Caraka-saṃhitā (the text alone) 3.4

अथातस्त्रिविधरोगविशेषविज्ञानीयं विमानं व्याख्यास्यामः

athātastrividharogaviśeṣavijñānīyaṃ vimānaṃ vyākhyāsyāmaḥ

Sanskrit only: no published translation is held for this verse.

इति ह स्माह भगवानात्रेयः

iti ha smāha bhagavānātreyaḥ

Sanskrit only: no published translation is held for this verse.

त्रिविधं खलु रोगविशेषविज्ञानं भवति तद्यथा आप्तोपदेशः प्रत्यक्षम् अनुमानं चेति

trividhaṃ khalu rogaviśeṣavijñānaṃ bhavati tadyathā āptopadeśaḥ pratyakṣam anumānaṃ ceti

Sanskrit only: no published translation is held for this verse.

तत्राप्तोपदेशो नामाप्तवचनम् आप्ता ह्यवितर्कस्मृतिविभागविदो निष्प्रीत्युपतापदर्शिनश्च तेषाम् एवंगुणयोगाद् यद्वचनं तत्प्रमाणम् अप्रमाणं पुनर्मत्तोन्मत्तमूर्खरक्तदुष्टादुष्टवचनमिति प्रत्यक्षं तु खलु तद्यत् स्वयमिन्द्रियैर्मनसा चोपलभ्यते अनुमानं खलु तर्को युक्त्यपेक्षः

tatrāptopadeśo nāmāptavacanam āptā hyavitarkasmṛtivibhāgavido niṣprītyupatāpadarśinaśca teṣām evaṃguṇayogād yadvacanaṃ tatpramāṇam apramāṇaṃ punarmattonmattamūrkharaktaduṣṭāduṣṭavacanamiti pratyakṣaṃ tu khalu tadyat svayamindriyairmanasā copalabhyate anumānaṃ khalu tarko yuktyapekṣaḥ

Sanskrit only: no published translation is held for this verse.

त्रिविधेन खल्वनेन ज्ञानसमुदायेन पूर्वं परीक्ष्य रोगं सर्वथा सर्वमथोत्तरकालम् अध्यवसानमदोषं भवति न हि ज्ञानावयवेन कृत्स्ने ज्ञेये ज्ञानमुत्पद्यते त्रिविधे त्वस्मिन् ज्ञानसमुदये पूर्वम् आप्तोपदेशाज्ज्ञानं ततः प्रत्यक्षानुमानाभ्यां परीक्षोपपद्यते किं ह्य् अनुपदिष्टं पूर्वं यत्तत् प्रत्यक्षानुमानाभ्यां परीक्षमाणो विद्यात् तस्माद् द्विविधा परीक्षा ज्ञानवतां प्रत्यक्षम् अनुमानं च त्रिविधा वा सहोपदेशेन

trividhena khalvanena jñānasamudāyena pūrvaṃ parīkṣya rogaṃ sarvathā sarvamathottarakālam adhyavasānamadoṣaṃ bhavati na hi jñānāvayavena kṛtsne jñeye jñānamutpadyate trividhe tvasmin jñānasamudaye pūrvam āptopadeśājjñānaṃ tataḥ pratyakṣānumānābhyāṃ parīkṣopapadyate kiṃ hy anupadiṣṭaṃ pūrvaṃ yattat pratyakṣānumānābhyāṃ parīkṣamāṇo vidyāt tasmād dvividhā parīkṣā jñānavatāṃ pratyakṣam anumānaṃ ca trividhā vā sahopadeśena

Sanskrit only: no published translation is held for this verse.

तत्रेदमुपदिशन्ति बुद्धिमन्तः रोगम् एकैकम् एवंप्रकोपणम् एवंयोनिम् एवमुत्थानम् एवमात्मानम् एवमधिष्ठानम् एवंवेदनम् एवंसंस्थानम् एवंशब्दस्पर्शरूपरसगन्धम् एवमुपद्रवम् एवंवृद्धिस्थानक्षयसमन्वितम् एवमुदर्कम् एवंनामानम् एवंयोगं विद्यात् तस्मिन्नियं प्रतीकारार्था प्रवृत्तिरथवा निवृत्तिरित्युपदेशाज्ज्ञायते

tatredamupadiśanti buddhimantaḥ rogam ekaikam evaṃprakopaṇam evaṃyonim evamutthānam evamātmānam evamadhiṣṭhānam evaṃvedanam evaṃsaṃsthānam evaṃśabdasparśarūparasagandham evamupadravam evaṃvṛddhisthānakṣayasamanvitam evamudarkam evaṃnāmānam evaṃyogaṃ vidyāt tasminniyaṃ pratīkārārthā pravṛttirathavā nivṛttirityupadeśājjñāyate

Sanskrit only: no published translation is held for this verse.

