Caraka-saṃhitā (the text alone) 4.5

अथातः पुरुषविचयं शारीरं व्याख्यास्यामः

athātaḥ puruṣavicayaṃ śārīraṃ vyākhyāsyāmaḥ

Sanskrit only: no published translation is held for this verse.

इति ह स्माह भगवानात्रेयः

iti ha smāha bhagavānātreyaḥ

Sanskrit only: no published translation is held for this verse.

ऽपुरुषो ऽयं लोकसंमितः इत्युवाच भगवान् पुनर्वसुरात्रेयः यावन्तो हि लोके मूर्तिमन्तो भावविशेषास्तावन्तः पुरुषे यावन्तः पुरुषे तावन्तो लोके इत्येवंवादिनं भगवन्तमात्रेयमग्निवेश उवाच नैतावता वाक्येनोक्तं वाक्यार्थमवगाहामहे भगवता बुद्ध्या भूयस्तरमतो ऽनुव्याख्यायमानं शुश्रूषामह इति

'puruṣo 'yaṃ lokasaṃmitaḥ ityuvāca bhagavān punarvasurātreyaḥ yāvanto hi loke mūrtimanto bhāvaviśeṣāstāvantaḥ puruṣe yāvantaḥ puruṣe tāvanto loke ityevaṃvādinaṃ bhagavantamātreyamagniveśa uvāca naitāvatā vākyenoktaṃ vākyārthamavagāhāmahe bhagavatā buddhyā bhūyastaramato 'nuvyākhyāyamānaṃ śuśrūṣāmaha iti

Sanskrit only: no published translation is held for this verse.

तमुवाच भगवानात्रेयः अपरिसंख्येया लोकावयवविशेषाः पुरुषावयवविशेषा अप्यपरिसंख्येयाः तेषां यथास्थूलं कतिचिद्भावान् सामान्यमभिप्रेत्योदाहरिष्यामः तानेकमना निबोध सम्यगुपवर्ण्यमानानग्निवेश षड्धातवः समुदिताः पुरुष इति शब्दं लभन्ते तद्यथा पृथिव्यापस्तेजो वायुराकाशं ब्रह्म चाव्यक्तमिति एत एव च षड्धातवः समुदिताः पुरुष इति शब्दं लभन्ते

tamuvāca bhagavānātreyaḥ aparisaṃkhyeyā lokāvayavaviśeṣāḥ puruṣāvayavaviśeṣā apyaparisaṃkhyeyāḥ teṣāṃ yathāsthūlaṃ katicidbhāvān sāmānyamabhipretyodāhariṣyāmaḥ tānekamanā nibodha samyagupavarṇyamānānagniveśa ṣaḍdhātavaḥ samuditāḥ puruṣa iti śabdaṃ labhante tadyathā pṛthivyāpastejo vāyurākāśaṃ brahma cāvyaktamiti eta eva ca ṣaḍdhātavaḥ samuditāḥ puruṣa iti śabdaṃ labhante

Sanskrit only: no published translation is held for this verse.

तस्य पुरुषस्य पृथिवी मूर्तिः आपः क्लेदः तेजो ऽभिसंतापः वायुः प्राणः वियत् सुषिराणि ब्रह्म अन्तरात्मा यथा खलु ब्राह्मी विभूतिर्लोके तथा पुरुषे ऽप्यान्तरात्मिकी विभूतिः ब्रह्मणो विभूतिर्लोके प्रजापतिरन्तरात्मनो विभूतिः पुरुषे सत्त्वं यस्त्विन्द्रो लोके स पुरुषे ऽहङ्कारः आदित्यस्त्वादानं रुद्रो रोषः सोमः प्रसादः वसवः सुखम् अश्विनौ कान्तिः मरुदुत्साहः विश्वेदेवाः सर्वेन्द्रियाणि सर्वेन्द्रियार्थाश्च तमो मोहः ज्योतिर्ज्ञानं यथा लोकस्य सर्गादिस्तथा पुरुषस्य गर्भाधानं यथा कृतयुगमेवं बाल्यं यथा त्रेता तथा यौवनं यथा द्वापरस्तथा स्थाविर्यं यथा कलिरेवमातुर्यं यथा युगान्तस्तथा मरणमिति एवमेतेनानुमानेनानुक्तानामपि लोकपुरुषयोरवयवविशेषाणामग्निवेश सामान्यं विद्यादिति

