Dvavimsatyavadanakatha 4

अन्नपानशयनासनसंपद् रत्नमाल्यवसनाभरणानि । कीर्तिर् उत्तमगुणाश् च युवत्यो दानतः कथितम् एतद् अशेषम्

annapānaśayanāsanasaṃpad ratnamālyavasanābharaṇāni / kīrtir uttamaguṇāś ca yuvatyo dānataḥ kathitam etad aśeṣam

Sanskrit only: no published translation is held for this verse.

आज्ञादीप्तिर् भोगसंपत् प्रकृष्टा रूपौदार्यं वर्णमाधुर्यम् ओजः । वाक्षौभाग्यं कान्तिर् आरोग्यम् आयुर् एतद् दानाद् इष्टम् इष्टण् फलं च

ājñādīptir bhogasaṃpat prakṛṣṭā rūpaudāryaṃ varṇamādhuryam ojaḥ / vākṣaubhāgyaṃ kāntir ārogyam āyur etad dānād iṣṭam iṣṭaṇ phalaṃ ca

Sanskrit only: no published translation is held for this verse.

अश्वाः क्षौमाणि नागा बहुकुसुमसितं चामरं चातपत्रं सौधं संगीतिगर्भं मधुपटहरवाः पुष्पमाला युवत्यः । भोज्यं रत्नादिहाराः पुरनगरमही चेशिता देवलोकं संबुद्धत्वं च बुद्धैः कथितम् इह फलं दानकल्पद्रुमस्य

aśvāḥ kṣaumāṇi nāgā bahukusumasitaṃ cāmaraṃ cātapatraṃ saudhaṃ saṃgītigarbhaṃ madhupaṭaharavāḥ puṣpamālā yuvatyaḥ / bhojyaṃ ratnādihārāḥ puranagaramahī ceśitā devalokaṃ saṃbuddhatvaṃ ca buddhaiḥ kathitam iha phalaṃ dānakalpadrumasya

Sanskrit only: no published translation is held for this verse.

यन् नीलोत्पलकोमलामलदलप्रस्पर्धिनेत्राः स्त्रियश् चञ्चन्मेखलचुम्बितोरुजघना विस्रस्तरक्तांशुकाः । दास्यं यान्ति विकम्पितस्तनतटा व्यावल्गितभ्रूलतास् तन् मात्सर्यकपाटपाटनपटोर् दानस्य विस्फूर्जितम्

yan nīlotpalakomalāmaladalapraspardhinetrāḥ striyaś cañcanmekhalacumbitorujaghanā visrastaraktāṃśukāḥ / dāsyaṃ yānti vikampitastanataṭā vyāvalgitabhrūlatās tan mātsaryakapāṭapāṭanapaṭor dānasya visphūrjitam

Sanskrit only: no published translation is held for this verse.

अश्वैश् चामरभारनामितशिरोरूपैः खलीनोन्मुखैर् नागैर् भिन्नमदैश् च यन् नरवरा गच्छन्ति छत्त्रोच्छ्रयैः । भृत्यैः साभरणैः कृताञ्जलिपुटैर् अभ्यर्च्यमानाः सदा तद् दानस्य फलं वदन्ति मुनयः पूर्वार्जितस्येदृशम्

aśvaiś cāmarabhāranāmitaśirorūpaiḥ khalīnonmukhair nāgair bhinnamadaiś ca yan naravarā gacchanti chattrocchrayaiḥ / bhṛtyaiḥ sābharaṇaiḥ kṛtāñjalipuṭair abhyarcyamānāḥ sadā tad dānasya phalaṃ vadanti munayaḥ pūrvārjitasyedṛśam

Sanskrit only: no published translation is held for this verse.

हारैर् वज्रविचित्रहेमवलयैर् यत् पार्थिवा भूषिताः केयूरैर् मुकुटैश् च रत्नखचितैः सिंहासनस्थाः सदा । मध्ये ऽन्तःपुरिकाजनस्य विविधैः क्रीडन्ति विक्रीडितैस् तद् दानस्य फलम् वदन्ति मुनयः शार्दूलविक्रीडितम्

hārair vajravicitrahemavalayair yat pārthivā bhūṣitāḥ keyūrair mukuṭaiś ca ratnakhacitaiḥ siṃhāsanasthāḥ sadā / madhye 'ntaḥpurikājanasya vividhaiḥ krīḍanti vikrīḍitais tad dānasya phalam vadanti munayaḥ śārdūlavikrīḍitam

Sanskrit only: no published translation is held for this verse.

