अथातो यज्जःपुरुषीयमध्यायं व्याख्यास्यामः
athāto yajjaḥpuruṣīyamadhyāyaṃ vyākhyāsyāmaḥ
Sanskrit only: no published translation is held for this verse.
Library·Caraka-saṃhitā (the text alone)·1·1.25
Caraka-saṃhitā (the text alone) 1.25
इति ह स्माह भगवानात्रेयः
iti ha smāha bhagavānātreyaḥ
Sanskrit only: no published translation is held for this verse.
पुरा प्रत्यक्षधर्माणां भगवन्तं पुनर्वसुम् समेतानां महर्षीणां प्रादुरासीदियं कथा
purā pratyakṣadharmāṇāṃ bhagavantaṃ punarvasum sametānāṃ maharṣīṇāṃ prādurāsīdiyaṃ kathā
Sanskrit only: no published translation is held for this verse.
आत्मेन्द्रियमनोऽर्थानां यो ऽयं पुरुषसंज्ञकः राशिरस्यामयानां च प्रागुत्पत्तिविनिश्चये
ātmendriyamano'rthānāṃ yo 'yaṃ puruṣasaṃjñakaḥ rāśirasyāmayānāṃ ca prāgutpattiviniścaye
Sanskrit only: no published translation is held for this verse.
तदन्तरं काशिपतिर्वामको वाक्यमर्थवित् व्याजहारर्षिसमितिमुपसृत्याभिवाद्य च
tadantaraṃ kāśipatirvāmako vākyamarthavit vyājahārarṣisamitimupasṛtyābhivādya ca
Sanskrit only: no published translation is held for this verse.
किंनु भोः पुरुषो यज्जस्तज्जास्तस्यामयाः स्मृताः न वेत्युक्ते नरेन्द्रेण प्रोवाचर्षीन् पुनर्वसुः
kiṃnu bhoḥ puruṣo yajjastajjāstasyāmayāḥ smṛtāḥ na vetyukte narendreṇa provācarṣīn punarvasuḥ
Sanskrit only: no published translation is held for this verse.
सर्व एवामितज्ञानविज्ञानच्छिन्नसंशयाः भवन्तश्छेत्तुम् अर्हन्ति काशिराजस्य संशयम्
sarva evāmitajñānavijñānacchinnasaṃśayāḥ bhavantaśchettum arhanti kāśirājasya saṃśayam
Sanskrit only: no published translation is held for this verse.
पारीक्षिस् तत् परीक्ष्याग्रे मौद्गल्यो वाक्यमब्रवीत् आत्मजः पुरुषो रोगाश्चात्मजाः कारणं हि सः
pārīkṣis tat parīkṣyāgre maudgalyo vākyamabravīt ātmajaḥ puruṣo rogāścātmajāḥ kāraṇaṃ hi saḥ
Sanskrit only: no published translation is held for this verse.
स चिनोत्युपभुङ्क्ते च कर्म कर्मफलानि च नह्यृते चेतनाधातोः प्रवृत्तिः सुखदुःखयोः
sa cinotyupabhuṅkte ca karma karmaphalāni ca nahyṛte cetanādhātoḥ pravṛttiḥ sukhaduḥkhayoḥ
Sanskrit only: no published translation is held for this verse.
शरलोमा तु नेत्याह न ह्यात्मात्मानमात्मना योजयेद्व्याधिभिर्दुःखैर्दुःखद्वेषी कदाचन
śaralomā tu netyāha na hyātmātmānamātmanā yojayedvyādhibhirduḥkhairduḥkhadveṣī kadācana
Sanskrit only: no published translation is held for this verse.
रजस्तमोभ्यां तु मनः परीतं सत्त्वसंज्ञकम् शरीरस्य समुत्पत्तौ विकाराणां च कारणम्
rajastamobhyāṃ tu manaḥ parītaṃ sattvasaṃjñakam śarīrasya samutpattau vikārāṇāṃ ca kāraṇam
Sanskrit only: no published translation is held for this verse.
वार्योविदस्तु नेत्याह न ह्येकं कारणं मनः नर्ते शरीराच्छारीररोगा न मनसः स्थितिः
vāryovidastu netyāha na hyekaṃ kāraṇaṃ manaḥ narte śarīrācchārīrarogā na manasaḥ sthitiḥ
Sanskrit only: no published translation is held for this verse.
रसजानि तु भूतानि व्याधयश्च पृथग्विधाः आपो हि रसवत्यस्ताः स्मृता निर्वृत्तिहेतवः
rasajāni tu bhūtāni vyādhayaśca pṛthagvidhāḥ āpo hi rasavatyastāḥ smṛtā nirvṛttihetavaḥ
Sanskrit only: no published translation is held for this verse.
हिरण्याक्षस्तु नेत्याह न ह्यात्मा रसजः स्मृतः नातीन्द्रियं मनः सन्ति रोगाः शब्दादिजास्तथा
hiraṇyākṣastu netyāha na hyātmā rasajaḥ smṛtaḥ nātīndriyaṃ manaḥ santi rogāḥ śabdādijāstathā
Sanskrit only: no published translation is held for this verse.
षड्धातुजस्तु पुरुषो रोगाः षड्धातुजास्तथा राशिः षड्धातुजो ह्येष सांख्यैराद्यैः प्रकीर्तितः
ṣaḍdhātujastu puruṣo rogāḥ ṣaḍdhātujāstathā rāśiḥ ṣaḍdhātujo hyeṣa sāṃkhyairādyaiḥ prakīrtitaḥ
Sanskrit only: no published translation is held for this verse.
तथा ब्रुवाणं कुशिकमाह तन्नेति कौशिकः कस्मान्मातापितृभ्यां हि विना षड्धातुजो भवेत्
tathā bruvāṇaṃ kuśikamāha tanneti kauśikaḥ kasmānmātāpitṛbhyāṃ hi vinā ṣaḍdhātujo bhavet
Sanskrit only: no published translation is held for this verse.
पुरुषः पुरुषाद् गौर् गोर् अश्वादश्वः प्रजायते पित्र्या मेहादयश्चोक्ता रोगास्तावत्र कारणम्
puruṣaḥ puruṣād gaur gor aśvādaśvaḥ prajāyate pitryā mehādayaścoktā rogāstāvatra kāraṇam
Sanskrit only: no published translation is held for this verse.