tasya puruṣasya pṛthivī mūrtiḥ āpaḥ kledaḥ tejo 'bhisaṃtāpaḥ vāyuḥ prāṇaḥ viyat suṣirāṇi brahma antarātmā yathā khalu brāhmī vibhūtirloke tathā puruṣe 'pyāntarātmikī vibhūtiḥ brahmaṇo vibhūtirloke prajāpatirantarātmano vibhūtiḥ puruṣe sattvaṃ yastvindro loke sa puruṣe 'haṅkāraḥ ādityastvādānaṃ rudro roṣaḥ somaḥ prasādaḥ vasavaḥ sukham aśvinau kāntiḥ marudutsāhaḥ viśvedevāḥ sarvendriyāṇi sarvendriyārthāśca tamo mohaḥ jyotirjñānaṃ yathā lokasya sargādistathā puruṣasya garbhādhānaṃ yathā kṛtayugamevaṃ bālyaṃ yathā tretā tathā yauvanaṃ yathā dvāparastathā sthāviryaṃ yathā kalirevamāturyaṃ yathā yugāntastathā maraṇamiti evametenānumānenānuktānāmapi lokapuruṣayoravayavaviśeṣāṇāmagniveśa sāmānyaṃ vidyāditi

Sanskrit only: no published translation is held for this verse.

एवंवादिनं भगवन्तमात्रेयमग्निवेश उवाच एवम् एतत् सर्वमनपवादं यथोक्तं भगवता लोकपुरुषयोः सामान्यम् किं न्वस्य सामान्योपदेशस्य प्रयोजनमिति

evaṃvādinaṃ bhagavantamātreyamagniveśa uvāca evam etat sarvamanapavādaṃ yathoktaṃ bhagavatā lokapuruṣayoḥ sāmānyam kiṃ nvasya sāmānyopadeśasya prayojanamiti

Sanskrit only: no published translation is held for this verse.

भगवान् उवाच शृण्वग्निवेश सर्वलोकमात्मन्यात्मानं च सर्वलोके सममनुपश्यतः सत्या बुद्धिः समुत्पद्यते सर्वलोकं ह्यात्मनि पश्यतो भवत्यात्मैव सुखदुःखयोः कर्ता नान्य इति कर्मात्मकत्वाच्च हेत्वादिभिर्युक्तः सर्वलोको ऽहमिति विदित्वा ज्ञानं पूर्वमुत्थाप्यते ऽपवर्गायेति तत्र संयोगापेक्षी लोकशब्दः षड्धातुसमुदायो हि सामान्यतः सर्वलोकः

bhagavān uvāca śṛṇvagniveśa sarvalokamātmanyātmānaṃ ca sarvaloke samamanupaśyataḥ satyā buddhiḥ samutpadyate sarvalokaṃ hyātmani paśyato bhavatyātmaiva sukhaduḥkhayoḥ kartā nānya iti karmātmakatvācca hetvādibhiryuktaḥ sarvaloko 'hamiti viditvā jñānaṃ pūrvamutthāpyate 'pavargāyeti tatra saṃyogāpekṣī lokaśabdaḥ ṣaḍdhātusamudāyo hi sāmānyataḥ sarvalokaḥ

Sanskrit only: no published translation is held for this verse.

तस्य हेतुः उत्पत्तिः वृद्धिः उपप्लवः वियोगश्च तत्र हेतुरुत्पत्तिकारणं उत्पत्तिर्जन्म वृद्धिराप्यायनम् उपप्लवो दुःखागमः षड्धातुविभागो वियोगः सजीवापगमः स प्राणनिरोधः स भङ्गः स लोकस्वभावः प्रवृत्तिर्दुःखं निवृत्तिः सुखमिति यज् ज्ञानमुत्पद्यते तत् सत्यम् तस्य हेतुः सर्वलोकसामान्यज्ञानम् एतत्प्रयोजनं सामान्योपदेशस्येति