प्रासादे मणिरत्नहेमखचिते छत्त्रध्वजालंकृते वीनावल्लरिवेणुगीतमुदिते रत्नप्रभोद्भासिते । यच् छक्रो रमते शचीसहचरो योषित्सहस्राकुले तद् दानस्य फलं वदन्ति मुनयः पूर्वार्जितस्येदृशम्

prāsāde maṇiratnahemakhacite chattradhvajālaṃkṛte vīnāvallariveṇugītamudite ratnaprabhodbhāsite / yac chakro ramate śacīsahacaro yoṣitsahasrākule tad dānasya phalaṃ vadanti munayaḥ pūrvārjitasyedṛśam

Sanskrit only: no published translation is held for this verse.

दाता प्रियत्वम् उपयाति जनस्य शश्वत् संसेव्यते च बहुभिः समुपेत्य सद्भिः । कीर्तिश् च दिक्षु विसरत्य् अमलं यशो ऽस्य तत् तत् पदं समुपयाति विशारदो ऽसौ

dātā priyatvam upayāti janasya śaśvat saṃsevyate ca bahubhiḥ samupetya sadbhiḥ / kīrtiś ca dikṣu visaraty amalaṃ yaśo 'sya tat tat padaṃ samupayāti viśārado 'sau

Sanskrit only: no published translation is held for this verse.

भेदात् कायस्य देवेष्व् अविकलविविधोत्तप्तभोगास्पदेषु प्राप्योत्पत्तिं विचित्रस्तबककुसुमितस्फीतकल्पद्रुमेषु । उद्यानेषु प्रकामं सुचिरम् अतिसुखं नन्दनादिष्व् अखिन्नः प्राप्नोत्य् उत्कृष्टरूपामरयुवतिजनैः सेव्यमानः प्रदानात्

bhedāt kāyasya deveṣv avikalavividhottaptabhogāspadeṣu prāpyotpattiṃ vicitrastabakakusumitasphītakalpadrumeṣu / udyāneṣu prakāmaṃ suciram atisukhaṃ nandanādiṣv akhinnaḥ prāpnoty utkṛṣṭarūpāmarayuvatijanaiḥ sevyamānaḥ pradānāt

Sanskrit only: no published translation is held for this verse.

दानं नाम महानिधानम् अनुगं चौराद्यसाधारणं दानं मत्सरलोभदोषरजसः प्रक्षालनं चेतसः । संसाराध्वपरिश्रमापनयनं दानं सुखं वाहनं दानम् नैकसुखोपभोगसुमुखं सन्मित्रम् आत्यन्तिकम्

dānaṃ nāma mahānidhānam anugaṃ caurādyasādhāraṇaṃ dānaṃ matsaralobhadoṣarajasaḥ prakṣālanaṃ cetasaḥ / saṃsārādhvapariśramāpanayanaṃ dānaṃ sukhaṃ vāhanaṃ dānam naikasukhopabhogasumukhaṃ sanmitram ātyantikam

Sanskrit only: no published translation is held for this verse.

श्रोणीसंगतमेखलाः कलगिरो लीलाचलैकभ्रुवः कर्णासन्नविशालचारुनयाः केशान्तसक्तस्रजः । यद् दास्यं स्वयम् अङ्गनाः सुकृतिनाम् आयान्ति पीनोरवस् तन् माहात्म्यम् उवाच संभृतफलं दानस्य शौद्धोदनिः

śroṇīsaṃgatamekhalāḥ kalagiro līlācalaikabhruvaḥ karṇāsannaviśālacārunayāḥ keśāntasaktasrajaḥ / yad dāsyaṃ svayam aṅganāḥ sukṛtinām āyānti pīnoravas tan māhātmyam uvāca saṃbhṛtaphalaṃ dānasya śauddhodaniḥ

Sanskrit only: no published translation is held for this verse.

पर्यस्यत्सहकारभङ्गसुरभि प्रेङ्खन्निमग्नोत्पलं श्रीमत्काञ्चनभाजने विनिहितं भन्धूकताम्रं मधु । कामिन्या शपथोपनीतम् असकृद् यत् पीयते कामिना हेतुं तत्र वदन्ति शुद्धमतयो दानं परं श्रेयसः

paryasyatsahakārabhaṅgasurabhi preṅkhannimagnotpalaṃ śrīmatkāñcanabhājane vinihitaṃ bhandhūkatāmraṃ madhu / kāminyā śapathopanītam asakṛd yat pīyate kāminā hetuṃ tatra vadanti śuddhamatayo dānaṃ paraṃ śreyasaḥ

Sanskrit only: no published translation is held for this verse.

इति दानगुणान् निशम्य सौम्य प्रयतात्मा कुरु दान एव यत्नम् । त्रिभवाग्रमहाभये नराणां न हि दानात् परम् अस्ति बन्धुर् अन्यः

iti dānaguṇān niśamya saumya prayatātmā kuru dāna eva yatnam / tribhavāgramahābhaye narāṇāṃ na hi dānāt param asti bandhur anyaḥ

Sanskrit only: no published translation is held for this verse.