Brahmavaivarta Purāṇa 2.32

सावित्र्युवाच ।। धर्मराज महाभाग वेदवेदाङ्गपारग ।। नानापुराणेतिहासपाञ्चरात्रप्रदर्शकः

sāvitryuvāca || dharmarāja mahābhāga vedavedāṅgapāraga || nānāpurāṇetihāsapāñcarātrapradarśakaḥ

Sanskrit only: no published translation is held for this verse.

सर्वेषु सारभूतं यत्सर्वेष्टं सर्वसम्मतम् ।। कर्मच्छेदे बीजरूपं प्रशंस्यं सुखदं नृणाम्

sarveṣu sārabhūtaṃ yatsarveṣṭaṃ sarvasammatam || karmacchede bījarūpaṃ praśaṃsyaṃ sukhadaṃ nṛṇām

Sanskrit only: no published translation is held for this verse.

यशःप्रदं धर्मदं च सर्वमंगलमंगलम् ।। येन यामीं न ते यांति यातनां भवदुःखदाम्

yaśaḥpradaṃ dharmadaṃ ca sarvamaṃgalamaṃgalam || yena yāmīṃ na te yāṃti yātanāṃ bhavaduḥkhadām

Sanskrit only: no published translation is held for this verse.

कुण्डानि च न पश्यन्ति तत्र नैव पतंति च ।। न भवेद्येन जन्मादि तत्कर्म वद सुव्रत

kuṇḍāni ca na paśyanti tatra naiva pataṃti ca || na bhavedyena janmādi tatkarma vada suvrata

Sanskrit only: no published translation is held for this verse.

किमाकाराणि कुण्डानि कानि तेषां मतानि च ।। केन रूपेण तत्रैव सदा तिष्ठंति पापिनः

kimākārāṇi kuṇḍāni kāni teṣāṃ matāni ca || kena rūpeṇa tatraiva sadā tiṣṭhaṃti pāpinaḥ

Sanskrit only: no published translation is held for this verse.

स्वदेहे भस्मसाद्भूते यांति लोकान्तरं नराः ।। केन देहेन वा भोगं भुञ्जते वा शुभाशुभम्

svadehe bhasmasādbhūte yāṃti lokāntaraṃ narāḥ || kena dehena vā bhogaṃ bhuñjate vā śubhāśubham

Sanskrit only: no published translation is held for this verse.

सुचिरं क्लेशभोगेन कथं देहो न नश्यति ।। देहो वा किंविधो ब्रह्मंस्तन्मे व्याख्यातुमर्हसि

suciraṃ kleśabhogena kathaṃ deho na naśyati || deho vā kiṃvidho brahmaṃstanme vyākhyātumarhasi

Sanskrit only: no published translation is held for this verse.

नारायण उवाच ।। सावित्रीवचनं श्रुत्वा धर्मराजो हरिं स्मरन् ।। कथां कथितुमारेभे गुरुं नत्वा च नारद

nārāyaṇa uvāca || sāvitrīvacanaṃ śrutvā dharmarājo hariṃ smaran || kathāṃ kathitumārebhe guruṃ natvā ca nārada

Sanskrit only: no published translation is held for this verse.

यम उवाच ।। वत्से चतुर्षु वेदेषु धर्मो वै संहितासु च ।। पुराणेष्वितिहासेषु पाञ्चरात्रादिकेषु च

yama uvāca || vatse caturṣu vedeṣu dharmo vai saṃhitāsu ca || purāṇeṣvitihāseṣu pāñcarātrādikeṣu ca

Sanskrit only: no published translation is held for this verse.

अन्येषु सर्वशास्त्रेषु वेदांगेषु च सुव्रते ।। सर्वेष्टं सारभूतं च मंगलं कृष्णसेवनम्

anyeṣu sarvaśāstreṣu vedāṃgeṣu ca suvrate || sarveṣṭaṃ sārabhūtaṃ ca maṃgalaṃ kṛṣṇasevanam

Sanskrit only: no published translation is held for this verse.

जन्ममृत्युजरारोगशोकसन्तापतारणम् ।। सर्वमङ्गलरूपं च परमानन्दकारणम्

janmamṛtyujarārogaśokasantāpatāraṇam || sarvamaṅgalarūpaṃ ca paramānandakāraṇam

Sanskrit only: no published translation is held for this verse.