tasya hetuḥ utpattiḥ vṛddhiḥ upaplavaḥ viyogaśca tatra heturutpattikāraṇaṃ utpattirjanma vṛddhirāpyāyanam upaplavo duḥkhāgamaḥ ṣaḍdhātuvibhāgo viyogaḥ sajīvāpagamaḥ sa prāṇanirodhaḥ sa bhaṅgaḥ sa lokasvabhāvaḥ pravṛttirduḥkhaṃ nivṛttiḥ sukhamiti yaj jñānamutpadyate tat satyam tasya hetuḥ sarvalokasāmānyajñānam etatprayojanaṃ sāmānyopadeśasyeti

Sanskrit only: no published translation is held for this verse.

अथाग्निवेश उवाच किंमूला भगवन् प्रवृत्तिः निवृत्तौ च क उपाय इति

athāgniveśa uvāca kiṃmūlā bhagavan pravṛttiḥ nivṛttau ca ka upāya iti

Sanskrit only: no published translation is held for this verse.

भगवान् उवाच मोहेच्छाद्वेषकर्ममूला प्रवृत्तिः तज्जा ह्यहङ्कारसङ्गसंशयाभिसंप्लवाभ्यवपातविप्रत्ययाविशेषानुपायास् तरुणमिव द्रुममतिविपुलशाखास्तरवो ऽभिभूय पुरुषमवतत्यैवोत्तिष्ठन्ते यैरभिभूतो न सत्तामतिवर्तते तत्रैवंजातिरूपवित्तवृत्तबुद्धिशीलविद्याभिजनवयोवीर्यप्रभावसंपन्नो ऽहमित्यहङ्कारः यन् मनोवाक्कायकर्म नापवर्गाय स सङ्गः कर्मफलमोक्षपुरुषप्रेत्यभावादयः सन्ति वा नेति संशयः सर्वावस्थास्व् अनन्यो ऽहमहं स्रष्टा स्वभावसंसिद्धो ऽहमहं शरीरेन्द्रियबुद्धिस्मृतिविशेषराशिरिति ग्रहणमभिसंप्लवः मम मातृपितृभ्रातृदारापत्यबन्धुमित्रभृत्यगणो गणस्य चाहम् इत्यभ्यवपातः कार्याकार्यहिताहितशुभाशुभेषु विपरीताभिनिवेशो विप्रत्ययः ज्ञाज्ञयोः प्रकृतिविकारयोः प्रवृत्तिनिवृत्त्योश्च सामान्यदर्शनमविशेषः प्रोक्षणानशनाग्निहोत्रत्रिषवणाभ्युक्षणावाहनयाजनयजनयाचनसलिलहुताशनप्रवेशादयः समारम्भाः प्रोच्यन्ते ह्यनुपायाः एवम् अयम् अधीधृतिस्मृतिरहङ्काराभिनिविष्टः सक्तः ससंशयो ऽभिसंप्लुतबुद्धिर् अभ्यवपतितो ऽन्यथादृष्टिरविशेषग्राही विमार्गगतिर्निवासवृक्षः सत्त्वशरीरदोषमूलानां सर्वदुःखानां भवति एवमहङ्कारादिभिर्दोषैर्भ्राम्यमाणो नातिवर्तते प्रवृत्तिं सा च मूलमघस्य

