Brahmavaivarta Purāṇa 2.65

नारद उवाच ।। श्रुतं सर्वं महाभाग सुधारसपरं वरम् ।। स्तोत्रं च कवचं पूजाफलं कालं वद प्रभो

nārada uvāca || śrutaṃ sarvaṃ mahābhāga sudhārasaparaṃ varam || stotraṃ ca kavacaṃ pūjāphalaṃ kālaṃ vada prabho

Sanskrit only: no published translation is held for this verse.

नारायण उवाच ।। आर्द्रायां बोधयेद्देवीं मूलेनैव प्रवेशयेत् ।। उत्तरेणार्च्चयित्वा तां श्रवणायां विसर्जयेत्

nārāyaṇa uvāca || ārdrāyāṃ bodhayeddevīṃ mūlenaiva praveśayet || uttareṇārccayitvā tāṃ śravaṇāyāṃ visarjayet

Sanskrit only: no published translation is held for this verse.

आर्द्रायुक्तनवम्यां तु कृत्वा देव्याश्च बोधनम् ।। पूजायाः शतवार्षिक्याः फलमाप्नोति मानवः

ārdrāyuktanavamyāṃ tu kṛtvā devyāśca bodhanam || pūjāyāḥ śatavārṣikyāḥ phalamāpnoti mānavaḥ

Sanskrit only: no published translation is held for this verse.

मूलायां तु प्रवेशे च नरमेधफलं लभेत्

mūlāyāṃ tu praveśe ca naramedhaphalaṃ labhet

Sanskrit only: no published translation is held for this verse.

कृत्वा विसर्जनं देव्याः श्रवणायां च मानवः।। लक्ष्मीं च पुत्रपौत्रांश्च लभते नात्र संशयः

kṛtvā visarjanaṃ devyāḥ śravaṇāyāṃ ca mānavaḥ|| lakṣmīṃ ca putrapautrāṃśca labhate nātra saṃśayaḥ

Sanskrit only: no published translation is held for this verse.

भुवः प्रदक्षिणं पुण्यं पूजायां लभते नरः ।। नक्षत्रयोगाभावे तु पार्वत्याश्चैव नारद

bhuvaḥ pradakṣiṇaṃ puṇyaṃ pūjāyāṃ labhate naraḥ || nakṣatrayogābhāve tu pārvatyāścaiva nārada

Sanskrit only: no published translation is held for this verse.

नवम्यां बोधनं कृत्वा पक्षं संपूज्य मानवः।। अश्वमेधफलावाप्त्यै दशम्यां च विसर्जयेत्

navamyāṃ bodhanaṃ kṛtvā pakṣaṃ saṃpūjya mānavaḥ|| aśvamedhaphalāvāptyai daśamyāṃ ca visarjayet

Sanskrit only: no published translation is held for this verse.

सप्तम्यां पूजनं कृत्वा बलिं दद्याद्विचक्षणः ।। अष्टम्यां पूजनं शस्तं बलिदानविवर्जितम्

saptamyāṃ pūjanaṃ kṛtvā baliṃ dadyādvicakṣaṇaḥ || aṣṭamyāṃ pūjanaṃ śastaṃ balidānavivarjitam

Sanskrit only: no published translation is held for this verse.

अष्टम्यां बलिदानेन विपत्तिर्जायते नृणाम् ।। दद्याद्विचक्षणो भक्त्या नवम्यां विधिवद्बलिम्

aṣṭamyāṃ balidānena vipattirjāyate nṛṇām || dadyādvicakṣaṇo bhaktyā navamyāṃ vidhivadbalim

Sanskrit only: no published translation is held for this verse.

बलिदानेन विप्रेन्द्र दुर्गाप्रीतिर्भवेन्नृणाम्।। हिंसाजन्यं न पापं च लभते यज्ञकर्मणि

balidānena viprendra durgāprītirbhavennṛṇām|| hiṃsājanyaṃ na pāpaṃ ca labhate yajñakarmaṇi

Sanskrit only: no published translation is held for this verse.

