇa yajñasūtraṃ ca gṛhyatām
Sanskrit only: no published translation is held for this verse.
द्रव्याण्येतानि मूलेन दत्त्वा स्तोत्रं पठेत्सुधीः ।। ततः प्रणम्य विप्राय व्रती दद्याच्च दक्षिणाम्
dravyāṇyetāni mūlena dattvā stotraṃ paṭhetsudhīḥ || tataḥ praṇamya viprāya vratī dadyācca dakṣiṇām
Sanskrit only: no published translation is held for this verse.
श्रीं ह्रीं क्लीं सावित्र्यै स्वाहा ।। मध्यन्दिनोक्तं स्तोत्रं च सर्ववाञ्छाफलप्रदम् ।। विप्रजीवनरूपं च निबोध कथयामि ते
śrīṃ hrīṃ klīṃ sāvitryai svāhā || madhyandinoktaṃ stotraṃ ca sarvavāñchāphalapradam || viprajīvanarūpaṃ ca nibodha kathayāmi te
Sanskrit only: no published translation is held for this verse.
कृष्णेन दत्ता सावित्री गोलोके ब्रह्मणे पुरा ।।। न याति सा तेन सार्द्धं ब्रह्मलोकं तु नारद
kṛṣṇena dattā sāvitrī goloke brahmaṇe purā ||| na yāti sā tena sārddhaṃ brahmalokaṃ tu nārada
Sanskrit only: no published translation is held for this verse.
ब्रह्मा कृष्णाज्ञया भक्त्या पर्यष्टौद्वेदमातरम् ।। तदा सा परितुष्टा च ब्रह्माणं चकमे सती
brahmā kṛṣṇājñayā bhaktyā paryaṣṭaudvedamātaram || tadā sā parituṣṭā ca brahmāṇaṃ cakame satī
Sanskrit only: no published translation is held for this verse.
सावित्रीति चतुर्थ्यन्तं वह्निजायान्तमेव च ।। लक्ष्मीमायाकामपूर्वं मन्त्रमष्टाक्षरं विदुः
sāvitrīti caturthyantaṃ vahnijāyāntameva ca || lakṣmīmāyākāmapūrvaṃ mantramaṣṭākṣaraṃ viduḥ
Sanskrit only: no published translation is held for this verse.
तेजस्स्वरूपे परमे परमानन्दरूपिणि ।। द्विजातीनां जातिरूपे प्रसन्ना भव सुन्दरि
tejassvarūpe parame paramānandarūpiṇi || dvijātīnāṃ jātirūpe prasannā bhava sundari
Sanskrit only: no published translation is held for this verse.
नित्ये नित्यप्रिये देवि नित्यानन्दस्वरूपिणि।। सर्वमंगलरूपेण प्रसन्ना भव सुन्दरि
nitye nityapriye devi nityānandasvarūpiṇi|| sarvamaṃgalarūpeṇa prasannā bhava sundari
Sanskrit only: no published translation is held for this verse.
सर्वस्वरूपे विप्राणां मन्त्रसारे परात्परे ।। सुखदे मोक्षदे देवि प्रसन्ना भव सुन्दरि
sarvasvarūpe viprāṇāṃ mantrasāre parātpare || sukhade mokṣade devi prasannā bhava sundari
Sanskrit only: no published translation is held for this verse.
विप्रपापेन्धदाहाय ज्वलदग्निशिखोपमे ।। ब्रह्मतेजःप्रदे देवि प्रसन्ना भव सुन्दरि
viprapāpendhadāhāya jvaladagniśikhopame || brahmatejaḥprade devi prasannā bhava sundari
Sanskrit only: no published translation is held for this verse.
कायेन मनसा वाचा यत्पापं कुरुते द्विजः ।। तत्ते स्मरणमात्रेण भस्मीभूतं भविष्यति
kāyena manasā vācā yatpāpaṃ kurute dvijaḥ || tatte smaraṇamātreṇa bhasmībhūtaṃ bhaviṣyati
Sanskrit only: no published translation is held for this verse.
अनेन स्तवराजेन संस्तूयाश्वपतिर्नृपः ।। ददर्श तां च सावित्रीं वरं प्राप मनोगतम्
anena stavarājena saṃstūyāśvapatirnṛpaḥ || dadarśa tāṃ ca sāvitrīṃ varaṃ prāpa manogatam
Sanskrit only: no published translation is held for this verse.
स्तवराजमिदं पुण्यं त्रिसन्ध्यायां च यः पठेत् ।। पाठे चतुर्णां वेदानां यत्फलं तल्लभेद् ध्रुवम्
stavarājamidaṃ puṇyaṃ trisandhyāyāṃ ca yaḥ paṭhet || pāṭhe caturṇāṃ vedānāṃ yatphalaṃ tallabhed dhruvam
Sanskrit only: no published translation is held for this verse.
इत्युक्त्वा जगतां धाता तत्र तस्थौ च संसदि ।। सावित्री ब्रह्मणा सार्द्धं ब्रह्मलोकं जगाम सा
ityuktvā jagatāṃ dhātā tatra tasthau ca saṃsadi || sāvitrī brahmaṇā sārddhaṃ brahmalokaṃ jagāma sā
Sanskrit only: no published translation is held for this verse.