bhagavān uvāca mohecchādveṣakarmamūlā pravṛttiḥ tajjā hyahaṅkārasaṅgasaṃśayābhisaṃplavābhyavapātavipratyayāviśeṣānupāyās taruṇamiva drumamativipulaśākhāstaravo 'bhibhūya puruṣamavatatyaivottiṣṭhante yairabhibhūto na sattāmativartate tatraivaṃjātirūpavittavṛttabuddhiśīlavidyābhijanavayovīryaprabhāvasaṃpanno 'hamityahaṅkāraḥ yan manovākkāyakarma nāpavargāya sa saṅgaḥ karmaphalamokṣapuruṣapretyabhāvādayaḥ santi vā neti saṃśayaḥ sarvāvasthāsv ananyo 'hamahaṃ sraṣṭā svabhāvasaṃsiddho 'hamahaṃ śarīrendriyabuddhismṛtiviśeṣarāśiriti grahaṇamabhisaṃplavaḥ mama mātṛpitṛbhrātṛdārāpatyabandhumitrabhṛtyagaṇo gaṇasya cāham ityabhyavapātaḥ kāryākāryahitāhitaśubhāśubheṣu viparītābhiniveśo vipratyayaḥ jñājñayoḥ prakṛtivikārayoḥ pravṛttinivṛttyośca sāmānyadarśanamaviśeṣaḥ prokṣaṇānaśanāgnihotratriṣavaṇābhyukṣaṇāvāhanayājanayajanayācanasalilahutāśanapraveśādayaḥ samārambhāḥ procyante hyanupāyāḥ evam ayam adhīdhṛtismṛtirahaṅkārābhiniviṣṭaḥ saktaḥ sasaṃśayo 'bhisaṃplutabuddhir abhyavapatito 'nyathādṛṣṭiraviśeṣagrāhī vimārgagatirnivāsavṛkṣaḥ sattvaśarīradoṣamūlānāṃ sarvaduḥkhānāṃ bhavati evamahaṅkārādibhirdoṣairbhrāmyamāṇo nātivartate pravṛttiṃ sā ca mūlamaghasya

Sanskrit only: no published translation is held for this verse.

निवृत्तिरपवर्गः तत् परं प्रशान्तं तत्तदक्षरं तद्ब्रह्म स मोक्षः

nivṛttirapavargaḥ tat paraṃ praśāntaṃ tattadakṣaraṃ tadbrahma sa mokṣaḥ

Sanskrit only: no published translation is held for this verse.

तत्र मुमुक्षूणामुदयनानि व्याख्यास्यामः तत्र लोकदोषदर्शिनो मुमुक्षोरादित एवाचार्याभिगमनं तस्योपदेशानुष्ठानम् अग्नेरेवोपचर्या धर्मशास्त्रानुगमनं तदार्थावबोधः तेनावष्टम्भः तत्र यथोक्ताः क्रियाः सतामुपासनम् असतां परिवर्जनम् असंगतिर्जनेन सत्यं सर्वभूतहितम् अपरुषम् अनतिकाले परीक्ष्य वचनं सर्वप्राणिषु चात्मनीवावेक्षा सर्वासाम् अस्मरणम् असंकल्पनम् अप्रार्थनम् अनभिभाषणं च स्त्रीणां सर्वपरिग्रहत्यागः कौपीनं प्रच्छादनार्थं धातुरागनिवसनं कन्थासीवनहेतोः सूचीपिप्पलकं शौचाधानहेतोर्जलकुण्डिका दण्डधारणं भैक्षचर्यार्थं पात्रं प्राणधारणार्थमेककालमग्राम्यो यथोपपन्नो ऽभ्यवहारः श्रमापनयनार्थं शीर्णशुष्कपर्णतृणास्तरणोपधानं ध्यानहेतोः कायनिबन्धनं वनेष्वनिकेतवासः तन्द्रानिद्रालस्यादिकर्मवर्जनं इन्द्रियार्थेष्वनुरागोपतापनिग्रहः सुप्तस्थितगतप्रेक्षिताहारविहारप्रत्यङ्गचेष्टादिकेष्वारम्भेषु स्मृतिपूर्विका प्रवृत्तिः सत्कारस्तुतिगर्हावमानक्षमत्वं क्षुत्पिपासायासश्रमशीतोष्णवातवर्षासुखदुःखसंस्पर्शसहत्वं शोकदैन्यमानोद्वेगमदलोभरागेर्ष्याभयक्रोधादिभिर् असंचलनम् अहङ्कारादिषूपसर्गसंज्ञा लोकपुरुषयोः सर्गादिसामान्यावेक्षणं कार्यकालात्ययभयं योगारम्भे सततमनिर्वेदः सत्त्वोत्साहः अपवर्गाय धीधृतिस्मृतिबलाधानं नियमनमिन्द्रियाणां चेतसि चेतस आत्मनि आत्मनश्च धातुभेदेन शरीरावयवसंख्यानमभीक्ष्णं सर्वं कारणवद्दुःखमस्वमनित्यमित्यभ्युपगमः सर्वप्रवृत्तिष्वघसंज्ञा सर्वसंन्यासे सुखमित्यभिनिवेशः एष मार्गो ऽपवर्गाय अतो ऽन्यथा बध्यते इत्युदयनानि व्याख्यातानि

tatra mumukṣūṇāmudayanāni vyākhyāsyāmaḥ tatra lokadoṣadarśino mumukṣorādita evācāryābhigamanaṃ tasyopadeśānuṣṭhānam agnerevopacaryā dharmaśāstrānugamanaṃ tadārthāvabodhaḥ tenāvaṣṭambhaḥ tatra yathoktāḥ kriyāḥ satāmupāsanam asatāṃ parivarjanam asaṃgatirjanena satyaṃ sarvabhūtahitam aparuṣam anatikāle parīkṣya vacanaṃ sarvaprāṇiṣu cātmanīvāvekṣā sarvāsām asmaraṇam asaṃkalpanam aprārthanam anabhibhāṣaṇaṃ ca strīṇāṃ sarvaparigrahatyāgaḥ kaupīnaṃ pracchādanārthaṃ dhāturāganivasanaṃ kanthāsīvanahetoḥ sūcīpippalakaṃ śaucādhānahetorjalakuṇḍikā daṇḍadhāraṇaṃ bhaikṣacaryārthaṃ pātraṃ prāṇadhāraṇārthamekakālamagrāmyo yathopapanno 'bhyavahāraḥ śramāpanayanārthaṃ śīrṇaśuṣkaparṇatṛṇāstaraṇopadhānaṃ dhyānahetoḥ kāyanibandhanaṃ vaneṣvaniketavāsaḥ tandrānidrālasyādikarmavarjanaṃ indriyārtheṣvanurāgopatāpanigrahaḥ suptasthitagataprekṣitāhāravihārapratyaṅgaceṣṭādikeṣvārambheṣu smṛtipūrvikā pravṛttiḥ satkārastutigarhāvamānakṣamatvaṃ kṣutpipāsāyāsaśramaśītoṣṇavātavarṣāsukhaduḥkhasaṃsparśasahatvaṃ śokadainyamānodvegamadalobharāgerṣyābhayakrodhādibhir asaṃcalanam ahaṅkārādiṣūpasargasaṃjñā lokapuruṣayoḥ sargādisāmānyāvekṣaṇaṃ kāryakālātyayabhayaṃ yogārambhe satatamanirvedaḥ sattvotsāhaḥ apavargāya dhīdhṛtismṛtibalādhānaṃ niyamanamindriyāṇāṃ cetasi cetasa ātmani ātmanaśca dhātubhedena śarīrāvayavasaṃkhyānamabhīkṣṇaṃ sarvaṃ kāraṇavadduḥkhamasvamanityamityabhyupagamaḥ sarvapravṛttiṣvaghasaṃjñā sarvasaṃnyāse sukhamityabhiniveśaḥ eṣa mārgo 'pavargāya ato 'nyathā badhyate ityudayanāni vyākhyātāni

Sanskrit only: no published translation is held for this verse.

भवन्ति चात्र एतैर् अविमलं सत्त्वं शुद्ध्युपायैर्विशुध्यति मृज्यमान इवादर्शस्तैलचेलकचादिभिः

bhavanti cātra etair avimalaṃ sattvaṃ śuddhyupāyairviśudhyati mṛjyamāna ivādarśastailacelakacādibhiḥ

Sanskrit only: no published translation is held for this verse.

ग्रहाम्बुदरजोधूमनीहारैर् असमावृतम् यथार्कमण्डलं भाति भाति सत्त्वं तथामलम्

grahāmbudarajodhūmanīhārair asamāvṛtam yathārkamaṇḍalaṃ bhāti bhāti sattvaṃ tathāmalam

Sanskrit only: no published translation is held for this verse.

ज्वलत्यात्मनि संरुद्धं तत् सत्त्वं संवृतायने शुद्धः स्थिरः प्रसन्नार्चिर्दीपो दीपाशये यथा

jvalatyātmani saṃruddhaṃ tat sattvaṃ saṃvṛtāyane śuddhaḥ sthiraḥ prasannārcirdīpo dīpāśaye yathā

Sanskrit only: no published translation is held for this verse.