भद्रकाप्यस्तु नेत्याह नह्यन्धो ऽन्धात् प्रजायते मातापित्रोरपि च ते प्रागुत्पत्तिर्न युज्यते
bhadrakāpyastu netyāha nahyandho 'ndhāt prajāyate mātāpitrorapi ca te prāgutpattirna yujyate
Sanskrit only: no published translation is held for this verse.
कर्मजस्तु मतो जन्तुः कर्मजास्तस्य चामयाः नह्यृते कर्मणो जन्म रोगाणां पुरुषस्य वा
karmajastu mato jantuḥ karmajāstasya cāmayāḥ nahyṛte karmaṇo janma rogāṇāṃ puruṣasya vā
Sanskrit only: no published translation is held for this verse.
भरद्वाजस्तु नेत्याह कर्ता पूर्वं हि कर्मणः दृष्टं न चाकृतं कर्म यस्य स्यात् पुरुषः फलम्
bharadvājastu netyāha kartā pūrvaṃ hi karmaṇaḥ dṛṣṭaṃ na cākṛtaṃ karma yasya syāt puruṣaḥ phalam
Sanskrit only: no published translation is held for this verse.
भावहेतुः स्वभावस्तु व्याधीनां पुरुषस्य च खरद्रवचलोष्णत्वं तेजोऽन्तानाम् यथैव हि
bhāvahetuḥ svabhāvastu vyādhīnāṃ puruṣasya ca kharadravacaloṣṇatvaṃ tejo'ntānām yathaiva hi
Sanskrit only: no published translation is held for this verse.
काङ्कायनस्तु नेत्याह न ह्यारम्भफलं भवेत् भवेत् स्वभावाद्भावानामसिद्धिः सिद्धिरेव वा
kāṅkāyanastu netyāha na hyārambhaphalaṃ bhavet bhavet svabhāvādbhāvānāmasiddhiḥ siddhireva vā
Sanskrit only: no published translation is held for this verse.
स्रष्टा त्वमितसङ्कल्पो ब्रह्मापत्यं प्रजापतिः चेतनाचेतनस्यास्य जगतः सुखदुःखयोः
sraṣṭā tvamitasaṅkalpo brahmāpatyaṃ prajāpatiḥ cetanācetanasyāsya jagataḥ sukhaduḥkhayoḥ
Sanskrit only: no published translation is held for this verse.
तन्नेति भिक्षुरात्रेयो न ह्यपत्यं प्रजापतिः प्रजाहितैषी सततं दुःखैर् युञ्ज्याद् असाधुवत्
tanneti bhikṣurātreyo na hyapatyaṃ prajāpatiḥ prajāhitaiṣī satataṃ duḥkhair yuñjyād asādhuvat
Sanskrit only: no published translation is held for this verse.
कालजस्त्वेव पुरुषः कालजास्तस्य चामयाः जगत् कालवशं सर्वं कालः सर्वत्र कारणम्
kālajastveva puruṣaḥ kālajāstasya cāmayāḥ jagat kālavaśaṃ sarvaṃ kālaḥ sarvatra kāraṇam
Sanskrit only: no published translation is held for this verse.
तथर्षीणां विवदतामुवाचेदं पुनर्वसुः मैवं वोचत तत्त्वं हि दुष्प्रापं पक्षसंश्रयात्
tatharṣīṇāṃ vivadatāmuvācedaṃ punarvasuḥ maivaṃ vocata tattvaṃ hi duṣprāpaṃ pakṣasaṃśrayāt
Sanskrit only: no published translation is held for this verse.
वादान् सप्रतिवादान् हि वदन्तो निश्चितानिव पक्षान्तं नैव गच्छन्ति तिलपीडकवद्गतौ
vādān saprativādān hi vadanto niścitāniva pakṣāntaṃ naiva gacchanti tilapīḍakavadgatau
Sanskrit only: no published translation is held for this verse.
मुक्त्वैवं वादसंघट्टम् अध्यात्मम् अनुचिन्त्यताम् नाविधूते तमःस्कन्धे ज्ञेये ज्ञानं प्रवर्तते
muktvaivaṃ vādasaṃghaṭṭam adhyātmam anucintyatām nāvidhūte tamaḥskandhe jñeye jñānaṃ pravartate
Sanskrit only: no published translation is held for this verse.
येषामेव हि भावानां संपत् संजनयेन्नरम् तेषामेव विपद्व्याधीन्विविधान्समुदीरयेत्
yeṣāmeva hi bhāvānāṃ saṃpat saṃjanayennaram teṣāmeva vipadvyādhīnvividhānsamudīrayet
Sanskrit only: no published translation is held for this verse.
अथात्रेयस्य भगवतो वचनमनुनिशम्य पुनरेव वामकः काशिपतिरुवाच भगवन्तमात्रेयं भगवन् संपन्निमित्तजस्य पुरुषस्य विपन्निमित्तजानां च रोगाणां किमभिवृद्धिकारणमिति
athātreyasya bhagavato vacanamanuniśamya punareva vāmakaḥ kāśipatiruvāca bhagavantamātreyaṃ bhagavan saṃpannimittajasya puruṣasya vipannimittajānāṃ ca rogāṇāṃ kimabhivṛddhikāraṇamiti
Sanskrit only: no published translation is held for this verse.
तमुवाच भगवानात्रेयः हिताहारोपयोग एक एव पुरुषवृद्धिकरो भवति अहिताहारोपयोगः पुनर्व्याधिनिमित्तमिति
tamuvāca bhagavānātreyaḥ hitāhāropayoga eka eva puruṣavṛddhikaro bhavati ahitāhāropayogaḥ punarvyādhinimittamiti
Sanskrit only: no published translation is held for this verse.
एवंवादिनं भगवन्तमात्रेयमग्निवेश उवाच कथमिह भगवन् हिताहितानाम् आहारजातानां लक्षणमनपवादमभिजानीमहे हितसमाख्यातानाम् आहारजातानाम् अहितसमाख्यातानां च मात्राकालक्रियाभूमिदेहदोषपुरुषावस्थान्तरेषु विपरीतकारित्वमुपलभामह इति
evaṃvādinaṃ bhagavantamātreyamagniveśa uvāca kathamiha bhagavan hitāhitānām āhārajātānāṃ lakṣaṇamanapavādamabhijānīmahe hitasamākhyātānām āhārajātānām ahitasamākhyātānāṃ ca mātrākālakriyābhūmidehadoṣapuruṣāvasthāntareṣu viparītakāritvamupalabhāmaha iti
Sanskrit only: no published translation is held for this verse.