उत्सर्गकर्त्ता दाता च च्छेत्ता पोष्टा च रक्षकः ।। अग्रे पश्चान्निबद्धा च सप्तैतेऽवधकारिणः

utsargakarttā dātā ca cchettā poṣṭā ca rakṣakaḥ || agre paścānnibaddhā ca saptaite'vadhakāriṇaḥ

Sanskrit only: no published translation is held for this verse.

यो यं हन्ति स तं हन्ति नेति वेदोक्तमेव च ।। कुर्वन्ति वैष्णवीं पूजां वैष्णवास्तेन हेतुना

yo yaṃ hanti sa taṃ hanti neti vedoktameva ca || kurvanti vaiṣṇavīṃ pūjāṃ vaiṣṇavāstena hetunā

Sanskrit only: no published translation is held for this verse.

एवं संपूज्य सुरथः पूर्णं वर्षं च भक्तितः ।। कवचं च गले बद्ध्वा तुष्टाव परमेश्वरीम्

evaṃ saṃpūjya surathaḥ pūrṇaṃ varṣaṃ ca bhaktitaḥ || kavacaṃ ca gale baddhvā tuṣṭāva parameśvarīm

Sanskrit only: no published translation is held for this verse.

स्तोत्रेण परितुष्टा सा तस्य साक्षाद्बभूव ह ।। स ददर्श पुरो देवीं ग्रीष्मसूर्य्यसमप्रभाम्

stotreṇa parituṣṭā sā tasya sākṣādbabhūva ha || sa dadarśa puro devīṃ grīṣmasūryyasamaprabhām

Sanskrit only: no published translation is held for this verse.

तेजस्वरूपां परमां सगुणां निर्गुणां वराम् ।। दृष्ट्वा तां कमनीयां च तेजोमण्डलमध्यतः

tejasvarūpāṃ paramāṃ saguṇāṃ nirguṇāṃ varām || dṛṣṭvā tāṃ kamanīyāṃ ca tejomaṇḍalamadhyataḥ

Sanskrit only: no published translation is held for this verse.

स्वेच्छामयीं कृपारूपां भक्तानुग्रहकारिणीम् ।। पुनस्तुष्टाव राजेन्द्रो भक्तिनम्रात्मकन्धरः

svecchāmayīṃ kṛpārūpāṃ bhaktānugrahakāriṇīm || punastuṣṭāva rājendro bhaktinamrātmakandharaḥ

Sanskrit only: no published translation is held for this verse.

स्तवेन परितुष्टा सा सस्मिता भक्तिपूर्वकम् ।। उवाच सत्यं राजेन्द्रं कृपया जगदम्बिका

stavena parituṣṭā sā sasmitā bhaktipūrvakam || uvāca satyaṃ rājendraṃ kṛpayā jagadambikā

Sanskrit only: no published translation is held for this verse.

प्रकृतिरुवाच ।। साक्षात्संप्राप्य मां राजन्वृणोषि विभवं वरम् ।। ददामि तुभ्यं विभवं साम्प्रतं वाञ्छितं तव

prakṛtiruvāca || sākṣātsaṃprāpya māṃ rājanvṛṇoṣi vibhavaṃ varam || dadāmi tubhyaṃ vibhavaṃ sāmprataṃ vāñchitaṃ tava

Sanskrit only: no published translation is held for this verse.

निर्जित्य सर्वाञ्छत्रूंश्च लब्ध्वा राज्यमकण्टकम् ।। भविष्यसि महाराज सावर्णिर्मनुरष्टमः

nirjitya sarvāñchatrūṃśca labdhvā rājyamakaṇṭakam || bhaviṣyasi mahārāja sāvarṇirmanuraṣṭamaḥ

Sanskrit only: no published translation is held for this verse.

दास्यामि तुभ्यं ज्ञानं च परिणामे नराधिप ।। भक्तिं दास्यं च परमे श्रीकृष्णे परमात्मनि

dāsyāmi tubhyaṃ jñānaṃ ca pariṇāme narādhipa || bhaktiṃ dāsyaṃ ca parame śrīkṛṣṇe paramātmani

Sanskrit only: no published translation is held for this verse.