कारणं सर्वसिद्धीनां नरकार्णवतारणम् ।। भक्तिवृक्षांकुरकरं कर्मवृक्षनिकृन्तनम्

kāraṇaṃ sarvasiddhīnāṃ narakārṇavatāraṇam || bhaktivṛkṣāṃkurakaraṃ karmavṛkṣanikṛntanam

Sanskrit only: no published translation is held for this verse.

गोलोकमार्गसोपानमविनाशिपदप्रदम्।। सालोक्यसार्ष्टिसारूप्यसामीप्यादिप्रदं शुभे

golokamārgasopānamavināśipadapradam|| sālokyasārṣṭisārūpyasāmīpyādipradaṃ śubhe

Sanskrit only: no published translation is held for this verse.

कुण्डानि यमदूतं च यमं च यमकिङ्करान् ।। स्वप्नेऽपि नहि पश्यन्ति सति श्रीकृष्णकिङ्कराः

kuṇḍāni yamadūtaṃ ca yamaṃ ca yamakiṅkarān || svapne'pi nahi paśyanti sati śrīkṛṣṇakiṅkarāḥ

Sanskrit only: no published translation is held for this verse.

हरिव्रतं ये कुर्वंति गृहिणः कर्मभोगिनः ।। ये स्नांति हरितीर्थे च नाश्नन्ति हरिवासरे

harivrataṃ ye kurvaṃti gṛhiṇaḥ karmabhoginaḥ || ye snāṃti haritīrthe ca nāśnanti harivāsare

Sanskrit only: no published translation is held for this verse.

प्रणमंति हरिं नित्यं हर्य्यर्चां पूजयन्ति च ।। न यान्ति ते च घोरां च मम संयमनीं पुरीम्

praṇamaṃti hariṃ nityaṃ haryyarcāṃ pūjayanti ca || na yānti te ca ghorāṃ ca mama saṃyamanīṃ purīm

Sanskrit only: no published translation is held for this verse.

त्रिसन्ध्यपूता विप्राश्च शुद्धाचारसमन्विताः ।। स्वधर्मनिरताः शान्ता न यान्ति यममन्दिरम्

trisandhyapūtā viprāśca śuddhācārasamanvitāḥ || svadharmaniratāḥ śāntā na yānti yamamandiram

Sanskrit only: no published translation is held for this verse.

ते स्वर्गभोगिनोऽन्ये च शुद्धा देवान्यकिंकराः ।। यान्त्यायान्ति च मर्त्यं च स्वर्गं च नहि निर्वृताः ।। निवृत्तिं न हि लिप्सन्ति कृष्णसेवां विना नराः

te svargabhogino'nye ca śuddhā devānyakiṃkarāḥ || yāntyāyānti ca martyaṃ ca svargaṃ ca nahi nirvṛtāḥ || nivṛttiṃ na hi lipsanti kṛṣṇasevāṃ vinā narāḥ

Sanskrit only: no published translation is held for this verse.

स्वधर्म्मनिरताश्चापि स्वधर्मविरतास्तथा ।। गच्छन्तो मर्त्यलोकं च दुर्द्धर्षा यमकिङ्कराः

svadharmmaniratāścāpi svadharmaviratāstathā || gacchanto martyalokaṃ ca durddharṣā yamakiṅkarāḥ

Sanskrit only: no published translation is held for this verse.

भीताः कृष्णोपासकाच्च वैनतेयादिवोरगाः ।। स्वदूतं पाशहस्तं च गच्छन्तं तं वदाम्यहम्

bhītāḥ kṛṣṇopāsakācca vainateyādivoragāḥ || svadūtaṃ pāśahastaṃ ca gacchantaṃ taṃ vadāmyaham

Sanskrit only: no published translation is held for this verse.

यास्यसीति च सर्वत्र हरिभक्ताश्रमं विना ।। कृष्णमन्त्रोपासकानां नामानि च निकृन्तनम्

yāsyasīti ca sarvatra haribhaktāśramaṃ vinā || kṛṣṇamantropāsakānāṃ nāmāni ca nikṛntanam

Sanskrit only: no published translation is held for this verse.

करोति नखराञ्जल्या चित्रगुप्तश्च भीतवत् ।। मधुपर्कादिकं ब्रह्मा तेषां च कुरुते पुनः

karoti nakharāñjalyā citraguptaśca bhītavat || madhuparkādikaṃ brahmā teṣāṃ ca kurute punaḥ

Sanskrit only: no published translation is held for this verse.