तमुवाच भगवानात्रेयः यदाहारजातमग्निवेश समांश्चैव शरीरधातून् प्रकृतौ स्थापयति विषमांश्च समीकरोतीत्येतद्धितं विद्धि विपरीतं त्वहितमिति इत्येतद्धिताहितलक्षणम् अनपवादं भवति
tamuvāca bhagavānātreyaḥ yadāhārajātamagniveśa samāṃścaiva śarīradhātūn prakṛtau sthāpayati viṣamāṃśca samīkarotītyetaddhitaṃ viddhi viparītaṃ tvahitamiti ityetaddhitāhitalakṣaṇam anapavādaṃ bhavati
Sanskrit only: no published translation is held for this verse.
एवंवादिनं च भगवन्तमात्रेयमग्निवेश उवाच भगवन् न त्वेतदेवमुपदिष्टं भूयिष्ठकल्पाः सर्वभिषजो विज्ञास्यन्ति
evaṃvādinaṃ ca bhagavantamātreyamagniveśa uvāca bhagavan na tvetadevamupadiṣṭaṃ bhūyiṣṭhakalpāḥ sarvabhiṣajo vijñāsyanti
Sanskrit only: no published translation is held for this verse.
तमुवाच भगवानात्रेयः येषां हि विदितमाहारतत्त्वमग्निवेश गुणतो द्रव्यतः कर्मतः सर्वावयवशश्च मात्रादयो भावाः त एतदेवमुपदिष्टं विज्ञातुमुत्सहन्ते यथा तु खल्वेतदुपदिष्टं भूयिष्ठकल्पाः सर्वभिषजो विज्ञास्यन्ति तथैतदुपदेक्ष्यामो मात्रादीन् भावान् अनुदाहरन्तः तेषां हि बहुविधविकल्पा भवन्ति आहारविधिविशेषांस्तु खलु लक्षणतश्चावयवतश्चानुव्याख्यास्यामः
tamuvāca bhagavānātreyaḥ yeṣāṃ hi viditamāhāratattvamagniveśa guṇato dravyataḥ karmataḥ sarvāvayavaśaśca mātrādayo bhāvāḥ ta etadevamupadiṣṭaṃ vijñātumutsahante yathā tu khalvetadupadiṣṭaṃ bhūyiṣṭhakalpāḥ sarvabhiṣajo vijñāsyanti tathaitadupadekṣyāmo mātrādīn bhāvān anudāharantaḥ teṣāṃ hi bahuvidhavikalpā bhavanti āhāravidhiviśeṣāṃstu khalu lakṣaṇataścāvayavataścānuvyākhyāsyāmaḥ
Sanskrit only: no published translation is held for this verse.
तद्यथा आहारत्वम् आहारस्यैकविधम् अर्थाभेदात् स पुनर्द्वियोनिः स्थावरजङ्गमात्मकत्वात् द्विविधप्रभावः हिताहितोदर्कविशेषात् चतुर्विधोपयोगः पानाशनभक्ष्यलेह्योपयोगात् षडास्वादः रसभेदतः षड्विधत्वात् विंशतिगुणः गुरुलघुशीतोष्णस्निग्धरूक्षमन्दतीक्ष्णस्थिरसरमृदुकठिनविशदपिच्छिलश्लक्ष्णखरसूक्ष्मस्थूलसान्द्रद्रवानुगमात् अपरिसंख्येयविकल्पः द्रव्यसंयोगकरणबाहुल्यात्
tadyathā āhāratvam āhārasyaikavidham arthābhedāt sa punardviyoniḥ sthāvarajaṅgamātmakatvāt dvividhaprabhāvaḥ hitāhitodarkaviśeṣāt caturvidhopayogaḥ pānāśanabhakṣyalehyopayogāt ṣaḍāsvādaḥ rasabhedataḥ ṣaḍvidhatvāt viṃśatiguṇaḥ gurulaghuśītoṣṇasnigdharūkṣamandatīkṣṇasthirasaramṛdukaṭhinaviśadapicchilaślakṣṇakharasūkṣmasthūlasāndradravānugamāt aparisaṃkhyeyavikalpaḥ dravyasaṃyogakaraṇabāhulyāt
Sanskrit only: no published translation is held for this verse.
तस्य खलु ये ये विकारावयवा भूयिष्ठमुपयुज्यन्ते भूयिष्ठकल्पानां च मनुष्याणां प्रकृत्यैव हिततमाश्चाहिततमाश्च तांस्तान् यथावदुपदेक्ष्यामः
tasya khalu ye ye vikārāvayavā bhūyiṣṭhamupayujyante bhūyiṣṭhakalpānāṃ ca manuṣyāṇāṃ prakṛtyaiva hitatamāścāhitatamāśca tāṃstān yathāvadupadekṣyāmaḥ
Sanskrit only: no published translation is held for this verse.
तद्यथा लोहितशालयः शूकधान्यानां पथ्यतमत्वे श्रेष्ठतमा भवन्ति मुद्गाः शमीधान्यानाम् आन्तरिक्षमुदकानां सैन्धवं लवणानां जीवन्तीशाकं शाकानाम् ऐणेयं मृगमांसानां लावः पक्षिणां गोधा बिलेशयानां रोहितो मत्स्यानां गव्यं सर्पिः सर्पिषां गोक्षीरं क्षीराणां तिलतैलं स्थावरजातानां स्नेहानां वराहवसा आनूपमृगवसानां चुलुकीवसा मत्स्यवसानां पाकहंसवसा जलचरविहङ्गवसानां कुक्कुटवसा विष्किरशकुनिवसानां अजमेदः शाखादमेदसां शृङ्गवेरं कन्दानां मृद्वीका फलानां शर्करेक्षुविकाराणाम् इति प्रकृत्यैव हिततमानाम् आहारविकाराणां प्राधान्यतो द्रव्याणि व्याख्यातानि भवन्ति
tadyathā lohitaśālayaḥ śūkadhānyānāṃ pathyatamatve śreṣṭhatamā bhavanti mudgāḥ śamīdhānyānām āntarikṣamudakānāṃ saindhavaṃ lavaṇānāṃ jīvantīśākaṃ śākānām aiṇeyaṃ mṛgamāṃsānāṃ lāvaḥ pakṣiṇāṃ godhā bileśayānāṃ rohito matsyānāṃ gavyaṃ sarpiḥ sarpiṣāṃ gokṣīraṃ kṣīrāṇāṃ tilatailaṃ sthāvarajātānāṃ snehānāṃ varāhavasā ānūpamṛgavasānāṃ culukīvasā matsyavasānāṃ pākahaṃsavasā jalacaravihaṅgavasānāṃ kukkuṭavasā viṣkiraśakunivasānāṃ ajamedaḥ śākhādamedasāṃ śṛṅgaveraṃ kandānāṃ mṛdvīkā phalānāṃ śarkarekṣuvikārāṇām iti prakṛtyaiva hitatamānām āhāravikārāṇāṃ prādhānyato dravyāṇi vyākhyātāni bhavanti
Sanskrit only: no published translation is held for this verse.