वृणोति विभवं यो हि साक्षान्मां प्राप्य मन्दधीः ।। मायया वञ्चितः सोऽपि विषमत्त्यमृतं त्यजेत्

vṛṇoti vibhavaṃ yo hi sākṣānmāṃ prāpya mandadhīḥ || māyayā vañcitaḥ so'pi viṣamattyamṛtaṃ tyajet

Sanskrit only: no published translation is held for this verse.

ब्रह्मादिस्तम्बपर्यन्तं सर्वं नश्वरमेव च ।। नित्यं सत्यं परं ब्रह्म कृष्णं निर्गुणमेव च

brahmādistambaparyantaṃ sarvaṃ naśvarameva ca || nityaṃ satyaṃ paraṃ brahma kṛṣṇaṃ nirguṇameva ca

Sanskrit only: no published translation is held for this verse.

ब्रह्मविष्णुशिवादीनामहमाद्या परात्परा ।। सगुणा निर्गुणा चापि वरा स्वेच्छामयी सदा

brahmaviṣṇuśivādīnāmahamādyā parātparā || saguṇā nirguṇā cāpi varā svecchāmayī sadā

Sanskrit only: no published translation is held for this verse.

नित्या ऽनित्या सर्वरूपा सर्वकारणकारणम् ।। बीजरूपा च सर्वेषां मूलप्रकृतिरीश्वरी

nityā 'nityā sarvarūpā sarvakāraṇakāraṇam || bījarūpā ca sarveṣāṃ mūlaprakṛtirīśvarī

Sanskrit only: no published translation is held for this verse.

पुण्ये वृन्दावने रम्ये गोलोके रासमण्डले।। राधा प्राणाधिकाऽहं च कृष्णस्य परमात्मनः

puṇye vṛndāvane ramye goloke rāsamaṇḍale|| rādhā prāṇādhikā'haṃ ca kṛṣṇasya paramātmanaḥ

Sanskrit only: no published translation is held for this verse.

सावित्री वेदमाताऽहं ब्रह्माणी ब्रह्मलोकतः ।। अहं गङ्गा च तुलसी सर्वाधारा वसुन्धरा

sāvitrī vedamātā'haṃ brahmāṇī brahmalokataḥ || ahaṃ gaṅgā ca tulasī sarvādhārā vasundharā

Sanskrit only: no published translation is held for this verse.

नानाविधाऽहं कलया मायया सर्वयोषितः ।। साऽहं कृष्णेन संसृष्टा नृप भ्रूभंगलीलया

nānāvidhā'haṃ kalayā māyayā sarvayoṣitaḥ || sā'haṃ kṛṣṇena saṃsṛṣṭā nṛpa bhrūbhaṃgalīlayā

Sanskrit only: no published translation is held for this verse.

भ्रूभंगलीलया सृष्टो येन पुंसा महान्विराट्।। लोम्नां कूपेषु विश्वानि यस्य सन्ति हि नित्यशः

bhrūbhaṃgalīlayā sṛṣṭo yena puṃsā mahānvirāṭ|| lomnāṃ kūpeṣu viśvāni yasya santi hi nityaśaḥ

Sanskrit only: no published translation is held for this verse.

असंख्यानि च तान्येव कृत्रिमाणि च मायया ।। अनित्ये नित्यबुद्धिं च सर्वे कुर्वन्ति सन्ततम्

asaṃkhyāni ca tānyeva kṛtrimāṇi ca māyayā || anitye nityabuddhiṃ ca sarve kurvanti santatam

Sanskrit only: no published translation is held for this verse.

सप्तसागरसंयुक्ता सप्तद्वीपा वसुन्धरा ।। तदधः सप्त पातालाः स्वर्लोकाश्चैव सप्त च

saptasāgarasaṃyuktā saptadvīpā vasundharā || tadadhaḥ sapta pātālāḥ svarlokāścaiva sapta ca

Sanskrit only: no published translation is held for this verse.

एवं विश्वं बहुविधं ब्रह्माण्डं ब्रह्मणा कृतम् ।। प्रत्येकं सर्वविध्यण्डे ब्रह्मविष्णुशिवादयः

evaṃ viśvaṃ bahuvidhaṃ brahmāṇḍaṃ brahmaṇā kṛtam || pratyekaṃ sarvavidhyaṇḍe brahmaviṣṇuśivādayaḥ

Sanskrit only: no published translation is held for this verse.

