Brahmavaivarta Purāṇa 2.67

नारद उवाच।। भगवन्सर्वधर्मज्ञ सर्वज्ञानविशारद ।। ब्रह्माण्डमोहनं नाम प्रकृतेः कवचं वद

nārada uvāca|| bhagavansarvadharmajña sarvajñānaviśārada || brahmāṇḍamohanaṃ nāma prakṛteḥ kavacaṃ vada

Sanskrit only: no published translation is held for this verse.

नारायण उवाच ।। शृणु वक्ष्यामि हे वत्स कवचं च सुदुर्लभम् ।। श्रीकृष्णेनैव कथितं कृपया ब्रह्मणे पुरा

nārāyaṇa uvāca || śṛṇu vakṣyāmi he vatsa kavacaṃ ca sudurlabham || śrīkṛṣṇenaiva kathitaṃ kṛpayā brahmaṇe purā

Sanskrit only: no published translation is held for this verse.

ब्रह्मणा कथितं सर्वं धर्मार्थं जाह्नवीतटे ।। धर्मेण दत्तं मह्यं च कृपया पुष्करे प्रभुः

brahmaṇā kathitaṃ sarvaṃ dharmārthaṃ jāhnavītaṭe || dharmeṇa dattaṃ mahyaṃ ca kṛpayā puṣkare prabhuḥ

Sanskrit only: no published translation is held for this verse.

त्रिपुरारिश्च यद्धृत्वा जघान त्रिपुरं पुरा ।। मुमोच धाता यद्धृत्वा मधुकैटभयोर्भयम् ।। जघान रक्तबीजं तं यत्कृत्वा भद्रकालिका

tripurāriśca yaddhṛtvā jaghāna tripuraṃ purā || mumoca dhātā yaddhṛtvā madhukaiṭabhayorbhayam || jaghāna raktabījaṃ taṃ yatkṛtvā bhadrakālikā

Sanskrit only: no published translation is held for this verse.

यद्धृत्वा तु महेन्द्रश्च संप्राप कमलालयाम् ।। यद्धृत्वा च महाकालश्चिरजीवी च धार्मिकः ।।

yaddhṛtvā tu mahendraśca saṃprāpa kamalālayām || yaddhṛtvā ca mahākālaścirajīvī ca dhārmikaḥ ||

Sanskrit only: no published translation is held for this verse.

यद्धृत्वा च महाज्ञानी नन्दी सानन्दपूर्वकम् ।। यद्धृत्वा च महायोद्धा रामः शत्रुभयङ्करः

yaddhṛtvā ca mahājñānī nandī sānandapūrvakam || yaddhṛtvā ca mahāyoddhā rāmaḥ śatrubhayaṅkaraḥ

Sanskrit only: no published translation is held for this verse.

यद्धृत्वा शिवतुल्यश्च दुर्वासा ज्ञानिनां वरः ।। ॐ दुर्गेति चतुर्थ्यन्तं स्वाहान्तो मे शिरोऽवतु

yaddhṛtvā śivatulyaśca durvāsā jñānināṃ varaḥ || oṃ durgeti caturthyantaṃ svāhānto me śiro'vatu

Sanskrit only: no published translation is held for this verse.

मन्त्रः षडक्षरोऽयं च भक्तानां कल्पपादपः ।। विचारो नास्ति वेदेषु ग्रहणे च मनोर्मुने

mantraḥ ṣaḍakṣaro'yaṃ ca bhaktānāṃ kalpapādapaḥ || vicāro nāsti vedeṣu grahaṇe ca manormune

Sanskrit only: no published translation is held for this verse.

मन्त्रग्रहणमात्रेण विष्णुतुल्यो भवेन्नरः ।। मम वक्त्रं सदा पातु चों दुर्गायै नमोऽन्ततः।।

mantragrahaṇamātreṇa viṣṇutulyo bhavennaraḥ || mama vaktraṃ sadā pātu coṃ durgāyai namo'ntataḥ||

Sanskrit only: no published translation is held for this verse.