अहिततमान् अप्युपदेक्ष्यामः यवकाः शूकधान्यानाम् अपथ्यतमत्वेन प्रकृष्टतमा भवन्ति माषाः शमीधान्यानां वर्षानादेयमुदकानाम् ऊषरं लवणानां सर्षपशाकं शाकानां गोमांसं मृगमांसानां काणकपोतः पक्षिणां भेको बिलेशयानां चिलिचिमो मत्स्यानाम् अविकं सर्पिः सर्पिषाम् अविक्षीरं क्षीराणां कुसुम्भस्नेहः स्थावरस्नेहानां महिषवसा आनूपमृगवसानां कुम्भीरवसा मत्स्यवसानां काकमद्गुवसा जलचरविहङ्गवसानां चटकवसा विष्किरशकुनिवसानां हस्तिमेदः शाखादमेदसां निकुचं फलानाम् आलुकं कन्दानां फाणितमिक्षुविकाराणाम् इति प्रकृत्यैवाहिततमानाम् आहारविकाराणां प्रकृष्टतमानि द्रव्याणि व्याख्यातानि भवन्ति इति हिताहितावयवो व्याख्यात आहारविकाराणाम्
ahitatamān apyupadekṣyāmaḥ yavakāḥ śūkadhānyānām apathyatamatvena prakṛṣṭatamā bhavanti māṣāḥ śamīdhānyānāṃ varṣānādeyamudakānām ūṣaraṃ lavaṇānāṃ sarṣapaśākaṃ śākānāṃ gomāṃsaṃ mṛgamāṃsānāṃ kāṇakapotaḥ pakṣiṇāṃ bheko bileśayānāṃ cilicimo matsyānām avikaṃ sarpiḥ sarpiṣām avikṣīraṃ kṣīrāṇāṃ kusumbhasnehaḥ sthāvarasnehānāṃ mahiṣavasā ānūpamṛgavasānāṃ kumbhīravasā matsyavasānāṃ kākamadguvasā jalacaravihaṅgavasānāṃ caṭakavasā viṣkiraśakunivasānāṃ hastimedaḥ śākhādamedasāṃ nikucaṃ phalānām ālukaṃ kandānāṃ phāṇitamikṣuvikārāṇām iti prakṛtyaivāhitatamānām āhāravikārāṇāṃ prakṛṣṭatamāni dravyāṇi vyākhyātāni bhavanti iti hitāhitāvayavo vyākhyāta āhāravikārāṇām
Sanskrit only: no published translation is held for this verse.
अतो भूयः कर्मौषधानां च प्राधान्यतः सानुबन्धानि द्रव्याण्यनुव्याख्यास्यामः तद्यथा अन्नं वृत्तिकराणां श्रेष्ठम् उदकमाश्वासकराणां सुरा श्रमहराणां क्षीरं जीवनीयानां मांसं बृंहणीयानां रसस्तर्पणीयानां लवणम् अन्नद्रव्यरुचिकराणाम् अम्लं हृद्यानां कुक्कुटो बल्यानां नक्ररेतो वृष्याणां मधु श्लेष्मपित्तप्रशमनानां सर्पिर्वातपित्तप्रशमनानां तैलं वातश्लेष्मप्रशमनानां वमनं श्लेष्महराणां विरेचनं पित्तहराणां बस्तिर्वातहराणां स्वेदो मार्दवकराणां व्यायामः स्थैर्यकराणां क्षारः पुंस्त्वोपघातिनां तिन्दुकम् अनन्नद्रव्यरुचिकराणाम् आमं कपित्थम् उत्कण्ठ्यानाम् आविकं सर्पिरहृद्यानाम् अजाक्षीरं शोषघ्नस्तन्यसात्म्यरक्तसांग्राहिकरक्तपित्तप्रशमनानाम् अविक्षीरं श्लेष्मपित्तजननानां महिषीक्षीरं स्वप्नजननानां मन्दकं दध्यभिष्यन्दकराणां गवेधुकान्नं कर्शनीयानाम् उद्दालकान्नं विरूक्षणीयानाम् इक्षुर्मूत्रजननानां यवाः पुरीषजननानां जाम्बवं वातजननानां शष्कुल्यः श्लेष्मपित्तजननानां कुलत्था अम्लपित्तजननानां माषाः श्लेष्मपित्तजननानां मदनफलं वमनास्थापनानुवासनोपयोगिनां त्रिवृत् सुखविरेचनानां चतुरङ्गुलो मृदुविरेचनानां स्नुक्पयस् तीक्ष्णविरेचनानां प्रत्यक्पुष्पा शिरोविरेचनानां विडङ्गं क्रिमिघ्नानां शिरीषो विषघ्नानां खदिरः कुष्ठघ्नानां रास्ना वातहराणाम् आमलकं वयःस्थापनानां हरीतकी पथ्यानाम् एरण्डमूलं वृष्यवातहराणां पिप्पलीमूलं दीपनीयपाचनीयगुदशोथार्शःशूलहराणां पुष्करमूलं हिक्काश्वासकासपार्श्वशूलहराणां मुस्तं सांग्राहिकदीपनीयपाचनीयानाम् उदीच्यं निर्वापणदीपनीयपाचनीयच्छर्द्यतीसारहराणां कट्वङ्गं सांग्राहिकरक्तपित्तप्रशमनानाम् अमृता सांग्राहिकवातहरदीपनीयश्लेष्मशोणितविबन्धप्रशमनानां अतिविषा दीपनीयपाचनीयसांग्राहिकसर्वदोषहराणाम् उत्पलकुमुदपद्मकिञ्जल्कः सांग्राहिकरक्तपित्तप्रशमनानां दुरालभा पित्तश्लेष्मप्रशमनानां गन्धप्रियङ्गुः शोणितपित्तातियोगप्रशमनानां कुटजत्वक् श्लेष्मपित्तरक्तसांग्राहिकोपशोषणानां काश्मर्यफलं रक्तसांग्राहिकरक्तपित्तप्रशमनानां पृश्निपर्णी सांग्राहिकवातहरदीपनीयवृष्याणां विदारिगन्धा वृष्यसर्वदोषहराणां बला सांग्राहिकबल्यवातहराणां गोक्षुरको