यया भिनत्त्यतिबलं महामोहमयं तमः

yayā bhinattyatibalaṃ mahāmohamayaṃ tamaḥ

Sanskrit only: no published translation is held for this verse.

सर्वभावस्वभावज्ञो यया भवति निःस्पृहः योगं यया साधयते सांख्यः सम्पद्यते यया

sarvabhāvasvabhāvajño yayā bhavati niḥspṛhaḥ yogaṃ yayā sādhayate sāṃkhyaḥ sampadyate yayā

Sanskrit only: no published translation is held for this verse.

यया नोपैत्यहङ्कारं नोपास्ते कारणं यया यया नालम्बते किंचित् सर्वं संन्यस्यते यया

yayā nopaityahaṅkāraṃ nopāste kāraṇaṃ yayā yayā nālambate kiṃcit sarvaṃ saṃnyasyate yayā

Sanskrit only: no published translation is held for this verse.

याति ब्रह्म यया नित्यमजरं शान्तम् अव्ययम् विद्या सिद्धिर्मतिर्मेधा प्रज्ञा ज्ञानं च सा मता

yāti brahma yayā nityamajaraṃ śāntam avyayam vidyā siddhirmatirmedhā prajñā jñānaṃ ca sā matā

Sanskrit only: no published translation is held for this verse.

लोके विततमात्मानं लोकं चात्मनि पश्यतः परावरदृशः शान्तिर् ज्ञानमूला न नश्यति

loke vitatamātmānaṃ lokaṃ cātmani paśyataḥ parāvaradṛśaḥ śāntir jñānamūlā na naśyati

Sanskrit only: no published translation is held for this verse.

पश्यतः सर्वभावान् हि सर्वावस्थासु सर्वदा ब्रह्मभूतस्य संयोगो न शुद्धस्योपपद्यते

paśyataḥ sarvabhāvān hi sarvāvasthāsu sarvadā brahmabhūtasya saṃyogo na śuddhasyopapadyate

Sanskrit only: no published translation is held for this verse.

नात्मनः करणाभावाल्लिङ्गमप्युपलभ्यते स सर्वकरणायोगान्मुक्त इत्यभिधीयते

nātmanaḥ karaṇābhāvālliṅgamapyupalabhyate sa sarvakaraṇāyogānmukta ityabhidhīyate

Sanskrit only: no published translation is held for this verse.

विपापं विरजः शान्तं परमक्षरमव्ययम् अमृतं ब्रह्म निर्वाणं पर्यायैः शान्तिरुच्यते

vipāpaṃ virajaḥ śāntaṃ paramakṣaramavyayam amṛtaṃ brahma nirvāṇaṃ paryāyaiḥ śāntirucyate

Sanskrit only: no published translation is held for this verse.

एतत्तत् सौम्य विज्ञानं यज्ज्ञात्वा मुक्तसंशयाः मुनयः प्रशमं जग्मुर्वीतमोहरजःस्पृहाः

etattat saumya vijñānaṃ yajjñātvā muktasaṃśayāḥ munayaḥ praśamaṃ jagmurvītamoharajaḥspṛhāḥ

Sanskrit only: no published translation is held for this verse.

तत्र श्लोकौ सप्रयोजनमुद्दिष्टं लोकस्य पुरुषस्य च सामान्यं मूलमुत्पत्तौ निवृत्तौ मार्ग एव च

tatra ślokau saprayojanamuddiṣṭaṃ lokasya puruṣasya ca sāmānyaṃ mūlamutpattau nivṛttau mārga eva ca

Sanskrit only: no published translation is held for this verse.

शुद्धसत्त्वसमाधानं सत्या बुद्धिश्च नैष्ठिकी विचये पुरुषस्योक्ता निष्ठा च परमर्षिणा

śuddhasattvasamādhānaṃ satyā buddhiśca naiṣṭhikī vicaye puruṣasyoktā niṣṭhā ca paramarṣiṇā

Sanskrit only: no published translation is held for this verse.