सर्वेषामीश्वरः कृष्ण इति ज्ञानं परात्परम् ।। वेदानां च व्रतानां च तीर्थानां तपसां तथा

sarveṣāmīśvaraḥ kṛṣṇa iti jñānaṃ parātparam || vedānāṃ ca vratānāṃ ca tīrthānāṃ tapasāṃ tathā

Sanskrit only: no published translation is held for this verse.

देवानां चैव सर्वेषां सारः कृष्ण इति स्मृतः ।। तद्भक्तिहीनो यो मूढः स च जीवन्मृतो धुवम्

devānāṃ caiva sarveṣāṃ sāraḥ kṛṣṇa iti smṛtaḥ || tadbhaktihīno yo mūḍhaḥ sa ca jīvanmṛto dhuvam

Sanskrit only: no published translation is held for this verse.

मन्त्रग्रहणमात्रेण नरो नारायणो भवेत् ।। विना जपेन तपसा विना तीर्थेन पूजया

mantragrahaṇamātreṇa naro nārāyaṇo bhavet || vinā japena tapasā vinā tīrthena pūjayā

Sanskrit only: no published translation is held for this verse.

मातामहानां शतकं पितॄणां च सहस्रकम् ।। पुंसामेवं समुद्धृत्य गोलोकं च स गच्छति

mātāmahānāṃ śatakaṃ pitṝṇāṃ ca sahasrakam || puṃsāmevaṃ samuddhṛtya golokaṃ ca sa gacchati

Sanskrit only: no published translation is held for this verse.

इदं ज्ञानं सारभूतं कथितं ते नराधिप ।। मन्वन्तरान्ते भोगान्ते भक्तिं दास्यामि ते हरौ

idaṃ jñānaṃ sārabhūtaṃ kathitaṃ te narādhipa || manvantarānte bhogānte bhaktiṃ dāsyāmi te harau

Sanskrit only: no published translation is held for this verse.

पवित्राणि च तीर्थानि तद्भक्तस्पर्शवायुना ।। तन्मन्त्रोपासकश्चैव जीवन्मुक्त इति स्मृतः

pavitrāṇi ca tīrthāni tadbhaktasparśavāyunā || tanmantropāsakaścaiva jīvanmukta iti smṛtaḥ

Sanskrit only: no published translation is held for this verse.

अहं यमनुगृह्णामि तस्मै दास्यामि निर्मलाम् ।। निश्चलां सुदृढां भक्तिं श्रीकृष्णे परमात्मनि

ahaṃ yamanugṛhṇāmi tasmai dāsyāmi nirmalām || niścalāṃ sudṛḍhāṃ bhaktiṃ śrīkṛṣṇe paramātmani

Sanskrit only: no published translation is held for this verse.

करोमि वञ्चनां यं यं तेभ्यो दास्यामि सम्पदम् ।। प्रातः स्वप्नस्वरूपां च मिथ्येति भ्रमरूपिणीम्

karomi vañcanāṃ yaṃ yaṃ tebhyo dāsyāmi sampadam || prātaḥ svapnasvarūpāṃ ca mithyeti bhramarūpiṇīm

Sanskrit only: no published translation is held for this verse.

इति ते कथितं ज्ञानं गच्छ वत्स यथासुखम्।। इत्युक्त्वा च महादेवी तत्रैवान्तरधीयत

iti te kathitaṃ jñānaṃ gaccha vatsa yathāsukham|| ityuktvā ca mahādevī tatraivāntaradhīyata

Sanskrit only: no published translation is held for this verse.

राजा संप्राप्य राज्यं च नत्वा तां प्रययौ गृहम् ।। इति ते कथितं वत्स दुर्गोपाख्यानमुत्तमम्

rājā saṃprāpya rājyaṃ ca natvā tāṃ prayayau gṛham || iti te kathitaṃ vatsa durgopākhyānamuttamam

Sanskrit only: no published translation is held for this verse.