मूत्रकृच्छ्रानिलहराणां हिङ्गुनिर्यासश् छेदनीयदीपनीयानुलोमिकवातकफप्रशमनानाम् अम्लवेतसो भेदनीयदीपनीयानुलोमिकवातश्लेष्महराणां यावशूकः स्रंसनीयपाचनीयार्शोघ्नानां तक्राभ्यासो ग्रहणीदोषशोफार्शोघृतव्यापत्प्रशमनानां क्रव्यान्मांसरसाभ्यासो ग्रहणीदोषशोषार्शोघ्नानां क्षीरघृताभ्यासो रसायनानां समघृतसक्तुप्राशाभ्यासो वृष्योदावर्तहरानां तैलगण्डूषाभ्यासो दन्तबलरुचिकराणां चन्दनं दुर्गन्धहरदाहनिर्वापणलेपनानां रास्नागुरुणी शीतापनयनप्रलेपनानां लामज्जकोशीरं दाहत्वग्दोषस्वेदापनयनप्रलेपनानां कुष्ठं वातहराभ्यङ्गोपनाहोपयोगिनां मधुकं चक्षुष्यवृष्यकेश्यकण्ठ्यवर्ण्यविरजनीयरोपणीयानां वायुः प्राणसंज्ञाप्रदानहेतूनाम् अग्निर् आमस्तम्भशीतशूलोद्वेपनप्रशमनानां जलं स्तम्भनीयानां मृद्भृष्टलोष्ट्रनिर्वापितम् उदकं तृष्णाछर्द्यतियोगप्रशमनानाम् अतिमात्राशनमामप्रदोषहेतूनां यथाग्न्यभ्यवहारो ऽग्निसंधुक्षणानां यथासात्म्यं चेष्टाभ्यवहारौ सेव्यानां कालभोजनमारोग्यकराणां तृप्तिराहारगुणानां वेगसंधारणम् अनारोग्यकराणां मद्यं सौमनस्यजननानाम् मद्याक्षेपो धीधृतिस्मृतिहराणां गुरुभोजनं दुर्विपाककराणाम् एकाशनभोजनं सुखपरिणामकराणां स्त्रीष्वतिप्रसङ्गः शोषकराणां शुक्रवेगनिग्रहः षाण्ढ्यकराणां पराघातनम् अन्नाश्रद्धाजननानाम् अनशनमायुषो ह्रासकराणां प्रमिताशनं कर्शनीयानाम् अजीर्णाध्यशनं ग्रहणीदूषणानां विषमाशनमग्निवैषम्यकराणां विरुद्धवीर्याशनं निन्दितव्याधिकराणां प्रशमः पथ्यानां आयासः सर्वापथ्यानां मिथ्यायोगो व्याधिकराणां रजस्वलाभिगमनमलक्ष्मीमुखानां ब्रह्मचर्यमायुष्याणां परदाराभिगमनमनायुष्याणां सङ्कल्पो वृष्याणां दौर्मनस्यम् अवृष्याणाम् अयथाबलमारम्भः प्राणोपरोधिनां विषादो रोगवर्धनानां स्नानं श्रमहराणां हर्षः प्रीणनानां शोकः शोषणानां निवृत्तिः पुष्टिकराणां पुष्टिः स्वप्नकराणाम् अतिस्वप्नस्तन्द्राकराणां सर्वरसाभ्यासो बलकराणाम् एकरसाभ्यासो दौर्बल्यकराणां गर्भशल्यमाहार्याणाम् अजीर्णमुद्धार्याणां बालो मृदुभेषजीयानां वृद्धो याप्यानां गर्भिनी तीक्ष्णौषधव्यवायव्यायामवर्जनीयानां सौमनस्यं गर्भधारणानां सन्निपातो दुश्चिकित्स्यानाम् आमो विषमचिकित्स्यानां ज्वरो रोगाणां कुष्ठं दीर्घरोगाणां राजयक्ष्मा रोगसमूहानां प्रमेहो ऽनुषङ्गिणां जलौकसो ऽनुशस्त्राणां बस्तिस्तन्त्राणां हिमवानौषधिभूमीनां सोम ओषधीनां मरुभूमिरारोग्यदेशानाम् अनूपो ऽहितदेशानाम् निर्देशकारित्वमातुरगुणानां भिषक् चिकित्साङ्गानां नास्तिको वर्ज्यानां लौल्यं क्लेशकराणाम् अनिर्देशकारित्वमरिष्टानां अनिर्वेदो वार्त्तलक्षणानां वैद्यसमूहो निःसंशयकराणां योगो वैद्यगुणानां विज्ञानमौषधीनां शास्त्रसहितस्तर्कः साधनानां सम्प्रतिपत्तिः कालज्ञानप्रयोजनानाम् अव्यवसायः कालातिपत्तिहेतूनां दृष्टकर्मता निःसंशयकराणाम् असमर्थता भयकराणां तद्विद्यसंभाषा बुद्धिवर्धनानाम् आचार्यः शास्त्राधिगमहेतूनाम् आयुर्वेदो ऽमृतानां सद्वचनमनुष्ठेयानाम् असद्ग्रहणं सर्वाहितानां सर्वसंन्यासः सुखानामिति
ato bhūyaḥ karmauṣadhānāṃ ca prādhānyataḥ sānubandhāni dravyāṇyanuvyākhyāsyāmaḥ tadyathā annaṃ vṛttikarāṇāṃ śreṣṭham udakamāśvāsakarāṇāṃ surā śramaharāṇāṃ kṣīraṃ jīvanīyānāṃ māṃsaṃ bṛṃhaṇīyānāṃ rasastarpaṇīyānāṃ lavaṇam annadravyarucikarāṇām amlaṃ hṛdyānāṃ kukkuṭo balyānāṃ nakrareto vṛṣyāṇāṃ madhu śleṣmapittapraśamanānāṃ sarpirvātapittapraśamanānāṃ tailaṃ vātaśleṣmapraśamanānāṃ vamanaṃ śleṣmaharāṇāṃ virecanaṃ pittaharāṇāṃ bastirvātaharāṇāṃ svedo mārdavakarāṇāṃ vyāyāmaḥ sthairyakarāṇāṃ kṣāraḥ puṃstvopaghātināṃ tindukam anannadravyarucikarāṇām āmaṃ kapittham utkaṇṭhyānām āvikaṃ sarpirahṛdyānām ajākṣīraṃ śoṣaghnastanyasātmyaraktasāṃgrāhikaraktapittapraśamanānām avikṣīraṃ śleṣmapittajananānāṃ mahiṣīkṣīraṃ svapnajananānāṃ mandakaṃ dadhyabhiṣyandakarāṇāṃ gavedhukānnaṃ karśanīyānām uddālakānnaṃ virūkṣaṇīyānām ikṣurmūtrajananānāṃ yavāḥ purīṣajananānāṃ jāmbavaṃ vātajananānāṃ śaṣkulyaḥ śleṣmapittajananānāṃ kulatthā amlapittajananānāṃ māṣāḥ śleṣmapittajananānāṃ madanaphalaṃ vamanāsthāpanānuvāsanopayogināṃ trivṛt sukhavirecanānāṃ caturaṅgulo mṛduvirecanānāṃ snukpayas tīkṣṇavirecanānāṃ pratyakpuṣpā śirovirecanānāṃ viḍaṅgaṃ krimighnānāṃ śirīṣo viṣaghnānāṃ khadiraḥ kuṣṭhaghnānāṃ rāsnā vātaharāṇām āmalakaṃ vayaḥsthāpanānāṃ harītakī pathyānām eraṇḍamūlaṃ vṛṣyavātaharāṇāṃ pippalīmūlaṃ dīpanīyapācanīyagudaśothārśaḥśūlaharāṇāṃ puṣkaramūlaṃ hikkāśvāsakāsapārśvaśūlaharāṇāṃ mustaṃ sāṃgrāhikadīpanīyapācanīyānām udīcyaṃ nirvāpaṇadīpanīyapācanīyacchardyatīsāraharāṇāṃ kaṭvaṅgaṃ sāṃgrāhikaraktapittapraśamanānām amṛtā sāṃgrāhikavātaharadīpanīyaśleṣmaśoṇitavibandhapraśamanānāṃ ativiṣā dīpanīyapācanīyasāṃgrāhikasarvadoṣaharāṇām utpalakumudapadmakiñjalkaḥ sāṃgrāhikaraktapittapraśamanānāṃ durālabhā pittaśleṣmapraśamanānāṃ gandhapriyaṅguḥ śoṇitapittātiyogapraśamanānāṃ kuṭajatvak śleṣmapittaraktasāṃgrāhikopaśoṣaṇānāṃ kāśmaryaphalaṃ raktasāṃgrāhikaraktapittapraśamanānāṃ pṛśniparṇī sāṃgrāhikavātaharadīpanīyavṛṣyāṇāṃ vidārigandhā vṛṣyasarvadoṣaharāṇāṃ balā sāṃgrāhikabalyavātaharāṇāṃ gokṣurako mūtrakṛcchrānilaharāṇāṃ hiṅguniryāsaś chedanīyadīpanīyānulomikavātakaphapraśamanānām amlavetaso bhedanīyadīpanīyānulomikavātaśleṣmaharāṇāṃ yāvaśūkaḥ sraṃsanīyapācanīyārśoghnānāṃ takrābhyāso grahaṇīdoṣaśophārśoghṛtavyāpatpraśamanānāṃ kravyānmāṃsarasābhyāso grahaṇīdoṣaśoṣārśoghnānāṃ kṣīraghṛtābhyāso rasāyanānāṃ samaghṛtasaktuprāśābhyāso vṛṣyodāvartaharānāṃ tailagaṇḍūṣābhyāso dantabalarucikarāṇāṃ candanaṃ durgandhaharadāhanirvāpaṇalepanānāṃ rāsnāguruṇī śītāpanayanapralepanānāṃ lāmajjakośīraṃ dāhatvagdoṣasvedāpanayanapralepanānāṃ kuṣṭhaṃ vātaharābhyaṅgopanāhopayogināṃ madhukaṃ cakṣuṣyavṛṣyakeśyakaṇṭhyavarṇyavirajanīyaropaṇīyānāṃ vāyuḥ prāṇasaṃjñāpradānahetūnām agnir āmastambhaśītaśūlodvepanapraśamanānāṃ jalaṃ stambhanīyānāṃ mṛdbhṛṣṭaloṣṭranirvāpitam udakaṃ tṛṣṇāchardyatiyogapraśamanānām atimātrāśanamāmapradoṣahetūnāṃ yathāgnyabhyavahāro 'gnisaṃdhukṣaṇānāṃ yathāsātmyaṃ ceṣṭābhyavahārau sevyānāṃ kālabhojanamārogyakarāṇāṃ tṛptirāhāraguṇānāṃ vegasaṃdhāraṇam anārogyakarāṇāṃ madyaṃ saumanasyajananānām madyākṣepo dhīdhṛtismṛtiharāṇāṃ gurubhojanaṃ durvipākakarāṇām ekāśanabhojanaṃ sukhapariṇāmakarāṇāṃ strīṣvatiprasaṅgaḥ śoṣakarāṇāṃ śukraveganigrahaḥ ṣāṇḍhyakarāṇāṃ parāghātanam annāśraddhājananānām anaśanamāyuṣo hrāsakarāṇāṃ pramitāśanaṃ karśanīyānām ajīrṇādhyaśanaṃ grahaṇīdūṣaṇānāṃ viṣamāśanamagnivaiṣamyakarāṇāṃ viruddhavīryāśanaṃ ninditavyādhikarāṇāṃ praśamaḥ pathyānāṃ āyāsaḥ sarvāpathyānāṃ mithyāyogo vyādhikarāṇāṃ rajasvalābhigamanamalakṣmīmukhānāṃ brahmacaryamāyuṣyāṇāṃ paradārābhigamanamanāyuṣyāṇāṃ saṅkalpo vṛṣyāṇāṃ daurmanasyam avṛṣyāṇām ayathābalamārambhaḥ prāṇoparodhināṃ viṣādo rogavardhanānāṃ snānaṃ śramaharāṇāṃ harṣaḥ prīṇanānāṃ śokaḥ śoṣaṇānāṃ nivṛttiḥ puṣṭikarāṇāṃ puṣṭiḥ svapnakarāṇām atisvapnastandrākarāṇāṃ sarvarasābhyāso balakarāṇām ekarasābhyāso daurbalyakarāṇāṃ garbhaśalyamāhāryāṇām ajīrṇamuddhāryāṇāṃ bālo mṛdubheṣajīyānāṃ vṛddho yāpyānāṃ garbhinī tīkṣṇauṣadhavyavāyavyāyāmavarjanīyānāṃ saumanasyaṃ garbhadhāraṇānāṃ sannipāto duścikitsyānām āmo viṣamacikitsyānāṃ jvaro rogāṇāṃ kuṣṭhaṃ dīrgharogāṇāṃ rājayakṣmā rogasamūhānāṃ prameho 'nuṣaṅgiṇāṃ jalaukaso 'nuśastrāṇāṃ bastistantrāṇāṃ himavānauṣadhibhūmīnāṃ soma oṣadhīnāṃ marubhūmirārogyadeśānām anūpo 'hitadeśānām nirdeśakāritvamāturaguṇānāṃ bhiṣak cikitsāṅgānāṃ nāstiko varjyānāṃ laulyaṃ kleśakarāṇām anirdeśakāritvamariṣṭānāṃ anirvedo vārttalakṣaṇānāṃ vaidyasamūho niḥsaṃśayakarāṇāṃ yogo vaidyaguṇānāṃ vijñānamauṣadhīnāṃ śāstrasahitastarkaḥ sādhanānāṃ sampratipattiḥ kālajñānaprayojanānām avyavasāyaḥ kālātipattihetūnāṃ dṛṣṭakarmatā niḥsaṃśayakarāṇām asamarthatā bhayakarāṇāṃ tadvidyasaṃbhāṣā buddhivardhanānām ācāryaḥ śāstrādhigamahetūnām āyurvedo 'mṛtānāṃ sadvacanamanuṣṭheyānām asadgrahaṇaṃ sarvāhitānāṃ sarvasaṃnyāsaḥ sukhānāmiti
Sanskrit only: no published translation is held for this verse.
भवन्ति चात्र अग्र्याणां शतमुद्दिष्टं यद्द्विपञ्चाशदुत्तरम् अलमेतद्विकाराणां विघातायोपदिश्यते
bhavanti cātra agryāṇāṃ śatamuddiṣṭaṃ yaddvipañcāśaduttaram alametadvikārāṇāṃ vighātāyopadiśyate
Sanskrit only: no published translation is held for this verse.
समानकारिणो ये ऽर्थास्तेषां श्रेष्ठस्य लक्षणम् ज्यायस्त्वं कार्यकर्तृत्वे वरत्वं चाप्युदाहृतम्
samānakāriṇo ye 'rthāsteṣāṃ śreṣṭhasya lakṣaṇam jyāyastvaṃ kāryakartṛtve varatvaṃ cāpyudāhṛtam
Sanskrit only: no published translation is held for this verse.
वातपित्तकफानां च यद्यत् प्रशमने हितम् प्राधान्यतश्च निर्दिष्टं यद्व्याधिहरमुत्तमम्
vātapittakaphānāṃ ca yadyat praśamane hitam prādhānyataśca nirdiṣṭaṃ yadvyādhiharamuttamam
Sanskrit only: no published translation is held for this verse.
एतन्निशम्य निपुणं चिकित्सां संप्रयोजयेत् एवं कुर्वन् सदा वैद्यो धर्मकामौ समश्नुते
etanniśamya nipuṇaṃ cikitsāṃ saṃprayojayet evaṃ kurvan sadā vaidyo dharmakāmau samaśnute
Sanskrit only: no published translation is held for this verse.
पथ्यं पथो ऽनपेतं यद्यच्चोक्तं मनसः प्रियम् यच्चाप्रियमपथ्यं च नियतं तन्न लक्षयेत्
pathyaṃ patho 'napetaṃ yadyaccoktaṃ manasaḥ priyam yaccāpriyamapathyaṃ ca niyataṃ tanna lakṣayet
Sanskrit only: no published translation is held for this verse.
मात्राकालक्रियाभूमिदेहदोषगुणान्तरम् प्राप्य तत्तद्धि दृश्यन्ते ते ते भावास्तथा तथा
mātrākālakriyābhūmidehadoṣaguṇāntaram prāpya tattaddhi dṛśyante te te bhāvāstathā tathā
Sanskrit only: no published translation is held for this verse.
तस्मात् स्वभावो निर्दिष्टस्तथा मात्रादिराश्रयः तदपेक्ष्योभयं कर्म प्रयोज्यं सिद्धिमिच्छता
tasmāt svabhāvo nirdiṣṭastathā mātrādirāśrayaḥ tadapekṣyobhayaṃ karma prayojyaṃ siddhimicchatā
Sanskrit only: no published translation is held for this verse.
तदात्रेयस्य भगवतो वचनमनुनिशम्य पुनरपि भगवन्तमात्रेयमग्निवेश उवाच यथोद्देशमभिनिर्दिष्टः केवलो ऽयमर्थो भगवता श्रुतश्चास्माभिः आसवद्रव्याणामिदानीमनपवादं लक्षणमनतिसंक्षेपेणोपदिश्यमानं शुश्रूषामह इति
tadātreyasya bhagavato vacanamanuniśamya punarapi bhagavantamātreyamagniveśa uvāca yathoddeśamabhinirdiṣṭaḥ kevalo 'yamartho bhagavatā śrutaścāsmābhiḥ āsavadravyāṇāmidānīmanapavādaṃ lakṣaṇamanatisaṃkṣepeṇopadiśyamānaṃ śuśrūṣāmaha iti
Sanskrit only: no published translation is held for this verse.