प्रत्यक्षतस्तु खलु रोगतत्त्वं बुभुत्सुः सर्वैरिन्द्रियैः सर्वानिन्द्रियार्थान् आतुरशरीरगतान् परीक्षेत अन्यत्र रसज्ञानात् तद्यथा अन्त्रकूजनं सन्धिस्फुटनम् अङ्गुलीपर्वणां च स्वरविशेषांश्च ये चान्येऽपि केचिच्छरीरोपगताः शब्दाः स्युस्ताञ्छ्रोत्रेण परीक्षेत वर्णसंस्थानप्रमाणच्छायाः शरीरप्रकृतिविकारौ चक्षुर्वैषयिकाणि यानि चान्यान्यनुक्तानि तानि चक्षुषा परीक्षेत रसं तु खल्वातुरशरीरगतम् इन्द्रियवैषयिकम् अप्यनुमानाद् अवगच्छेत् न ह्यस्य प्रत्यक्षेण ग्रहणम् उपपद्यते तस्मादातुरपरिप्रश्नेनैवातुरमुखरसं विद्यात् यूकापसर्पणेन त्वस्य शरीरवैरस्यं मक्षिकोपसर्पणेन शरीरमाधुर्यं लोहितपित्तसंदेहे तु किं धारिलोहितं लोहितपित्तं वेति श्वकाकभक्षणाद्धारिलोहितम् अभक्षणाल्लोहितपित्तम् इत्यनुमातव्यम् एवम् अन्यान् अप्यातुरशरीरगतान् रसाननुमिमीत गन्धांस्तु खलु सर्वशरीरगतानातुरस्य प्रकृतिवैकारिकान् घ्राणेन परीक्षेत स्पर्शं च पाणिना प्रकृतिविकृतियुक्तम् इति प्रत्यक्षतोऽनुमानाद् उपदेशतश्च परीक्षणम् उक्तम्

pratyakṣatastu khalu rogatattvaṃ bubhutsuḥ sarvairindriyaiḥ sarvānindriyārthān āturaśarīragatān parīkṣeta anyatra rasajñānāt tadyathā antrakūjanaṃ sandhisphuṭanam aṅgulīparvaṇāṃ ca svaraviśeṣāṃśca ye cānye'pi keciccharīropagatāḥ śabdāḥ syustāñchrotreṇa parīkṣeta varṇasaṃsthānapramāṇacchāyāḥ śarīraprakṛtivikārau cakṣurvaiṣayikāṇi yāni cānyānyanuktāni tāni cakṣuṣā parīkṣeta rasaṃ tu khalvāturaśarīragatam indriyavaiṣayikam apyanumānād avagacchet na hyasya pratyakṣeṇa grahaṇam upapadyate tasmādāturaparipraśnenaivāturamukharasaṃ vidyāt yūkāpasarpaṇena tvasya śarīravairasyaṃ makṣikopasarpaṇena śarīramādhuryaṃ lohitapittasaṃdehe tu kiṃ dhārilohitaṃ lohitapittaṃ veti śvakākabhakṣaṇāddhārilohitam abhakṣaṇāllohitapittam ityanumātavyam evam anyān apyāturaśarīragatān rasānanumimīta gandhāṃstu khalu sarvaśarīragatānāturasya prakṛtivaikārikān ghrāṇena parīkṣeta sparśaṃ ca pāṇinā prakṛtivikṛtiyuktam iti pratyakṣato'numānād upadeśataśca parīkṣaṇam uktam

Sanskrit only: no published translation is held for this verse.

इमे तु खल्वन्येऽप्येवमेव भूयोऽनुमानज्ञेया भवन्ति भावाः तद्यथाग्निजरणशक्त्या परीक्षेत बलं व्यायामशक्त्या श्रोत्रादीनि शब्दाद्यर्थग्रहणेन मनोऽर्थाव्यभिचरणेन विज्ञानं व्यवसायेन रजः सङ्गेन मोहमविज्ञानेन क्रोधमभिद्रोहेण शोकं दैन्येन हर्षमामोदेन प्रीतिं तोषेण भयं विषादेन धैर्यमविषादेन वीर्यमुत्थानेन अवस्थानमविभ्रमेण श्रद्धामभिप्रायेण मेधां ग्रहणेन संज्ञां नामग्रहणेन स्मृतिं स्मरणेन ह्रियमपत्रपणेन शीलमनुशीलनेन द्वेषं प्रतिषेधेन उपधिमनुबन्धेन धृतिम् अलौल्येन वश्यतां विधेयतया वयोभक्तिसात्म्यव्याधिसमुत्थानानि कालदेशोपशयवेदनाविशेषेण गूढलिङ्गं व्याधिमुपशयानुपशयाभ्यां दोषप्रमाणविशेषम् अपचारविशेषेण आयुषः क्षयमरिष्टैः उपस्थितश्रेयस्त्वं कल्याणाभिनिवेशेन अमलं सत्त्वमविकारेण ग्रहण्यास्तु मृदुदारुणत्वं स्वप्नदर्शनमभिप्रायं द्विष्टेष्टसुखदुःखानि चातुरपरिप्रश्नेनैव विद्यादिति