ॐ दुर्गे रक्षयति च कण्ठं पातु सदा मम ।। ॐ ह्रीं श्रीमिति मन्त्रोऽयं स्कन्धं पातु निरन्तरम्

oṃ durge rakṣayati ca kaṇṭhaṃ pātu sadā mama || oṃ hrīṃ śrīmiti mantro'yaṃ skandhaṃ pātu nirantaram

Sanskrit only: no published translation is held for this verse.

ॐ ह्रीं श्रीं क्लीमिति पृष्ठं च पातु मे सर्वतः सदा ।। ह्रीं मे वक्षःस्थलं पातु हस्तं श्रीमिति सन्ततम्

oṃ hrīṃ śrīṃ klīmiti pṛṣṭhaṃ ca pātu me sarvataḥ sadā || hrīṃ me vakṣaḥsthalaṃ pātu hastaṃ śrīmiti santatam

Sanskrit only: no published translation is held for this verse.

ॐ श्रीं ह्रीं क्लीं पातु सर्वाङ्गं स्वप्ने जागरणे तथा ।। प्राचं मां प्रकृतिः पातु पातु वह्नौ च चण्डिका

oṃ śrīṃ hrīṃ klīṃ pātu sarvāṅgaṃ svapne jāgaraṇe tathā || prācaṃ māṃ prakṛtiḥ pātu pātu vahnau ca caṇḍikā

Sanskrit only: no published translation is held for this verse.

दक्षिणे भद्रकाली च नैर्ऋत्यां च महेश्वरी ।। वारुण्यां पातु वाराही वायव्यां सर्वमङ्गला

dakṣiṇe bhadrakālī ca nairṛtyāṃ ca maheśvarī || vāruṇyāṃ pātu vārāhī vāyavyāṃ sarvamaṅgalā

Sanskrit only: no published translation is held for this verse.

उत्तरे वैष्णवी पातु तथैशान्यां शिवप्रिया ।। जले स्थले चान्तरिक्षे पातु मां जगदम्बिका

uttare vaiṣṇavī pātu tathaiśānyāṃ śivapriyā || jale sthale cāntarikṣe pātu māṃ jagadambikā

Sanskrit only: no published translation is held for this verse.

इति ते कथितं वत्स कवचं च सुदुर्लभम् ।। यस्मै कस्मै न दातव्यं प्रवक्तव्यं न कस्यचित्

iti te kathitaṃ vatsa kavacaṃ ca sudurlabham || yasmai kasmai na dātavyaṃ pravaktavyaṃ na kasyacit

Sanskrit only: no published translation is held for this verse.

गुरुमभ्यर्च्य विधिवद्वस्त्रालंकारचन्दनैः ।। कवचं धारयेद्यस्तु सोऽपि विष्णुर्न संशयः

gurumabhyarcya vidhivadvastrālaṃkāracandanaiḥ || kavacaṃ dhārayedyastu so'pi viṣṇurna saṃśayaḥ

Sanskrit only: no published translation is held for this verse.

भ्रमणे सर्वतीर्थानां पृथिव्याश्च प्रदक्षिणे ।। यत्फलं लभते लोकस्तदेतद्धारणान्मुने

bhramaṇe sarvatīrthānāṃ pṛthivyāśca pradakṣiṇe || yatphalaṃ labhate lokastadetaddhāraṇānmune

Sanskrit only: no published translation is held for this verse.

पञ्चलक्षजपेनैव सिद्धमेतद्भवेद्ध्रुवम् ।। लोके च सिद्धकवचं नास्त्रं विध्यति संकटे

pañcalakṣajapenaiva siddhametadbhaveddhruvam || loke ca siddhakavacaṃ nāstraṃ vidhyati saṃkaṭe

Sanskrit only: no published translation is held for this verse.

न तस्य मृत्युर्भवति जले वह्नौ विशेद्ध्रुवम् ।। जीवन्मुक्तो भवेत्सोऽपि सर्वसिद्धेश्वरः स्वयम्

na tasya mṛtyurbhavati jale vahnau viśeddhruvam || jīvanmukto bhavetso'pi sarvasiddheśvaraḥ svayam

Sanskrit only: no published translation is held for this verse.

यदि स्यात्सिद्धकवचो विष्णुतुल्यो भवेद्ध्रुवम् ।। कथितं प्रकृतेः खण्डं सुधाखण्डात्परं मुने

yadi syātsiddhakavaco viṣṇutulyo bhaveddhruvam || kathitaṃ prakṛteḥ khaṇḍaṃ sudhākhaṇḍātparaṃ mune

Sanskrit only: no published translation is held for this verse.

या चैव मूलप्रकृतिर्यस्याः पुत्रो गणेश्वरः ।। कृत्वा कृष्णव्रतं सा च लेभे गणपतिं सुतम्

yā caiva mūlaprakṛtiryasyāḥ putro gaṇeśvaraḥ || kṛtvā kṛṣṇavrataṃ sā ca lebhe gaṇapatiṃ sutam

Sanskrit only: no published translation is held for this verse.

स्वांशेन कृष्णो भगवान्बभूव च गणेश्वरः ।। श्रुत्वा च प्रकृतेः खण्डं सुश्राव्यं च सुधोपमम्

svāṃśena kṛṣṇo bhagavānbabhūva ca gaṇeśvaraḥ || śrutvā ca prakṛteḥ khaṇḍaṃ suśrāvyaṃ ca sudhopamam

Sanskrit only: no published translation is held for this verse.

भोजयित्वा च दध्यन्नं तस्मै दद्याच्च काञ्चनम् ।। सवत्सां सुरभिं रम्यां दद्याद्वै भक्तिपूर्वकम्

bhojayitvā ca dadhyannaṃ tasmai dadyācca kāñcanam || savatsāṃ surabhiṃ ramyāṃ dadyādvai bhaktipūrvakam

Sanskrit only: no published translation is held for this verse.

वासोऽलंकाररत्नैश्च तोषयेद्वाचकं मुने ।। पुष्पालंकारवसनैरुपहारगणैस्तथा

vāso'laṃkāraratnaiśca toṣayedvācakaṃ mune || puṣpālaṃkāravasanairupahāragaṇaistathā

Sanskrit only: no published translation is held for this verse.

पुस्तकं पूजयेदेवं भक्तिश्रद्धासमन्वितः ।। एवं कृत्वा यः शृणोति तस्य विष्णुः प्रसीदति

pustakaṃ pūjayedevaṃ bhaktiśraddhāsamanvitaḥ || evaṃ kṛtvā yaḥ śṛṇoti tasya viṣṇuḥ prasīdati

Sanskrit only: no published translation is held for this verse.

वर्द्धते पुत्रपौत्रादिर्यशस्वी तत्प्रसादतः ।। लक्ष्मीर्वसति तद्गेहे ह्यन्ते गोलोकमाप्नुयात् ।। लभेत्कृष्णस्य दास्यं स भक्तिं कृष्णे सुनिश्चलाम्

varddhate putrapautrādiryaśasvī tatprasādataḥ || lakṣmīrvasati tadgehe hyante golokamāpnuyāt || labhetkṛṣṇasya dāsyaṃ sa bhaktiṃ kṛṣṇe suniścalām

Sanskrit only: no published translation is held for this verse.

इति श्रीब्रह्मवैवर्त्ते महापुराणे प्रकृतिखण्डे नारदनारायणसंवादे दुर्गोपाख्याने ब्रह्माण्डमोहनकवचं नाम सप्तषष्टितमोऽध्यायः

iti śrībrahmavaivartte mahāpurāṇe prakṛtikhaṇḍe nāradanārāyaṇasaṃvāde durgopākhyāne brahmāṇḍamohanakavacaṃ nāma saptaṣaṣṭitamo'dhyāyaḥ

Sanskrit only: no published translation is held for this verse.