तमुवाच भगवानात्रेयः धान्यफलमूलसारपुष्पकाण्डपत्त्रत्वचो भवन्त्यासवयोनयो ऽग्निवेश संग्रहेणाष्टौ शर्करानवमीकाः तास्वेव द्रव्यसंयोगकरणतो ऽपरिसंख्येयासु यथापथ्यतमानाम् आसवानां चतुरशीतिं निबोध तद्यथा सुरासौवीरतुषोदकमैरेयमेदकधान्याम्लाः षड् धान्यासवा भवन्ति मृद्वीकाखर्जूरकाश्मर्यधन्वनराजादनतृणशून्यपरूषकाभयामलकमृगलिण्डिकाजाम्बवकपित्थकुवलबदरकर्कन्धूपीलुप्रियालपनसन्यग्रोधाश्वत्थप्लक्षकपीतनोदुम्बराजमोदशृङ्गाटकशङ्खिनीफलासवाः षड्विंशतिर्भवन्ति विदारिगन्धाश्वगन्धाकृष्णगन्धाशतावरीश्यामात्रिवृद्दन्तीद्रवन्तीबिल्वोरुबूकचित्रकमूलैर् एकादश मूलासवा भवन्ति शालप्रियकाश्वकर्णचन्दनस्यन्दनखदिरकदरसप्तपर्णार्जुनासनारिमेदतिन्दुककिणिहीशमीशुक्तिशिंशपाशिरीषवञ्जलधन्वनमधूकैः सारासवा विंशतिर्भवन्ति पद्मोत्पलनलिककुमुदसौगन्धिकपुण्डरीकशतपत्रमधूकप्रियङ्गुधातकीपुष्पैर् दश पुष्पासवा भवन्ति इक्षुकाण्डेक्ष्विक्षुवालिकापुण्ड्रकचतुर्थाः काण्डासवा भवन्ति पटोलताडकपत्रासवौ द्वौ भवतः तिल्वकलोध्रैलवालुकक्रमुकचतुर्थास्त्वगासवा भवन्ति शर्करासव एक एवेति एवमेषामासवानां चतुरशीतिः परस्परेणासंसृष्टानाम् आसवद्रव्याणाम् उपनिर्दिष्टा भवति एषाम् आसवानाम् आसुतत्वाद् आसवसंज्ञा द्रव्यसंयोगविभागविस्तारस्त्वेषां बहुविधकल्पः संस्कारश्च यथास्वं संयोगसंस्कारसंस्कृता ह्यासवाः स्वं कर्म कुर्वन्ति संयोगसंस्कारदेशकालमात्रादयश्च भावास्तेषां तेषामासवानां ते ते समुपदिश्यन्ते तत्तत्कार्यमभिसमीक्ष्येति
tamuvāca bhagavānātreyaḥ dhānyaphalamūlasārapuṣpakāṇḍapattratvaco bhavantyāsavayonayo 'gniveśa saṃgraheṇāṣṭau śarkarānavamīkāḥ tāsveva dravyasaṃyogakaraṇato 'parisaṃkhyeyāsu yathāpathyatamānām āsavānāṃ caturaśītiṃ nibodha tadyathā surāsauvīratuṣodakamaireyamedakadhānyāmlāḥ ṣaḍ dhānyāsavā bhavanti mṛdvīkākharjūrakāśmaryadhanvanarājādanatṛṇaśūnyaparūṣakābhayāmalakamṛgaliṇḍikājāmbavakapitthakuvalabadarakarkandhūpīlupriyālapanasanyagrodhāśvatthaplakṣakapītanodumbarājamodaśṛṅgāṭakaśaṅkhinīphalāsavāḥ ṣaḍviṃśatirbhavanti vidārigandhāśvagandhākṛṣṇagandhāśatāvarīśyāmātrivṛddantīdravantībilvorubūkacitrakamūlair ekādaśa mūlāsavā bhavanti śālapriyakāśvakarṇacandanasyandanakhadirakadarasaptaparṇārjunāsanārimedatindukakiṇihīśamīśuktiśiṃśapāśirīṣavañjaladhanvanamadhūkaiḥ sārāsavā viṃśatirbhavanti padmotpalanalikakumudasaugandhikapuṇḍarīkaśatapatramadhūkapriyaṅgudhātakīpuṣpair daśa puṣpāsavā bhavanti ikṣukāṇḍekṣvikṣuvālikāpuṇḍrakacaturthāḥ kāṇḍāsavā bhavanti paṭolatāḍakapatrāsavau dvau bhavataḥ tilvakalodhrailavālukakramukacaturthāstvagāsavā bhavanti śarkarāsava eka eveti evameṣāmāsavānāṃ caturaśītiḥ paraspareṇāsaṃsṛṣṭānām āsavadravyāṇām upanirdiṣṭā bhavati eṣām āsavānām āsutatvād āsavasaṃjñā dravyasaṃyogavibhāgavistārastveṣāṃ bahuvidhakalpaḥ saṃskāraśca yathāsvaṃ saṃyogasaṃskārasaṃskṛtā hyāsavāḥ svaṃ karma kurvanti saṃyogasaṃskāradeśakālamātrādayaśca bhāvāsteṣāṃ teṣāmāsavānāṃ te te samupadiśyante tattatkāryamabhisamīkṣyeti
Sanskrit only: no published translation is held for this verse.
भवति चात्र मनःशरीराग्निबलप्रदानाम् अस्वप्नशोकारुचिनाशनानाम् संहर्षणानां प्रवरासवानामशीतिरुक्ता चतुरुत्तरैषा
bhavati cātra manaḥśarīrāgnibalapradānām asvapnaśokārucināśanānām saṃharṣaṇānāṃ pravarāsavānāmaśītiruktā caturuttaraiṣā
Sanskrit only: no published translation is held for this verse.
तत्र श्लोकः शरीररोगप्रकृतौ मतानि तत्त्वेन चाहारविनिश्चयं च उवाच यज्जःपुरुषादिके ऽस्मिन् मुनिस्तथाग्र्याणि वरासवांश्च
tatra ślokaḥ śarīrarogaprakṛtau matāni tattvena cāhāraviniścayaṃ ca uvāca yajjaḥpuruṣādike 'smin munistathāgryāṇi varāsavāṃśca
Sanskrit only: no published translation is held for this verse.