विलंघ्य ब्रह्मलोकं च गोलोके गच्छतां सताम् ।। दुरितानि च नश्यन्ति तेषां संस्पर्शमात्रतः

vilaṃghya brahmalokaṃ ca goloke gacchatāṃ satām || duritāni ca naśyanti teṣāṃ saṃsparśamātrataḥ

Sanskrit only: no published translation is held for this verse.

यथा सुप्रज्वलद्वह्नौ काष्ठानि च तृणानि च ।। प्राप्नोति मोहः संमोहं तांश्च दृष्ट्वाऽतिभीतवत्

yathā suprajvaladvahnau kāṣṭhāni ca tṛṇāni ca || prāpnoti mohaḥ saṃmohaṃ tāṃśca dṛṣṭvā'tibhītavat

Sanskrit only: no published translation is held for this verse.

कामश्च कामिनं याति लोभ क्रोधौ ततः सति ।। मृत्युः पलायते रोगो जरा शोको भयं तथा

kāmaśca kāminaṃ yāti lobha krodhau tataḥ sati || mṛtyuḥ palāyate rogo jarā śoko bhayaṃ tathā

Sanskrit only: no published translation is held for this verse.

कालः शुभाशुभं कर्म्म हर्षो भोगस्तथैव च ।। ये ये न यान्ति यामीं च कथितास्ते मया सति

kālaḥ śubhāśubhaṃ karmma harṣo bhogastathaiva ca || ye ye na yānti yāmīṃ ca kathitāste mayā sati

Sanskrit only: no published translation is held for this verse.

शृणु देहस्य विवृतिं कथयामि यथागमम् ।। पृथिवी वायुराकाशं तेजस्तोयमिति स्फुटम्

śṛṇu dehasya vivṛtiṃ kathayāmi yathāgamam || pṛthivī vāyurākāśaṃ tejastoyamiti sphuṭam

Sanskrit only: no published translation is held for this verse.

देहिनां देहबीजं च स्रष्टुः सृष्टिविधौ परम् ।। पृथ्व्यादिपञ्चभूतैश्च यो देहो निर्मितो भवेत्

dehināṃ dehabījaṃ ca sraṣṭuḥ sṛṣṭividhau param || pṛthvyādipañcabhūtaiśca yo deho nirmito bhavet

Sanskrit only: no published translation is held for this verse.

स कृत्रिमो नश्वरश्च भस्मसाच्च भवेदिह ।। वृद्धाङ्गुष्ठप्रमाणेन यो जीवः पुरुषाकृतिः

sa kṛtrimo naśvaraśca bhasmasācca bhavediha || vṛddhāṅguṣṭhapramāṇena yo jīvaḥ puruṣākṛtiḥ

Sanskrit only: no published translation is held for this verse.

बिभर्ति सूक्ष्मदेहं च तद्रूपं भोगहेतवे ।। स देहो न भवेद्भस्म ज्वलदग्नौ ममालये

bibharti sūkṣmadehaṃ ca tadrūpaṃ bhogahetave || sa deho na bhavedbhasma jvaladagnau mamālaye

Sanskrit only: no published translation is held for this verse.

जलेन नष्टो देहो वा प्रहारे सुचिरं कृते ।। न शस्त्रे च न चास्त्रे च सुतीक्ष्णे कण्टके तथा

jalena naṣṭo deho vā prahāre suciraṃ kṛte || na śastre ca na cāstre ca sutīkṣṇe kaṇṭake tathā

Sanskrit only: no published translation is held for this verse.

तप्तद्रवे तप्तलौहे तप्तपाषाण एव च ।। प्रतप्तप्रतिमाश्लेषेऽप्यत्यूर्ध्वनेऽपि च ।।

taptadrave taptalauhe taptapāṣāṇa eva ca || prataptapratimāśleṣe'pyatyūrdhvane'pi ca ||

Sanskrit only: no published translation is held for this verse.

न च दग्धो न भग्नश्च भुंक्ते संतापमेव च ।। कथितं देवि वृत्तान्तं कारणं च यथागमम् ।। कुण्डानां लक्षणं सर्वं निबोध कथयामि ते ।।

na ca dagdho na bhagnaśca bhuṃkte saṃtāpameva ca || kathitaṃ devi vṛttāntaṃ kāraṇaṃ ca yathāgamam || kuṇḍānāṃ lakṣaṇaṃ sarvaṃ nibodha kathayāmi te ||

Sanskrit only: no published translation is held for this verse.