ime tu khalvanye'pyevameva bhūyo'numānajñeyā bhavanti bhāvāḥ tadyathāgnijaraṇaśaktyā parīkṣeta balaṃ vyāyāmaśaktyā śrotrādīni śabdādyarthagrahaṇena mano'rthāvyabhicaraṇena vijñānaṃ vyavasāyena rajaḥ saṅgena mohamavijñānena krodhamabhidroheṇa śokaṃ dainyena harṣamāmodena prītiṃ toṣeṇa bhayaṃ viṣādena dhairyamaviṣādena vīryamutthānena avasthānamavibhrameṇa śraddhāmabhiprāyeṇa medhāṃ grahaṇena saṃjñāṃ nāmagrahaṇena smṛtiṃ smaraṇena hriyamapatrapaṇena śīlamanuśīlanena dveṣaṃ pratiṣedhena upadhimanubandhena dhṛtim alaulyena vaśyatāṃ vidheyatayā vayobhaktisātmyavyādhisamutthānāni kāladeśopaśayavedanāviśeṣeṇa gūḍhaliṅgaṃ vyādhimupaśayānupaśayābhyāṃ doṣapramāṇaviśeṣam apacāraviśeṣeṇa āyuṣaḥ kṣayamariṣṭaiḥ upasthitaśreyastvaṃ kalyāṇābhiniveśena amalaṃ sattvamavikāreṇa grahaṇyāstu mṛdudāruṇatvaṃ svapnadarśanamabhiprāyaṃ dviṣṭeṣṭasukhaduḥkhāni cāturaparipraśnenaiva vidyāditi

Sanskrit only: no published translation is held for this verse.

भवन्ति चात्र आप्ततश्चोपदेशेन प्रत्यक्षकरणेन च अनुमानेन च व्याधीन् सम्यग्विद्याद्विचक्षणः

bhavanti cātra āptataścopadeśena pratyakṣakaraṇena ca anumānena ca vyādhīn samyagvidyādvicakṣaṇaḥ

Sanskrit only: no published translation is held for this verse.

सर्वथा सर्वमालोच्य यथासंभवम् अर्थवित् अथाध्यवस्येत् तत्त्वे च कार्ये च तदनन्तरम्

sarvathā sarvamālocya yathāsaṃbhavam arthavit athādhyavasyet tattve ca kārye ca tadanantaram

Sanskrit only: no published translation is held for this verse.

कार्यतत्त्वविशेषज्ञः प्रतिपत्तौ न मुह्यति अमूढः फलमाप्नोति यद् अमोहनिमित्तजम्

kāryatattvaviśeṣajñaḥ pratipattau na muhyati amūḍhaḥ phalamāpnoti yad amohanimittajam

Sanskrit only: no published translation is held for this verse.

ज्ञानबुद्धिप्रदीपेन यो नाविशति तत्त्ववित् आतुरस्यान्तरात्मानं न स रोगांश्चिकित्सति

jñānabuddhipradīpena yo nāviśati tattvavit āturasyāntarātmānaṃ na sa rogāṃścikitsati

Sanskrit only: no published translation is held for this verse.

तत्र श्लोकौ सर्वरोगविशेषाणां त्रिविधं ज्ञानसंग्रहम् यथा चोपदिशन्त्याप्ताः प्रत्यक्षं गृह्यते यथा

tatra ślokau sarvarogaviśeṣāṇāṃ trividhaṃ jñānasaṃgraham yathā copadiśantyāptāḥ pratyakṣaṃ gṛhyate yathā

Sanskrit only: no published translation is held for this verse.

ये यथा चानुमानेन ज्ञेयास्तांश्चाप्युदारधीः भावांस्त्रिरोगविज्ञाने विमाने मुनिरुक्तवान्

ye yathā cānumānena jñeyāstāṃścāpyudāradhīḥ bhāvāṃstrirogavijñāne vimāne muniruktavān

Sanskrit only: no published translation is held for this verse.